ومين بقى اللي ح يفرض عقوبات على امريكا؟

كلمة القذافي/احمدي نجاد

حديث:
لقيت كلمة احمدي نجاد، كانت حلوة قوي، والحمد لله ما جابش سيرة الهولوكوست، فرنسا وامريكا وكندا واسرائيل انسحبوا اثناء كلمته وبعدين عرفت بعد كده انهم كانوا متفقين من قبل الجلسة انهم يعملوا الحركة دي وهو بيتكلم عشان "لا شيء اكثر تعبيرا عن الاحتقار من الانسحاب اثناء القاء الكلمة في الامم المتحدة" قالوا كده، وده كان بناء على طلب الجمهور اللي هو اسرائيل، هي اللي طلبت منهم كده، وبعدين وانا باتفرج لقيت مقعد الوفد الالباني خالي، مع ان ما جابوش سيرته، بس انا متأكدة انه شفته خالي، هي البانيا دي راخرة ايه دي؟
وعرفت ان فيه ناس انسحبت اثناء كلمة القذافي، على فكرة، غجر وشراشيح، اي والله، ده مش اسلوب محترم ابدا لما يتفقوا مع بعض عشان يربكوا اللي بيتكلم، دي قلة رباية، لو حد مننا عمل كده كنا بهدلناه وكنا قلنا له الانسحاب ضعف وكنت اقعد ورد وكل الكلام الخايب ده، صح؟ مش متربيين والله، مالهمش ام علمتهم ان ما يصحش تمشي وحد بيكلمك؟









مش لاقية كلمة القذافي بالعربي على النت، الخواجات نزلوها قبلنا، اللي ما شفهاش يشوفها الكلمة مهمة فعلا وكلها كلام حق، بصرف النظر عن رأينا في القذافي نفسه، سيدنا معاذ بن جبل قال: اقبل الحق وان جاءك من منافق او كافر. وهو على الاقل مش كافر يعني هههه

الكلمة فعلا مهمة وكويسة وشاملة وبيتكلم بمكنونات نفساوياتنا

هو هطرس شوية بالنوسبة ل: احنا عايزين نريح امريكا من تعبنا وهم ناس ضايفونا كتر خيرهم وكدهون يعني
ههههههه
كلمة احمد نجاد كانت موزونة اكتر وكانت حلوة قوي برضه ح ادور عليها واجيبها بس انتوا اتفرجو على دي

عبد البرماوي يكتب عن الفسفور الابيض وحرب الابادة

الاستخدام المكثف للفوسفور الأبيض، أحد أسوأ الأسلحة المحرمة دوليا، من قبل جيش إسرائيل المحتل ضد تجمعات المدنيين فى قطاع غزة هو جريمة حرب بكل المقاييس، هذا ما تثبته وترصده التقارير الإعلامية وشهادات الشهود والتقارير العيادية بمستشفيات الإغاثة فى القطاع، وخرج بشأنه بيان عن منظمة مراقبة حقوق الإنسان (هيومان رايتس واتش) الدولية أشارت فيه المنظمة لقيام باحثيها في إسرائيل برصد قيام المدفعية الإسرائيلية يومي 9 و10 يناير 2009 بإطلاق قذائف عدة في سماء مدينة غزة وجباليا تحتوي على الفوسفور الأبيض. وأشار البيان – بدافع الحيطة - لاحتمال أن إسرائيل تستخدم مادة الفوسفور الأبيض "كآداة تمويه" على تحركاتها العسكرية، وهو استخدام مباح في الأصل من قبل القانون الدولي الإنساني (قوانين الحرب)، وأضاف البيان أن الفوسوفر الأبيض له آثار بالغة على أجساد البشر، وأن من شأن استخدامه فى قطاع غزة ذى الكثافة السكانية التي تعد من أعلى النسب في العالم أن تؤدي هذه المادة الحارقة لإيذاء المدنيين بالجملة

والفوسفور الأبيض كما تفيد المراجع المتوافرة على الشبكة هو مركب كيميائى صلب شبه شفاف أشبه بشمع مائل للصفرة، ينفجر عند تعرضه للهواء منتجا لهيبا حارقا ودخانا كثيفاً. وهو نفسه ما يستخدم فى طلقات التتبع التى يطلقها البحارة فى الليل طلبا للاستغاثة عند تعرض السفن لخطر الغرق، لتحدد مكان وجودهم لسفن الإنقاذ، كما يستخدم أيضاً فى قنابل الدخان لما ينتجه هذا المركب عند تفاعله من دخان كثيف ولاستمراره لفترة طويل، كما يستخدم فى تسهيل الاشتعال (كفتيل الحرق) فى معظم الذخائر. له آثار حارقة ومدمرة للجسم البشرى غير اعتيادية، إذا ما قورن بالأسلحة الأخرى، ولهذا يقابل استخدامه فى الحروب بالاستهجان و النقد الشديد. ونظرا لكونه سلاحا أعمى يقتل بالجملة، اعتبر من الأسلحة المحرم استخدامها دولياً، هذا بحسب البروتوكول الثالث المُلحق بمعاهدة حظر الأسلحة التقليدية لعام 1983، التى حظرت استخدام الفوسفور الأبيض ضد الأهداف العسكرية التي تقع ضمن تجمعات مدنية، إلا إذا كانت معزولة بوضوح عما يحيط بها من سكان مدنيين، ومع استخدام الاحتياطات الكافية لحمايتهم عند استخدامه وهو ما خالفته إسرائيل بوضوح شديد فى عملية الرصاص المصبوب التى شنها جيش الدفاع الاسرائيلى منذ الثالث من يناير 2009 على المدنيين وتجمعاتهم شديدة الكثافة السكانية فى غزة بحجة استئصال ميليشيا حركة حماس الحاكمة فى هذا الإقليم الصغير، وضد قذائفها البدائية المسماة زورا صواريخ تضخيما لآثارها. والغرض الوحيد بحسب ما شاهدته العيون كان هو إيقاع أكبر عدد من القتلى المدنيين وإصابة أكبر عدد ممكن منهم (العدد حتى يوم وقف إطلاق النار تخطى بحسب بيانات وزارة الصحة الفلسطينية 1300 قتيلاً ثلثهم من الأطفال، و5300 جريحا) وهو ما يدخل قادة جيش الدفاع الإسرائيلى لحظيرة مجرمى الحرب العتيدين، لكن اسرائيل التى لا تحترم أى من المواثيق الدولية وتعتبر قوانين الحرب الدولية أقل من ورق الحمام فى أهميتها، قامت بذلك اعتمادا على عدم توقيعها لهذا البروتوكول الإضافى متبعة فى ذلك الولايات المتحدة الأمريكية التى لا ترى الفوسفور الأبيض سلاحا محرما دوليا، وهى الأكثر استخداما لهذه النوعية من الأسلحة المحرمة وتنتجه شركاتها وتصدره للعالم.

