مولاي صلي وسلم دائما أبدا على حبيبك خير الخلق كلهم

رمضان كرييييييييييييييم

:)

محمد سيد الكونين والثقلين والفريقين من عرب ومن عجم

لو تعلمون ما في رمضان لتمنيتم أن تكون السنة كلها رمضان

انا مش عارفة السنة دي بالذات رمضان مأثر في مشاعريني وسنتمنتالياتي كده ليه؟ مع انه كان متعب بصراحة السنة دي، وقبل ما ييجي كنت خايفة منه قوي، بس اهو جه وخلص، مش عارفة ليه عمالة اسمع الغنوة دي واعيط
اول سنة اعمل كده في حياتي كلها

لو تعلمون ما في رمضان لتمنيتم أن تكون السنة كلها رمضان

هوف هوف

هي السما منورة وللا انا بيتهيألي؟

السما الليلة دي شكلها حلو قوي، انا ح ابقى ابص على الشمس بكرة وهي طالعة ان شاء الله

اسيبكوا بقى واقوم اقول لي دعوتين

هو عمر رجع فدك لولاد ستنا فاطمة؟

اصل ابراهيم عيسى بيعمل برنامج لسة ابتديت اتابعه من قريب، اصل لقيته بيتكلم عن عمر :)، انا مبسوطة في تلات اربع حلقات اللي ابتديت اتابعها، بس قال حاجة النهاردة، قال ان عمر رجع فدك لولاد السيدة فاطمة وبعدين اخدها عثمان واداها لمروان بن الحكم وبعدين رجعها عمر بن عبد العزيز لولاد ستنا فاطمة تاني

انا اللي فاكرة كويس اني قريته ان عمر بن عبد العزيز هو اللي رجع الارض لاهل البيت، مش متذكرة اني قريت ان عمر بن الخطاب رجعها، ومكسلة ادور في ابن كثير قبل الفطار، تؤ.... لا، لا ما رجعهاش، لو كان رجعها كنت ح افتكر لان الموضوع ده كان غايظني ومضايقني، انا بانسى كل حاجة اه، بس ما انا فاكرة ان عمر بن عبد العزيز رجعها

بالليل بقى ابقى ادور في خبر فدك واقول لكوا، او حد يعرف موقع عليه البداية والنهاية مش بي دي اف؟

بس ماحدش والنبي يروح يجيب لي من موقع سعودي وللا سلفي كلام فارغ، عشان الواحد لما بيسمعهم بيتكلموا عن اهل البيت شعره بيقف، فيه كده؟ عاملين دعاية ضد اهل بيت النبي اللي هم المفروض مؤمنين بيه؟ كتر خيرهم ما شتموش النبي نفسه
---
تحديث
انا عمالة ادور اهو في الاجزاء ستة وسبعة وتمانية في ابن كثير مش لاقية خالص ان عمر بن الخطاب رجع فدك لاولاد السيدة فاطمة
اللي رجعها عمر بن عبد العزيز، ده اللي وارد في البداية والنهاية
لازم هو جاب الكلام ده من مرجع تاني مش من البداية والنهاية، او الذهبي ولو حد يعرف مصدر تاني من المصادر ممكن يفيدنا في الموضوع ده يقول عشان هو اكيد عنده مصدر صحيح للرواية دي
ح ادور في ابن سعد، وبرضه ح ابص في الذهبي احتياطي

اقتراح

انتوا متابعين نفسكوا من اول رمضان؟ دي فرصة كويسة والشياطين محبوسة ان الواحد يعرف بالظبط ايه اللي منه وايه اللي من الشيطان، والله هو اللي من الشيطان لطيف وسهل واخره اعوذ بالله من الشيطان. عموما لو مش متابع قوي ممكن تبتدي من دلوقت، مش ح تكتب بقى عيوبك، ح تكتب الموقف، او لو دماغك بتشيل كويس، (بس تكون بتشيل كويس قوي فوتوغرافية يعني) لو انت من النوع اللي مش بيشوف غلطه يبقى تكتب الموقف زي ماهو كده وبعدين تعكسه بس تعكسه مش مع نفس الشخص عشان انت اكيد ح تبقى مأير منه، مع شخص تاني يكون هو بالنسبة لك زي انت بالنسبة للشخص التاني

