المركز المصري للحقوق الاقتصادية والاجتماعية يستقبل شكاوي العمال الفلسطينيين والسودانيين

من مدونة مالك مصطفى

رجاء النشر على اوسع نطاق، خدوا كوبي من عندي وانشروها على مدوناتكم:

قام المركز المصري للحقوق الاقتصادية والاجتماعية
ecesr.com
بمقابلة وزير القوى العاملة احمد البرعي, بناء ع شكاوي عديدة وصلت للمركز عن ظروف عمل مجحفه لاشقاء فلسطينيين وسودانيين, وقد تعهد السيد احمد البرعي, بحل كل تلك المشكلات.
وعليه يتقدم المركز لكل الاشقاء الذين لديهم مشاكل خاصة بظروف العمل التقدم بشكاوي مكتوبه له لحلها.
عنوان المركز
1ش سوق التوفيقية وسط البلد الدور الرابع القاهرة

عمال امنستوا اضربوا واتقبض عليهم بعد ما بيوتهم اتخربت

تحديث:
اخلاء سبيل العمال
تحديث:

عمال امنيسيتو المؤكد وجودهم في قسم السيدة:سيد نوفل, مصطفى عبدالصبور, ابراهيم السيد, محمد الصاوي, سيد ولم يستدل ع الاسم الثاني له. المصدر مالك مصطفى

تحديث:

عمال النوبارية يفضون اعتصامهم اليوم, بسبب ضغوط امنيه, بعد احداث امنيسيتو اليوم. المصدر مالك على التويتر

تحديث:

شرطة السيدة زينب, تمنع حتى المحاميين من دخول قسم السيدة زينب للتواجد مع عمال امنيسيتو. المصدر مالك على التويتر

 تحديث:
الصور
تحديث:
انا زهقت من كتر العياط، الحمد لله على كل حال واللهم لا اعتراض
نص الخبر في الالمانية هنا
وستة ابريل نزلت الخبر هنا
اقروا الاخبار لان فيها تفاصيل انا مش قادرة اعيدها........ عشان باعيط
الناس تتهان وتتشتم وتنضرب وتتسرق وحتى يتمنعوا انهم يناموا في الشارع
حسبنا الله ونعم الوكيل
وبصراحة بقى... منك لله يا مصر

مصدر الخبر

وده نص الخبر

تم إلقاء القبض علي سبعة من عمال أمنسيتو وهم محتجزون الآن في قسم السيدة زينب
ومن بين المقبوض عليهم مصطفي عبد الصبور وصابر عبد القوي وإبراهيم السيد وسيد نوفل ومحمد الصاوي
كما تم القبض علي مصطفي بهجت ، مصور صحفي بالمصري اليوم ولم يتم الإفراج عنه الإبعد تفريغ الكاميرا من الصور
وأَصيب رجب خضر الخولي وتم نقله إلي مستشفي المنيرة وأخذ ثلاث غرز ، كما أَصيب عصام محمد عبد الحميد بكدمات دموية إثر ضربه بعصا
وحاليا قام جزء من العمال بالتوجه إلي بنك مصر وسط حصار أمني كثيف ولا يزال الجزء الاخر من العمال معتصمين أمام مجلس الشعب
----------
غطيني يا صفية

عاجل: القبض على عصام شعبان وحمادة الكاشف, اثناء تعليقهم ملصقات للدعوة لإعتصام 2 مايو

تحديث الساعة 1:11 27 ابريل 2010
العيال خرجوا الحمد لله
وده نص تويتة مالك:
أسف للتوترات اخلاء سبيلهم من قسم عابدين خلاص وهم ع الاسفلت واضح ان الزفه جابت نتيجه وقالوا لم الدور ياجدع

تحديث الساعة 00:57 27 ابريل 2010
اعلان الطوارئ بمركزي هشام مبارك و المصري للحقوق الاقتصادية, وعلى المحامين الراغبين في التطوع الحضور باكرا غدا, الدعوة بعد قليل على الموقعين
تحديث الساعة 00:53 27 ابريل 2010
وصول المحامين لقسم عابدين, والقسم يخبرهم بعدم وجودهم لديه, وذلك يعني انهم تم ترحيلهم لأمن الدولة
من مالك برضه
---------------
الخبر لسه جاي على التويتر من مالك

