ملحوظة:
دي مدونة.. فاهمين يعني ايه مدونة؟ يعني محدتة من ام بلاش، بيفتحها واحد معبي في قلبه عشان يفضفض، يعني العالم الاول عملها لامثالنا من سكان العالم التالت عشان ينفسوا عن نفسهم
اصحاب المدونات مش من المشاهير، ولا هم الفنانة الاستعراضية جواهر، ولا هم قادة ولا زعما، دي مجرد ناس بترغي
ملحوظة 2:
زباين المدونة دول معلقين.. فاهمين يعني ايه معلقين؟ يعني بيكتبوا في التعليقات، عارفين ايه التعليقات دي؟ دي محدتة ببلاش برضه، واحد نفسه يتكلم برضه وعلى قلبه قد كده، نفسه يتخانق وخايف من المواجهة في الحياة العادية فبيدخل عند اي مدونة، ما يعرفش صاحبها، ولا صاحبها يعرفه، ولو شافه في الشارع مش حيعرفه، وبيعمل في الفضاء الافتراضي كل اللي نفسه يعمله في حياته العادية ومش قادر
دول مش جمهور، عشان الجمهور بيدفع فلوس، وحضرتك داخل هنا ببلاش، يعني ماحدش حيكلمك ويقول لك جمهوري العزيز، لانك مش شاري بفلوس، الفنانين وكبار الكتاب اللي بيقولوا جمهوري الحبيب، وقرائي الاعزاء دول عودونا على كده عشان بياكلوا عيش من ورانا، ماحدش في المحدتة دي بياكل عيش من ورا حد، لا انا باكل عيش من وراك ولا انت بتاكل عيش من ورايا، احنا قرفانين وبنطلع قرفنا في الخيال، بدل ما نقرف الناس في حياتنا، لا انت جمهور الفنانة الاستعراضية جواهر، ولا انت من اتباع القائد الزعيم، عشان لا فيه استعراضات ولا قادة هنا في ام الكمبيوتر ده
ملحوظة 3:
صاحبة المدونة دي كحيانة وبتمشي في الشارع بعشرين جنيه في شطنتها وساعات اتنين جنيه، وبتدخل البنزينة تمون بخمسة جنيه وعامل البنزينة بيضحك عليها
واصحاب مدونات كتير كده، اللهم الا اللي بيسترزق من ورا التدوين ودول مش كتير على فكرة.. في المجمل ماحدش من المدونين دول نجوم الفلوس والشهرة غيرته، لانه ما عندوش لا فلوس ولا شهرة.. ولا هو نجم اساسا، احنا كلنا على بعضنا على النت دي شوية بتوع كده، وفي اوروبا والدول المتغدمة بيسمونا
freaks
ولظروف طارئة على البلاد، النسبة الاكبر من سكان المنطقة فريكس، وبارك الله في صنع الغرب اللي بيخلينا ننفس عن اطوارنا الغريبة المكبوتة
ملحوظة 4:
لو حسيت ان العالم الافتراضي سيطر عليك لدرجة انك واخد الموضوع بجدية وبتتعامل مع صاحب مدونة ما على انه الزعيم جمال عبد الناصر وبتتعامل مع نفسك على انك سيد قطب اللي بيقول كلمة الحق في وشه ولا يأبه للمشنقة، دور لك على طبيب نفسي
بجد يعني، انت في خطر
ما تكبرش الموضوع والا تعيا
ملحوظة 5:
فوق بقى... احنا ما بنعملش حاجة.. ما بنعملش حاجة ابدا، اخرنا بنرغي، بنتكلم عن مشاكل ومش بنعرف نحلها، وممكن نقترح حلها، وممكن نختلف، بس في النهاية احنا الكحيت بتاع مصطفى حسين واحمد رجب.. احنا ولا حاجة
ولا حااااااجة
ولاااااااااا حاااااااااااااااااااااااااجةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة
خاااااااااااااااااااااااااااااالص
لو انا مثلا على سبيل المثال مناضلة، تقدر تقول لي عمالة اطول لساني على حسني مبارك وسايبني ليه؟ ما هو يا الراجل ديمقراطي، يا انا اللي بعوضة
واكيد هو مش ديمقراطي.. انا اللي بعوضة، واقل من بعوضة، عشان حتى البعوضة الناس بترشها، بترقعها وهي بتقرصهم، لكن احنا ولا حتى بنترش
ولو انا وانت مهددين النظام كان زمانا متحاكمين احكام عسكرية ومرميين في غيابات الجب مع اخواتنا اللي بيهددوا الامن
النظام المصري ما بيقضيش عشر ثواني يفكر فينا
