الشرطة رجعت بكامل طاقتها وكفائتها وحمد الله على سلامتها وربنا ياخدنا احنا

أول قضية تعذيب بعد ثورة 25 يناير هنا

ودي بقى قضية وقعت عليها في ميدان التحرير، واحد راح يخلص توك توك اخوه من ايد ظابط كان طالب اتاوة راح الظابط ضاربه بالنار وملفق له تهم

القصة كاملة هنا

وهنا

حمد الله ع السلامة يا ولاد الـ...

شرفتنا يا سيادة اللواء العيسوي يا بتاع: الشعب مش عايز اسقاط النظام، ده كان عايز اصلاحه بس

والحمد لله هو صلح لنا الداخلية بعد ما ضربناها، واخدها وش دوكو ورجعها لنا كأنها داخلية جديدة بورقها

امشي يا حاج عيسوي... امشي بدل ما تسمع لك كلمتين مالهمش لازمة من الشعب ده، ده شعب قليل الادب وانا عارفاه

خير؟ هو مفعول علقة 28 راح ولا ايه؟ هو احنا كل شوية حنضربكوا؟

مش قلت لكم مافيش اجماع وطني يبقى مافيش ثورة... ادي احنا رجعنا لحوادث التعذيب في الاقسام تاني، وكلها اسبوعين ونقف على سلم النقابة

لايموها بقى.. النظام رجع، لا مش حيرجع.. هو رجع خلاص

احنا بقى عايزين نعفق الشرط عفقة كويسة عشان مش كل شوية حترجع لنا زي القرش البراني

اسمعونا بقى يا اي حد في ام البلد دي

يا تجمدوا نشاط الداخلية دلوقت حالا لاعادة هيكلتها واحنا رقبتنا سدادة في اللجان الشعبية، وتعملوا فورا اشراف قضائي وحقوقي مستقل على الامن الوطني

يا نرجع لكم تاني.. بس ساعتها مش احنا اللي حنرجع.. الغلابة دول هم اللي حيرجعوا، ودول زعلهم وحش قوي... قوي يعني، صدقوني انتوا ما شفتوش زعلهم لحد دلوقت، وعمالين تخنقوا عليهم وتعملوا لهم ازمات اقتصادية ومرجعين لهم الشرطة بنفس طريقتها القديمة وفاكرين حتكسروا مناخيرهم، دول بعد ما شموا الكرامة لو جوعتوهم وعذبتوهم انا مش مسئولة عن ردود افعالهم

انسوا سلمية سلمية دي خاااااااااااااااالص

احنا قلنا لكم اسقاط النظام وما قلناش اسقاط الدولة... انتوا بالحماقات دي حتسقطوا الدولة

القوى السياسية دلوقت مدقوق اسفين ما بينهم ومش حيعرفوا يسيطروا على زعل الغلابة، وبتوع سلمية سلمية اتخبلوا في مخهم وفاكرين نفسهم هم اللي عملوا الثورة واللي بيعمل ائتلافات واللي مشغول في الانتخابات واللي بيتخانق على هيافات.. يعني برضه مش فاضيين للغلابة

وانتوا بتقرفوا الغلابة دوبل قال ايه.. ناصحين قوي، فاكرين ان ده حيكره الشارع في الثورة.. ابسلوتلي.. ده حيندم الشارع ان ثورته كانت سلمية

اسمعوني بقى انا ناصحة امينة... كخ كده.. كخ قوي.. والايام بينما، صحيح القوى السياسية حترجع سلم النقابة

بس القوى الشعبية رجعتها وحشة.. انتوا ما تحبوش حتى تسمعوا هم ممكن يعملوا ايه

الا هل بلغت؟ اللهم فاشهد

نداء إلى كل مواطن صالح: ما تخافش من المخبرين المخبر عرة

الراجل اتقتل قدام المارة

ده مش اول انسان يتقتل في الشارع قدام الناس وماحدش يتدخل ولا يحوش عنه

ما ينفعش كده يا ناس

انا عارفة ان الناس بتخاف، بس خايف من ايه؟ دول اتنين مخبرين، وانتوا عشرميت انسان في الشارع وهم موقفهم ضعيف لأنه مش قانوني

1- المخبر مش مفروض يقبض على الناس في الشارع، لو لقى انسان اشتبه فيه المفروض يراقبه ويبلغ في القسم انه اشتبه في فلان وخط سيره كذا ومحل اقامته كذا، مش اول ما يشوفه في الشارع ينزل عليه يعني مثلا القتيل ده كان عليه حكم واتلغى لانه اتصالح مع البنك

2- المخبر مش معاه سلاح.. وما يقدرش يستخدم سلاح اساسا ضد المارة في الشارع، وبعدين يا سيدي هو مش معاه سلاح ولو معاه سلاح يبقى تبلغ فيه لأنه مش مفروض انه مسلح

3- تحت اي ظرف مش مفروض ان المخبر ينزل عجن وضرب في الانسان اللي بيقبض عليه، لما يشده من هدومه حاجة، ولو ان ده مش قانوني، ولما ينزل عليه ضرب لحد ما يفيص في ايده دي حاجة تانية، ما تقنعنيش ان اول ما حط ايده عليه موته، ده قعد يضرب فيه على الاقل تلت ساعة عشان يعرف يطلع روحه ده لو ضاربه بالرصاص مش حيموت في ساعتها

ماذا تفعل حين تمر من شارع وتجد ان انسان ما يتم سحله:

1- فين النسوان؟ اخصصصص على نسوان مصر.. اي ست معدية ترقع بالصوت كده: يالهوي يالهوي يالهوي.. بقية الستات حيرقعوا بالصوت وراها

2- المارة حيتلموا على صويت الستات

3- الشارع المصري مليان بغال واكلين كشري وفول.. يرموا جتتهم على الواد اللي بينضرب عشان يحوشوا عنه

4- تلات بغال تانيين يمسكوا في المخبرين - ده اذا فضل المخبرين واقفين لسه وما جريوش، لانهم لو لقوا الشارع اتلم عليهم حيجروا على فكرة - المهم يمسكوهم وهاتك يا عزق فيهم... بس ماحدش تاخده الجلالة ويموت المخبر، عشان بس ما يعملوش شهدا علينا وينضربوا لما يبان لهم صحاب

