تحديث:
اولا: الله اكبر ولله الحمد على رأي الاخوان
منظمة العفش الدولية عملت نفس المقارنة اللي عملتها ما بين ايران والنظم الغربية وخصوصا امريكا
ثانيا: الله اكبر ولله الحمد
عشان فيه خبر بيأكد الكلام اللي قلته بخصوص ان الحملة اللي معمولة على نجاد بالتحديد وعلى ايران بشكل عام هي حملة استعمارية لتأهيل الرأي العام العالمي لضرب ايران وتأهيل الرأي العام العربي بالتحديد لعدم التعاطف مع ايران لما تنضرب
الخبر بيقول ان علي اكبر ولاياتي، قال بيقولك، ان الخوميني قال في مرة من المرات ان الشعب الايراني احسن مش شعب الرسول
وبمراجعة الكلام ده لقيته بيقول احنا دلوقت نبقى افضل من ايام الرسول
هممممم
طب ما السنة بيقولوا كده لما بيفسروا الحديث الرسول: اشتقت لأخواني. وبيقولوا ان اللي آمن بالرسول بعد وفاته من غير ما يشوفه احسن من الصحابة، وده حديث صحيح وصريح عندنا في كتب السنة ده اولا
ثانيا: اشمعنى دلوقت يعني؟ ايه اللي جاب سيرة الخوميني دلوقت، ما لو قال كده الخوميني ده ميت من عشرميت سنة
عموما احنا نعمل حسابنا ان الهلولة بتاعة الشيعة كفار، والخوميني مجنون، وايران عايزة تحتل العرب حتشتد عشان ايران قربت تنضرب وشكل الحرب كده بالكتير على اخر السنة، ده اذا ما لقوش تلكيكة قبلها ونمنا صحينا لقيناهم بيضربوها، بس هم غالبا حيعملوا زي ما عملوا قبل العراق، حملة كبيرة وفيديوهات ويطلعوا من القديم والجديد صحيح وتأليف والجدع يدور، ويطلع اوباما يحذر نجاد تلات اربع مرات، وبعدين اديله، وحملة الحرب الاعلامية اشتدت بالفعل، والكل حيشارك في الهلولة دي
العلمانيين حيقولوا حكم الملالي، وديكتاتور، والليبرالي حيقول دول دينيين، الشيوعي حيقول دول رأسماليين، والقوميين حيقولوا دول فرس بيكرهوا العرب
والاسلاميين حيقولوا الشيعة الكفار، وياخدوا الكلام زي الجملة دي، اللي احنا اصلا بنقولها ومؤمنين بيها وعندنا حديث نبوي بيها وظيطوا عليها، زي ما قالوا قبل كده الخوميني بيقول القرآن محرف، ولما تقرا الكلام تلاقيه بيقول: التحريف على ثلاثة اوجه حجب ايات الله، او اضافة كلام البشر على ايات الله، او اساءة تفسير ايات الله، وقال ان الكتابيين عملوا التلات حاجات دول، لكن فيه بعض المسلمين عملوا الاخيرة فقط وهي اساءة تفسير ايات الله وبكده ياخدوا ذنب التحريف، ماشي ماشي، الشيعة كفار والايرانيين فرس، والملالي شموليين
برضه ما يستاهلوش يتقصفوا وما يستاهلوش يتعمل فيهم اللي اتعمل في العراق وافغانستان وغزة
ولو بيعبدوا العجل ما يستاهلوش.... اديني باقول اهو من قبل الحرب عشان ابرأ نفسي امام الله
وزي ما قلت في التعليق كل مرة امريكا قبل ما تضرب بلد تدي اوامر لشباشبها يعملوا حملات مضادة ويشيطنوا الهدف لحد ما خلاص الكل يقتنع ان الهدف شيطان يروحوا ضاربين
عملوا كده مع كل الدول اللي ضربوها واحد واحد مع اختلافهم، جمال عبد الناصر كان اشتراكي، وطالبان سلفية، وحماس اخوانية، وصدام.. صدام.. صدام مجنون، ودلوقت ايران شيعية
وكلهم سبحان الله شياطين وبديل وقرون قبل ما ينضربوا بخمس دقايق
