كابتشن، يا تصوت يا تقول لي ما صوتش ليه؟

اسم الله على مقامك، ربنا يبارك في نواضرك، شايف الاستفتاء اللي على جنب المدونة ده؟

>>>>>>>>>>>>>>

اه ده، لو سمحت يا تصوت عليه يا اما لو مش ح تصوت تقول لي ما صوتش ليه؟

ممكن؟ وللا مش ح تعبرني في دي كمان؟ :) يعني لو مش مستنضفني للدرجة دي اكيد مش ح تدخل المدونة اصلا

وللا ايه؟

عاوزة رأيكوا

تفتكروا ايه اللي ناقصنا في الفضائيات؟ يعني لو كل واحد عنده امكانية يعمل قناة فضائية ح يعملها ازاي؟ او ايه الحاجة اللي ناقصة وهو شايف انها محتاجة تكمل؟

انا ح اعمل استطلاع رأي وعايزاكوا تساعدوني فيه

تحديث:
استنوا استنوا استنوا، دلوقت فيه اتنين بيقولوا لي ان الامن ممكن يضايقنا! يضايقنا ليه
ما احنا لما عملنا استطلاعات الرأي، من حوالي خمسة وسبعين سنة لما كنت لسة في الجامعة، ما كانش معايا لا تصريح ولا كارنيه (كنت طالبة تحت التمرين) ولا اي حاجة وماحدش اتعرض لي
يبقى يضايقونا ليه؟ استنوا بقى ماحدش يعمل حاجة لحد ما اسألكوا

الطريقة دي اتعلمتها لما كنت باتدرب في الاهرام ويكلي وفي الشباب

اول حاجة عايزاكوا تقروا الاستطلاع واللي عنده اقتراحات يقول لي عليها

تاني حاجة، اللي ح يتطوع معايا يعمل الاستطلاع يبقى يقول لي ح يشتغل فين عشان ماحدش يكرر نفسه

اولا: الامكان المقترحة

1- محطة مصر

في اي محافظة انت فيها، يعني انا في القاهرة، وفيه ناس في اسكندرية وكده، اللي بتعمله انك تنزل تنقي ناس مختلفة عن بعض بشكل عشوائي، حاول بقدر الامكان تنقي ناس بيشكلوا الاغلبية، رواد الدرجة التالتة يعني، حاول ان وشك يبقى عليه ابتسامة جامدة لا توحي باي شيء، نبرة صوتك تبقى برضه باردة، لو قابلت اي حد مش بيعرف يقرا ويكتب بتقول له الاختيارات من غير ما تركز على جملة او تأكدها بصوتك، يعني صوتك يبقى شبه صوت الكمبيوتر، وابتسامتك تبقى مرسومة مالهاش اي معنى

2- الجامعات

القاهرة/ عين شمس/ اسكندرية/ حلوان/ المنيا....إلخ انا ممكن اشتغل في جامعة عين شمس لانها جنب بيتي، وح تتبع نفس الطريقة، الابتسامة المرسومة ونبرة الصوت الباردة، الطلبة ح توزع عليهم الورق مش ح تكتب بنفسك، هم بيرتاحوا اكتر لما هم اللي بيكتبوا بايدهم

وايضا الجامعات المفتوحة والجامعات الخواجاتي اللي انا مش باحبها

3- النوادي

دول بيبقوا ابوخ ناس الحقيقة، وردودهم بتبقى سخيفة، معلش، حاول تلبس شيك على قد ما تقدر، خصوصا الجزمة لازم تبقى غالية، عشان دي اول حاجة بيبصوا عليها، ولو لقوا جزمتك وحشة مش ح يردوا عليك، باتكلم بجد

نادي هيليوبليس جنبي ممكن برضه اعمله، مين عنده اكسس لنادي الجزيرة او اي نوادي على نفس المستوى؟

4- مواقف الاتوبيسات والميكروباصات

موقف العباسية جنبي، موقف احمد حلمي، موقف السيدة عائشة، واي حد جنبه موقف يقول لي عليه لو مستعد يشارك، وياريت يبقى فيه ناس من المحافظات يساعدونا في الموضوع ده، لان الاستطلاع المفروض يبقى مش القاهرة بس

مصر مش القاهرة، احنا دايما ننسى الحكاية دي

اي حد عنده اقتراحات تانية لاماكن تغطي اكبر نسبة من شرائح المجتمع؟

انا بافكر في كورنيش النيل وكورنيش البحر في اسكندرية

نموذج الاستطلاع

(قابل للاقتراح والتعديل)

