مأمور سجن طرة وكل الطقم لازم يتغير.. ولا نعمل لكم مليونية لطرة بقى؟

ايه ده بقى ان شاء الله؟

احنا مش عايزين وجع دماغ بقى، احنا زهقنا مش كل شوية حننزل بقى مليونية
مأمور سجن طرة والطقم كله يتنقل يروح القناطر ويجيبوا طقم جديد رخم، ويتعمل تفتيش على الوزرا دول
ولا نعمل مليونية بقى لطرة ونظبطهم احنا بنفسنا ولا ايه؟

تسقط الحرية عدوة العدل

تحديث:
ده ايه الوساخة والتسول دول.. جواب لاوباما؟ هو خلاص التسول ده بقى نمط حياة؟
تحديث:
اتفرجوا على هوجة الجزائر الجديدة... ولسه ولسه ولسه، امن الدولة اللي مانع تظاهرات عشان خاطر فلسطين في المساجد مسلم البت للكنيسة وفاتح الجوامع للمسلمين يعملوا فيها مظاهرات عشان كاميليا ومعيشنا في احلى اجواء للجزائر
ولسه ولسه
حسبي الله ونعم الوكيل في اللي يقدر ينقذ البلد دي من المصيبة اللي هي داخلة عليها ومش بيتصرف عشان وسخ ابن ... اقول ايه انا صايمة، حسبي الله ونعم الوكيل فيكوا واحد واحد، في كل اللي بيشارك في المصيبة دي بالشعللة او بالظلم او بالسكوت
تحديث:
يا سلااااااااااااااااام.. وسعت قوي.. وسعت قوي قوي قوي، انا مش حمارة للدرجة دي
تحديث:
اتفضلوا.. حد بقى يقول لي ان كل الاحداث دي عادية... عادية ازاي؟ ازاي كل يوم والتاني بت مختفية؟ مين اللي بيعمل كده بقى؟ لو الموضوع ان الناس بتطفش عشان تسلم او تتنصر، اشمعنى الستات بس اللي بيغيروا دينهم؟ ليه الرجالة ما بيغيروش دينهم ويطفشوا؟ 
------------
أنا محتاجة أرتب افكاري لأني في حالة انفعالية عالية.. ليه؟ عشان كنت عميا وفتحت، وغلطت ولازم اعترف بغلطي، وربنا يعلم حسن نيتي

النهاردة كان فيه مظاهرة في الازهر عشان كاميليا، عماد عرب قال لي عليها قلت له مش جاية مظاهرات في جوامع انا عشان مواطنة مختطفة، لما تبقوا تعملوها عند النائب العام ابقى اجيلكم

فقال لي معاك حق.. بس ماحدش اتقدم ببلاغ للنائب العام

هممممم، كل اللي رفعوا قضايا لمحمد حجازي والعائدين للمسيحية وللبهائيين وقدموا بلاغ للنائب العام بعد مذبحة نجع حمادي وعشان خالد سعيد وساندناهم طبعا وقمنا بواجبنا ماحدش فيهم قدم بلاغ للنائب العام عشان كاميليا، مع انها انسان يعني ما تقلش عنهم في الانسانية حاجة

احنا عايزين بقى الستات هم اللي يحكموا العالم عشان هم اللي عندهم نظرة بانورامية للاوضاع، وهم اللي عندهم الشجاعة يعتذروا لما يغلطوا

الحملة العالمية على المسلمين المسماة بالاسلاموفوبيا عنوانها كده: نحن لسنا في حرب مع المسلمين وانما نحن في حرب مع الاسلام.

الحملة دي بتقول نفس الرطانة اللي كانت بتتقال على النظام الشيوعي وعن الاتحاد السوفييتي: السوفييت ناس كويسين، والشيوعيين مضحوك عليهم، احنا ضد الفكرة نفسها مش ضد معتنقيها وعايزين نحررهم منها، طبعا دي سفسطة استعمارية، مافيش الكلام ده، الكلام ده فارغ، الفكرة في كتاب وما بتتحولش لحقيقة غير لما يعتنقها انسان، انت ضد الكتاب؟ يعني حتحارب الكتاب وتقدمه للمحاكمة وتشنقه في ميدان عام؟

الحملة على الاسلام هي هي نفس الحملة على الشيوعية بنفس البنطلون بنفس الفانلة، مش باذلين حتى مجهود انهم يغيروا السكريبتات القديمة جابوا هي السكريبتات القديمة وشالوا كلمة شيوعية وحطوا مكانها كلمة اسلام

"أنا متعاطف مع المسلمين لكنني لست متعاطفا مع الإسلام كفكرة"

كلمة استعمارية امبريالية معناها: احنا عايزين نغزو المسلمين فكريا زي ما غزوا الشيوعيين فكريا

وبرضه هي نفس الخطة وتحت نفس الشعار وبنفس العنوان: الحرية

هي نفس الجهة: الفريدم هاوس.. بيت الحرية، بيت الحرية اللي اسقط الشيوعية كمنظومة وكقوة هو اللي بيسقط الاسلام كفكرة من اساسه

حيسقطها ولا المسلمين يا عيني حيقولوا: لاااااااااااااااا احنا نفديه بارواحنا والكلام ده، ما يخصنيش، اللي يخصني اني ما اشاركش في حملة استعمارية على اهلي وناسي، وان ما كانوش اهلي وناسي هم ناس غلابة ومستضعفين ومظلومين

ايوة عارفة ان المسلمين شاركوا في الحملة على الشيوعية واكلوا يوم اكل الثور الاسود، وتحت نفس الشعارات، واتخدعوا بكلمات حق كتيرة اريد بها باطل زي ما بيتنصب لهم فخ بكلمات حق كتيرة يراد بها باطل

بس ايه؟ حنعاقبهم يعني؟

انا شخصيا مش حاعاقبهم.. مش بس عشان غلابة ومظلومين وعزيز قوم ذل ومش وش البهدلة اللي هم شايفينها دي ابدا (المسلمين مش زي اليهود، مش واخدين على المرمطة علاولة كده، عشان كده تلاقي عودهم طري شوية ومش قادرين يستحملوا زي الامريكان المسلمين اللي مش حيحتفلوا بالعيد عشان خايفين) بس عشان عيب كده، وعشان مش في الصالح، وعشان اي انتقام او "تستاهلوا انتوا اللي عملتوا في نفسكوا كده" معناه انتصار للقوى الامبريالية والرأسمالية في العالم وحيصب في مصلحتها، ثم يعني مش معقولة يعني كل ما يعوزوا يجيبوا اي عدو ارضا كده ينجحوا بمنتهى السهولة ولا كأن لهم كبير.. إيه إيه إيه؟ ماحدش عارف يوقفهم خالص؟ طب ماحدش عارف يوقفهم بس على الاقل مش حاشارك معاهم

ايه دخل ده كله بكاميليا.. مالوش دخل بشخص كاميليا، له دخل بالدلالات اللي تبينتها بما يحيط بحدث كاميليا

كل الناس بتوع حملة حرية العقيدة تغاضوا او تراخوا عن التصدي لقضية شبه قضية محمد حجازي والعائدون للمسيحية والبهائيين وخالد سعيد... ليه؟

اي كلام عن انه "لم يثبت اسلام كاميليا" كلام هجص وتهجيص واستهبال.. امال الكنيسة طلقت عيالها يعملوا مظاهرة عشانها ليه؟ ولا انتوا فاكرين ان نملة تقدر تتحرك داخل الكاتدرائية من غير اذن الكنيسة؟ امال امن الدولة عكشها وسلمها للكنيسة ليه؟ امال الكنيسة متحفظة عليها وخافياها وبتقول مش حنطلعها ليه؟ عشان غضبت من جوزها وقرفت منه؟ كل الستات المصريات قرفانين من اجوازهم على فكرة، والمسيحيين قبل المسلمين لان المسيحيين ما عندهمش طلاق، طب ما فيه مسيحية ضربت جوزها سكينة، ما اتسلمتش للكنيسة تشأمظها ليه؟

احنا عندنا طرفين مش باصين لابعد من ارنبة انفهم، الازهر والكنيسة، فعلا يعني عساكر امن مركزي او امناء شرطة لما الواحد يكارمهم قوي، الاوامر العليا اللي بتجيلهم بينفذوها، ولو جات للكنيسة اوامر عليا بان سيبوا كاميليا حيسيبوها، ولو جات لهم اوامر بان اسكتوا حيسكتوا، مين فهمكوا ان الكنيسة عندها القدرة انها تضغط على النظام؟ ده يضغط على اللي يتشدد لها، هي تحت رحمته اساسا، النظام في اي لحظة يطلق عليهم السلفيين يقطعوهم فرافيت فرافيت، والسلفيين نفسهم ما بيتحركوش من غير ارشادات من النظام

طب انا مش حاعيش بقى مشغولة في الهبل واساند مخطط اوسع عشان فيه كام عبيط في ام البلد دي خايفين من بعض وتعيش كل طايفة من التانية خايفة وتنزل ستاير بداير وشيش.. اللي مخوفهم من بعض هو النظام، والنظام ده مش ماشي من دماغه ده برضه بتجيله اوامر، وبينفذها من غير مناقشة على فكرة

واهو الراجل ساحب ابنه ورايح يبيع الفتافيت اللي باقية من فلسطين عشان يركب الواد علينا واحنا قاعدين هنا نعمل مظاهرات في كنايس وجوامع

الصورة البانورامية الاوسع ان عجل المسلمين وقع وكترت سكاكينه، وخلاص بقى خطاب معترف ومعتبر ان الناس تقول حربنا مع الاسلام والقاعدة هي اللي فاهمة الاسلام صح وبقية المسلمين سذج مش فاهمينه صح وعشان كده واجب علينا تنويرهم وتوعيتهم وعلى الجانب الاخر شوية صراصير يطلعوا لنا من الجحور يتكلموا بكلام حق يراد به باطل ويبرطعوا لنا في حرية العقيدة

طبعا.. حرية العقيدة عشان نسن قانون يفتح الباب على مصراعيه لاي حد عايز يسيب الاسلام وفي نفس الوقت اللي يدخل الاسلام يتعاقب وماحدش يسانده، وفي نفس ذات الوقت حملة شعواء على الاسلام بانه ديانة شيطانية شريرة ضد الحريات

الحرياااااات

الحريااااااااااااااااااات

احا على الحريات.. انتوا بوظتوا لي رمضان السنة دي خالص.. احا على الحريات دي اللي وقعت الاتحاد السوفييتي وفتته ستين حتة وخلت العالم كله تحت رحمة قوة واحدة

والحريات هي اللي ورطت المسلمين وخلتهم يروحوا حرب افغانستان وادي اللي حاربوا في افغانستان اترموا زي ورقة كلينكس اتنف فيها وما بقاش لها عازة، لا وشوفوا البجاحة، يقولوا: اسامة بن لادن السحر الذي انقلب على الساحر.. بقى مين اللي انقلب على مين؟ الراجل كان مصدق ورايح يجاهد فعلا، وهم ساعدوه، وبعد ما استخدموه فرموه هو واللي معاه، يبقى مين اللي اتقلب على مين؟

يعني نفس اللي اتعمل مع الاتحاد السوفييتي بيتعمل دلوقت مع المسلمين، والمسلمين مش الاتحاد السوفييتي دول ماشيين يزكوا، هو هو بالمللي:

خطاب كراهية في العالم كله ضد الفكرة نفسها، وفي نفس الوقت اختراق داخلي تحت يافطة الحرية.. هي هي طبق الاصل العلقة الاولانية، مافيش اي ابداع

وعشان نبقى واضحين مافيش حاجة اسمها ديانة وحشة وديانة حلوة.. مافيش اصلا حاجة اسمها فكرة وحشة وفكرة حلوة.. الافكار افكار. والديانة هوية ثقافية، والاديان كلها زي بعض، اول إن اول كده كلها زي بعضها، وبتؤدي لنفس النتائج، وبتستحث نفس المشاعر، وبتستخدم نفس الاستخدامات - ايجابا او سلبا - وبتحمل نفس المبادئ والاخلاقيات كمان - برضه سواء اتوظفت في الاتجاه السلبي او الايجابي - والكلام عن ان الاسلام وحش او اليهودية وحشة او المسيحية وحشة او الهندوسية او البوذية او حتى الالحاد - وهو ديانة غصب عن عين الملحدين والله - ده خطاب عنصري وخطاب كراهية ولما يكون معتنقي اي من الديانات دي واقع تحت ظلم او بيعاني من الضعف او اضطهاد او استهداف بداية من السنج وانتهاء بالقنابل العنقودية، يبقى خطاب تحريضي

وزي ما انا متأكدة مليون في المية ان الحركة السلفية الجديدة صناعة احتلال، ومصممة اسميها السلفية الجديدة عشان فيه سلفية قديمة مالهاش علاقة بالسلفية الجديدة

وقبل ما حد يقول لي مالك ومال السلفيين دول امامير والله هو انت قعدتي معاهم؟ دول حتى بيوزعوا بطاطين واكل في رمضان، دول مش كلهم زي بعض

الاتجاه السلفي على اختلاف اطيافه مؤمن بتفوق المسلم على غير المسلم وعدم المساواة بينهم ولا لأ؟ الاتجاه السلفي بيتهم المتصوفة بالبدعة وبيطعن في عقيدة الشيعة ولا لأ؟ الاتجاه السلفي مؤمن بعزل الاقليات الدينية في المجتمعات اللي فيها اغلبية مسلمة ولا لأ؟