هههههههههههههه اقطع دراعي ان كنتوا فاهمين مني حاجة

يعني مثلا، انت قلت كلمة لحد اكبر منك، مثلا مثلا، وهو زعل ورد عليك رد معين، انت شايف انك مش غلطان، اعكسها بقى وحط في الموقف حد اصغر منك بنفس فرق العمر، تقوم لما تتخيل الموقف وتلاقي نفسك زعلت تعرف ان من عيوبك انك وقح مثلا

هو مثال اهبل طبعا بس باحاول اوضح لكوا وجهة نظري

عشان لما الواحد يعرف يعمل ايه؟ مش عارفة، بس اهي معلومة الواحد يعرفها برضه

-------

انا عارفة اني بقيت اكلمكوا عن حرب الجواسيس كتير، بس هي فعلا سيطرت على مشاعري وشغلت كل حياتي وفكري، حلقة امبارح عملت كده: شلومو قال لباروخ انه ح ينزل نبيل مصر عشان لو نبيل متراقب يتقبض عليه في مصر ولو مش متراقب يرجع لهم بسامية بحجة انها ح تيجي تشتري عربية

وبعدين شفنا نبيل راح مصر وقابل سامية وقال لها تجيله ايطاليا وتتحجج بانها ح تشتري عربية

وبعدين اخدت نبيل عند مامتها وقالت لها انها رايحة ايطاليا تشتري عربية

وبعدين شفنا سامية وهي بتقدم اجازة اسبوعين وبتقول لرئيس التحرير انها رايحة ايطاليا تجيب عربية وهو بيقول لها لا انت رايحة لنبيل

وبعدين شفنا هشام سليم وهو بيحكي للراجل ده اللي قاعد يسمع حدوتة قبل النوم وبيقول له ان نبيل راح مصر عشان يجيب سامية ايطاليا بحجة انها ح تشتري عربية

وبعدين (ملحوظة: اظن مش متوقع مني اني اكدب او ابالغ وانا صايمة يعني، وبعدين ده في التلفزيون وكل الناس شافته، يعني مافيش داعي حد يستهتر بكلامي ومشاعري) وبعدين منة شلبي (والله العظيم) راحت لهشام سليم وقالت له ان "اياميها نبيل جه مصر وطلب مني اني اروح ايطاليا" عملوا فلاش باك لشلومو وهو بيتفق مع نبيل انه يجيب سامية ايطاليا بحجة انها ح تشتري عربية، وانا الحقيقة مش فاهمة وضع الفلاش باك ده ايه؟ يعني لا الظابط بيفتكره ولا سامية بتفتكره لانه اتفاق ما بين نبيل وشلومو، يعني كان مفروض يا نبيل يا شلومو هم اللي يفتكروه

وبعدين رجعوا من الفلاش باك اللي مش بتاعهم بس هم افتكروه بالتليباثي وهشام سليم قال لها وعملتي ايه؟ قالت له: قدمت على اجازة و.. وراحت حاكية الحلقة تاني، سابع

الللللللللههههههههههههه

انا عمري ما شفت حاجات حلوة كده، انا مبسوطة قوي، ما تنسوش تعملوا النوتة اللي باقول لكوا عليها، ومعلش استحملوني في الفترة اللي جاية بالنوسبة لحرب الجواسيس، اظن اني ح اقعد اتكلم عنها حتى بعد رمضان 

طب انت ح تعمل ايه يا استاذ جمال؟

بمناسبة الشهر الفضيل، ونظرا لحبسة الشياطين فانا في اقصى حالاتي السنتمنتالية المهترئة بحيث اني واخدة قرار (اظن انه مؤقت) اني اعذر الناس على قد ما اقدر، ومن ثم فانا مش ناوية اقسو على حد، حتى المفتريين، بس والله، اخوة ومحبة ولوجه، الاستاذ جمال ح يعمل ايه؟ يعني انا عمالة اقول انا لازم احط نفسي مكان الناس عشان ارحمهم يمكن ربنا يرحمني، طب انا باحط نفسي مكانه، ح اعمل ايه؟ ح تعمل ايه يا استاذ جمال؟ لا حولا ولا قوة الا بالله، والله العظيم صعبان عليا، والله صعبان عليا