والمدونة دي مدونة شخصية، بتاعة واحدة.. والواحدة دي ما تعرفكوش، ولا انتوا تعرفوها، والواحدة دي مش شريهان، ولا انتوا فهمي عبد الحميد، ولا انتوا بتدوها فلوس على اللي هي بتعمله، واللي هو ولا حاجة غير شوية رغي، يعني دي انا اتكلم فيها زي ما انا عايزة لاني واقعا باكلم نفسي
وبدل ما اكلم نفسي فعلا واتجنن، باتكلم على الكي بورد، واقعد اتخيل شخصيات قدامي واوجه لها الكلام، بس انا مافيش حد قدامي
ولا اللي بيدخل يعلق، هو مش قدامي، ولا انا قدامه، عشان اللي بيدخل يعلق برضه بيكلم نفسه، وكلنا تحولنا لكائنات بتكلم نفسها
مش وحش... الرغي مش وحش، اهو نشغل مخنا شوية بدل ما يصدي من القعدة
والخيال مش وحش، الخيال حلو
الخلط ما بين الخيال والحقيقة هو اللي وحش
انت بتكلم الكمبيوتر.. انت بتكلم الكمبيوتر.. انت بتكلم الكمبيوووووووووووتتتتتتتررررررررررررررررررررررر
مش بتكلم انسااااااان
فووووووووووووووق.. تخيل زي ما انت عايز بس فوووووووووووق
انا طول عمري من طفولتي وانا باتخيل طول الوقت، بس عارفة انه خيال، كنت باتخيل ان اسمي ليلى، وكنت بامسك المقشة واعملها مكروفون واغني فيها واتخيل اني مطربة، وكنت بالعب مع اصحابي لعبة انا الرقاصة وواحد منهم البلطجي وواحدة المطربة ونعمل خناقة في خمارة ونكسر اللي حوالينا، وكنا بنعمل فريق بوليس وندور على القتيل وننزل حفر في حوش المدرسة لما نطلع مصارينه عشان ندور على الجثة
بس كنا بنبقى عارفين انه خيال.. واحنا عيال صغيرة كده كنا عارفين انه خيال
فوقوا بقى.. المدونة دي خيال، والمعلقين دول خيال، واحنا بنتكلم في الخيال، عشان محتاجين ده بدل ما نتجنن في حياتنا العادية، واكيد لو قابلت واحد مجنون زي اللي انا عاملة له سبام ومصمم يكتب تلاتين تعليق في السبام حتلاقيه شخص لطيف وظريف ومش مجنون كده زي ما بيكتب، هو مضطر يطلع جنانه في السبام والا حيقتل قتيل
وانا كده
وانت كده
واصحابي على التويتر مش اصحابي
وانا على المدونة مش انا، وانت في التعليقات مش انت
ما يجيش واحد مهبوش اختلط الخيال بالحقيقة عنده هنا يقول لي انت اتغريتي على اساس اني نجمة الجماهير نادية الجنسي اللي الشهرة والفلوس غيرتها وعلى اساس انه الناقد العظيم سمير فريد
انا مش نادية الجنسي ولا هو سمير فريد، عشان انا ما عنديش شهرة ولا فلوس، ولا هو ناقد اريب، وانا ما اسميش جبهة التهييس الشعبية انا اسمي نوارة، وصحابي اللي بجد مش اللي في الخيال بيقولوا لي يا نونو او يا نوسة، واكيد كل الاسامي الكرتونية اللي بتدخل لي دي ما اسمهمش كده في البطاقة، وماهماش الناس اللي بتكتب دي
ابوس ايديكوا فوقوا بقى عشان كده الناس ابتدت تفوت بجد، النت ده علاج لمواطنين العالم الثالث، مش مفروض يتحول لمرض
هارش؟
ابدا.. ولا هارش ولا حاجة، عارف ليه؟ عشان انت مش في وعيك دلوقت، انت لابس الشخصية السرية بتاعتك وعايشها قوي زي ما خالد الصاوي بيعيش ادواره
لا.. انا متبعة المدرسة الانجليزية في التمثيل، مش المدرسة الامريكية، مش باروح بالشخصية، انا بادخل في الاحساس اول ما بيقول داير، واول ما يقول ستوب بافصل من الشخصية
درب نفسك على الموضوع ده عشان ما يحصلكش اللي حصل لجاك نيكلسون وتمشي تضحك لوحدك وتحرق الفلوس وتتجوز ستميت واحدة وتطلقها عشان مش عارفة تعيش مع عفاريتك
تأكيدات:
احنا ولا حاجة
مش بنعمل حاجة
وما لناش دور ولا حاجة
ومش بنغير حاجة
ومش حنعمل ثورة بام المدونات دي
ومش بنخدم بلدنا
احنا بنخدم مخنا عشان ما يوجش منا
واللي مش عارف الكلام ده، فورا حالا: اقفل الكمبيوتر واقعد لمدة شهر ما تفتحش النت لحد ما جرعة الادمان تخرج من دمك وتبتدي تبص للحاجة من بعيد وتعرفها على حقيقتها