إن استخدام جيش الدفاع الاسرائيلى لهذا السلاح من الفتاك لهو دليل على أن الوحشية التى يتمتع بها بعض البشر والتى تتخطى الأهداف المشروعة لاستخدام العنف فى الردع والدفاع لا زالت تطل برأسها على هذا العالم. الفوسفور الأبيض الذى حرق أجساد أطفال غزة مادة شيطانية آثارها لا حدود لها، حتى استخدامه مع المقاتلين (الأعداء) الذين يعتبر استهدافهم فى الحرب شرعى هو من قبيل البربرية، إذ تتخطى نواتج استخدامه مجرد الإعاقة للعدو المستهدف أو التصفية إلى التمثيل بالجثث ومضاعفة المعاناة، وقد وثقت لآثاره العيادية عدة جهات مناهضة لاستخدامه فى العالم، مثبتة أنه بمجرد التعرض له يحرق جسم الإنسان ولحمه فلا يبق منه إلا العظام، واستنشاقه لفترة قصيرة يهيج القصبة الهوائية ويدمر الرئة، أما استنشاقه لفترة طويلة فيسبب تهتكات بالغة في الفم ويفتت عظام الفك. كما أنه يدمر المباني والحقول وغيرها من الأهداف المدنية

وبالطبع تشير التقارير الواردة من ميدان العمليات البائس بغزة عندما استخدمته إسرائيل لم تتخذ أدنى احتياطات وجاءت الصور التى بثتها وكالات الأنباء تدينها، وتثبت تعمد استخدام السلاح المحرم دوليا ضد المدنيين العزل. وعدم توخى أى احتياطات لتجنيب المدنيين آثارها، فقد جاء في التقرير الصحفية أن القذائف التى استخدمها الطيران الاسرائيلى تنشر 116 رقاقة محرقة فوق منطقة يبلغ قطرها ما بين 125 إلى 250 متراً، استناداً إلى ارتفاع القذيفة، الأمر الذي يؤدي إلى حتمية تعرض المدنيين والمباني المدنية للضرر الناتج عنها، مقارنة بالقذيفة التي تطلق على جهة محددة على الأرض. وتذرع اسرائيل بوجود مقار عسكرية لحماس واعتبارها أهدافا مشروعة يتناقض وحقيقة أن حماس مجرد ميليشيا من المقاومين لا تتمتع بأى تنظيم عسكرى حقيقى له قواعده ومؤسساته ومعسكراته كما بالنسبة للجيوش الاحترافية، ومن ثم لا يمكن تمييز ما يمكن اعتباره أهدافا عسكرية لها، وما صدر عن جيش إسرائيل بتسمية أهدافا عسكرية لحماس واضحة هو محض اختلاق، وأن ما يقال عن مسعاها لفصل حماس عن قواعد تأييدها من خلال ضربات متقنة لأهداف منتقاه تضعف حماس دون أن تتسبب بأضرار جانبية collateral damages غير مقصودة هو كلام عبثى لتغطية جريمة إبادة الجنس التى ارتكبت بحق الفلسطينيين، لا أحد يدرى ما هى الأهداف المشروعة التى يشيرون إليها، اللهم إن كانت إسرائيل تخالف البشرية فى فهمها، وتعتبر أن دور العبادة ومستشفيات ومدارس القطاع التى دمرتها وقذفتها بالأسلحة المحرمة دوليا هى أهداف عسكرية مشروعة بحسب بيانات جيشهم. ورغم التقارير الإعلامية التى نبهت قبل عملية اجتياح غزة لاحتمال استخدام الجيش الإسرائيلى هذا السلاح الفتاك المحرم، ونبهت لخطورة ذلك، إلا أن قادة إسرائيل من سياسيين وعسكريين قد تجاهلوا عامدين هذه التنبيهات ومارسو جريمة إبادة الجنس وإزهاق أرواح المدنيين بالجملة بهذه الأسلحة المحرمة دوليا دون رادع من قانون أو ضمير، وهم من وضعوا هذه الذخائر المحرمة فى أيدى جنودهم وأمروا باطلاقها.

استخدام مثل هذه الأسلحة المحرمة دوليا - فى ظنى – لإبادة الجنس هو صفة ملازمة لآيديولجيات الاستعمار التى تنتهج فكر عنصرى يقودها لاستساغة ممارسة هذه الجريمة متذرعين بالتكنولوجيا. ولعل جزء من تاريخ الاستعمار الغربى يمكن تفهمه بمتابعة تاريخ تطور أسلحة الدمار المحرمة دوليا، لقد ظهر الفوسفور الأبيض كسلاح فى القرن التاسع عشر فى أوربا، وتطور فى هذا المحضن الغربى ضمن التنافس المحموم بين الغزاة الغربيين لتطوير الأسلحة الأشد فتكاً. وتنعقد رذيلة تحويله لقذائف فى عنق البريطانيين الذى طوروا استخدامه البدائى من مجرد محلول قابل للاشتعال ذو أثر حارق لقنابل شديدة الانفجار وذلك خلال الحرب العالمية الأولى، واستعمله من بعدهم خلفاؤهم الأمريكيون على نحو كثيف فى الحرب العالمية الثانية، وقيل أن اليابانيين استخدموه كذلك، لكن فضائح استخدامه نقلت بشكل مكثف مع حرب فيتنام خلال الستينات من القرن الماضى والتى انطوت بشكل كبير على ممارسة لجريمة إبادة الجنس وتجيه هذه الأسلحة ضد المدنيين واستخدامها للقتل السهل وبالجملة ضد ما قيل أنه ميليشيات مقاومة لا يمكن تمييزها عن المدنيين، وكانت كبرى فضائح حرب فيتنام العنصرية الاستعمارية التى بقت فى الذهن العالمى حتى اليوم

ولا ننسى أن الفوسفور الأبيض الذى برع الأمريكيون فى استخدامه هو ذات السلاح الذى قيل أن صدام حسين قد ضرب به الأكراد فى ثمانينات القرن العشرين وكانت واحدة من التهم التى التصقت به حتى من قبل قيام القوات الأمريكية باحتلال بلاده. كما أن الجيش الروسي كان له نصيب من هذه البربرية حين قاد محارق عديدة ضد شعب الشيشان ومقاوميه في منتصف التسعينيات