خلاص كده

البني ادم المشتبه فيه في ايديكوا، والمخبرين ما قتلوهوش، تاخدوا المخبرين والمشتبه فيه وتطلعوا على القسم بربطة المعلم لو يعني القانون واخد حده معاكم... وانا بصراحة لو مكانكم اهربه، يعني حيكون عامل ايه الواد يعني؟ لو عملته كبيرة قوي قوي ويستاهل فعلا عليها عقوبة مش حتلاقيه ماشي في الشارع اساسا.... حتلاقيه عضو مجلس شعب

فاهدوا كده واطمنوا، مافيش حد من اللي بيتجرجروا على الاقسام يستاهل اساسا يتجرجر
اه....... نسيت حاجة مهمة قوي
لما تمشي جنب الحيط مش حتسلم.. ليه بقى؟ لأن المارة لما وقفوا يتفرجوا على الراجل وهو بيموت بعد شوية البوليس جه لمهم عشان هم شهود، وزمانهم بيتعذبوا دلوقت، ادعوا بقى ماحدش منهم يموت

مقتل ضحية جديدة بالاسكندرية

بنفس طريقة خالد سعيد اتقتل الضحية الجديدة

والتفاصيل هنا

جنازة حاشدة للشهيد خالد سعيد

وان شاء الله شهيد وعلى مسئوليتي، قال حشاش قال

ده على اساس ان ظباط الداخلية ما بيفوتوش فرض؟ واللي قتله بالطريقة دي بقى كان بيحمي المجتمع من الحشاشين؟ ده انا لما شفت جثته افتكرته من الفلسطينيين اللي ماتوا بالفسفور، دي ايدين بني ادمين عادية اللي عملت فيه كده؟ 

فيه جريمة ابشع من جريمة قتل خالد سعيد بالطريقة دي، جريمة تبرير الجريمة

محاولة اقناع الناس بانه يستاهل يموت كده عشان كان مجرم والصاق التهم بيه، مش بس تشويه لانسان بريء مات بالظلم

ده تشويه لنفسية الناس، لان الناس حتبقى على فريقين، يا اما يقولوا حتى لو مجرم ما يستاهلش، يا اما ناس تقول ماهو كان مجرم وما يستاهلش نزعل عليه

دي جريمة.. دي جريمة في حق المجتمع وحق الانسانية وبقالهم سنين بيعملوا فينا كده لحد ما تحولنا الى شعب من الحلاليف ماعندوش دم ولا احساس ولا مشاعر كله بسببهم كله بسببهم

كله بسببهم

عمرنا ما كنا كده عمرنا ما كنا بالقسوة دي

بس اعتماد تبرير الجرائم دي والزن على دماغ الناس بيها ومحاولة انهم يمنطقوا كل السفالات اللي بيعملوها هو اللي وصل الناس انها تبقى غليظة الحس وقاسية عمالين يغذوا الناس بحقارة حقارة حقارة عشان ينزعوا من قلوبنا الرحمة ويحولونا لكائنات حقيرة زيهم

للاسف مافيش قانون يعاقب على جريمة تبرير الجريمة

بس انا بقى شايفة ان تبرير الجريمة اوحش من الجريمة نفسها ويستحق عقوبة ضعف العقوبة على الجريمة

لو حد من صحابي بقى رئيس جمهورية حاخليه يطلع قانون على الموضوع ده
جنازة الشهيد خالد سعيد.. اطلبوا له الرحمة:

عاجل: القبض على 11 متظاهر منهم المدون عمر الهادي

تحديث:
طلعوا كلهم الحمد لله
حسام الحملاوي الشرطة كسرت له مشط رجله لما حاولوا ياخدوا منه الكاميرا وهو قاوح معاهم
:((
تحديث:
مالك عدلي ومالك مصطفى ومحمد واكد اتقبض عليهم
انا نازلة رايحة لهم
تحديث:
علي حسن زيتون
من ضمن المقبوض عليهم
تحديث:
اسماء جديدة لمن قبض عليهم:
حازم نصار
هاني الجمل
هاني الحسيني
شادي هاني الحسيني
فيه ناس راحت ميدان التحرير، وفيه مظاهرات في الشوارع الجانبية
-------
سماح اسحاق اتاخدت من طلعت حرب وانضربت واغمى عليها من الضرب وهي في المستشفى ومش عارفين اسم المستشفى
فيه حداشر متظاهر اتقبض عليهم من المظاهرة اللي قدام لاظوغلي، الاسماء اللي وصلتني لحد دلوقت:

عمرو عز
وعمرو علي
احمد عيد
احمد بدوي
عمر الهادي
الامن مش بيضرب وواضح ان فيه تعليمات ان ماحدش ينضرب، طب امال ازاي العيال اتخطفوا من وسط المظاهرة كده واستسلموا والناس سابتهم يتقبض عليهم؟ 
المظاهرة حوالي 200 الى 250 والامن كردن عليهم بحيث يقسمهم الى تلاتة
ايمن نور جات له ازمة قلبية ومشي
ولسه لو فيه حاجة تانية حاقول لكوا عليها

تعذيب/ قضية اسماء/ دحلان

ايه الكربسة دي؟

اولا قسم شرطة محرم بيك عذب اسرة كاملة، راجل وخمس ستات وهدد واحدة منهم بالاغتصاب والتفاصيل والفيديوهات هنا

------

ثانيا:

اسرائيل دي عايشة عشان احنا اللي عايزينها تعيش، مش عشان شطارتها، ايه الخيابة دي؟ المبحوح الله يرحمه لا متأمن وغالبا ما كانش مسلح وقاعد في فندق وكان نازل يشتري مش عارفة ايه في كيس كده، وبصراحة بقى، الله يرحمه كان مستهتر قوي بالتأمين، ده ماشي كده زي ما انا بامشي في صالة بيتنا، والامارات لسبب او لآخر قررت ما تأمنش الراجل ولا حتى ببودي جارد بيلعب تايكوندو. بالذمة واحد بالمواصفات دي في فندق في دبي يتقتل ازاي؟ لو بعت اخوك الصغير ح يقتله ويرجع عادي

ايه اللي موساد عمله ده؟ جندوا اتنين جواسيس فلسطينيين، وبعتوا حداشر واحد، حدااااااااااااااااااااااااشر واحد، وضربوا باسبورات، وطلعوا معاه في الاسانسير وقعدوا يراقبوه بطريقة عاطف السكري وشكلهم باين جدا، الله يرحمه ازاي ما خدش باله؟ وللا خد باله وطنش زي المرحوم يحيى عياش؟ 