ليه فيه ناس بتحب الكاميرات اكتر من البني ادمين؟

يوم 2 مايو هو يوم مطالبتنا كلنا كمواطنين عاملين بحقنا في تنفيذ حكم قضائي لصالحنا بوضع حد ادنى للاجور

وحيبقى قدام مجلس الوزرا

اعتصام

مش مسيرة

اعتصام

مش مسيرة

اعتصام

مش مسيرة

والمطلب: تنفيذ الحكم القضائي بوضع حد ادنى للاجور او المطالبة باستقالة حكومة نظيف

وعايزين كلنا نروح الوقفة دي لان ده اكل عيشنا واللي عايز ينزل يتضامن معانا من الناس اللي ما عندهاش معاناة في اكل العيش يتشال على العين والراس، في المطلب ده

عشان احنا ناس غلابة، والناس الغلابة فاتحة بيوت ونازلة عشان اكل عيشها

ليه ناس عايزة تركب على كتاف الغلابة وتضرب لهم اليوم اللي بيحضروا له بقالهم شهر ويعرضوهم للخطر؟ 

ليه؟

ليه؟ 

ليه؟ 

ليه فيه ناس ما يهمهاش غير انها تطلع تتصور في التلفزيون وفي الجرايد وتسجل مواقف على قفا غيرها؟

ليه فيه ناس عشان مش عارفين يحشدوا الناس ويكسبوهم لصفهم بيركبوا على كتاف شغل ناس تانية في قضية تانية؟

تعديل دستوري ايه؟ الوقفة دي مش عشان التعديل الدستوري دي عشان الحد الادنى للاجور، دي عشان اكل العيال وكسوة الصيف والشتا ومصاريف المدارس والمواصلات

احنا مطلبنا مشروع، وواخدين بيه حكم قضائي، ومش عايزين اي حاجة وحشة تحصل، وماحدش يقدر يمسك علينا حاجة، لان دي وقفة سلمية وفي ايدنا ورقة مختومة بختم النسر

ليه الناس يدوا فرصة للامن انه يدبح الناس في الشارع عشان يطلعوا هم في الجزيرة يمسحوا دموعهم يا امال؟

وليه يشتتوا الناس؟ الوقفة قدام مجلس الوزرا

مكرم عبيد ايه اللي حيعملوا منه مسيرة لحد مجلس الشعب؟ هم بيصيعوا وللا بيهرجوا وللا بيستعرضوا وللا متعمدين يضربوا اليوم؟ 

وعلى راي ابراهيم الابيض: بعتني بكام يا عشري؟

اعتصام الحد الأدنى من الاجور يوم 2 مايو

اعتصام اتنين مايو للاستجابة للامر القضائي او الحكومة دي تقدم استقالتها

دي المجموعة على الفيس بوك

العمال واخدين حكم قضائي لالزام الحكومة بوضع حد ادنى للاجور... والحكومة كسرت كلام القضاء، والعمال ناويين يعتصموا اعتصام مفتوح بداية من اتنين مايو عشان حكومة نظيف تنفذ الحكم او تستقيل

وانا مع العمال ان شاء الله

وانتوا كمان لازم تبقوا مع العمال... شاركوا معانا عشان نبقى احنا السلطة التنفيذية للقضاء

العمال اجدع ناس.. ولازلت مصممة انهم مبروكين ومكشوف عنهم الحجاب

عشان العمال هي الفئة الوحيدة اللي بتحافظ لنا على بلدنا على ارض الواقع ما نصحاش نلاقي نفسنا بنلم بؤجتنا ورايحين لاجئين عند الجيران لان البلد اتباعت والشاري عايز يقلب البلد مول

ماحدش ماسك في البلد غيرهم، واحنا لازم نمسك معاهم... دلوقت اللي العمال بيعملوه هنا في مصر زي اللي حزب الله بيعمله على حدود لبنان بالظبط.. مافيش اي فرق

