اي بلد في الدنيا اقتصادها معتمد على البقشيش والسمسرة مش ح يبقى فيها ناس عندهم اخلاق، عشان لا الشحاتة ولا الحنجلة بتنتج بني ادمين محترمين
ماحدش بقى يكلمني على الدين، وللا الاخلاق، وللا قيم، ولا البلد مافيهاش رجالة، ولا فيها رجالة
احنا اتسترنا في السبعينات عشان كان فيه فرصة ان بعض المصريين يسافروا الخليج ويضخوا فلوس للبلد، لكن تجريف الاراضي وهدم الصناعة ابتدى من السبعينات، ولولا سفريات الخليج كان زمان البلد دلوقت معتمدة على....ما تخلوناش نتكلم
وعمالين يتمادوا في الخطة الاقتصادية اللي ابتداها السادات ودلوقت وصلت لذروتها
خصوصا بعد ما العراق (اللي كانت ساترة بيوت كتير برضه) اتهدت على دماغ المصريين ورجعوا هربانين وشقا عمرهم راح عليهم
يعني مافيش فرصة ان واحد يشتري حتة ارض ويزرعها
ولا حتى يعمل صناعة صغيرة
ودلوقت البلد بتاكل عيشها منين؟ من ناس تيجي من برة تصرف فلوسها علينا، يا نمد ايدنا وناخد تيبس (دلوقت الناس بقت تقول على الشغل: طالع لي "حسنة" كويسة منه) يا نهنكر ونشتغل سماسرة ونطلع كوميشن
دي مش شغلانات، دي سفالة، وانحطاط، وقلة ادب، وكل حاجة بقت معتمدة على البقشيش والسمسرة، حتى الطب، والهندسة، والفن، والصحافة، ده التدوين بقى كده، كل حاجة، كل حاجة
صلي بقى وربي دقنك وصوم اتنين وخميس، وحج بالفلوس اللي انت شاحتها كل سنة، مهما تعمل، انت عايش عيشة مش محترمة ومش ح تبقى محترم، انت متسول وفي احسن الحالات شماشيرجي بتطلع بسبوبة
من هنا بقى لحد ما ربنا يفك اسرنا من الورطة اللي ورطها لنا السادات وبينفذها مبارك بكل الاخلاص والتفاني - مما يجعله الوحيد اللي مخلص في شغلته ومهمته في البلد
نستحمل بعض بقى، نستحمل بعض على قد ما نقدر، ما نمشيش نشتم في اخلاق الناس، شوف اخلاقك الاول، اكيد اتأثرت بشغلانتك يعني، واللي مرتاح سنة يستحمل اللي تعبان اكتر منه، ما تبقاش راكب عربية مكيفة وتتخانق مع سواق ميكروباص وسواق عربية نص نقل وسواق تاكسي، احترم نفسك وخلي عندك كرامة - لما تفتري على الاضعف منك (حتى لو غلطان) يبقى انت بني ادم لا عندك كرامة ولا عندك دم ولا احساس، كتر خيره انه ما رفعكش بالمطواة عشان ياخد حقه، ما تبقاش راجل وتتخانق مع ست، ما تبقاش شاب وتتخانق مع راجل كبير (حتى لو قليل الادب - مش عارفة ايه اللي حصل الرجالة الكبار بقوا قلالات الادب قوي - بس استحمله بكرة تبقى قده) ما تبقاش مسلم وتتخانق مع مسيحي، ما تبقاش قوي او مرتاح شوية او عندك اي امكانية على اي مستوى وتتخانق مع الاضعف وللا الاتعب وللا الاعجز، احترم نفسك، لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل
دي بلد لا فيها انتاج ولا فيها قانون يعني مافيهاش اي حاجة تخلي البني ادم عنده مرجعية اخلاقية، حتى الدين بيتفسر على مزاج صاخيب المخيل، وفيها ناس تعبانين، نساع بعضينا شوية، ونستحمل بعضنا شوية
لو الرحمة كمان راحت من البلد يبقى دي بلد ليه بقى؟ يبقى مالهاش لازمة اصلا، ربنا ح يجيب ضرفها، ولو جاب ضرفها مش حلو علينا
