لا إله إلا أنت سبحانك إني كنت من الظالمين

همممممممممممممم

المفروض اني عاملة البوست ده عشان اصالحكوا، بناء على تأنيب طنط محسنة توفيق وماما على البوست اللي قبل اللي فات، قعدوا يقولوا لي حرام عليك، دول غلابة، بتعملي فيهم كده ليه؟ وحسسوني انهم بيتكلموا عن مراهق عنده اربعتاشر سنة واني عقدته وهدمت تصوره عن نفسه وما راعتش السن الحرجة اللي هو بيمر بيها وقلت له وشك فيه حبوب ودمك تقيل ومستوى ذكاءك اقل من المتوسط، مما قد يؤدي انه لما يروح المدرسة يضرب زمايله وممكن ينحرف ويشرب سجاير بسبب الكلام القاسي اللي قلتهوله، ومش بعيد يطفش ويسيب البيت

وطنط محسنة قالت لي: لما هم شعب واطي حارقة نفسك عليهم ليه؟ قلت لها: عشان انا واطية زيهم.. فبهتت

كانت خالتي الكبيرة الله يرحمها، عبقرية في الرياضيات البحتة، كانت دايما تقول: كله زيفت كله أرف وأنا كمان حمارة. ماما قالت لي انت عملتي زي خالتك: كله زيفت كله أرف وأنا كمان حمارة.

قلت لها ما كان معاها حق، فقالت لي: وذا النون إذ ذهب مغاضبا فظن أن لن نقدر عليه فنادى في الظلمات أن لا إله إلا أنت سبحانك إني كنت من الظالمين

بتوجع لي قلبي أمي.

فتحت المدونة عشان اصالحكوا، بس غبائي خلاني افتح الريدر وابص على كام مدونة على كام موقع على كام جرنال على كام تعليق من تعليقات الناس اللوز......... اففففففففففففففففف استغفر الله العظيم، له حق اسامة غريب يطلب من الدستور تقفل التعليقات وقال لي: ده اللي بيشكروني على المقال بيغيظوني اكتر من اللي بيشتموني عليه، بالاقيهم بيشكروني على عكس اللي انا كاتبه

وانا اياميها كنت حنينة وقلت له: ليه؟ ما تسيب الناس تنفس عن نفسها، انا في الاول كنت باقرا التعليقات على مقال الدستور واهتم ارد عليها، وبعدين لما اكتشفت ان جل المعلقين عصابيين بطلت ابص عليها، بس ما قلتش يقفلوا التعليقات لان دي ناس محتاجة تنفك

بعد ما اتغميت من الجولة النتية قفلت وقلت ابقى اصالحهم بعدين، لما انزل الشغل وارجع

نزلت الشغل فطبعا قابلت ناس... مشكلة دي اني اقابل ناس، هلاوس سمعية وبصرية

بس سواق التاكسي قال لمحمد ان العيد يوم السبت عشان رمضان السنة دي 31 يوم، وما كانش بيهزر، كان بيتكلم جد، اصل محمد مهتم يعرف العيد امتى، وقال لي انه سألني عشان مسلمة وسأل صلاح عشان شيوعي وسأل التاكسي عشان من السكان الاصليين زي ما بلال بيقول عليهم، ومن خلال تجميع اجاباتنا يقدر يعرف الاجابة الصحيحة من خلال معرفة المتوسط، ومش عارفة محمد مهتم ليه بالعيد مع انه مش صابم، ومش مسلم اساسا، وطبعا زي اي واحد مش مسلم وجاي من اسرة مسلمة رأيه المسلمين هم الغلطانين في كل حاجة وغلطانين اساسا انهم اتولدوا

