انسانية كاميليا شحاتة!

طبعا احنا سيبنا اشغالنا، واعمالنا، وحالنا ومحتالنا، واللي ورانا، وبنتكلم عن كاميليا شحاتة دلوقت حاليا، وعايز اختي، وانت فين يا خالتي؟ واللي يتجوز امي اقوله يا عمي

مش ورانا حاجة غيرها

وامبارح كان فيه مظاهرة عند الكاتدرائية، سألتهم: هم انتوا مسيحيين ولا سلفيين احسن بقيت اتلخبط.. فضحكوا

لما ضحكوا بقى عرفت انهم مسيحيين

طب واقفين ليه؟

اصل السلفيين شتموا البابا بشتايم وحشة الاسبوع اللي فات

فقلت لهم وانتوا داخلين لبعض مظاهرات من الاسبوع للاسبوع؟ فضحكوا تاني... انت جاي تتظاهر ولا جاي تهرج؟ 

لا.. انت جاي تهرج، عشان هم شكلهم كده قالوا لهم اتظاهروا، هم مش بيتظاهروا من معاميق قلبهم، زي ايام ماسبيرو كده لما كنت باروح لهم اقولهم المظاهرة دي طائفية، قوم يقولوا لي: والله معاكي حق، المفروض نروح التحرير ونتظاهر مسلم ومسيحي، عموما، كلمي ابونا عشان ياخدنا! 

بس الشهادة لله.. المظاهرات دي مجرد ردود افعال

هيييييه... والله وجه اليوم على السلفيين اللي بقوا بيتكلموا فيه بكلام كفري والعياذ بالله.. زي انهم مثلا يقولوا: دي قضية حرية عقيدة.. دي قضية سيادة قانون.. دي قضية حقوق انسان

الله الله الله يا عبد الله... جامد قوي الكلام ده، وشكلكم قمر وانتوا بتقولوا الكلام ده

همممم.. ولو ان مافيش اي دليل مادي واحد انها قضية حرية عقيدة، أو حقوق انسان، أو سيادة قانون، لأن القانون مافيهوش ابو يحيى

وولو ان النيابة نفسها تجاوزت القانون لما خاطبت الكنيسة عشان تجيب لها مواطنة، مع ان المفروض ده دور الشرطة، والكنيسة غير ذات صفة، ولو ان فيه تناقض ما بين موقف النيابة نفسها، وموقف المطالبين بسيادة القانون، والكلام عن ضرورة ان الكنيسة في حد ذاتها ما تدخلش وفي نفس الوقت يخاطبوها كأنها جهة ذات صفة عشان تجيب لهم مواطنة، وانا مش فاهمة على اي اساس الكنيسة تجيب لهم المواطنة دي، ماهو يا الشرطة تروح تجيب كاميليا بنفسها عشان تمثل قدام النيابة، يا النيابة توجه اتهام للانبا اغابيوس بانه اختطف كاميليا والشرطة تروح تقبض عليه.. يعني ايه الكنيسة تسلم اي حد؟ هي مالها؟ ده في قانون ايه؟ ما هو يا الكنيسة متهمة، وفي الحالة دي مافيش حاجة اسمها الكنيسة متهمة، فيه افراد بيعملوا في الكنيسة متهمين ولازم يتقبض عليهم من قبل الشرطة، يا الكنيسة كنيسة وبس مش شغلتها تسلم ناس، هي ايه صفتها تسلم وتستلم؟ 

بس حنمشي قضية كاميليا قضية انسانية وحرية عقيدة وسيادة قانون.. كده بدون ادلة غير شهادة ابو يحيى

وانا مستعدة انضم لحملة كاميليا سيدة العصر والاوان... بس عشان تبقى قضية انسانية بقى فيه شروط:

1- الاخوة اللي راحوا يروعوا الناس قدام دار عبادتهم ويتظاهروا قدام جهة ليست ذات صفة مع ان القضية في ايد النيابة عايزة اشوفهم بيتظاهروا قدام سجن طرة للافراج عن المقبوض عليهم في قضايا "التشيع". اييييووون.. اييييوووووننن... ايه؟ هو التشيع ده مش حرية عقيدة برضه؟ يعني ايه يتقبض على ناس بتهمة التشيع مش فاهمة يعني؟ مافيش في القانون المصري تهمة اسمها التشيع، ومع ذلك، فيه ناس كتير اتقبض عليها بتهمة "التشيع". 

2- هم هم نفس الاخوة الاربعتلاف واحد اللي جم باتوبيسات سياحية يروعوا الناس قدام دار عبادتهم ويقولوا على البابا شنودة نجس... عايزة اشوفهم بيروحوا يتظاهروا قدام مجلس الدولة عشان يطالبوا بحق البهائيين في انهم يتكتبوا في البطاقة: بهائي. مش: --.. كأنه لفظ قبيح. وقالك يتكتبوا شرطة عشان احنا "مش معترفين بيهم". يعني ايه مش معترفين بيهم مش فاهمة؟ نمتوا مع الشغالة في الحرام وحملت خلفت بهائي؟ طب نعمل دي ان ايه. قالوا: لا.. اصل لو اعترفنا بيهم (اسمعوا بقى بتوع الانسانية) حيطلبوا معبد يصلوا فيه، ويمكن يطلبوا ان عيالهم في المدرسة ياخدوا دروس دين بهائية وما يحضروش مع المسلمين والمسيحيين! سامعين بتوع الانسانية وحرية العقيدة وسيادة القانون بيقولوا ايه؟ حق ان الانسان ياخد اودة يصلي فيها ويعلم ابنه ديانته... ده حق، مش مكرمة من سيادتكم، ومش مستني سيادتكم "تعترفوا" بيهم. هم بني ادمين، ولهم وجود، ومكونين من خلايا ولحم ودم، ومعتقدين في اعتقاد معين، والاعتقاد ده حقهم يتكتب في البوطاقة عدم اللا مؤاغزة، ولو عايزين مكان يصلوا فيه من حقهم، ولو عايزين يعلموا ولادهم ديانتهم من حقهم. وحكاية ان عددهم الفين واحد دي حاجة تحرق الدم فعلا.. لأن عدد كاميليا: 1 فرد. ولو اضفنا عليها الاخت تريزة والاخت وفاء بقوا: عدد 3 مزز. 

3- هم هم نفس الاخوة الاربعتلاف واحد ياخدوا بعضهم على مشايخ السلفية ويتظاهروا قدام بيوتهم ويطالبوهم بالاعتذار عن فتاويهم ايام الحرب على لبنان سنة 2006 لما قالوا على الاطفال الرضع اللي كانوا بيموتوا في جنوب لبنان "روافض" وحرام تدعوا لهم عشان "حزب الشيطان" و"حسن نصر اللات" اخطر على الامة من اسرائيل. اهي دي بقى لا حرية عقيدة، ولا سيادة قانون، دي ارواح.. ارواح اطفال وستات وناس بريئة، وهان عليهم يقولوا عليهم روافض، وهان عليهم يكرهوا الناس فيهم وهم بيموتوا، وهان عليهم يحرموا على الناس حتى الدعاء لهم بالنصر ومنظر الطفل الرضيع اللي راسه طايرة بيتذاع على كل القنوات. 

4- هم هم نفس الاخوة الاربعتلاف واحد ياخدوا بعضهم ويتظاهروا تاني قدام مجلس الدولة عشان كاميليا برضه، بس كاميليا أم اندرو وماريو اللي قلبها اتحرق وولادها اتخطفوا منها بحكم المحكمة، وفوق ده كله اتجبروا على ديانة هم مش عايزينها، وعلى العيشة مع راجل بيكرهوه، والقاضي قال في حيثيات الحكم "لأن الاسلام هو الدين الافضل"! 

5- هم ذات نفس الاربعتلاف واحد دولم، يشرخوا على الصعيد ويعملوا مظاهرة عشان اللي قطعوا ودن الواد يتحاكموا، واظن القضية دي اولى، لأن قضية كاميليا قدام النيابة، وقضية سلوى مقبوض على اللي قتلوها، لكن المقطوع ودنه اللي عملوا فيه العملة دي ما اتقبضش عليهم

في هاذوها الحالة

انا مدينة لفرقة كاميليا للانشاد الديني بالاعتذار، وابقى فعلا اسأت فهمهم، ويبقوا فعلا بيسعوا لدولة قانون وعدالة ومساواة، وبيستخدموا قضية كاميليا لتطبيق سيادة القانون، وحانزل اركب معاهم الاتوبيس السياحي والف معاهم على الشوارع وانام فيها كمان، انا اصلا باحب نومة الشارع

اما اذا تحججت فرقة كاميليا للانشاد الديني بان الروافض اخطر على الامة من اسرائيل، والبهائيين مؤامرة ماسونية، وفعلا الدين الاسلامي هو الدين الافضل، وايه يعني دي حتة ودن؟ 

يبقى حماسهم لقضية كاميليا - اللي تاني مافيش اي ادلة على ادعاءاتهم فيها الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية

واظن هم هم نفس الناس دي بنفسهم حكموا على اصحاب القضايا الطائفية لما قالوا ان ثورة البحرين انها ثورة طائفية، وبناء عليه، فيحل لملك البحرين انه يقتلهم، ويحط جرحاهم في التلاجات، وبعد ما يستنفد كل طاقة جيشه وشرطته، يستدعي لهم قوات اجنبية تدخل تضربهم... ويستاهلوا، اصل مظاهراتهم مظاهرات طائفية

حكمتم بنفسكم على نفسكم.... بالشفا

ومن اولويات الامة

اللحية فرض زي الصلاة، بس الصلاة فرض كبير واللحية فرض صغير

ياترى فيه فرض وسطاني؟


ده كمية الفيديوهات اللي على اللحية خرافية، جيت ادور بقى على فيديوهات عن الحاكم الظالم مثلا
ما لقتش اي فيديوهات لمحمد حسان ولا الحويني ولا محمد حسين يعقوب خالص بخصوص الحاكم، لا ظالم ولا عادل
بس لقيت الفيديو ده



ونبذ بيعتهم والعياذ بالله.. حد من المحيط للخليج يقول لي امتى بايع اي حاكم عشان ينبذها


طب بقى لو الحاكم قال لهم يحلقوا دقنهم حيعملوا ايه؟ لا يجوز نبذ بيعة الحاكم والعياذ بالله


جيت بقى ادور على امريكا لقيت: نوارد الشيخ محمد حسان في امريكا
لا ناس بتبذل مجهود مجهود الحقيقة.. مش عارفة الناس حتعمل من غيرهم ايه فعلا، وحقيقي كلامهم ونوادرهم واهتماماتهم تستاهل اننا نحرق النصارى ونكفر الروافض ونبدع الصوفية واوعى رجلك ومولد النبي