وقفة تضامنية مع عمال طنطا

بكرة ان شاء الله الساعة حداشر الصبح امام مجلس الشعب وقفة تضامنية مع عمال طنطا للكتان

مؤتمر للتضامن مع عمال طنطا للكتان

النهاردة الساعة ستة مساء في نقابة الصحفيين

والنبي والنبي تيجوا، دي ناس غلابة ومحتاجين يحسوا ان فيه حد معاهم

العمال اكتر ناس في الدنيا تستاهل التضامن.. تتضامن كده وانت مغمض عينيك عشان دايما قضيتهم عادلة

-----

قضية اسماء اتحجزت للحكم واحنا مستنيين ايمان تنزل الفيديوهات وتكتب بوست

يا نظيف اصحى وفوق ح ترجع بينا لعصر فاروق

اللهم صلي ع النبي، اللهم صلي ع النبي، الله اكبر عليهم

الا هو مافيش حد بيفهم في البلد دي غير العمال.. احنا نولع في نفسنا ونسيب البلد للعمال يمكن يعرفوا يعملوا فيها حاجة

عايزة اعرف مين اللي بيعملهم الهتافات العميقة دي؟  في هتاف واحد بيلخصوا وبيحسموا كل الطنطنات بتاعة المثقفين والريبراريين والمطبعين وخلافه

"يا نظيف اصحى وفوق ح ترجع بينا لعصر فاروق"

لا نفع مع العمال غسيل مخ ولا مسلسلات فاشلة تأليف دكتورة ما فلحتش في الطب فقررت تتحفنا بانها تشرح دماغنا

وبيهددوا بنقل اعتصامهم للرياسة

اعتصام 400 من عمال طنطا للكتان

تحديث:
هو فيه ايه النهاردة؟



تحديث:
من عند خالد علي والمركز بتاعه اسمه المركز المصري للحقوق الاقتصادية والاجتماعية
طب بذمة النبي يا خالد ده اسم يتحفظ؟
عموما ده النص والصور عنده على الفيس بوك
الشرطة تتدخل لفض اعتصام طنطا بالقوة




10 فبراير2010
فى الساعة الرابعة والنصف عصر اليوم قامت قوات الشرطة بمحاولة اقتحام اعتصام عمال طنطا للكتان بشاع حسين حجازى أمام مجلس الوزراء بوسط القاهرة، وهو الإعتصام الذى قام به العمال منذ صباح يوم 8 فبراير واستمر لليوم الثالث على التوالى احتجاجا على سياسات المستثمر السعودى عبد الله الكحكى الذى أغلق الشركة، واعتراضا على تجاهل وزارتى الإستثمار والقوى العاملة لمطالبهم، وكذلك تقاعس الإتحاد العام ونقابة النسيج.
ومنذ بداية الإعتصام كانت قوات الشرطة تقف على الحياد الإ أنها وعلى حين غره قامت فى الساعة الرابعة والنصف بالإعتداء بالضرب على العمال وتكسير واتلاف ما معهم من محتويات لمحاولة فض الإعتصام بالقوة، وتسببوا فى اصابة هشام أبو زيد القيادى العمالى بالشركة ، كما ألقو القبض على اثنين من شباب حركة تضامن وهم محمد ناجى وخالد السيد وهم الآن محتجزين بعربات شرطة تحمل أرقام 39789، كما تعرض الصحفيين جيهان شعبان وهشام فؤاد، والباحثة فاطمة رمضان للإعتداء بالضرب والسب أثناء متابعتهم للإعتصام وتم إبعادهم عن شارع حسين حجازى بالقوة .
وقد جاء هذا التدخل بعد تغيير العمال لهتافاتهم حيث كانوا طوال الأيام الماضية يرددون شعارات لا تهاجم الحكومة ولكنهم اليوم رفعوا هتافات " بالروح والدم رزق عيالنا أهم"، " تسقط حكومة الحزب الوطنى" " يا علاء قول لابوك العمال بيكرهوك" ، وحتى صدور هذا البيان عجزت الشرطة عن فض الإعتصام رغم كل هذه الاعتداءات الإ أنه شوهدت عربات من قوات الشرطة تتوافد وتتزايد على مكان الاعتصام .
ومن الجدير بالذكر ان مطالب العمال فى الاعتصام
1- صرف الارباح.
2- ربط الحافز بأجر 2008
3- رفع بدل الوجبة من 32 حتى 90 جنيه
4- إقرار العلاوة الدورية ب 10%
5- تثبيت العمالة المؤقتة
6- تسديد حصة التأمينات للعمال عن فترة الاضراب من مايو 2009 حتى نوفمبر 2009
والمركز المصرى للحقوق الاقتصادية والاجتماعية إذ يعلن تضامنه مع عمال طنطا للكتان يطالب كل القوى السياسية والنقابية والحقوقية بإعلان تضامنها مع العمال، وتقديم كافة أشكال العون والمساندة لهم، ويدين اعتداءات الشرطة ومحاولاتها فض الاعتصام .