فيه حكاية قريتها زمان قوي بس فاكراها كويس جدا لانها اكلت دماغي، في الطبقات الكبرى لابن سعد، الجزء التاني، الطبقة الاولى من الصحابة، فصل عمر بن الخطاب، ولحد وقت قريب كنت فاكرة الصفحة كمان بس بقى السن

الحكاية بتقول ان سيدنا عمر وسيدنا العباس عم الرسول كانوا اصحاب قوي، واتفقوا مع بعض ان اللي يموت فيهم الاول ييجي للتاني في الرؤيا ويقول له ايه الاخبار، لو فيه خير معين يستزيد منه، حاجة غلط هو مش واخد باله منها كده (سبحان الله على اليقين). قام جه عمر اتقتل في حياة العباس. العباس بيقول قعدت استناه يجيلي ما جاش لحد ما قلقت عليه (ما شكش في حاجة، قلق عليه هو)، بعد سنة لقيته جاي في الرؤيا بينشف عرقه وبيقول لي انا لسة مخلص حساب حالا

"لكني وجدت ربا رحيما"

بعد سنة، بعد الرحمة والرأفة خلص حساب بعد سنة

طب انت ح تعمل ايه يا استاذ جمال؟ انا لو مكانك اجري بالمشوار، اولا احنا تمانين مليون، ده الجزيرة العربية كلها بمصر وفارس والعراق وفلسطين ايام عمر ما يتهياليش ابدا انهم كانوا يجيبوا الرقم ده، تعداد الناس كان قليل، وهو كان عنده فرصة يمشي يسأل الخنساء بتعيط ليه، ويدخل على ست فقيرة بتدعي عليه ويقف يطبخ لها، الخليفة، الخليفة بيطبخ لها ويحط لها الاكل هي وعيالها وهي قاعدة زي الباشا وبتشتم في عمر عشان ما تعرفش ان ده عمر، وهو سامعها وساكت

ويقولوا شدة عمر، انا قريت سيرة سيدنا عمر ده في ابن كثير، وابن سعد، وكتاب تاني اسمه عمر بن الخطاب ما لقتش غير واحد كل الناس بتزعق له، الراجل اللي قاعد يسكر يزعق له ويقول له طب انا شربت خمرة وده ذنب واحد، انت بقى اتجسست عليا وما دخلتش البيت من الباب ودخلت من غير اذن، دول تلات ذنوب اتفضل اطلع برة، وطلع، طلع ياعيني، الخليفة اطرد يا استاذ جمال من بيت واحد سكران وطلع من سكات، وام سلمة زعقت له، وواحدة ما نعرفش اسمها لحد النهاردة زعقت له في المسجد قدام الناس، حتى مراته كانت بتزعق له قدام الناس، طب انت ح تستحمل تعمل كده؟ انا لو مكانك مش ح استحمل كل الناس تزعق لي كده، ح اعيط

ثم انا لو مكانك وجالي واحد يقول لي ابن الوزير وللا السفير وللا المحافظ بتاعك ضربني مش ح اقدر اجيب ابن الوزير من قفاه من اخر الدنيا واكتفه للفلاح في وسط الشارع والم الناس عليه وقدام ابوه اقول للفلاح اضرب ابن الاكرمين حتى تشتفي، خصوصا لما يبقى صاحبي وبيني وبينه عشرة سنين يعني وابن بلدي، وده واحد غريب، والرومان كانوا بينشروا اهله بالمنشار ويفقعوا عينيهم، ولو الراجل عارف ان عمر زي الرومان ما كانش طخ المشوار ده كله، انا لو مكانه مش ح اقدر، ممكن يبقى نفسي اعمل كده، بس صعب

طب حضرتك ح تعمل ايه؟ انا والله باكلمك اهو بالراحة عشان ماليش مزاج ازعل اي حد مني، ده اختيار صعب قوي