ومش عارفة جاب منين ان كلمة بدعة على طول غلط مع ان سيدنا عمر قال على اقامة التراويح في الجامع نعم البدعة

ونشتم البرادعي كمان اخر الاغبار البرادعي طلع حبشتكنات.. انا مش مغرمة بالبرادعي ولا حاجة، ده انا حتى غيرت فستان الفرح، بس هم عملوا ايه قبل ما يشتموا الناس ويقولوا عليهم ملحدين وكفار وعملاء؟ وكتاب الله ما فهمت بيقولوا ايه؟ افتكرت خطبة اللمبي في السجن قدام لجنة حقوق الانسان

مع ان البرادعي ماهوبش ناحية المادة التانية.. سبحان الله، وخالد عبد الله بيقول الناس بتقول الشيوخ جبنا.. ههههههههههه يعني عارف احنا بنقول عليهم ايه؟ طب ايه؟ ساكتين ليه؟ ده افضل الجهاد كلمة حق عند سلطان جائر، وبعدين البرادعي وحش وبيهدد الاسلام
ومبارك هو اللي بيحمي الاسلام؟ ما سمعناش صوتهم يعني
اااااااااااه ده انا نسيت، ما ينفعش ننقض بيعتنا - والعياذ بالله - مع مبارك اللي عمرها ما حصلت
وقال لك بقى المعارضة كلها بتاخد فلوس من امريكا وعشان كده احنا مش بنعرف نعارض.. طب ما امريكا كده تشجعهم باي حاجة
يعني انا دلوقت اعمل ايه يعني عشان ابقى مسلمة لما الاسلام كله تربية لحية.. ما عنديش انا لحية دلوقت اعمل ايه؟
ومازلنا في انتظار البلطجية وسأستمر في تنسيل الشبشب على دماغهم لحد ما يتأدبوا ويعرفوا يكلموا الناس ازاي، ومش حيقطعوا لساني عن فضحهم الا اذا قتلوني بقى

دوري على شمشون يا دليلة

اصل انا الشاحن بتاع اللاب توب بتاعي كان بيفصل، وكنت ح اشتري شاحن جديد من راديو شاكر بس مالك مصطفى لحقني وانقذني، كالعادة، وكالعادة من غير ما اسأله ولا اطلب منه لوحده بيشم ان عندي مشكلة ويقب يحلها ويرجع يختفي تاني، اصله بعيد عنكوا ما بيعرفنيش غير عشان مصلحتي، الناس بقت وحشة قوي يا اخي، وبعتني لشمشون، في سوق العصر في الخليفة المأمون، الدور التاني، عموما اول ما تدخل سوق العصر وتقول شمشون ح يدلوك عليه واضح انه ذائع الصيط، واتعامل بجدية شديدة وصلح لي الشاحن واديني باكلمكوا من خلاله اهو

دي اول حاجة كويسة حصلت، تاني حاجة كويسة ان ايليا سليمان ادانا كلاس ساعتين وكان عثل عثل عثل، انا حبيته خلاص وبقيت كل ما يعدي قدامي ابص له زي المراهكات لما يبصوا لانور وجدي.... اه، انا يادوب من ايام مراهكات انور وجدي، بابربش

الحاجة التالتة الكويسة اني اخيرا اشتريت اللي كان نفسي فيه، بس مش ح اقول هو ايه، ده سر لحد ما اتمكن منه

الحاجة الرابعة اني اتفرجت على فيلم الزمن الباقي تاني، ولنا هنا وقفة، اولا كان قاعد جنبي ستتين كبار كده، ما اعرفش مين اللي شار عليهم ييجوا الفيلم ده؟ قعدوا طول الفيلم جنبي يقولوا: هو مش بيتكلم ليه؟ هم ح يتكلموا امتى؟ هو الممثل مش بيتكلم خالص ليه؟ يارب يتكلم بقى.. حاجة غريبة انه مش بيتكلم، طب يا ترى ايه سبب انه مش بيتكلم، ح يتكلم اهو، لا ما اتكلمش، طب ح يتكلم؟ وللا ايه؟ وللا مش ناوي يتكلم، ده اتكلم اهو، يوه، هو كده بس؟ دي جملة، الله، طب ما يتكلم

وعلى الناحية التانية كان قاعد واحد الظاهر كان داخل فيلم امير البحار ودخل الصالة دي غلط كان بيضحك كده: نياهيييق ايييييييييهههههه نياهييييق هيق هيق هيييييييق من غير مبربر واضح غير انه اهبل وابن هابلة 

بس شفت حسن حامد، كان واحشني قوي، وقلت له اني لسة باغني في الشغل، وشفت احمد غربية وكان باين عليه اثار العدوان من ضحك الواد الاهبل بعد الفيلم ولو كان استمرت حالة النهيق دي خمس دقايق كمان كان احمد غربية ح يقوم يصرخ اكتر من نادية الجندي في افلام الجاسوسية... كان بقالي كتير ما شفتوش

الحاجة السارة ال... كام دي؟

الكذا يعني اني لقيت فيلم اجورا على التورنت واللي عايز ترجمة يدور ويقول لي لقاها فين، انا لسة بانزله مش عارفة بقى ساعات الترجمة بتبقى متحملة اصلا، عموما لو مش متحملة ياريت حد بقى يدور على سابتايتل، انا مش باعرف اسباني :) ولقيت كمان فيلم يد الهية بتاع ايليا سليمان اهو على التورنت برضه

وبهاذوها المناسبة، انا مغيبة تماما عن الكون مما ساعدني في اجتياز مرحلة الاكتئاب بنجاح، ايه بقى اللي حاصل في الدنيا اليومين دولم؟ غير موضوع نصر حامد ابو زيد ده اللي الكويت مش عايزة تدخله قاموا اتخانقوا معاها وهزأوها عشان مش عايزة تدخل واحد اصلا بلده ادانته وفرقته عن مراته بحكم قضائي واحنا من الاساس رفضنا قبل كده ندخل نائب في البرلمان الكويتي من غير ابداء اسباب! مع ان النائب الكويتي بقى ممثل عن الشعب الكويتي فعلا لان عندهم انتخابات حرة وعليها اقبال كبير ومعاهم فلوس ماحدش بيشتري الاصوات هناك، ووالله لو كانوا دخلوا نصر ابو زيد كان طلع ناس تانية يقولوا الكويت بتتحدى القضاء المصري النزيه الشامخ وبتدخل بلدها واحد مدان قضائيا، ولما ما دخلوهوش في بلدهم اللي هم احرار فيها ومع ابداء الاسباب وبناء على طلب الجماهير كمان بيتهزأوا برضه، وح يتهزأوا في كل الاحوال، واي حد من اللي حوالينا ح يتهزأ بقى عشان نبقى على نور، احنا فاضيين لا شغلة ولا مشغلة وقاعدين زي الولية العجوزة المجنونة في الشباك نسب بالاب والام للي رايح واللي جاي، مع اننا لما منعنا الطبطبائي من دخول مصر من غير ابداء اسباب واحدة من عدوينه في الكويت قالت: مصر حرة مستقلة وعلى كيفها تمنع وتدخل اللي هي عايزاه، وانا باقول للانسة دي بوصفي مصرية اصيلة ابنة الكشري والفول والطعمية ان لو الموقف معكوس ونائب من الحزب الوطني اللي بينجحوا بالوجبات والخمسة جنيه المقسومة نصين اتمنع من دخول الكويت ومن غير ابداء اسباب كمان وبعد ما اتوجت له دعوة كان اعداءه قبل اولياءه هنا في مصر ح يساندوه ويهللوا على كرامة مصر اللي اتهانت باهانة عضو برلمان مصري، وبصراحة في دي ح يبقى معاهم حق، لان من حق نائب عن الشعب، ولو اسما، انه يعرف بيتمنع من دخول بلد معينة ليه؟ لانه مدعو بصفته ممثل لشعب مش لنفسه، لما يبقى يطلع من البرلمان ويمثل نفسه هم احرار يمنعوه من غير سبب، مش شطارة منها يعني انها تشمت في ممثل شعبها في البرلمان لمجرد خلاف سياسي بينها وبينه، دي قلة اصل منها، واحنا بقى العكس المتطرف، لو مبيض محارة اتمنع ح نرقع بالصوت زي الاخوة المثقفين ما بيرقعوا بالصوت على نصر حامد ابو زيد

انما يتحسدوا يعني، ماحدش جاب سيرة ياما اكلناكوا وشربناكوا والمدرسين والكراريس (مسطرة عربي وانجليزي وكراريس حساب مربعات وكراريس رسم من ام ورق فاخر) والبرايات والاساتيك الكبيرة من ام ريحة اللي كنا بنبعتها لكوا وما تمرش فيكوا، وللا جابوا سيرة وانا ما شفتش؟ اصل مش معقولة يفوتوا فرصة ذهبية زي دي، اكيد فيه حد جاب السيرة دي، ده كان يوم اسود يوم ما العرب عرفونا وللا قبلوا منا خيط في ابرة، بعد كده لو ح يموتوا من العطش ح يشربوا بولهم ولا انهم يشربوا من حنفية سبيل عاملها واحد مصري، ده احنا فضحناهم، ده لو عزمناهم على الغدا ح يحطوا لنا تمن الغدوة تحت الطبق عشان ما يجيش يوم ونقول لهم ياللي غديناكوا وحطينا لكوا نص فرخة عتاقي في الطبق وكانت معمولة بالحبهان وورق اللوري سفتها كلها يا عب عال وما سبتليش ورك

اما عجايب والله، بلدهم وهم احرار فيها، يوقع محفظته مطرح ماهو عايز، يعني احنا لينا عين بعد ما طردنا النائب بتاعهم نقول لهم ما دخلتوش الراجل اللي احنا اصلا طاردينه من عندنا ومالوش اي صفة ولا حيثية في بلده ليه؟ لمجرد انه معاه جنسية مصري؟ اهو، احنا نطلع تلاتيه ونخرب بيته ونطلقه من مراته ونكفره ونهججه من بلده ونطلع عينه وانتوا تشيلوه على راسكوا يا كلاب، وان كان عاجبكوا؟ ايه البلطجة دي؟

