حسام الحملاوي وريم ماجد غدا امام النيابة العسكرية

مطلوبين للتحقيق معاهم بكرة الساعة عشرة الصبح

وده الايفينت 

هي في الحي العاشر بيقولوا

بس للاسف معاهم نبيل شرف الدين... ينفع نتضامن معاهم ونطالب بسلخ قرعة نبيل شرف الدين؟

عاااااجل: والد طل الملوحي يؤكد أنها على قيد الحياة

الخبر ورد في موقع أخبار سوريا

وإليكم نص الخبر

والد طل الملوحي لسيريانيوز: ابنتي بصحة جيدة وهي محالة للقضاء وستتم محاكمتها خلال فترة قصيرة


الاخبار المحلية




قال دوسر الملوحي والد الشابة السورية طل الملوحي إن "ابنته بصحة جيدة ووضعها طبيعي, وانه قام بزيارتها برفقة والدتها عهد الملوحي مساء يوم الخميس 30 أيلول في سجن دوما للنساء في محافظة ريف دمشق".


وكذب دوسر الملوحي ما تناقلته تقارير إعلامية مؤخرا أشارت إلى أن طل تعاني من وضع صحي سيء, فيما أشار بعضها الآخر إلى أنها توفيت في السجن.


ونفى الملوحي, في تصريح خاص لسيريانيوز عقب زيارته ابنته, (حسب ما أفادت به طل) أن "تكون قد أوقفت كونها مدونة أو لأسباب تتعلق بحرية التعبير", مشيرا إلى أن "ما نشر بهذا الخصوص مجرد ادعاءات كاذبة لا أساس لها من الصحة".


وأكد والد طل أن "ابنته موقوفة بسبب ارتكابها أعمالا تسيء إلى امن سورية, وذلك من خلال اتصالها بجهات خارجية", حسب تعبيرها.


وأوضح دوسر الملوحي انه "ستتم محاكمة ابنته أمام القضاء خلال فترة قصيرة, وانه سيقوم بتوكيل محام للدفاع عنها أمام القضاء السوري المختص".


سيريانيوز
----

ومن العجب العجاب ألا تمتلك وسائل الإعلام المصرية المستقلة مثل صحيفة الشروق أي وسيلة اتصال بعائلة طل، وأظن أنه بإمكانهم الحصول على رقم هاتفهم من رئيس المركز الحقوقي الذي نشر خبر وفاتها، ونرجو من صحيفة الشروق، أو النشطاء المتصلين بهذا المركز السعي للحصول على وسيلة اتصال بعائلة طل، فإن لم يكن صاحب المركز على اتصال بعائلة طل، فهذا يعني أنه ليس له علاقة بقضية طل، مما يجعل تصريحاته بنفس قدر مصداقية تصريحات أبو يحيى وأبو محمد، كما أنه كان يجب على النشطاء الذين أخذوا على عاتقهم قضية طل أن يتصلوا بأسرتها لمعرفة احتياجاتهم وكيفية مساعدتهم والتحصل على أخبار ذات مصداقية، هذا ألف باء العمل السياسي، ومن أساسيات تدشين الحملات، وعدم إيجاد وسيلة للاتصال بأسرة طل تجعل من الحملة: مولد وصاحبه غايب
-----
التعليق الاخر بخصوص الخبر:
طيب.. هي على قيد الحياة والحمد لله وبصحة جيدة، أما ان يقول والد المتهمة على لسانها أنها أوقفت بسبب ارتكابها أعمالا تسيء إلى أمن سوريا
ههههههههههههههههههههههههههههههههههههههههههههههههههههههههههههههههههههه
الله يكون في عونهم
يارب فك اسرها

عاجل: القبض على مجموعة من النشطاء اثناء تظاهرهم امام ستار باكس المهندسين

تحديث:
العيال خرجوا
اسماء النشطاء من احسان سلطان:

القبض على وسام عطا ومصطفى شرارة - محمود احمد - كامل عرفة - عبدالرحمن هانى - ياسمين الجيوشى - احمد عباس - سارة ابو زيد - نهى جيلانى - سلمى زكريا

دلوقت هم في قسم الدقي، معاهم تلات محامين عرفت اساميهم ومش فاكرة منهم غير احمد الجيزاوي، فيهم حد اسمه صقر وحد تاني ناسية اسمه، معلش السن بقى

وسنوافيكم بالاخبار

افرجوا عن طل ملوحي

اضغط هنا

انا لسه ما كتبتش حاجة لاني لو كتبت حطلع اللي في قلبي كله، ومش عايزة اطلعه دلوقت، عايزة البنت طلعت

بس والنبي ومن نبى النبي نبي لو البت ما خرجتش اللي في قلبي كله حيخرج..... بلا رجعة
وقع للافراج عن طل ملوحي
ارسل رسالة لاسماء الاسد للافراج عن طل ملوحي
مجموعة طل ملوحي على الفيس بوك

إحالة العمال للمحاكم العسكرية موت وخراب ديار

يرجى توقيع البيان هنا
لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.

وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة.
--------
المشاركون في الحملة
me myself and I
ماحدش فاهم
جنين
دهووم
انسانة
طراطيش
غريب
ياباني
ميزو
ثورة مصر
صرير قلم
ادهم
مدونة شاب مصري
الحلم العربي
رسائل البحر
أنا وهؤلاء
ايجي فويس
مدونة دودا
مصري
تأملاتي
مصري في فرنسا
مركز الدراسات الاشتراكية
تضامن
المنتدى النقابي الحر
اخوان اون لاين (اياد جاي؟ :)
هرش مخ
حكايات مصرية
كومة ورق
مصر الحرة
Mostahfazana
اما نعيمة
المحلة مصر
مصريون من اجل سيادة القانون
lost princess
ذات
Marwa Learns
مدونة بهية
محمد نجم
الخوجة
زنوبيا
ايام سودا    

ونرجوا من الجميع نشر البيان في كل المدونات

القبض على مجموعة كبيرة من شباب الجمعية الوطنية للتغيير ونحتاج لمحامين

تحديث:
خرجوووووواااااا
مها سكوت هنصوت اتصلت بيا دلوقت وبعتت لي اسامي المقبوض عليهم:

مها الجمل

نهى الجمل

محمد الزيني

محمد الطيب

محمود شقير
اماني امه
ماجد وابرايم لويس

واسماء اخرى مها مش عارفاها ومتوزعين من الشروق لحد الجيزة

ومحتاجين محامين

الله يخرب بيتك يا امن الدولة وينكد عليك بحق الايام المفترجة دي
------
المحامين كلهم نايمين.. حد صاحي يروح للعيال
فيه ناس في قسم شيراتون مش عارفين اساميهم 

عاجل: النائب العام يصدر قرارا بالتحقيق مع الضباط المعتدين على أحمد دومة

راحت عليا نومة وقمت الساعة اتناشر ونص على ما اتمهمزت وشرب القهوة واخدت دوش ولبست كلمت خالد عبد الحميد قال لي ما تجيش حنفضها

وقال لي ان النائب العام اصدر قرار بالتحقيق مع الضباط اللي اتهمهم احمد دومة بالاعتداء عليه

اما دلوقت ففيه اجتماع للمحامين لبحث امكانية وقف تنفيذ الحكم

قولوا يا رب

قولوا يارب

يوم السبت 31 مستنيين الحكم في القضية اللي عبد الفتاح مراد رافعها على احمد سيف الاسلام وجمال عيد وعمرو غربية

قولوا يارب.. وقولوا حسبي الله ونعم الوكيل

تفاصيل القضية هنا

صباح الخير على الورد اللي فتح في جناين مصر

ده فيديو على الفيس بوك
ومحمد توفيق جاب لي فيديو من اليوتيوب

ما عرفتش اكتب حاجة امبارح عشان كنت راجعة تعبانة وبعدين لما رجعت سمعت كلام زي الطين ضايقني فدخلت اتقلبت نمت

الشهادة لله انا ما كنتش متوقعة ابدا ان مظاهرة امبارح تنجح ولا تتم خالص، كنت فاكرة انها حيحصل فيها زي اللي حصل ايام مظاهرة التعديلات الدستورية اللي سببت لي صدمة عصبية مش قادرة انساها، بس قلت حانزل برضه، وطبعا لاني لخمة وموكوسة بطبعي قعدت احاول القح جتتي على اي حد يسحبني في ايده:

مالك تاخدني معاك المظاهرة؟

لا...

حسام تاخدني معاك المظاهرة

انا مش رايح

يا جماعة حد ياخدني معاه المظاهرة

ماحدش رضي يعبرني عشان عارفين اني حالخمهم في المظاهرة وانا اصلا لخماهم في حياتهم كلها، مافيش غير سلمى سعيد حبيبتي اللي بحماس شديد قالت لي تعالي معايا يا نونة، بس ما اعرفش مين ابن ال... اللي وشى بيا عندها وخلاها تتهرب مني في اخر لحظة

جمال عيد قال لي عدي عليا في المكتب وانا اخدك المظاهرة، الوقت اتأخر ما لحقتش اروح له المكتب وقعدت الف في ميدان التحرير

كلمت عايدة سيف الدولة وفهمت منها انهم في قصر النيل قلت لها استنوني قام سبحان الله قالت لي في وشي كده: لا مش حنستناكي!

ايه المعاملة دي؟ المهم محمد واكد اخد منها التليفون وقال لي: لا... حنستناكي... تعالي ياللا

في اخر لحظة المكان اتغير لان جيش عرمرم كان في ميدان التحرير قدام كنتاكي والميدان متقفل خالص كأن اسرائيل حتحاربنا

بصوا بقى انا مش بافهم في الشوارع فحقول لكوا بالشبه كده

احنا مشينا لحد ما وصلنا عند الشارع اللي كان فيه جرنال البديل زمان، واروى مرعي بتكلمني وتقول لي انتوا فين؟ قال بتسألني انا احنا فين على اساس انا اللي حاشرح لها الشوارع، قلت لها: احنا هنا... ماشيين في شارع كده

وطبعا البنت فضلت تعافر عشان تعرف توصل لنا

انا بانصحها نصيحة اخوية لوجه الله... تدور لها على مرشد غيري، هي مش شايفة من كتر وكستي الناس بتتهرب مني ازاي؟

وصلنا عند الشارع ده قام لقينا بتاع تلاتين اربعين واحد متجمعين ورحنا فجأة مشينا في مسيرة الناس تسمع يسقط يسقط حسني مبارك وتنضم في الاول الامن حاول يجري ورانا واحنا في الشارع بس الحمد لله العدد كان بيزيد فلقوا نفسهم مش عارفين يسيطروا، مشينا من شارع لشارع تاني مش عارفة اسمه، بس حتى بالامارة عدينا على قهوة البورصة، ومشينا في شارع تاني، وبعدين قالوا تعالوا ندخل من الشارع ده، كان شارع جانبي، تقريبا قالوا لي ده باب اللوق او حاجة زي كده، بس ناس المجموع مشي في شارع تاني وقالوا لي ان ده شارع شريف، المهم كان غلط نمشي في شارع شريف ده عشان بيوصل على ميدان التحرير حيث الثكنات لو كنا كملنا في الشارع التاني اللي على جنب مش اللي على طول كانت المسيرة بقت اطول واكبر، بس عموما انا كنت مبسوطة قوي