طيب كل دي اهداف استعمارية لتفتيت لحمة المنطقة وتسهيل السيطرة عليها بعد كده، بمعرفتهم او غير معرفتهم ما يخصنيش واساس اتجاههم ما بيخدمش غير الامبريالية، وانا شايفاهم صهاينة المسلمين، ولا اتهم افرادهم بالعمالة، بس الاتجاه صناعة امبريالية، وانضمام افراد له نابع من الاضطهاد العالمي للمسلمين، وتخفيف حدة الاتجاه ما يجيش بالقمع وانما برفع اسباب الظلم اللي ادت بناس انها تنتمي للاتجاه ده كرد فعل للمذلة اللي شايفينها، وان كنت برضه احب انبه المنتمين للاتجاه بانهم بيخدموا الاحتلال وعقلهم في راسهم يعرفوا خلاصهم

بس زي ما انا شبه متأكدة ان الاتجاه ده صناعة الامبريالية

انا كمان دلوقت، وبعد المحك اللي اتحط فيه دعاة الحقوق المدنية في قضية كاميليا، بقيت متأكدة كمان ان شبورة الحريات الدينية دي صناعة استعمارية، وهدفها تحقيق الهدف الاكبر المعلن للناس اللي بيقول عدونا هو الاسلام مش المسلمين وعلينا اننا نوعي المسلمين بحقيقة دينهم الوسخ

ايييييوةةةة.. حريات دينية حريات دينية، ومع الحصار العالمي للمسلمين والتنكيل بيهم مش حيبقى فيه اكتر من الناس اللي بيخرجوا من الاسلام عشان يدخلوا اي حاجة تانية، ومش حيبقى عندنا حتى ملحدين محترمين زي فنكلستاين وتشومسكي اللي بيقولوا احنا ملحدين عقائديا يهود ثقافيا، لان اللي حيخرج من الاسلام حيبقى هدفه اساسا الهروب من الحصار المضروب عليه في كل العالم، مش عايز هو يتشتم ويتفتش في المطارات وينضرب بقنابل ويتقال عليه متخلف وبيرجم الستات وبيقطع ايدين الناس (قال يعني رجم الستات مش موجود في كل الكتب المقدسة وقال يعني حرق الناس بالفسفور اكثر انسانية من قطع ايدين الناس) وحيحصل مع المسلمين اللي حصل مع الشيوعية وبقت الناس دلوقت تتكسف تقول انا شيوعي، وعلى رأي ياسمين عبد العزيز: انا مش شيوعيييييةةةةة انا يساااار معتدل

وبعد شوية يتكسف الناس يقولوا انهم مسلمين

بعد شوية ليه؟ ما قبل شوية اهو، ناس كتير بتتكسف تقول انها مسلمة

طيب انا شاركت بعزم مافيا في قضايا الحريات الدينية، لا اخفيكم سرا، انا كنت يعني مستعجبة شوية من الانفجار المفاجئ لقضايا التحول من الاسلام لاي دين تاني ولقضايا الحريات الدينية اللي فجأة فرقعت في وشنا، بس انا قلت الحق احق ان يتبع، حق الانسان يختار دينه، وحقه يتكتب في البطاقة، وبرضه كنت مستغربة من انفجار الاعتداءات على المسيحيين كل ما يرمموا كنيسة في وشنا ده، ما بيرمموا كنايس وبيبنوا كنايس، ايه الانفجار المفاجئ ده؟ بس قلت عليا واجب الحق حق، وتوقعت ان ده مبدأ

يعني في اي حالة وتحت اي ظرف المبدأ ده ساري، سواء واحد خارج من الاسلام او داخل الاسلام، سواء واحد واقع تحت ارهاب سلفي او ارهاب كنسي

وسبب انضمامي اساسا للحملات دي مش الحرية.. مش مؤمنة انا بالحرية دي، مالهاش معنى اساسا، انا مؤمنة بالعدل، بمعنى، زي ما مسموح لمن هو خارج الاسلام ان ينضم له، من حق من هو داخل الاسلام انه يخرج منه، ده العدل، والعدل هو اللي يهمني

بس الظاهر اني هابلة ومسكوها طبلة، والظاهر ان الموضوع اكبر مني بكتير، وان الحكاية لا فيها مبدأ ولا فيها اخلاق، ولا فيها حق، ولا فيها عدل

وحيث اني مش مهتمة غير بالعدل، مش من العدل اني اشتغل في حتة بازل صغيرة تبان كأنها عادلة بينما انا باحطها في صورة اكبر ظالمة، يعني باحط حتة من صورة ست الحسن عشان اكمل صورة الغول وهو بياكلها؟ لا.. مش حاعمل كده انا

طب حاعمل ايه؟ مش عارفة والله.. انا دلوقت محتاجة اتوقف وافكر شوية، انا ماليش هدف في الدنيا غير العدل وبس. ومحتاجة ادور عليه واكمل بحتة البازل اللي في ايدي صورة عادلة مش صورة ظالمة، او اموت وانا في ايدي حتة البازل وانشالله ما حاجة كملت

انا كل حاجة حواليا بتصب في مصلحة الامبريالية العالمية، كلها، مش عارفة اروح فين... وطبعا مسلمين معاتيه حيقروا الكلام ده ويمسكوا في خناق المسيحيين مع ان المسيحيين لا يقلوا عتها عنهم والله والاتنين اهبل من بعض وعاملين زيي كده وهابلة ومسكوها طبلة هم راخرين.. بدليل انهم يا قلب امهم ما عملوش مظاهرة واحدة عشان يرأسوا أقسام النسا مثلا، دول ما يعرفوش حاجة دول، سوا دول ولا دول، يعني مما لا شك فيه ان الاعتداء على الكنائس كان وراه حاجة، بس اللي اعتدوا على الكنائس ما يعرفوش حاجة، ومما لا شك فيه ان المظاهرات في كنائس عشان مرات كاهن بينما عمرهم ما عملوا مظاهرة عشان اندرو وماريو مثلا اللي اتخطفوا من حضن امهم كان وراها حاجة بس هم ما يعرفوش حاجة

والموضوع شكله كده فيه ظروطة وقرف وعك وكلنا اتلطينا ولا ايه...

بس ليه يعني بتوع حروق اللسان ما قدموش بلاغ للنائب العام عشان كاميليا؟ بجد يعني والله العظيم سؤال يعني

ومش حاقول ليه المسيحيين ما تضامنوش ولا ليه المسلمين بيعملوا مظاهرات في الجامع عشان دول مخهم على قدهم اساسا، وعلى فكرة هم مش عايزين دولة مدنية، بجد، ولا عايزين مواطنة، هم كانوا راضيين بحالهم زي ماهم، ومش متضايقين، لا دول ولا دول، هو بس فيه حاجات معينة حصلت خوفتهم من بعض، او بالاحرى فيه ناس كانت ورا حاجات معينة تخليهم يخافوا من بعض، دولم بغبغانات قعدوا يرطرطوا على موضوع الحرية الدينية ده وهم فعلا مش عايزينه، ودوكهمة بغبغانات قعدوا يرطرطوا كلام عن حرق النصارى عباد الصليب وهم لا يعنوا الكلام ده فعلا... فيه حد مرمر لهم عيشتهم وخوفهم من بعض

بس ليه بتوع حروق اللسان ما قدموش بلاغ للنائب العام؟

بس ليه بتوع حروق اللسان ما قدموش بلاغ للنائب العام؟

بس ليه بتوع حروق اللسان ما قدموش بلاغ للنائب العام؟

بس ليه بتوع حروق اللسان ما قدموش بلاغ للنائب العام؟

بس ليه بتوع حروق اللسان ما قدموش بلاغ للنائب العام؟

بس ليه بتوع حروق اللسان ما قدموش بلاغ للنائب العام؟

ها؟ ها؟ ها؟ ها؟ ها؟

رد رد رد رد رد رد رد رد رد رد رد رد رد رد رد رد رد رد رد رد رد

حكاية هاني المسيحي اللي كل الناس بتعامله على انه مسلم

انا والله ما اعرف اسمه هاني ايه؟ انا اعرف انه هاني وحتى مش فاكرة عرفت انه مسيحي منين، متهيالي حد كان بيهرج معاه في الموضوع ده، المهم هاني ده مافيش مخلوق في الدنيا مش بيتعامل معاه على انه مسلم، ده لو كتب مذكراته ح يكتب مواقف مالهاش حل

اول مرة اشوفه كنا طالعين السنة اللي فاتت في القافلة دي اللي اتمنعت، ايام ضرب غزة، كان معانا واحدة منقبة ما بطلتش رغي وكلام حماسي من عينة اننا كلنا فداء فلسطين ولازم نستشهد ولما الامن وقفنا جه التلفزيون يصور وماحدش فينا فايق يتكلم هي الوحيدة اللي قعدت تتكلم تتكلم وتقول لهم شعر وتعلن عن استعدادها للسير على الاقدام لنيل الشهادة في غزة لحد ما الكاميرا مان قفل الكاميرا والمذيعة طلعت تجري راحت جارية وراهم وسألتهم: هي الفقرة دي ح تتذاع على انهي قناة؟ اصل جوز اختي ما يعرفش اني جاية ولو شافني ح يزعل ويحرمني من اني اشوف ولاد اختي. هي منقبة اساسا، جوز اختها ح يعرفها ازاي؟ ثم ايه دخل جوز اختها في حياتها دي فهمتنا انها مقطعة البطاقة وح تروح تفجر نفسها. وبعدين طلعت الاتوبيس وبعد فشل محاولات مالك مصطفى ومحمد جابر انهم يقنعوها تقرا عدية يس عشان تحل عنهم الكل هرب، مين اللي فضل مستحملها وزنقته في الركن؟ هاني، المسيحي الوحيد في القافلة، قالت لهاني ايه: احنا لازم نموت عشان فلسطين (وبعدين راحت موطية صوتها لبعدين حد مسيحي يسمع وللا حاجة) وقالت: اذا كان النصارى اللي هم النصارى متعاطفين مع فلسطين، ازاي احنا بقى نسيب فلسطين. وهو يا قلبي يهز راسه.

النهاردة بقى، هاني اتعامل على انه مسلم برضه في الوقفة اللي ضد التمييز الطائفي امام النائب العام، واللي مركز هشام مبارك قدم له بلاغ، بس المرة دي من واحد مسيحي، هو يا حبيبي من اهالي الضحايا، وما اقولكوش بقى، انا رحت متأخر لأني فضلت ساعة الف على ركنة، ما عدتش اروح الوقفات بالعربية تاني، دخلت لقيت واحد بيتخانق، سايب دقنه، والدمعة بترقص في عينه ما بتنشفش ابدا، وعمال يزعق، بيزعق لمين؟ بيزعق لهاني: "لااااا، انا مش جايين هنا حفلة ولا بارتي وح نوزع جاتو، انتوا جايين تبيضوا وشكوا على قفانا؟ لأ، الحقيقة لازم تتقال، احنا مش جايين نقول الهلال مع الصليب، دي امنيات نتمناها، بس احنا مش جايين نقدم بلاغ بامنياتنا، احنا جايين نقول الحقيقة، مافيش هلال مع صليب في البلد دي، البلد مليانة كره، دي الحقيقة، فيه شعب بيكره، ده مش اضطهاد حكومي، ده اضطهاد شعبي.." والمسيحيين عمالين يسكتوه عشان ما يغلطش في واحد مسلم، اللي هو ميييين؟ اللي هو هاني، بصراحة انا شفت الواد بيتكلم بحرقة كده وهاتك يا عياط وشحتفة، وانا راخرة نسيت ان هاني مسيحي قعدت ازعق له: ما تسكتوش يا هاني، هو عارف ان فيه نفاق ومش عايز النفاق ده، هو عايز يقول حاجة سيبه يقول..الله يكون في عونه، انت مش حاسس بيه؟

مع العلم ان مش هاني اللي كان بيسكته... هاني مسيحي.. هاني مسيحي.. وما كانش بيسكت الجدع

لا بقى، باقول لكوا ايه؟ هم المسيحيين بقى شكلهم بيستفز الناس عشان تضطهدهم من غير ما يعملوا حاجة، امال كل الناس كانت بتزعق لهاني ليه؟ والست اياها افترست هاني وزنقته في الحيطة ليه؟ وايه اللي طسها في عقلها وخلاها دونا عن كل الناس تنم معاه على النصارى؟ ده نصيب بقى، يرضوا بنصيبهم

وطبعا ماحدش فيكوا ح يتف على وشي، لأن اللي حضروا الوقفة النهاردة هم اللي حضروا وقفة غزة، ماحدش من بتوع الشأن الداخلي شرفنا ولا آنسنا...عبده ظروف كالعادة

الاهالي مغدورين، مش حزنانين، مغدوريييييييييين، مش مقهورين من الموت، مقهورين من اللي حط عليهم ولا كان ع البال ولا ع الخاطر، حاجة فظيعة، مافيش حد حالق دقنه حتى، شكلهم عامل زي اهالي العبارة، واحد من الاهالي قال لي ان المسجل ده اللي اتقبض عليه بينزل في كل الانتخابات، وانه قبل الحادث باسبوع الحكومة اخدته وطلعت له شهادة تخلف عقلي، واحد تاني قال لي ما كانش فيه حراسة كافية، والبوليس وقف يتفرج على الناس ولا حتى جري ورا العربية، ولا اتحركوا من مكانهم، قلت لهم ما كانش فيه اسعاف سريع؟ قالوا لي مافيش اسعاف في نجع حمادي اصلا!!! يعني ايه مافيش اسعاف في نجع حمادي؟ يعني مافيش