المهم يعني، انا مش عارفة اي حاجة بتحصل غير الموضوع ده، وان اية الله منتظري الله يرحمه مات، والايرانيين ح يعملوا مظاهرة عشان مات، دي عالم فاضية باينها، ح يتظاهروا ضد عزرائيل يعني؟ لا بجد مايصين قوي وبيدلعوا بزيادة يعني، ده ولا حتى ماتش، ولا حتى بنطلون اتقلع لمخمل باف ده واحد مات، امر الله يعني ح نعمل ايه؟ ايه المرعة اللي هم فيها دي؟ حالهم مايل قوي راخرين، اذا كنا احنا عاملين زي البت البايظة اللي مش فالحة وعيارها فلت، هم عاملين زي البت اللي ابوها لوا بوليس ومفهمها انها احلى واذكى واشطر واحدة في الدنيا عشان طالعة الاولى على طول وغير شطارتها في الدراسة ما بيخليهاش تعمل حاجة ابدا ولا بيحملها اي مسئولية ولما المدرسة تقول لها خطك وحش تجيب ابوها يشتكي المدرسة في المنطقة التعليمية وعشان لوا يرفد المدرسة، وللا انا بقيت كارهة للبشر ومش طايقة حد؟ انا خليني في السيما احسن  

خلاص بقى.. خدوهم على قد عقلهم

والله ما باقول كده عشان انا مصرية، انا بقالي فترة باحاول اطلع نفسي واتعامل على اني سنغالية مع الموضوع عشان ما اظلمش حد. بس من خلال متابعتي للاعلام المصري باقول للعرب، خلاص بقى، خدوهم على عقلهم، والله. خلاص.
مالكوش دعوة بيا انا سنغالية دلوقت. المصريين زعلانين. مكبرينها، مزودينها، متجننين، ماشي، الرحمة بقى. ارحموهم. اتفرجت النهاردة على العاشرة مساء، على الاقل لانه البرنامج الوحيد اللي مافيهوش شتيمة وضرب بالجزم وخوض في اعراض الناس وتحقير للجزائريين والصراخ الهيستيري بكرامة مصر اللي ظهرت فجأتن زي عفريت العلبة. بس الحلقة كانت بعنوان: لماذا يكرهوننا؟
خلاص.. انا عارفة ده جنان رسمي، مافيش حد بيذنب الدول المحيطة بيه ويحط افتراض ويحاكمهم على اساس الافتراض ده وكمان يدافع عن نفسه ويحس انه ضحية غير اتنين، امريكا ومصر.
الاعلام الامريكي عمل كده عشان يوجد مبررات للحرب على العرب والمسلمين ويقنع الناس ان المسلمين بيكرهوهم فيستاهلوا يموتوا. ده مبرر معقول، يعني اقصد الواحد يبقى فاهم هم بيعملوا كده ليه؟
لكن ليه المصريين بيعملوا كده؟ انا عارفة، بس خلاص، حرام بقى، قولوا لهم احنا بنحبكوا. اكيد يعني مصر مش عايزة تستعمر حد، هم بس تعبانين، مرهقين، حاسين بالضعف، الجيل ده من المصريين جيل ضاربه السلك، وان شاء الله الاجيال اللي جاية ح تعمل بيبي تقيلة على قبورنا، والموضوع مالوش علاقة خالص بمصر، مصر مش مجرد جيل فاشل في مطلع قرن مليان ظلم في كل الكرة الارضية، بقالها كتير، وح ييجي ان شاء الله اجيال تانية واكيد ح تبقى اوضاعهم احسن، اصل مافيش اوسخ من كده بصراحة، ح يحتقرونا صحيح ويقولوا الحمد لله ان الجيل ده غار في داهية، بس خلاص تعاملوا بقى. والله هم مش اشرار، مش اشرار قوي يعني، هو كل انسان جواه طاقة شر، ومع الفشل والمعاناة والاحساس بانه اوحش جيل مر على تاريخ مصر، بيتصرف تصرفات هوجاء.
يعني نفس الجيل ده اللي عامل عزا لكرامة مصر، هو الجيل اللي بيقعد يشتم في تاريخ مصر، هم هم يعني، بيقولوا على نفسهم مصريين ويقولوا مصر دي عمرها ما شافت يوم عدل وطول عمر المصريين عبيد. واي واحد بيفك الخط عارف ان ده كلام فارغ، بس هو الجيل ده من المواطنين حاسس بالفشل، وبصراحة حاسس انه عار على البلد دي وعلى تاريخها، انا واحد قالها لي بالمفتشر: احنا مشكلتنا ان لنا تاريخ. عارف كده لما يبقى ابوك دكتور مخ واعصاب وامك عالمة ذرة وانت ساقط تانية ابتدائي بعد ما عدتها سبع مرات؟ احساسه انه خريج تانية ابتدائي يخليه يقول لابوه: ايه يعني دكتور انت يعني؟ طب ده انا باعمل فلوس اكتر منك، بس ح يروح لابن عمه وح يقرفه بقى، انا ابويا دكتور، انا امي عالمة ذرة، المفروض، رحمة بيه يقول له وماله؟ انت سيد الناس وابن اصول، ما يكبسوش ويقول له ما تسكت بقى يا ساقط تانية ابتدائي، وللا يعمل زي الفلسطينيين اللي مصممين اننا نرجع المدرسة عشان عندهم امل اننا نذاكر وننجح وناخد الدكتوراه كمان، وما تقعدوش بقى تخنقوهم وتقولوا لهم لو انتوا بقيتوا كويسين احنا كلنا ح نبقى كويسين عشان ح تسمعوا كلام وحش، مش عشان الجيل ده بديل وقرون، بس عشان ده كلام فوق طاقته، اصبروا على رزقكوا، ح ييجي جيل كويس، ادي البلد قاعدة ح تروح فين يعني؟ ح تغرق؟ اهو تبقوا استريحتوا واحنا متنا واستريحنا.
فخلاص بقى، خلاص، ارحموهم، بالراحة، اعملوا معاهم زي عم مدبولي ما كان بيعمل مع قناوي في اخر فيلم باب الحديد، او زي ما فؤاد المهندس كان بيغني للسفاح ماما زمانها جاية. مش عايزين مشاكل الله يخليكوا، لحد ما الغمة دي تنزاح، هو الجيل ده ح يفضل عايش الى الابد؟
يعني يرضيكوا ومصر مبتلاه بالجيل الضعيف ده تقع فريسة في ايد اسرائيل ونتعزل وييجي اللي بعدنا يلاقوها عكة يقعدوا ميت سنة يصلحوا فيها؟ الناس لبعضيها، هم عايزين كلمتين حلوين، عندهم نقص حنان وعايزين حد يقول لهم: باحبكوا باحبكوا باحبكوا. ما تعملوا لهم اللي هم عايزينه ده الكلمة الطيبة صدقة، لحد بس ما الواد ساقط تانية ابتدائي يخلف عيل يمكن يفلح في المدارس وياخد الدكتوراه اللي انتوا عايزينها.
بلاش سلخ وتريقة والنبي، الكترة تغلب الشجاعة، فما بال مافيش شجاعة؟ وما تزعلوش، ما تزعلوش والنبي من قلة الادب دي، ده واد ساقط تانية ابتدائي هايف وكل ما ح تقول له يا فاشل ح يرد عليك ويقول لك: انت بتهين الدهاشنة؟ وماحدش بيهين الدهاشنة غير هبله، وقعدته مع العيال الصيع في وسط السكة يلعب معاهم بلي ويركب الزقازيق في المولد ويتخانق مع عبيط القرية ويعمل عقله بعقل عيل قد عياله شاط الكورة وجات في الازاز. وعلى رأي منى الشاذلي: الرد على جريدة الشروق ده زي واحد كاتب نوت على الفيس بوك يقوم رئيس الوزرا يخش ويتخانق معاه، معلش، بكرة تروق وتحلا، هو ح يموت وح تفضل الدهاشنة، من هنا لحد ما يموت طبطبوا عليه وادوله نبوت الغفير وقولوا له: احنا بنحبك يا بهلول، وقال على رأي المثل عمر الضفر ما يبقى مية والدم ما يطلعش من الكم.
وكلمة لاخوتي المواطنين، احنا جيل عار على البلد دي، يعني خسارة في جتتنا مصر الحقيقة، بس اهو نصيبها، من هنا لحد ما نموت والبلد دي ربنا يعافيها مننا ويجيب لها جيل محترم (وح ييجي جيل محترم بس نطلع منها احنا وما نحاولش نهبب اي حاجة عشان بنعك) نتنيل ونسكت ونبطل جر شكل في الناس، احنا بالصلاة ع النبي في ظرف خمس ايام اشترينا عداوة كل العرب، وكسبنا احتقار عالمي تاريخي عمره ما حصل في عيلة الدهاشنة، ده احنا في عز العدوان الثلاثي والعالم كله بيشتمنا وبيقول علينا شيوعيين عمر ماحد احتقرنا الاحتقار ده كله، كانوا بيكرهونا بس بيحترمونا، انما بعد انجازاتنا وتظاهراتنا الشعبية حتى مجلة التايمز مستهيفانا، فرانس توينتي فور مستهيفانا، اسرائيل مستهيفانا، الامريكان طلعوا علينا نكت وصحابي الامريكان اللي على الفيس بوك بعتوا لي يقولوا لي كده، اهمد يا بهلول، العب قدام البيت وما تروحش تبل نفسك في الترعة عشان البلهارسيا وما تحدفش الناس بالطوب والا والله ما اوديك الزقازيق في العيد.
كفاية بهدلة في البلد دي، نسيبها في حالها مدام مش عارفين نشرفها وما نلخصش مصر فينا عشان بجد احنا عيبة في حقها، احنا مش مواطنين، احنا ميني مواطنين، بميني مخ، وميني انتماء، وميني وطنية، وميني انجازات، وميني كرامة اتلخصت في ماتش كورة وواحد قلع بنطلونه لفردوس عبد الحميد، ده حتى الشهادة لله واحدة اتصلت تدافع عن القومية العربية، (بعد سيل من المكالمات من كذا بهلول بيقولوا: الواد مندوح ابن عمي سماعين وحش، مش بيحبني، مش بيجيب لي عسلية ولا ارواح زي زمان غيران مني عشان كسبت دور السيجا من الواد زاهر اخوه الصغير واخدت القرش اللي معاه طب واني مالي، مش هو اللي خسر؟)، وعشان تثبت ان القومية العربية لسة موجودة وان الواد مندوح ابن عمي سماعين، هو ابن عمي شقيقي، ولسة بيحبني ضربت مثل بجروب على الفيس بوك ضد الجزائر وعليه عدد كبير من العرب مشتركين فيه و"ما تتخيليش زعلانين علينا قد ايه يا مدام منى" وقاموا معانا بالواجب وحضروا الصوان من الاول لحد ما لمنياه، وحتى "في ستار اكاديمي كل العرب كانوا بيصوتوا لقماح عشان مصري"، خلاص بقى، انتوا ايه مافيش في قلبكوا رحمة؟ معلش البطن قلابة بقى، انا مش عارفة الخلفة السودا دي جابتها من مين؟ طبعا، ماهي اللي تخلف من عوكل ح تجيب ايه؟

