خلاص.. قفشت على الدنيا بقى

غطس كبيييييير

سلام

أنا مع الرصين

لقد مللت الشخصيات الشاذة التي تتكأكأ على مدونتي ومقالاتي، ويصرون على التعليق والنقاش، بينما لا تجمعنا أرضية مشتركة يمكن أن نتحاور إنطلاقا منها، كما حدث تطور هائل في شذوذ الشخصيات الواقعة على رأسي مثل شرفة أسمنتية متهالكة وقعت على رأس مواطن مسكين، مدني، أعزل، حتى تحولت إلى أكبر جاذب للفصاميين، والعصابيين، وأصحاب الضلالات، وضحايا السكيتزوفرينيا، فلم تعد مواساة الثلة العاقلة تجدي نفعا ولا تطبب جرحا، بل إن بعضهم عاف التعليق على مدونتي، بينما تمسك النزر اليسير منهم بتربيت على كتفي في تعليق ثم الهرب سريعا قبل أن تصيبهم شظايا أحد المعلقين المنتمين لفريق: وآدي رقصة المجنونة يابا يابا ع اللمونة.

أثبت لي فريق العمل السلفي، القائم على التعليقات بمدونتي، ومقالاتي، وتويتاتي - عادة ما يدخلون في مجموعات إذ أن يد الله مع الجماعة - أن زميلي الذي يعتقد بأن الدين الصواب هو ديانة أحمد عدوية الجزء الثاني، وأن السادات لم يمت، وأنه قتل بيل كلينتون بضربة واحدة، وأن أوباما هو جمال عبد الناصر، هذا الزميل العزيز، هو شخص طبيعي جدا، يوجد في الأسواق ألوان من البضائع المستنسخة منه، بل وربما جرى عليها من التحديث والتطوير ما يجعلها تحفة فنية بديعة.
هذا، وقد أكد بلال فضل أن الكاتب الذي لا يخسر جزءا من قرائه مع كل مقال، عليه ألا يرضى عن نفسه، مما أذهل خاطري، وأثقل قلبي حزنا وهما، فإنني مع كل بوست وكل مقال أكسب مجموعة من القراء الناقمين الساخطين على حظهم العاثر الذي جعلهم يولدون في زمن ولدت فيه مخلوقة مثلي، ويأخذون عطلة من أشغالهم فقط ليتركوا تعليقات فحواها الهلوسة وهدفها اللا شيء ومجملها أنهم غاضبون مني لسبب ما. 

وبعد أن حار عقلي، وخلب لبي، وأسقط في يدي، أرسلت بريدا إلكترونيا لعمرو غربية أسأله: يخلصك إنت يا عاطف؟ وأرفقت بعض الروابط التي تلخص ما أكابده وألاقيه، فما كان من عمرو غربية إلا أن أجابني قائلا:

معلش


أصلك مش مملة و ينفع يقروك. خليك رصينة و مملة كدا و مش هييجوا لك.


خليك... مع الرصين
-------
أيها الأخوة المواطنون، لقد اتخذت قرارا أرجو منكم أن تساعدونني على تنفيذه، إنني أعلن من منبري هذا خلف شاشة الحاسوب الآلي، أنني من الآن فصاعدا مع الرصين. عسى الله أن يرفع عنا الغمة، ويطعمنا بعض الرضا عن النفس، والسلوى في الكرب.
هذا وبالله التوفيق، وحسبي الله ونعم الوكيل فيك يا فخري
مقدمته لكم:
جبهة التهييس الشعبية/ أوشة أخت مليجي

انا ما اعرفش واحدة اسمها سها يا مصححي الدستور

فيه شخص ما في التصحيح في الدستور بيكرهني، اه والله، بيتعمد يكتب لي حاجات في المقال عشان يضحك عليا الناس

مين سها؟ سها مين؟

انا كاتبة: سهي عليهم.. يقوم يعملها لي سها عليهم؟

هي سها يسهو، بس دي للفاعل: سها محمد

لكن: سهي على محمد

وقبل كده كتبت: شروى نقير، عملوها لي: شرا ونقيرا

مين شرا ونقيرا دي ؟

وكتبت سعد نبيهة، عملوها لي: سعدنا بيهه

وحاجات كتير بالشكل ده، ده مرة كتبت ايعاز عملوها لي ايعاذ، ومرة كتبت النزر اليسير عملوها لي النذر اليسير، نذر ليه؟ ربنا ما يجيب نذر، نزر يعني نصيب، نذر يعني انذارات، حكمة بالغة فما تغني النذر، بس انا بطلت اكتب النزر اليسير دي خالص لان كل الناس بتكتبها النذر اليسير، كل الناس، كل الناس كل الناس، المصححين في كل حتة في الدنيا بيكتبوها النذر