المسيرة ابتدت تلاتين اربعين خلصت وهي حوالي خمسمية ستمية

ما كانش زمان الناس بتنضم كده

الامن قفل علينا شارع شريف ونزل ضرب في العيال وقبض عليهم وسمعنا صوت بنت بتصوت وبعدين مشينا من شارع شريف ده وبقينا نجري لحد ما وصلنا لحتة انا عارفاها دي.. اسمها شارع الشواربي

ضربوا البنات والشباب واتحرشوا بالبنات، بس سلمى سعيد جدعة، شتمت الظابط وراحت طلعت تجري

كل ده واروى مرعي بتحاول توصل لنا وكل ما تمشي في حتة يضربوها

اتضربت كتير قوي ومافيش فايدة عندها اصرار تيجي برضه.. البت دي بميت راجل على فكرة، ومن غير صياح ولا باللو، بهدوء شديد كده واللي يشوفها يفتكرها الكتكوت المفترس ما توحيش ابدا بشدة البأس دي

المهم لما سلمى شتمت الظابط خفنا عليها لان الراجل عرف وشها وبقينا خايفين يحطها في دماغه، قلنا لها يا سلمى ما تمشيش لوحدك

كل ما نمشي دي تعمل زي البطة اللي لسه فاقسة وتروح سارحة بعيد لوحدها، واروح اسحبها من ايدها: يا سلمى ما تمشيش لوحدك لو سمحت

ومالك كل شوية يكلمني.. طب ما كان ييجي معايا، عمري ما حاسامحه ابدا عشان خلا شكلي عار على التويتر وانا باترجاه ياخدني معاه وهو قالبني، بس هو عموما قعد في مركز هشام مبارك يلم اسماء المعتقلين وبعدين جالنا على النقابة بعد كده

الاول قلنا حنروح على مركز هشام مبارك، جينا نروح على هشام مبارك قام واكد واحنا معديين قال فيه حاجة دار القضاء العالي اهي

رحنا ما لقيناش حد، بس المدرعات اوهمتنا ان فيه وقفة هناك

كان عددنا قليل بتاع خمستاشر واحد وللا حاجة، والعيال كانوا حيتخانقوا مع الحرس بتاع دار القضاء عشان عايزين يمشونا

المهم لقينا صعوبة في اننا نعمل وقفة عن القضاء العالي بعددنا القليل ده وبقينا نتصل ببعض عشان نلم بعض على نقابة الصحفيين واحنا ماشيين لنقابة الصحفيين مشي جنبي لزق مخبر طول بعرض لابس ازرق زي الكشافة وعمال يتصنت عليا وانا باتكلم في التليفون وكان ناقص يلزق ودنه في التليفون زي المخبر اللي كان ماشي جنبي انا وعبد الرحمن فارس قبل كده وعايدة بتكلمني في التليفون: انتوا رايحين فين

وده لازق ودنه وبيلمع اكر

طبعا قلت لها انا مروحة حاقول لها انا رايحة النقابة؟ لا ما انا ناصحة يعني، هو صحيح فضل ماشي ورانا لحد ما شافنا رايحين النقابة بس انا حبيت اعمل تمويه، انا دايما باعمل تمويه وبانصح غيري بالتمويه في التليفونات المتراقبة، على التليفون وش كده: ما تبقاش تبين ان معاك تليفون وابقى خبيه عشان تعرف تكلمنا لو اتقبض عليك.. اعمل زي فلان، ماهو بيعمل كده.... لحد ما الناس تقفل السكة في وشي بعد ما يقولوا لي: ده كلام يتقال في التليفون ده؟ طب اعمل ايه طاه؟ ما انا عايزة اوصل لهم معلومة حاوصلها على النت وللا على التليفون وللا وانا ماشية معاهم في الشارع والمخبر جنبي؟ مافيش غير اني ازنقهم واحد واحد في الحمام عشان اقولهم اللي عايزاه.. وللا مراقبين الحمامات كمان؟

رحنا على النقابة لقيناهم مقفلين النقابة فهتفنا برة الكوردون راحوا فاتحين لنا بسرعة عشان يدخلونا

المرة دي العيال ما حدش فيهم كان خايف، الكل كان غضبان خصوصا انهم ضربوا ناس كتير، ضربوهم وهم شايلين صورة خالد سعيد وهو متشوه، الظاهر احساسهم ان دي بجاحة ما بعدها بجاحة خلاهم يقولوا وان شالله يموتونا زي خالد سعيد

لما كنا وصلنا النقابة كان عددنا زاد شوية، بتاع تلاتين واحد، هوب هوب بقينا حوالي تلتمية ربعمية وفضلنا قاعدين معتصمين عشان يفرجوا عن اللي قبضوا عليهم

فيه ناس ما كانتش في المسيرة جات وناس من اللي كانوا في المسيرة اتفرقوا، بس لاول مرة عدد الناس اللي في المسيرة يبقى اكبر من عدد الناس اللي على سلم النقابة

بالرغم من زعلي على الناس اللي انضربت، بس انا فرحانة باليوم بتاع امبارح قوي

طبعا انا جربوعة ولما الدنيا ليلت والعيال ما خرجتش لسه قلت لهم: هيييييه حنباااااات... صح؟ صح؟ حنبات على السلم؟