(ملحوظة: طول فترة الشغل في المقاومة بييجوا في الاخر يزهقوا ويسيبوا التأمين، لاسباب كتيرة، منها انه زهق من الخنقة بتاعة التأمين، ومنها انه بيبقى شخصيا مر بمواقف توريه ان التأمين حقيقي ما بيعملش حاجة والمسألة مسألة عمر، ده كلامهم هم)

وبعد كل فيلم ميونخ الطويل العريض ده كله، كاميرات الفيديو قفشتهم والناس كلها بتضحك عليهم، واتعرفوا واحد واحد، ويقول لك براعة شرطة دبي.... براعتها في ايه؟ في انها شغلت شريط الفيديو واتفرجت عليه؟ 

وبعدين دحلان ده مالوش حل خالص كده؟

انا كان ليا وجهة نظر والظاهر انها صح، الخونة هم اللي بيشغلوا اسرائيل مش العكس

المرحوم المبحوح كان شكله اشتاق للشهادة، رحمة الله عليه، بس انا قرفانة من اسرائيل، بصراحة انا اشجع اللعبة الحلوة، ودي لعبة خايبة اخر حاجة

ده غير بقى اني متضايقة جدا انهم دفعوا كل الفلوس دي لحداشر واحد غير الاتنين الجواسيس، ايه السفه ده؟ اللي معاه قرش محيره يجيب حمام ويطيره

-----------------------

اسماء

اسماء ابراهيم في مواجهة الدكتورة ماجدة جمعة اللي قالت لهم على فلسطين ولبنان وسيناء والاردن: اسمها اسرائيل غصب عنكوا

لا

الانسة دي صعبت عليا... كده الست دي يا اتجننت يا اتجننت

مالك كان بيقول لي اكيد الموضوع فيه حاجة تانية، مش ممكن تبقى غبية كده

بس طلعت الحكاية كده واوسخ من كده والقصة كلها هنا، والانسة فرايداي ما راحتش المحكمة

 

وسقطت سبعين في المية من الدفعة

اوختشي... انت مجنونة؟

القضية اتحجزت للحكم ليوم 25 فبراير

زي ما قلت لكوا احنا عايزين نعذبها.... او نعالجها بقى

تعذيب حتى الموت تاني

اظن الموضوع ده ما بقاش خبر خلاص

امن جامعة حلوان يعذب سائق ميكروباص

التفاصيل هنا

يوسف حمدان ابو زهري

قتلنا اسير عندنا، وهو اسير اساسا ليه ما تعرفش، بس فوق انه اسير من غير مبرر، قتلناه، قتلناه، مش بالرصاص، ولا بالمشنقة، بالتعذيب لحد ما جاله نزيف داخلي وسبناه اسبوعين لحد ما لحق بربه

ربنا يرحمه ويتقبله في الشهداء

انا مش قادرة استحمل خلاص، احمد موسى بيتكلم في الجزيرة وبيخرف، وبيقول: ان سامي ابو زهري في غزة لكن انا باتكلم من مصر، على رأي احمد نصر، يعني قاعد في اودة الكنترول بتاعة مصر؟ طب ما انا قاعدة في مصر وما كنتش عارفة من الاصل ان عندنا كل دول مساجين من حماس، طيب فيه كام مسجون اسرائيلي من اللي بيتاجروا في المخدرات وبيصدروا دعارة وبيتجسسوا؟

احمد موسى قال: ما اتعرضش للتعذيب، ولقي رعاية طبية كاملة من النزيف اللي جاله (والنزيف ده طبعا جه لواحد عنده 38 سنة بسبب حمى النفاس مش بسبب التعذيب) وبعدين عمره جه ومات زي ما ناس كتير بتموت في السجن من غير سبب، او بسبب امراض مزمنة

همممم

او بسبب ان امه داعية عليه، او من كتر السعادة جوة السجن جات له ازمة قلبية من الفرح، او بسبب ان حماس اخدته درع بشري وهو جوة السجن المصري، او بسبب انهم جم على عباس المظلوم قام ربنا انتقم منهم

انا مصدقاك يا احمد يا موسى

مش ده سؤالي، سؤالي هوه: ايه اللي دخل عنصر من حماس جوة السجن المصري من اساسه؟ ده على اساس ان سجونا فاضية وبنبخرها عشان تسكن؟ اذا كان الرئيس بتاعنا ببقه قال تعقيبا على سؤال احدى الصحفيات الاسرائيليات عن الجاسوس عزام: ما احنا ياما رجعنا لكوا جواسيس وتجار مخدرات في الكتم، انما انتوا اللي عملتوا دوشة على عزام واضطرتونا اننا نخليه في السجن عندنا..

وبعد شوية عزام رجع لحضن شارون لافف العلم الاسرائيلي حوالين كتافه وهو لسة ما خلصش الحكم اللي عليه

يا ترى معتقلين حماس دول متاخدين رهينة لحد ما المعتقلين المصريين مثلا في سجن حماس يخرجوا؟ انا اللي اعرفه اننا لينا اسرى مصريين حمضوا في سجون اسرائيل وما طالبناش بيهم

يا ترى معتقلين حماس دول كانوا جواسيس مثلا؟ جواسيس لمين؟ طب جواسيس، ما يشبهوش عزام يعني؟ وتجار المخدرات والجواسيس اللي رجعوا في "الكتم" يا عوكل؟ يا راجل، يا راااااجل ده انت حفيدك لسة ما مرش عليه استغفر الله العظيم ح تخاف ربنا امتى؟

طب عيال المصريين وحابسهم وبتعذبهم وبيموتوا وبيطلع عينهم وادي احنا راضيين يا قدرنا وعملنا الرضي (اكيد ربنا بيعذبنا على حاجة عملناها) انما خلاص؟ يعني خلصت علينا وداير بقى تلم في اللي حوالينا؟ مرة السودانيين ومرة الفلسطينيين... شملول قوي، سبع، سبع يا عوكل، يا مسيطنا، يا رافع رايتنا واحنا حدودنا واجواءنا بتخترق وجواسيسهم بترجع في الكتم ومش لاقي غير المستضعفين تستقوى عليهم

وكل ما يذلوك ويفقعوك زنبة زي اللي عملوها مع اوسني دكتوري دكتوري اوسني في اليونسكو تفش غلك فينا اكتر واكتر وناشر خيرك على اللي حوالينا كمان