من الهتافات بقى اللي اتقالت: ما تقولوش احنا ضعاف احنا اقوى من اي رصاص

ههههههههههههههه بصراحة ضحكت، مع اني كنت مفحوتة من العياط بسبب الولد اللي مش عايز نفاق، يا عم اقعد انت وهو، على فكرة في فوء تساهم، المسيحيين حاسين ان الناس بتعمل فيهم كده عشان مستضعفينهم ومستهفأينهم، بينما المسلمين بيخافوا المسيحيين وعشان كده بيعملوا معاهم كده، ومش حاسين انهم ضعاف ابدا، بالعكس، دول فاكرينهم ياما هنا ياما هناك، وصدق او لا تصدق، هتاف زي اللي ضحكني ده بيخوف المسلمين بجد.. بينما واقع الامر انهم بيتبهدلوا ومش عارفين ياخدوا حق ولا باطل وكل ما يعملوا حاجة تيجي على دماغهم اكتر ومش عارفين يروحوا فين وييجوا منين، مش ح ينفع كده، مش ح ينفع فريق الاهلي والزمالك، دي مش كورة، دي بلدنا

على رأي الصخص اللي قال لي: البلد بتطلع في الروح يا آنسة. وانا اشرت امبارح على التويتر ان البلد تولع، المهم انه قال لي يا آنسة، بس الظاهر انها بتطلع في الروح فعلا

فيه ناس طلبت مني اني اتأكد من المعلومة اللي قالها لي احد اهالي الضحايا بتاعة شهادة التخلف العقلي، بس اليوم الساقع بتقول دلوقت ان المتهمين انكروا اي صلة لهم بالحادث!!!!! يعني نستنى الاغبار، كلها اربعة وعشرين ساعة وشهادة التخلف العقلي بتاعة البلد كلها تطلع

ثم ايه حكاية الهلال مع الصليب دي؟ الشارة دي بتغيظني قوي بصراحة، انا دلوقت حاليا مسلمة اهو، ايه كنه الهلال بالنوسبة لي يعني؟ ده هلال ايه ده؟ ده هلال الدولة العثمانية؟ وللا هلال رمضان؟ غالبا هلال رمضان حيث ان فيه مسلمين مش بيصلوا غير في رمضان وبنات مش محجبات بيلبسوا حجاب في رمضان، هو لازم شارة يعني؟ لو لازم شارة شوفوا لكوا اي شارة تانية غير الهلال مع الصليب دي عشان بقت مبتذلة قوي وبقت تفكر الناس بالنفاق والتلييس

مش مهم يبقى فيه هلال جواه صليب، المهم ان لما واحد يبقى قاعد بيتغدى ما يسمعش جيرانه بيدعوا عليه في الميكروفون وهم بيصلوا

----------

البحرين عاملة مظاهرات ضدنا... هيهيهيهيهيييييي، احنا اتشهرنا فعلا

وح نتشهر اكتر واكتر كل ما ابو الغيط يفتح بقه ويقول الضرر بتاعته، وطبعا ده ابلغ رد على اتهامات جالاوي المغرضة

اسكتوا اسكتوا اسكتوا، مش الراجل اول ما نزل مطار هيثرو فضح اللي جابونا وخلا اللي ما يشتري يتفرج علينا؟ وقال عندنا البحر وعندنا تركيا وده وسام على صدري ان مصر ما ترحبش بيا

انا مبسوطة قوي مننا يا شباب.. انتوا كمان مبسوطين؟
اه.. نسيت: فيه حد على التويتر بيقول ان المنقبات راحوا الامتحان لابسين كمامات وقالوا عشان انفلوانزا الخنازير
والله العظيم بنات بميت... لا انا مش ح اقول بميت راجل، عشان نو افنس كده، ميت راجل دول ما يوزنوش ربع كيلو جبنة رومي قديمة عند البقال.. كل واحدة فيهم بنت بميت بنت

شعب الله المنشار

اسرائيل بتاخد من امريكا بس ستة مليار دولار سنويا، غير اللي بتاخده من الاتحاد الاوروبي، غير اللي بتاخده من تحت الترابيزة من الحكومات العربية، غير اللي بتاخده من الجمعيات اليهودية في العالم كله، غير قضية الفساد اللي فيها حاخامات (حاخامات يعني رجال دين يهود) اللي بيتاجروا فيها باعضاء الناس ويغسلوا اموال مسروقة من قوت الناس (وغالبا الناس دول اللي هم احنا على رأس القائمة) ويبعتوا لاسرائيل، غير فلوس العراق اللي بتكب عندهم بعد ما حصل اللي حصل

وهم كلهم على بعضهم تعدادهم يقارب السبعة مليون، منهم مليون ونص عربي، وبقالهم ستين سنة على ده الحال، اليابان بنت نفسها في كام سنة؟ كل ده ودي احوالهم الاقتصادية:

Poverty and Hunger


Of the 2.1 million households in Israel, one of every four Israelis –1.6 million people – lives below the poverty line. Close to half of them are working in full or part-time jobs and are still unable to provide the basics for their families. This Passover, charity organizations say they saw a 40 percent increase in the number of people asking for help. In Jerusalem nearly 1,000 people a day come to four soup kitchens at which hot meals are served.


• One-third of Israeli children, some 777,400 in number, live in poverty-stricken families, according to the National Insurance Institute (February 2009). Israel ranks among Western countries with the greatest percentage of poor children.
• The number of working families under the poverty line continues to rise, from 45.7percent in 2007 to 66.4percent in 2008.
• In 2005, the poverty line for a single person was about $445 per month; for a family of five, it was $1,337. A minimum-wage earner in Israel brings in approximately $883 per month; taxes can reduce that number almost to the poverty line.
• Over 70 percent of the minimum wage earners in Israel are women.
• 75 percent of poor families cannot afford medicine and 70 percent are dependant on food donations.
• 80 percent of Israelis living on support provided by aid groups are below the hunger line.


One of the saddest and most telling statistics is this: 44 percent of those polled by Latet, a food aid organization, stated they cannot imagine breaking out of the cycle of poverty, and believe that their children will also grow up to be poor.

 

انا مندهشة وفاتحة بقي كدهو

انا عايزة افهم ليه؟ ليه يعني؟ عندهم فساد اكتر مننا؟ ما بياخدوا فلوس اكتر مننا، وتعدادهم قد تعداد شبرا، ازاي احصائيات الفقر بتاعتهم تبقى زي بتاعتنا؟ وبيتنططوا علينا ليه بقى؟ الفلوس بتروح فين؟ لا بجد، انا باكرر تاني انا تافهة، الحاجات دي تضايقني قوي

ايه الفشل ده؟ انا ما احبش الفشل، وجزيرة الديمقراطية دي عاملة زي ابن العمدة اللي فضل يسقط يسقط يسقط لحد ما اخر مرة في الامتحان حطوا له ورقة الاجابة جنب ورقة الاسئلة وعايز يغش من اللي قدامه برضه، قام اللي قدامه قال له:

- عايز ايه؟ ماهم حاطين لك ورقة الاجابة

- ايوة يعني نعمل فيها ايه؟ نحط لها اسئلة؟

حرام والله

طب والله العظيم حرام، حرااااااااااااااااااااام، حرااااااااااااااااااااااااااام احنا نعيش في الذل ده وسبع صنايع والبخت ضايع كله لجل عيون ابن العمدة الخايب،

شعب الله المنشار

طالع واكل نازل واكل وياريته محوق

يا عيني علينا والله، ربنا ما يرضاش بكده ابدا

---

سؤال بس والله، هم بيقولوا اسرائيل من اكتر الدول "الغربية" اللي فيها فقر اطفال! ودي برضه من ضمن الحاجات التافهة اللي بتضايقني

ان اسرائيل عاملة زي الواد الـ....فوزي. لما نقول لهم ايه حقكوا في الارض دي يقولوا احنا شرق اوسطيين ومناخيرنا طويلة زي مناخيركوا وولاد عمكوا

لما يقولوا لهم بامارة ايه بتاخدوا كل الفلوس دي من الدول الغربية وبامارة ايه الدول الغربية تميزكوا عن بقية الشرق الاوسط يقولوا احنا الممثلين للحضارة الغربية في المنطقة

ما يعملوا عملية ويقرروا هم سالي وللا سيد

----

بياخدوا من الاسرائيليين اكتر من خمسين في المية ضرايب؟ هو احمد نظيف اسرائيلي وللا ايه؟

---

نسوانهم بيقبضوا اقل فلوس؟ طب الرجالة بتصرف يعني وللا برطات؟

----

خمسة وسبعين في المية من الاسر الفقيرة بتشحت الاكل؟ يعني ما يقرب من تلت الاسرائيليين بيشحتوا الاكل؟

احسن يكونوا حاسبين الفلسطينيين معاهم، لا ما يتهيأليش، اللي في الاراضي الفلسطينية بيتقال عليهم بالستينيان تيريتوريز

-----

امال هم عايشين ليه؟ وكل الفلوس اللي بتتهلب دي ومجوعين الناس؟ ناسهم؟

مش نافع كده والله

طب والله العظيم ما نافع ابدا

وقع وثيقة تفكيك اسرائيل.... بجد بقى، يعني ده انت حتى لوشبشب لامريكا المفروض يصعب عليك اليهود اللي جوة اسرائيل لو احنا مش صعبانين عليك

ماحدش يشتكي من اخلاق اي حد تاني

اي بلد في الدنيا اقتصادها معتمد على البقشيش والسمسرة مش ح يبقى فيها ناس عندهم اخلاق، عشان لا الشحاتة ولا الحنجلة بتنتج بني ادمين محترمين

ماحدش بقى يكلمني على الدين، وللا الاخلاق، وللا قيم، ولا البلد مافيهاش رجالة، ولا فيها رجالة

احنا اتسترنا في السبعينات عشان كان فيه فرصة ان بعض المصريين يسافروا الخليج ويضخوا فلوس للبلد، لكن تجريف الاراضي وهدم الصناعة ابتدى من السبعينات، ولولا سفريات الخليج كان زمان البلد دلوقت معتمدة على....ما تخلوناش نتكلم

وعمالين يتمادوا في الخطة الاقتصادية اللي ابتداها السادات ودلوقت وصلت لذروتها

خصوصا بعد ما العراق (اللي كانت ساترة بيوت كتير برضه) اتهدت على دماغ المصريين ورجعوا هربانين وشقا عمرهم راح عليهم

يعني مافيش فرصة ان واحد يشتري حتة ارض ويزرعها

ولا حتى يعمل صناعة صغيرة

ودلوقت البلد بتاكل عيشها منين؟ من ناس تيجي من برة تصرف فلوسها علينا، يا نمد ايدنا وناخد تيبس (دلوقت الناس بقت تقول على الشغل: طالع لي "حسنة" كويسة منه) يا نهنكر ونشتغل سماسرة ونطلع كوميشن

دي مش شغلانات، دي سفالة، وانحطاط، وقلة ادب، وكل حاجة بقت معتمدة على البقشيش والسمسرة، حتى الطب، والهندسة، والفن، والصحافة، ده التدوين بقى كده، كل حاجة، كل حاجة

صلي بقى وربي دقنك وصوم اتنين وخميس، وحج بالفلوس اللي انت شاحتها كل سنة، مهما تعمل، انت عايش عيشة مش محترمة ومش ح تبقى محترم، انت متسول وفي احسن الحالات شماشيرجي بتطلع بسبوبة

من هنا بقى لحد ما ربنا يفك اسرنا من الورطة اللي ورطها لنا السادات وبينفذها مبارك بكل الاخلاص والتفاني - مما يجعله الوحيد اللي مخلص في شغلته ومهمته في البلد

نستحمل بعض بقى، نستحمل بعض على قد ما نقدر، ما نمشيش نشتم في اخلاق الناس، شوف اخلاقك الاول، اكيد اتأثرت بشغلانتك يعني، واللي مرتاح سنة يستحمل اللي تعبان اكتر منه، ما تبقاش راكب عربية مكيفة وتتخانق مع سواق ميكروباص وسواق عربية نص نقل وسواق تاكسي، احترم نفسك وخلي عندك كرامة - لما تفتري على الاضعف منك (حتى لو غلطان) يبقى انت بني ادم لا عندك كرامة ولا عندك دم ولا احساس، كتر خيره انه ما رفعكش بالمطواة عشان ياخد حقه، ما تبقاش راجل وتتخانق مع ست، ما تبقاش شاب وتتخانق مع راجل كبير (حتى لو قليل الادب - مش عارفة ايه اللي حصل الرجالة الكبار بقوا قلالات الادب قوي - بس استحمله بكرة تبقى قده) ما تبقاش مسلم وتتخانق مع مسيحي، ما تبقاش قوي او مرتاح شوية او عندك اي امكانية على اي مستوى وتتخانق مع الاضعف وللا الاتعب وللا الاعجز، احترم نفسك، لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل

دي بلد لا فيها انتاج ولا فيها قانون يعني مافيهاش اي حاجة تخلي البني ادم عنده مرجعية اخلاقية، حتى الدين بيتفسر على مزاج صاخيب المخيل، وفيها ناس تعبانين، نساع بعضينا شوية، ونستحمل بعضنا شوية

لو الرحمة كمان راحت من البلد يبقى دي بلد ليه بقى؟ يبقى مالهاش لازمة اصلا، ربنا ح يجيب ضرفها، ولو جاب ضرفها مش حلو علينا 

لاطلاق سراح المعتقلين في ايران

محمد مرعي عمل المدونة دي لاطلاق سراح المعتقلين في ايران

هم نازلين عفق في العيال وسايبين موسوي وخروبي؟ ماهو لو فيهم عميل العيال دي - وانا اشك ان عيل فيهم عميل - يبقى على راسهم خروبي وموسوي سايبينهم ليه بقى؟ وللا هم الغلابة مالهمش حظ في اي حتة تانية؟

هو فيه في الدنيا كده؟ حصلت في الدنيا قبل كده ان فريق خسر الانتخابات قام حرك الناس في الشارع؟ وفي الاخر الناس هي اللي غلطانة كمان؟ هم ذنبهم ايه؟