وطبعا زي اي مسلم مولود في اسرة مسلمة قرر غيره من بقية الزملا ان المسلمين اصلا ما بيغلطوش لان معاهم توكيل من ربنا يعملوا اللي هم عايزينه وبتاع الامن قرر ان بتوع النت كدابين، وان الريس ما قالش اسرة حسنة، ده بتوع النت هم اللي فبركوا له الفيديو، واذاعة القاهرة الكبرى افشل اذاعة في التاريخ، وصاحبتي المسيحية بتقول هلاوس عن جدي اللي من الف سنة اللي كان فقير وعشان كده دخل الاسلام لانه ما دفعش الجزية واللي يضحك ان المسلمين بيزعلوا من كلامها ده، واللي يضحك اكتر انها بتزعل من زعلهم، وكلهم مصدقين حكاية خطف البنات، بس كل واحد فاكر ان التاني بيخطف البنات من عنده، والمدير رايح جاي بدفتر الامضا كأنه متجوزه على مراته عرفي، والعيال كلهم بيتخانقوا على صياغة خبر ماحدش حيقراه اساسا لان ماحدش بيشوف القناة بتاعتنا، وصاحبتي التانية بتتابع مسلسل العار وتقريبا هي الوحيدة اللي ممكن تتابع مسلسل زي ده،

المهم يعني...

ما تزعلوش

كبر مقتا عند الله أن تقولوا مالا تفعلون

تركيا وإيران تحالفوا ونازلين هبد في الاكراد ليه؟ يبقى لهم عين هم الاتنين ازاي يلوموا على اسرائيل ويصفوها بعدم الانسانية وهم بيعملوا في الاكراد اللي اسرائيل بتعمله في الفلسطينيين؟ يرضي مين ده كل يوم على الله الاكراد يضربوا كده؟ وحجة حزب العمال الكردستاني دي زي حجة حماس

اللي بيموتوا مش حزب العمال الكردستاني، اللي بيموتوا اطفال ومدنيين وابرياء

انا مش شماتة ولا مهللاتية زي ايتام الديمقراطية الامريكية ودلاديل الحزب الوطني

دي نصيحة محب 

"يا أيها الذين آمنوا لم تقولون مالا تفعلون، كبر مقتا عند الله أن تقولوا مالا تفعلون"

تركيا وايران يتقوا الله في الاكراد، على الاقل عشان يبقى لهم مصداقية لما يتصدوا لاسرائيل

البصل الدرامي

قال لك البطل الدرامي لازم له نقطة ضعف تبقى كعب اخيلوس اللي فيها مقتله، ودايما يدوا امثلة بالزعماء بوصفهم خير ممثل للابطال الدراميين

عبد الناصر نقطة ضعفه حب الزعامة

السادات نقطة ضعفه حب الظهور
كنيدي نقطة ضعفة حب الحريم
جيفارا نقطة ضعفه العند

مبارك...

نقطة ضعفه ايه؟ نقطة ضعفه ايه؟ نقطة ضعفه ايه؟

تصدقوا مالوش نقطة ضعف؟  الواد محمود صابر النهاردة بعد ما شاف الخطاب كان في حالة لا يرسم لها، وقعد يقول: البحة راحت.. البحة راحت.. البحة راحت، فكرني بعبود على الحدود لما كان بيقول: ادا كل واحد فيكوا مربع واداني تلات مربعات.. ادا كل واحد فيكوا مربع واداني تلات مربعات اداني تلات مربعات اداني تلات مربعات

مبارك لو مالوش نقطة يبقى مش بطل درامي... فعلا زومبي، ربنا وفقني جدا في اختيار الاسم ده

