المنظور السريالي للتخطيط المروري

حضرتك تقدر تشوف كم التنظيم والتنسيق اللي موجود في الشارع المصري هنا

ايه رأيك؟ اظن مافيش بعد كده يا شعب جاحد...انتوا بتكرهوا النظام والقوانين عشان انتوا شعب فقري
دلوقت بقى فيه احترام لاشارات المرور

بل ان اشارات المرور اصبحت زي المسرح التجريبي كده....بتحمل معان عدة لا يمكن باي حال من الاحوال لواحد جاهل زيك انه يفهمها...وده كويس لانه بيستفز عقل المواطن وبيخليه يحاول يشغل مخه ويفهم ما بين الاشارات الحمرا والخضرا ويخرج من مفهوم المرور الضيق والتقليدي لمجالات اوسع وارحب من الابداع المروري
يعيب الشعب المصري انه بيهمل الرياضة، شوفوا في امريكا الناس كلها تصحى الصبح تجري، انتوا بقى قاعدين زي الحطة بطة، عشان كده قانون المرور بيساعد المواطن المصري على تنمية مواهبه الرياضية

بعد خراب بيوت سواقين الميكروباص اللي اغلب الظن انهم كانوا ضمن مؤامرة صهيونية لارخاء عضلات الساق والفخذ بعد ما يوسف والي ارخى عضلات اخرى، فانت دلوقت تقدر عزيزي المواطن تبتدي نشاطك الرياضي في شوارع المحروسة شفتهم في الفيديو؟ لا ده مش يوم القيامة ودول مش رايحين يتحاسبوا
دول عدائين مسافات طويلة

الظاهر والله اعلم قانون المرور بيحب كل الناس اللي فوق

عشان الناس اللي فوق تعيش اعفن الناس لازم يموتوا
ماجدة من فيلم العمر لحظة...بتصرف

يعني يسرا وهشام سليم احسن مني؟

انا كمان زيهم بقيت متخصصة في المرور عشان اليومين دول ورايا مشاوير كتير باخلص ورق
النهاردة في اشارة زحمة كنت فاتحة السبيكر بتاع التليفون وباتكلم قام امين الشوربة وقفني وقال لي ح تدفعي غرامة قلت له انا فاتحة السبيكر قال لي بس ماسكة التليفون بايدك قلت له ما انا ممكن ابقى ماسكة كوباية شاي في ايدي قال لي لا كوباية الشاي مش ح تشغلك زي الموبايل
قلت له: طيب انا ح ادفع الغرامة بس والنبي ترد على سؤالي
قال لي: والله العظيم ح ارد على سؤالك

قلت له: رئيس الجمهورية ورئيس الوزراء بيدفعوا كام غرامة لما بيعدوا في التشريفة ويعطلوا الناس؟
قال لي: اقول لحضرتك...(وركزوا والنبي في الكلام اللي ح يقوله عشان كلام مهم) انا ما اقدرش اقول لرئيس جمهورية انت ليه بتعمل تشريفة وتعطل الناس...اما بالنسبة لرئيس الوزراء فده راجل وراه شغل مهم ولازم يوصل له بسرعة
ههههههههههههههههه
يعني حتى امين الشرطة عارف ان الريس ما وراهوش شغل.... المهم
قلت له: بس رئيس الوزراء بياخد مننا ضرايب عشان يعمل الشغل ده مافيش داعي يعطلني...مش انت بتدفع الضرايب؟
قال لي: انا مش بادفع ضرايب انا باقف تسع ساعات في الشمس المفروض تدفعوا لي انتوا ضرايب
قلت له: ما انت بتدفع ضرايب انت مش عارف؟ وبعدين انت بتقف في الشمس تسع ساعات...انت بيتعمل لك تشريفة
قال لي: بصي يا انسة (طبعا وقعت في غرامه عشان قال لي يا انسة زي ما انتوا عارفين ) بصي يا انسة....احنا مسيرين مش مخيرين...هو حضرتك بتشتغلي فين؟
قلت له: في التلفزيون
قال لي: في التلفزيون وتدفعي غرامة؟ ده انا ممكن اخد الفلوس منك واحطها تحت البنورة للذكرى...لا خلاص بس انت في انهي دور..قلت له في التالت...قال لي: خلاص تبقى تنشري صورتي في التلفزيون..ح ابقى اجيلك..ح تديني كارت؟ وللا ح تفتكريني لما اجيلك
قلت له: لا ح افتكرك
طبعا لو قلت لي اني باشتغل في القناة اللي بتشتغل بدل الوشششششششش كان دفعني الغرامة دوبل