كرامتي وجعتني قوي، لان اكيد القراء حيقولوا: البت الحمارة دي ما اخدتش الابتدائية؟

بس دي مقالب، لان مصححين الدستور كويسين، طب ليه المقالب دي؟ لو متضايق مني يقول لي شايل مني في ايه؟

اكتئاب

خلاص.. جه، شرف الاكتئاب، كنت عمالة اقاومه، بس هجم، دايما بيجيلي بعد حالات الغضب الشديدة، وما عرفتش اسيطر

عندي قرف وعمالة اكل زي الجاموسة.. مافيش حاجة بتضحكني دلوقت غير لما سمعت خطاب الرئيس وقال: لقد كان لنا في رسول الله اسرة حسنة

بس انا قرفانة

:((

انا اتمرمطت

كرامتي كرامتي كرامتي كرامتي كرامتي كرامتيييي يا لهوتيييييييييييييييييييييييييي

انا انمرمنط

انمرمنط وانبهدلت وكرامتي انبعترت وبرستيجي انبعزق وانمسح بيا البلاط

اه يانا، اه يا كرامتي اللي واجعاني ياني.. يا عيني عليا، يا حرام، انا صعبانة عليا قوي، يا غلبانة يا انا

اصلي مش حاعرف اخد حقي.. ما حاولتش اخد حقي ومش حاعرف اخد حقي

ليه؟ عشان ام النضال على ام المبادئ وحاتفها تنزل في عبي واراذل الناس حتشمت

اه يانا يانا يانا

بس... ماحدش يسألني فيه ايه؟ انا بافضفض بس مش حاحكي حاجة

مافيش غير جمال عيد حبيب قلبي اللي جبر خاطري وعالجني ورفع من روحي المعدنية وفهمني اني ست الناس بعد المرمنطة اللي انمرمطها لولاه كنت ولعت في نفسي

دي تاني مرة في حياتي اعمل خير واحس اني عايزة اشفطه او الحسه، انا اصلا اعمل خير في ناس ويدوني على قفايا ده على طول، بيحصل اساسا معايا يوم اه ويوم لا، بس عمري ما ندمت، المرتين اللي ندمت فيهم مرة من ست سنين والمرة دي، والمرتين كانوا ناس مختلفة بس نفس الفصيلة، وكل مرة ما اعرفش اخد حقي عشان برضه كل مرة حاتفها تنزل في عبي، ما اعرفش اشمعنى الفصيلة دي من الناس اللي بتندم الواحد على الخير اللي عمله... بس بس، ما حدش يقول لي ما تندميش على خير عملتيه، عارفة انا الكلام ده، بس فيه ناس عندها القدرة انها تخليك تندم

هيييييييييييييييييييييه

الحمد لله، لولا كلمت جمال عيد كنت مت، ويمكن كنت انحرفت، انا قبل ما اكلمه كنت حاسة اني حاعيش حياة الفتاة المستهترة عشان انسى اللي جرا لي، لولا كلمته نشلني ما حكتش تفاصيل بس فهمته اني انمرمنط، وهو مننا وعلينا وقعد ينفخ فيا عشان يمسح المرمطة

وقال لي نصيحة... حاحاول اعمل بيها ولو اني ما باعرفش

اه يانا يا كرامتي... والدم يخرررررررر

انا ابتديت اغير على المدونة :(

امبارح ناس كتير في الندوة بتاعة مركز الدراسات الاشتراكية قالوا لي انهم جم عشان مقال الدستور.. يعني ما شافوش المدونة؟ 

ما شافوش المدونة ليه؟ 

لا شوفوها بقى

حان الآن موعد الاعلان الكامل عن نظريتي

انا كنت اتكلمت عن ان فيه ناس بتفهم ومش بتحس، وفيه ناس بتحس ومش بتفهم، وفيه ناس لا بتفهم ولا بتحس