وعلى رأي هيكل: لزومها ايه الشرشحة دي؟

فين مواطن مصري؟

بتتفرج على الانتخابات الايراني يا مواطن؟

وتلاقيه بعد النتيجة ح ييجي (زي كل مرة): بس الحقيقة حاجة تفرح الانتخابات دي

يا حبيبي

فعلا مواطن مصري اصيل، قاعد يفرح للناس كلها، ولا متغاظ زيي، ولا سماوي زيي، ولا دمه محروق بجاز وسخ زيي

والملحوظ ان ناس كتير زي مواطن، ايام انتخابات امريكا، ولبنان، ودلوقت ايران، ولسة شوية تركيا: بس حاجة تفرح

ايوة حاجة تفرحهم هم، انت فرحان ليه؟  

عاملين زي سكان العشوائيات اللي كل ما يعدي عليهم عربية سبعة متر يقولوا: بس ابن ناس وراجل نضيف الصراحة

ولا حقد، ولا اشمعنى هو عنده واحنا لا، ولا انشالله تتقلب بيه، ولا الهي تولع بيه ولا اي حاجة: اللهم صلي ع النبي ربنا يزيده

يزيده ليه؟ ما تعرفش

قلبهم فيه الخير المصريين دول

قلبهم فيه الخير قوي

قلبهم فيه الخير بطريقة تغيظ

لا إله إلا الله

انا انسان وانت انسان، ابويا وابوك ادم، وامي وامك حوا، عايشين في دنيا واحدة وفيها رزق نازل للبشرية، اللي خلقني هو اللي خلقك

ليه انا ابقى ريسة عليك اديلك اوامر وانت تبقى تحت ايدي ومنصاع ليا؟

ليه انا اعيش مرتاحة وانت تعيش تعبان؟

مين قال اني بافهم احسن منك؟ ما اللي خلق مخي هو اللي خلق مخك

ليه انا يبقى عندي ملايين وانت تبقى بتزق في الشهر بالعافية؟

لو فيه كذا خالق - لا اله الا الله - يبقى اللي خلقني احسن من اللي خلقك

لكن اللي خلقنا واحد

انا احسن منك في ايه؟

طب لو انا انت وانت انا... انت فاكر نفسك احسن من الناس ليه؟ وليه ما حطتش في بالك انك كان ممكن تتولد فقير مش غني؟ مرؤوس مش رئيس؟ تعبان مش مرتاح

--------

طبعا واحد ح يسيب ده كله ويسألني: نوارة.. انت معاك ملايين؟

طبعا... الكتاب بيبع حضرتك هررررررررررررر 

عاجل: وفاة شاب في اسطبل عنتر على ايدي الشرطة

احمد محمود شحاتة، السن 19 سنة، عامل رخام، ساكن في خارطة الشيخ مبارك بمصر القديمة ظابط شرطة وقفه واخده تحري وفضل يضرب فيه لحد ما مات، اهله ما سكتوش وقدموا بلاغ راح الظابط ضغط على عمه عشان يتنازل عن المحضر، الجنازة طالعة بكرة الصبح من مشرحة زينهم، واهل الولد واللي في المشرحة مستعدين يشهدوا بالواقعة، ده مش اول واحد ينضرب لحد ما يموت، بس ده اول واحد اهله مش عايزين يسكتوا بالرغم من ضغط القسم عليهم، بس محتاجين حد يقف جنبهم

امراض الطبقة المتوسطة لا تمثل الشعب المصري

عاجل:

مدونتي مش بتنزل البوستات الجديدة ولما اعمل سيف للبوست يقول لي

form errors

الفورم ايرورز دي تيجي منين؟ المهم اني لما باعمل ايديت بيتعمل ايديت، كمان مدونة شهروزة اتوقفت وكمان وقفوا لها حساب الايميل بتاعها

لا بقى

كده محتاجين تصييح جامد يا شباب، اكتبوا على مدوناتكوا لجوجل جوابات لان كده شهروزة الاول وبعدين انا بعدها بتاني يوم، والموضوع مش موضوع شكاوى بقى معلش، جوجل مليانة حاجات خارجة عن القانون بما فيها جنس الاطفال المحرم دوليا واللي بينزله على الكمبيوتر بتاعه بيتحبس

الطبقة المتوسطة تحترم نفسيتها بقى وتتلم، هم اصلا 15 في المية وماسكين كل حاجة ونازلين عمايل زي الناس في دماغنا

انا مستاءة جدا من حلقة العاشرة مساء النهاردة
الموضوع وما فيه ان مجلس الوزرا عمل استطلاع رأي على عينة من المصريين وطلعت النتيجة كالآتي:
هل انت سعيد في حياتك؟
الحمد لله (80%)
طب راضي عن وضعك الاقتصادي؟
بصراحة لا (75%)
هل انت فخور انك مصري؟
اه طبعا فخور قوي اني مصري (80%)
مستعد لو قامت حرب تموت عشان مصر؟
طبعا (80%)
تحب تشتغل في القطاع العام وللا الخاص؟
الخاص
تحب نظام الخصخصة وللا القطاع العام؟
العام
طيب انا شايفة النتائج دي منطقية جدا والمفروض ان اي حد مصري بينزل الشارع وبيركب مواصلات وبيتكلم مع سواقين التاكسي (ومش لازم يشتغل في العشوائيات يعني) يبقى فاهم الكلام ده جاي منين
نفسي اعرف بقى ايه وجه السخرية والتريقة من الاستاذة منى الشاذلي والدكتور الرخاوي والاستاذ ايمن الصياد على المصريين
ومرة يتهموهم انهم فشارين وكدابين، ومرة يقولوا الكلام متناقض، ومعقولة يعني المصريين فخورين بمصريتهم اكتر من الالمان امال بيرموا نفسهم في البحر ليه؟
طيب هم بيرموا نفسهم في البحر وبيحبوا مصر، وهم هربانين من الفقر مش هربانين من مصر، واللي هم ما استكملوهوش في وصلة السخرية من المصريين ان فيه احصائية بتقول ان المصريين اقل الجنسيات المهاجرة تخلي عن جنسيتهم الاصلية، وانهم ما بيعملوش كده غير في الدول اللي بتجبرهم على انهم يبقى عندهم جنسية واحدة وبيبقى اختيارهم الاول انهم يرجعوا ولو ما ينفعش يرجعوا بيضطروا يتنازلوا عن الجنسية المصرية، ولما استطلعوا رأي موظفين السفارات قالوا المصريين اللي بتخلوا عن جنسيتهم بييجوا السفارة وهم بيعيطوا، ولما بيقطع الباسبور على الشط لما بيوصل ايطاليا مش بيقطع جنسيته المصرية ده بيقطع اي وسيلة ترجعه تاني للفقر، زي ما تقول كده بيرمي بلاه على البلد اللي رايحها
واللي كمان هم مش واخدين بالهم منه، ان المصريين مش بيهاجروا الى ابد الابدين، دايما بيرجعوا، ودايما بيبقوا مهتمين ان لما ربنا يفتح عليهم في الغربة يبقى عندهم بيت هنا في مصر، ولازم يبقى بيت ملك
انا اتضايقت جدا وعيطت
كون ان الطبقة المتوسطة ساخطة ومش بتحب مصر ومخنوقة منها ومحتقرة الشعب المصري وكل واحد شايف نفسه خسارة في البلد، دي امراضهم هم ياريت ماحدش يسقطها على الشعب المصري لانهم مش بيمثلوا الشعب المصري، دول حتى ليل نهار يقولوا احنا بنضمحل...ياللا في داهية
انا اشتغلت فترة في العشوائيات، والناس فعلا دي اجاباتها: الحمد لله احنا احسن من غيرنا كتير....يوووه ده الدنيا ياما فيها بلاوي ده احنا في نعمة...بس لابد من كل بد تركبوا لنا عداد النور....وتساعدونا عشان جوزي بيعمل غسيل كلوي ومش معايا تمن الدوا...لو ينفع الواد اخويا يسافر في اي حتة يجيب قرشين....بس بلاش الخليج عشان مش بيحبوا مصر....مصر ح تلعب النهاردة مع الكاميرون...مصر ام الدنيا
طب اقول لكوا حاجة
في الاول خالص مالص، زمااااااان اول ما اشتغلت هناك، ايام ما كان اسطبل عنتر ده ادغال، اهالي اسطبل عنتر ما كانوش بيرضوا يتصوروا (دلوقت اقتنعوا بجدوى التصوير ومش كلهم برضه، فيه لسة بيزعقوا لنا لو صورناهم) عارفين ليه ما كانوش بيرضوا يتصوروا؟:
انتوا عايزين تصوروا عفانتنا عشان تشوهوا سمعة مصر؟ مصر فيها حتت حلوة كتير...مش كل المصريين زينا...امشوا من هنا يا ولاد الكلب يا اسرائيليين
انا عايزة افهم ايه العجيب في ان المصريين بيقولوا احنا مستعدين نموت عشان مصر لو حرب قامت؟
اولا المصريين ما عندهمش اي مانع يموتوا لاتفه السبب، واللي مش مصدق يشوف الناس بتعدي الشارع ازاي، دول ناقص يحبوا على رجل اللي سايق عشان يموتهم، ونسبة الخوف من الموت عندنا طول عمرها قليلة، ثم بقى انا بالاقي كتير قوي، خصوصا من اللي الغلابة، نفسهم ومنى عينهم ان يحصل حرب! نوع من انواع الاكسايتمنت يعني، الحقيقة مافيش غير الطبقة المتوسطة هي اللي بتخاف من الحرب، واللي فوقيها طبعا، اللي فوقيها انا مش باعتبرهم مصريين اصلا، المهم، اللي خايف من الحرب خايف عشان عنده حاجة يخسرها، لكن اللي انا اشغلت معاهم (خصوصا العيال بتوع الاحداث) حاسين ان الحرب دي بقى ح تبقى لعبتهم، وفرصتهم الوحيدة عشان يبقوا ابطال والبلد كلها تتوقع في عرضهم، عاملين زي اللي امه بتضطهده وبتطلع عينه وبتفضل اخوه عليه، ونفسه ومنى عينه انها تعيا عشان يتبرع لها بكليته ويموت عشانها بس عشان تعرف قيمته وتحبه زي ما هو بيحبها
وهم محقين فعلا
مين اللي مشي على الالغام بالالاف وصد بجسمه فوهات المدافع في حرب تلاتة وسبعين؟ مش العساكر الفلاحين والصعايدة الغلابة؟
اما بخصوص انه عايز يشتغل في القطاع الخاص لكن عايز كل حاجة تبقى تبع القطاع العام
فده مفهوم، هو دلوقت حالا عايز يشتغل في القطاع الخاص عشان فلوسه اكتر، لكن يتمنى ان كل حاجة تبقى تبع القطاع العام لاني سبق وقلت لكوا المصريين شيوعيين بالسليقة، الثقافة الابوية بتخليهم عايزين كل حاجة تبقى في ايد الدولة عشان يبقى فيه عدالة
الحقيقة انا مش شايفة غرائبية في نتائج الاستطلاع، ولا شايفة تناقض اذا اتكلمنا عن السياق المصري وتصارع الشخصية المصرية وموروثها مع الواقع المفروض عليها، ايه ده؟ انا باقول ايه؟ ايه الجملة الاخرانية دي؟ المهم انتوا فاهميني يعني احنا عشرة
ولا شايفة اي داعي للتريقة على المصريين والسخرية منهم واتهامهم بالكدب وانهم هم اللي المشكلة فيهم مش المستطلعين
الحقيقة المشكلة مش فيهم ولا في المستطلعين، المشكلة في النظام اللي بيحطهم في صراع ما بين القيم اللي هم مؤمنين بيها وما بين الظروف الصعبة المفروضة عليهم
وايوة المصريين لسة بيحبوا مصر، ولسة فخورين بيها لدرجة انهم ساعات يستعروا من نفسهم عليها، يعني شايفين ان مصر مقامها اكبر منهم، وكتير بيعملوا زي اللي مش بيرضوا يتصوروا عشان مستعفنين نفسهم ومحرجين لمصر منهم، ودي تركيبة ما يفهمهاش اللي قاعد معزول عن الناس
والرضا بقضاء الله حاجة وزنقة الفلوس وصعوبة المعيشة حاجة تانية
وقرفهم من العيشة حاجة وحبهم لمصر واستعدادهم انهم يموتوا عشانها حاجة تانية
هم اصل المتحدثين تعليم خواجاتي شوية، عندهم التصور الخواجاتي بتاع ان الوطن هو اللي بيدي الواحد حقوق وبيوفر له حياة كريمة
واحنا من امتى في مصر كان عندنا التصور ده عن الوطن؟ اذا كنا لما بنهاجر بنعمل فول وطعمية وبنوسخ الاماكن اللي احنا عايشين فيها عشان تبقى شبه مصر، ونعمل قهاوي ونعمل تجمعات مصرية ونتخانق نفس الخناقات وننزل في الشارع نحتفل بفوزنا بكاس افريقيا، مش كل من هاجر بقى ما عندوش انتماء
ولا زهق من البلد ولا ده معناه ان ما يتمناش يموت عشانها
والناس لما بتقول مصر هي امي، هم حاسين انها امهم بجد، حتى لو ام رخمة وبترنهم علقة بالحزام، ويتخانقوا معاها ويطفشوا ويروحوا يباتوا عند واحد صاحبهم، بس امهم، حد ح يكره امه؟
انا مش طالبة منهم ينزلوا العشوائيات (مع مراعاة انهم يلبسوا لبس بسيط شوية عشان يحسسوا الناس انهم منهم) انا بس عايزاهم مرة كل ست شهور يركبوا المواصلات وللا حتى ياخدوا تاكسي عشان ما يبقوش قاعدين كده مندهشين من اختراع العجلة ومش دريانين بجوانيات اهلهم
ولما هم اللي ما يفهموش
ولما هم اللي ينعزلوا
يطلعوا ان الشعب هو اللي وحش وهو اللي كداب وهو اللي مش معقولة ابدا يبقى عنده انتماء واكيد نصاب
ويقعدونا قدامهم ساعة يبستفوا فينا هم ومتصلينهم اللي لاوئين ضبتهم
اما عاجيب والله
وتحية للدكتور ماجد عثمان
اه، نسيت اقول حاجة، الناس قالت احنا مستعدين نموت عشان مصر، تقوم الاستاذة منى في اخر الحلقة تقول، ياريت نقول الحقيقة عشان استطلاعات الرأي دي بتفيدنا يعني لما حد يقول لك مستعد تموت في حرب قول اللي جوة نفسك
يعني كأنه تحريض للمصريين على انهم ما يموتوش عشان بلدهم وتسفيه للناس واللي يقول انا اموت عشان بلدي يبقى كداب
امممممممممما عجااااااااااااايييييييييييييبببببببببببببببب فعلااااااااااااااا

لا...عيالنا يرجعوا لنا بقى

عااااااااجل: احد المعلقين دخل دلوقت وقال لي الفيديو ده قديم!!!!!!!!! طب ليه ينزل دلوقت؟
انا مش قلت قليل من نظرية المؤامرة يصلح المعدة؟ طبعا انا ما اقصدش ابدا ابناء مصر، دول عيالي وعيال جدعان وكل واحد وواحدة فيهم عشر رجالة في بعض، انا اقصد اكيد اتبعت لهم الفيديو ده وهم فاكرينه جديد، طيب ياريت نتحقق من كلام المعلق واذا كان فعلا فيديو قديم يبقى فيه حاجة مش مظبوطة بتحصل!