هم عايزين منه ايه ولاد التيت دول؟

يعني اوباما نازل قتل في الافغان علاولة زي ما موت الدبانة على ايده، وبيعمل لهم تأمين صحي عايزه يبقى زي كندا وبريطانيا كده، نازلين فيه شتيمة وبيقولوا له انت ح تموتنا بالاشتراكية بتاعتك؟

هم اللي بيعملوا كده متخلفين وللا حيوانات؟

هي الناس في كل حتة فوتت وللا ايه؟ انا فاكرة ده عندنا احنا بس عشان التلوث

ام العروسة.... فاضية ومشغولة

تحديث:
وصلني الان ميل من الاستاذ عزت هلال بيقول لي ان عبد الحليم قنديل هو كمان رفض الدعوة الى جانب جمال عيد رئيس الشبكة العربية لحقوق الانسان
على فكرة الميلينج ليست بتاعتهم مضروبة، يبعتوا لعبد الحليم قنديل؟ هم هبل دول؟

ابوخ حاجة حكاية الصحيان بدري دي بكرة

بالطبع يا عزيزي مش ح ادعي اني ح انام واشخر، انا ما اقدرش اتكلم بالطريقة البطالة دي، لازم اصحى اشوف يعني..نهارك سعيد

بس الاستعدادات قبل ساعة الصفر كالآتي:

اول حاجة انا بجد مش فاهمة منطق اسرائيل، بتتصرف كأنه ح يتجوز عليها وبتقول له: براحتك براحتك، ها؟ بس ما تجورش على حقي، ها؟

احنا واخدين بالنا ان اسرائيل مش دولة مستقلة واستمرارها مربوط بخدمة مصالح استعمارية، ما داهية تكون خايفة مصر تحل محلها في الحكاية دي! لا مش معقول يعني، هم اتجننوا وللا ايه؟ احنا اه اندال بس مش للدرجة دي يعني

وللا للدرجة دي؟

وقبل ما ييجي بيوم راحت اسرائيل عاملة كده

ياااا حتى اسرائيل بتروق البيت معانا؟ بصراحة الاتنين بيتصرفوا بستايل ستات قدام قوي، ما بقاش فيه ستات بتعمل كده دلوقت

على الله ما يكونوش محضرين له مية سخنة بملح في المطار

وكله حضر طلباته حتى الجماعة الاسلامية، طب والنبي يعني ابتدا يصعب عليا: بابا بابا.. جبت لنا عسلية؟

وروبرت فيسك لسة صاحي دلوقت يقول له ايه اللي موديك القاهرة؟ ما كان من الاول الكلام ده

هو هنا بيصيع، كالعادة، في كانال الفرنسية قال ان بالنظر لعدد المسلمين في امريكا فامريكا تعد من اكبر الدول الاسلامية :)) يا دهوتي، لا شفنا ولا ح نشوف صياعة كده، وبعدين قالوا له ايه رأيك في الاسلام (طبعا هو بيعمل حوار مع كانال في فرنسا، فرنسا دي السعودية بتاعة اوروبا، دماغهم فيما يخص الاسلام شبه دماغ الناس بتوع "عباد الصليب" و"احفاد القردة والخنازير" يعني ما يقدرش يقول لهم الاسلام مش وحش يعني، اهو دين زي اي دين، لان الفرنساويين بيتعبروا ان مجرد التعبير عن عدم كراهية الاسلام يبقى كأنك جبت سيرة الست والدتهم بكلام بطال، وفي نفس الوقت مش عايز يزعل المسلمين) يعمل ايه يعمل ايه؟ قال لهم: والله فيه ناس بتقول كويس وناس بتقول وحش

هههههههههههه

لأ بصوا، احنا لازم نعترف ان دمه خفيف، اقطع دراعي من لغلوغه ان ما كان بيضحك في سره على كل الناس العبيطة اللي مبهورة بيه

هنا بقى بيقولوا له في البي بي سي: هل انت شايف مبارك استبدادي؟

يقوم يقول ايه؟

"والله احنا كان بينا تليفونات، انا ما اقدرش احكم عليه"

!!!!!!!!!!!!!!!

موبايلات بقى ها؟ وقال على رأي المثل: تعرف فلان ايوة، عاشرته، لا، تبقى ما تعرفوش، ومش كويس انك تحكم على الناس، احكم على نفسك، ويا حاسدين الناس، مالكم ومال الناس

سؤال اشتراجيتي: دوقت جات دعوات لبعض المعارضين وبعد مؤسسات المجتمع المدني وبعض الافراد المصريين المحسوبين على الادارة الامريكية.

جمال عيد، اللي دعي بوصفه مدير الشبكة العربية لحقوق الانسان، رفض الدعوة احتجاجا على حضور السفير الاسرائيلي، مش متأكده انه هو الوحيد اللي رفض الدعوة، بس لحد دلوقت مافيش اخبار عن رفض دعوة حضور خطاب اوباما غير هو جمال عيد بس، وانا اصلا مش عارفة ايه اللي طسهم في دماغهم وخلاهم يدعوه؟

واظن ان الباقي ح يحضر

وبصرف النظر عن دعوة السفير الاسرائيلي اللي نشرت في الجرايد واتقالت في برامج التوك شو ومع ذلك لسة فيه ناس بتقول: لا ما تقولش لا، بس ما تقولش بس، مش ما تقولش مش

طب نفترض ان السفير الاسرائيلي مش ح يحضر، وانهم احييوا تشي جيفارا ودعوه للخطاب، السؤال الجوهري

اللي ح يحضر ح يحضر ليه؟ اقصد يعني مخاطبة العالم الاسلامي من مصر وهي في الحالة دي، ربنا يشفيها ويعافيها، اكبر دعم للنظام القائم اللي المدعويين بيقولوا انهم معارضين له، صح؟

طيب اللي ح يحضر، ح يحضر مثلا عشان يرفع ايده ويسأل اوباما:

يا سيد انت جاي تدعم نظام استبدادي ليه؟ يا سيد انت قلت ح تنسحب من العراق ولحست الكلمتين وح تفضل سايب خمسين الف جندي ليه؟ يا سيد بتضرب القرى والفلاحين في افغانستان ليه؟ يا سيد المعونة اللي بتدفعها لحسني مبارك هي اللي مخلياه كابس على انفاسنا ولو شلتوا ايديكوا من ورا ضهره مش ح يقعد ثانية في كرسيه، طب بتدفعوا له فلوس ليه؟ حد قال لكوا اننا شحاتين؟ يا سيد انت رفعت المعونة العسكرية لاسرائيل بنسبة عشرة في المية ليه؟ دي دولة متوحشة وعلى حدودنا وانت كده بتهددنا تهديد مباشر، ليه؟ يا سيد مش عايز تنزل صور الجرائم اللي ارتكبت في ابو غريب عشان تحمي المجرمين ليه؟

انت وبلدك كلها مدينين لينا بالاعتذار... لحد اللحظة دي ما سمعناش كلمة اعتذار عن غزو افغانستان والعراق اللي اضر بمصلحتي انا كمواطن مصري واضر باكل عيشي ومن ساعة ضرب العراق بالذات شفنا فقر ما شافتهوش مصر من سنة الفت وتسعمية وعشرين، ولا سمعنا اعتذار عن التعذيب اللي في جوانتانمو وابو غريب، وبتضحك علينا وتقول لنا ح اقفل جوانتانمو وانت كل اللي ح تعمله انك ح تنقل المساجين من مكانهم لمكان تاني بنفس وضعهم القانون اللا قانوني، بس تغيير مناظر، وبتضحك علينا وتقول لنا انك بتحقق في ابو غريب وانت قبل التحقيق اصدرت عفو شامل عن كل المتورطين في الجريمة، وطبعا مش ح تدفع تعويضات للضحايا، ومش ناوي تبرز الجرائم للاعلام على الاقل كعقوبة معنوية للمتورطين، طب بتحقق ليه؟

يا سيد احنا ما بينضحكش علينا احنا ناس صيع والدنيا لطشت فينا جامد

البقين دول تروح تقولهم للخواجات اللي اكبر مشكلة حصلت لهم في حياتهم وجابت لهم كوابيس وهلع هي برجين وقعوا وتلاتلاف ماتوا.... يا سلام؟ هو ده اخركوا يعني؟ وعشان كده غزيتوا بلدين عشان برجين، وقتلتوا اكتر من تلاتة مليون عشان تلاتلاف؟ طب التلاتلاف دول بيموتوا في نص ساعة في حادثة قطر عادية جدا هنا، تحت حكم النظام اللي انت بتدفع له فلوس وبتبني له سجون وبتدعمه

يا سيد السجون الجديدة كلها في مصر مبنية بفلوس المعونة الامريكية، بتبنوا للنظام المصري سجون ليه؟

حد ح يسمح له يرفع ايده ويقول جملة واحدة؟ كلمة واحدة من اللي فوق ده؟

لو ح يقدروا يقفوا ويقولوا الكلام ده، ارجوهم يروحوا، ويروحوا بدري ويحجزوا على الارض قدام المنصة، انا باتكلم بجد، اللي ح يقدر يعمل كده ويقول اللي في قلبنا (مش مهم يحضر بالانجليزي، يقول بالعربي في مترجمين) يبقى عمل احسن حاجة ممكن تتعمل، مش خدمة لينا في مصر بس، خدمة للانسانية كلها، ده يبقى عمل احسن حاجة في تاريخ الولايات المتحدة من ساعة ما ربنا بلا العالم بيها

لو مش ح يقدروا يقولوا له الكلام ده، رايحين يعملوا ايه؟ يتفرجوا؟ هو قرداتي وللا بهلوان؟ هممم هو قرداتي وبهلوان، الاتنين، بس ما اظنش ان المعارضة المصرية والمجتمع المدني عندهم فقر سيرك يعني، البلد كلها سيرك، يعني البهلوان جاي يبيع المية في حارة السقايين

عموما مش عايزين نستبق الاحداث ونحكم على اللي رايحين، مين عارف، يمكن يقولوا كلام احسن من كده كمان، ويمكن يدوهم فرصة يتكلموا، ويمكن يبقوا احسن من ظننا بيهم واملنا فيهم

ويمكن يطلعوا قرادتية هم كمان، في الحالة دي احنا مش خسرانين حاجة، هو احنا من امتى كان عندنا امل في اي حد؟

اخيرا: حسني مبارك مش ح يحضر ليه؟ متضايق عشان بعض المعارضة مدعوة؟ وللا تعبان؟ وللا بيتقل والتقل صنعة؟