الاسم

(اختياري)

النوع:

(اجباري)

السن

(اجباري)

مستوى التعليم

(اجباري)

المهنة

(غير مطلوب التفاصيل/ اجباري)

هل شاهدت خطاب الرئيس الامريكي باراك اوباما الموجه للعالم الاسلامي؟

نعم

لا

من هو باراك اوباما؟

ما رأيك في خطاب الرئيس الامريكي الموجه للعالم الاسلامي؟

- رائع.. بداية جيدة جدا

- مجرد كلام وننتظر الفعل؟

- انا لا اثق في اي رئيس امريكي

- لا يختلف في مضمونه عن خطابات بوش

- لا اعرف

هل لديك ملاحظات اخرى؟ 

------

طبعا ده نموذج اولي لحد ما يتم الموافقة عليه باجماع المشاركين او يتم تعديله وفقا برضه للاجماع

اللي بتعمله الاتي:

ح تقرر المكان اللي انت ح تنزل فيه (مش لازم تختار اماكن كتير، ممكن تاخد مكان واحد بس) وتطبع الاستفتاء ده وتصوره ميت نسخة بالظبط

ح تنزل المكان اللي انت قررته، زي ما قلنا لو الجامعة،  ح توزع الورق وبعدين تلمه منهم، حاول انك ما تنقيش شلة صحاب قاعدين مع بعض لان دول غالبا بيبقوا بيفكروا بنفس الطريقة، او على الاقل من نفس الخلفية الاجتماعية، ممكن اتنين من كل مجموعة

لو ح تنزل موقف او محطة مش ح توزع الورق ح تقراه عليهم بالطريقة اللي اتفقنا عليها بس

وخللي بالك: باللهجة العامية، ما تقراش الكلام ده بالفصحى، تستخدم لهجة عامية وصوتك يبقى عالي عشان يسمعوا كويس، والاحسن انك تقراها مرتين على اللي بتسأله

لو فيه ملاحظة، زي مثلا ان حد جاوب عليك وبعدين في نص الاجابة راح سايبك وماشي، اكتب الكلام ده

لما ترجع البيت ح تفرز الورق زي الاتي

عدد المصوتين من سن كذا لكذا: كذا

عدد المصوتين من المستوى التعليمي كذا (ولنقل جامعة/ ثانوية عامة/ دبلوم/ محو امية/ غير متعلم...إلخ): كذا

عدد الذكور: كذا

عدد الاناث: كذا

وبعدين تبتدي تفرز بناء على الاجابات

المشاركين في الاستفتاء ح تنزل اساميهم طبعا :) بس لازم يقول لي انا ح اشتغل معاكي ويشتغل معايا

لو ما حدش اشتغل معايا خالص انا ح اعمل الاتي:

ح انزل جامعة عين شمس، نادي هيليوبليس، محطة مصر، موقف العباسية

واظن دي عينة مش بطالة

بس الاحسن اننا نعرف المحافظات وبقية الناس

انا في انتظار مقتراحاتكم وتسجيل المشاركين، بس اللي ح يشارك يلتزم، وبيني وبينه ربنا، لو ضرب نتائج يبقى حسبي الله ونعم الوكيل بقى

:)

اعمل له ايه؟

ملحوظة تانية: ده لا يتضارب مع اي صحيفة او مجلة تعمل الاستفتاء ده

بس، معلش يعني من غير زعل، وبما اني اشتغلت في مطبخ الصحافة، الحاجة اللي بيبقى عليها فلوس ممكن نتائجها تنضرب، يقعد في المكتبة ويضرب نتائج عشان ياخد المكافأة، مالم يكون رئيس تحرير رزل يقول لي وريني الورق اللي اشتغلت بيه وهاتهولي هنا كله، زي ما عملوا معانا في الاهرام ويكلي، وبعدين يعمل مجموعة تانية تفرز الورق

بس الاهرام ويكلي كان فييس وما عندوش مانع انه يدفع مكافآت لكل دول في مقابل تبقى نتائج حقيقية، لكن فيه جرايد جلدة، يهمها تعمل عنوان وما يهمهاش تتأكد من النتائج