المركز المصرى للحقوق الاقتصادية والاجتماعية
10 فبراير 2010
الساعة الخامسة عصرا
----

بالنسبة بقى لموضوع المنوفية بتاع النجار المسيحي لسه لا خالد ولا مركز هشام مبارك نزلوا بيان اول ما ينزلوا ح اجيبهولكوا ان شاء الله الاخبار المؤكدة حتى الان ان الشرطة من فترة قفلت مصلى المسيحيين وحطت عليه حراسة وان امين شرطة قتل نجار مسيحي ولحد ما تيجي اخبار تانية غير اللي في البوست ده هي دي المعلومات الواردة من الشهود، وزي ما قلت في التعليق اذا افترضنا ان الشهود بيتخيلوا بنسبة اربعين في المية فالحكومة كدابة بنسبة خمسة وتسعين في المية، وفيه جهات مستقلة متولية الموضوع وهم دول اللي ح يقولوا الحق، وانا عارفة ان نسبة لا بأس بها من المسلمين اللي عاملين متدينين مش ح يقولوا كلمة حق في الموضوع ده حتى لو طلع جزء كبير من شهادة الشهود صحيحة، عملا بقول الله: وإذا قلتم فاعدلوا ولو كان ذا قربى. والانسان عشان يبقى متدين لازم يفسر بالعكس طبعا زي ما كلنا عارفين

حاجة بقت تخنق

التفاصيل هنا وهنا
الله اكبر.... دول بيقولوا يسقط يسقط الاستثمار


الحمد لله الحمد لله الحمد لله... ايييييوة كده انطقوها بقى

 

ولا سعودي ولا ياباني شركة طنطا ح ترجع تاني

مرعي بتاع الكلمة غطى جزء من اضراب شركة عمال طنطا للكتان والزيوت

انا اليومين دول سنتمنتالية مهترئة زيادة عن اللزوم، بقيت اتضايق قوي، هم بيعاملونا كده ليه؟ فيه في الدنيا بلد الشعب فيها يعتصم عشان عايز يشتغل والحكومة تقول له لا، خليك كده عواطلي؟ نفسي ادخل جوة دماغك يا عوكل واعرف ايه اللي بيدور فيها

اكيد له عذر ما، او تبرير ما، في الكورس اللي باخده عند رأفت الميهي كان بيقول لنا على رسم الشخصيات: اوعى ترسم شخصية سودا، مافيش شر مطلق، كل انسان له اعذار ومبررات واسباب تخليك تتعاطف معاه، حتى ابليس لما ربنا وصفه اداله مبرراته وعمل له تاريخ.