الفيديو ده من عند ابناء مصر، وكلهم لابسين جلاليب بيضا فالواحد مش عارف المصري من السعودي

بس سمعت واحد بيقول ربوا المصري ينعل دينه
لا عيالنا يرجعوا لنا بقى بلا بهدلة وشحططة ومرمطة، ارجعوا لنا بقى وتعالوا البلد فيها فلوس ايه اللي يخليكوا تسيبوها، ييجوا وانشالله يطلعوا بالمطاوي على رجال الاعمال الاوساخ اللي واكلين بلدنا وطاردينا منها
السفارات المصرية في كل انحاء العالم: قبح الله وجوهكم على رأي السعوديين
لو لنا سفارة ما كانش حد داس لنا على طرف في حتة، لكن هو احنا لنا بلد عشان يبقى لنا سفارة؟
انا مش قلت رجال الاعمال لازم يتنيلوا يتأمموا، فلوسنا وواكلينها وبيصرفوها على مطربات الفيديو كليب وعيالنا يروحوا يتبهدلوا عند الناس
بس هي ايه الحكاية؟
لا بجد
قليل من نظرية المؤامرة يصلح المعدة
اشمعنى اليومين دول موضوع السعودية والمصريين ده قايم؟ من فترة سعوديين ومصريين عملوا اغنيتين في منتهى الحقارة والسفالة بيشتموا بعض
وبعدين توالت الاحداث
ايون...ايه الحكاية بقى؟ ما احنا بنشتغل في السعودية من السبعينات
مين اللي مقوم الدنيا كده ما بينا؟ ولمصلحة مين؟ ثم اساسا اي حد يوعى من وشنا دلوقت احنا روحنا في مناخيرنا ومش طايقين نفسنا وما ح نصدق نطلع غلبنا كله في حد لما نمشيه يكلم نفسه
انا اللي شايفاه من المصريين، في الشارع حتى والمواصلات، انهم بيتلككوا عشان ما يصدقوا حد بس يحك لهم على مناخيرهم، ده انا مرة واحدة شتمتني في الشارع قلت لها فيه حاجة يامدام قالت لي هو كده! فما بال بقى ينضربوا في حتة، ما ح يصدقوا ما تغوروا من وشنا الساعة دي

الانسان الانوي النادر

الراجل ده عنده كرامة،
هاه؟ هي حاجة كده بتبقى عند ناس معينة، بتخليهم يتصرفوا تصرفات غريبة شوية، ويقولوا كلام اغرب ويزعلوا من حاجات ما تزعلش ودمهم يتحرق من حاجات لطيفة موت وما يخافوش من حاجات تخوف ويفرحوا بحاجات رخمة كده ودمها تقيل...يعني نيموذج من البشريات، ربنا يشفي كل انسان ما يصحش نعايب على المرض

لا والمفاجئة بقى انه اتكلم كلام واحد فعلا عنده كرامة، تصوروا؟ يعني ثابتة عليه، وما انكرهاش على فكرة، بيبجح في وشنا كده، ده حتى جاب سيرتها، الكرامة يعني، ما انا نسيت اقول لكوا ان هي الناس دي بتبقى كده، يعني يقول لك مثلا ايه علاقة كيان عنصري بالاديان وحوار الاديان؟ واحد قاتل اطفال من سنتين بس، ده الحكاية مافتش عليها ميت سنة ولا حاجة، دول سنتين يا ناس، اديان ايه اللي رايحين تتحاوروا مع بيريز فيها؟ يعني احنا في المقاومة لو قلنا اننا عايزين نشارك في حوار الاديان امريكا ح ترضى؟ ما تخلوا عندكوا شوية كرامة بقى، مافيه يهود في الدنيا كلها ماهماش صهاينة...هي حبكت؟ وقعد يقول، حاجة شبه انتوا مالكوا شبطانين في ديل امريكا كده، دي موتت ناس كتير حتى، ومننا على فكرة، ده الحرب علينا كانت امريكا اللي اخدت قرارها وبتديرها، انتوا ماعندكوش كرامة ليه؟ وبعدين يعني واحد نجح في انتخابات مش بتاعتنا مالكوا فرحانين كده؟ انا مش باقول ازعلوا لا سمح الله بس ما تفرحوش يعني او حتى استنوا شوية شوفوا يمكن يطلع كويس يمكن يطلع وحش، وبعدين كويس وللا وحش انتوا مالكوا، هو ماله هو المفروض ان مصيركوا في ايدكوا يعني وكده، مش معقول قاعدين مستنيين متغيرات العالم عشان تحدد مصيركوا وانتوا مافيش فيكوا اي حركة يعني..ده الغرض بس انا ما اقصدش حاجة...
وكلام شبه كده، مش عارفة انا الناس امات كرامة دي بتجيب الكلام الغريب ده منين؟
سبحان الله، ويخلق مالا تعلمون
عموما هو انسان انوي نادر، يعني اتفرجوا عليه من باب حتى العلم بالكرامة، عشان تعرفوا ان الواحد في نعمة
قال كرامة قال...تف من بقك يا شيخ دي عالم حاقدة وفاضية وما ورهاش حاجة
تلاقيه نفسه من جوة قلبه ما يبقاش عنده كرامة وهي طالعة له غصب عنه ومحتاس فيها ومش عارف يعمل فيها ايه، وعمال يحقد علينا احنا بقى من جواه، يا ساتر على نفوس الناس، وعايز يفرض رأيه بقى علينا، يا نبقى عندنا كرامة زيه يا اما يقول لنا: يعني مش المفروض اننا عندنا كرامة؟
وانت ايه اللي مزعلك يا اخي اننا ما عندناش كرامة؟ ايه اللي يهمك في الموضوع ده يا حشري؟ ما تخليك في نفسك بقى وفي كرامتك اللي منكدة عليك عيشتك وخلتك تبعت ابنك عشان يموت، كل شوية يكلمنا عن الكرامة الكرامة الكرامة لما صدعنا
طاااااااااااااب ما عندناش انت شريكنا؟ يا باي...
اما راجل غريب قوي

على لطفي: الاجانب- غياب العدالة - تهرب الاغنياء من الضرائب هم السبب في الازمة

ده حوار مفيد مع الدكتور علي لطفي وهو مش شيوعي ولا اشتراكي ولا حاجة بالعكس ده رأسمالي على ابوه وهو صاحب فكرة الخصخصة والاقتصاد الحر بس قال ان:
اعتماد البورصة على الاستثمار الاجنبي (واللي سحب فلوسه فجأتن من بورصتنا لاحتياج امريكا واوربا لسيولة في الوقت الحالي مما ربطنا بالازمة العالمية غصب عن بوزنا)
وعدم عدالة توزيع الناتج القومي على الناس
وتهرب الاغنياء من الضرائب بسبب غياب الرقابة
وفرض ضرائب باهظة على الفقراء
هم سر الازمة الاقتصادية وما يبدو كأنه انهيار في البورصة...ده واحد كان وزير وبعدين رئيس وزراء وبعدين كان رئيس مجلس الشورى، يعني تبع الحكومة وبيدافع عن حسني مبارك وبيقول انه مش بيحمي رجال الاعمال ولا حاجة وبعض رجال الاعمال غلطانين عشان اذا راحت ست فيه الف غيرها
:D
طيب الاربع نقاط اللي فوق دول واللي هو اشار ليهم انهم سبب الازمة الاقتصادية دايما بيبقوا مصاحبين للنظم الرأسمالية، يمكن النقطة الاولى مش لازم تبقى مصاحبة طول الوقت اللي هي الاستثمار الاجنبي، بس بقية النقط ده العاتشي يعني في اي نظام رأسمالي
امممممممممم
اهو ده عيب الاكاديميين بقى، فاكرين ان الكلام المثالي اللي مكتوب في الكتب ح ينفع يطبق في الواقع

على لطفي: الاجانب- غياب العدالة - تهرب الاغنياء من الضرائب هم السبب في الازمة

ده حوار مفيد مع الدكتور علي لطفي وهو مش شيوعي ولا اشتراكي ولا حاجة بالعكس ده رأسمالي على ابوه وهو صاحب فكرة الخصخصة والاقتصاد الحر بس قال ان:
اعتماد البورصة على الاستثمار الاجنبي (واللي سحب فلوسه فجأتن من بورصتنا لاحتياج امريكا واوربا لسيولة في الوقت الحالي مما ربطنا بالازمة العالمية غصب عن بوزنا)
وعدم عدالة توزيع الناتج القومي على الناس
وتهرب الاغنياء من الضرائب بسبب غياب الرقابة
وفرض ضرائب باهظة على الفقراء
هم سر الازمة الاقتصادية وما يبدو كأنه انهيار في البورصة...ده واحد كان وزير وبعدين رئيس وزراء وبعدين كان رئيس مجلس الشورى، يعني تبع الحكومة وبيدافع عن حسني مبارك وبيقول انه مش بيحمي رجال الاعمال ولا حاجة وبعض رجال الاعمال غلطانين عشان اذا راحت ست فيه الف غيرها
:D
طيب الاربع نقاط اللي فوق دول واللي هو اشار ليهم انهم سبب الازمة الاقتصادية دايما بيبقوا مصاحبين للنظم الرأسمالية، يمكن النقطة الاولى مش لازم تبقى مصاحبة طول الوقت اللي هي الاستثمار الاجنبي، بس بقية النقط ده العاتشي يعني في اي نظام رأسمالي
امممممممممم
اهو ده عيب الاكاديميين بقى، فاكرين ان الكلام المثالي اللي مكتوب في الكتب ح ينفع يطبق في الواقع