ثم احنا شعوب مفسدة بسبب القهر اللي عانينا منه لسنين، مش ح تلاقي ناس تزعق لك يعني زي ما عمر كل ما يفكر في حاجة فيها احتمال خطأ يلاقي ميت واحد يطلعوا فيه، الحاكم الامريكي اول ما مسك العراق زعق للمساعدين العراقيين وقال لهم انتوا بتفسدوا حكامكوا لو بتعاملوهم زي ما بتعاملوني، ده الامريكاني المحتل، انت بقى ح يتسلط عليك ناس كتير تفتنك وتغرك وتزين لك وتحوش عنك اي حد ممكن يزعق لك، ومش ح تعرف تلف على تمانين مليون وتطبخ لهم، وبعدين السياسة الجديدة اللي انت عاملها وعامل لها اعلانات الجنية اللي بيلف والاستثمار اللي بيلف عشان تقنع الناس بالنظام الرأسمالي فيه منه قلة مستفيدة وكروشها متعبية ودول اللي ح يبقوا حواليك، واغلبية ح يتخرب بيتها وتجوع ومش ح تعرف بيهم او ح تعرف بيهم وتلاقي حد يقول لك: التوزيع غير العادل للثروة افضل من التوزيع العادل للفقر، ده كلام ناس مستفيدة مش ناس بتخاف من ربنا، وح تلاقي ناس كتير تقول لك قال الله وقال الرسول ويلبسوا الحق بالباطل عشان يكنزوا الذهب والفضة وكله بالشرع وبما يرضي الله، الصنف ده ما كانش موجود ايام عمر، الناس يا كانوا مؤمنين ومتعلمين من الرسول، يا منافقين وباين عليهم، يا مش مسلمين، ما كانش فيه الناس اللي بتأول الدين على كيفها عشان تاكل الشهد من وراه وتعبي عبي  شيل شيل، في النهاية انت اللي ح تتحاسب على الجعانين لوحدك، كل اللي بيدافعوا عن "الفكر الجديد" اللي جوع الناس ومخليهم رافعين ايديهم بالدعا ليل نهار يوم القيامة ح يهربوا منك، وحتى لو حبيت تعمل عمرة وللا تحج ح يفضوا لك الكعبة، مش ح يبقى عندك الفرصة اللي جات لسيدنا عمر وسيدنا علي لما شافوا واحد بيطوف وبيعيط قاموا قالوا الله الراجل ده كويس، ياللا نمشي وراه عشان ناخد من الرحمة اللي نازلة عليه وفضلوا ماشيين وراه لحد ما الراجل برضه زعق لهم وهو مش عارف مين دول، قاموا يا عيني اعتذروا له ومشيوا، ماحدش كان بيعرفهم، لا شكلهم معروف ولا لبسهم يقول انهم ناس مميزة ولا ماشيين بحرس يحوشوا عنهم الناس اللي بتزعق لهم في الرايحة والجاية

كل ده وفضل وهو بيموت يقول: ويل لعمر ولأم عمر إن لم يغفر الله لعمر

هو ادرى، مدام كان بيعيط كده يبقى هو عارف انه امر جلل، يعني هو لما يقول ربنا ح يحاسبني على الناقة في العراق لو تعثرت كان بيتنطع؟ هو متعلم من الرسول رأسا وعارف الحساب بيبقى ازاي، ولما يعيط يبقى له حق يعيط عشان هو عارف، واديه طلع بيتحاسب سنة

امال انت ح تقعد كام قرن؟

بلاش، والله العظيم نصيحة اخت لوجه الله، حد بيحبه ويخاف عليه يقول له الكلام ده، بلاش، انا عارفة انه هذا ما جناه ابي علي وما جنيت على احد، وانه واخد على النعمة وفتنة التنعم اوحش من فتنة الفقر والرسول كان بيقول على الفقر ملهي بس كان بيقول على الغنى مطغي، ومش سهل على بني ادم اتربى في العز والسلطة انه يتخيل نفسه عايش عيشة تانية، ده كده زي ما انا حد يطلب مني اني اسيب بيتنا واعيش في العشوائيات، احم، هو انا عملت حاجة شبه كده من فترة، بس صعب، وناس كتير ما تقدرش عليه، انا عارفة والله، وحاسة بيه كمان، شوفوا بقى بركة رمضان؟ انا حاسة بجمال مبارك، بس الدنيا بتخلص، على رأي عمر: انها مدة يسيرة. وكله بيعدي، الاصعب اني الاقي نفسي واقفة بيتقال لي اسامي ناس عمري في حياتي ما شفتهم ولا اعرفهم وبيقولوا لي: انت اذيتي الناس دي، وياسلام لو اتواجهت بيهم: منك لله.. يا عم وانا اعرفك؟ واطلع في الاخر خربت بيته وللا خليته ينتحر وللا يسرق وللا يقتل من كتر ما انا مجوعاه، كل ده وانا ما اعرفوش، يا ساتر يارب، يا ساتر، اعوذ بالله، والنبي يارب ما تكتبها عليا ولا على اي حد