وياترى شاليط اللي محبوس عندنا بيتلقى خدمة كام نجمة؟ سبعة؟ تمانية؟ سبعتلاف سنة يا مصر يا غلبانة ياللي اتبليتي بينا وما كانش ليك الذل ده كله يا حبيبتي؟

انا مكسوووووفة، مكسوفة وحاسة بالذنب والمرار والعار والاحراج

اعمل ايه ياربي، نعمل ايه طيب؟ انا مش عارفة اعمل ايه؟ انا خايفة... خايفة ربنا ينتقم منا اكتر ما بينتقم

يارب انا أبرأ اليك من اللي حصل ده يارب، ما احنا بيحصل فينا برضه، لو كنا عارفين نعمل حاجة كنا عملنا من زمان، والله يارب احنا غلابة مالناش دعوة، احنا لا بندافع ولا راضيين يارب انت اعلم

تيجي من عندك بقى يارب، تيجي من عندك، عليهم هم، عليهم يارب عليهم يارب عليهم يارب وعلى اللي راضي بعمايلهم واللي بيدافع عنهم واللي بيبرر لهم واحنا لا والنبي يارب

انا محتاجة ارتاح بقى

عاجل: وفاة شاب في اسطبل عنتر على ايدي الشرطة

احمد محمود شحاتة، السن 19 سنة، عامل رخام، ساكن في خارطة الشيخ مبارك بمصر القديمة ظابط شرطة وقفه واخده تحري وفضل يضرب فيه لحد ما مات، اهله ما سكتوش وقدموا بلاغ راح الظابط ضغط على عمه عشان يتنازل عن المحضر، الجنازة طالعة بكرة الصبح من مشرحة زينهم، واهل الولد واللي في المشرحة مستعدين يشهدوا بالواقعة، ده مش اول واحد ينضرب لحد ما يموت، بس ده اول واحد اهله مش عايزين يسكتوا بالرغم من ضغط القسم عليهم، بس محتاجين حد يقف جنبهم

طب وضحية تعذيب سيدي جابر قديم برضه؟

الصور فظيعة...ح احاول انزلها على المدونة بس شوية كده لما استوعب لاني فعلا مش قادرة ابص
شوفوا اللنك هنا وانا شوية كده وح اتكلم عن الموضوع لما استجمع نفسي

عاجل: نطالب بالتحقيق في هذا الفيديو

ده فيديو اخدته من مدونة ماك وهو اخده من عند عرباوي والتعذيب في مصر

الفيديو ظاهر فيه متهمين في احد الاقسام وشهم للحيطة وعينيهم مغمية كأنهم اسرى حرب 67 واقعين في ايد اسرائيليين
وزي ما ماك بيقول احنا لا بنقول فيديو حقيقي ولا مش حقيقي ولو ان الحيطة الوسخة دي والدفاتر الوسخة دي وبدل العساكر دي شكلها كده بيقول انه مش متفبرك خصوصا ان اللي بيصور شكله خايف يتقفش ومع ذلك احنا لا نجزم باي شيء احنا عايزين تحقيق
على كل الاحوال عايزين تحقيق في الفيديو ده اذا كان في قسم شرطة يبقى الموجودين يساءلوا احنا مش في اسرائيل هنا عشان الناس تتعامل كده
واذا كان مش في قسم شرطة يبقى مين اللي خاطف ناس وبيعمل فيهم كده؟
واذا كان تمثيلية يبقى مين اللي يقدر يجيب بدل ميري ودفاتر ميري ويمثل بيهم وينشر حاجة زي دي ويفزع الناس؟
عموما وشوش الناس واضحة واصواتهم واضحة كمان
رجاء نشر الفيديو على اوسع نطاق عشان يهتموا ويحققوا في الموضوع

طلب تحقيق من جمال عيد في واقعة تعذيب

طلب التحقيق في واقعة تعـذيب ،، حفظ لأن المتهم ضابط شرطة يا غجر

بلاغ في واقعة تعذيب ،،
قدمناه في 2003 ،
وطبعا النيابة حفظته
وهل ننتظر غير ذلك !!!!؟؟؟؟؟؟؟
نص البلاغ :

الأستاذ الفاضل / رئيس نيابة الخليفة

تحية و احتراماً و بعـد
مقدمه لسيادتكم / جمال عبد العزيز المحامي بالاستئناف العالي ، بطاقة محاماة رقم ------- بخصوص :

طلب التحقيق في واقعة تعـذيب
الموضوع

في مساء الجمعة الموافق 21 / 3 / 2003 ألقي القبض علي ضمن أخرين في نقابة المحامين في القضية رقم 1686 إداري، حيث قررت النيابة العامة حبسنا أربعة أيام علي ذمة التحقيق في يوم السبت 22/3/2003 وقد مكثنا بحجز قسم شرطة الأزبكية حتى يوم الأحد 23/3/2003 م حيث أخبرنا بعض الضباط أنه سوف يتم ترحيلنا إلي أحد سجون منطقة طره ، بعـد مرورنا علي قسم ترحيلات الخليفة .

وبالفعل تم نقلنا إلي قسم ترحيلات الخليفة وهناك و بمجرد ترجلنا من سيارة الترحيلات و دخولنا إلي مبني القسم فوجئنا بوجود مأمور القسم " عميد شرطة : علاء سالم " وأحد الضباط برتبة رائد و بعض مساعديهم المرتدين ملابس ملكية و ملابس رسمية .

حيث صاح بنا مأمور القسم ، أنتم يا أولاد الشرموطة الذين قمتم بالتخريب ؟
و حينما أخبرته أننا لم نفعل شيئاً ، قام بسبنا مرة أخري قائلاً أنه سوف يجعـلنا نعترف رغماً عنا ثم أمر تابعيه بسحبي إلي الداخل بجوار الحجز و أمسك بعصا و أمسك رائد الشرطة بحزام ، و قام بعض معاونيه بشل حركتي و إنهال المأمور علي جسمي بالعصا ورائد الشرطة بالحزام الجلدي ، وحينما احتج زملائي علي تعـذيبي ، خاصة بعـد ارتفاع صراخي ، أمر المأمور بضربهم جميعاً قائلاً سوف تعترفون يا اولاد الوسخة!