وانا ما اقدرش اعمل حملة لمضادة لحملة الحرب الامريكية على هدفها التالي، لاني فرد واخري مدونة ومقال
بس انا الحمد لله لا شاركت في حملة الحرب على طالبان ولا على حماس ولا حتى على صدام ومش ناوية اشارك في الحملة الاعلامية العسكرية على ايران وكل اللي املكه اني اعمل زي ما باعمل كل مرة، اخالف الظيطة والهيصة والمولد والناس تشتمني وتتهمني وانا احسبن عليهم واحملهم مسئولية المشاركة في قتل الناس بالكلمة زي ما حملتهم مسئولية دم الناس وهم بيشتموا فيهم اثناء دبحهم قبل كده واختصمهم عند الله واستحمل الشتيمة واحتسبها عند ربنا ... ده اخري وماليش حاجة تانية باعرف اعملها، عارفة ان جهدي قليل ومحدود، بس لو في ايدي حاجة تانية اعملها كنت عملتها
وعشان نبقى واضحين لو ايران بقت زي العراق البلد اللي ساندينها بعود كبريت دي حتتكل على الله، زيادة ماهي متكلة اساسا، ولا يخفى الخراب اللي حصل لنا بعد ضرب العراق بالتحديد، واللي حيحصل لنا بعد ضرب ايران لا يقارن باللي حصل لنا بعد ضرب العراق
وانا برضه بريئة بلساني وايدي وحادافع عن الناس الموحودة المهددة ضد حملات الاستعمار واللي عايز يلغوص فيها حسبي الله عليه
-----------
تحديث:
نجاد برج العقرب وعمال يخانق في دبان وشه ومستمتع بالحكاية دي، بينبسطوا لما بيتخانقوا مع الناس، دي حاجة بتريحهم، وهو غلبان وطيب والله العظيم، هو بس عنده طاقة زيادة... حد برج عذراء او حوت او ميزان او سرطان او تور يصالحه على الناس ويهديه شوية، ممنوع منعا باتا حد من مستشاريه يبقى برج الجدي او الاسد او القوس او الحمل او الجوزاء.. حيسخنوه زيادة وهو ما حيصدق... طب والله انتوا ما فاهمينه، والله كمان مرة غلبان وطيب------------بيتعامل معاملة البطة السودا في العالم كله، حتى روسيا اتخانقت معاه:((
لا حرام... حرام كده، كده اوفر قوي يعني
انا عايزة افهم نجاد عمل ايه اكتر من امريكا والاتحاد الاوروبي ومش حاقارنه بالدول العربية اللي بتاخد دعم من امريكا والاتحاد الاوروبي لانه احسن منهم
نجاد عمل ايه اكتر من انجلترا اللي قبضت على واحد عشان الاكاونت بتاعها على الهاي فايف اسمه: شاعرة الارهاب؟
عمل ايه اكتر من اللي عمله بوش وبيعمله اوباما وبتعمله كل دول الاتحاد الاوروبي مع "المشتبه" في انهم "على صلات" بالقاعدة
زي ما هم قبضوا عليهم وعذبوهم في كل دولة اوروبية وفي الولايات المتحدة الامريكية
هو كمان قبض على "المشتبه" في انهم "على صلات" بالسي اي ايه والمخابرات البريطانية، وبعدين الراجل طلع معاه حق، مش مجنون ولا مهووس ولا حاجة، واوباما قال انه مد لهم شبكة آمنة للاتصال، يعني مخابرات اهو عيني عينك
ماهو يا اما اوباما بيشوه سمعتهم عشان يعمل فتنة جوة ايران، وفي الحالة دي المعارضة الايرانية ملزومة تبرأ نفسها، يا اما نجاد معاه حق وهم جواسيس فعلا، وفي كل الاحوال، اهو بيتصرف زي زعيمة الديمقراطية في العالم امريكا اللي صادرت اموال المسلمين وقفلت لهم الجمعيات الخيرية بتاعتهم، وشمعت لهم مساجدهم، وعذبتهم في السجون، وقتلتهم، وقررتهم لما اعترفوا انهم هم اللي قتلوا هابيل وان قبيل بريء، مش امريكا دي بتاعة الديمقراطية، اهو الراجل جاي بانتخابات زي اوباما وبوش، وبيحمي الناشونال سيكيورتي زي اوباما وبوش، وبيراقب النت زي انجلترا وزي اوباما وبوش، انا عايزة اعرف هو زايد عنهم في ايه؟ اذا كان مبارك اللي ما جاش بانتخابات بيساندوه