وكنت اتكلمت عن غباوة المخ وغباوة القلب وقلت ان الاتنين يؤدوا لنفس النتائج، زي ما برضه نباهة المخ تؤدي لخلاصة نباهة القلب مع اختلاف الاليات شوية بس النتيجة النهائية واحدة

بس ما قلتش انا اقصد مين، غير لصحابي بقى، ما قلتش اقصد مين عشان اللي بيحسوا وما بيفهموش ما يزعلوش، لانهم بيحسوا بقى فحيزعلوا

بس انا خلاص مش قادرة مش قادرة مش قادرة بسبب اللي حصل لي امبارح

كان بقالي يومين قافلة الموبايل عشان حاسة اني تشبعت بالاحداث وعايزة افصل طبعا فيه ناس قالوا لي مالك يابنتي واليكم نصوص الحوارات

حوار مع واحد صاحبي شيوعي:

ايه يا جميل؟ مالك؟ 

- لا ابدا كان عندي ااكتئاب

ليه؟ ما الناس بتتحرك اهي

- لا بس الظاهر تشبعت

اه فهمت قصدك.. طب وبقيتي كويسة وللا لسه؟

- اه بقيت كويسة.. رحت مقابر الفدائيين في بورسعيد وفرفشت نفسي

طب كويس.. اخدتي صور؟ 

-----

يلاحظ انه فهم على طول ان الضغط السياسي هو اللي اثر على حياتي الشخصية، ويلاحظ انه فهم وجه التأثير من غير ما اشرح كتير، ويلاحظ ان كل اللي همه اني اخد صور بما اني قلت له بقيت كويسة خلاص يبقى نتكلم في الشغل بقى

-------

حوار مع صديق تاني اسلامي:

ايه يا نونو؟ خضيتنا عليك

- كان عندي اكتئاب

اكتئاب؟ ليه؟ قولي لي مين اللي زعلك وانا اطلع لك عينه.. اكيد فيه حد زعلك، انا عارف الاشكال الوسخة اللي حوالينا

------

يلاحظ ان قلبه حنين جدا والله، وقال لي يا نونو، مش يا جميل اللي تحسسك انها بتتقال لكل الناس، وفعلا مخضوض عليا لانه اتصل كتير، ومتعاطف جدا، لدرجة انه عايز يروح يتخانق مع اشخاص مالهمش وجود بفرض انهم زعلوني من غير ما يفهم انا مالي، مع ان مافيش حد زعلني وبقالي مدة طويلة مش باتعامل مع اشكال وسخة وقفل معايا وهو لسه مش فاهم انا كنت مكتئبة من ايه، بس متعاطف جدا وكل شوية يسأل عليا

-----

واكيد ماليش صحاب ليبراليين، واكيد لو ليا مش حاتكلم معاهم في حاجة لاني اي حاجة حاقولها حيقولوا لي: وقعتي بيان التغيير؟ لو وقعتي مش حتكتئبي

بس انا عندي تلاتة صحابي بيفهموا وبيحسوا... كل شوية اقول لهم اوعوا تموتوا

فنون ومالك وغادة جبر

طب والله تلاتة بيفهموا ويحسوا في الزمن ده كتير يعني، ربنا يخليهم والنبي يا رب

طب انا باحبه طيب.. اعمل ايه طاه

هيهيهيهييييييييييييي

انا قلتها قبل كده على التويتر، بس بما ان فيه ناس بقت تبعت لي على الفيس بوء ورسايل على الموبايل بقى فانا مضطرة اعلنها مدوية من منبري هاتيك المجالي:

قسما بالله، تلاتة بالله، يمين بالله انا ما باخد مليم اصفر ولا احمر ولا اخضر من الدستور

والناس الشهادة لله عرضوا عليا على استحياء وانا اللي ما رضتش عشان انا باحب الدستور، وعشان لما انقل مقال لابراهيم عيسى هنا ماحدش يقول: اااااه عشان بيقبضها ويطلع بيقبضني ميتين جنيه وللا حاجة واهزأ نفسي على الفاضي

وقسما بالله، تلاتة بالله، يمين بالله انا عمري ما باعرض نفسي على حد ابدا، الناس لازم تقول لي ولازم يقولوا لي بجدية مش كلمة عابرة كده: ما تكتبي عندنا... عشان انا باتكسف، ساعات يعني، باتكسف من حاجات معينة، ده انا اول ما اتعينت في الشغل اتكسفت اطلع الخازنة اقبض