يا ضنايا يا ابني...انت متهرش؟ نهى رشدي مفترية بصحيح

صباح الخير، معلش انتوا عارفين بعد لفة ع الريدر بيبقى شكلي كدهو
المهم بعد اللفة لقيت ان المدونين اليومين دول اغلبهم مالهمش سيرة الا نهى رشدي، معظم الناس فرحانة بيها، وفيه كام مدون قرر انه يصعب عليه شريف اللي اخد تلات سنين ويوجد له اعذار ومبررات، وح نعتبرها مصادفة انهم رجالة
بادئ ذي بدء احب اوضح اني عارفة كويس اعذار ومبررات شريف والاسباب اللي دفعته وبتدفع غيره لجريمة التحرش او اسمها القانوني هتك العرض يا مصريين يا بتوع الشرف واحلى من الشرف مافيش يا آه يا آه
واعذاره لا ليها دعوة بالكبت الجنسي، ولا بلبس الستات
ثانيا انا فعلا صعبان عليا شريف وغير شريف بسبب اعذاره ومبرراته وعشان كده فرحانة له انه اتسجن
وانا مش شايفة ان نهى انتقمت منه انا شايفة انها بتعمل لمصلحته وبتربيه عشان تعمل منه راجل حيث ان امه ما عرفتش تعمل الحكاية دي
اما بخصوص رأي بعض المدونين في ان المسألة اتقسمت كأنها صراع ما بين ستات ورجالة فالحقيقة الكلام ده مثير للغثيان فعلا
يا جدعان هو احنا ما بقاش عندنا نخوة وللا ايه؟ ده حتى شرف البنت زي عود الكبريت
افففففففففف لا مش قادرة اتكلم بطريقة ح اجوزك هنومة يا قناوي يابني اكتر من كده
طيب
طول عمر الرجالة في حوض البحر المتوسط بيعاكسوا الستات، في سوريا بيبرموا شناباتهم، واغلب الظن ان الهدف ورا كل الشنبات اللي في سوريا دي انها تتبرم للستات بس، ماهو انا شخصيا لما رحت ما لقيتلهاش اي استعمالات تانية برغم انتشارها كالنار في الهشيم، في ليبيا والمغرب بيلعبوا حواجبهم، اه والله العظيم لسة في الزمن ده حد بيلعب حواجبه، في فرنسا يعدي جنبك ويقول: ماجنيفيك، في ايطاليا يعمل لك فضيحة في وسط الشارع ويفتح زوره: سنيورة بللاااااااااااااااااااااااااااااااااااااا، في لبنان هم سايحين على روحهم على طول اول ما يشوف واحدة ست انشالله قد جدته يتحول ويفضل يسمبس ويصوصو ويتنهد ويتنحنح ويسبل ويبربش، حتى لو لسة خارج من كنيسة وللا جامع هو بيعتبر ده واجب وطني ويمكن معتقد انه بياخد ثواب، وفي مصر كانوا...كانوا..بيحبوا يبتكروا ويقولوا جمل طويل ما تلحقيش تسمعي بقيتها: هو القمر نزل م السما امتى...وانا اقول ياربي القمر راح فـ....(خلاص انتي مشيتي وهو لسة بيتكلم) ولو سايقة عربية ييجي جنبك: العجلة يا انسة العجلة..انت: مالها؟ بتنقط ثكر وعثل.. الا انت بتمليها في انهي منحل وللا...(الاشارة فتحت وانت مشيتي وبرضه هو لسة بيتكلم) احنا شعب رغاي بطبعنا.
لكن لما واحد يمسك ست من صدرها ويسحلها على الارض ده اسمه معاكسة؟ ده له اي علاقة بالجنس من قريب او من بعيد وللا ده واحد عايز يذل واحدة؟
لما ميت واحد يجروا ورا واحدة ويهبشوا فيها لحد ما يقلعوها هدومها ويقعدوا يضحكوا ويسيبوها ويجروا ورا واحدة تانية
ده شبه ايه؟ ده شبه اي حاجة لها علاقة بالكبت الجنسي؟ وللا ده عامل زي الماتشات الرومانية ما بين الاسد والعبد؟ او شبه عملية سحل هيباتيا عالمة الرياضيات، ماحدش يقول لي ان الناس اللي سلخت جلد هيباتيا وسحلتها في شوارع اسكندرية كانت بتتحرش بيها، ولا حد شرح جسمها بالاصداف عشان هي مزة وانما عشان هي عالمة رياضيات وفلك وهم كانوا شايفينها ساحرة شريرة
لما واحدة تبقى ماشية، وراجل ماشي وراها يقول لها: يا شـ*** كـ*** أمك ويروح تافف عليها
ده له اي علاقة من قريب او بعيد بالجنس؟ معلش اسمحوا لي لو اي راجل في الدنيا دي فاهم ان ده الجنس فورا يتوجه إلى معالج نفسي عشان يحطه في اقرب مصحة يمكن يعرف يلحقه قبل ما يتجوز ويتورط في جريمة
اذن دي جريمة عنف، بس مش عنف عادي، ده عنف مصحوب بالرغبة في كسر العين والاذلال، بالظبط زي جريمة اسلام نبيه في حق عماد الكبير، ماحدش توقع ابدا ان اسلام نبيه كان معجب بعماد ومش طايله مثلا! ولا انه شاذ جنسيا، كلنا كنا عارفين ان اسلام نبيه كان بيقهر عماد وعايز يذله ويكسر نفسه
ليه بقى؟ دي قصة تانية بخصوص اسلام انا ما اعرفوش ولا اعرف تاريخه النفسي ولا اللي مر بيه في طفولته
لكن اللي اعرفه كويس، ان شريف، والشباب اللي زي شريف منين ما يمشوا بيتوقفوا في لجنة وبيتقال لهم من احقر امين شرطة: بطاقتك يالا...شمر وريني دراعاتك...انت بتبجح يا لا؟ بتبجح يا...امك يا ابن الـ... يا .....؟ (كل الالفاظ اللي هو بيقولها بدوره في عملية التحرش)
وزي ما تيجي تيجي بقى، شلوت...قفا...بونية (كلها حاجات شبه اللي هو بيعمله في التحرش الجنسي)
وشريف واللي زي شريف بيبقوا واقفين زي القطط السيامي، لا القطط السيامي شقية، ولا زي اي قطة في الدنيا القطة بتخربش، حتى الفار اهو بيقرقض، مش عارفة بيبقوا عاملين زي ايه؟ بيبقوا عاملين زي ولا حاجة، زي خرقة مالهاش كرامة ولا احساس
هو بيبقى واقف زي الخرقة، بس هو مش خرقة، هو انسان وله كرامة واحساس، والذل اللي بيشربه ليل نهار بيتغرس جواه ومش بيقدر يتعايش معاه لان الانسان كريم ولازم يفضل كريم عشان يعرف يعيش
طاقة الذل اللي بيشيلها فوق قدرته على الاحتمال
قوم بدل ما يقف زي الراجل، زي الراجل، ويقول للي بيذله ما تعملش معايا كده، مش ح اقول بقى يروح يشتكي ويعمل زي ما عماد الكبير عمل، لان الناس ح تقول لي ده راجل مستواه التعليمي ما يأهلوش انه يروح يشتكي، على اساس ان عماد الكبير معاه دكتوراه في الاقتصاد الدولي من اوكسفورد يعني. بس خلينا نتحدت بالصاعيدي. هو ماشي بروح امه بمطواة وللا جنزير، بدل ما يطلعهم على الغلابة في الشارع ما يطلعها على اي حد ينتهك كرامته والارزاق على الله
يعني هم راحوا فين الصعايدة اللي كانوا بيطخوا اي كلب يمد ايده على شنباته؟ احنا كنا فاكرين ان بعد قضية عماد الكبير الناس ح تتشجع انها تطالب بحقها في الكرامة احسن من كده، بس رجع ابوك عند اخوك والناس اتعاملت مع قضية عماد على انها حالة استثنائية مش عارفة ليه؟
اممممممممممممم معذور، اصله خايف، اصله بيجري على كوم لحم، اصل الامين ح يلبسه قضية
قووووووم يمشي من قدام الامين بعد ما يتذل كل الذل اللي خلقه ربنا في الدنيا ويستضعف له اي كائن ماشي في الشارع ويفرغ فيه الذل اللي هو شافه، اضعف كائن ماشي في الشارع بعد الاطفال هم الستات
اذا ربنا وفقه وعرف يعمل حاجة في عيل (نسبة التحرش واغتصاب الاطفال زادت في الفترة الاخيرة بشدة خاصة في الصعيد! دي تقارير المركز القومي للامومة والطفولة) يبقى خير وبركة، بس ده مش متاح قوي، مش متاح انك تتحرش بعيل في الشارع وتجري والناس تضحك، لان دي حاجة، لحد دلوقت، ما بتضحكش، وما بتصنفكش على انك دكر هايج، وماحدش لحد دلوقت لقى لها تبريرات، ولا حد يعرف يرمي اللوم على العيل بوصفه هو اللي اثارك، ثم ان هتك عرض الاطفال ح يعمل لك سمعة انك بتاع عيال، ودي سمعة وحشة، لكن هتك عرض الستات ح يعمل سمعة انك هايج، لا مؤاخذة، ودي سمعة يتمناها اي راجل مصري، خصوصا لو ما كانش هايج ولا حاجة
نصيحة لوجه الله: والنبي اللي بيرغي ويحاول يأكد في حاجة كتير بيبقى باين لاي عيلة عندها خمس سنين انها مش فيه فبلاش تخلي شكلك وحش يعني
اذن التحرش بالنساء في الشارع جريمة عنف تنفيسية مرتبطة بالقهر ومالهاش علاقة بالجنس
طيب موضوع اللبس عشان نخلص منه ولاخر مرة:
لو بنت مش لابسة حجاب (حتى لو لابسة جلابية بلدي) يتقال لها مش شايفة اللي انت لابساه؟
لو محجبة يتقال لها: ده حجاب ده؟ بس لمجرد انها لابسة الوان لايقة على بعض
لو منقبة تبقى حاجة من الاتنين: يا اما راجل متخفي وعايز يسرق كل الناس اللي ماشية في الشارع يا اما على رأي مينا: يقولوا عليها دي مشيها بطال ومتخفية ورا النقاب
وعليه فكل انواع الملابس مستحلة في الشارع المصري
لانه تااااااااااااااااااني الموضوع مالوش علاقة بالجنس خالص، هو بيحاول يلاقي مبرر، وبما ان الست دايما مدانة، ده اساسي يعني في كل حاجة، في بيتها: ماهو انت مقصرة في البيت عشان بتشتغلي، لو مش بتشتغل ما انت عمالة تتخني وجالك تخلف من القعدة في البيت
مع جوزها: ماهو بص برة عشان انت مش واخدة بالك من نفسك..أو..انت قاعدة ليل نهار قدام المراية وعند الكوافير؟ فين اهتمامك ببيتك وولادك يا هانم؟
في الشارع: ما تشوفي انت لابسة ايه ( في كل الاحوال احنا عايزينكوا والنبي تلفوا على دواليبنا وتقولوا لنا بالظبط انتوا عايزينا نلبس ايه عشان نخلص)
في الشغل: ماهو انت عشان البيت والعيال مقصرة في شغلك...انتوا مالكوا ومال الشغل
ولو شاطرة: ما انتوا السبب في بطالة الشباب عشان بتشتغلوا وواخدين مكانهم
المهم احنا غلطانين وخلاص
صح، احنا غلطانين فعلا، احنا غلطانين عشان مش بنعرف نربي رجالة يتحملوا المسئولية ويواجهوا بدل ما يستوطوا لهم حيطة عشان يميلوا عليها
اللي عنده مشكلة بطالة، يا اما هو مش عايز يشتغل (وده احتمال ضعيف) يا اما الحكومة مش عايزة تشغله وتبقى مشكلته مع الحكومة، لو راجل يواجه الحكومة او يتلط ويسكت
اللي بيتذل ويقبل الذل من غير ما يدور على حقه من اللي ظلمه ويتجدعن كده زي الشباب الجدعان (القليلين) اللي بيواجهوا الحكومة، واللي بالمناسبة برضه مش عارفين يتجوزوا، واللي بالمناسبة ولا واحد فيهم بيتحرش باي حد، واللي بالمناسبة هم اللي بيعملوا حملات ضد التحرش
اللي مش زيهم يروح يندفن بدل ما يفرغ غلبه في اعراض الناس في الشارع
مين قال ان نهى رشدي انتصرت للستات؟
بالعكس...دي احرجتنا كلنا، عشان هي الوحيدة اللي قامت بواجبها
اه، ماهو بما اننا كلنا غلطانين دايما، وبما ان بعض المدونين مصممين يصوروه على انه صراع بين الرجالة والستات ولا كأن دي اعراض ناس، ولا كأن ان اللي في الشارع دي لها اب وللا اخ وللا مالهاش ده كله لها رب، فبص يا كابتن انت وهو، احنا ربنا خلقنا في الدنيا دي عشان نربيكوا، مين اللي رباك يا بابا؟ ماما مش كده؟ طيب
اللي الست الوالدة عرفت تربيه وتطلعه راجل محترم، كتر خيرها كفتنا مجهود اننا نربيهولها
اللي تغلط فينا فعلينا اننا نصلح غلطتها ونربي لها ابنها اللي ناقص تربية، ونعلمه ازاي يبقى راجل
وسيبنا بقى من جمعية المرأة المتوحشة وخلينا في التراث المصري: ابنك على ما تربيه وجوزك على ما تعوديه والظاهر اننا مضطرين كمان نربي ونعود اللي ماشيين في الشارع حيث ان الستات هم اللي مقصرين في التربية
مش الستات دايما غلطانين والرجالة معذورين؟
مش الست شغلتها تربي العيال؟
ماشي يا قناوي يابني....يبقى احنا ربنا خلقنا عشان اللي امه ما علمتوش الصح من الغلط احنا نعلمهوله بما انه متبرمج على انه ما يتعلموش غير من واحدة ست، اذا ما كانتش امه يبقى اي واحدة بقى.
كخ..كخ يا بابا...عيب يا ولد
اذا كان فيه ناس معتبرين ان نهى رشدي قاسية، وناس تانية معتبرة انها: لولا انها متعلمة ومن فئة اجتماعية معينة ما كانتش عرفت تحبسه
طيب تعالوا بقى نشوف اللي مش متعلمة ومش من فئة اجتماعية معينة بتعمل ايه؟ واحدة اعرفها كانت راكبة اتوبيس (هي بنت بلد وتعليمها على قدها وبتشتغل وشقيانة)، راح واحد وقف وراها، الناس كانت شايفة وماحدش اتكلم على اساس انها اكيد مبسوطة مثلا! قامت البنت سابته يخلص عشان ما تضايقهوش (قلب الام بقى)، وبما انها محجبة ولابسة عباية، راحت بحركة سريعة شادة دبوس الطرحة من راسها في نفس الوقت اللي التفت له فيه وراحت....احم...شغل خيالك...بس خيال يكون شبه جلادياتور او بريف هارت او لقاء مع مصاص دماء.
المهم يعني دي كانت اخر مرة بالنوسبة لهذوها الصخص، وبما انه كان محروم من الجواز غصب عنه يا قلب امه، فهي قررت انه يبقى محروم من الجواز بخاطره عشان ما يحزنش على روحه تاني (قلب الام بقى)
الغريب ان البنت بتقول لي انه طول ما كان واقف وراها ماحدش اتدخل واول ما اعملت الدبوس اعمالا الاتوبيس كله اتدخل عشان يخلصه من ايدها، بس هم مين، البت تقريبا وزنها اربعين كيلو بس الغل اداها قوة خمسين حصان
ها؟
عموما هو معروف ان الامهات من بنات البلد تربيتهم بتبقى شديدة شوية عن تربية الامهات من البنات اللي من "طبقة معينة"
وبما ان نسبة لا بأس بها من الذكور في مصر لسة بيحملوا التكوين النفسي الطفولي: والله مش انا ده هو يا ميث...ماهو اللي زقني الاول يا ميث عشان كده خزقت له عينه....مش قثدي...عااااااا
اذن فما حدش بيكبر على امه بقى....والام اللي بتربي مش اللي بتخلف
لو تخيلنا طابور طويل كل واحد بيضرب اللي قدامه بالقفا، لو واحد في نص الطابور بدل ما يضرب اللي قدامه التفت وضرب اللي ضربه اتجاه الضرب ح يتغير
وللا ايه؟