لكن المتطوع مافيش حاجة تجبره انه يعمل كده غير انه فعلا عايز يخدم

فمضمون اكتر انه مش ح يضرب نتائج

فائدة الاستطلاع:

1- معرفة حقيقية لاتجاهات الرأي العام

2- بناء على المعرفة دي اي حد عايز يخدم يقدر يقرر خطته

3- مجرد الاهتمام بالرأي العام بيخلي الناس عندها كرامة واحساس انها مشارك وان رأيها مهم

في انتظاركوا

يا احمد يا سعيد كفاياك شتيمة في الديانة اليهودية

احمد سعيد الوحيد في الدنيا دي اللي رغاي اكتر مني ومع ذلك سبحان الله امسك البوست بتاعه اكله اكل من كتر ما اسلوبه حلو قوي، مع اني ماليش تقل على الرغي، (اه انا ارغي وانتوا تسمعوني، ماحدش يرغي في وداني، انا براحتي دي مدونة واحدة رخمة اصلا) بس بقاله فترة ماسك اليهود ونازل على ابوهم سلخ من حيث كونهم ديانة مش من حيث استغلال الديانة دي في السياسة

كفاية يا احمد، كفاية

ترضى ده على دينك؟ ماهو برنارد لويس بيعمل في الاسلام اللي انت بتعمله في اليهودية

1- من الناحية الاخلاقية:

انا ما افهمش يعني ايه امسك عقيدة بيؤمن بيها ملايين البشر واشتحها بالطريقة دي، ده اسمه خطاب كراهية، ده معناه اني بافترض ان ملايين من البشر خلقة ربنا قتالين قتلة. انا لما حد بيعمل كده في الاسلام باقول انه عايز يبرر المذابح الجماعية اللي ما تميزش حد عن حد لمجرد انتماءه للاسلام، ماهي مالهاش اي معنى تاني

طب ما الهندوس بيؤمنوا بنظام طبقي امسكهم واهزأهم؟ لا، انا باحترم الديانة الهندوسية، ومش معنى اني احترم دين معين اني ادخل فيه، بس اذا كنت حتى ما اعرفش ولا كلمة عن ديانة بيؤمن بها الملايين يبقى على الاقل احتراما لادمية البني ادمين المؤمنين بيها لازم احترمها، مش اللي خلقني هو اللي خلقهم؟

2- من ناحية المصلحة

المصلحة تقول اني اسعى في اتجاه فصل اليهودية عن الصهيونية مش أؤكد ان الصهيونية متجذرة في العقيدة اليهودية لان كده ابقى هتلر بجد، ثم ان ده بقى معناه اني قدامي اختيارين، يا اما ابيد ديانة بحالها يا اما استناهم لحد ما يبيدوني، يعني صراع ابادة
والرسول قال على العنصرية (التحييز لعرق او قبيلة) انها منتنة، وانها دعوى الجاهلية، وده لما ايه؟ لما واحد من المهاجرين قال يالمهاجرين وواحد من الانصار قال ياللانصار
الصراع ضد العنصرية اخلاقي
لكن صراع يا انا يا هو صراع عنصري، والمفروض اني ضد الصهيونية لانها بتحول ديانة زي اي ديانة تانية الى عنصر ارقى من بقية البشر وعليه فهو حلال له انه يموت الناس
اقوم اقول ان اليهودية هي الصهيونية؟ باساعدهم يعني؟ ده محبب ما عليهم
ايه الفرق بيني وبين مناحم بيجين بتاع: كل من ليس يهودي فهو وحش او حيوان او قطيع ماشية على احسن الاحوال؟

3- من الناحية الواقعية

يعني لسة اول امبارح دكتور اسمه روبنسن يهودي مرفود من شغله في احدى الجامعات الامريكية (اتفرجوا يا بتوع الديمقراطية الغربية والليبرالية) وبيتحقق معاه

عارفين ليه؟

فاكرين الصور اللي كانت بتقارن بين النازي والصهيونية؟ اللي عجبتنا قوي وقعدنا نوزعها في كل حتة؟

فضلوا يدعبسوا ورا مين اللي عملها لحد ما طلع البروفيسير روبنسن اليهودي هو اللي عملها، وح يروح في داهية ويتقطع عيشه

وقبل كده دكتور تاني كتب عن صناعة الهولوكوست، يهودي برضه، واترفد من شغله

لوجه الله

مش عايزين مننا حاجة ولا بيقبضوا زي ناس كلنا عارفينهم شوية من صدام وشوية من القذافي وشوية من المعونة الامريكية وشوية من بلاد تركب الافيال عشان يعملوا مناضلين