ايه بقى؟ نعم؟ مالهم اللي طالعين واكلين نازلين واكلين جوة مصر وبرة مصر من ايتها جيهة ما بيخطوش خطوة من غير دورارات وايشي اخضر واحمر؟ 

محروقين ليه من حتة عمود في الصفحة قبل الاخيرة اللي عمر ما حد بيفتحها وعلى يمين الصفحة وفوق السودوكو وجنب تعيش وتفتكر وتعيش وتفتكر لو حد شافه اصلا بتوضيب الصفحة دي؟ 

وانا راضية، انا باحب الدستور كده لله في لله وشايفاهم بيعملوا دور وطني مهم ويشرفني اشارك معاهم ولو طلبوا ادفع لهم فلوس، انا لسه عايشة بذنب جرنال البديل وزعلانة انه راح مننا ويهمني ان جرنال زي الدستور في وسط الواغش اللي حوالينا يفضل عايش، ولو معايا فلوس كنت لميت لهم تبرعات، بس انا باشارك باضعف الايمان

التانيين بقى ماهم ربنا مسهل لهم يعني ونفخ في صورتهم ومن بعد الجلابية والفوطة الدبلان في رقبته المهرية من هبش الاكلان والدوخة الازلية والنوم في الدكان بقى صاحب عربية وعمارة وسكان، شعبان البقال شعبان البقال، ومكومين فلوس قد كده على قلبهم ولهم حسابات في بنوك، انا والله العظيم الحساب الوحيد اللي ليا في البنك بيتحول عليه المرتب عشان اسدد اقساط العربية وبقية فلوسي من وظيفتي حوافز ومكافئات وكده

مش ذنبي والله ان ماحدش حاسس بيهم عشان كلامهم رايش ومش ذنبي ان ماحدش بيثق في مصداقيتهم عشان سمعتهم اللي زي الطين، مش انا اللي عملتها، كل واحد بيعمل سمعته بتصرفاته، وماحدش بياخد كل حاجة، مافيش حد بيطلع واكل وينزل واكل وكمان عايز الناس تثق فيه وهو حتى لما بيطرش التعليمات اللي جاية له ما بيتحلاش بقدر من المهنية عشان يبان كأن يعني ده كلامه، كل واحد له اختياراته

حاسبوا الدودة بقى، دودة موجودة تحتيكوا في المية، دودة موجودة والنية اذية

انا بس كاتبة البوست ده عشان اهديهم والله بدل ما ينبروا عليا بخيالات في دماغهم وانا اصلي طول عمري نجمي خفيف "اجرني" كايدة العزال انا من يومي ايوه اه هيهيهيهيهيييييييييييييييييييييييييييييييي

من كشف التاريخ الاجرامي لمستر اكس؟

انا لازم اعرف مين اللي سرب المستندات دي لاحمد يسري؟

الجريمة لا تفيد

الخط في بداية تاريخه المهني حيث بدأ السلم من اوله وعمل كناضورجي

هذا وقد تعهد زعيم المطاريد اللي هو انا بالانتقام من كل من تسول له نفسه استغلال هذه المستندات ضد مشروعه التوسعي... وزي ما انتوا شايفين في الصورة 2.. احنا ناس مقطعين البطاقة

دوري على شمشون يا دليلة

اصل انا الشاحن بتاع اللاب توب بتاعي كان بيفصل، وكنت ح اشتري شاحن جديد من راديو شاكر بس مالك مصطفى لحقني وانقذني، كالعادة، وكالعادة من غير ما اسأله ولا اطلب منه لوحده بيشم ان عندي مشكلة ويقب يحلها ويرجع يختفي تاني، اصله بعيد عنكوا ما بيعرفنيش غير عشان مصلحتي، الناس بقت وحشة قوي يا اخي، وبعتني لشمشون، في سوق العصر في الخليفة المأمون، الدور التاني، عموما اول ما تدخل سوق العصر وتقول شمشون ح يدلوك عليه واضح انه ذائع الصيط، واتعامل بجدية شديدة وصلح لي الشاحن واديني باكلمكوا من خلاله اهو

دي اول حاجة كويسة حصلت، تاني حاجة كويسة ان ايليا سليمان ادانا كلاس ساعتين وكان عثل عثل عثل، انا حبيته خلاص وبقيت كل ما يعدي قدامي ابص له زي المراهكات لما يبصوا لانور وجدي.... اه، انا يادوب من ايام مراهكات انور وجدي، بابربش