وقد استمرت واقعة التعذيب لإجباري علي الاعتراف من حوالي الساعة الثانية و النصف بعـد الظهر و لمدة ساعة علي الأقل، وعلي الرغم من أن العصا التي كان يستعملها مأمور القسم قد تكسرت علي جسمي و بخاصة علي ذراعي الأيسر و ظهري ، فقد راح المأمور يستخدم يدية و قدمية صافعاً ولاكما وركلا أغلب أجزاء جسمي ، و قد تخللت واقعة التعـذيب قيامة بسبي بأبشع السباب ومؤكداً أنه لن يتركني إلا بعـد اعترافي وأنني لست أقوي من معـتقلين سابقين قد اعترفوا علي يدية .
وحينما أبلغـته وأنا لا أكاد أقوي علي الحديث أنني محام وسوف أقدم بلاغ إلي النيابة العامة بهذا التعـذيب قام بسبي مرة أخري و تقدم بعض معاونيه لمساعدته في الضرب و التعذيب ولاسيما رائد الشرطة و شخص يرتدي الملابس المدنيه حتى أوشكت ان أفقد رشدي فألقوني جانباً ، حيث فوجئت أن زملائي المحامين و المتهمين معي بنفس القضية قد نالهم قسط من وافر التعذيب وهم :

1- الأستاذ / ياسر محمد فراج
2- الأستاذ / زياد عبد الحميد زكي

وفي نحو السادسة مساء تم نقلنا إلي سجن المحكوم بطره ، حيث تم إثبات الإصابات التي لحقت بي بواسطة أحد أطباء السجن في دفتر كان يحمله - علماً بأن نيابة الأزبكية و أثناء إجرائها التحقيق معي يوم السبت 21 / 3 / 2003 م كانت قد ناظرتني و لم يكن ثمة إصابات بجسمي .

وحيث أن ما أتاه مأمور شرطة ترحيلات الخليفة يعد جريمة معاقباً عليها بنص المادة 126 عقوبات ، التي تنص علي " كل موظف أو مستخدم عمومي أمر بتعـذيب متهم أو فعل ذلك بنفسه لحمله علي الاعتراف يعاقب بالاشغال الشاقة أو السجن من ثلاث سنوات إلي عشر ، وإذا مات المجني عليه يحكم بالعقوبة المقررة للقتل عمداً "

كما تنص المادة 7 من العهد الدولي للحقوق المدنيه و السياسية، الذي صدقت عليه مصر بالقرار رقم 536 لسنة 1981 واعتبر قانونا داخلياً بعد موافقة مجلس الشعب عليه و نشره بالجريدة الرسمية العدد 15 في 15 إبريل 1982 ، تنص علي " لا يجوز إخضاع أحد للتعذيب ولا للمعاملة أو العقوبة القاسية أو اللاإنسانية أو الحاطة بالكرامة ..."
فضلاً عن إنتهاك نص اتفاقية مناهضة التعـذيب و غيره من ضروب المعاملة أو العقوبة القاسية أو اللاإنسانية أو المهنية و التي تعد قانوناً داخلياً بعد التصديق عليها في 7/1/1988 م .

لذلك

أتقدم لسيادتكم بتلك الشكوى ، ملتسماً إصدار أوامركم بالتحقيق فيها و سماع شهود الواقعة وهما :
زياد عبد الحميد زكي المحامي و ياسر محمد فراج المحامي ، اللذان شهدا الواقعة . وإعمال حكم القانون فيما تضمنته من جريمة التعذيب التي إرتكبها مأمور قسم ترحيلات الخليفة الضابط / علاء سالم وبعض معاونيه الذين يمكني التعرف عليهم فضلاً عن تحويلي للطب الشرعي لإثبات ما تبقي من أثار تعذيب علي جسدي ، علماً بأن واقعة التعذيب قد تمت ، وكما سبق الإشارة إليها في يوم الأحد 22/3/2003 م .
وهو ما يعني مرور سبعة أيام تكفي لأن تندمل بعض الجروح و اختفاء أغلب الآثار .

وتفضلوا بقبول وافر الاحترام
مقدمه / جمال عبد العزيز عيد

تقرير ام زينب والفيديوهات

القوطة باتنين جنيه
الفاصوليا بتلاتة
الملوخية الخضرا باربعة
البصل بجنيه ونص
الكوسة بجنيه
السبانخ باتنين ونص
لقلقاس بتلاتة
الرز بيبتدي بتلاتة ويوصل لاربعة ونص النوع الكويس
المكروتة 400 جم باتنين ونص
السكر 900 جم بتلاتة
الخيار 2 جنيه
الزيت التحمير بتسعة ونص
الملحوظ ان فيه بعض الاغذية رخصت زي الكوسة والقوطة والخيار وفيه حاجات ضربت زي الرز والمكرونة والملوخية
والغريبة ان البضل بقى بجنيه ونص اما السجاير فطلعان تلاتينا في ايجادها
هم مش مفروض منعوا تصدير الرز عشان يرخص؟ ثم ايه السبانخ والكوسة اللي رخصوا دول؟
حد فاهم حاجة؟
دي بقى الفيديوهات بتاعة خناقة البنزينة قبل غلاء سعر البنزين بساعة واحدة

ح نعمل ايه يوم ستة ابريل

دوقت يا سيدي لما انت عمال المحلة دعوا لاضراب شامل يوم ستة ابريل احتجاجا على الغلاء
الفكرة هايلة نظريا، خصوصا يا كابتشن انت وهو ما حدش عمل حاجة بالنوسبة للغلاء خالص، الناس بتموت بعض وفي الصعيد دوقت عاملين مخازن سلاح وبيعمروا الفرفر وهم رايحين طابور العيش واللي ما بياخدش عيش بيخبط الفران بطوبة في راسه ده بقى موروث شعبي حاليا دوقت
طيب اضراب شامل وعام
في حالة الاضراب الشامل والعام الدولة مش ح تقدر ترفد مثلا مليون عامل عملوا اضراب
لكن تقدر ترفد عشرتلاف عامل
بالنوسبة لنا احنا طبعا تمانين ماليون فيهم حوالي خمستاشر واحد يعتمد عليه بجد
طب هل ايه؟
يعني انا مثلا اقطع مناخيري ووداني لو حد عندنا في التلافزيون عمل اضراب
لا يستحيل ابدا
الاستعلامات ماحدش ح يعمل فيها اضراب
بتوع الضرايب العامة
ده غير كمان ان الدعوة للاضراب ما وصلتش المتكحرتين فعلا: يعني بتوع خدمات المعاونة والكير سيرفيس والناس اللي بالنسبة لهم الكشري بقى كفيار
طب هل ايه؟
وعلى رأي ام زينب مرات بابا، فجأة لقيتها قعدت جنبي وبصت لي كده: طب وبعدين يا نوارة
قلت لها وبعدين ايه يا ام زينب
قالت لي يعني اخرة الترنت كوم بتاعكوا ده والاستعصامات والحاجات دي...ح نفضل كده اللي معاه ياكل واللي معاهوش ما ياكلش؟
ما عرفتش ارد
الا صحيح اخرة الترنت كوم والاستعصامات ايه؟