وتقريبا ليست هناك من حرب جرت فى الشرق الأوسط خلال الأعوام الستون الماضية لم يستخدم فيها هذا السلاح المحرم، لكن استخدامه على نحو موسع وضد المدنيين العزل وبغرض واضح وهو إبادة الجنس ظل جريمة إسرائيلية مكتملة الأركان كررتها إسرائيل مراراً ومراراً دون رادع. فهى استعملته بتوسع خلال عملية غزو لبنان سنة 1982 وكررت ذلك بكثافة أكبر خلال حربها الأخيرة ضد حزب الله وضربها لبنان فى 2006، وكذلك في بعض معاركها ضد المقاومة الفلسطينية

إسرائيل تعيد انتاج الرسائل الإعلامية التضليلية وتجيد أدوات الدعاية الأمريكية، وبرعت فى تغطية – فى ظل صمت دولى مريب وتغييب للضمير العالمى - جريمة حرب جديدة ضد المدنيين الفلسطينيين العزل. استفادت اسرائيل من سلوك الولايات المتحدة والدعاية الحربية التى تقودها البنتاجون. فى عام 2004 استخدمت القوات الأمريكية المحتلة للعراق قذائف الفوسفور الأبيض التى يطلقون عليها ويلى بيت، وهى فضيحة فجرها تقرير مصور لقناة إيطالية وثق لقيام القوات الأمريكية بضرب المدنيين العراقيين بالفوسفور الأبيض في معركة الفلوجة. ورغم محاولات وزارة الدفاع الأمريكية (البنتاجون) المستميته للتغطية على جريمة الحرب بتبرير استخدامها لهذه المادة المحرمة دوليا والقول بأن قواتها استخدمت الفوسفور الأبيض، "كعتاد حارق" ضد قوات المتمردين في الفلوجة. لكن صور الضحايا وعدة شهادات جمعت من جنود أميركيين ونشرت فى مجلة مدفعية الميدان الصادرة عن قاعدة فورت سيل بأوكلاهوما جاءت جميعها كقرينة إثبات قوية بأن القوات الأميركية قد استخدمت هذا السلاح الحارق. لكن لم يستطع العالم أن يوقف أحد قادة الحرب المجرمين الأمريكيين، كما هو عاجز اليوم عن مجرد التفوه بالتهمه فى وجه أولمرت وصحبه

لا يجب أن تمر هذه الجريمة كمثيلاتها، ويجب فضح مجرمى الحرب هؤلاء وكشف زيفهم، نحن فى حاجة لإجراء توثيقى فعال ومتقن قبل أن يزول أثر العدوان، تصوير، جميع مواد إلعامية، شهادات، وثائق، بيانات، تصريحات، مراجع وكل ما من شأنه أن يوثق لهذه الجريمة كجريمة حرب. لقد أفلت أولمرت المرة الفائته ببربريته التى أظهرها فى لبنان، كما أفلت المحتلون فى العراق بما فعلوه فى الفلوجه، فهل يا ترى أتى الوقت الذى نستطيع فيه أن نقود حملة دولية تقنع العالم برفع سبابته والإشارة لمجرم حرب حقيقى وواضح ومدان

خد مراتي ولك تحياتي

بدلي جوزك وما تلويش بوزك
ولسة...بكرة الناس تفرش بناتها ع الرصيف وتقول: اتنين ونص...تعالى بص، خد تلاتة ولك واحدة مجانا
طب منكن اقول حاجة من غير ضرب، بتوع تبديل الزوجات والازواج دول ضحايا
هو راجل موظف كبير في الدولة وهي مدرسة
انا عارفة انهم لو كانوا فقرا كيك كانت الناس تعاطفت معاهم لكن كونهم من طبقة متوسطة ماحدش حاسس انهم ضحايا، ضحايا لايه؟ عايز يجيب فيلا في بيفرلي هيلز وعربية بمليون جنيه؟ يلعن ابو شكله
طيب ماهو بيني ادم، وموظف كبير، وبيتفرج على التلفزيون، وطبقة متوسطة بكل ما تحمله هذه الطبقة من خير زائل وشر قائم. والتلفزيون طول النهار والليل عمال يطمعه يطمعه يطمعه ويقول له في الاعلانات: من حقك يبقى بيتك اوسع...من حقك تصيف في بورتو السخنة من حقك يبقى سلاحك صاحي من حقك من حقك من حقك...آي آف يو...آي آف يو تووووو
وهو حاسس انه من حقه كونه موظف كبير قضى عمره في خدمة الحكومة
وبما انه في خدمة الحكومة فهو مش عارف لما ايه يقوم يحصل ايه امتى؟ يعني لما جعان يسرق رغيف عيش الناس تتلم عليه وتنزل فيه ضرب وتوديه القسم، لما موظف ياخد رشوة مليون دولار يترقى، لما ظابط شرطة يعذب مواطن ويموت منه يترقى، لما مواطن يتعذب وما يموتش يتحبس، لما تبقى مش عايز تسرق وسط موظفين حرامية تلبس قضية، لما تسرق تبقى باشا، لما تبقى افاق تبقى من كبار النخبة اللي بيطلعوا في التلافزيون كل تلات ثواني، لما تتعب على نفسك تبقى مهمش وهكذا كذا فزورة
التطور الطبيعي للحاجة الساقعة: لما يبقى عندي شرف ابقى قواد ولما ابقى قواد ابقى راجل محترم
ماهو الراجل مخه اتبرجل يا ناس
ولسة ولسة...وياما ح تجيب لنا استثمارات القرنية

بالنوسبة لايران

ايران دي كانت صاحبتنا قوي، بس مش بعد الثورة، قبلها، ايام اخويا الامير بظرميط الايراني، طيب الجمسي كاتب في مذكراته ايام اخويا الامير بظرميط الايراني الاتي:

لقد كان العدو ينقل سنويا 18 مليون طن بترول من ايران عبر باب المندب الى ايلات، لاستخدام جزء منها ويعيد تصدير الجزء الاكبر الى اوروبا....إلخ

وفضل اخويا الامير بظرميط الايراني يعمل كده لحد ما طرده الايرانيين واحنا استقبلناه في الوقت اللي اسرائيل نفسيتها ما رضيتش تستقبله ولا كارتر الندل مع انه حبيبه وصاحبه وصاحب مراته وكان والده ايضا مصاحب حماته
وما كانتش ايران ايام اخويا الامير بظرميط خطر على المنطقة، ولا كان لها اهداف توسعية، ولا كان الشيعة كفرا، ولا كانت الجزر العربية عربية عربية، بيب بييييييييب آآآوووووأأأأأأأأأأأااااااا