اخيرا وقع في ايدي ظباط التشريفة

والله ما اعرف مين ابن الكلب اللي كان معدي المرة دي بس وقفونا على مطلع كوبري اكتوبر مع اني نزلت من الشغل فور انتهاء الماشت عشان عربيتي بيضا وخفت حد يكسرها لي الدنيا كانت فاضية وعلى المطلع لقيت عسكري وامين شوربة بيوقفونا اول ما طلعنا لقيت ظابط بتلات نجوم وظابط تاني مش عارفة بقى رتبته ايه رحت مطلعة راسي وقلت له: انتوا مش ح ترحمونا من التشريفات دي بقى؟ اللي معدي في التشريفة ده بياخد مرتبه من ضرايبنا...كل يوم متعطلين كده؟
الظابط ابو تلات نجوم فضل يبص لي ويبتسم ابتسامة بلهاء والتاني كان بيبص لي بغيظ ونفسه يضربني والاتنين ما ردوش عليا وانا ما استنيتهمش قلت الكلمتين الواقعين بتوعي دول وانا متنرفزة ورحت طالعة بالعربية
وكل ما ح اشوف ظابط تشريفة ح اقول له كده
بس نسيت اقول لهم اننا بندعي عليهم هم واصحاب التشريفات
ملحوقة ما انا كل يوم متعطلة في تشريفة
الا مين المسئول النشط قوي ده اللي بيروح السيما كل يوم حفلة اتناشر ده؟