لا حول ولا قوة الا بالله

بعض المدونات العربية وباللغة الانجليزية والالمانية كمان واصحابها مسلمين بيتناقلوا بفرح وفاة احد راسمي الرسوم المسيئة اسمه اريك ابيلد سورنسن عن عمر يناهز 89 سنة
يا عيني يا ربي....كده دخلنا في تقطيع القلب، يعني بصرف النظر عن اني دورت في الوكالات كلها عن الخبر ده ما لقيتهوش...بس الراجل عنده 89 سنة ومات، مات زي ما كلنا ح نموت، ان اجلا او عاجلا، ايه بقى؟ ايه يا عيني كمية الكبت والغلب اللي الناس فيه ده، والله العظيم صعبوا عليا

حضانة نورماندي تو تو تو

والله انا باحب الاطفال بس ايه اللي يخلي ام رؤوم تاخد ابنها اللي عنده ست شهور للسينما في البرد ده حفلة ستة؟ ماحدش يقول لي امال ح تسيبه فين؟ ما تسيبوش خالص ما حبكش السينما وهي مخلفة رضيع...مش ح يطير الفيلم كلها سنة وينزل على كل القنوات الفضائية. امبارح كنت باشوف فيلم الجزيرة كالعادة ورحت حضانة نورماندي (سينما نورماندي سابقا). ممكن افهم الاطفال من سن شهرين لسن سنتين ونص بيعملوا ايه في فيلم الجزيرة غير انهم بيزنوا ويصرخوا واللي عندهم من تلات لاربع سنين بيجروا في السينما.

انا مش باتضايق من الاطفال في اي مكان لاني ببساطة باعتبر ان الدنيا اصلا بتاعة الاطفال واحنا هنا في الدنيا خدامينهم وبس. فيه ناس بتتضايق من الاطفال في الجوامع ودول بابقى عايزة اشنقهم لان المسجد بالذات ده بقى مكان الاطفال ومش باتشتت في الصلاة لما بيبقى حواليا عيال بالعكس باحس ان الملايكة حواليا؛ صحيح هم بيركبوا على ضهرنا ولما بنسجد يروحوا نازلين يسمعوا بنقول ايه ويبتدوا يوشوشونا او يقولوا بصوت واطي في ودننا: بِس بِس بِس بِس بِس......وساعات يطلعوا على ضهر الامام وهو ساجد ويمسكوا الميكرفون ويقولوا: الوووووووووووووووووووو. بس في الصلاة انا عارفة انا باقول ايه ولذلك فمافيش مشكلة انهم يصوتوا جنبي لان الصلاة في الاول بتخرج من القلب على اللسان وهم مش ممكن يصوتوا في قلب حد...لكن في السينما انا ما اعرفش الممثلين بيقولوا ايه...ماحدش يقول لي ما انت شفتي الجزيرة قبل كده مرتين، طيب واللي ما شافش الجزيرة قبل كده؟ ثم انا داخلة الفيلم عشان اشوفه تاني بقى وللا تالت ماحدش له دعوة.

سينما نورماندي من السينمات القديمة اللي لسة فيها لوج وبلكون والتقسيمات الطبقية المقرفة دي، زجحت تذكرتنتن في اللوج واللي ورايا جايبة عيلة عندها تلات شهور واللي جنبي جايبة عيل عنده شهرين وحاطاه في سبت وسايبة السبت على السلم واللي رايح واللي جاي تقول له حاسب تشوط البيبي وتزعق للناس واثناء الفيلم طول الفيلم قاعدة جنب جوزها كده: يااااااااااااا ده حقيقي ده؟ بيحصل ده بجد...اممممممممم

وبتشتغل صدا صوت للفيلم السقا يقول لهند صبري: ح تبجي مرتي يا كريمة تروح قايلة لجوزها: ح يتقدم لها بقى ويطلب ايدها، محمود يس يقول الكبير بنفسه هو اللي ح يحضر العملية...منصور ابني تروح قايلة لجوزها: هو بقى عمله الكبير بداله....بص...التانيين متغاظين

يقول لها: آه غيرانين منه

الله حاسب يا اخ تشوط البيبي

اهم رايحين اهم يستلموا البضاعة....بيستلموا البضاعة....ياااااا هجم عليهم حرامية....ياااااااا ده هرب.....يااااااده طلع ما هربش.....ده مستني فوق النخلة.....هو طالع على النخلة ليه......اااااه ده عايز يضربهم....ده بيضربهم.....حاسب يا بابا لتشوط البيبي (طبعا لان العيال كانوا بيجروا فكانوا ممكن يشوطوا البيبي)......آه ده الراجل ده خانهم...ده ابنه....يا ده بيقول انه اجر مطاريد.....دي كريمة حبيبته

مع ملحوظة انها بتتكلم بصوتها العادي اللي بتكلم بيه جوزها وهي واقفة في المطبخ وهو قاعد في الصالة وبتسأله عايز بصل في السلطة وللا لا؟

والحقيقة ان المواطنة دي مش شاذة....انا اللي كنت غريبة في السينما لان كان ورانا واحد ابتدى الفرجة على الفيلم من اول ما الاسامي نزلت ابتدى يقراها بصوت عالي كده: الجزيرة...أحمد السقا...هند صبري...وضيف الشرف عزت ابو عوف لحد ما قلت له لوسمحت الصوت سكت شوية واول ما ابتدى الفيلم قعد يقول كده: ده محمود ياسين....ده عبد الرحمن ابو زهرة...ده احمد السقا....دي زينة...ده باسم سمرة وقضى الساعتين بتوع الفيلم بيعرفنا كلنا بالممثلين واحد واحد والغريبة انه عارف اسامي كل الناس حتى الكومبارس ما كانش ناقص غير يقول لنا اسماء المجاميع اللي بتمثل الامن المركزي عسكري عسكري.