هازوها الفاصل بمناسبة خطاب عيد العمال

للي ما شافوش: لاااازم يتعذب معانا

اتقوا الله

  التلفزيون المصري يؤكد دفن شيخ الازهر سيد طنطاوي في البقيع، ولسه مافيش تأكيدات على احمد الطيب
يارب استرها معانا يا رب، البلد مليانة، اي حد غير احمد الطيب، انشالله معتز الدمرداش
-------------
سيبوا الراجل يدفن في البقيع وتوصله صلوات النبي حرام عليكوا بطلوا بقى انتوا عايزين منه ايه تاني؟ 
يا ساااااااااااااااااااااااتر عاملة زي النكتة بتاعة نفسك في ايه قبل ما تموت: اشوف مراتي وعيال
وسألوا التاني وانت نفسك في ايه قبل ما تموت: ما يشوفش مراته وعياله
يا باي مش كفاية ح يجيبوا لنا الطيب وصلاة الجمعة ح تقام في حجز الخليفة
------------------
انبسطتوا؟ انبسطتوا؟ اهو جالكوا احمد الطيب
يا ريتها كانت هربييييييييييييييييييييت ست الستات نامييييييييييييييييت
الله يرحمك يا شيخ طنطاوي
يالهوتيييييييييييييييييييييييييييييييييييييييييييييييييييي
اقابلكوا بقى بعد ما يرفد نص البلد ويسجن النص التاني
---------------
الموت مش عقوبة عشان الناس تفرح فيه، ده الحقيقة الواحدة اللي في حياتنا وكل ابن ادم رايح له

وفيه ناس شايفة ان الموت ده افراج واخلاء سبيل، زي انا بدون ذكر اسماء، واللي مش عايز يترحم ما يشمتش، كلنا رايحين الحفرة، ربنا يختم لنا بحسن الخاتمة، والله العظيم الدنيا سجن، ايه وجه الشماتة في ان واحد خرج من السجن؟

الله يرحمه ويخلف علينا بالخير

امريكا احتلت هيتي اخيرا

بعد سنين طويلة من التجسس، وشغل المخابرات، وخطط وتدخلات وانقلابات ولعب من تحت الترابيزة، واخيرا... آن آن آآآآآن

جه الزلزال منح هيتي لامريكا لوزة مقشرة... فعلا: لكل مجتهد نصيب

البني ادم برضه لما يشتغل بذمة وضمير ربنا بيكافئه

هو ده بقى، هو ده، مدام عندك تفاني في العمل لازم تعبك ما يروحش هدر ابدا

هييييييييييييييييييييييييييييه

الحمد لله الحمد لله.. ده الهيتيين.. مش هي بتتقال كده؟ اهل البلد يعني، عاملين مظاهرات عشان يقيلوا الرئيس، صحيح، اعمل الخير وارميه في امريكا، طلبتها ونلتها يا حاج

---

ما تنسوش والنبي المساعدات لمركز هشام مبارك 1 شارع التوفيقية، بطاطين، ومعلبات، وهدوم تقيلة، من هنا لحد يوم 24 الصبح الله يخليكوا، مش طالبة امريكا تيجي تساعدنا احنا كمان، لحد دلوقت مصايبنا على قد صبرنا الحمد لله، ربنا بيقدر ويلطف

امير البحار

شفته على النت، الحمد لله اني ما شفتوش في السينما، لو كنت دفعت فيه فلوس كنت ح احس اني اتلسعت على قفايا

يا سبحان الله، ولا حتى يضحك، انا باحب الهيافة والهبل، بس تبقى حتى دمها خفيف

كانت صاحية وبتلعب

يا عيني يا مصر.. اسم الله عليك يا حبيبتي

طب الجزائر يا عيني من زمان ولهم عذرهم، احنا يا عيني ليه؟

البلاد بتمر بمراحل اضمحلال، بمراحل تخلف، بامراض اجتماعية، ازمات اقتصادية، مشاكل سياسية