يمكن يكون الكورس ده هو اللي مخليني سنتمنتالية مهترئة بزيادة كده؟

طيب يا عوكل، لو سمحت خليني اشوف مبرراتك زي ما شفت مبررات ابليس على الاقل، بتعمل فينا كده ليه؟ هو احنا وحشين؟ هو احنا طلباتنا ايه غير الستر ولقمة العيش، والناس عايزة تشتغل، نفسها تشتغل يا اخي، ده احنا شعب اي حكومة في الدنيا تتمناه

بتعمل كده ليه؟

الناس بتقول بالروح بالدم نفديك يا كتان، انا عمري ماشفت كده في اي حتة في الدنيا

مرة ابليس طلع لعوكل وقال له: انا عندي ليك فكرة تعملها في الشعب ده.... هات ودنك: وشوشوشوشوشوش

راح عوكل قال له: طب اسمع الفكرة دي، هات ودنك..وشوشوشوشوشوشوش

قام ابليس قال له: لا يا شيخ حرام عليك

اضراب عمال طنطا

والله انا لسة صاحية لقيت حسام الحملاوي بيزعق لنا على التويتر وبيقول عمال طنطا محتاجين تضامن بقالهم اربع اسابيع مضربين

لمزيد من المعلومات انطح هنا

مطالب عمال طنطا:

تعلن لجنة التضامن مع عمال طنطا للكتان عن تضامنها الكامل مع عمال شركة طنطا للكتان المضربين منذ ثلاثة اسابيع وتطالب معهم بمطالبهم المشروعة وهي:



1- صرف العلاوة الدورية التي قررها قانون العمل بمقدار 7% من الأجر الأساسي اعتباراً من 1/7/2008، خصوصا وأن الشركة حققت ارباح بميزانيتها


2- صرف الحافز للعاملين علي أساس الأجور الأساسية الحالية وليس علي أساس المرتب الثابت منذ 30/6/2004



3- صرف زيادة بدل الوجبة الغذائية من 32 جنيه إلي 90 جنيه كباقي العاملون في صناعة النسيج طبقا للقرارات المنظمة



4- عودة عمال الشركة التسعة ( بينهم 2 نقابين ) المفصولون تعسفيا خصوصا بعد حصول بعضهم علي احكام قضائية



كما تطالب اللجنة بفسخ العقد مع المستثمر السعودي الذي أخل بالتعاقد عندما امتنع عن سداد حقوق العمال وفي مقدمتها أجرهم عن شهر مايو والذي أمتنع عن تسديده للضغط علي العمال لمنع العمال من القيام باضرابهم، كما إنه امتنع عن تنفيذ اتفاقية العمل الجماعية التي سبق ووقعها بعد اضراب العمال السابق، وتطالب اللجنة بالاضافة إلى فسخ العقد واعادة تبعية الشركة إلى القطاع العام بمحاسبة المتورطين في عملية البيع المشبوهة وذلك حفاظا علي حقوق العمال وحفاظا علي السيادة الوطنية التي اهدرها المستثمر السعودي بتجاهله نصوص عقد البيع وكذلك عدم احترامه لاتفاقية العمل الجماعية التي تعتبر بمثابة قانون وفوق هذا وذاك عدم احترامه للقانون المصري.

(ده ولا مسلسل الراية البيضا، هو ايه اللي باع المصنع اصلا؟ ده كتان وزيوت، لو اتطور يقببنا على وش الدنيا بدل شغل التسول اللي البلد كلها عايشة فيه لما بقى التسول قيمة من قيم المجتمع)

وتتساءل اللجنة لماذا الصمت الرهيب من قبل الحكومة المصرية بكل وزرائها ومسؤوليها تجاه تحدي المستثمر لهم جميعا وتعديه علي حقوق العمال

(مع خالص تقديري للجنة، ايه السؤال ده؟ انا لو مدرسة وعيل من عيالي سألني السؤال ده ح اطرده من الفصل)

لجنة التضامن مع عمال طنطا للكتان



(نقابة العاملين بالضرائب العقارية، رابطة عمال الغزل والنسيج بالمحلة، اللجنة التنسيقية للحقوق والحريات النقابية، اللجنة التحضيرية للعمال،عمال من أجل التغيير، مجموعة تضامن، امانة عمال حزب التجمع، امانة عمال الحزب الناصري، مركز هشام مبارك للقانون، المركز المصري للحقوق الاقتصادية والاجتماعية، مركز الدراسات الاشتراكية، مركز آفاق اشتراكية)
-------