 بلاش والنبي: انج سعد... فقد هلك سعيد  

اليوم الحادي عشر

يتهيالك انك واخد بالك من حاجة معينة، وتطلع لا واخد بالك ولا حاجة

بس ربنا بياخد باله بدالك بقى من كل حاجة، وماحدش بيصيدك غير نفسك يا اخي، سبحان الله، وتبقى ماشي كده مش ناوي تجيبها البر وبرضه ربنا يسترها معاك

ايه اللي بيخليك تتخنق من الناس بقى؟ نفس السبب اللي بيخليهم يتخنقوا منك، كل واحد عايز الكون كله يمشي على مزاجه، والناس كلها تفكر زي ماهو بيفكر، واللي هو عايزه يتعمل، حتى في حياة غيره، اللي هو عايزه هو اللي لازم يتعمل، ولما ده كله ما يحصلش تتخنق من الناس والناس بدورها بتتخنق منك لنفس الاسباب

ولو الكون مشي على مزاجك ح تطربق على دماغك انت، اي والله، عن جد يعني على رأي الشوام، عن تجربة

ولو الناس كلها فكرت زيك ح تبقى عايز ترميهم من الشباك، لانهم اصلا ح يوروك وساخة مخك، وعمرك ما حتحس انك حمار، ح تستحمر الناس بس، وتقول ياربي انا شفت الحمورية دي فين؟ وعمرك ما ح تعرف انك شفتها في المراية

ولو الناس عملت لك كل اللي انت عايزه ح تتخنق منهم برضه، وتزهق

طب لما انت خنيق والناس خنيقة زيك بالظبط، ما تشيل ده من ده يرتاح ده عن ده، حل عن الناس وخليهم يحلوا عنك، شوية بقى عشان النفس وياريت تنسى دورك التاريخي شوية، خليك في نفسك، انت مالكش دور تاريخي يا اقرع، انت مستني القطر اما ييجي، ما تعملش مهم بقى، انت عارف كام مليار زيك جم الدنيا؟ عامل مهم ليه؟ ما تعملش دوشة ولا تسمح لحد يدوشك وخلاص، مسيره جاي يعني ح يروح فين، القطر يعني، تلاقيه بس متعطل في الاشارة، هو الحقيقة رخم، بيتأخر قوي، اصله اشاش

حاول تاخد بالك بقى من كل اللي بيقلقك وابقى تف في وشي، تتفاجئ بعد شوية ان ربنا سترها معاك في حاجة عمرك ما كنت تتخيل انها تحصل وانت فاكر نفسك الفتك.

اقعد بقى

اليوم العاشر

الا باين ان "هامش" الحرية ده دايما بيبقى مصاحب للطغيان

الاستاذ فرعون كان مدي هامش حرية كبير قوي، يعني انا عمري ما شفت رئيس جمهورية يتناقش بنفسه وجها لوجه مع رئيس العمال مثلا وللا فلاح وللا اي ناس غلابة، حتى لما السادات كان بيحب يعمل "حوار" كان بيستنضف، مش اي حد يكلمه كده

بني اسرائيل دول كانوا عبيد، وسيدنا موسى بالنسبة لفرعون زعيم العبيد، وقال له حاجة شبه انت مين انت، وطبعا ما نسيش يعايره بانه لحم كتافه من خيره (امال يبقى مصري ازاي؟ ده احنا اللي بيشرب عندنا بق مية بنفضحه خمسين سنة قدام)

بس في النهاية اتكلم معاه يا ناس، اتكلم معاه بشخصه ونفسه وذات نفسه واخد وادا معاه في الكلام، بنفسه، ما سلطش عليه رئيس تحرير حيطة في معبد، لا وايه كمان؟ وقال له حدد المعاد اللي يعجبك، وقال للسحرة آمنتوا من غير ما تاخدوا اذن؟ يعني هو ده كل اللي فارق معاه؟ :) برضه الادب فضلوه عن العلم، ده فرعون الطاغية وربنا قال عليه علا في الارض وقال عليه طغى