عمري ما شفت بلد بتتجنن وتتهبل.. كلها، كلها

الريادة برضه يا عم... عمك ياض

طب معلش، ما تزعلوش، مافيش حاجة مستاهلة، صلوا ع النبي، اهم حاجة صحتكوا، انتوا لاقينها في الشارع؟ ربنا يهدي الحال، اتفرجوا على الماتش بخير كده، وانبسطوا، واحنا ايه والجزائر ليه؟ والمصريين ح يشجعوا الجزائر والجزائريين ح يشجعوا تايوان، وما اخذ بالكورة لا يسترد الا بالكمبيالات، وقال على رأي المثل، اكلك منين يا بطة واكره اللي يقول آمين، وقال لك: تعرف فلان؟ لا ولا اعرفه ولا عمره شفته، عاشرته؟ اه ده احنا حاربنا سوا، يبقى ما تعرفوش فعلا، صلي ع النبي بقى، ده عيان بيلاعب في ميت، ويا مآمنة للرجال بكرة يجيلك شلل اطفال، وقال يا خبر النهاردة الجمعة بكرة يبقى التلات، وكاس العالم وداير على الكل، وما تقولش ايه ادتنا مصر قول ح نتعشى فول بالبيض، بيض، بيض، بيض كتير قوي، بتاع مزرعة بيض كده

وسوا مصر طلعت الجزائر طلعت ان شاء الله، في كل الاحوال احنا الاتنين ح يطلع تلاتين ابونا وح نفضل ننط في البحر عشان نهرب من بلادنا اللي عمالين نقطع بعضنا عشانهم وساعة ما حد يقول لنا ح نسفكروا كل واحد يتف على بلده ويخلع ولو ح يموت في عرض البحر، وكل حاجة بخير والحمد لله، ومن حبنا زنقناه واستلفنا منه فلوس ومن كرهنا زنقناه برضه عشان نبوسه بالعافية بعد اكلة بصل، والشاطرة تغسل رجليها قبل ما تطلع على السرير بعد ما تشرب اللبن، والعبد في التحديف ورئيس الجمهورية في التكييف

خير اللهم اجعله خير

يوسف حمدان ابو زهري

قتلنا اسير عندنا، وهو اسير اساسا ليه ما تعرفش، بس فوق انه اسير من غير مبرر، قتلناه، قتلناه، مش بالرصاص، ولا بالمشنقة، بالتعذيب لحد ما جاله نزيف داخلي وسبناه اسبوعين لحد ما لحق بربه

ربنا يرحمه ويتقبله في الشهداء

انا مش قادرة استحمل خلاص، احمد موسى بيتكلم في الجزيرة وبيخرف، وبيقول: ان سامي ابو زهري في غزة لكن انا باتكلم من مصر، على رأي احمد نصر، يعني قاعد في اودة الكنترول بتاعة مصر؟ طب ما انا قاعدة في مصر وما كنتش عارفة من الاصل ان عندنا كل دول مساجين من حماس، طيب فيه كام مسجون اسرائيلي من اللي بيتاجروا في المخدرات وبيصدروا دعارة وبيتجسسوا؟

احمد موسى قال: ما اتعرضش للتعذيب، ولقي رعاية طبية كاملة من النزيف اللي جاله (والنزيف ده طبعا جه لواحد عنده 38 سنة بسبب حمى النفاس مش بسبب التعذيب) وبعدين عمره جه ومات زي ما ناس كتير بتموت في السجن من غير سبب، او بسبب امراض مزمنة

همممم

او بسبب ان امه داعية عليه، او من كتر السعادة جوة السجن جات له ازمة قلبية من الفرح، او بسبب ان حماس اخدته درع بشري وهو جوة السجن المصري، او بسبب انهم جم على عباس المظلوم قام ربنا انتقم منهم

انا مصدقاك يا احمد يا موسى

مش ده سؤالي، سؤالي هوه: ايه اللي دخل عنصر من حماس جوة السجن المصري من اساسه؟ ده على اساس ان سجونا فاضية وبنبخرها عشان تسكن؟ اذا كان الرئيس بتاعنا ببقه قال تعقيبا على سؤال احدى الصحفيات الاسرائيليات عن الجاسوس عزام: ما احنا ياما رجعنا لكوا جواسيس وتجار مخدرات في الكتم، انما انتوا اللي عملتوا دوشة على عزام واضطرتونا اننا نخليه في السجن عندنا..