طيب، انا قريت في اللنك اللي حسام سايبه ان العمال قبضوا مرتب مايو! ولسة مضربين

والله لسة امبارح واحدة من غزة بتكلمني قلت لها احنا عندنا حصار برضه، حسبي الله ونعم الوكيل

عاجل: قرار بفصل كريم البحيري

والله انا ما اعرفش مادو ده اسمه ايه بس هو دخل ساب لي التعليق ده

انا نازلة دلوقت عندي مشوار وح اتصل بكريم افهم الحكاية ان شاء الله

كريم البحيري ينقل لكم تفاصيل حريق فندق النيل بلازا

ده تاني فندق مملوك لمجموعة طلعت مصطفى يتحرق في اسبوع واحد
كريم البحيري نقل كل حاجة، مع ملحوظة انه اتصل بالنجدة عشان الحريق قام النجدة قالوا له: اتكلم ارضي يابن بلدي
اه والله العظيم انطح هنا
المهم ان كريم اتصل بيا وقعد ينقل لي تفاصيل اللي بيحصل قدامه وفين وفييييييييييييين لما قال لي انه محال للتحقيق!
يابني مش تقول من الاول؟ لا طبعا...مدام الحريق فيه عمال يبقى مش مهم التحقيق معاه المهم العمال :) وكيل العمال في جمهورية مصر العربية متحول للتحقيق هنا..يستاهل ماهو فقري
الواحد يبقى وكيل رقاصة وكيل منولوجيست وكيل مطربة فيديو كليب وده رايح للعمال

غصب عنكوا المحلة أم الرجال

يعني لما ينقلوا كريم البحيري ومحمد العطار وامل ووداد نقل تعسفي كده خلصت المحلة من الجدعان؟ عمال المحلة لا بيخافوا ولا بيتهتوا وكلهم جدعان ستاتهم ورجالتهم وعيالهم والارض اللي انتوا ماشيين عليها بتلعنكوا يا واكلين حقوق الناس
انا كلمت كريم، هو راح يقدم بلاغ بالنقل التعسفي، خصوصا انهم ما ادهوش قرار نقل في ايده ولا بدل انتقال ولا عملوا اي اجراءات، بقيقي كده قالوا له روح القاهرة
كريم بيقول لي انهم امبارح كسروا بيت على اللي فيه
ايه بقى؟ ايه الفكر الجديد العظيم ده؟
هو ده بقى الفكر الجديد يا شباب، بدل ما نحارب برة و"نعادي المجتمع الدولي" زي ما جمال قال امبارح، خللي الحرب منا فينا كده، وهم مش ح يخلوا في نفسنا حاجة، نفسنا في اسرائيل، ح يعملوا في الناس زيها بالظبط
عايزين ايه تاني؟ يعملوا لنا ايه تاني عشان نبطل بطر؟
---
تحديث:
كريم اتنقل القاهرة
محمد العطار اتنقل اسكندرية
امل ووداد اتنقلوا قسم حضانة اطفال العاملين برغم خبرتهم في خطوط الانتاج
على فكرة الناس مش مبسوطة
لا بجد الناس عمرها ما كانت ما بسوطة، بس فيه ناس شقيانة، تكنس وتمسح وتسرح في الاشارات وتشقى وتعلم عيالها ومش حاطة في بالها اي حاجة
ولا شاغلة نفسها بالبلد، البلد بالنسبة لهم العيال، ومصاريف العيال وبس
وفيه منهم بياخدوهم بالزوفة بعشرين جنيه عشان ينتخبوا الحزب الوطني وهم مش فاهمين اصلا ايه ده؟ هم فاهمين انهم اخدوا حسنة من اهل الخير عشان يقولوا نعم: هو فيه يا ابلة احلى من كلمة نعم؟ربنا يزيد نعمه علينا
الناس دهين بقى




مش مبسوطة...