ودارت الايام تارارا ومرت الايام تارارا ما بين بعاد وخصام
وبقينا احنا الامير بظرميط، وبقينا احنا اللي بنتبرع بغازنا ومواردنا لاسرائيل حاجة ببلاش كده ولنا الاجر والثواب عند الشيطان
وفجأتن...أن أن آآآآآآآآآآآآآآن
بقى الشيعة كفرا، وبقت ايران لها اهداف توسعية، لمجرد انها بطلت تبعت التمنتاشر مليون طن بترول لاسرائيل، وحاشرين احنا بالذات نفسنا وعلى رأي مينو: يعني ايران على اوحش تقدير ح تحتل مصر يعني؟ دي لو رمت اسرائيل في البحر فعلا برضه مش ح تحلم انها تحتل مصر
حد بقى يفهمني عشان انا واحدة خريجة خامسة ابتدائي: مين اللي جاب القلعة جنب البحر؟

دول العالم: انا عايز حد يهزأني يهزأني يهزأني

ليه؟ بأمارة ايه يعني؟ بامارة ان دول العالم كلها بقت مهزأة مش احنا بس، بالعكس ده احنا طلعنا من الدول المحترمة وعلى رأي الله يرحمه حسن عابدين: قطعني هزأني..هزأني بعترني
---
لا وبصوا ده كمان....هع هع هع

يا سلام لو كان المفتي اللي قال الكلام ده

الكلام ده صادر عن برلماني محترم في دولة صهيونية محترمة
طبعا الدولة الصهيونية محترمة وماحدش مهزأ غيرنا، سعادة البرلماني قال ان الزلازل اللي بتحصل في اسرائيل سببها تسامح اسرائيل مع المثليين، ولا يعني سمعنا حد بيقول طيور الظلام، والظلاميين، واليهودية السياسية، واهودة السياسة، هي تمشي اهودة دي؟
ولا سمعنا حد بيطالب بحبس وسجن ومحاكمة وشنق وفشخ وشنيرة وفتق صاحب التصريحات الرجعية المتخلفة الظلامية اللي بترجعهم للعصور الوسطى
ولا اترسم لهم رسومات تطلع حتى بن جوريون ماسك قنبلة ولا حاجة
يعني الحكاية مش حكاية تديين الصراع والسعي وراء الخرافة والكلام الهجص ده كله
الكلام ده مقصود بيه دين واحد معين، هو اللي متخلف هو اللي ممنوع يدخل في السياسة، وفي الفن، وفي الكورة، ممنوع يدخل هنا خالص يفضل قاعد في الجنينة برة عشان رجليه مليانة طين
عشان هو وحش وحش واي محاولة للدفاع عنه تبقى تشنج وتخلف
آه...ده جايلي انا بقى
طب ما تختصر وتقول شامبنزي مش الدوغري احسن برضه
الشامبنزي يا سادة مالوش اي جريمة غير انه ابن دادا، ماعندوش قوة ولا اقتصاد ولا بيفشخ الناس ولا بيموت بالملايين
لو كانت قنبلة الشامبنزي العنقودية بتنزل كده على لكشة بني ادمين تطير بلد بزيها كان اتعمل له قانون معاداة الشامبانزية، وكانت اصرت الدول الشامبانزية ان ضحاياها يعترفوا بيها كدولة شامبانزية اصيلة، وكان عرف يتنطط في السياسة والكورة والفن زي ماهو عايز
شامبنزي بقى ومعاه نووي وعنقودي وبيولوجي واوعى وشك
انا مش غايظني غير الناس الشامبانزية اللي عاملة موضوعية عشان قصر ديلهم
ما تقول طيزي حمرا وديلي قصير وخلاص...ايه لزوم تعمل علماني وموضوعي عشان يبقى شكلك حلو وعاملها بجميلة
حاجة وسخة
والنبي ياحاج شلومو نسألك الدعاء
يا راجل يا بركة

بوش وحلاوة الروح

يموت بوش ولسانه بيلعب الراجل كلها فركة كعب ويغور ويريحنا من هبل امه وبرضه مش عايز يتكتم، بجد انا عايزة اعرف هو ايه مشكلته، انا عايزاه ان شاء الله بعد ما يغور في داهية ييجي عندنا ويمدد على الشيزلونج ويحكي لي مشاكله يمكن اعرف اساعده
يعني ايه رئيس جمهورية يحث العالم على إنهاء الشر في دارفور؟ ايه التعبيرات اللولبية دي محسساني اني دخلت قصة اطفال واضح ان امه كانت بتحكي له حكاية الساحرة الشريرة والساحرة الطيبة وهو عيل صغير، بس هو لسة عيل صغير، عشان بيقول احداث دارفور هزت اعماقي
يامي يامي يامي...امشي يا عفريت امشي يا عفريت خلاص جوجو ح ينام وقبل ما ينام ح يدفع ميت مليون دولار لحل ازمة دارفور
ادفع ياعم ما هو مال الاموات اللي دبحتهم في العراق انت دافع حاجة من جيبك ماهو احنا اللي بنكع وكمان محملنا جميلة
وبالمناسبة دي جورج بوش كمان بيدعو لانتخابات حرة في كوبا
انا مش عارفة هو مال امه اصلا وللا ده الصوت اللي هو بيسمعه وبيقول ربنا بيكلمني؟
على فكرة هو بيسمع اصوات فعلا، انا مصدقاه، الناس بتقول عليه بيستعبط بس هو مش بيستعبط، اغلب الظن انه لابسه عفريت عنده تلات سنين، وهو اللي بيخليه يركب عجل وياخد اجازات كتيرة عشان يلعب هوكي ويجري مع الكلب بتاعه وهو اللي بيخليه يتكلم عن الشر والاشرار والعيال الوحشة اللي بتاخد منه الشندوشتات اللي ماما بتعملها طب برضه ممكن ييجي عندنا ويجد ما يسره واي حد من اللي بيطلعه العفاريت يضربه بالعصايا لما ينجده ويخليه ولا صالون العروسة ينكن عقدته تتفك وربنا يكرمه آخر كرم
وبما اني بطبعي متفائلة فعندي احساس اننا ح ييجي علينا يوم ونقول ولا يوم من ايامك يا جوجو ليه بقى؟
لان ماكين شارك في حرب فييتنام وتقريبا دماغه لسعت هناك، الفييتناميين ادوهم علقة ما اخدهاش زملكاوي من اهلاوية، واكيد العلقة دي اثرت على مخه وكله على دماغنا ودماغ اللي خلفونا، وفوق البيعة بفلوسنا كمان
ويعتبر الاحتلال الامريكي هو الاحتلال الاول من نوعه اللي بيديك بجزمتك انت لانه مكسل يقلع الجزمة بتاعته، او غالبا ريحة شرابه وحشة، ويتعبر الوطن العربي هو المستعمَر الاول من نوعه اللي اول ما يشوف المستعمِر جاي من بعيييييييييييييييد يقلع الجزمة اللي في رجله من سكات ودايما تتخم وتفتكر انه بيقلع الجزمة عشان يضرب اللي جاي يضربه فإذ بيك تستافوجأ انه يدي المستعمِر الجزمة زي الشاطر وكمان يقول له تحب تضرب فين ياباشا؟
قطعني يا معلم