ياااااااا، ده ربنا عامل كرامة للبشر والواحد له حقوق كتير وهو مش واخد باله

طب من لغاليغه ان ما كان اياميها فيه ناس بتقول: مش كفاية انه كلمه واتناقش معاه؟ مش كتر خيره انه ما دبحهوش هو والعبيد بتاعه؟ قليل الاصل اكل وشرب في قصر الراجل ولما شد حيله قلب عليه، ده في سن والده على الاقل يحترمه، عايزين يضربوا استقرار مصر، وراح مدين وشوه سمعة مصر، وهم اصلا جم عندنا واستضفناهم واكلناهم وشربناهم، وعاملين تنظيم سري عشان يقلبوا نظام الحكم

انا متأكدة، متأكدة ان كان فيه ناس بتقول كده، انا سامعاهم اهو

واكيد كمان بعد ما مات فرعون بتلاتين سنة لقى ناس تقول عليه كان راجل ديمقراطي وبعيد النظر وفضلوا ناصبين له معزى بعد موت بعشرميت سنة

ومتأكدة من نظرية جمال حمدان ان الفلسطينيين انثروبولجيا هم بني اسرائيل

امال احنا مستقصدينهم ليه يعني؟

اليوم التاسع

الدعاء ده انا باحبه، قريته في كتيب صغير كده وحفظته:

اللهم احرسني بعينك التي لا تنام، واكنفني بركنك الذي لا يرام، وارحمني بقدرتك علي، فلا أهلك وانت رجائي، فكم من نعمة انعمت بها علي قل لك عندها شكري، وكم من بلية ابتليتني بها قل لك عندها صبري، فيا من قل عند نعمته شكري فلم يمنعني، ويا من قل عند بليته صبري فلم يخذلني ويا من رآني على الخطايا فلم يفضحني، يا ذا المعروف الذي لا ينقضي ابدا، ويا ذا النعماء التي لا تحصى عددا، اسألك ان تصلي وتبارك على سيدنا محمد وعلى آله، وبك اللهم أدرأ في نحور الأعداء والجبارين، اللهم اعني على ديني بالدنيا، وعلى آخرتي بالتقوى، واحفظني اللهم فيما غبت عنه، ولا تكلني الى نفسي فيما حضرته، يا من لا تضره الذنوب، ولا تنقصه المغفرة، هب لي ما لا ينقصك واغفر لي مالا يضرك انك انت الوهاب، اللهم اني اسألك فرجا قريبا، وصبرا جميلا، ورزقا واسعا، واسألك العافية من كل بلية، وأسألك تمام العافية، وأسألك دوام العافية، وأسألك الشكر على العافية، وأسألك الغنى عن الناس، وأسألك السلامة من كل سوء في الدنيا والآخرة ولا حول ولا قوة الا بالله العلي العظيم

واللي بيشحتوا على المرضى والفقرا ح يجيلهم ويحط عليهم ان شاء الله عشان اصلا دول ما كانوش مفروض يبقوا موجودين

اللي سرطن الناس المفروض كان يبقى في السجن

واللي فقر الناس المفروض كان يبقى تحت القطر

يمرضوا الناس ويفقروهم وياكلوا على قفاهم عيش ويشحتوا عليهم وكمان عايشين لي في دور المحسنين عمار؟

حسبي الله ونعم الوكيل

حكمة اليوم الثامن

لو الواحد عرف يحط نفسه مكان اللي "بيعطف" عليهم مشاكل كتير ح تتحل

يعني هو مافيش وسيلة يعلنوا بيها عن الصدقة (والله حتى الجملة نفسها تضحك) غير انهم يهينوا الفقرا والمرضى ويشحتوا عليهم؟

ما الانسان يحس باحساس طفل مريض بيعرض مرضه في التلفزيون عشان يعمل دعاية ويعمل من فقره ومرضه فرجة

لو ده ابن، لا قدر الله، المخرج وللا حتى الدكاترة  والمتبرعين "العطوفين" كانوا عرضوهم كده؟

لو "المحسنين" لطشت معاهم ولبسوا مقطع زي الواد اللي بنشوفه في "اعلان الصدقة" كانوا رضيوا على نفسهم يطلعوا في التلفزيون بالمنظر ده؟

تفيد بايه هدومك المستعملة بعد ما تقلع الناس من كرامتهم؟

هو العيل اللي جايبينه في اعلان الصدقة ده بجد وللا ممثل؟ اصل شكله عنده انيميا فعلا