سؤال وظيفي بحت حيث اني موظفة من اللي بيشيلوا بطيخة

احنا ح نغيب طبعا، مش ح ينفع نروح الشغل

ح يحسبوا لنا اليوم غياب ونقدم عليه اجازة؟ طب واحنا مالنا؟ المفروض يدوهولنا اجازة، انما ياخدوا من اجازتنا ويخصموا الشيفت عشان هم اللي عزموا واحد عندهم؟ هو جايلنا وللا جايلهم؟

انا مش قلت لكوا الغباوة غباوة قلب ماحدش صدقني

طب والله الانسان المصري الشعبي بيفهم احسن من كل المتعلمين، لما يقول على واحد انه غبي يقصد بالكلمة انه الابعد ما بيحسش، او قاسي: ما تخلنيش اتغابى عليك بقى

يعني ما تخلنيش اقسى عليك

 والله فعلا الغبي غبي غباوة قلب. وانا عندي نظرية غير علمية مبنية على مافيش اساس خالص ولم يثبت عليها اي دليل ما قريتهاش في اي حتة والفتها من دماغي في لحظة تجلي وانا واقفة في الاشارة والدنيا زحمة وواحد بيتناصح وعايز يعمل غرزة ويدخل ما بيني وبين العربية اللي قدامي اللي المسافة بيني وبينها ربع متر ومتخيل انه ح يعرف يعدي بعربيته من الحتة دي وتأكدت لي نظريتي غير العلمية لما بادي اشارة عشان ادخل يمين فالعربيات اللي جاية من بعيد على مهلها اول ما تشوف الاشارة تدوس بنزين عشان ما اعديش مع ان مافيش سابق عداوة ما بيني وما بينهم ومقتنعة بهذه النظرية وما اخدتش عليها براءة اختراع ولا حاجة لاني استوحتها من التراث الشعبي

اكتبوها يمكن تنفعكوا:

كل البني ادمين مخلوقين من عند ربنا اذكيا ماحدش غبي الا بمزاجه وده نابع من انه الابعد ما بيحسش، وغلظة الحس طبعا اختيارية، وكل ما غلظ حس البني ادم كل ما ربنا ضلم على مخه

ودي انسب مقدمة للي ح اقوله:

طبعا كلنا عارفين لميس الحديدي،

واظن كلنا يا اطفال يا حلوين كنا شفناها لما راحت غزة وقعدت تقول للاطفال اللي لسة خارجين من تحت القصف نفسك تطلع ايه يا حبيبي فيقولوا لها : مقاوم

وانت-

مقاوم

يااااااا برضه مقاوم؟ ليه كده بس؟-

وراحت قايلة قدام العيال: وزي ما احنا شايفين اعزائي المشاهدين للاسف كل الاطفال الفلسطينيين عايزين يطلعوا مقاومين، ماحدش للاسف عايز يطلع دكتور ولا مهندس ولا يعمل نهضة، ولكن للاسف عايزين يطلعوا مقاومين

وقعدت تقول للاسف للاسف للاسف قدام العيال اللي بايتين في المدرسة ونصهم اهاليهم ميتة

راح واحد زئرد بتاع عشر سنين كده شدها من دراعها عشان ينبهها لكلامه: مقاومتنا هي اللي راح تعمل نهضتنا

تحس بقى على دمها؟ ابدا، بصت له وراحت باصة للكاميرا: زي ما انتوا سامعين للاسف

واكيد شفتوها مع مرتضى منصور اللي لاول مرة في حياته يصعب عليا:

استاذ ياسر ايوب، ايه تعليق حضرتك، وايه رأي حضرتك، هل وجود مرتضى منصور فعلا بيعمل مشاكل وللا غيابه بيخلي الدنيا هادية؟

قول لنا بقى اللي حصل يا سعادة المستشار...ما تحكيش بقى اللي حصل خلاص

"ياريت في الكنترول يجيبوا لنا حد يهاجم مرتضى لان الناس ح تفتكر اننا بنختار التليفونات"

وكل ده عشان واحد قال: انا باحب المستشار مرتضى

لا وشوف النباهة والمعية التفكير؟ يعني لما تقول للكنترول قدامنا نقوا لنا تليفونات تشتم مرتضى يقوم المشاهدين كده مش ح يفتكروهم بيختاروا المكالمات ولا حاجة، دول ح يتأكدوا ان المتصل ده عم فوزي بتاع الشاي والقهوة في الدور

---

مين بقى ايهاب صالح؟ اصل اتغابى غباوة قلب امبارح على نجوم اف ام وسمعته وانا راجعة:

وطبعا الكابتن قبل الفاصل كان بيتكلم عن روعة الكرة الاوروبية وتنظيمها وجمالها لكن للاسف يا كابتن جه الافريقي وبوظها

قصده على ابو ركبة ده اللي عمري ما بعرف اسمه بتاع ساحل العاج

يا سلااااااام

يا سلاااااااااااااااااام

ده ايه العظمة دي يا سيد ايهاب صالح، ايه التهذيب، والذوق، والحساسية، اللي حضرتك فيها دي؟ حضرتك قاعد في بلد افريقية، ان كيس يعني ما حدش خبرك وللا حادة

ياريت تحاول تعيشها بشكل تاني

البني ادم يا يبقى قليل الادب يا يبقى غبي ما ينفعش الاتنين

بادئ ذي بدء البزنس هو اللي خرب العالم وعمالين ناخد منه بونيات البونية ورا التانية والناس في العالم عمالة تقول: انتوا ضحكتوا علينا ليه؟ فهمتونا ان الاشتراكية دي حاجة عيب، اهو ماحدش فلت من الازمة غير الدول الاشتراكية، حتى جون ستيوارت عمل حلقتين يموتوا من الضحك على الموضوع ده

مين بقى اللي زي الحمار بيضحك على النكتة بعد تلات ايام؟

احنا طبعا، الناس كلها بتراجع اقتصاديات السوق واحنا لسة بنقول: ح نفتح السوق

فيه كتير دواجن اعدمت وفيه تجار هربوا الدواجن وفيه تجار ما اخدوش الاحتياطات الصحية المطلوبة

وعشان كده كان عندنا اصابات بفلفلوسا الطيور والحكومة اخفتها لان دي حاجة يمكن اخفاءها، احنا تمانين مليون يعني

فلفلوسا الخنازير يصعب اخفاءها بالمرة، لان لو واحد عطس في اتوبيس كل الناس ح تتعدي ودي بتموت على طول ما بتستناش على حد، وممكن في ظرف شهر نصفصف على خمسة بيشاوروا عقلهم

واذا كانت في المكسيك في ظرف يومين موتت 170 اظن احنا عارفين النظام الصارم الحاسم والطبي المتقدم اللي بيحكم مصر وعشان كده المية وسبعين دول ح يموت قدهم عشر مرات كل ساعتين

ده اخطر وباء واوسع انتشارا

قووووووووم قالوا دول كلهم يعني 200 الف خنزير نعدمهم ونخلص

طبيعي الناس اللي مرتبطة بالبزنس ده تخاف، طبعا يعني، اكل عيشهم، مين يرضى بخراب البيوت؟ ماحدش

الحكومة قالت ح ندفع لهم تعويضات، وطبعا مين بيصدق الحكومة؟ طب ايه رأيكوا ان فيه ناس مستعدة يلموا مننا تبرعات ويدفعوا للي بيشتغلوا في مزارع الخنازير، وسبحان الله المخ المصري الاصيل، مش خايفين يموتوا، يعني لو ح يخسر شغله يبقى يموت احسن

كل ده شغال وعادي

ايه ده بقى؟

وفي ذات السياق هدد عشرات الأقباط من ملاك مزارع تربية الخنازير باللجوء للرئيس أوباما من أجل عدم المساس بأي مرب للخنازير على الأراضي المصرية.

لا وايه؟

خدوا دي كمان

وقد خلفت الأزمة بعداً طائفياً حيث أعلن عدد كبير من أصحاب مزارع الدجاج عن تنديدهم بقرار الدكتور أحمد نظيف رئيس الوزراء بإغلاق العشرات من مزارع إنتاج الدواجن، بينما لم يصدر قراراً واحداً بإغلاق أي مزرعة من مزارع إنتاج الخنازير.

الله؟ ده انا كنت باهزر، لما قلت "هي الفراخ مسلمة والخنازير مسيحية" كنت باهزر، باهزررررررررررررر

ايه الغباوة دي؟ يعني الاتنين عايزين يموتوا ولا ان يخسروا شغلهم ودي مفهومة، ده تراث مصري حتى في العبارة واحد طلع وقعد يلطم ويقول شقا تلات سنين قالوا له احمد ربنا انك طلعت قال لهم: يا ريتني ما طلعت

بالنسبة لمعظم الناس، بالذات الغلابة، الموت مش اوحش حاجة تحصل لهم، خراب البيوت هو اوحش حاجة

لكن ليه قلة ادب؟

ليه؟

ليييييييييييييييييييه؟

ايه دخل الفتنة الطائفية والدين في الموضوع؟ ويعني ايه نشتكي لاوباما؟ هم فاهمين معنى كلامهم وللا اهي هطرسة وخلاص؟ ماهو لو فاهمين تبقى مصيبة ولو مش فاهمين تبقى مصيبة اكبر، لو فاهمين انهم في كل كبيرة وصغيرة يستعدوا قوة استعمارية على بلدهم، بلدهم، بلدهم، اللي مش ناقصة استعمار كفاية عليها الاستعمار اللي فيها، وان الكلام ده بيوجع حقيقي، وبيحسس الباقيين بالرعب، وبيحطهم في تصنيف الطابور الخامس، وبيعمل اغتراب وهلع، تبقى مصيبة، ولو مش فاهمين ده كله (ووالله العظيم اغلب الظن انهم مش فاهمين اي ابعاد لده كله) تبقى مصيبة اكبر، يبقى اي حد ييجي يبخ في ودنهم ويقول لهم يخرفوا بكلام فارغ وللا يتصرفوا تصرفات هابلة يمشوا وراه من غير ما يفكروا، والمصيبة الاكبر لما تبقى طوائف الشعب المختلفة محكوم دماغها بناس بتوع بزنس، اهو بصوا بقى، مافيش في الدنيا اوسخ من السياسيين غير بتوع البزنس، واحد عايش حياته يلم في فلوس، ده يبقى ايه؟ يبقى ايه الكائن ده؟ الموضوع كله بزنس في بزنس، ورجال اعمال كبار متصارعين وضالعين فيه وعشان كده عايزين يحولوها لفتنة طائفية عشان يهددوا الدولة تقوم ما تضربش مصالحهم ومش مهم عندهم الناس تموت، واول ناس ح تموت اللي بيشتغلوا في المزارع نفسها وطبعا الناس تموت ارخص واوفر لهم، لو رجال الاعمال اللي ضالعين في الموضوع (سواء بقى الدواجن او الخنازير) اعدموا اللي عندهم لازم ح يدفعوا للعمال الغلابة، طب وهم من امتى بيدفعوا للعمال الغلابة؟ دول لو يطولوا يعملوا لهم عقد عبودية مش ح يتأخروا