وبعد شوية عزام رجع لحضن شارون لافف العلم الاسرائيلي حوالين كتافه وهو لسة ما خلصش الحكم اللي عليه

يا ترى معتقلين حماس دول متاخدين رهينة لحد ما المعتقلين المصريين مثلا في سجن حماس يخرجوا؟ انا اللي اعرفه اننا لينا اسرى مصريين حمضوا في سجون اسرائيل وما طالبناش بيهم

يا ترى معتقلين حماس دول كانوا جواسيس مثلا؟ جواسيس لمين؟ طب جواسيس، ما يشبهوش عزام يعني؟ وتجار المخدرات والجواسيس اللي رجعوا في "الكتم" يا عوكل؟ يا راجل، يا راااااجل ده انت حفيدك لسة ما مرش عليه استغفر الله العظيم ح تخاف ربنا امتى؟

طب عيال المصريين وحابسهم وبتعذبهم وبيموتوا وبيطلع عينهم وادي احنا راضيين يا قدرنا وعملنا الرضي (اكيد ربنا بيعذبنا على حاجة عملناها) انما خلاص؟ يعني خلصت علينا وداير بقى تلم في اللي حوالينا؟ مرة السودانيين ومرة الفلسطينيين... شملول قوي، سبع، سبع يا عوكل، يا مسيطنا، يا رافع رايتنا واحنا حدودنا واجواءنا بتخترق وجواسيسهم بترجع في الكتم ومش لاقي غير المستضعفين تستقوى عليهم

وكل ما يذلوك ويفقعوك زنبة زي اللي عملوها مع اوسني دكتوري دكتوري اوسني في اليونسكو تفش غلك فينا اكتر واكتر وناشر خيرك على اللي حوالينا كمان

وياترى شاليط اللي محبوس عندنا بيتلقى خدمة كام نجمة؟ سبعة؟ تمانية؟ سبعتلاف سنة يا مصر يا غلبانة ياللي اتبليتي بينا وما كانش ليك الذل ده كله يا حبيبتي؟

انا مكسوووووفة، مكسوفة وحاسة بالذنب والمرار والعار والاحراج

اعمل ايه ياربي، نعمل ايه طيب؟ انا مش عارفة اعمل ايه؟ انا خايفة... خايفة ربنا ينتقم منا اكتر ما بينتقم

يارب انا أبرأ اليك من اللي حصل ده يارب، ما احنا بيحصل فينا برضه، لو كنا عارفين نعمل حاجة كنا عملنا من زمان، والله يارب احنا غلابة مالناش دعوة، احنا لا بندافع ولا راضيين يارب انت اعلم

تيجي من عندك بقى يارب، تيجي من عندك، عليهم هم، عليهم يارب عليهم يارب عليهم يارب وعلى اللي راضي بعمايلهم واللي بيدافع عنهم واللي بيبرر لهم واحنا لا والنبي يارب

انا محتاجة ارتاح بقى

مين بقى سامية فهمي؟

لتكون مالهاش اي اصل ولا اتولدت اصلا، بس معقولة صالح مرسي يكدب؟ النهاردة بقى في الحلقة، في اول الحلقة سامية كانت حامل وفي اخر الحلقة نسيوا انها كانت حامل والحياة مشيت عادي

والمخابرات عرفت انها حامل اما هي فما عرفتش انها حامل، على نفسها يعني، هي ما عرفتش، والمخابرات عرفت، اعيد الجملة بصيغة تانية عشان تصدقوا عينيكوا؟

مين بقى سامية فهمي

تكونش نادية حلمي؟ طبعا ما حدش ياخد مني كلام، انا باحاول اشوف مين اعلامية اسمها شبه اسم سامية فهمي، بس نادية حلمي اذاعية مش صحفية، وياترى مين نبيل؟ ما اخدش اعدام يعني؟ طب لو اخد اعدام مش كنا عرفناه؟ ماهو مش ممكن اكون باضيع وقتي واشل نفسي واشلكوا معايا وفي الاخر يطلع في الوهم، وبعدين لما احنا كان عندنا احمد الهوان ورفعت الجمال وسامية فهمي