كفاية يا احمد، اعادة تصنيع الكراهية لدين مش ح تحل حاجة
كل مجموعة بشرية فيها كده وكده، والا بقى تقبل ان الناس تقول كل المصريين زي حسني مبارك.... طب والله لو ما بطلت لاطلع اشاعة على المصريين ان ممثلهم الاوحد حسني مبارك وانا معاهم هه

وعلى فكرة بقى، وكلام ده من مصادر اولى، بتوع المقاومة مش بيكرهوا اليهود، مش بيكرهوا حد خالص، بيكرهوا الفكر الصهيوني

ولو كان قلبهم فيه كره ما كانوش عرفوا يضحوا بنفسهم، وشفت منهم بعض ناس لما تشتم اليهود قدامهم يستاءوا جدا

لانها فعلا حاجة مش انسانية، ومش في المصلحة

هي اسرائيل دي مين اللي عملها؟ اليهود؟ وللا انجلترا؟ ومين اللي بيديها السلاح؟ اليهود هم اللي بيصنعوه؟ وللا امريكا هي اللي بتبعته ليهم؟

مين اساسا اللي كل شوية يقلب عليهم غنيوة الهولوكوست عشان يخليهم دايما تحت احساس ان كل الناس عدوينهم كل الناس بيكرهوهم نافع هو اللي بيحبهم نافع هو خطيبهم

مين اصلا اللي عمل الهولوكوست مش هو نافع اللي ينشك في معاميعه؟
ده كتاب صناعة الهولوكوست بتاع الدكتور اللي اترفد نورمان فنكلشتاين بيثبت فيه ان صناعة الهولوكوست بدأت تنشط بقوة في امريكا بعد انتصار اسرائيل سنة سبعة وستين لان زي ما احنا عارفين قبل سبعة وستين امريكا كانت لسة بتشاور عقلها ومش عارفة ح تراهن على مين في الشرق الاوسط لحد ما اسرائيل اثبتت قوتها فقالت انا لاعبة على الحصان ده بعد ما كانت بتلعب على الحبلين

هي اسرائيل دي ايه؟ اسرائيل دي فسلة حزب الله يدبها على دماغها دبتين تمشي تقول: انا حسحس وحسحس انا

المشكلة في اللي بيديها سلاح، المشكلة في اللي اسسها من اصله

انا عايزة افهم، من امتى هجرة اليهود الخواجات كانت اعجوبة بالنسبة للعالم العربي والاسلامي؟

بمعنى اخر

لو كان كلللللللللللللل يهود العالم لموا بؤجتهم وجم زي الناس المحترمة وقعدوا في فلسطين زيهم زي اي حد بيهاجر من غير عصابات ولا كيان صهيوني ولا يطردوا الناس من بيوتها، لو كانوا حتى اشتروا كل البيوت اللي حوالين القدس واتملكوا زي اي مواطنين محترمين وزي ما كانوا بالفعل متملكين في مصر وقاعدين واكلين شاربين متهنيين ومدلعين اخر دلع وقعدوا زي ما كانوا قاعدين قبل كده، زي ما اليونان والارمن والطلاينة هاجروا عندنا كتير منهم هم كمان

كان حد كلمهم؟ هو احنا من امتى اي حد بييجي يعيش عندنا بنقول له لا؟ 

مين اللي سلحهم وعمل منهم عصابات هجانا وقوم في دماغهم دولة عنصرية قائما على ابادة السكان الاصليين؟ ما كانوا طول عمرهم بييجوا

ثم يا سيدي ده لو الكلام ده صحيح المفروض من مصلحتنا اننا ننفيه ولو بالكدب مش نأكد ان ايوة اليهودية هي الصهيونية 

