جدع يا حضري

ايه بقى الباللو اللي معمول للحضري ده؟ والحضري هرب يا منز؟
الواد عنده خمسة وتلاتين سنة...لو ما احترفش دلوقت ح يحترف امتى؟ وادارة النادي الاهلي كل شوية تطير منهم عقد احتراف يسوى العمر، وقبل كده طيروا من ابو تريكة عقد احتراف في انجلترا، وكل اللي يهمهم البزنس ومش مهم مستقبل العيال، اللي اتربوا في الفقر ولما ربنا فتح عليهم اتكتب عليهم يتسجنوا تحت رحمة شوية رجال اعمال
اخد بعضه وعياله وسابها لهم مخضرة
جدع يا حضري والله المفروض الفريق كله يعمل كده

الشيء زاد عن حده وانقلب في المعدة

هو احنا ليه بنحب نمؤ في الحاجة ونعيد ونزيد فيها زي نكت حمادة سلطانة لحد ما الناس ترجعها؟
المنتخب المصري فلح بسبب شطارة اللاعبين والمدرب وحسن التنظيم وبسبب ان الدولة سايباهم في حالهم ومش حاطة مناخيرها الفاسدة فيها وعشان كده نجحوا وخلصنا نقطة ومن اول السطر...ايه بقى؟ ايه؟ نعم؟
بياخدوهم مجلس الشورى ليه؟ ومش عارفين يعملوا ايه لابو تريكة قاموا حطوا عياله على بطاقة التموين...وناقص يدوا حسن شحاتة دكتوراه فخرية في الذرة ويرقوا احمد حسن لواء اركان حرب ويفتحوا للحضري عيادة باطنة
ما خلصنا بقى
حتى هناء السمري اللي هي هناء السمري واللي واحد بيقول عليها هناء السمري قالت لجمال مبارك ما معناه يعني المصريين اهم حيوية وعزم وهمة ولما بيحبوا يعملوا حاجة بيعرفوا يعملوها طب ايه؟ يعني التنظيم وحسن الادارة ده ح يفضل في الكورة بس مش ح نستلهم منه حاجة في بقية المجالات؟
وطبعا جمال مبارك اتهرب من الاجابة وقعد يقول لها ان شاء الله والكورة اجوان وربنا يجعل في وشك القبول وحاجات كده
يعني الميزة في فوز المنتخب مرتين على التوالي بكاس افريقيا هو ان اللعيبة دول فلاحين وصعايدة وغلابة ومصريين مما يثبت عدم صحة نظرية وزير العمل اللي قالت ان العيب في الشعب المصري مش في الحكومة والشعب هو اللي لازم يتغير مش الحكومة
وبما ان لعيبة الكورة من الشعب...من الشعب قوي، من الشعب خالص لدرجة ان فيه واحد علق في موقع العربية وقال ما معناه ايه اللعيبة البيئة دول؟ دول بيتكلموا بطريقة غريبة...طبعا هو مش مصري يعني وما يعرفش ان اكتر من تلات اربع البلد بتتكلم كده
يا سيدي بيئة بيئة الله يكرم اصلك احنا شعب بيئة
بس اهو العيب طلع مش فينا ولا في اننا بيئة الحمد لله ومش محتاجين نتغير ولا حاجة
المفروض بقى نطالب الحكومة انها زي ما بتهتم بالكورة او على الاقل بتسيبها في حالها تسيبنا احنا في حالنا يمكن نعرف نعمل حاجة في مجالات تانية
ويا نحلة لا تقرصيني ولا عايز عسل منك
ياريت ما يتدخلوش في مجال البحث العلمي ويكفروا سيئات العلماء المصريين لحد ما تسقط عنهم فريضة الحج شرعا من كتر ما ذنوبهم اتخلصت
يا ريت ما يقرفوش كل بني ادم ناجح في اي مجال من مجالات الانتاج في البلد لحد ما يقول حقي برقبتي انا ح اتكل على الله واشتغل رقاصة
يا ريت ما يحطوش مناخيرهم في كل حاجة وياخدوا اتاوة من كل عيل عايز يعمل مشروع يفيد البلد وللا يستصلح ارض وللا يعمل بحث ينفع الناس
عشان نعرف نعمل حاجة زي ما الفريق القومي عرف يعمل حاجة في مجاله
بس خلاص ده الغرض يعني ما نقصدش حاجة تانية والله
انما الاحتفال الهيستيري ده ح يكرهنا في الفريق القومي وفي حسن شحاتة وفي بطاقة التموين
تموين ايه اللي ياخده ولاد ابو تريكة؟ ايه الحكومة الجعانة دي؟ حد يكافئ حد يديله بطاقة تموين؟
ثم ان العيال نفسهم مخضوضين ومش فاهمين ايه اللي بيحصل...دول لعيبة كوووووووورة مش مستوعبين استراحة الرئاسة ومجلس الشورى ومش ناقص غير يعملوا لهم اصنام ويلفوا حواليها نحن غرابة عت عت..هم مالهم بالهم ده كله؟

معلش يا شباب: غزة بتحتفل بيكوا

ايمان بدوي بقت بتشجع كورة زيي :) وتقريبا لنفس السبب اللي بقيت اشجع عشانه كورة، الصور دي هي بعتتها لي لاحتفالات غزة بفوز مصر بكأس الامم الافريقية، يعني ولا يهمكوا يا شباب من الاستقبال النكد بتاع النهاردة فيه ناس احسن بتحتفل بيكواانا عيطت لما شفت الصورة دي:

وعيطت كمان لما شفت الصورة دي

عرفتوا بقى كان قصدي ايه لما قلت ان ابو تريكة عمل حاجة اعمق مما هو نفسه كان يتصور؟
اولا: اذا كانت الخطة الهاء الشعوب العربية بالكورة عن القضايا المهمة، فابو تريكة جاب القضايا المهمة لحد الكورة واتقلب السحر على الساحر
ثانيا: قبل ما ابو تريكة يعمل الحركة دي كان فيه ناس بتسخن ما بين المصريين والفلسطينيين والناس فعلا كانت ابتدت تسخن على بعض وكان ممكن الامر يتطور من تراشق بالكلمات لتشابك بالايدي والله اعلم بقى يمكن كان واحد مات وللا اتنين اذا كنا بنسخن على بعض بكلمة وفيه ناس محلاتها بتتحرق وتموت بعض امال بقى كان ح يحصل ايه لو كان المصريين والفلسطينيين سخنوا على بعض؟
جه ابو تريكة في الوقت المناسب - وما اعتقدش انه كان حاسب كل الحسابات دي لكن ده توفيق من ربنا - جه بالحركة دي هدا النفوس
وذهبت جهود المسخنين سدى وانشالله دايما
--------
الاهتمام بالكورة طول عمره بيحرق دمي، لكن اذا لم يكن منها بد فلتكن الكرة مثل ما اراد لها ابو تريكة
ملحوظة اخرى
الحضري يستاهل احسن حارس مرمى لانه بصراحة كان واقف زي الاسد واخد علقة ووقف يموت نفسه على الكور اللي بتجيله بس هو غالبا باظ خلاص يعني مراته بقى تعمل حسابها انها تعيش معاه عشان الولاد والعشرة ده انا كنت باتفرج بس وقطعت الخلف امال هو عامل ازاي دلوقت؟

يا سيادة الريس..انت بتنكد على الناس ليه

لجل البخت الباب خبط الساعة تسعة ونص الصبح فاضطريت اصحى وبعدين فتحت التلفزيون عشان اشوف احتفالات الناس بالفريق بتاعها اللي جاي واللي هو الحاجة الوحيدة اللي بتبسطهم في الدنيا كلها والشعب الغلبان ده ماعندوش اي حاجة تفرحه غير ماتشات الكورة لدرجة استفزازية والناس راضية وساكتة ما بتفتحش بقها ومكتفية بالكورة
الاقيلكوا السيد الرئيس جايب الاولاد وبيستقبل الفريق وسط احتياطات امنية مشددة والمذيعة بتقول توجه الالاف من الجمهور وجابوا الصورة لقيت بالظبط حوالي خمستاشر عيل الظاهر داخلين بواسطة وحواليهم امن مركزي قد عدد ميت مرة
طب ليه كده يا سيادة الريس؟ ليه النكد ده حرام عليك؟ طب امبارح لما شوبير اتصل باللعيبة او كلمة قالها له احمد حسن: الناس عاملة ايه يا كابتن؟ فقال له الناس كلها نزلت الشارع في مصر وفي غزة وفي عواصم عربية كتير
فقال له: قول للناس ما تخلصش الفرح عشان احنا جايين بكرة نحتفل مع بعض واحنا متوقعينهم يستنونا احنا جايين الساعة تسعة
يعني العيال عايزين يحتفلوا مع الناس
طيب ليه تنكدوا عليهم وتقفلوا على الجمهور وتحرموهم وتحرموا اللعيبة اللي طالبينهم بالاسم عشان يستنوهم من انهم يفرحوا
دول لعيبة كورة...مالهم هم ومال استراحة الرئاسة مش كفاية غليتوا تذاكر الاستاد وعمالين تغيظوا الناس وتكتبوا في الجرايد ان من ساعة ما التذاكر غليت الجمهور بقى شكله نضيف؟
طيب يا سادة احنا شكلنا وسخ...واللعيبة دول من نفس الاسر اللي شكلها وسخ ومش عاجبة السيد والمدام والاولاد
هو حضرتك فيه ايه بينك وبين الغلابة؟ لا بجد انا عارفة انك بتحب بلد الاكسلانسات بس احنا مش اكسلانسات سعادتك احنا خمسة وتمانين في المية منا بيكحوا تراب وفقا لتقارير الامم المتحدة ولعيبة الكورة اللي انت قعدت تبوس فيهم دول برضه اصلا طالعين من اسر بتكح تراب وامهاتهم بجلاليب وطرح سودا زي ملايين الستات المصريات الشقيانات ما تسيبهم لناسهم
واخد لهم الاولاد ورايح تضايقهم وتضايق الناس ليه هي حديقة الفسطاط؟
الغريبة بقى ان السيد جمال مبارك اللي وشه ما بيضحكش للرغيف السخن ومتعود يكلم الناس بقرف كأن ريحتنا وحشة وهو شاممها ومش قادر يمسك نفسه من القرف اول مرة اشوفه بيضحك وبيبتسم للعيبة الكورة وبياخدهم بالحضن
والله كويس يا سيد جمال يعني اظن انك عارف ان اللعيبة دول بيقولوا: قولتشيلها و..لوحيدها...ناس زي الناس اللي انت بتقرف منهم برضه بس ربنا فتح عليهم والله اذا كان لعب الكورة يخليك تبتسم ابتسامة الرضا دي احنا مستعدين كلنا نلعب كورة عشان سعادتك
النبي تبسم

ابو تريكة ابو تريكة ابو تريكة ابو تريكة

ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة
ابو تريكة ابو تريكة ابو تريكة ابو تريكة ابو تريكة ابو تريكة ابو تريكة ابو تريكة