واحنا دولة فوضى ومش ح يعرفوا يسيطروا على اي حاجة، ده الدنيا بتمطر خمس دقايق مصر بتتحول لمنطقة كوارث، وما عرفوش يسيطروا على انفلونزا الطيور وبقى الحمام الميت واقع في شارع جامعة الدول وفاتح منقاره

طب الخناقة ما بين الدولة وما بين رجال الاعمال والغلابة في النص خايفين على لقمة عيشهم، ايه دخل اوباما؟ وليه قلة الادب؟ دي اسمها قلة ادب، دي قلة ادب، مش ممكن البني ادم يبقى غبي وقليل الادب كمان، يختار حاجة من الاتنين، وحتى قلة ادب غبية كمان

مين الحيوان اللي شار عليهم الشورة المهببة دي؟ واحد اللي يهمه فلوسه وما يهموش ان الكلام ده بيتحفر وبيتخزن وبيطلع وقت اللزوم

طب ما ياخدهم يقابلهم باوباما عشان يسيب كل اللي وراه ويتفرغ لخنازير مصر

(ملحوظة خارج السياق: لو رحتوا خدوني معاكوا يمضي لي اتوجراف واتصور معاه، قبل ما يطردكوا طبعا)

المعونة هي اللي خيانة عظمى يا مصطفى يا بكري

الاستاذ مصطفى بكري كان طالع امبارح مع منى الشاذلي في العاشرة يقول لها: وراحوا (سعد الدين ابراهيم وواحدة اسمها منى الطحاوي انما ايه؟ سعد الدين ابراهيم جنبها ملاك ينقصه الجناحين) لامريكا يطلبوا قطع المعونة.....طلب قطع المعونة عن مصر خيانة عظمى

يا سلاااااااااااام؟

يااااااااااااااااااااااا سلاااااااااااااااااااااااااااااام؟

ياااااااااااااااااااااااااااااااااااااااااااااااااااااا سسسسسسسسسسللللللللللللاااااااااااااااااااااااااااااامممممممممم؟

وكيف كان ذلك يا حاج دبشليم الفسلسوف؟

يا ناس... يا عالم، البلد دي فيها اعجب الاعاجيب، والطف الاهازيج، صحيح مصر يا ام العجايب

فيه في الدنيا معارض حكومي؟ فيه كده؟

بصرف النظر عن رأيي في سعد الدين ابراهيم ومنى الطحاوي، يعني لما ييجي حتى يتناقش مع الناس يقول لهم قطع المعونة عن مصر خيانة عظمى؟ ايه ده؟ انتوا عايزينا نبطل شحاتة وللا ايه؟ قلة ادب، ما داهية تكونوا عايزينا نستغل مواردنا ونحترم نفسنا ونبقى بلد عليها القيمة.....سفالة

فيه كده؟ فيه كده؟

هو فيه بلد في الدنيا بتنهض وهي بتاخد معونة؟ فيه بلد شحاتة بيبقى لها اي سعر في العالم؟

طب المعونة دي جزء من كامب ديفيد يا استاذ مصطفى، ولو كامب ديفيد ح تتلغي، وان شاء الله ح تتلغي، المعونة ح تتقطع توماتيكي توماتيكي، هو مش مصطفى بكري معارض لكامب ديفيد برضه؟

"وقد يكون جمال مبارك راح يتفاوض بشأن الصالح الوطني في امريكا في حاجات ما يقدرش يتفاوض فيها الا هو"

سبحان الله يا اخي، ويخلق مالا تعلمون

ده ايه الفتوح ده كله؟ ده انت لقطة 

طب المعونة دي معمولة في اساسها عشان تضعف الدول اللي بتاخدها وتخليها دايما معتمدة على امريكا ورهينة شروطها

واهو ابراهيم عيسى يا استاذ مصطفى بدون سابق انذار على غفلة واحنا قاعدين بيقول لك اهو

http://dostor.org/ar/index.php?option=com_content&task=blogsection&id=21&Itemid=64

طب انا اللي افهمه، ان البني ادم لما يبقى عنده القدر القليل من المنطق، والقدر القليل من حل المسائل الرياضية (كانوا بيقولوا العرب جنس متفوق في الرياضيات اكتر حاجة.....مش باين) يقول حاجة بسيطة قوي: انت يا حاج انت والانسة اللي معاك رايحين تطلبوا قطع المعونة عن مصر، وانا معاكوا، طب انتوا بتاخدوا معونة ليييييييييييييييييييييييييه؟ هو انتوا مش مصريين برضه؟

مش كده؟ وللا انا هابلة؟

اه

انا هابلة، ما انا عارفة دي معلومة قديمة

بس بصراحة المنظر بقى مقزز قوي، قاعدين كل واحد فيهم ماسك في طرف المعونة ويقولوا: ما تشدش ما تشديش انتي ما تشدش ما تشديش انتي

طب والله العظيم الشحاتين في الاشارات عندهم كرامة اكتر من كده، والله العظيم كمان مرة العيل اللي عنده عشر سنين اللي ما رضيش ياخد مني فلوس من غير ما يبيع لي ورد محترم عنهم وقال لي بالاطة شديدة: انا مش شحات....انا باشتغل

بس دي هدية-

خلاص....وانت كمان تاخدي مني ورد هدية

انا عايزة الواد ده يحكمنا

يرشح نفسه في الانتخابات وانا ح اتبنى الحملة الانتخابية بتاعته انشالله ارفع الناس بالمسدس عشان ينتخبوه، اذا ما كانش عشان كرامته يبقى عشان نباهته ومخه النضيف

عنده قدرة على الاستدلال المنطقي على الاقل

هو اوباما بيسمع عمرو دياب؟

ايه الحملة الانتخابية اللي عاملها عمرو دياب دي؟ انا منين ما امشي الاقيه، وبيعملوا برامج عليه ويستضيفوا مفيد فوزي وعمار الشريعي وحلمي بكر!!!!!!!!!!!! علامات التعجب الكتير دي للناس اللي من جيلي اللي عارفين ان التلاتة دول كانوا بيلعوا ابو خاش عمرو دياب على السبحة

عموما لو عمرو دياب اترشح قدام ايمن نور وجمال مبارك انا ح انتخب عمرو دياب

عته بعته يبقى على الاقل قرد يسليني ولا غزال شارد

تحليل دي ان ايه في جريمة قتل على 200 جنيه وموبايل

ماهو يا انا مجنونة يا انا مجنونة، مش معقولة كل الناس دي مجنونة وانا اللي عاقلة، اكيد الغلط فيا

النهاردة المخرج احمد عاطف قال لي قريتي تفاصيل القبض على الحداد المسلح اللي مفروض انه قتل بنت ليلى غفران؟ مافيش حبكة...مين السيناريست الفاشل اللي كتب لهم الكلام ده؟

مخرج بقى ونظرته للدنيا على انها فيلم سينما

بس ده فيلم سينما؟ ده ولا فيلم وش اجرام بتاع محمد هنيدي

حد يقنعني بملابسات الجريمة الكوميدية دي! حاولت افسر الموضوع واقول احنا دمنا خفيف وحيث كده فيبقى اكيد الجرايم اللي بنرتكبها دمها خفيف برضه

بس لقيتها مش راكبة

واحد رايح يسرق حتة مش عارفها ولا محدد هو ح يسرق ايه؟ وواخد معاه تريننج سوت عشان يبدل زي محسن السكري، وواخد سكينة! مش عارفة سكينة ليه وهو حداد؟ ما كان ياخد سنجة وللا اي حاجة ما تستلزمش مجهود كبير في القتل؟ وبعدين عنده ضائقة مالية قام المعفن سرق 200 وموبايل والشقة مليانة تحف وبعدين قتل البنات وغير هدومه وركب ميكروباظ!

طبعا واحد بيعمل جريمة قتل على 200 جنيه اكيد ح يرجع في ميكروباظ لانه مش معاه فلوس التاكسي من ستة اكتوبر لروض الفرج، مالوش واحد صاحبه عنده عربية نص نقل طيب؟ مش عارف يراقب المنطقة شوية؟ مش ممكن القاتل اللي خريج التثقيف الفكري ده

المفروض ما يتعاقبش، ده يودوه مدرسة لرعاية ذوي الاحتياجات الخاصة

الواحد يصحى من النوم كده وياخد بعضه ويتوكل على الله يقلب رزقه في اي حتة ويسرق اللي يطلع له ويقتل اللي يشوفه وهو قاصد وجه كريم، ويركب ميكروباظ ويعملوا له تحليل دي ان ايه وفي اربع ايام يكتشفوا جريمة القتل ومين القاتل من غير كاميرات ولا سحر ولا شعوذة، يعني احنا اجدع من الامارات على راي احمد

حد يديني عقله عشان انا عقلي دورت عليه الظاهر راح يشتي في المريخ

لا وبرضه كاتبين الكي وورد في كل اخبار قضايا القتل: وانهار واعترف

اعترف وفاهمينها

انهار ازاي؟ ده شغل البوليس بقى

العبث بقى ان يكون التلفيقة للواد الغلبان ده مش عشان يتستروا على ابن راجل كبير ولا حاجة

بس عشان عايزين يثبتوا انهم قبضوا على القاتل بسرعة زي الامارات وانا مش اقل من كاظم انحنى لي انحنيت له

يا اخوانا انا مش عارفة احشر في راسي القصة دي...يا تلاقوا لي طريقة احشر بيها القصة في دماغي يا توفروا لي الكلة 

على فكرة بقى الفيلم ده ساقط

فيلم سوزان تميم احلى، على الاقل كوميدي، ده كفاية الحوار العبقري: حاضر عن زوج المجني عليها..مين فيهم يعني؟
انما فيلم اوباما ومحاولات اغتياله من الناس الاشرار ونجاح السلاطات في احباطها قديم قوي كمان صيغ الحوار ستريو تايب زي انهم يحطوا في الخبر جملة زي دي:

Obama, who would be the first black U.S. president,

توء....سم قوي الفيلم ده، مين الفاشل اللي كاتب السيناريو؟
على فكرة احنا ابتدينا نتفوق عليهم في كتابة السيناريوهات السياسية...المفروض ناخد اوسكار، بس احنا عيبنا الممثلين، لسة عادل معتوه وابو سوزان بيمثلوا بطريقة يوسف واهبل
الا ايه حكاية المسلماني اتمنع دي؟ حد عنده فكرة؟
-------
تحديث:
لما كنا بنتكلم عن مقاطعة البضائع الامريكية كانوا بيتريقوا علينا وبيقولوا لنا اننا هبل..طيب اتفضلوا

والنبي انا هابلة اه بس مش للدرجة دي

دلوقت اسرائيل عملت هيصة وبوليكة عشان الجزيرة احتفلت بسمير القنطار وقعدوا يشتموا في غسان بن جدو وهددوا بطرد الجزيرة من فلسطين المحتلة حلو؟
جات هآرتس كتبت ان الجزيرة اعتذرت، حلو؟
جات الجزيرة قالت احنا ما اعتذرناش ولا حاجة وح نرفع قضية، حلو؟
لا مش حلو
عشان الجزيرة كتبت على موقعها كده:

وأوضح الناطق أن هيئة التحرير في اجتماعها الدوري كانت قد أصدرت توضيحا بشأن حلقة حوار مفتوح مع الأسير المحرر سمير القنطار، وأشادت هيئة التحرير بالبرنامج، غير أنها تحفظت على الأجواء الاحتفالية التي صاحبت الحلقة، ولم يتضمن ذلك أي اعتذار لأي طرف.