كل الناس احولوا كده في وشي وامل رمسيس قالت لي: انا كنت فاكراكي مناضلة طلعتي عندك مشاكل في البيت ومش عارفة تطفشي

بس طبعا ماحدش ساندني في فكرة نومة الشارع دي غير محمد واكد مجيبا: طبعا لو ما خرجوش حنبات.. هي دي محتاجة مناقشة؟

العيال بقوا يتصلوا بينا ويقولوا لنا انهم رموهم على الدائري بعد ما اخدوا كل فلوسهم وبطاقات بعضهم بلغت كمال خليل في ساعتها فراح باصص للظباط وقال لهم: عيشوا بشرف جاتكوا القرف هههههههههههههه

الا صحيح ياخدوا فلوسهم ليه يعني؟

لقينا واحد جاي في المظاهرة معاه صورة على الموبايل لواحد اسمه هاني خيري متعذب تعذيب السنين ومصورين ضهره لدرجة ان عايدة سيف اللي ما بتشوفش في حياتها غير التعذيب اتفزعت لما شافت الصورة

بيسان كساب اخدت الصورة واخدت نمرة هاني وان شاء الله بقى ينزلوها في الدستور

للاسف بقى كلهم خرجوا وما عرفناش نبات :)) ياللا الجايات اكتر من الرايحات ان شاء الله

بس على فكرة.. الجايات فعلا اكتر من الرايحات

الغريبة ان التغطيات ما كانتش كويسة قوي

اون تي في بس غطت كويس قوي على حسب ما سمعت ما شفتش، سمعت من الناس اللي جات في الوقفة على سلم النقابة ان الجزيرة غطت وحش، اتصلت بسمير عمر قام اتنرفز عليا وقال لي انا عامل تقرير طويل وطلعت على الهوا

النهاردة اظن الصحف ما لحقتش تنزل كل حاجة، يمكن ينزلوا بكره

يارب يكون حد من العيال صور المسيرة، كانت كبيرة وحلوة وناس كتير عادية من الشارع انضمت وما كانوش خايفين

وعلى فكرة بقى على فكرة، احب اقول لكل الناس اللي تهربت مني زي ما بيتهربوا من الديانة وما رضيوش ياخدوني للمظاهرة خصوصا مالك اللي قعد ينظر لي عشان يتهرب مني: انا مش احسن واحد تروحي معاه المظاهرة.. وحسسني اني خانقاه في حياته، اني صحيح لبخت محمد وكل ما يحاول ينتحر اصوت: يا لهوي انت حتسيبني؟ بس لولا كده كان اتعجن واتقبض عليه زي كل مرة، والمرة دي بقى كانوا بياخدوا الفلوس والبطاقات يعني حرقة قلب... ساعات بيبقى ليا منفعة، هو زهق شوية :) بس عمل الخير قعد له في عينه وعافيته ورجع البيت سليم يعني
عندي ملحوسة رفيعة
الا احنا ما نشبهش المعارصة الايرانية اللي عملوا لنا عليها باللو وحدوتة؟ الا ما شفت السي ان ان ولا البي بي سي ولا اي حد اهتم بينا زي ما كانوا مهتمين بالمعارصة الايرانية اللي كنا كل ما نكلمهم على التويتر يقولوا لنا يا عرب يا جرابيع

ما كانتش ناقصاك يا عبده في الايام دي

حلقة جديدة في مسلسل تصفية منظمات حقوق الإنسان في مصر

يوم السبت.. أحمد سيف وجمال عيد وعمرو غربية أمام محكمة جنح الخليفة

وتشكيل لجنة للتضامن مع المدافعين عن حقوق الإنسان

القاهرة 20 مايو 2010

تعقد محكمة جنح الخليفة بمجمع محاكم الجلاء بشارع الجلاء يوم السبت القادم 22/5/2010 في تمام الساعة التاسعة صباحاً جلسة محاكمة لكل من أحمد سيف الإسلام مدير مركز هشام مبارك وجمال عيد مدير الشبكة العربية لمعلومات حقوق الإنسان وعمرو غربية الناشط الحقوقي والمدون، في القضية رقم 8260 لسنة 2009، وذلك باتهامات بسب وقذف القاضي عبد الفتاح مراد وتهديده، و إساءة استخدام أحد وسائل الاتصالات.

يذكر أن القاضي عبد الفتاح مراد قد تقدم ببلاغ للنيابة العامة يتهم فيه النشطاء الحقوقيين بتهديده وابتزازه وسبه وقذفه وذلك على خلفية إعلان عدد من المنظمات الحقوقية عن واقعة انتهاك حقوق الملكية الفكرية للشبكة العربية واقتباس 50 صفحة من أحد تقاريرها دون الإشارة للمصدر

مركز النديم للعلاج والتأهيل النفسي لضحايا العنف

قائمة باسماء المحتجزين والمفرج عنهم الى الان

من مدونة جبهة الدفاع عن متظاهري مصر

إبريل، من 5:05 مساءً-6:20 مساءً- أسماء المفرج عنهم: مصطفى فؤاد أحمد فؤاد - شريف عبد المنعم أحمد - أحمد محمد حسن - مصطفي الشامي - مصطفي ماهر- محمد عادل سوكا - عبد الرحمن فارس - أحمد نجيب - شريف محمد هاني - محمود سامي - عبد الله يحي - نادر سعد عطا الله - شهاب وجيهه عبد الحميد - عمرو أسامه - الحسيني أحمد الحسيني - محمود سامي متولي - عمرو أسامة - محمد سامي علي يونس - خالد محمد سيد - محمود دهشان - أحمد عبد ربه البرعي - محمد سامي.