عشان ايه؟

عشان يبقى اللي ضد الصهيونية يبقى ضد ديانة بحالها؟ وديانة المفروض انك بتدعي كمسلم انك مؤمن بيها؟ طب ما احنا كده بنناقض نفسنا، منين بنقول موسى نبي عيسى نبي محمد نبي ومنين اليهود دول بديول وقرون؟ وبعدين ما هو ده التفكير اللي احنا عايزين نغيره امال بننتع في قلبنا ليه وبنقول: معاداة اسرائيل ليست هي معاداة السامية؟ واحمدي نجاد راح اتهزأ في مؤتمر العنصرية؟ هو كان بيقول ايه غير ان اليهود حاجة والصهيونية حاجة تانية؟ انت بتلبسنا تهمة النازية؟ هو احنا ناقصين؟
يا راجل يا مفتري... تقول على الناس بتشرب دم عيال صغيرة؟ اعمل فيك ايه بس؟ طب ايه رأيك ان اوروبا كلها فاكرة ان الاسلام بيبيح الاغتصاب، ومقتنعين تماما واللي فيهم مش عنصري بيقول: مش كل المسلمين ملتزمين مية في المية بالاسلام، فيه مسلمين كويسين، وتعالى بقى قول لهم الكلام ده مش صحيح، يضحكوا او يتصعبوا عليك لانك يا قلب امك مش عارف دينك
والله واحد قال لي كده
حد في الدنيا دي يقول على ناس بتشرب دم عيال صغيرة؟ يعني انا ح افترض معاك ان الكلام ده حصل في مجموعة صغيرة منهم او طايفة من الطوائف، يعني ينفع واحد يمسك طائفة الحشاشين الباطنية ويقول الاسلام بيبيح الحشيش؟ وهم كل المسلمين مساطيل كده؟

والف دورتي وارجع للاخلاقية

امشي عدل يحتار عدوك فيك وربنا اقام الكون بالعدل

اللي يرضى على دينه يتعمل فيه كده يبقى يرضاها على اديان الناس 

استفتاء مهم ارجو التصويت

عمرو غربية عامل الاستفتاء ده ارجو منكم انكم تدخلوا وتجاوبوا عليه لاني اظن انه مهم جدا، واظن ان مناقشة الاستفتاء ده بعد ما يخلص مع عمرو ومع اللي شاركوا فيه ح يبقى مهم جدا

ادي النك تاني اهو اتفضلوا هنا

ارقعوا بالصوت الحياني هنا ضروري

انا عايزة افهم انا ما متش لحد دلوقت ازاي؟ جالي الميل ده من امي:

التلفزيون الايطالي يجري هذا الاستفتاء: من هو الذي انتهك القانون الدولي خلال حرب غز؟

هناك اربع اختيارات:

اسرائيل بالقائها قنابل الفسفور على المناطق السكنية.

(اضغط هنا)è Israele, con le bombe al fosforo in centri urbani

حماس باستعمالها المدنيين والنساء والاطفال كدرع وقائي.

Hamas usando civili, donne e bambini, come

 

الاثنين معا.

Hamas usando civili, donne e bambini, come

لا احد منهم.

Nessuno dei due

 

انصار بني صهيون شغاليين فماذا انت فاعل, انصر الحق واختر: اسرائيل بالقائها قنابل الفسفور على المناطق السكنية.

Israele, con le bombe al fosforo in centri urbani

صوت وارسل هذه الرسالة لمن تعرف في كل انحاء العالم

http://www.sondaggi.rai.it/index.php?sid=39195&lang=it

---------

ايه الاسئلة دي؟ هو العالم اتجنن يا ناس؟ العالم اتجنن؟ فيه حاجة في الدنيا اسمها كده؟ يعني المسئول عن ضحايا هيروشيما ونجازاكي هم اليابانيين عشان دخلوا الحرب العالمية التانية؟ المسئول عن الهولوكوست هم اليهود عشان سيطروا على الاقتصاد؟ المسئول عن محاكم التفتيش هم العلماء عشان كانوا بيقروا كتب كيميا؟ المسئول عن المليون شهيد هي المقاومة الجزائرية عشان كانوا بيقاوموا؟ المسئول عن ضحايا ثورة تسعتاشر هو الشعب عشان خرج في مظاهرة؟ او سعد زغلول عشان اتقبض عليه؟ المسئول عن العدوان الثلاثي هو احنا عشان اممنا القناة؟ المسئول عن احتلال النازي لفرنسا هي فرنسا عشان مش نازية؟ المسئول عن قتلى فييتنام من المدنيين هم المقاومة الفييتنامية؟ المسئول عن قتل سيدنا حمزة هو سيدنا محمد صلى الله عليه وسلم عشان قبل الرسالة وهاجر؟ 

معقولة المناقشة دي؟ اولع في مين انا دلوقت؟ ده مافيش زمن في الدنيا الحق فيه واضح والباطل واضح زي زمنا ده