امال ايه اللي حصل لنا ده كله؟ وللا المعلومات كانت بتوصل ويبوسوها ويركنوها جنب الحيط؟

عموما الحمد لله، عصر الجواسيس انتهى الى غير رجعة، اللي بيشتغل لحساب اسرائيل دلوقت بيقول بصراحة ويزعق للي يقول له: اخص، لا وبيوظف ناس معاه كمان، وفوق ده كله بيلاقي ناس تجري وراه عشان يشغلهم

هي نادية الجنسي ما مثلتش دور سامية فهمي قبل كده ليه؟ ازاي الدور ده يفوتها من غير ما تمثله وتنضرب وتخر دم وتتخرشم وتكبب في وش الكاميرا وهي بتقول: لاعااااااااااااااااااا وبعدين التيترات تنزل

ح الظابط طير الحالة السنتمنتالية المهترئة

استغفر الله العظيم من كل ذنب عظيم يا رب. ده انا لسة كنت باقول مجهودات السادة المدونين حسنت من اداء الداخلية ومباحث السجق المدني اتصلت بيا عشان تحقق في المقال اللي نشرته في الدستور. مافيش 24 ساعة من عودتي من التحقيق الاقيلكوا اهازيج عندنا في العمارات، اسمع يا سيدي:

العمارات عندنا ورا جامعة عين شمس، قدامها ممرين ووراها ممر. فيه تصليحات في احد الممرات، قام بعض السكان اقترح ان الناس تركن ورا العمارات عشان يوسعوا وبالتالي فهم محتاجين الممرات اللي ما بين العمارات عشان العربيات تعدي، كويس لحد كده؟ كويس قوي

الطبيعي ايه؟ الطبيعي انه يتم ابلاغ حراس العمارات وكل حارس يبلغ السكان، او يعلقوا ورقة على مدخل كل عمارة او في الاسانسيرات، او يعملوا ده كله مع بعضه، مش كده؟ وللا انا مجنونة وعندي هلاوس؟ لا الظاهر اني مجنونة وعندي هلاوس، عشان تفتق ذهن احد السكان اللي تصادف انه رائد شرطة انه يجيب من واحد صاحبه في المرور يافطة مرورية: ممنوع الانتظار! طبعا اي انسان عنده ذرة مخ ح يلاقي اشارة مرورية زي دي في مكان ماهواش شارع ح يعتبر ان فيه واحد بيهزر هزار سخيف، جات الناس ركنت. وجيت انا ركنت طبعا لان مافيش مكان في حتة تانية، انزل لك النهاردة يا استاذ الاقي على شباك العربية مخالفة مجهولة الهوية ملزوقة. ناديت على البواب قال لي: لا ما تقلقيش، هم عاملين كده بس

انا: يعني ايه يا سيد؟

سيد: ما الدكتور فلان في العمارة هنا والدكتور علان في عمارة خمسة برضه نزلوا لقوا الورقة دي ملزوقة بس عرفوا انها كده وكده لما لقوا مافيش رقم العربية ولا اسم امين الشرطة ولا حاجة، اللي بيعمل كده كابتن هاني

(ومخلي البوابين يقولوا له كابتن)

انا: مين كابتن هاني ده؟ وجاب الدفتر منين؟

سيد: ماهو ظابط، رائد، بيلزقها كده عشان الناس ما تركنش، وهو اللي جاب الاشارة المرورية دي وحطها بتاعة ممنوع الوقوف

انا: ظابط بوليس وبيستظرف على الناس كده؟ طيب يا سيد، انا ح اركن هنا، وقول له اني ح اركن هنا ولو نزلت بكرة ولقيت حاجة تانية ملزوقة ح اقدم فيه شكوى لوزارة الداخلية، ده اسمه سوء استغلال سلطات، الحكومة مدية له الدفتر ده مش عشان يلعب بيه، والدفتر ده انا وانت دافعين تمنه من الضرايب

سيد: هو مش في المرور

انا: وكمان مش في مرور؟ طب لو نزلت بكرة ولقيت الورقة دي ح ابلغ فيه هو وصاحبه اللي ادا له الدفتر ده

سيد: طب استنى اما نتأكد طيب عشان...