لسة النهاردة واحدة منهم بتقول لي: هو فيه ايه؟ ايه اللي ح يحصل؟ فيه حاجة غريبة
فعلا حاجة غريبة...لان الغلابة متعودين يستحملوا وما يستغربوش...ياما دقت على راسهم طبول، معنى انهم يستغربوا يبقى البلد قطعت شوط طويل من الهطل

اسماء اسرى المحلة

دي اسماء اسرى المحلة من عند الحاج حسام الحملاوي للحملات
هو شبشب قانون الطوارئ ده ح يفضل مرفوع كده كتير وكل شوية ينزل على ام دماغنا؟
وياريته بيطبق
طب ياريت يطبقوا قانون الطوارئ
انا بقى عايزة قانون الطوارئ يطبق عدل
هو قانون الطوارئ يخليك تحجز عمال واهالي وناس عادية جدا في احداث هم مالهمش اي يد فيها وكمان واخدين افراج من النيابة واحيانا من النائب العام زي حالة اسراء؟
هو قانون الطوارئ بروح امهم مش بيطبق على ممدوح اسماعيل بتاع العبارة ليه؟ اشمعنى اطبق على ممدوح اسماعيل المحامي عشان لقوا عنده فلاشة من ضمن الضبطيات؟
يالهو بالي ياما، ده انا عندي ممنوعات كتير قوي: ايشي فلاشة على لاب توب على تلفزيون ملون بيجيب قناة المعلومات وفيديون وريسيفر وحاجات قلة ادب كتير قوي، وعندنا كمان فرن بالكهربا...اه وربنا، كل دي احراز ربنا يستر بقى ان شاء الله ح اخبيهم بسرعة في مكان آمن احسن لو لقوهم عندي تنظيم التهييس ح يتكشف وح نروح كلنا في داهية وانا ح اعترف عليكوا واحد واحد، بس يقطعوا عني التكييف في الحر ده
طب قانون الطوارق والنوازل ما اطبقش على هاني سرور ليه؟ وللا يكونش الناس هي اللي لوثت الدم بغباوة قلوبهم؟
اشمعنى قانون الطوارق ما بيطرقش غير باب الغلابة اللي مالهمش في حاجة، وعلى رأي حسام الحملاوي، بيقول لي هو مش ده معمول عشان الارهاب زي ما بيقولوا لنا؟ طب هم دول ارهابيين في ايه؟ دول عمال
الاسماء اهية

Kamal Mohamed el-Sayyed el-Fayoumi, Ghazl el-Mahalla worker
Tarek Abdel Hamid Amin (Tarek el-Senoussi), Ghazl el-Mahalla worker
Abdel Kareem Ali el-Beheiri Abdel Kareem (Kareem el-Beheiri), Ghazl el-Mahalla worker and blogger
Ibrahim el-Zoghby, Mahalla resident
Ahmad Mohamed Ahmad, Security guard at Ghazl el-Mahalla
Ibrahim el-Yamani, doctor
Abdel Halim Ahmad, Ghazl el-Mahalla worker

كريم البحيري في سجن برج العرب

تحديث بخصوص كريم البحيري:
ده التعليق اللي سابه حسام الحملاوي عندي:

كريم وكمال الفيومي وعدد من عمال غزل المحلة ومواطني المحلة كانو محتجزين بأمن دولة المحلة بعض صدور قرارات الإفراج من النيابة ودلوقتي اتحولوا على سجن برج العرب.. المحامين بيحاولوا دلوقتي يطلعوا تصاريح زيارة ويروحوا... وأنا بأدعو الناس انها تحاول تروح تزورهم وما تسيبهومش لوحديهم في المحنة ديه
أنا حأبعتلك دلوقتي نمرة محام رايح على الميل...