كارثة التأمين الصحي: اللي ماعهوش ما يعيشوش

ليه؟ ليه؟ ايه اللي صحاني بدري؟ ما كنت مخمودة، ايه اللي بيصحيني اصلا؟
اتفضلوا الخبر ده بتاع التأمين الصحي
يعني واحد مرة دخل لي وقال لي انت متشائمة ليه انت مش شايفة حاجة حلوة في البلد؟ انت بتيأسي الناس
طب الناس اللي عشرة تدوين معايا مش عارفين ان لما بيبقى فيه خبر حلو باقوله؟ مش مفروض ان قضية التأمين الصحي دي كسبناها؟ وقلت لكوا وفرحنا؟
طب اتفضلوا بقى
ده قانوني؟ ينفع يعني كده؟ امال القضية كانت مرفوعة ليه؟ وكسبوها ليه؟
طب انا اعمل لكوا ايه؟ هي دي بلدكوا اعمل ايه انا اخترع لكوا بلد من دماغي؟ حاضر حاضر
احنا يا اولاد بلدنا جميلة ومليانة عدل وخير، تقدر تروح تتعالج بالمجان في اي مستشفى استثماري
اول ما بتتخرج بتلاقي شغل بتلاتلاف جنيه في الشهر اول مرتب، والحكومة بتساعدك في اسكان الشباب وتجيب لك شقة، لاحظ ان مافيش وسايط ابدا عندنا الحمد لله، احنا زي ايام سيدنا عمر كده اول ما تتولد يتصرف لك فلوس، وتتحوش لك لحد ما تكبر، وطبعا ده بسبب اننا بلد زراعي وصناعي وبنستثمر مواردنا احسن استثمار فالخير عم وفاض وزاد، ولما تتجوز بنت الحلال في الشقة الجميلة اللي مدياهالك الحكومة بتخلف عيال حلوة، بيتعالجوا على حساب الدولة، ويتعلموا على حساب الدولة من الضرايب اللي انت بتدفعها
بس فيه مشكلة صغيرة، للاسف من كتر الفلوس المصريين بيفطرو ا لحمة ويتغدوا لحمة ويتعشوا لحمة فانتشر مرض النقرص ما بينهم
يا ريت يا شباب تخلوا بالكوا من نفسكوا

ترحيل 9 مشجعين زملكاوية للسجن الحربى بعد أحداث مباراة الجيش

جيمي بعت لي الميل ده:

منذ بداية الدورى العام المصرى أبدى الجميع تخوفهم من وجود فرق الشرطة و الجيش فى جدول الدورى نظرا لحساسية المؤسسات التابع لها تلك الفرق و تخوف الجميع من الصدام بين جماهير كرة القدم العادية التى تتعامل مع الامور على إنها فقط لعبة كرة قدم و ليست جهات سيادية و نظامية .
مباراة الزمالك و طلائع الجيش التى اقيمت على استاد الكلية الحريبة بتاريخ 17 – 10 و التى انتهت بفوز طلائع الجيش بهدف نظيف ، و التى أفسدها حكم المباراة بعد قراراته الظالمة و عدم احتساب العديد من ضربات الجزاء لصالح فريق الزمالك الامر الذى أدى الى احتجاج الجماهير على تلك الممارسات الظالمة التى مارسها فهيم عمر حكم اللقاء معترضين على فوز طلائع الجيش بتحيز حكم اللقاء لثاني مرة على التوالى بعد اهداهم الفوز ضد الزمالك ايضا فى الموسم الماضى.
الامر الذى ادى لتعالى الهتافات من الجماهير البيضاء ضد حكم اللقاء و ضد اتحاد كرة القدم منظم البطولة و الذى قابله الامن بالقمع و تفريق الجماهير الغاضبة لخارج الاستاد بعد ان أطلقوا الكلاب البوليسية على الجماهير ، كل هذا وارد حدوثه فى مباريات كرة القدم فى جميع استادات مصر و العالم .
تبع ذلك القاء القبض عشوائيا على 11 فرد من جماهير نادى الزمالك و الذى أجمع الكل على وجودهم خارج أبواب الاستاد أثناء القبض عليهم بعد أن صدرت الاوامر بوجوب إلقاء القبض على بعض من المشجعين و تم ترحيلهم للسجن الحربى بزى السجن بعد حلق شعرهم و تقييد أيديهم و أرجلهم و تم توجيه التهم التالية اليهم
- سب وزير
- إتلاف ممتلكات حربية عن عمد
- التعدى على عساكر حربية أثناء تأدية عملهم

المشجعين التسعة ( بعد ان تم الافراج عن إثنين منهم لأسباب السن ) ينتظرون الان العرض على النيابة العسكرية يوم الثلاثاء القادم ، و تناشد أهالى المشجعين المسئولين بالافراج عن أبنائهم لإرتباطهم بدراسة خاصة و ان جميعهم طلبة جامعيين .

--

انا ماليش في الكورة، بس المدونة دي نصيرة المضطهدين بما فيهم الزمالكاوية، الا الواحد لما يبقى زملكاوي يترحل للسجن الحربي ليه؟ تخيل بقى لو فيهم زمالكاوية ست ومسيحية وعضوة في الاخوان المسلمين....وعندها جرب

طيب يا ليلى ارحمي نفسك عشان غيرك يرحمك

كلنا ليلى فتحت تالت سنة
امممممممممم
طيب يا ليلى انا عمري ما شفت حد بيقرف ليلى غير ليلى نفسها
:(
كلنا بنقول كلام حلو، بس ساعة الجد اللي اتزرع في..استني، امسي راسك من ورا كده، ايوة فوق القفا على طول، اللي مزروع هنا مش بيتغير بسهولة
ساعة الجد بتقبلي على نفسك حاجات مش لازم تقبليها، وبتحكمي على الليلات غيرك احكام ظالمة وبتنحازي مع المجتمع ضدها ومش بتفكري لو كان اللي في الموقف ده عويس مش ليلى كنت قلتي نفس الكلام وحكمت نفس الاحكام وللا لا؟
بجد يا ليلى انت فخورة انك ليلى وللا لا؟ طيب عارفة ليلى دي يعني ايه وللا لا؟
عارفة ان لك مخ ومشاعر زيك زي اي انسان ولك كرامة وللا لا؟
قبل ما تنامي وانت لسة بتروحي في النوم افضلي قولي عشر مرات: انا انسان ليا كرامة..انا انسان ليا كرامة..انا انسان ليا كرامة
لحد ما عينك تروح في النوم
عشان تعاملي نفسك كإنسان له كرامة يقوم المجمتع كله يعاملك على انك انسان وعنده كرامة
كنت اتكلمت مع لست أدري بخصوص ليلى، بس قلت لها اني ما عنديش حكاوي ليلى انا عندي حكاوي الست ام ليلى، وبعدين بصراحة طنشت لان كلامي مش ح يعجب حد، خصوصا ان حكاوي الست ام ليلى حكاوي تحزن ومقرفة
كمان ليلى نفسها ما عندهاش استعداد تسمع الكلام اللي ح اقوله
ملحوقة: انا مش مبسوطة من نغمة التريقة اللي عند بعض الاخوة الرجالة من المدونين اللي مش ناقص غير يقولوا: الحق الحق الحق الفرخة اتكلمت
بس اللي مضايقني اكتر رد الفعل للناس اللي بتدافع عن ليلى...مالكوا فيه ايه هم مش ماسكين ذلة عليكوا يعني دي ناس متخلفة اصلا
---------
تحديث:

ده استطلاع رأي للاناث
وده استطلاع راي للذكور
ياريت تجاوبوا عليه انا جاوبت...على استطلاع الاناث طبعا :)