بالنسبة للحملة بتاعة واضح

واضح دخل لي بالاقتراح ده
ان الناس ياريت تبقى مؤدبة مع بعضياتها
ييجي واحد يقول لي اتلهي على عينك انت وواضح بتاعك جتكوا نيلة انتوا الاتنين ادب ايه والناس مش لاقية تاكل
اقول له آه، الناس مش لاقية تاكل وعشان كده بتفش غلها في بعض
وطول ما احنا بنفش غلنا في بعض ح يحصل لنا الاتي:
اولا: ح ننفس عن نفسنا ومش ح نحتاج نوجه غضبنا للمسئولين عن حالنا اللي زي الزفت
ثانيا: ح نشيل من بعض...كتير قوي باسمع ناس لما بتتخانق في الشارع بتقول: والله ده شعب يستاهل اللي يجرا له
واحنا مش مصلحتنا نشيل من بعض احنا محتاجين لبعض لاننا غلابة ومحتاجين نسند بعض ما نجيش على بعض زي ما ام زينب بتقول
ثالثا: انا مثلا لما شتمت واحد مالوش ذنب امبارح كان هو جالي في اللحظة اللي عمالة اتخيل قدامي ظابط وعمالة اهزأه بعد ما شتمته اتلهيت في احساسي بالذنب وقابلت كذا ظابط بعد كده وما طلعتش راسي من الشباك وقلت له اللي كنت باحضرهوله يعني الخطة فشلت عشان فشيت غلي في واحد اغلب مني
رابعا: ظلمنا لبعض اللي بيبتدي باننا بنفش غلنا في بعض بيحسسنا بالذنب والتقل ويكسر عينا ويخلينا مش قادرين يبقى لنا عين نطالب بحقوقنا
خامسا: اختيار واضح للمدونات كان اختيار صائب لان مش معقولة الحملة دي تتوجه للي سايقين عربيات اجرة المنطقي انها تتوجه اللي بيسوق عربيات ملاكي وهو اللي بيبقى عنده امكانية للدخول على النت
لو اللي سايقين عربيات ملاكي مؤدبين وعندهم رحمة بالغلابة
بقية الناس ح ترحم بعض
ده مش كلام طبقي ولا حاجة دي تجربة شخصية
انا لما سواق ميكروباص بيشتمني من غير سبب وباقول له حقك عليا بيعتذر لي، ومرة سواق ميكروباص عيط وقال لي ما تزعليش مني يا اختي انا من غلبي حقك على راسي
دي حاجة
الحاجة التانية بقى ان فعلا فعلا اللي سايقين ملاكي قلالات الادب اكتر من الاجرة ومعلش بقى راجعوا نفسكوا شوية ح تلاقوا كلامي صح
الكل بيشتم صح؟
بس الاجرة لما بتطيب خاطره بيتأثر قوي
الملاكي كتير منهم بيقول: وانا اعمل ايه باسفك
بما اني طول النهار بابرم بالعربية - ما تستهونوش بيها هي قسطها ربعميت جنيه على سبع سنين صحيح بس جمل لو بتنطق كانت تفت في وشي - فانا ليا خبرة في شوارع مصر واليكم خبرتي المتواضعة
اخطر مناطق: امبابة الوراق فيصل
احمر سواقة: الهرم عين شمس
اسفل ناس واندلهم: مصر الجديدة المهندسين مدينة نصر وشوية الدقي مش قوي والزمالك بس بصراحة اوسخهم مدينة نصر ومصر الجديدة فاكرين نفسهم ملوك العالم وهم اللي ح يربوا الناس وهم قليلي التربية الصراحة
لو شافوك بتموت في الشارع مش ح يعبروك ويمكن يقولوا لك: يا حمار
اطيب ناس: المنيل، منيل الروضة، الحدايق، سرايا القبة، مصر والسودان جاردن سيتي العباسية وسط البلد
كأنهم من زمن تاني، كأنهم واقفين في الشارع يقولوا: يا رب...يااااااااااااااارب يااااااااااااااااااااااا ررررررررب حد عربيته تعطل عشان نساعده يارب يااااااااااااا رب حد يقع في مشكلة عشان نساعده
احياة حبيبك النبي يا رب ما تضيع علينا الثواب
دي تجربة شخصية مش مبنية على دراسة ولا حاجة بس مبنية على خبرة واحد مش بتقعد في بيتهم
لو حد عنده خبرة تانية يقدر يقولها لنا
وانا موافقة على الحملة دي