الامريكان لا ح ينتخبوا اسود ولا ست

الامريكان مخهم مقفل وعنصريين وما يرضوش ان ست او ملون يحكمهم
وقال الست هيلاري متصورة وهي شايلة عيل اسود عشان تكسب السود في صفها
هاهاهاشكلها كان قرفان منه قرف ومش راضية تبص له وباعده وشها عنه كأنها شايلة تعبان
ومش ح يقعد لنا غير ماكين ومش ح تفرق كتير لان كلهم بلا استثناء ح يطلعوا ميتين ابونا
اوباما وللا ماكين وللا الولية الصهيونية دي قطعت هي وجوزها بتاع الفستان الازرق
هلبت ما الانسان بشكل عام مخه متبرمج على انه لما يحكم على غيره يقيس على نفسه
عشان كده مثلا لما حد فينا بيقبل على الاستشهاد وللا الجهاد هم بيقولوا عليه عنده اكتئاب
او يائس او الغشاء اللحائي في مخه مش بيشتغل والفصين الاماميين من المخ عطلانين
زي ما فرنسا كانت بتطلع نظريات علمية عشان تثبت بيها ان جنس الجزائريين والافارقة
كلهم مخهم فيه حاجة غلط بتخليهم مجرمين وبيحبو القتل بالطبيعة والاغرب ان الجزائريين
اللي كانوا بيدرسوا في فرنسا كانوا بيقولوا كده على نفسه ويقولوا ده مثبت علميا
وماحدش فيهم سأل نفسه واللي يقتل مليون ونص انسان يبقى اخبار لحاءه ايه؟
ما علينا
احنا كمان لما بنحكم عليهم بنقيس على نفسنا
احنا بطبعنا ما عندناش سيستم يعني طبيعة الحكم في بلادنا متصلة تماما بالمزاج
الشخصي للحاكم
اول ما يموت الحاكم تنتهي سياسته وخطته ونظامه بموته وييجي واحد تاني
يبل صباعه ويبتدي من اول وجديد
والحقيقة ان سياسة دعم امريكا لاسرائيل ومحاولاتها الحثيثة لاستغلال ثرواتنا
ومسح مخنا وغسيلة وعصره ونشيره وكويه
وتنسيل كافة القباقيب والاحذية والشباشب على ام دماغنا بعد ان تعاص في كل الخرا
اللي في الكون و"علاجنا" النفسي ومنحنا كورسات لتأهيلنا
بحيث اننا ناخد القباقيب وناكل الخرا ونقول كمواااااان
مالوش علاقة بده اسود وللا ده ابيض
لانهم شالوا الدو حطوا شاهين الدو قال مانتوش لاعبين
بس انا كنت عايزة اوباما ينجح عشان شكله حلو
الولية هيلاري شكلها زي مصاصين الدماء وماكين بغل كده وشكله زي الخنزير
طيب اذا كان ولا بد ناخد بالقباقيب يبقى على الاقل واحد شكله يفتح النفس على القباقيب

ايها المصريون ركبوا القرون

اعزائي التمانين مليون أنتنّة نرحب بكم في برنامجنا الجديد ساركوزي جانا وفرحنا به، ونحب أن نذكر أن الأخ ساركوزي هو ذات نفس الصخص اللي قال للفرنسيين لما تحبوا تستقبلوا مهاجرين ابقوا استنضفوا يعني مش معقولة ابدا كل شوية يهجم علينا الشيالين والصنايعية من بلاد العرب احنا بنفضل هجرة العقول
على اساس انه عنده عقول والله اصحاب العقول في راحة
طيب شوفوا كده
http://www.youtube.com/watch?v=_geDnpy65Uw


ايه يا عم ساركوزي الحلاوة دي ده انت طلعت ابن حظ اهو على الله يكونوا الصعايدة الشنبات باسطينك هناك وقايمين معاك بواجب البانجو على اكمل ما يكون....الا صحيح هو الاسطى اللي ساحب المزة معاه ونايم معاها في نفس السويت على مرآى ومسمع من تمانين مليون إريال..إريال ينطح إريال، مش هو قاعد في الصعيد برضه؟ وللا الصعايدة في لقصر بلدنا بلد ديشات بقوا الا فرانكا؟
عموما برضه لما يجي ويجيب معاه المزة ينفي عن نفسه التهمة دي
http://www.youtube.com/watch?v=8MvDyYVn2ok


ربنا يستر على رجالتنا بقى
حبيب قلبي بيجري كل يوم الصبح وبيفضوا له المكان كله عندنا في مصر ويعملوا احتياطات امنية مكلفة عشان يعرف يجري....ما تتهد يا عم وبلاش تهلك صحتك في الجري ده انت جايب معاك صاروخ ارض جو عابر للقارات....وللا انت عايز واحد من الصعايدة يلطشها منك وانت بتلف التراك زي الاهبل؟ ماهو ما ينفعش مع الاخت دي كده..الصبح بتجري وبالليل سكران طيب انت جايبها تآنسك وللا ايه؟ ما كنت تخلي ام العيال بقى اذا كانت الحكاية انس وقعدة حظ وخلاص...آه ده نسيت ان ام العيال هي راخرة شافت لها شوفة تانية....طب ايه؟ ناوي تطير دي هي كمان؟ وللا جايبها في مصر عند الفراعنة عشان يعني يساعدوك مثلا؟ عموما الناس لبعضيها والمصريين شعب جدع ويخدموك في الموضوع ده بعنيهم
خصوصا اذا لم يقتصر الامر على البص من خرم الباب؟ اذا كان كده يبقى الفلوس اللي اترمت على الارض جايبة تمنها على الاقل الشباب ينباسطوا ويهيصوا الباشا جاي يجري
اجريييييييييييييييي
http://www.youtube.com/watch?v=aag4LLGXECs