أيوة غضب من ربنا

أنا بجد مش عارفة ايه الحساسية اللي بقت عند الناس من سيرة ربنا دي؟ لو كانت عند ملحدين كنت قلت اوك..شغال، حقهم يعني، حتى لو انا ما عنديش حساسية من الالحاد زي حساسية الالحاد من الايمان، فده طبيعي ان الملحد يحس انه في موقف ضعيف وبيدافع بشراسة عن نفسه، انا مش بازعل منهم خصوصا ان معظم الملحدين اللي عرفتهم بيبقى عنده اسباب ما بيبقاش ملحد غلاسة كده، فيه ملحدين غلاسة بس مش كتير، ما علينا ده مش بوست عن الالحاد
الغريب بقى ان كتير من المؤمنين بربنا اتريقوا على بعض الناس اللي قالت ان الانهيار الاقتصادي غضب من ربنا! وعوجوا ضبتهم وقالوا: بطلوا التفسيرات الغيبية فيه تفسير علمي للظاهرة. اه ماكل حاجة ينفع تتأصل علميا حتى ربنا نفسه. وانا مش شايفة اي تناقض ما بين التفسير العلمي واننا نقول ده غضب من ربنا. دي حاجة تانية غير تفسير ان الفقرا بيموتوا في الدويقة عشان ربنا غضبان عليهم، لانه كلام مش منطقي، كل الناس بتموت، ودول ماتوا شهداء ان شاء الله، كمان التفسير ده مالوش اصل علمي ولا فقهي
لكن ان فيه ناس بتقول ربنا غضبان على النظام الاقتصادي وعشان كده انهار ده لا يتناقض مع التفسير العلمي للانهيار الاقتصادي بالعكس ده مرتبط بيه ارتباط وثيق.
الناس المؤمنة بربنا، لا مؤاخذة يعني احنا اسفين والله مش عارفين نعتذر عن الخطأ الجسيم ده ازاي؟ بس نصيبنا بقى معلش، الناس الوحشين العيانين اللي زينا كده مؤمنين ان ربنا حاطط نظام للانسان وللكون، وانه ادانا ارشادات عشان النظام ده يمشي بشكل صحي وسليم. وان المحرمات دي مش عشان ربنا عايز يضايقنا بس عشان دي حاجات بتخل بالنظام وبالتالي تصيبه بالامراض وتودي به الى المهالك.
يعني مثلا في التراث بتاعنا، الديني والشعبي، نعرف الامثال اللي بتقول: لكل ظالم يوم، وفيه مثل تاني مش عارفة ليه انقرض بس المفروض انه مثل صعيدي قديم: قاتل النفس ما يموتش بخير، ومثل تاني: قاتل النفس فاضح نفسه.
وده كله مستمد من العقائد الايمانية ان ربنا ما يسيبش الظالم ولا قاتل النفس ابدا.
طيب فيه تفسير علمي لكل ده، الانسان بتكوينه السوي المفروض انه مش من الطبيعي انه يظلم، ولا من الطبيعي انه يقتل، وفعلا في علم النفس، القتل بالذات بيشكل عبء نفسي على البني ادم كبير قوي، وبيأثر على أحلامه وسلوكياته وتصرفاته في كل حاجة. البني ادم لما بيضغط على طبيعته الانسانية وبيحملها ظلم او قتل، هو بيحملها فوق طاقتها، وهي لازم بتعمل رد فعل للحمل ده، باي حاجة، ممكن بانه يفضح نفسه زي المثل ما بيقول، بمعنى انه يسيب دليل يدل عليه، اللا وعي بيخليه يرشد عن نفسه وهو مش حاسس ومش قاصد وعقله الواعي اكيد مش عايزه يرشد عن نفسه، وممكن بانه لو فلت يعيش طول حياته بيحاول يتخطى فكرة انه قاتل او ظالم، وعليه بيتصرف تصرفات هيستيريه قد تودي به الى المهالك لانه بيبقى عامل زي اللي بيهرب من عفريت، يمعن في السكر مثلا، يمعن في الظلم، المهم انه في رحلة هروبه بيبقى فيه صراع ما بين اللا وعي الرافض لفكرة القتل او الظلم والوعي اللي بيحاول يخنق الذكرى وتأنيب الضمير، الخناقة دي لازم بيبقى فيها خسائر نفسية وجسمانية غصب عنه، وعشان كده مش بيموت بخير. مهما عقله الواعي حاول يمنطق الظلم بيفضل عقله اللا واعي يطلع له زي العفريت. طبعا الكلام ده مش تحليلي يعني انا ايش فهمني في الكلام ده انا بنت الشيعب :) ده من الكتب.
وكل حاجة في الدنيا كده، كل حاجة تخل بالنظام الكوني اللي في اساسه مبني على انه يبقى خير وكويس بتدمر نفسها بنفسها. طيب النظام المصرفي قائم في اساسه على النصب. احنا منصوب علينا.
احنا في ايدينا ورق مالوش غطاء دهب وبنتصارع عليه وبنموت بعض عليه وهو ورق...ورق مالوش قيمة، ولع فيه يا عم ده ورق. والنظام المصرفي ده القائم على النصب، قائم كمان على الظلم، فكرته في الاساس قائمة على ان اللي معاه كتير يزداد كترة، واللي مش معاه يزداد فقر، وده بالظبط فكرة الجلا جلا اللي موجودة في الرابط اللي انا حاطاه. بتاع الكوتشينة اللي بيقول لك فين السنيورة بيعمل ايه؟ بيخليك تحط رهان، هي فلوسك اصلا، وبيقول لك فين السنيورة، لو ما عرفتش هو اخد الفلوس، ولو عرفت انت ما اخدتش حاجة لان دي فلوسك اساسا، وانت تضحك وتنبسط ويتهيالك انك كسبت، انت يا حمار ما كسبتش حاجة الفلوس دي كانت في جيبك اصلا.
طيب بتاع الكوتشينة ده اسمه ايه؟ اسمه حرامي، اسمه نصاب، اسمه ظالم. اسمه فلوسه الحرام ربنا مش ح يبارك له فيها، ازاي؟ فيه تفسير علمي، نفسي واقتصادي، يخليه برضه يطلع من اللعبة في الاخر خالص خسران. بس كون ان فيه تفسير علمي نفسي واقتصادي لانهيار حياة بتاع الكوتشينة ده ما ينفيش الايمان بالغضب الالهي بالعكس ده يؤكده، يؤكد ان ربنا، واضع النظام، لما قال اعملوا كذا كذا عشان النظام يمشي صح، ولو عملتوا كذا كذا النظام ح ينهار، كان معاه حق. (معلش اللي ح يزعلوا من كلمة كان معاه حق دي خلوها عليا انا مش باكلمكوا انتوا انا باكلم ناس تانية)
وعليه فاختصار التحليل الاقتصادي الطويل في انه غضب ربنا هو مجرد تلخيص للتحليل العلمي مش تناقض معاه.
آه، انا سامعة جملة غبية اهي....جاية من هناك اهي: ايوة، يعني الناس بقى تسيب الاقتصاد ينهار ويولع بجاز وتبطل تفكر في حلول وتروح تصلي نقوم نصحى الصبح نلاقي الاقتصاد اتصلح.
....
على فكرة للحظة وانا باكتب البوست فكرت في اني اقول: طب انا مش باحب ارد على الغباوة حد يرد مكاني.
وبعدين رجعت في كلامي انا ورايا ايه؟
اولا غضب ربنا على الظلم يستوجب العقوبة، العقوبة عمرها ما تترفع بمليون ركعة يصليها مليار بني ادم، عقوبة الظلم لا ترفع الا برفع الظلم.
اذا كان النظام الاقتصادي - الرأسمالي الوسخ - قايم على الظلم والنصب، على تتخين الكروش اللي هي اصلا تخينة وتجويع البطون اللي اصلا جعانة والتجارة في كل حاجة، كل حاجة حتى المية والمعلومات اللي من حق الانسان، وتصنيع ورق والضحك بيه على الناس وهو مالوش غطاء. يبقى ولا مليون صلاة، ولا مليار دولار يطلعوا زكاة للفقرا ح يجبروا الظلم ده، ولا النظام الاقتصادي ح يتصلح، لان اصلا المليار دولار دول نصب نصب، ده ورق....انت تضحك على الناس بس مش ح تضحك على ربنا. اول حاجة نعملها اننا نبطل نصب من اساسه، وبعدين نوجد حلول انسانية تخف الدهون من الكروش وتملا البطون الخاوية
عموما انا شخصيا شايفة ان فات الوقت على الحلول، ولو لقوا حلول ح تبقى مجرد حلول لتأجل الكارثة لكن هي واقعة واقعة، وان شاء الله اكون مت شهيدة قبل ما العالم يرجع لنظام المقايضة تاني، بس هو راجع يعني. ان ما كانش في العشر سنين اللي جاية تبقى كمان عشرين تلاتين خمسين ميت سنة
ايه ميت سنة في عمر الانسانية؟ بس راجع...عشان الانسان افترا قوي، احنا مفروض موجودين مع بعض عشان نساعد بعض على العيشة مش عشان نتاجر في بعض ونعيش على جثث بعض.
كلنا ايدنا في النظام ده، كلنا بناكل لحم بعض، انا بعربيتي ام قسط 400 جنيه والكام ورقة اللي في شنطتي مشاركة في النصباية دي، انا باكل لان غيري جعان، انا عايشة لان غيري ميت.
انا عارفة الكلام الغبي ح يكتر: يعني الغلابة اللي بيوتهم اتخربت بالانهيار الاقتصادي، الغلبان اللي راح اتذل في الخليج ورجع فلوسه راحت في البورصة ومات من الحسرة ربنا غضبان عليه؟
لا ربنا ما بيغضبش على غلابة، انا قلت فوق اهو: ربنا غضبان على السيستم لانه غير انساني، لانه سيستم خلا الغلبان ده يقبل الذل على نفسه في الخليج، ولو كان سيستم رحيم ما كانش اضطره للغربة والبهدلة والذل، هو مات من الحسرة، ما كلنا ح نموت، من لم يمت بالبورصة مات بغيرها. العمارة المبنية باسمنت مغشوش بتقع فوق الغلابة، الغلابة مش هم المذنبين، واهم ماتوا وارتاحوا، المقاول هو المذنب وح ياخد جزاءه.
ثم احنا من حقنا نجيب سيرة ربنا يعني، وللا هو ممنوع؟
اه...هو غالبا ممنوع، عشان الناس كده شكلها زعلانة من ربنا. طيب ربنا مش هو اللي قال للمشايخ تحلل البنوك والبورصة بدل ما تقول ده نظام ظالم، مش ربنا اللي قال للمشايخ تلوي عنق الدين وتبرر للظلم ولتجويع الناس او حتى انهم يفتوا في اللي ما يعرفوش فيه. مش ربنا اللي قال للدعاة خليكوا مع الاغنيا وريحوا ضميرهم كمان. ثم اخيرا مش هو اللي قال لنا ننصب على بعض، ولا هو اللي قال لنا كل ما تتزنق وعايز تبرر لنفسك حاجة انت عارف من جواك انها حرام تروح تسأل شيخ عشان يريحك ويشيل الوزر عنك، انت عارف انها غلط امال بتسأل فيها ليه يا روح خالتك؟ لو عارف انها صح ما كنتش سألت
نعمل البلاوي ونرميها على ربنا وفي الاخر نزعل منه، واللقمة اساسا نازلة لنا بالسم الهاري وحوالينا الجوع ده كله، وانا اولكم، طب مش كتر خيره انها مش بتنزل بسم حقيقي؟
سيدنا الامام علي قال: اينما ذهب الفقر قال له الكفر خذني معك
وكلام كتير على لسان الامام علي: لو كان الفقر رجلا لقتلته
بس بقى ماحدش فاكر ابدا ان سيدنا محمد صلى الله عليه وسلم تعوذ من الغنى
سيدنا محمد تعوذ من الغنى قبل ما يتعوذ من الفقر
عشان الغنى اوحش من الفقر
-----------
استدراك:
للتوضيح بس، بالنسبة للرابط بتاع اسلام اون لاين ده
انا مش حاطة الرابط عشان موافقة على تحليل كاتب المقال، وانما حاطة الرابط عشان المقتطفات اللي محطوطة في المقال من بعض الكتاب اللي بيوجهوا اللوم للمؤسسات الدينية اللي سابتهم يتعاملوا في الربا من غير ما تعلن موقفها الواضح من لا اخلاقية النظام الاقتصادي
لكن انا مختلفة تماما مع النتيجة اللي وصلها كاتب المقال من ان البنوك الاسلامية هي الحل، لان واقع الامر ان كل البنوك الاسلامية الموجودة هي داخل نفس المنظومة وماشية بنفس السيستم ونفس المعاملات، نفس النقد، نفس الفايدة: ياللا يا شاطر، مش انت مش عايز الفايدة؟ طب هاتها احنا ح ناخدها، خد انت الفلوس الحلال احنا عاجبنا الحرام. يعني البنوك الاسلامية بشكلها الحالي مشاركة في السيستم الظالم زي اي بنك تاني
وعليه فهي مش مشكلة بنك اسلامي وبنك مش اسلامي، هي مشكلة نظام اقتصادي كامل كله مبني على النصب، مافيش نصب اسلامي ونصب لا اسلامي
ده زي الراجل بتاع للاخوة العرب الزواج من مصريات على سنة الله ورسوله

ملحوظة تانية:
الله هو العدل وربنا بينتصر لمقيم العدل ايا كان دينه...ولو حتى مالوش دين
وبينتقم من الظالم حتى لو ما بيفارقش سجادة الصلاة
وربنا موجود، ومن حقي مدام مؤمنة بربنا اني اجيب سيرته، ورضا ربنا وغضبه شغلي الشاغل بوصفي مؤمنة بيه، والمفروض يبقى شغل اي مؤمن الشاغل
والمفروض المؤمن يبقى مؤمن ان ايمانه يتسق مع المنطق ما ينقاضوش
ولو هو مؤمن ان الايمان حاجة والمنطق حاجة تانية يبقى هو مؤمن ليه؟ غاوي جنان وتخريف يعني؟ اه..ماهي الحاجة اللي مالهاش علاقة بالمنطق تبقى جنان وتخريف
والمفروض المؤمن يبقى عارف ان رضا ربنا في العدل لانه هو العدل وغضبه في الظلم، والمكان اللي فيه ظلم ربنا لا ينظر اليه، والعالم بقى كله ظلم

العنصرية والطائفية مرض القهر والاضطهاد

سبقنا اليها اليهود اللي فضلوا قرون يضطهدوا ويساء الى سمعتهم ويتقال لهم يا بخلا يا مرابين ياللي بتقطعوا لحم الناس يا شايلوك
النتيجة: الصهيونية
والافرو امريكان اللي مات منهم 150 مليون في البحر وهم في الاغلال مساقين الى العبودية
النتيجة: بقوا يقولوا ربنا اسود والشيطان ابيض
اليهود والافارقة في امريكا عانوا من الفتن بينهم وبين بعض بس عرفوا يتجاوزوها مؤخرا
الافرو امريكان بقوا
integrated
وبقى بعض...بعض منهم يزاول امراض القهر والاضطهاد على ناس تانية: زي العنصرية ضد العرب مثلا!!!!!
على اساس انهم بقى من العالم المتحضر
واليهود بقوا اسرائيل، مش محتاجة شرح
احنا لسة في طور الطائفية والفتن الى جانب العنصرية اللي ابتدت تتنامى
ربنا يوفقنا كده وشوية وح نبقى زي الصهاينة، ان شاء الله نتجاوز الفتن، بس بقى ح نعمل ايه؟ ح ننزل قتل في مخاليق ربنا عشان احنا احسن من كل الناس وكل اللي غيرنا حيوانات غير عاقلة؟
المقهور والمضطهد لمدد طويلة قوي، قرون مثلا، بيكتسب صفة جديدة وهي الوضاعة، مش بيبقى عنده الشجاعة انه يواجه اللي بيقهره ويضطهده، ما تقدرش تلومه لانه فعلا عيان،
وفي نفس الوقت فوق طاقته انه يتحمل التحقير والتنكيل وهدر الكرامة طول الوقت لان ربنا خلق الانسان كريم
الانسان اللي طول الوقت بيتقال له يا حقير يا زبالة بيبقى عايز يصرخ ويقول انا مش حقير انا مش زبالة انا انسان، وبعد شوية لما الموضوع بيطول ويزيد بيبقى عايز يقول: انا احسن منكوا كلكوا انا احسن واحد في الدنيا
من حقه يصرخ في وش اللي ظلمه وقهره ويقول له كده لانه هو احسن منه فعلا
بس هو مش بيقدر، بيخاف، مش بس بيخاف، هو بيقتنع فعلا انه اقل من اللي بيقهره
فبيمارس القهر والظلم والعنصرية اللي بتمارس عليه ضد نفسه وضد اللي اضعف منه، وكل اللي اتعمل معاه بيعمله في غيره
بس له علاج قبل ما الحالة تتفاقم، انه يفهم ان اللي بيقهره ده مش هيركليز ولا حاجة، وانه مش احسن منه، لو ما لحقناهوش يبقى خلاص تحول
وهكذا كانت اسرائيل، في الاول كان اليهود بيضطهدوا بعض وطائفيين ضد بعض بجنون، عاملين زي العرب كده دلوقت، وبعدين ربنا وفقهم وانتقلوا من مرحلة الطائفية الى مرحلة العنصرية
واحنا ماشيين على نفس الطريق بوصفنا اجدد في مجال الاضطهاد منهم يعني هم مضطهدين من ايام الاستاذ خشبة، احنا اول مرة نتهزأ كده الحقيقة في القرنين اللي فاتوا دول بس، ووصلنا دلوقت لمرحلة عظيمة، ودي حاجة جديدة الحقيقة احنا طول عمرنا مدلعين، اقصد مدلعين في الاطار ده ماحدش كان بيضطهدنا بشكل عنصري، والحقيقة ولا احنا كان خاطر في بالنا موضوع العنصرية دي، بس على رأي اطاطا مافيش حاجة بتفضل على حالها، وادي في ماشيين في السكة
لحد ما ربنا يوفقنا ونبقى كيان عنصري دموي حقير زي اسرائيل
حاجة من الاتنين: يا اما نعذرهم ونتفهم الحالة المرضية اللي هم وصلوا لها
يا اما نفوق لنفسنا ونتعلم من غيرنا ونفهم اننا لو ما شربناش اللبن ح نبقى زي عمو الجرسون
المظلوم مسكين، المضطهد يستحق التعاطف
لحد ما يتحول زي مصاص الدماء ويبقى هو الظالم وهو العنصري، مهما كانت اعذاره
العنصري مالوش علاج غير انه يفضل يتعامل كحشرة لحد ما يبطل يتعامل مع الناس كأنهم حشرات ويعرف ان الله حق وان كل البشر سواسية
لا ينفع يتعمل معاه سلام ولا وئام ولا ينفع يبقى استخبارات صديقة
الطائفي اللي فاكر نفسه هو الوحيد اللي ربنا بيحبه وبيكره كل الناس، مالوش حل غير انه يحس انه مكروه من كل الناس لحد ما يتأدب ويعرف ان ربنا خلق الناس زي ما خلقه وانه بيحبهم زي ما بيحبه
لا ينفع حد يقرب معاه ولا يتكلم معاه اصلا