----

انتهى التعليق واحكي لكوا اللي حصل:

كنت باتصل بكريم مش بيرد وبعدين تليفوناته اتقفلت، اتصلت بالمحامية صفاء زكي مراد وقالت لي ان اسم كريم البحيري مش في المحتجزين بتوع المحلة، ماما قالت لي حرام عليكي ليكون الواد مستخبي سيبيه في حاله بقى

طبعا الكلام ده كان يوم تمانية او تسعة ابريل مش متذكرة، واعتمادا على ان امي دايما تحسسني بالذنب قلت طب خلاص، لو فيه خبر جديد او حد عرف انه في امن الدولة اكيد ح تتنشر في المدونات

وبتوع المحلة اخدوا اخلاء سبيل والناس هيصت وزأططت وانبساطات

واتباعا لسياسة عدم التنجيم ماحدش جاب سيرة كريم غير حسام من كام يوم وانا قلت ياااااه الواد لسة مستخبي لحد دلوقت؟

لحد ما حداويت دخل عندي وقال لي كريم فين يا نوارة وانا كل ده مقتنعة انه غطسان وبعدين الفار لعب في عبي رحت لحد حسام فقال لي الاخبار دي

طب هل كريم اتعرض على النيابة؟ واذا كان اتعرض على النيابة ماحدش قال لي ليه؟ اكيد صفاء زكي مراد لحد يوم تمانية او تسعة، وهي محامية من بتوع المحلة ما كانتش تعرف ان كريم هناك وده معناه انهم خفوه شوية

يخفوه بقى وللا يغور في داهية مش كده؟ ما احنا مش عايزين نعمله نجم

افففففففففففففففففففففففففففففففففففففففففففففففففففف

ان شاء الله ح اتصل بالنمرة اللي بعتها لي حسام واشوف نطلع امتى واقول لكوا

لسة حالا حسام الحملاوي باعت لي ميل بيقول لي ان كريم البحيري محبوس في سجن برج العرب
يعني ايه الكلام ده؟ طب وخافيينه عن المحامين ليه؟ وازاي يدخل سجن برج العرب من غير ما يعدي على امن الدولة؟ ولما عدى على امن الدولة انكره ليه؟ طب اتعرض على النيابة وللا لا
يا حساااااااااااااام رد عليا
اي حد يعرف يقول لي، طب فيه زيارات له في سجن برج العرب؟
لو كده نروح له

عاجل: الامن يطارد كريم البحيري في المحلة

دلوقت اتصل كريم البحيري وقال لي ان العمال عملوا وقفة احتجاجية في المحلة وبعدين الامن ضرب عليهم قنابل مسيلة للدموع وحاولوا ياخدو الكاميرا منه وفضلوا يجروا وراه وهو هرب ودلوقت الامن بيلف عليه المحلة الكبرى كلها وعايزين يقبضوا عليه وهو مش عارف يقعد في مكان واحد ساعة على بعضها
ربنا يستر
كريم برضه بيقول لي انه بيحاول يتصل بيا والغريب ان محاولاته دي مالهاش اي اثر
عموما انا ح احاول اكلمه كل شوية واطمن عليه
وربنا يستر

عاجل: أخطر قضايا الفساد

عند كريم البحيري على مدونة عمال مصر

البشوات بيتعاملوا باتفاقية الكويز في شركة غزل المحلة مع انهم مش من ضمن الاتفاقية

بس محبة كده بيتعاملوا مع اسرائيل

وبالرغم من ان الادارة الفاسدة السابقة هي اللي عملت كده الا ان الادارة الحالية ماشية في المشروع زي ما هي

مع ان ده مش قانوني

ده غير بلاوي تانية كتيييييييير

يمكنكم قراءة التفاصيل هنا

يلعن ابو كده..كريم البحيري اتفصل من عمله

وهم كانوا ح يسكتوا عليه؟

ماهو بصراحة كريم البحيري ده

واد يستاهل قطم رقبته قال ايه عايز العمال

ياخدوا حقوقهم وحقوقهم دي مش زي حقوقك طبعا

العين ما تعلاش عن الحاجب كل اللي عمال عايزينه انهم

يوصلوا لخط الفقر لانه في السطوح وهم البدروم

زيه زي اي مواطن بيطالب بحقه

يستاهل كسر حقه

بس حقه لازم يتكسر من غير ما الجريمة تبان

التفاصيل عند كريم

هنا

وادعوا له ربنا ينصره