هو قتل كام في مظاهرة واتقتل له كام في الحرس الثوري بتاعه، وامريكا ودول الاتحاد الاوروبي قتلوا كام وشردوا كام في العراق وافغانستان
اليونان عاملت المتظاهرين احسن من نجاد في ايه؟ تركيا نفسها عاملت الاكراد احسن من معاملة نجاد لمعارضيه في ايه؟
ايه كل الاضطهاد ده؟ ده بيتعامل كأنه مسيحي في مصر او مسلم في امريكا او شيعي في الخليج او واحدة ست في السعودية
وهو اساسا حيمشي كمان اربع سنين، ماشي كمان اربع سنييييييييين، امال اللي قاعد للنفخ في الصور ده يبقى ايه؟
لا انا صعبان عليا.. صعبان عليا قوي وصعبان عليا كمان انه مش عارف يسايس اموره وبيتخانق مع الدولة الوحيدة اللي راضية تكلمه
هم صحيح غدروا عليه ووافقوا على العقوبات، بس يا سيدي يوافقوا وللا ما يوافقوش حتفرق ايه؟ بتمسك في خناقهم ليه؟ انت ناقص؟
لا حرام.. حرام حرام حرام
والشباشب اللي هنا اللي بيقولوا عليه قال ايه ديكتاتور وهم جورج بوش بذات نفسه فاتح لهم دكاكين وبياخدوا مرتبات من امريكا من ايامه ولحد دلوقت
طب ما قالوش لبوش انت ديكتاتور ليه؟ ماهو ناجح بالتزوير هو كمان، ما قالوش لاوباما انت ديكتاتور ومنافق وبتدعم مبارك ليه؟
ما فتحوش بقهم على انتخابات السودان اللي تم التزوير فيها تحت سمع وبصر المراقبة الدولية ليه؟
اشمعنى نجاد يعني اللي كل الناس بتشتم فيه؟
لا دي قذارة وظلم بقى... وبما انه مالوش حد دلوقت فانا متعاطفة مع نجاد وباحبه وحاقف جنبه، ماهو انا ما اقدرش الاقي انسان موحود كده وكل الناس متكالبة عليه بالظلم والبهتان والنفاق واسكت، انا متخصصة في الموحودين اللي مالهمش حد، حتى الزمالك
مافيش حد في العالم كله بيتعامل المعاملة اللي بيتعاملها نجاد، ولا شافيز، ولا كاسترو، ولا حتى صدام في عز الحصار، ونجاد ما عملش ولا حاجة من اللي عملها كل دول، لا غير الدستور عشان يقعد على قلب الناس زي شافيز وكاسترو، ومن قلة الادب والسفالة انه يتقارن بصدام اساسا، بيسمموه الاربع سنين اللي هو قاعدهم ليه؟ ده لو كان كاسترو وللا شافيز وللا صدام كان واحد زي موسوي ورفسنجاني اخدوا اعدام ولو خامنئي اعترض كان اعدمه هو راخر... انما ده راجل غلبان قوي
ههههههههههههههههه
طبعا انتوا عارفين انا جامدة يعني، اجمد من روسيا وامريكا والصين ووقفتي جنبه حتنفعه اخر حاجة... ح.. ح... حادعي له
اه والله حادعي له، ربنا يجبر خاطره وينصفه على كل العالم اللي بيضطهده، قادر ربنا ينصفه عليهم كلهم ويظهر كدبهم ونفاقهم وتظيطهم وتهليلهم في الهيصة، يارب، وينور له بصيرته ويهدي له نفسه كده ويعرفه مصلحته ويلهمه التصرف الصح
يارب والنبي ما تعدي الاربع سنين دول من غير ما تنصفه وتجبر خاطره وترفع راسه وتكسف اللي عمالين يضطهدوه، وغلاوة حبيبك النبي يارب، يارب، يارب
آمين