حكمة اليوم السابع

مش مهم في الواحد العيوب اللي عارفها في نفسه، المهم العيوب اللي مش عارفها، والمصيبة في العيوب اللي هو فاكر في نفسه عكسها، ده يبقى حتة مقلب

أعمل ايه انا دلوقت؟

حكمة اليوم السادس

"من نازعك في دينك فنازعه ومن نازعك في دنياك فألقها في وجهه"

الامام علي

بس انا شايلة من واحدة اكلت الشيكولاتة بتاعتي من حوالي خمستاشر سنة، انا باتكلم بجد، اصلها كانت لوح شيكولاتة كبير قوي بالمكسرات واكلته كله من ورايا

اكيد لسة شايلة بدليل اني لسة فاكرة، شيكولاتة دي اكيد مش دين طبعا، ياللا بالهنا والشفا، ماهو ايام سيدنا علي ما كانش فيه شيكولاتة بالمكسرات، الا هم صحيح الاكل على ايامهم كان حاجة اي كلام خالص، ما كانش عندهم فرايتيز كتير، لهم حق يخسوا

اليوم الخامس... سؤال

دلوقت في تفسير ابن كثير لما بيفسر: وإذ أخذ ربك من بني آدم... الآية. بيقول ان في عالم الارواح فيه ارواح بتخير تيجي الدنيا وللا ما تجيش وبيتعرض عليها حياتين وفقا لاختياراتهم هم الحياة اللي ح يعيشها لو اختار الشر والحياة اللي ح يعيشها لو اختار الخير وحتى بيستدل بالكلام ده بآية وهديناه النجدين. وبيعرض عليهم الامانة ومكافئتها والعقوبة واللي بيختار من عالم الارواح ويقبل ربنا بيبعته وبيستدل على كده بآية إنا عرضنا الأمانة..الآية

بجد؟

انا مش باكذب ابن كثير، انا باستفهم لاكون فاهمة غلط، هي من حيث المنطق تمشي لان الانسان هو المخلوق الوحيد اللي عنده حرية اختيار، بس بجد يعني مليارات البشر دول اختاروا البلوة دي؟ طب انا، وانا عارفة، طول عمري غبية وباخد قرارات غلط، فعادي يعني لما اتهور واقبل امانة وارجع اضرب نفسي بالجزمة، بس كل الاخوة الزملاء دول اختاروا زيي؟

الكلام ده صحيح كده وللا انا فاهمة غلط؟

حكمة اليوم الرابع

"خذ العفو وأمر بالعرف وأعرض عن الجاهلين"

من واقع محاولاتي الفاشلة لمحاسبة نفسي اللي استمرت سبع ثواني ثم اقلعت عنها، عرفت قد ايه التأنيب والتوبيخ مزعجين، وعرفت ان الواحد لو مش عايز ربنا يحاسبه بالتنتوفة ما يحاسبش الناس بقى

والله هم كلهم صعبين، ان الواحد يحاسب نفسه قبل ما ربنا يحاسبه، صعبة قوي، صعبة وغلسة وتجيب اكتئاب، حد جربها؟ اصل الانسان ما يحبش يشوف نفسه وحش، اكيد احب اشوف نفسي ان "اهم عيوبي اني طيبة زيادة عن اللزوم، وبانسى الاساءة، ما باعرفش ازعل من حد وقلبي ابيض" وانا طبعا لا طيبة ولا متسامحة وبازعل عادي يعني واحقن واغل في نفسيتي، بس قعدت كده افتكر كام حاجة غلط عملتها لقيت الحساب صعب، لمجرد اني فكرت نفسي بيهم

طب الواحد لو استنى ربنا يحاسبه طب ما دي وقعة سودا

مافيش غير ان الواحد يتجاوز عن الناس عشان ربنا يتجاوز عنه، هي صعبة، صعبة قوي، خصوصا لواحدة غلاوية زيي، بس، طب على الاقل مافيش داعي لتوبيخ الناس، ما انا لما جربت اوبخ نفسي لقيته احساس وحش، مافيش داعي اعرض الناس لاحساس يضايقهم عشان ربنا ما يعرضنيش لنفس الاحساس ده، الاية اللي فوق دي بتسهل الموضوع على فكرة