هم البني ادمين ايه اللي حصل لهم؟ وانا اللي ظلمت المصريين وقلت التلوث هو اللي عمل فينا كده؟ ده احنا قمر والله، ده احنا اسياد العاقلين، طب احنا عندنا تلوث، دول عندهم ايه؟

بخصوص تعليق رئيس الوزراء على المدونات

دلوقت فعلا في مدونة على اسم مصر فيه حد دخل وعلق بوصفه رئيس الوزراء المصري والخبر اتنشر هنا، طبعا كلنا اخدنا الموضوع تهريج وقلنا مش هو، مش معقول يكون هو رئيس الوزراء، مش ممكن رئيس الوزراء يكون بيفتح المدونات
يا ليلة سوخة
يعني رئيس الوزراء شاف فيديوهات العشوائيات دي؟
وشاف كفر العلو ده؟
وشاف البؤس اللي مالي الملفات دي
ودي
شاف ده بالذات؟
شاف الحملة دي؟
شاف اللي حصل للناس في المحلة؟
شاف اللي حصل للفلاحين؟
وبتوع كفر البطيخ؟ وحرقتنا على العبارة وبراءة هاني سرور والتلاتين في المية؟ ومعتقلي ستة ابريل؟ والعيال اللي رفعت علم مصر واتقبض عليها؟ وحادثة مستشفى المطرية؟ وحنفي ابو دقة وغير ابو دقة وغيره وغيره؟
شاف كل ده وفي الاخر بيرد علينا الرد ده؟ انتوا عايزين تنقطوني؟
لا طبعا...مش ممكن يكون هو احمد نظيف....ده اكيد الاستاذ بهيج، انا متأكدة...اكيد هو
----
ايه ده؟ انا لسة واخدة بالي انهم كاتبين جبهة التهييس (الهبل) الشعبية
انا هبل برضه؟
الله يكرم اصلهم
:)

بقية احداث إسنا

وده إيه ده كمان لا والمصري اليوم مخططة تحت النقطة الهامة في الخبر ومكبراها
معناتو ايه بقى الكلام الماصخ ده؟ هو فيه ايه يعني ايه اللي بيحصل
ومش عايزة تخمينات والنبي عشان احنا زهقنا من التخمينات انا نفسي مش عارفة ايه الحكاية
ما طول عمرنا عايشين يعني ومش من المعتاد ان المسيحيين بيكرهوا المسلمين والمسلمين بيكرهوا المسيحيين زي ما مينا امبارح كان بيقول لي
الكلام ده مش صحيح مش طول عمرنا بنكره بعض وما ينفعش نسحب اللي بنشوفه دلوقت نسحبه على اللي فات ونقول طول عمرنا كده
لا مش طول عمرنا لما واحد مسلم يتخانق مع واحد مسيحي تقوم الكنيسة تنضرب والمسيحيين يترنوا علقة وتتحرق محالهم
والنبي اللي بيلعب في البلد دي يسيبها في حالها الضرب في الميت حرام
ده بالنوسبة للسطر اللي المصري اليوم مخططة تحته....ابعدوا عنا بقى الله لا يسيئكوا
اما بالنوسبة للانبا بيمن
حضرته بيقول الاشتباكات اللي حصلت بين المسلمين والمسيحيين!!!!! هو فيه اشتباكات؟
هي فين الاشتباكات يا سيد؟ فين الاشتباكات؟ في الاشتباكات؟
انا اللي فهمته من الاحداث ان فيه ناس ضربت وناس انضربت
دي حاجة تانية غير اشتباكات، الاشتباكات بيبقى الطرفين بيضربوا بعض لكن اللي حصل ان فيه طرف ضرب وطرف انضرب وطرف تالت مشكوك فيه من الطرفين الاولانيين وبيعملوا تصرفات مريبة وبيتردد ان معاه سلاح
معناتو ايه الكلام ده
ومين الخسران في ده كله؟
ثم برضه مع احترامي للانبا بيمن اللي ادان تصرف واحد قال لواحدة شيلي النقاب وقال دي مش من اخلاق المسيحية
طيب على فكرة كتير قوي بيقولوا للمنقبات شيلوا النقاب عشان نعرف انتوا مين وهو كان شاكك انها حرامية
غلطان وللا مش غلطان ده تصرف عادة بتكون نتيجته الطبيعية والمنطقية ان المحال تتحرق والكنيسة تتضرب وتتكسر؟
ماهو ما ينفعش التلييس كده ياخوانا
اذا كان فيه فئة مسلحة صحيح واهل المدينة ابلغوا عنها يبقى لازم نتكلم بوضوح
الكنيسة تم الاعتداء عليها والمسيحين انضربوا ما اشتبكوش
مين اللي عمل كده ومين اللي ورا ده لازم نشوف ونبحث كويس
لكن نظام لو اتخانقتوا ح اذنبكوا انتوا الاتنين بيدي فرصة لايدي خفية تتلاعب في الشئون الداخلية