اللي ورايا اللي كانت هي وجوزها جايبين عيلة عندها تلات شهور كل شوية العيلة تعيط اروح باصة لهم يروحوا مسكتينها...إذن....هم بيعرفوا يسكتوها...امال بيسيبوها تعيط ليه؟

ده غير طبعا العيال الاكبر شوية اللي انا قلت انهم بيجروا وانا طبعا مش بازعق للاطفال خالص....مش بانجح في الموضوع ده يعني حتى لو حاولت باضحك واضحك العيال عليا، ومش عايزة اقول لامهاتهم لان الامهات المصريات بيعملوا حاجة غريبة قوي: تسيب ابنها يقتل الناس لو عايز لحد ما تقول لها يا ستي ما تحوشي ابنك تروح ساحبة الواد من شعره وتنزل فيه ضرب انتقام قدام كل الناس من غير ما تحاول تستخدم معاه الذوق في الاول خالص وانا مش فاهمة ازاي هي امه وبتضربه كده؟ انا اصلا مش فاهمة ازاي كائن خده ناعم ومدور وكفه مكبب وصوابعه صغيرة كده وينفع ينضرب؟ اذا كان هو ينضرب امال هي يتعمل فيها ايه؟

وتتبع الام المصرية استراتيجية معروفة في ضرب العيال: في الاول تروح شاداه من دراعه لحد ما تملخه وبعدين تسفخه بالكف على وشه ولما يجري منها تسحبه من قفاه وبكفها ضاربة دماغه من فوق كأنها بتنطط كرة سلة وساعات تقرصه في دراعه او رجله. كل ده مش عشان هي معترضة انه عمل حاجة غلط - مع ملحوظة انه ما عملش حاجة غلط ده طفل ومن حقه يجري ويتنطط هي اللي غلطانة انها تاخده في اماكن ما ينفعش يعيش فيها حياته كطفل - لكنها بتبقى زعلانة ان حد وجه لها نقد بدليل انها وهي بتضربه بتقول له: خليت اللي يسوا واللي ما يسواش (اللي هو حضرتك صاحب الملحوظة) يقول لنا بس.

المهم يعني فيلم الجزيرة كان حلو قوي خصوصا اني شفته اتنين في واحد، مرة على الشاشة ومرة الست اللي جنبي حكتهولي لبعدين اكون مش واخدة بالي وللا حاجة، ده غير الاخ اللي عرفني على اسماء الممثلين خصوصا انه ابتدى في نص الفيلم يقول: ده احمد السقا بيعمل دور منصور الحفني، ده باسم سمرة بيعمل دور حسن الحفني وهكذا

الا صحيح يا اخوة: هم لغوا اوبشن السايلنت من الموبايلات الجديدة؟ اصل انا الوحيدة اللي استخدمت الاوبش ده امبارح