أسماء المتحجزين إلي الآن: عبد الرحمن عز الدين - أحمد إبراهيم أحمد عواد(بـ 6 اكتوبرالثاني والمباحث تتعنت في الإفراج عنه وقالوا لأخيه سيخرج بعد ثلاث أيام ومحامي من الجبهة في الطريق إليه)، - ياسر حلمي (بمدينة نصر) - محمد عبد التواب جمعة(بالمطرية) - أحمد سعد (بدمنهور) - أحمد محمود عبد السلام (بأوسيم وفي انتظار الافراج عنه) - أحمد محمد خيري (بالمرج) - روماني صومائيل جبرائيل (بسوهاج) - محمد ناجي عبد المقصود (بالشرقية) - محمد ميمون - عبد الرحمن سعيد - محمد سيد جمعة - محمد شكري.
-------------
وتابعوا اللنك عشان بيتم تحديث الاسامي

الظاهر العيال ما خرجوش

لما نزلت كان الامن عايز يودي العيال محافظات مش يفرج عنهم من القاهرة

رجعت وعرفت ان مصطفى ماهر شقيق احمد ماهر بيتعرض للضرب للضغط على اخوه في القسم!!!!

خليهم خليهم، كل شوية بيتجننوا اكتر وجنانهم حييجي على دماغهم

مين بقى اللي عامل فولو لعبد الله كمال على التويتر؟ البني ادم ده يتعمل له بلوك من كل الناس لحد ما يلاقي نفسه لوحده على التويتر وعلى الفيس بوك كمان

ده يا قلب امه عامل لروحه موقع كمان ههههههههههههههه

البيان ده وصلني بالميل ولو اني ما اعرفش مين الجهة دي بس قلت انشره برضه

بيان صحفي 7/4/2010
المؤسسة تدين الاعتداءات الأمنية على
متظاهري 6 أبريل وترحب بقرار الإفراج عنهم
تعرب المؤسسة العربية لدعم المجتمع المدني وحقوق الإنسان عن بالغ إدانتها للاعتداءات الأمنية على المتظاهرين المصريين والذي حدث امس الثلاثاء 6 ابريل ، وكان المتظاهرين وأغلبهم من الشباب المنتمين لحركة 6 أبريل وقوى سياسية وحزبية ، كانوا ينوون التظاهر أمام مجلس الشعب لتوصيل مطالبهم بعدم مد حالة الطوارئ .
وقد احاطت قوات الأمن وسط القاهرة أمس الثلاثاء ، وتواجدت بقوات كبيرة في ميدان التحرير وأمام مقار الأحزاب خاصة مقر حزبي الغد والتجمع بميدان طلعت حرب ، وامام مقار النقابات الرئيسية خاصة المحامين والصحفيين .
واعتدت قوات الأمن بدنيا على المتظاهرين من الشباب والشابات أمام مجلس الشوري حوالي الساعة الثانية عشر والنصف ظهرا ، كما اعتدت على متظاهرين اخرين وأعضاء بحزب الغد أمام مقره الرئيسي ومنهم نجل مؤسس الحزب د. ايمن نور ، ومنعتهم من الخروج من مقر الحزب.
كما منعت عشرات الصحفيين والإعلاميين من تغطية اليوم ، وقامت بسحب كاميراتهم ، ومنعت فضائية الجزيرة من التغطية منذ الصباح الباكر .
واعتقلت قوات الأمن ما يقرب من 80 متظاهرا ، عرض البعض منهم مساء الثلاثاء على نيابة قصر النيل ، بينما أفرج عن عدد محدود في ذات اليوم .
وقد أحاطت قوات أمنية كثيفة مقر نقابة المحامين ، بعدما اعتصم عشرات الشباب ، ونظموا مظاهرة داخل مقر النقابة ، رددوا فيها هتافات ضد النظام الحاكم وقوات الأمن.
وترحب المؤسسة بقرار السيد المستشار عبد المجيد محمود النائب العام الإفراج عن كل من احتجز على ذمة تظاهرات الأمس ، وتطالبه بالتحقيق في الاعتداءات التي حدثت على المتظاهرين.
وتتناقض هذه الاعتداءات مع كافة مبادئ الدستور والمواثيق الدولية لحقوق الإنسان التي تؤكد على حق التجمع السلمي . وهو الحق الذي أكد عليه الدستور المصري في المادة 54 التي نصت على (للمواطنين حق الاجتماع الخاص في هدوء وغير حاملين سلاحا دون حاجة إلى إخطار سابق ولا يجوز لرجال الأمن حضور اجتماعاتهم الخاصة ، والاجتماعات العامة والمواكب والتجمعات مباحة في حدود القانون)
وتطالب المؤسسة وزارة الداخلية باحترام حق التظاهر السلمي والمقر به دستوريا ووفقا للمواثيق الدولية لحقوق الإنسان التي وقعت عليها الحكومة المصرية. .
------------
انتهى البيان
كمان الجمعية الوطنية للتغيير قدمت بيان للنائب العام
العيال اللي انضربوا امبارح اجدع ناس وارجل ناس بنات وولاد وما يستاهلوش غير كل احترام وتقدير ويتشالوا على الراس من فوق
ومش مسموح لحد انه يهاجمهم.. كده، مافيش ديمقراطية في الموضوع ده

 

عاجل: نحتاج اعاشة للمعتقلين تسلم لمركز هشام مبارك

العيال الظاهر حيباتوا وللا ايه؟
محتاجين اعاشة، اللي هي زيارات يعني للسجن، اللي عايز يبعت حاجة يتصل بخالد عبد الحميد ومالك مصطفى
مالك مصطفى 0121340370 خالد عبدالحميد 0106114257