يعني لو الواحد عفا بينه وبين نفسه وقال اللي يخلصه من ربنا وضرب طناش وسقع دماغه عن الناس اللي ممكن يسفهوا عليه ممكن يسهل موضوع العفو ده

حكمة اليوم الثالث

إنكم اليوم في زمان كثير علماؤه، قليل خطباؤه، من ترك عشر ما يعرف؛ فقد هوى ويأتي من بعد زمان: كثير خطباؤه، قليل علماؤه، من استمسك بعشر ما يعرف؛ فقد نجا

-------

النشاط الوحيد اللي كلنا مجمعين عليه، وانا لما باقول كلنا اقصد العالم كله عدا الصينيين، اننا بنرغي كتير، انا والله مش باسقط عيوبي على غيري، بس هي الثورة العالمية اللي حولت العالم الى قرية صغيرة ايه غير انها ثورة رغي؟ وحرية التعبير ايه غير حرية رغي؟ ده حتى اعلان موبينيل: "كل الناس ح تتكلم".. ده اعلان ده وللا تهديد؟

انا مش باعترض، باتأمل بس

طب حد بيسمع حس للصين؟ وللا بيتكلموا صيني وانا مش فاهماهم؟

نصيحة لوجه الله تعالى

قانون المرااااااغي

اتفرجوا على قانون المراغي ضروري، مش بس عشان خالد الصاوي رائع، امبارح اول حلقة ما تمكنتش من اني احكم غير على خالد الصاوي، مبدع كالعادة

بس النهاردة تاني حلقة والمسلسل سخن، تصدقوا بالله؟ المسلسل سخن في تاني حلقة؟ حتى المشاهد اللي بتستخدم في المسلسلات عشان تطول الحلقات معمولة حلو جدا، وعاجبني قوي رسم شخصية غادة عبد الرازق، كل الناس عندها يا اما محترمين يا اما غلابة ههههههه لطيف قوي ان يبقى فيه شخصية مرسومة كده :) وشخصية المراغي مرسومة حلو برضه لحد دلوقت، انا مبسوطة قوي، من كل حاجة بس احنا لسة في الحلقة التانية، يارب بقية الحلقات تمشي كده

الا خالد الصاوي بيعمل كده ازاي؟ بيلبس ازاي كده الشخصية لحد ما يتهيالك انك شفت البني ادم ده قبل كده في حياتك العادية؟ على فكرة ده ح يتجنن، الممثلين اللي بيعملوا كده بيلسعوا في الاخر زي جاك نيكلسون، ايوة، هو عامل فعلا زي جاك نيكلسون، من هنا ورايح ح اسميه جاك نيكلسون مصر، هههههههههه كان لازم تشوفوه وهو بيترافع امبارح، فريد الديب ياربي؟

حكمة اليوم الثاني

ينفع وزارة النقل تعمل اعلان في رمضان بمليون جنيه عشان تقول لنا ندفع السبعين جنيه تمن تذكرة القطر وما نسطحش ولا نتشعبط؟

ليه؟ عشان الدخل ما يقلش ويعرفوا يعملوا صيانة، يعني اتضح انهم مش عارفين يعملوا صيانة بسببنا

وقال وزارة النقل بتقول لنا احنا: قول للغلط لأ.

حكمة اليوم:

بدل ما ابوظ صيامي على وزارة النقل، أنقر هنا

حكمة اليوم

من قال فسد الناس فهو أفسدُهم

ترجمة الحكمة بالبلدي:

اللي فيه حاجة بيجيبها في الناس ويقول الناس بقت وحشة
-----
عملتوا ايه النهاردة؟ مش جابوا فيلم الشيماء؟ انا لسة مش مستوعبة ان عربية حرة تمشي تتصرمح في الصحرا وهي بتغني

مولاي صلي وسلم دائما ابدا على حبيبك خير الخلق كلهم

ومبلغ العلم فيه أنه بشر

وأنه خير خلق الله كلهم

يا خير من دفنت بالقاع أعظمه
فطاب من طيبهن القاع والأَكم
نفسي في الفداء لروض أنت ساكنه
فيه العفاف وفيه الجود والكرم

كل سنة وانتوا طيبين.. ريحة رمضان ابتدت تهل، والبكس ح يلم الشياطين وح نهيص
يارب يعذبوهم