شتمت واحد في الشارع وقلت له يابن الجزمة

ومخنوقة ومتضايقة وركبتي واجعاني ودراعي واجعني وبطني وضهري واجعني
مش عشان شتمت وانا بقى البت المؤدبة لا سمح الله، لكن عشان هو ما يستاهلش الشتيمة وكمان ما ردش عليا
الدنيا زحمة الظاهر فيه تشريفة لواحد ابن ستين جزمة قديمة فعلا، وعربيات الشرطة في كل حتة وقاعدة اتحين الفرصة عشان واحد فيهم يقع في ايدي واشتمه واقول له ارحموا دين ابونا من ام التشريفات انتوا وصاحب التشريفة بتقبضوا مرتباتكوا من ضرايبنا الهي تنزل عليكوا سم هاري تحرق بطونكوا يا حرامية يا ولاد الكلب الهي لا تكسبوا ولا تربحوا وتصرفوا ضرايبنا اللي بتضربوها في جيوبكوا وتستعبدونا بيها على المرض الهي ينتقم منكوا انتقام عزيز مقتدر دنيا واخرة ولا تشوفوا يوم حلو في حياتكوا الهي يوقف لكوا المراكب السايرة وينكد عليكوا يا بعدا زي ما انتوا معكرين علينا عيشتنا ومصعبين حياتنا ليل نهار...وانا قاعدة احضر وصلة الردح دي، واحد سايق نص نقل يا حبيبي قال عايز يعمل غرزة في ام الزحمة دي وانا جنبه والعربية اللي قدامي بيني وبينها شبرين وهو عايز يعمل غرزة في الشبرين دول ازاي ما اعرفش واديله كلاكس مافيش وبعدين لقى ان الامر مستحيل خصوصا اني كبست عليه وهو كابس عليا لدرجة اني اترعبت من الرعب طلعت راسي من الشباك وقلت له يا ابن الجزمة الراجل بص لي بصة تقطع القلب وما ردش عليا
يا ريته رد عليا
يا ريته رد عليا وسب لي ميت دين وميتين عشان ما احسش بالذنب ده كله طول ما انا ماشية بعد كده عمالة استغفر واعيط وصوابع رجليا بتترعش وركبتي بتنغز ودراعي واقف وبطني بتكركب وضهري قافش
- اه انا لما باتضايق دي الاعراض اللي بتظهر عليا- ومافيش حاجة مضايقاني غير انه ماردش عليا
طب اعمل ايه انا دلوقت؟ ربنا يغفر لي ويغفر له، يارب يجيله عربية بي ام دبليو وفلوس كتير بالحلال ويفرح ويتهنى بقية عمره وما يتضايقش ابدا طول حياته يا رب امين والنبي يارب
ويخرب بيت اللي عصبني وخلاني اشتم واحد مالوش ذنب

مين الوغد الواطي الرمة الحقير الزبالة الوسخ اللي يشيل ويحط عليه اللي كان عنده تشريفة دلوقت؟

ده غير ماسورة شارع العروبة، ابن الكلب، ايا كان، والله العظيم ما عارفة مين هو، بس واحد وسخ وخلاص، وسخ وابن وسخة كمان عشان يوقف ميدان التحرير وميدان رمسيس وميدان عبد المنعم رياض اللي كان مليان عربيات اسعاف والكوبري فوقينا شايفينه ماشي صواريخ عشان ابن الكلب - ايا كان - يعني
حسبنا الله ونعم الوكيل
حار ونار في جتة امه مرتبه اللي بياخده من ضرايبنا
يارب يجيليه دمامل في مناخيره من جوة
يارب الحساسية اللي في عيني اللي جات لي من التلوث واللي بتزيد في الصيف وبتحول نظري الى شيش بيش في الزحمة تروح على عينينه الاتنين
انا من كتر العادم اللي دخل في عيني ابتديت احس بشكة الدمل اللي ح يبتدي يتكون في عيني وح ارجع تاني اجيب قطرة انتي بايوتك
يارب ينتقم منه
يارب ينتقم منه
يارب ينتقم منه

حملة الدعاء على اصحاب التشريفات

حضراتكوا اكيد بتخرجوا في الشارع زي اي انسان طبيعي ما بيخرج في الشارع، واكيد بيبقى وراكوا مواعيد زي ما اي كائن حي بيبقى وراه مواعيد، السؤال اللي بيطرح نفسه على ترابيزة السفرة: هل بتوصلوا في معادكوا؟
اقصد لما بيبقى فيه تشريفة بتوصل في معادك؟ الاجابة طبعا لا واللي ح يقول اه ح اضربه بالقلم على وشه، طيب هل حضرتك او حضرتي عندنا قوائم بمواعيد التشريفات عشان اليوم اللي يبقى فيه تشريفة ننزل بدري شوية او نأجل المعاد او نشرب سم فيران ونخلص من حياتنا؟ على رأي راقية براهين بالطبع لأ واكيد حضرتك بتقف، لامؤاخذة، زي الكلب والباشا الظابط معطلك والدوق معدي بتشريفته وعادة الدوق بيبقى جاي من مدينة اكتوبر رايح مصر الجديدة او جاي من مصر الجديدة رايح العاشر من رمضان او امبابة او العجوزة المهم انه لازم يجيب اول الكوبري لاخره وانت تقف زي الكلب، مافيش حاجة يا كابتن ما تزعلش كده كلنا كلاب