عااااجل.. مش عارفة اقول ايه؟

التحديثات اسفل الروابط
المواقع التي يمكنكم متابعتها لمتابعة الاخبار:
جبهة الدفاع عن متظاهري مصر


الشبكة العربية


التويتر مالك مصطفى وستة ابريل

ولأي طوارئ رجاء الاتصال بمركز هشام مبارك للقانون

تحديث: الساعة 1:25
معلومات جديدة عن المعتقلين

تحديث: الساعة 1:13 يوم 7 ابريل

الداخلية مقدمة بلاغ في 33 من المقبوض عليهم انهم اعتدوا على الامن وبيدعوا ان فيه 23 اصابة في الامن

كده بقى ربنا يستر

عايزين يعملوها زي المحلة بالظبط

تحديث:
تقرير العاشرة مساء كان كويس
  تحديث:
الافراج عن 20 من المعتقلين

تحديث:
البرادعي يدين ما حدث وسيعلن موقفه بشكل رسمي
تحديث:
المنصورة حصل فيها لبش بس من غير اعتقالات
تحديث:
البي بي سي انجليزي نزلت خبر
تحديث:
الحمد لله اخيرا الواشنطن بوست نزلت فيديو


تحديث:

تحديث:
فيه اربعة في اسكندرية كان مقبوض عليهم وافرج عنهم
تحديث


مواطن مصري جاب لي لنك يدعوت احرنوت عشان هم اللي غطوا
تحديث:
دلوقت منى الشاذلي قالت ان حاتم خيري مراسل دريم اتقبض عليه وافرج عنه بعد ساعات طويلة واتاخد منهم الكاميرا ورجعوها لهم فاضية من غير الشرايط
تحديث:



تحديث:

الافراج عن جانيت عبد العليم وصفا سليمان بعد ضربهم في عربة الترحيلات

مش عارفين حيعملوا في التسعين واحد الباقيين ايه؟

وكالات الانباء الناطقة بالانجليزية زي البي بي سي ورويترز والسي ان ان ما جابوش الخبر بالانجليزي

الخبر موجود على البي بي سي العربي ورويترز العربي بتقول ان المتظاهرين "تعاركوا" مع الشرطة

انا برضه عايزة افهم فيه ايه؟

تحديث:
قنا البي بي سي عربي عملت تغطية على شكل تعليق
لا بجد.. هو الايرانيين بني ادمين واحنا كلاب مثلا؟
الحفلة اللي عملها النظام بالتعاون مع زفت الطين حماقي - اللي قررنا نعمل عليه حملة مقاطعة - قلبت بنكد والحمد لله

تحديث:

لم تعلق اي من الفضائيات على ما حدث اليوم الا قناة الجزيرة وراحت جايبة لنا جمال عبد الجواد من لجنة السياسات يقول اللي حصل النهاردة دليل على الديمقراطية ولو شفتي المظاهرات في الدنمارك حتقولي ان الدنمارك اكبر ديكتاتورية

لا تعليق

تحديث:
قائمة باسماء المعتقلين من موقع جبهة الدفاع عن متظاهري مصر

1. احمد إبراهيم عوده

2. احمد الميرغني

3. احمد سعيد دومه

4. أحمد سمير عبد الحي

5. احمد شوقي إبراهيم

6. احمد عبد المنعم عبد المنعم

7. أحمد عبد الوهاب

8. أحمد عبد ربه برعي

9. احمد عيسوي نصر

10. أحمد محفوظ عبد السلام

11. احمد محمد أسامة

12. أحمد محمد حسن حميد

13. أحمد محمد خيري

14. احمد محمد معوض

15. أحمد محمود فتح الله

16. احمد نجيب سيد

17. إسلام أنور محمد

18. إسلام محمد

19. إسلام محمد عبد العظيم

20. إيهاب احمد مصطفى

21. تامر عبد الوهاب

22. جانيت عبد العليم

23. حامد سامي

24. حامد محمد

25. الحسن عقيل

26. حسن ماهر محمود

27. حسيني صلاح حسيني

28. حمد عبد السلام

29. خالد عز الدين

30. خالد محمد السيد.

31. خالد محيي الدين

32. روماني صومائيل جبرائيل

33. رياض أحمد مصطفى

34. سليمان عوني الفاجوني

35. سمير جاد الحفناوي

36. سمير سيد عبد الرسول

37. شادي فكري حسن

38. شريف عبد المنعم

39. شريف محمد

40. شريف محمد هاني

41. شهاب عبد المجيد وجيه

42. صفا سليمان

43. طارق أبو العلا

44. طارق رأفت الدويري

45. طه العيسوي

46. عبد الحميد مدحت عبد العظيم

47. عبد الرحمن سيد عبد المجيد

48. عبد الرحمن عماد الدين

49. عبد الرحمن فارس

50. عبد العظيم إسماعيل

51. عبد الله طاهر

52. عبد الله يحيي سعداوي

53. عربي كمال فرغلي (محامي)