بس فيه حاجة غريبة بقى.....الحكومة المصرية قررت ان وزير الثقافة فاروق حسني هو اللي ح يرافق نيكولا ساركوزي في رحلته غير الرسمية دي....ساركوزي بيجري وكارلا مع الحرس الفرعوني ووزير الثقافة مرافقه...قصدي مرافق يعني في الرحلة....ايه؟
طيب فلوس الحرس والتشريفة بتاعة ح الوزير وكدهوت يعني على حساب مين؟ اكيد على حساب صديقه رجل الاعمال اللي عزمه على الرحلة، الا مين صديقه ده راخر؟ بس هو ان شاء الله على حسابه مش كده...وللا على حساب فلوس الدعم اللي شالوها من العيش عشان يصرفوها على الاهبل ده وعشيقته؟ وقال على رأي المثل الفرنسي الشهير: كارلا بتاعتك كارلا بتاعته كارلا دي ليكوا كلكوا....مدام الانسة بيتصرف عليها من فلوسنا بسكوا عليها يا شباب

خدوا حقكوا ناشف

عاجل: خبر إنفاق وزارة السياحة على رحلة ساركوزي غير مؤكد

لا في الواشنطن بوست ولا في رويترز ولا في المصري اليوم ولا في الوفد ولا في اي حتة
ما اعرفش المصريون دي جابت الكلام ده منين؟ بس حرقة دم على الفاضي انا لما شفت الخبر دخت بعد كده لو سمحتوا ماحدش يجيب لي اخبار من المصريون دي لحد ما يتأكد من الاخبار انا اعصابي مش لاقياها في الشارع خلتوني دمي يتحرق واشتم كل اللي رايح واللي جاي
زي الاهبل اللي واقف على ناصية الشارع يتف
مش اي موقع فاتح في بير السلم تجيبوا منه اخبار
كل اللي قريته في جريدة الشرق الأوسط ان الاعلام الفرنسي بيشن هجوم على ساركوزي عشان واخد صاحبته وبيتفسح على حساب رجل اعمال صاحبه وواحدة صحفية راحت مع جوزها في نفس الرحلة قوم نقابة الصحفيين الفرنسية مسحت بكرامتها البلاط وطلعت بيان لادانتها
يعني فعلا مافيش قرني غيرنا
وبناء عليه انا باقترح ايس كاب يكون طالع لها انتنة عشان الارسال

ساركوزي نازل مع عشيقته في سويت واحد يا عم قرني

امال فين السؤال السرمدي: هي المدام تقرب لك ايه

- مراتي

- طب القسيمة لو سمحت

ده انا ايام ما كنت متجوزة كنت شايلة القسيمة في شنطتي من كتر ما كنا بنتسئل السؤال ده مع اني والله العظيم تلاتة شكلي محترم ناهيك على ان الحب ماكانش مقطع بعضه ولا حاجة ده احنا كنا بنبقى متخانقين على طول وانا عنيا وارمة من العياط على طول وشكلنا من بعيد كأننا متجوزين بقالنا خمسين سنة ومع ذلك مافيش حتة كنا نمشي فيها ولا ندخلها الا يطلع لنا كائن هلامي من تحت الارض

- هي المدام تبقى لك ايه؟

- مراتي

- طب القسيمة لو سمحت

والاخ ساركوزي معاه بقى قسيمة وللا ورقة عرفي وللا دافع خمسين بجرة في السنيورة وللا ايه بالظبط؟ طيب هو جاي مش بصفة رسمية احنا نستقبله ليه ما تستقبله السفارة ماهو جاي بوصفه مواطن فرنسي نازل يقضي يومين مع عشيقته يا عم قرني انت وهو....احنا دورنا ايه بالظبط؟ موصل جيد للحرارة؟

مش فيه ام قانون في ام البلد دي بيمنع ان اتنين مش معاهم اثبات انهم متجوزين ينزلوا في اودة واحدة؟

يعني ايه نازل قدام العالم كله مع عشيقته عندنا في سويت واحد؟ وبعدين نرجع نزعل من جاد شويري انه عامل اغنية اسمها مصرية ومطلع المصريات استغفر الله العظيم؟ طيب كتر خيره مش احسن ما يطلعنا قوادين؟ وللا احنا بقى كبرنا وعجزنا وبقى ينطبق علينا مثل

الـ......لما تتوب تـ...تـ....تقرص مشيها تقرص

يعني سي نيكولاي ساركوزي مالقاش حتة تئنيه هو والشر.....يفة بتاعته غير مصر؟ ما حدش رضي يشتغل كتاليست غيرنا؟

ويا ترى طالع لنا سمسرة حلوة في الشغلانة دي وللا عاملينها محبة؟ يعني ح يدفع فلوس كويسة مقابل ان السكك ح تتقفل والاماكن السياحية ح يخلوها ويأمنوها عشانه هو والوزة اللي معاه؟ وللا ده مجرد تعاطف ببلاش مع جوز الكناريا اللي جايين يستقرنونا بمزاجنا واحنا واقفين على الباب نحرسهم ونشنف اذانا بالاصوات وللا نبص من خرم الباب وللا ايه بالظبط الحكاية ايه الخرا ده بجد؟

طيب على الاقل مراعاة لمشاعر التمانين مليون جاموسة اللي في ام البلد دي نزلوا كل واحد فيهم في سويت لوحده قدامنا كده واحنا مش ح نيجي نفتش عليهم بالليل ونطمن ان كل واحد فيهم نايم لوحده يعني كأننا مش واخدين بالنا ان فيه سويت منهم فاضي انما التقريص عيني عينك كده؟

طيب ما بالمرة الست كوندوليزا هي وصاحبتها يجوا يقضوا شهر العسل عندنا

وللا دول بقى ح تطلبوا منهم قسيمة؟

السؤال يعني اشمعنى المصريين بيطلب منهم قسيمة؟

طيب لو ساركوزي حب يجدد وزهق مثلا من السنيورة اللي معاه وحب يجرب الفول والطعمية ياترى الشندوشت ح يطلع له السويت؟ وللا ح تحجزوا له اودة صغيرة على قد الليلة؟ وياترى ح يضطر يقدم قسيمة؟ وللا عشان الفول والطعمية معاهم نبيت معتق يبقى معفي من الورق الرسمي؟

مرة واحد زميلي قال لي انه راح مع واحد صاحبه امريكاني في مطعم في رمضان وكان بعد الفطار فصاحبه الامريكاني طلب بيرة فزميلي قال له وانا كمان عايز بيرة الجرسون قال له لا انت مصري....هو امريكاني يشرب بيرة في رمضان لكن انت مصري البيرة ممنوعة عليك في رمضان!!!!!!!!