!!!!!!!!!
انا باحب الجزيرة وكل حاجة، بس نفسي افهم يعني ايه اصدرت توضيح؟ توضيح بخصوص ايه يعني؟ ومين يعني الجهة اللي الجزيرة بتوضح لها؟ اسرائيل؟ ما يولعوا بجاز وسخ هي اسرائيل كانت اصدرت توضيح لما القنوات بتاعتهم احتفلت بعزام عزام وابدت اي تحفظات على "الاجواء الاحتفالية" اللي صاحبت عزام وهو نازل بوس في شارون وشايل علم اسرائيل على كتافه؟
حد بقى يفهمها لي عشان انا واحدة تعليمي على قدي

دم المسيحي مقدس وكلوة المسلم للحيوانات

بلغني من مصادر مواقعاتية موثوق بيها اللي هي مينو خطيبي المسيحي ان مالك مستاء من بوستاتي الكتير، طبعا بعد الله اكبر في عينك يا مالك، طب انا اعمل ايه؟ حد يوصف لي مهدئ او يشيل الريدر من قدامي ولجل غباوتي مشتركة في معظم المدونات ووكالات الانباء وعلى رأسهم مدونة مينو اللي كاتب النهاردة بوست يحرق الدم
البوست السعيد لمراقب مصري بيزف لنا خبر ان الدكتور حمدي السيد - اللي انا كنت باحبه قوي بالمناسبة - طلع قرار حكيم (بيدي حقن) بمنع نقل الاعضاء ما بين المسلمين والمسيحيين وتعلل باننا مجتمع لم يصل الى هذه الدرجة من الانسانية اللي تخلي المسلم يتبرع لمسيحي ومسيحي يتبرع لمسلم ببلاش! وانا اقول ياربي يعني مينو ذاكر في الثانوية العامية لما اتعمى واهله صرفوا اللي وراهم واللي قدامهم عليه في كلية الطب وبعدين ساب الطب؟ ده اكيد مجنون، طلعت انا اللي مجنونة
وعشان مينو يحب يكركب المصايب ذكر تصريح الانبا بيشوي اللي قال من فترة انه لا يجوز للمسيحي يتبرع للمسلم بالدم عشان دم المسيحي مقدس
ييجي واحد من الازهر يعترض على قرار حمدي السيد ويقول: لا ازاي ما نتبرعش للمسيحيين ده الاسلام امر بحسن معاملة الحيوانات فما بالك باهل الكتاب
بس نسي يقول: اللي ما يفرقوش عن الحيوانات حاجة، او على احسن التقديرات افضل شوية من الحيوانات في نظر المخاليل اللي متحكمين في حياتنا وامخاخنا
يعني قلنا رجال الدين المصايب بتيجي من تحت راسهم قام ربنا رد عليا عشان الظاهر اتجنيت على رجال الدين وبعت لي التصريح بتاع الدكتور حمدي السيد عشان يعرفني اننا شعب واطي على رأي مينا
دكتور...طبيب...عالم..يقول اصلنا عملنا بحث ولقينا 48 مسلم اتبرعوا لمسيحيين بينما 5 مسيحيين بس اتبرعوا لمسلمين وده دليل على انها تجارة اعضاء؟
ايوة ده دليل على انها تجارة اعضاء على اساس ايه؟ ان المسلمين اوطى من المسيحيين بالطبيعة؟ وللا هو خايف على اعضاء المسلمين ليلهفها المسيحيين ويدخلوا بيها الجنة زي ما الانبا بشوي خايف المسلمين ياخدوا دم من المسيحيين ليدخلوا بيه الجنة لا سمح الله؟ وللا عشان المسيحيين اغنيا ولاهفين بقى فلوس البلد وعندهم صيدليات ومحلات جواهرجية بقى وبيلغوا في الفتة والمسلمين - اللي زي احمد عز - فقرا ياعيني؟ يعني مش فاهمة المقدمات المنطقية بتاعة عدد المسلمين والمسيحيين ادت ازاي لانها تجارة؟ يفهمنا منطقه...آه آه عشان القسيس بيسحر، وممكن ياخد فص الكبد وللا الكلوة ويشرب مية بالل فيها ورقة بالحبر الاحمر ويتف فيها..صح؟ ياااااااه ده العلم نورن صحيح
عموما احب اطمنهم اننا ان شاء الله كلنا داخلين الجنة لان مش معقولة ربنا يودينا النار دنيا واخرة
الا اذا كانت القيامة قامت واحنا فعلا في الجحيم دلوقت والاخ السيد وقطب وبشوي هم الزبانية
مش عارف الدكتور المحترم اللي متعلم مناهج بحث ان القضية مش قضية مسلم ومسيحي وانما قضية غني وفقير؟
مش عارف ان معظم - ان لم يكن كل - اللي بيتبرعوا بالاعضاء بيتبرعوا لانهم فقرا ومستعدين يبيعوا عيل من عيالهم عشان لقمة عيش؟ بدل ما كان يتعب نفسه ويعمل بحث واسقتصاء عشان يشوف نسبة المسلمين المتبرعين من نسبة المسيحيين المتبرعين (اللي طبيعي يبقوا اقل لانهم اقل في العدد يعني) ما عملش ليه بحث عشان يشوف نسبة الفقرا المتبرعين ونسبة الاغنيا المتبرع اليهم؟
انا واثقة انه كان ح يلاقي نسبة الفقرا المتبرعين للاغنيا مية في المية بصرف النظر عن الدين
وعليه فكان واجب عليه يطلع قرار بان المتبرع يقدم بيان حالة اقتصادية لمنع تبرع الفقراء باعضائهم اللي مالهمش غيرها عشان ياكلوا بيها عيش
حسبنا الله ونعم الوكيل

حلس حلس تاللي مايلبس في اسرائيل يفلقس

يا سلاااااام بقى اسرائيل قبضت على حلس؟
اممممم، الله اعلم يمكن مظلومين، بس هو كل اللي بيتقبض عليه بيبقى مقبوض عليه؟
انا ماليش دعوة بغيري...بس احنا ساعات فيه ناس عندنا هنا في مصر بيتقبض عليهم قدامنا عشان ياخدوا تعليمات من الامن
انا ما باتكلمش على حد انا باتكلم على اللي عندنا...وماحدش عارف يمكن يكونوا مظلومين حرام ان بعض الظن اثم..انا باقول على اللي عندنا يعني ويمكن يكون ماحدش مظلوم خالص....يمكن...مش يمكن....اكيد كل الاطراف غبية...انا قصدي على اللي عندنا يعني
يافرحة امكوا بيكوا....ياللي عندنا
------------
الله يحظك يا جابر...هو بيجيب الافكار دي منين، الواد ده لو اشتغل مصمم في شركة اعلانات ح يكسب الشهد بس هو اللي غاوي فقر

عاجل: العرب اتخانقوا في الاجتماع

الشويفات مولعة، اشتباكات كثيفة جدا مجزرة
سوريا والسعودية مسكوا في شعر بعض وشتموا بعض في الاجتماع
ما يفرجونا خلونا نفك عن نفسيتنا
الظاهر كمان جنبلاط واخد اوامر ما يوقفش الاشتباكات لحد ما الاجتماع في الجامعة يخلص عشان يبعتوا قوات عربية
القومي والتوحيد المفروض يسلموا الجيش ويبقى جنبلاط منه للجيش بقى

ندوة في الصحفيين للتضامن مع المحلة/ عرص في المتعرص

النهاردة ان شاء الله الساعة سبعة ح يبقى فيه ندوة للتضامن مع المحلة في نقابة الصحفيين وح يبقى فيه شهادات ناس
موضوع المحلة مش لازم ينام، التحقيق في موضوع المحلة لازم يفضل مفتوح
لو موضوع المحلة اتقفل يبقى الامن اكل لحمنا واستطعمه وما نزعلش بقى لو اتكرر في كل حتة وفي اي حتة
ومش بعيد يدخلوا على الناس البيوت ويموتوهم...مدام بنموت في الشارع ونسكت
----
الغنوة بتاعة اربعة مايو سم ناقع ودمها تقيل وبايخة وانا مش مبسوطة منها
مافيش مجال للتهريج، ولو الموضوع تهريج بعد ما كل الناس دي اتفشخت يبقى الامن حابس الغلابة دول ليه وعامل لهم تجديد اعتقال؟
الامن ما عندوش
sense of humor
???
وللا اللي بيهرجوا دمهم تقيل وعقابا على تقل دمهم حابس ناس تانية وقتل الناس في المحلة؟
ماحدش يهيس في المتهيس القصة مش
funny
فيه ناس مش لاقية عيش وناس ماتت وناس واخدة افراج من النائب العام واتعمل لها تجديد اعتقال وعمال فقدوا عينيهم وهاني سرور اخد براءة وابرياء اتحبسوا وقبل ده وده فيه قانون طوارئ وقبضة امنية خانقة وفوضى ومش عارفة ازاي المعادلة دي اتعملت قبضة امنية وفوضى مع بعض ومعارصة اوسخ من حكومة وحكومة اعرص من معارصة والمفروض ان الاضراب ده احتجاج على الاوضاع دي مش للتهريج والنكت السخيفة والاغاني العبيطة
صحيح اللي يمشي ورا العيال ما يخلاش من التقريص
مشيها التقريص
اديني قاعدة اقرا موضوع في البديل ولما اخلصه ح نبقى نتكلم عنه