الحاجة التالتة الكويسة اني اخيرا اشتريت اللي كان نفسي فيه، بس مش ح اقول هو ايه، ده سر لحد ما اتمكن منه

الحاجة الرابعة اني اتفرجت على فيلم الزمن الباقي تاني، ولنا هنا وقفة، اولا كان قاعد جنبي ستتين كبار كده، ما اعرفش مين اللي شار عليهم ييجوا الفيلم ده؟ قعدوا طول الفيلم جنبي يقولوا: هو مش بيتكلم ليه؟ هم ح يتكلموا امتى؟ هو الممثل مش بيتكلم خالص ليه؟ يارب يتكلم بقى.. حاجة غريبة انه مش بيتكلم، طب يا ترى ايه سبب انه مش بيتكلم، ح يتكلم اهو، لا ما اتكلمش، طب ح يتكلم؟ وللا ايه؟ وللا مش ناوي يتكلم، ده اتكلم اهو، يوه، هو كده بس؟ دي جملة، الله، طب ما يتكلم

وعلى الناحية التانية كان قاعد واحد الظاهر كان داخل فيلم امير البحار ودخل الصالة دي غلط كان بيضحك كده: نياهيييق ايييييييييهههههه نياهييييق هيق هيق هيييييييق من غير مبربر واضح غير انه اهبل وابن هابلة 

بس شفت حسن حامد، كان واحشني قوي، وقلت له اني لسة باغني في الشغل، وشفت احمد غربية وكان باين عليه اثار العدوان من ضحك الواد الاهبل بعد الفيلم ولو كان استمرت حالة النهيق دي خمس دقايق كمان كان احمد غربية ح يقوم يصرخ اكتر من نادية الجندي في افلام الجاسوسية... كان بقالي كتير ما شفتوش

الحاجة السارة ال... كام دي؟

الكذا يعني اني لقيت فيلم اجورا على التورنت واللي عايز ترجمة يدور ويقول لي لقاها فين، انا لسة بانزله مش عارفة بقى ساعات الترجمة بتبقى متحملة اصلا، عموما لو مش متحملة ياريت حد بقى يدور على سابتايتل، انا مش باعرف اسباني :) ولقيت كمان فيلم يد الهية بتاع ايليا سليمان اهو على التورنت برضه

وبهاذوها المناسبة، انا مغيبة تماما عن الكون مما ساعدني في اجتياز مرحلة الاكتئاب بنجاح، ايه بقى اللي حاصل في الدنيا اليومين دولم؟ غير موضوع نصر حامد ابو زيد ده اللي الكويت مش عايزة تدخله قاموا اتخانقوا معاها وهزأوها عشان مش عايزة تدخل واحد اصلا بلده ادانته وفرقته عن مراته بحكم قضائي واحنا من الاساس رفضنا قبل كده ندخل نائب في البرلمان الكويتي من غير ابداء اسباب! مع ان النائب الكويتي بقى ممثل عن الشعب الكويتي فعلا لان عندهم انتخابات حرة وعليها اقبال كبير ومعاهم فلوس ماحدش بيشتري الاصوات هناك، ووالله لو كانوا دخلوا نصر ابو زيد كان طلع ناس تانية يقولوا الكويت بتتحدى القضاء المصري النزيه الشامخ وبتدخل بلدها واحد مدان قضائيا، ولما ما دخلوهوش في بلدهم اللي هم احرار فيها ومع ابداء الاسباب وبناء على طلب الجماهير كمان بيتهزأوا برضه، وح يتهزأوا في كل الاحوال، واي حد من اللي حوالينا ح يتهزأ بقى عشان نبقى على نور، احنا فاضيين لا شغلة ولا مشغلة وقاعدين زي الولية العجوزة المجنونة في الشباك نسب بالاب والام للي رايح واللي جاي، مع اننا لما منعنا الطبطبائي من دخول مصر من غير ابداء اسباب واحدة من عدوينه في الكويت قالت: مصر حرة مستقلة وعلى كيفها تمنع وتدخل اللي هي عايزاه، وانا باقول للانسة دي بوصفي مصرية اصيلة ابنة الكشري والفول والطعمية ان لو الموقف معكوس ونائب من الحزب الوطني اللي بينجحوا بالوجبات والخمسة جنيه المقسومة نصين اتمنع من دخول الكويت ومن غير ابداء اسباب كمان وبعد ما اتوجت له دعوة كان اعداءه قبل اولياءه هنا في مصر ح يساندوه ويهللوا على كرامة مصر اللي اتهانت باهانة عضو برلمان مصري، وبصراحة في دي ح يبقى معاهم حق، لان من حق نائب عن الشعب، ولو اسما، انه يعرف بيتمنع من دخول بلد معينة ليه؟ لانه مدعو بصفته ممثل لشعب مش لنفسه، لما يبقى يطلع من البرلمان ويمثل نفسه هم احرار يمنعوه من غير سبب، مش شطارة منها يعني انها تشمت في ممثل شعبها في البرلمان لمجرد خلاف سياسي بينها وبينه، دي قلة اصل منها، واحنا بقى العكس المتطرف، لو مبيض محارة اتمنع ح نرقع بالصوت زي الاخوة المثقفين ما بيرقعوا بالصوت على نصر حامد ابو زيد