انا: زي ما باقول لك كده، لما تشوفه في صلاة الفجر وللا في اي داهية قول له اني ح اقدم بلاغ في وزارة الداخلية..سلام

------

هو رائد ده يطلع عنده كام سنة؟

طير لي الحالة السنتمنتالية المهترئة اللي كنت فيها 

الله، هم بتوع القومية الفرعونية بيحبوا اسرائيل ليه؟

كانت مناقشة غريبة قوي، مش اللي يعوز يعمل حاجة مش يعملها مظبوط وللا هي اي هطرسة؟ ازاي واحد نازل شتيمة في العرب، اللي المصريين مخلفينهم (ملحوظة: لان اليهود بيحسبوا النسب بالام فهم حاسبين الاسماعيليين مصريين عشان كده بيقولوا العرب مش ساميين) واللي من حوالي الفين سنة ابتدت هجراتهم لمصر الى الصعيد (انظر جمال حمدان) وفي نفس الوقت بيحب اسرائيل اللي الحقيقة، وكلمه لله والتاريخ، مافيش حد طلع عين العبرانيين وكفر سيئاتهم ومشاهم يكلموا نفسهم وهو اصلا اللي بدع استعبادهم غير المصريين، وبعد ما مصر بقت مسيحية المسيحيين المصريين طلعوا عين اليهود عشان ايام اضطهاد المسيحيين اليهود تعاونوا مع الوثنيين ضد المسيحيين (ههههههههههه اندال طول عمرهم) بس لما مصر بقت مسيحية المصريين انتقموا من اليهود شر انتقام، وماحدش انقذهم غير دخول العرب كالعادة، مش مفروض الفراعنة بيحبوا اليهود، المفروض ان العرب هم اللي بيحبوهم، والمفروض ان المصريين بيحبوا العرب وبيعتبروهم ولادهم، يبقى ازاي كل ما اقابل حد من بتوع القومية المصرية الاقيه بيحب اسرائيل وبيموت فيها وبيتعامل معاهم عيانا بيانا كده؟ بس عند في العرب؟ طب احنا ولاد عم واتخانقنا يا كتكوت ما تدخلش انت بقى يا خال خليك في فسيخك ونيلتك،

هييييه، كان فيه واحد جزائري زمان كان بيقول لبابا: الدنيا كلبة يا سي احمد، الدنيا كلبة يا سي احمد

اي والله، هو طبعا مما لا شك فيه مافيش عرقية اسمها المصريين، ولا عرقية اسمها اليهود، اليهود دول دين، وطبعا مما لا شك فيه ان العرب الاسماعيلية (اللي اصلا مش وارد يبقى فيهم نقاء عرقي لانهم هم اصلا مش عرق) نصهم عراقي (كلدان في جنوب العراق وسيدنا ابراهيم كلداني - التوضيح ده عشان ماليش مزاج للغباوة كفاية اللي سمعته) ونصهم من ناحية الام مصري، والعبرانيين ولاد عمهم والمصريين اخوالهم، ده انثروبولوجيا، وجمال حمدان اللي بيقول مش انا، والدي ان ايه كمان، انا بس باستعجب على الدنيا الكلبة، يعني ايام عز العرب كان كل واحد، حتى اللي مش عربي، يدعي انه عربي، حتى ابن خلدون كان بيقول انه عربي و"اعداءه" كانوا بيقولوا لا ده اسباني أصلي، وكان كل الناس بتتمحلس لهم زي ما بيتمحلسوا لامريكا كده، وعلى رأسهم اليهود و

it goes without saying

ان مصر عربية ومن زمان، ولما يا عيني المركب غرقت، اول اللي هربوا الفيران

بعد عشر قرون قاعدين ندلع في اليهود اول ما وقعنا خلعوا، وكل الناس بقى ابتدت تخلع مننا