بالنوسبة للاخوان: انا دمي محروق..انتوا دمكوا مش محروق ليه

انا الموضوع عمال يكبر في دماغي من امبارح، اصل انا ردود افعالي بطيئة شوية
ممكن اعرف الاخوان بعد الاحكام دي ما بيرفعوش شكوى للقلل المنتحرة ليه؟
ممكن اعرف ما بيعملوش اضراب عن الطعام ليه؟ ده اجراء قانوني ومشروع، هم مش بيقولوا ان عددهم سبعة مليون؟ متهيالي لو سبعة مليون اضربوا عن الطعام ح يبقى فيه تأثير
ممكن اعرف ما بيسحبوش كل فلوسهم اللي في البورصة ليه مرة واحدة؟ هم مش بيقولوا ان لهم فلوس كتير في البورصة وانهم هم اللي مقومينها؟
ما يشاركوش في اضراب اربعة مايو لان بصراحة كده ماحدش عايزهم فيه
بس فيه في الكون ستميت خطوة قانونية وسلمية ودستورية يعملوها بعد الاحكام الجنونية دي اكتر من انهم يحسبنوا
ممكن افهم مبدأ: تهجرني برضه احبك، تنساني برضه احبك، تلاوعني برضه احبك ده مبني على اي اساس؟
استباقا: بالنوسبة للناس اللي بتكره الاخوان وبتقول عليهم عاملين صفقة، ياريت تجيب لي دليل مادي قبل ما تقول الكلام ده عشان لو دي صفقة يبقى لازم يتم الكشف على قوى كل اعضاء الاخوان العقلية، ماحدش بيعمل صفقة عشان يتسجن وفلوسه تتصادر ويخرج من الانتخابات ويتفشخ تلتمية وستين درجة لحد ما رجليه تسلم على بعضها فوق راسه الا اذا كان مختل عقليا
وكل ده عشان ايه؟ يكسبوا تعاطف، تعاطف ايه ماحدش متعاطف ده انا ام قلب رهيف قرفت منهم
بالنوسبة للاخوان والمتعاطفين معاهم: لو سمحت اتكلم بالاطة وفوقية زي ما انت عايز، وقول لي: الحكاية مش جهجهوني كده يا ديماجوجية يا شعبوية فيه خطة، فيه فكر، فيه منهج، الاخوان جماعة منظمة مش عشوائية زيكوا يا كلاب يا قطط يا فيران يا صراصير، الاخوان هم اللي في الشارع، الاخوان هم المعارضة الحقيقية، والنبي انا عتريس والنبي انا بلوة سودا حتى بصوا اني ح اخد الاتاوة الطاج طاجين...إلخ، بس اديني امارة للفتونة دي
مش عارفة ليه افتكرت فيلم بوحة لما كان المعلم بيضربه بالقلم في القسم وهو عمال يقول له: تسلم ايد يا معلم
بالنوسبة للناس اللي انا باحترمهم: ح نعمل ايه؟ ماهو ح نرجع تاني للحق احق ان يتبع، ما ينفعش ده يحصل في بلدنا ونسكت عليه، انا عارفة والله الناس المبضونة لها حق، بس ايه؟ لازم المطالبة بالغاء تحويل المدنيين لمحاكم عسكرية يبقى مطلب اساسي، ماحدش عارف بكرة فيه ايه، وما ينفعش تبقى اموال البيني ادمين عرضة كده للمصادرة بدون اي وجه حق، ثم ان دي حاجة لوجه الله يعني مش عشان حد، يا اخي لو واحدة جوزها بيضربها ح تحوش عنها حتى لو بعد ما انقذتها قالت لك: وانتش مالك انتش...جوزي وهو حر فيا، وللا ح تطنش؟

سؤال بيمغص في نفسيتي

هو الامن هدد بتوع الفضائيات بايه بالظبط؟
ياريت يشرحوا لنا بالظبط عشان نقدر نعذرهم بدل ما كل الناس نازلة شتيمة فيهم
يعني مثلا هل الامن هددهم بانه يقطع ارسالهم؟
عادي ممكن نجيبه من الاراب سات او حتى ينزلوا على الاوروبي
هل هددهم بقفل مقر القناة في القاهرة
عادي ممكن يبثوه من اي داهية في الدنيا ما الجزيرة مكتبها مقفول في العراق
وبيقدروا يجيبوا الصور اللي هم عايزينها من تصوير الموبايلات
هل هددوهم انهم يتقبض عليهم؟
بتهمة ايه؟
هم فاكرين الحكاية سهلة كده؟ مش فيه ام قانون في البلد دي؟ هو احنا امريكا؟
ما حدش يضحك لا فيه لسة شوية قانون
انا باتكلم بجد هويدا طه مثلا لو كانت وقعت في ايد امريكان ما كانتش خرجت وكانت اتقال عليها تبع تنظيم القعدة الحلوة
ولو مافيش قانون ما كانش اسلام نبيه واللي زيه كتير اتحبسوا
انا مش متفائلة بطبعي ولا متشائمة بس احب اشوف الصورة زي ماهي
برضه عايزة اعرف بتوع اعلام الفضائيات خايفين من ايه؟ واتهددوا بايه؟
هل عندهم حاجات مشينة مثلا وخايفين الامن يطلعها لهم؟ استغفر الله العظيم اللهم اخزيك يا شيطان بس برضه احنا عايزين نفهم
انا ما احبش اخد على قفايا، وبعد اللي حصل من الاعلام في الاضراب انا حاسة اني اخدت على قفايا، وثقت في ناس وقدرت ناس وطلعوا بيضحكوا عليا وفي اول محك بانوا
طيب ممكن ياخدوا فرصة ويشرحوا هم بيعملوا كده ليه؟ يمكن ما ادونيش على قفايا ولا حاجة واكون انا ظالماهم
لكن لو الحكاية كده وبس زي ما احنا شفناها ومافيش وراها عذر مقبول يبقى بصراحة بقى الإج إجك احسن برنامج
على الاقل طول الوقت متسق مع نفسه وبيقول انا رقاصة الحكومة والحكومة الطبال بتاعي
انا باحب الصراحة....مافيش احسن منها

تقرير مراسلنا للإج إجك

قام مراسلنا الاعلامي الاستاذ جمال بيه باعداد تقرير عن التغطيات الاعلامية لاحداث الامس، ويتمتع الاستاذ جمال بيه بصحة وافرة حيث يبلغ طوله ستة اقدام وعرض منكبيه اربعة اقدام، كمان انه حالة نادرة اذ يتمتع بمرارتين الامر الذي مكنه من التضحية باحدى مرارتيه ومتابعة برنامج الإج إجّك العالمي
وإليكم تقرير الأستاذ جمال بيه:
تامر أمين إبراهيم يوسف بسيونى خريج الألسن الذى بلغ منتصف الثلاثينات ممن ينطبق عليهم الإعجاز الإلهى الذى تلخصه الآية الكريمة ويخلق ما لا تعلمون، ذكر غير واضح الملامح ينتمى لفصيلة نادرة من المذيعين الملتزمين بخدمة سياسات الإعتام الحكومى، ويفوق الجميع فى ملكاته الآسرة التى تجعلك تنصت له وأنت تبسمل وتحوقل وتدعو الله كجدودك ليلة هجم عليهم بونابرته بقنبره فقالو يا خفى الألطاف نجنا مما نخاف، وقد أشاع عنه المغرضون أنه يستطيع سحب الأكسجين من سماء القاهرة وهى الملوثة أصلا والتى يعانى أكثر من ثلث ساكنيها أمراضا صدرية وضيقا فى التنفس، وتهاجمها ظاهرة بيئية تسمى السحابة السوداء فى مثل هذا الوقت من كل عام، والحق أنه لا يفعل ذلك، فوفق مصدر طبى معتبر فإن إطلالة المذيع إبن المذيع أخو المذيع أخو المذيعة تتسبب فى عوارض تنتمى للأمراض النفسجسمية وغالبها توهم وتخيل غير عضوى بوجود ألم فى منطقة الصدر وأعلى الحجاب الحاجز وأحيانا فى البواسير، وهى عوارض لا علاقة لها على الإطلاق بالأمراض الصدرية أو بسحب الأكسجين من سماء العاصمة مع بث البيت بيتك.
هذه المقدمة لازمة إذ أنه تجلى بالأمس وقدم واحدة من أبدع حلقات البيت بيتك والتى تناولت أكاذيب الشعب والصحافة التى تقول عن نفسها مستقلة وتحدث عن الفزع والرعب الذى يثيره حفنة من اعداء الشعب الذين يودون أن تنكسر مصر ويقع شعبها تحت سلطانهم من خلال ما يبثونه من سموم، لكن الشعب الفطن تنبه لهم، وقد أشار بحكمته التى تستخلص الحقيقة من ركام الغموض لعدة تلعيقات فى ريبورتاج تم بثه عن الحال فى القاهرة التقى فيه البرنامج مع مواطنين من الشارع انكروا جميعا معرفتهم بهذا الإضراب، ووضع تفسيرا رائعا بأن الحياة مرت زى الفل يوم 6 إبريل دون أدنى مظهر لاستجابة الناس لدعاة العبث، ومر عليه أنه بهذا التقرير قد دحض كلامه السابق من أن المعارضين الكارهين للوطن أعداء الشعب يثيرون الخوف والفزع فى قلوب الخلق. والإيفيه الأعلى الذى أظن أنه سيتسبب فى طرده من البرنامج أنه قدم دليلا على وقوع الإضراب فى مؤسسات التعليم حين قال أن ابنته فى الصف الثانى الابتدائى بعد أن أقنعها بالذهاب للمدرسة اتصلت به من هاتفها المحمول بعد وصولها بوقت قصير تعاتبه لما أرسلها ولم يحضر للمدرسة سوى طالبين فقط. قدم بشهادة الصغيرة البريئة صورة حقيقية للاستجابة للإضراب والتى ظنها دليلا على إشاعة الخوف التى ينسبها لأعداء الشعب والتى حالت دون وصول التلاميذ لمدارسهم.
كم أعشق تامر أمين إبراهيم يوسف بسيونى وتلك الدبلة العريضة فى إصبعه التى يستخدمها الشواذ للتعارف وأناقته التى تختصرها بدله الهوجو بوس وقمصانه الدبل مانشيت إنجليزية الصنع ذات ازرار الكف الذهبية وساعاته الفاخرة وصبغة شعره المائلة للفستقى وابتسامته غير المبررة دائما التى يحتل بها قلوب المشاهدين. أعشقه لأنه الدليل القطعى على تخلف الإعلام الحكومى الموجه مهما تلون بديكور جميل ولوجهات وأغنية لطيفة تقول بقالنا كتير ما شوفناش بعض. نعم لا نرى بعضنا رغم المرئيات التى تبثونها يا تامر يا أمين يا إبراهيم يا يوسف يا بسيونى. وسلملى على بابا.
----
كان معكم الاستاذ جمال بيه، الإج إجك، الكرتونة...الثلاجة