هتاف المسيحيين المصريين في العمرانية: عاش الهلال مع الصليب عايزين حقوقنا
الناس دي حصل فيها كده عشان عايزة تصلي
عايزين يصلوا بس
تحية لارواح الشهداء، الصحة بتقول واحد بس اللي مات، والكنيسة بتقول اربعة، والاهالي بيقولوا عشرة
الحقيقة حتبان على بكرة واكيد الصحة مش حتقول الحقيقة، بدليل ان الداخلية قالت على نفسها انها تعاملت "بعقلانية" مع الحدث! قاتلين ابرياء او على الاقل بريء وبيتكلموا عن العقلانية، واستغلوا بلطجية عشان يحدفوا طوب على الناس وكان باين قوي انهم بلطجية، دول مش اهالي ابدا، لو اللي ضربوا ليلى سويف في الجامعة طلبة غيورين يبقى الاشكال دي اهالي
وتحية للابطال اللي تصدوا للامن وهم عزل وما خافوش وما جريوش دفاعا عن حقهم في الصلاة زي كل عباد الله
وتحية لمرشح الاخوان المسلمين وانصاره اللي شاركوا المسيحيين المظاهرة، طبعا تحية لمرشح الناصري بس مرشح الناصري كان متوقع يعمل كده، لكن الحق يتقال مشاركة الاخوان في المظاهرة فارقة، وهي اللي خلت المسيحيين يهتفوا عاش الهلال مع الصليب
واسفخص على الامن اللي تحول لقوة احتلال ومنظره في الصور يشبه منظر الجيش الاسرائيلي وهو بيضرب الفلسطينيين، واسفخص على الامنجية اللي بيتكلموا زي الصهاينة ويبرروا قتل الابرياء
التغيير محتاج تضحية، وابطال العمرانية قدموا ارواح ودم، اللي الكره والطائفية عمت قلبه وخلته مش قادر يتضامن معاهم، على الاقل يحل عنهم، بس الناس كانت حلوة المرة دي، كل الناس، اقصد كل الاهالي مسلمين ومسيحيين، حتى اللي طلعوا علقوا في الجزيرة من المسلمين قالوا كلام كويس مع ان تقرير الجزيرة كان زي الطين
وزي ما قلت لهم على التويتر، انا مش وائل خليل بيصعب عليا الناس، انا مفترية، بس الناس المرة دي كويسة، واحسن مما كنت اتوقع بكتير، لان فيه ظروف ومتغيرات وضغوط مرت عليهم ما تؤديش للنتيجة دي، والنتيجة دي بالنسبة لي مرضية جدا وطظ في رويترز اللي تجاهلت مشاركة الاخوان المسلمين وبعض الاهالي المسلمين للمسيحيين في المظاهرة وما جابتش غير سيرة البلطجية وقالت عليهم مسلمين يشاركون الامن في قذف المسيحيين بالحجارة
طظ فيهم لانهم ما يهمنويش
اللي يهمني ناسي
وربنا يرحم الشهداء ودمهم مش حيروح هدر ان شاء الله