قال له طيب انا بقى مسيحي - هو مش مسيحي ولا حاجة بالمناسبة - قال له حتى لو مسيحي مش انت مصري؟ يبقى ما تشربش بيرة في رمضان

والله انا يعجبني التربية المحترمة دي...احنا مالناش دعوة بولاد الناس المهم ولادنا يبقوا متربيين ومحترمين

احنا ناس صعايدة نفهم في الاصول بلا مسخرة وقلة ادب

المؤامرة الحجازية القطيفية البهائية الصهيونية الامريكية بالتقلية

مين بقى قال ان نظرية المؤامرة غلط؟

انا رأيي الشخصي ان اللي يقول ان نظرية المؤامرة غلط

يبقى يا اما متآمر يا اما حمار ومن حق اللي شايف عكس كده انه

يستحمرني زي ماهو عايز

بس فيه تفصيلة دقيقة لطيفة ظريفة في نظرية المؤامرة

المؤامرة بتتحط..لازم لها عملاء يروجوا ليها..ولازم لها برضه

كام حمار على كام غبي على كام حنجوري ينفذوها بحذافيرها

عشان الخطة تنجح يعني تنفيذ المؤامرة مش شغلانة العملاء

دي شغلانة المتآمر عليهم

وخلينا نفسر كل شيء من وجهة نظر تآمرية بحتة مافيهاش

تنتوفة حسن نية او زكي نية

ولنقل مثلا ان قضية محمد حجازي وفتاة القطيف وقضية

البهائيين مؤامرة علينا لتمكين امريكا من السيطرة علينا

واحداث البلبلة عشان يبقى فيه مسوغ لامريكا انها يا اما تضغط على الحكومات

عشان تقبل بحاجات مشينة يا اما تحولنا زي العراق

وتستخدم القضايا السالف ذكرها مسمار جحا زي ما استخدمت الشيعة مثلافي العراق

طيب ده بياض امريكا اللي رميته

فاضل علينا بياضنا احنا نرميه

مثلا قضية محمد حجازي والبهائيين في مصر مؤامرة على مصر

عشان ايه؟

عشان يقولوا ان فيه اضطهاد ديني واستنصاد للاقليات ومافيش حرية دينية

مش كده؟

عشان يطلعوا ميتين مصر ويخلوها شبشب في رجليهم

صح؟

قول صح...حتى اللي مش موافق ياخدني على عقلي ويمشي معايا للاخر

قضية فتاة القطيف جات قبل مؤتمر انا بوليس سلم نفسك للسلام

ورفعت امريكا العصا والجزرة وخلت الديمقراطيين يقولوا: اخص عليكي يا سعودية

والجمهوريين يقولوا: لا لا يا ولاد السعودية حلوة

عشان تضغط عليهم ينضموا لانا بوليس سلم نفس المكان محاصر ويوافقوا على

القرارات بدون مناقشة

صح؟

قول صح معلش عشان خاطري

طيب وكل ده ليه؟ عشان عين الحكومة المصرية والحكومة السعودية

مكسورة بالمظالم ومش عايزة تفتيق عشان ما نبقاش العراق

طيب المؤامرة الفظيعة دي والعملاء ولاد المتسخة دولم حلهم ايه؟

دلوقت الحق احق ان يتبع وان كنتوا اخوات اتحاسبوا

ايه اللي يخلي الحكومات العربية عينها مكسورة؟

ماهو انت يا صخص قدامك حلين لا ثالث لهما في موضوع المؤامرة دي

يا اما تبقى زي كوريا والصين وان حد جاب سيرة حروق اللسان في حضورك

تزر عينك وتبص بالجنب وتتخن صوتك وتقول: ناااااااععععععععععمممم؟

قوم الناس كلها تقول لك بصوت كله حنان: يا فندم ابدا احنا مش بنكلم حضرتك خالص

احنا بنقول على ولاد الكلب التانيين حضرتك براحتك

يا اما عندك سلاح اكثر قوة: ان الحكومة تستخبى في الناس

يعني صدام لو كان حاكم عادل ماعندوش اضطهاد لا للشيعة ولا للاكراد

ولا ديكتاتور وبيتقي ربنا في العراقيين وامريكا راسها والف صارمة قديمة

لتغزو العراق مش كان لقى شعب متماسك متوحد وراه بيحبه ومستعد يموت عشانه؟

يا سيدي قضية محمد حجازي مؤامرة امريكية تنصيرية صهوينية متحدة

دلوقت حجازي ده بيقول انه مسيحي

وبيقول انا مش مسلم وانا مضطهد عشان كنت مسلم وبقيت مسيحي ومش

عايزين يكتبوني في البطاقة مسيحي

الحق والعدل ايه؟ ايا كانت اهدافه ونواياه

هل الحق انك تزور في اوراق رسمية وتكتب واحد مسيحي على انه مسلم؟

هل العدل انك تمسك بني ادم وتحرمه من حق حرية العقيدة اللي ربنا

كفلهوله من فوق سبع سموات وتشارك ربنا في ملكه وعبيده؟

ونفس الكلام ينطبق على قضية العائدين للمسيحية وعلى البهائيين

وينطبق على فتاة القطيف اللي ابتدت الحكومة السعودية بدل ما تصلح غلطها

تخوض في عرض البنت ويقولوا عليها كانت نايمة مع الواد في العربية

وفي عز الضهر وفيه شهود

طيب فيه شهود بقى يبقى يطبق عليها حد الزنا

ايه متين جلده دي؟ وضعها ايه في الحدود؟

بدل ما نتهم الناس ونخوض في اعراضهم نعدل ونقول الحق

والحق والعدل صدق او لا تصدق يا مواطن

هما سلاحان اقوى بكتييييييييير من كل اسلحة الدمار الشامل

مافيش حاكم مستبد قوي ابدا

ومافيش ظلم الا لازم يجيب لاهله الخراب

ومافيش حاكم عادل ضعيف ابدا

والحق درع واقي لاهله

وعلى الله قصد السبيل

صحيفة أخبار العرب: الحكم على عقيلة غير كاف

عرفت بقى قصة عقيلة باختصار بنت من حوالي سنة

اتعرضت للاغتصاب 14 مرة والبنت واللي اغتصبوها شيعة

يعني القصة مش طائفية خالص للامانة المهنية يعني

هم معاملتهم زفت لكل الناس الحقيقة كتر خيرهم