انما يتحسدوا يعني، ماحدش جاب سيرة ياما اكلناكوا وشربناكوا والمدرسين والكراريس (مسطرة عربي وانجليزي وكراريس حساب مربعات وكراريس رسم من ام ورق فاخر) والبرايات والاساتيك الكبيرة من ام ريحة اللي كنا بنبعتها لكوا وما تمرش فيكوا، وللا جابوا سيرة وانا ما شفتش؟ اصل مش معقولة يفوتوا فرصة ذهبية زي دي، اكيد فيه حد جاب السيرة دي، ده كان يوم اسود يوم ما العرب عرفونا وللا قبلوا منا خيط في ابرة، بعد كده لو ح يموتوا من العطش ح يشربوا بولهم ولا انهم يشربوا من حنفية سبيل عاملها واحد مصري، ده احنا فضحناهم، ده لو عزمناهم على الغدا ح يحطوا لنا تمن الغدوة تحت الطبق عشان ما يجيش يوم ونقول لهم ياللي غديناكوا وحطينا لكوا نص فرخة عتاقي في الطبق وكانت معمولة بالحبهان وورق اللوري سفتها كلها يا عب عال وما سبتليش ورك

اما عجايب والله، بلدهم وهم احرار فيها، يوقع محفظته مطرح ماهو عايز، يعني احنا لينا عين بعد ما طردنا النائب بتاعهم نقول لهم ما دخلتوش الراجل اللي احنا اصلا طاردينه من عندنا ومالوش اي صفة ولا حيثية في بلده ليه؟ لمجرد انه معاه جنسية مصري؟ اهو، احنا نطلع تلاتيه ونخرب بيته ونطلقه من مراته ونكفره ونهججه من بلده ونطلع عينه وانتوا تشيلوه على راسكوا يا كلاب، وان كان عاجبكوا؟ ايه البلطجة دي؟

المهم يعني، انا مش عارفة اي حاجة بتحصل غير الموضوع ده، وان اية الله منتظري الله يرحمه مات، والايرانيين ح يعملوا مظاهرة عشان مات، دي عالم فاضية باينها، ح يتظاهروا ضد عزرائيل يعني؟ لا بجد مايصين قوي وبيدلعوا بزيادة يعني، ده ولا حتى ماتش، ولا حتى بنطلون اتقلع لمخمل باف ده واحد مات، امر الله يعني ح نعمل ايه؟ ايه المرعة اللي هم فيها دي؟ حالهم مايل قوي راخرين، اذا كنا احنا عاملين زي البت البايظة اللي مش فالحة وعيارها فلت، هم عاملين زي البت اللي ابوها لوا بوليس ومفهمها انها احلى واذكى واشطر واحدة في الدنيا عشان طالعة الاولى على طول وغير شطارتها في الدراسة ما بيخليهاش تعمل حاجة ابدا ولا بيحملها اي مسئولية ولما المدرسة تقول لها خطك وحش تجيب ابوها يشتكي المدرسة في المنطقة التعليمية وعشان لوا يرفد المدرسة، وللا انا بقيت كارهة للبشر ومش طايقة حد؟ انا خليني في السيما احسن  

راديو بكرة

اسمعوا بكرة ان شاء الله راديو بكرة

الساعة ستة مساء عشان محمود صابر عامل معايا حوار، وتصدقوا بايه؟ كلمني على البلوك برضه ده حتى محمد طاهر قال له: انت بتعمل ايه؟ قام محمود اتنرفز وصمم يتكلم على البلوك