دلوقت بقى، احنا في مرحلة اننا نخلع من نفسنا، دي بقى جديدة، يعني الدنيا دي لو مافيهاش مصريين، او لو كان المصريين انقرضوا قبل سيدنا اسماعيل ابو العرب، ما كانش النهاردة ح يبقى فيه حاجة اسمها عرب، وعشان كده اللغة العربية فيها كتير من اللغة المصرية، مش عشان "احنا مش بنتكلم عربي احنا بنتكلم مصري قديم" ده واحد غبي، يعني طلع ان العربي مش عربي، طلع مصري، والنكتة بقى اني قريت واحد كويتي بيقول: الكويتيين مش عرب

على فكرة

ولا سيدنا محمد ح يطلع عربي كمان؟ بالمرة بقى، فرعوني؟ او فينيقي؟

هييييييييييييييييييييه الدنيا كلبة يا سي احمد

طيب، قومية فرعونية يبقى الكام مهفوف اللي في البلد دي، ومنهم زاهي حواس اللي الظاهر اتلبس من كتر ما بينبش قبور الناس، يعملوا القومية الفرعونية صح بقى

 المفروض المؤمن بالقومية الفرعونية ده يطالب بالدهب اللي اخدوه العبرانيين، وبعدين يا يرجعوا عبيد تاني، يا يدفعوا بقى تمن صكوك العتق، والمفروض انهم يرفضوا وجود اسرائيل عشان اصلا فلسطين ايام الفراعنة كانت تبع المصريين، يعني يتحشروا كده ما بين الفلسطينيين والاسرائيليين ويقولوا لهم ولا بتاعتك ولا بتاعتك، دي بتاعتي انا وانتوا ح تشتغلوا عندي عبيد، ثم ان المصريين القدماء كانوا دايما بيساعدوا الكنعانيين ضد العبرانيين وبيقفوا جنبهم، مش بيجوعوهم، وكانوا على طول في حلف معاهم عند في العبرانيين، والكلام ده مكتوب في الكتاب المقدس لان المصريين القدماء من كتر غلهم ما استعنوش يكتبوا كلمة عن العبرانيين، والمفروض ان المصريين القدماء عمرهم ما عملوا اي معاهدة مع العبرانيين، والمفروض ان المصريين القدماء لا مؤمنين بارض موعد ولا مؤمنين باله الانبيا ده خالص، ومؤمنين ان كل حاجة بتاعتنا، السودان وليبيا وفلسطين واحيانا الحبشة، اه ما احنا كنا بلطجية برضه يعني، ايه سر بقى ان بتوع القومية الفرعونية بيجاهروا بالعمالة لاسرائيل في نهار رمضان؟ نوع من انواع التعاطف مع زميل في العنصرية والدماغ الوسخة اللي مليانة عناكب وعايشة في تاريخ غير مؤكد مات واندفن من الاف السنين؟ عشان احنا اصلنا ناقصين عته، عموما هي القومية الفرعونية دي اهبل حتى من الصهيونية، وطبيعي ان اللي يصدق فيها يبقى معوق

وياريت ماحدش فيهم يتناقش معايا تاني عشان انا مسكت لساني بالعافية حيث اني كنت في حالة سنتمنتالية مهترئة واهي طارت، ده ايه القرف ده في الايام المفترجة دي، في رمضان؟ في رمضان والشياطين محبوسة، عمالة وجهل وغباوة في ساعة واحدة؟ امال ح يعملوا ايه في العيد؟