طب ايدك معايا يا كابتن انت وهو ولو راسك متغطية بكوفيرتة وللا حاجة اكشفها وادعي معايا: الهي وانت جاهي يا اصحاب التشريفات يوقف لكوا المراكب السايرة، الهي لا تكسبوا ولا تربحوا قادر يا كريم، يخصم من رصيدكوا في البنوك ومناصبكوا وصفقاتكوا على قد ما بيتخصم للموظفين بسبب العطلة على الكوبري، الهي كل مشوار تخرجوا فيه وتوقفوا حال الناس يبقى اوله نكد واوسط غم واخر خسارة بالمليارات، الهي يقلق منامكوا زي ما بتضيعوا وقتنا ولا تناموا ليل ولا نهار، قادر يضيع عليكوا صفقات بيع البلد زي ما بتضيعوا عمرنا في الاشارات، الهي الكاربيراتيرات بتاعة العربيات كلها تتخرم وتجيب بنزين وتتزحلقوا من فوق الكوبري، الهي يرزقكوا بمفصلة مدببة على الكوبري تفرقع عجلة العربية ام اتنين مليون قادر يحرق دمكوا بجاز وسخ زي ما بتحرقوا دمنا واحنا ملطوعين، الهي تفرقع في وشكوا ازازة كوكاكولا وغطاها يلبس في عنيكوا زي ما بنفرقع في وش بعض وبنلبس في بعض من الغل اللي مش عارفين نفشه فين، يا رب يا ربنا تطلعوا برة مناصبكوا وتتلطعوا زي الكلاب معانا في تشريفة جربوع تاني يزنقكوا ويسخن العربية ويعصب السواقين
ربنا يبتليكوا بسواق ميكروباص اضبش يدخل في العربية المصفحة ويعجنها لكوا، يا رب امريكا تقلب عليكوا وتعطل لكوا سفرياتكوا، الهي وانتوا راكبين الطيارة ورايحين امريكا تقبضوا المعلوم الطيارة تعطل في نص السكة وتفضلوا متشعلقين في الهوا
ينكد عليكوا بحق كل اسعاف مات فيها مريض، يسود عيشتكوا بحق كل موظف اتحسب له تأخير، يطربقها على دماغكوا بحق كل واحد خطيبته فسخت خطوبتها عشان لطعها، الهي يوقف لكوا كل ماشي في حياتكوا وينيم لكوا كل واقف ولا صيدليات الدنيا ومستشفياتها تنجيكوا
قادر يا كريم
---
سيبكوا بقى من الدعاء لغزة، غزة وللا فلسطين وللا العرب كلهم مش عايزين دعوات دول عايزين رجالة وعندهم مخ وللاسف الصنف ده شاحح من السوق ولما بيبقى فيه مخ اوبشن الرجالة بيبقى عطلان ولما بيبقى فيه رجالة بروجرام المخ بيبقى ما نزلش على الهارد ديسك اصلا والاغلبية لا ده ولا ده ومش حلها الدعا

دلوقت احنا فعلا محتاجين حملة دعاء على اصحاب التشريفات لان فعلا مافيش في ايدنا حاجة نعملها مافيش غير ان ربنا يستجيب دعواتنا على كل صاحب تشريفة انشالله واحد بس قوم يبقى عبرة لمن يعتبر ومن لا يعتبر
انا معوقة بانرات يا ريت حد يتطوع من المتضررين من التشريفات ويعمل لنا بانر للحملة دي