اي والله

اه.. اللي مش على التويتر مش ح يعرف الحكاية.. اسمعوها بكرة، انا بقى مش ح اعرف اسمعها عشان ح ابقى برة وما بتتسجلش

:(

دماااااغ

بالمناسبة السعيدة دي، بنشكر الاخت فنون (بكيزة اسمها الحركي) اللي شرفت ونورت، وزقتني زق عشان اخرج من الاكتئاب وناخد صحابنا ونخرج

ياااااا انا ما كنتش عارفة اني محتاجة الخروجة دي غير لما خرجتها

عملت دماغ حقيقي، ده انا بقالي كتير ما خرجتش اتفسح، وجيت عاملة دماغ حتى نزلت التعليقات من غير ما اقراها عشان ما انكدش على نفسي

مشتكرة يا فنون

خدوا اعملوا دماغ، واهداء خاص لبكيزة

ودي مادو اهداها لي الصبح

القهوة الخضرا

حد يعرف القهوة الخضرا بتتباع فين؟ واذا كانت بتتباع في مصر اصلا؟

آآآآآآآآآآه ده نسيت

ابراهيم منصور قال لي امبارح وانا نسيت، ونسيت اجيب الجرنال ونسيت اقول لماما

ح اقول لها على الفطار يارب ما تشمتنيش

ميدو اللي فكرني وجاب لي المقال، ده نص التحقيق اللي اتعمل في السجق المدني على اثر يوميات عقلي الباطن في السجق المدني

أمي في العاشرة مساء الليلة ان شاء الله

وفيه ضيوف تانية طبعا، ح يتكلموا عن خطبة اوماما اللي هي ما خلتنيش اعرف اتفرج عليها من كتر كل ما يقول حاجة ترد على التلفزيون واحنا قاعدين: يا ماما مش سامعك هو... انا بس اللي مش عارفة اسمعه كده

واضطريت اسمعه تاني على النت

الحمد لله ان جات لها فرصة ترد عليه بدل ما كانت قاعدة تزعق للتلفزيون

مش الجبهة عدت المليون؟

اه والله صحيت الصبح لقيت العداد عامل كدهون

يا مرحب بالمهيسين يا مرحب
01003252

http://my8.statcounter.com/project/standard2/stats.php?project_id=4665625

بس زعلانة

عشان غالبا هم تلاتة بيقفلوا الصفحة ويفتحوها عشرتلاف مرة في اليوم لان العدد مش بيزيد بالريفريش، يبقى اكيد بيعملوا كلوز ويجيبوا الصفحة اكتر من مرة عشان يوهموني انهم ناس كتير... اكيد يعني

امال الوثيقة دي مش عايزة تزيد ليه؟

:""""(((

حفل توقيع كتابي في مكتبة البلد الجمعة عشرة ابريل ان شاء الله الساعة ستة

ستة مساء طبعا مش صباحا

مكتبة البلد اللي في عمارة سيلانترو الجامعة الامريكية

احمد مهنى ح يشنقني عشان اديت شورت نوتيس، اصلا اصلا هم عازمني على حفل التوقيع ده، انا ما دفعتش حاجة

ح تيجوا بقى والنبي عشان احمد مهنى ما يرمنيش من شباك المكتبة

هو اللي كتب الاغنية دي يعرفني؟

هو اللحن مش لحن اصلا، لحن بتاع واحد بيهشك عيل، بس كلمات الاغنية غريبة قوي، بالنوسبة لي يعني، انا ما اعرفش ايهاب عبده ده، اعرف ايهاب عبده تاني بس مش هو اللي كاتب الاغنية، هو يعرفني؟ اصلي حسيت انه حاططني قدامه وبيكتبني يا اما يعرف حد من صحابي بقى وحكى له عني، طب ليه كده بقى؟ هي دي الصحوبية؟

فيديوهات حفل توقيع كتابي

انا مش عارفة اودي فيديوهات ميدو فين، الراجل مغرقني بفيديوهاته

وهنا وانا لابسة بالطو دوريس داي

وطبعا زي ما انتوا عارفين ميدو اول ما شافني قعد يترعش من الرهبة والرعب والمهابة

زي ما انتوا شايفين في الفيديوهات