54. علاء محمد على

55. عمرو أسامة

56. كامل عرفه كامل

57. محسن رشاد

58. محمد أحمد عبد السلام

59. محمد احمد عبده

60. محمد احمد محمد

61. محمد حازم محمد

62. محمد زغلول عطا

63. محمد سامي على

64. محمد سعد الله

65. محمد سيد جمعه

66. محمد شكري

67. محمد عبد العظيم سلامه

68. محمد عبد المجيد محمود

69. محمد عواد

70. محمد فتحي محمد

71. محمد محيي الدين فاضل

72. محمد مهدي عبد المقصود

73. محمد ناجي

74. محمد يحيى

75. محمود حازم محمد

76. محمود دهشان أحمد

77. محمود سامي

78. محمود مصطفى

79. محمود ياسر

80. محمود ياسين عبد الواحد

81. مصطفى الشامي

82. مصطفى فؤاد أحمد

83. مصطفى ماهر

84. معوض سعد

85. نادر سعد عبد العاطي

86. نبيل عبد الستار صادق

87. هاني جمال عوض

88. وائل عبد الرحمن

89. وسام عطا جاويش

90. ياسر محمد مصطفى

91. يوسف عادل مزروع

92. يوسف عماد يوسف

تحديث:

انا لازم اوصل للفنانة محسنة توفيق كم الامتنان والسعادة والحب اللي على التويتر لها وقد ايه فرحوا لما عرفوا انها كانت موجودة :) وبيقولوا لها بنحبك يا بهية

تحديث وندااااء:


عائل واحد اسمه مصطفى فؤاد احمد مش عارفة عنه حاجة وبتتصل بالمصري اليوم وماحدش عارف هو فين، اخر كلام من مركز هشام مبارك ان المعتقلين تسعين واحد بس لسه لحد دلوقت ماحدش يعرف مصطفى فؤاد احمد فين، رجاء اللي يعرف عنه حاجة يتصل بالمصري اليوم او بمركز هشام مبارك او بالشبكة العربية او يسيب تعليق هنا وانا اقول لهم على التويتر لو انت مش على التويتر
تحديث :

ده انت طلعت خفيف قوي يا مبارك.. ايه اللي عملته ده؟
فيديوهات فيديوهاااااااااات.. اي حد عنده فيديوهات ينشر
تحديث:
احمد عبد الفتاح يكتب شهادته: حين تضامنت معي الفنانة محسنة توفيق
!!!!!!!
طنط محسنة راحت؟
ولمتابعة الاخبار اولا باول تابع موقع الشبكة العربية


تحديث:
هي وكالات الانباء العالمية دالقانا ليه؟ مش ده نظام مبارك اللي بيدوله فلوس وبيدربوه عشان يحارب الارهاب؟ هو ده الارهاب؟ بنات ضلوعهم تتكسر ويتحرشوا بيهم؟ هو احنا ما نشبهش الايرانيين؟ هم الايرانيين معمولين من دهب واحنا معمولين من كاكا؟ هم يقعدوا العالم كله يأوأ عليهم واحنا هنا مرميين في التلاويت ومشدود علينا السيفون ولا كأن اللي انضربوا واتسحلوا دول شوية صراصير؟ هو احنا مش بني ادمين زينا زيهم وللا ايه؟ مافيش غير التغطية دي
تحديث:
المدون احمد عبد الفتاح اخد مطواة في وشه من الامن.. ونعم البلطجية والله، بيرفعوا الناس بمطاوي؟ هو شوية وحينزل تغطيته على مدونته


تحديث:

انا ساكنة جنب جامعة عين شمس ومن الصبح الجامعة عاملة حفلة والرقص والغناء لا ينقطع من بيت الفاجر ابو سهيل
اه يا نظام فاشل كل دعائمه محمد حماقي وماتش كورة وبلطجية يكسروا دراعات الناس
يا فاشل يا فاشل يا فاشل يا فاشل يا فاشل يا فاشل يا فاشل يا فاشل يا فاشل يا فاشل يا فاشل
ياللي حتى ما عرفتش تلم الزبالة من الشارع
ياللي ما عرفتش تحل ازمة انابيب بوتجاز
ياللي كل ما تتزنق ولو في رغيف عيش تنزل الجيش
ياللي ما عرفتش تحل ازمة انفلوانزا الخنازير غير بانك تقتل الخنازير والخنازير مالهاش اي صلة بالانفلوانزا يا جاهل يا جاهل يا فاشل
ياللي شوية فراخ عملوك دولة وبائية
ياللي ما بتعرفش تكسب شعبية الا تعمل ماتش كورة
يا فاشل يا فاشل يا فاشل
يا ساقط.. ولا لك ملحق.. انت اللي زيك يطلع من المدرسة ويروح اي ورشة وان المعلم رضي بيك اصلا يا فاشل يا فاشل يا فاشل يا فاشل يا فاشل يا فاشل يا فاشل يا فاشل وكما قال محمد حسان: يا افشل اهل الارض
تحديث:
ايه ده؟ ايه ده؟ ايه ده؟ هم اتجننوا في مخهم؟ النظام اتجنن في مخه؟
اولا: المظاهرة دي كانت مظاهرة ستة ابريل، وكلنا كنا متوقعين ان ناس يتقبض عليها، بس انا كنت فاكرة انها حتبقى زي مظاهرة التعديلات الدستورية سنة 2007 اقصى حاجة.. ما كنتش متوقعة انهم يقلبوها المحلة
الاصابات كتيرة، والاعتقالات على حسب التويتر عددها كبير قوي
ثانيا: دول حاولوا يعملوا هاك على موقع البرادعي وموقع ستة ابريل
هم اتهبلوا فعلا
---------------
لسه جاية من برة ووصلتني رسالة من فنون بتقول لي العيال اللي نزلوا المظاهرة النهاردة قدام مجلس الشورى اتبهدلوا

فتحت الاكاونت بتاع مالك على التويتر لقيت مساخر

اتقبض على ناس كتير، حوالي 40 او خمسين، والامن استخدم عناصر نسائية لاول مرة لمطاردة النساء على حسب كلام مالك واتقبض على محمود مخلوف 60 سنة وضربوا بنات كتير وقفلوا على حزب الغد بعدد من عربيات الامن المركزي وفيه تويتة لمالك بيقول:

"تحرش، كسر اضلع، شرطة نسائية، مطاردات في الشوارع والدنيا ربيع والجو بديع".