إيه يا عم الأمور

حيران فيا ليه يا ح الظابط؟ مالك؟

بدل ما كل شوية تبعت لي ناس

مرة تبعت لي واحد ضخم الجثة مشرئب الفلنكات شلولخ

وعينيه ملونة ويقول لي انا شيعي زيك

واظن هو قال لك اني قلت له: انا مش شيعية خالص

ده انا سنة على ابوه

قال لي: يعني ايه

قلت له يعني باحب عمرو بن العاص

طبعا واحد ضخم الجثة مشرئب الفلنكات شلولخ

وعينيه خضرا وجايب خمسين في المية

ايش عرفه هو برأي الشيعة في عمرو بن العاص؟

اتلخبط وبص لي بصة غبية

وبعدين تبعت لي واحد شلولخ تاني يقول لي انا سعيد

بانك في اليسار معانا

اقول له انا مش في اليسار

يقول لي وش كده: امال اخوان؟

قلت له ولا اخوان

يقوم يقول لي وش كده: امال تصنيفك ايه؟

وتبعت لي واحد شلولخ تالت يقنعني بان التعذيب حلو

جميل

واني مش مفروض اتضايق منه لان نفس اللي بيتعذبوا مبسوطين من التعذيب

ده غير الشلولخ الاصلي اللي زاقينه عليا كل شوية يتصل بيا

الا هو راح فين صحيح؟ اختفى كده وبقى واحد تاني كل شوية يتصل بيا

ويسألني اسئلة وش برضه

مالك يا عم الامور

بتبعت لي شلولخات ليه وتاعب نفسك؟

ما تبص فوق

ايوة فوق اليافطة اللي فوق دي

مكتوب ايه؟

جبهة التهييس الشعبية

هي دي تصنيفي يا ح الظابط

خلاص؟

انت مش مصدق ليه؟

عجبتني ابتكارة وائل عباس لما اتسأل هو راخر على تصنيفه

وقال: احنا جيل ما بعد الأيدلوجية

هئ هئ هئ

ملعوبة يا وائل

حلوة دي يا ح الظابط؟ حلوة ما بعد الأيدلوجية دي؟

وللا ح تعملوا لنا تنظيم التهييس الشعبي لقلب نظام سيكام؟

ارحموني بقى

وبطلوا تبعتولي شلولخات عينيهم خضرا

الا هم ليه معظمهم عينيهم خضرا؟

انا باقول معظمهم اهو عشان اللي مستلمني اليومين دول فلت من العينين الخضرا

بس شلولخ برضه

كلهم الحقيقة ناجحين هيئة ماحدش فيهم داخل بواسطة

ما تكلفوش بقى نفسكوا عشان انا دماغي بتوجعني

وللا بتحللوا المرتب وللا ايه؟

آه ملحوظة: بلاش برضه الجنود المجندين ماركة صحفيين والنبي

عشان رغايين وبياكلوا دماغي

نقوا لكوا حاجة كده تبقى دكتور مهندس

او ميكانيكي

اهو يصلح لي العربية وانا ارد على اسئلته

نتيجة الاستفتاء: بيني وبينك سور ورا سور

ده كان سؤال الاستفتاء

في حرب تلاتة وسبعين الجنود مشيوا على الالغام عشان يأمنوا طريق للدبابات. لو اتكررت الحرب عندك استعداد تمشي على الالغام وتصد