وسبب مضاعفة الحكم ان محامي البنت كلم الاعلام

هههههههههه

الراجل يا عيني قال لك ما الناس لما بيعملوا حملة اعلامية

ممكن ياخدوا حقهم او حد يلحقنا يا ناس

راحوا عاملين معاه شغل صعايدة وقالوا له بقى بتشتكينا

طيب بدل تسعين جلدة ح نعملها ميتين جلدة

وراحوا مضاعفين السجن للي اغتصبوها من خمسة لعشر سنين

انا عايزة افهم من امتى في دولة زي السعودية اللي بيغتصب واحدة

و14 مرة كمان بياخد سجن بس؟ يعني انا اللي اعرفه ان الاغتصاب عندهم

بيبقى اعدام

وهل كون البنت كانت خارجة تقابل واحد وللا حتى رايحة لواحد البيت

تقضي معاه ليلة حمرا ده يبرر ان سبع رجالة تانيين غير اللي هي رايحة

له يغتصبوها؟ ده عذر لهم يعني؟ يعني مثلا اشمعنى هو واحنا كمان ادينا حتة؟

هي جاموسة مثلا؟ وللا فرخة مشوية وهم عايزين ياخدوا ورك؟

وبعدين فيه جريدة اسمها اخبار العرب بتقول الحكم على البنت غير كافي

!!!!!!!!!!!!!!!!!!!!!!!

طيب يا ريت يقولوا لنا عايزين ايه عشان نعمله في البنت

يعني مثلا تتعلق من رجليها ويسلخوا جلدها ويقلعوا عينيها

وينتفوا شعر راسها شعراية شعراية وبعدين يدهنوا قرعتها سباخ بهايم؟

كل ده عشان قابلت واحد في عربية في الشارع؟

وواحد يجي يقول ماهي اللي كانت رايحة تقابل الواد اللي اتقفشت معاه

عشان تاخد منه الصور اللي كان بيهددها بيها

!!!!!!!!!!!!!!!!!!!

نعم؟ يا اخوانا هو احنا في العصر الحجري هنا؟

اما بالنوسبة للسؤال: اشمعنى البنت دي اللي متضايقين عشانها

ما كل السعوديين بيتعمل فيهم كده واحمد ارحم دماغك قال لي

ان فيه واحد اتجلد عشان كان

استغفر الله العظيم

بيوصف عنوان لواحدة يعني هي مش حالة فردية

فطبعا هي مش حالة فردية بس هي اللي استنجدت بالعالم

ثم يعني هي مش حالة فردية احنا مش علينا واجب ناحية البني ادمين وللا ايه؟

يعني عشان هي مش الوحيدة نسيب الناس يتسخلوا على صباح الخير صباح

النور اتفضل الشاي ع النار؟ يعني افرض واحد مصري عبيط

ماشي في الشارع في السعودية لقى واحدة وكالعادة قالها: يا عسل

يتجلد؟

دي حاجة الحاجة التانية بقى لما البنت قررت تستغيث بالعالم

امريكا ياخويا تدخلت وقالت: الله ده حكم قضائي في دولة ذات سيادة

احنا مالنا

يا سلاااااااااااااااااااااااااام

يا سلااااااااااااااااااااااااااااااااااااام

ياااااااااااااااااااااا سلااااااااااااااااااااااااااااااااااااااااام

على كده السعودية هي الدولة الوحيدة في العالم اللي لها سيادة

طيب ياريت يطلعوا لنا البند ده من قوانين القلل المنتحرة عشان نعرف

راسنا من رجلينا ونعرف من له سيادة ومن له عبادة ومن له رب اسمه الكريم

ومن له الجزمة القديمة لو فتح بقه

وقعوا هنا

لو سمحتوا اهو باطلب بادب عشان ماحدش يقول لي انت بتزعقي ليه

ممكن أعرف ضاربين الطناش على البت السعودية ليه؟

هو عشان الخواجة الأمريكاني قال: والله كل بلد لها قانونها

وكل واحد حر في بلده يبقى البت السعودية تولع بجاز وسخ؟

وللا عشان شيعية واللي اغتصبوها سنة؟

هي بقت كده؟ طيب انا انشغلت في سمينة وما عنديش معلومات كافية

ح اجيب المعلومات ونشوف ح نعمل ايه في البت دي كمان

بس بجد بقى انا عايزة اعرف يعني اشمعنى يعني امريكا محموقة على

الشواذ جنسيا بتوع ايران والبت دي مش فارقة معاهم

ويقولوا احنا بنحترم سيادة الدولة وما بنتدخلش في شئونها

يعني من امتى امريكا بتحترم سيادة الدول؟

واشمعنى ايران مالهاش سيادة على الشواذ جنسيا؟

واشمعنى برررررررضه ام سلمان رشدي ده واخد سير

واشمعنى السعودية حرة تجلد بنت اغتصبت وتخفف العقوبة على اللي اغتصبوها

وتبقى الحكومة السورية مش حرة في وفاء سلطان؟

كل اللي اعرفه لحد دلوقت ان البنت كانت واخدة عقوبة تسعين جلدة على انها

كانت راكبة عربية مع راجل مش محرم

!!!!!!!!!!!!!!!!!

ولما محاميها بلغ الاعلام العالمي القاضي ضاعف العقوبة

!!!!!!!!!!!!!!!!!!!!!!!!

خخخخخخخخخخخخخخ بجد يعني يا بتوع سمعة الاسلام

هي سمينة اللي بتسيء لسمعة الاسلام والاحكام الجائرة دي

بتبيض وجه الاسلام

====

تحديث

http://www.reuters.com/article/topNews/idUSN1950867920071119

ده لنك تصريحات السيد

شيان ماك كورماك المسئول الامريكي

اللي قال والله يعني ده حكم قضائي هو مش حلو قوي

بس ده قضاء في دولة ذات سيادة

هئ هئ هئ هئ هئئئئئئئئئئ

ضحكتني يا مضروب

وهي افغانستان ما كانتش دولة ذات سيادة؟

تغطي بقى وش النسوان تقلعهم ملط

هي حرة وللا السيادة على حسب مزاج السيادة

شالله يشربوا على روحك قهوة سيادة

قادر يا كريم

وقع لمساندة الفتاة المغتصبة والمعاقبة على انها اغتصبت

http://www.petitiononline.com/stwgl001/petition.html

محرك الحملة المدون

راجي