شرطة نسائية؟ لالالالا مش دي حقوق المرأة اللي كنا عايزينها

وبيقول ان البنات حالتهم سيئة، واكتر من 8 بنات مصابين، وان المحتجزين في مبنى تأمين المركبات في طريق مصر الاسماعيلية

بصوا ده اكاونت مالك على التويتر للمتابعة

واللي عنده مشكلة يتصل بمركز هشام مبارك للقانون

هي المظاهرة دي كانت على ايه؟

عاجل: اطلاق سراح احمد مهنى

حمد الله ع السلااااااااااااامة

احمد مهنى خرج... كان مالك عدلي من مركز هشام مبارك كلمني النهاردة الصبح وقال لي هو اتقبض عليه عشان جوز اخته اخوان

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

كام علامة تعجب كفاية؟

القبض على احمد مهنى

 تحديث 
تحديث: اخر اخبار جات لي ان فيه وقفة الساعة حداشر عند النائب العام بكرة ان شاء الله

مهنى في قسم الاميرية، والقسم بينكر وجوده، والشباب واقفين قدام القسم

-------------
انا عارفة الخبر من الصبح بس كنت طول النهار برة البيت وقلبت بخناقة في نهاية اليوم... المهم احمد مهنى مدير دار نشر دون

عشان اصدر كتاب: البرادعي وحلم الثورة الخضراء

هجموا عليه في الفجر، واخدوا جهازه وتقريبا جهاز باباه حاجة كده، المهم قلبوا لهم البيت، وبقينا مش عارفين هو فين لحد ما خالد علي ومركز هشام مبارك عرفوا انه في مديرية امن الدولة وهم متابعين واي تحديثات ح ابلغكوا بيها

عاجل :- القبض على المدون كريم رضا مطلق دعوة اضراب بتروتريد

التفاصيل هنا

إحالة المدون أحمد مصطفى إلى محاكمة عسكرية بسبب تدوينة

هو فيه ايه؟ احنا محسودين وللا حاجة؟ المدون احمد مصطفى اتحول لمحاكمة عسكرية بسبب تدوينة كاتبها من سنة

طب اشمعنى دلوقت؟ 

التفاصيل هنا في التعليق ده

فصل مدونة تانية من عملها بسبب بوست نشرته

ما انا ستميت مرة قلت لها ما تشتغليش مع رأسماليين سيس... بس هي مديرة مبيعات، ح تشتغل في مصنع الغزل والنسيج يعني؟

فنون، كتب البوست ده، وحطته نوت على الفيس بوك، اتاري صاحب الشركة اللي بتشتغل فيها شافه على الفيس بوك، لان طبعا الاشكال اللي زي المدير ده مش بيدخلوا مدونات، لقاها كاتبة الكلام ده، او بالاحرى اكتشف اساسا انها مدونة وماشية في البطال راح فاصلها من الشغل كده بمنتهى البساطة، انا خايفة بس اكون ليا يد في الموضوع ده عشان اديتها الاختبار ده وطلعت يسار ديمقراطي (معظمنا طلع يسار ديمقراطي ما عدا مواطن مصري طلع رأسمالي سلطوي) وراحت برضه حاطاها على الفيس بوك وقعدت تمتحن صحابها

:)

هو اغلب الظن صاحب الشغل مافهمش ايه ده ولا مين فين؟ هو بس شافها في المربع الاخضر وفاتحة مدونة سودا وبتقول دستور قام قال لك دي اخوان مسلمين

طب ده بقى مش فصل تعسفي؟ هو عشان قطاع خاص من حقه يفصل الناس كده من غير ابداء اسباب؟ ومافيش حقوق عمل خالص بقى؟

ودي لطافة الرأسمالية وظرفها وابداعيتها؟ ان الناس تترفد من شغلها عشان صاحب العمل مش فاهم ايه اللي مكتوب على الاكاونت بتاع الموظف اللي عنده على الفيس بوك؟

بس لما تصحى من النوم اعرف منها اسم الشركة والمدير ونسيح له بقى مدام مافيش قانون يقتص منه
-------
ملحوظة: فنون كانت بتشتغل من غير عقد ولا حاجة، وكانوا مستعبدينها في الشغل، ومش بيدوها على قد مجهودها مع انها
highly qualified
مش عارفة اقولها ازاي، يعني مؤهلاتها احسن من الوظيفة كمان، وشغيلة زي التور في الساقية
كل ده من غير عقد وبفلوس اقل من حقها وكمان تترفد عشان عندها مدونة
ان شاء الله ح ييجي يوم ونطير رقاب الرأسماليين بالجيوتين

هو انا كنت فين لما عمرو علي واحمد ماهر اتقبض عليهم

طب يا جماعة مش تسيبوا لي تعليق وللا تبعتوا لي على التويتر؟

انا لسه عارفة دلوقت حالا من انفيتيشن على الفيس بوك

طب ايه اخبارهم؟ حد عنده اخبار؟ حد راح لهم؟  ثم اتقبض عليهم ليه اساسا؟ حد عنده فكرة بملابسات الموضوع؟

ده انا ح اسود عيشتكوا كلكوا عشان سايبيني اعرف من جروب على الفيس بوك