بجسمك المدافع؟

اللي صوتوا في الاستفتاء كانوا حوالي تلاتة ونص في المية من اللي بيدخلوا المدونة

اي والله

عدد المصوتين كانوا

230

عدد اللي دخلوا لي في الست ايام بتوع التصويت

حوالي ستلاف ونص او ازيد شوية

وعدم الاقبال على التصويت ده في حد ذاته تصويت

يعني الستة وتسعين ونص في المية اللي ما صوتوش من زوار المدونة

ممكن يبقى فيه جزء منهم مش مهتم اساسا

ممكن جزء تاني شايف انه حرب ايه هو ح يبقى في حرب تاني اصلا؟

جزء تالت بيقول ايه السؤال اللولبي ده؟ وانا ايش عرفني

جزء رابع ح يقول: مافيه كاسحات الغام

جزء خامس ح يقول انا ماليش جيش

جزء فعلا مش عارف يرد على السؤال

ده بالنوسبة للي ما صوتش

اللي صوت بقى

: النتيجة كده

تلاتين في المية قالوا: ياريت ده انا اتمنى

تمنتاشر في المية قالوا: مش عارف ح اعمل ايه ما فكرتش

تلاتة في المية قالوا: لا متهيالي ح اخاف

اتناشر في المية قالوا: وهي دي بلد الواحد يموت عشانها

خمسة وتلاتين في المية

(وهي النسبة الاكبر)

قالوا: على حسب باحارب عشان ايه ومع مين لو الحكومة دي هي اللي ح تحارب مش ح احارب معاها

امممممممم

مبدئيا انا احب احيي التلاتة في المية اللي قالوا ح اخاف

لان دي حاجة انسانية جدا، واعتقد ان اللي عنده شجاعة انه يعترف بالخوف

ح يبقى عنده شجاعة القتال

--

الحقيقة الهدف من الاستفتاء ده مش اني اعرف كام في المية مستعد يحارب

ويموت عشان مصر

لان فعلا ما حدش يقدر يعرف غير اذا حصلت بالفعل حرب

لكن هدفي هو اننا نعرف قد ايه تراب متكوم على حبنا لبلدنا

الحقيقة ان النتيجة: بيني وبينك سور ورا سور

وانا لا مارد ولا عصفور

اكبر نسبة شايفة انها ما عندهاش استعداد تموت

طول ما البلد ظالمة

لو جمعنا نسبة الناس اللي مش متأكده انها ممكن تموت عشان مصر

ح تطلع على بعضها سبعين في المية

شوية صغيرة قوي اللي هم اتناشر في المية زعلانين من مصر نفسها

وشايفين انها بلد ما تستاهلش

وخمسة وتلاتين في المية زعلانين من الظروف اللي مزعلاهم من البلد

اللي هي الحكومة وحاسين ان الحكومة دي هي الحائل اللي بينهم وبين بلدهم

وهي السور ورا سور

وهم لا مارد ولا عصفور

وممكن يكون جزء من اللي صوت على انه مش ح يحارب مع الحكومة الحالية

يكون خايف من الموت ومكسوف يعترف بده قدام نفسه وعايز يلاقي تبرير

وممكن يكون فيهم جزء شايف ان دي حكومة كافرة مثلا

وتلاتة في المية بانسانية شديدة عبروا عن مخاوفهم

وتمنتاشر في المية اظن ان مشاغل الدنيا واخداهم لدرجة انهم

ما فكروش ان مصر ممكن تبقى في خطر

او ان الاخطار اللي بيتعرضوا لها كل يوم في الاتوبيس مثلا

ممكن تبقى اولى بتفكيرهم

النتيجة ان المصوتين اكيد مش بيكرهوا مصر

بس هم زعلانين قوي

بالنوسبة للتصويت

أولا خدامتكوا لسة ما رقعتش بالصوت في التصويت ده

ح استنى اصوت اخر يوم

ثانيا

انا حريصة ان التصويت يبقى نزيه

وارجو من السادة العملاء الالتزام بالتصويت مرة واحدة

فقط لا غير

ومافيش داعي حكاية التصويت من عدة اجهزة ولا مسح

الانبوكس اللي في كوكيز وكده يعني

ثالثا

ارجو انك تاخد نفس عمييييييييييق من الهواء النقي

وتتخيل ان مصر في حرب فعلا وانك على الجبهة فعلا

وانك مخير ما بين انك تكمل او ما تكملش او تحارب او ما تحاربش

وبعدين ترقع بالصوت على الاستفتاء

يعني مافيش داعي للتسرع

ولا التصرع

وبعد ما يخلص الاستفتاء وهو قدامه أسبوع

نبقى نحلل النتيجة مع بعض

كل واحد يجيب علبة عشان ياخد التحليل بتاعه فيها