مراقب الدودة

اول ما قالوا يا قناة معلومات اشتغلت فيها وكان اللي بيرأسها حسن حامد، كان واحد بيفهم اعلام صح وبيساعدنا اننا نحب الشغل ونشتغل، كان بيبقى قاعد على الجهاز اللي جنبي وانا قاعدة اشتغل واغني ولما ابص له اقول له: معلش يا استاذ حسن انا ما اقدرش اشتغل من غير ما اغني..يضحك ويقول لي: غني زي ما انتي عايزة المهم تشتغلي...مشي الاستاذ حسن وبلاد شالتنا وبلاد حطتنا وعملوا لنا نظم جديدة واحدة واحدة اتحولنا من محررين اخبار لموظفين ودلوقت بيقعدوا لنا ميقاتي على الامضا يبص للساعة ويبص على الامضا ويفضل طول الشيفت قاعد يتفرج علينا ويكتب فينا تقارير زي توفيق الدقن في فيلم ابن حميدو آه.
تقول مين بقى اللي بيقعد القعدة دي؟ مديرين ادارات...اي والله، راجل مدير ادارة محترم في مكان اعلامي محترم في هذا الجهاز العظيم على راي خليفة خلف خلف الله خلف خلاف المحامي قاعد زي ناظر الزراعة يراقب الانفار وكل مرة يدخلوا فيها ابقى حاسة انهم راكنين الحمارة برة ومش ناقصهم غير منديل محلاوي تحت طربوش احمر فلطح.....طبعا المديرين دولم كانوا في يوم من الايام زمايلنا ماهو انا من ايام سيدنا خشبة وانا في القناة دي، فيه منهم ناس عاقلة وحاسة ان دي مش شغلانة يشتغلها اعلامي صحيح قاعد على الامضا مراقب دودة زي ما كلنا مسمينهم لكن ادي الله وادي حكمته ساعات يبقى قاعد كده مضطر ساعات يطلع كتاب وللا حاجة مفيدة يعملها بدل ماهو قاعد كده، مافيش الا واحد بقى ده نيموذج للانسان الانوي الوظيفي، بيتكلم زي محمد صبحي لما كان بيعمل دور آدم في مسرحية الهمجي...لما كان جوز حورية. الله يرحم بقى قبل ما يبقى مدير كان بيجي القناة يقعد ساعة بالظبط ويمكن اقل ويبقى لابس شبشب مش عارفة ليه وبعدين ينزل يعمل شغل في اي حتة تانية. بس الحقيقة هو مبسوط قوي بشغلة مراقب الدودة دي، وطفش كام واحد من القناة، لدرجة ان كان عندنا واحد في القناة بيشتغل في الجمهورية بقى يبعت جوابات من مجهول لجريدة الجمهورية عشان يقطع عيشه من هناك وفي الاخر دخل لمديرة من المديرات اللي جم قبل المديرة الحالية وقال لها انه بيشتغل في الجمهورية وقومها عليه لحد ما مشاه من التلفزيون كله، وفيه واحد تاني زميلنا مشي من البلد كلها بسببه، وفيه واحد تالت اتنقل بسببه، وواحده زميلتنا راحت الصين بسببه، وهو الحقيقة بينبسط قوي لما يئذي الناس ويطفشوا من الكون بسببه، بس انا حاسة ان لسة هدفه ما اتحققش، متهيألي حلمه الكبير ان حد مننا ينتحر بسببه، دلوقت هو مش وراه غيري انا وكام بنت كده صغيرين.
وبما اننا شغلتنا صحفيين يعني شغلتنا نكتب اخبار، وبما انه هو قاعد مش بيعمل حاجة غير بيراقب الدودة والانفار ونفسه بقى يكتب اخبار يبدو انه وجد فيا مادة خصبة لكتابة الاخبار، من ساعة ما مسك مراقب دودة وهو ماوراهوش حاجة غير يكتب فيا عرايض زي توفيق الدقن، لدرجة ان نفس رئيسة القناة ابتدت تتخنق منه خصوصا وهو كل عرايضه: وكانت تضحك بصوت عال....وكانت تغني....وكانت بتهرش في راسها...وهكذا، غير الزملا بقى اللي قاعد لهم: ده طقطق صوابعه، ده لعب في مناخيره، ده دعك عينه، ده اتمطع.
طب ايه؟ يعني هم مش مفروض يشغلونا وللا ايه؟ القناة اول ما اشتغلنا فيها كانت مواكبة لاحدث تطورات الاعلام، بس دلوقت كل الناس بتطور التليتكست في كل انحاء العالم الا احنا، والاجهزة قدمت والكراسي قدمت وآليات الشغل قدمت واحنا قاعدين. اكتر ناس بتشتغل عندنا السعاة رايحين جايين يجيبوا شاي وقهوة، والاخ مراقب الدودة ده قاعد يكتب في شكاوى يسلي نفسه، واحنا بنقدم اقتراحات للتطوير والاقتراحات بتروح لرئيس القناة ورئيس القناة بتطلعها للي فوقيها واللي فوقيها بيطلعها للي فوقيه واللي فوقيه بيطلعها للي فوقيه..يعني افهم بس احنا مستنيين الاقتراحات دي توصل لربنا مثلا؟ طيب ما يقولوا كنا دعينا ربنا في الصلاة وخلصنا ده قريب يعني مش محتاج كل السلالم دي.
الغريب بقى ان كل القناة مسمية الاخ آدم الهمجي: مراقب الدودة.....مافيش مخلوق ما بيقولش عليه الكلمة دي حتى اللي بينافقوه ويقعدوا يقولوا له: والله بحبك وهم والله العظيم كدابين وبيلعنوا سنسفيله على السبحة، والغريب ان الكل بيكره هذا الكائن من اول رئيسة القناة لحد السعاة، والغريب انه بيقول لي انا بانام "مورتاح" اه والله بيقول "مورتاح" والغريب ان مافيش مدير مكروه غيره لان كلهم حاسين ان الشغلانة المطلوبة منهم مهينة لهم قبل ما تبقى مهينة لينا احنا الفصل اللي موقفين عليه واحد يكتب اسامي اللي بيتكلموا. طيب بينمام مورتاح ازاي وهو عارف ان كل البشرية بتكرهه...نفر نفر، وان كل المديرين التانيين عادي يعني فيهم ناس محبوبة من الكل فيهم ناس شوية بيكرههوهم شوية بيحبوهم فيهم ناس في حالها لا حد بيكرهها ولا بيحبها فيهم ناس مختلفة مع فلان ومتصاحبة على علان انما هذوها الصخص بالذات عليه اجماع زي الاجماع اللي على صدام اللي اخد مية في المية، مافيش مخلوق بيحبه واشك ان مراته وعياله يكونوا بيحبوه ده الله يكون في عونهم والله. وهذا الاخ المورتاح واشباهه لما بيبقى فيه شغل صح ما بيبقاش فيه مجال لظهور امثالهم على السطح ولكن لما يتحول الناس الى موظفين وبدل ما نبقى صحفيين نبقى قاعدين نبص في الصقف وهو قاعد باشكاتب الشكاوى دي تبقى عيشة؟
احنا عملنا اللي علينا واشتكينا وقلنا وقدمنا اقتراحات للتطوير، بس طب وبعدين ما احنا لازم بتوع الادارات يساعدونا ويتكلموا مش عارفة بيخافوا ليه؟ المديرين بطبعهم خوافين ما اعرفش ليه؟ مع ان المفروض ان المدير بقى يبقى مدير مش قاعد خايف من اللي فوقه طول الوقت كده....مرة الاستاذ مورتاح قال لي انه قدم اقتراحات للتطوير واذ بي افوجأ انه مقدم اقتراحات ما ينفعش تتنفذ غير في القسم ولو دريت بيها حروق اللسان ح يرفعوا قضية ويطالبوا باعدامه.
الا هو ما دخلش كلية الشرطة ليه؟ دي حتى كلية مفيدة قوي للناس اللي بتحب تئذي الناس لوجه الله تعالى

عاجل: قضية مصري ظلم في السعودية

يا شباب الراجل ده دخل لي على المدونة وقال لي لو سمحتي زوري مدونتي

دخلت لقيت حاجة تغم وتقطع القلب

مصري راح يشتغل في السعودية اتنصب عليه من الكفيل ولما جه يطالب بحقه طلع عين اللي جابوه وتم التدخل في قرار القضاء من جهات عليا...عليا جدا...عليا خالص....عليا لاقصى درجة

ارجو منكم زيارة مدونته ونشوف نقدر نعمل له ايه

http://gamal51.blogspot.com/

بجد يعني الراجل فايض بيه على الاخر

ردود فضيلة المفتي علينا

فضيلة المفتي الدكتور علي جمعة رد علينا

في الأهرام النهاردة والمقال هنا

http://www.ahram.org.eg/Index.asp?CurFN=writ2.htm&DID=9398

وأنا أرجو من الجميع قراءته ولا حول ولا قوة إلا بالله

مش عايزة أعلق قبل ما تقروه لبعدين ابقى بأثر عليكوا

واحدة واحدة كده اقروه كلمة كلمة وبعدين نتكلم

مش عارفة اقول رأيي وللا لا دلوقت

بصراحة مش قادرة امسك نفسي المقال ضايقني جدا

بس مش ح انطق بولا كلمة غير بكرة ان شاء الله

ان احياني ربنا وكان ليا عمر

عشان تاخدوا فرصة تقروه بتركيز وانتوا برضه تكونوا رأي

ويمكن يكون له حق وأنا اللي غلطانة

وعلى كل الاحوال كامل الاحترام لفضيلة المفتي

بصرف النظر عن هذا المقال