اين علاء مبارك الذي ادعى موت العروبة من اجل مباراة كرة قدم؟ خانس يعني

انا عمالة اعيط :'(

خلاص انسوا عمرو اديب والله اتمنع ودخل حزب الوفد وطالق علينا الجرادة اللي متجوزها

ادعوا لنا بقى بكرة.. عندنا امتحان

استجدع وانزل يوم 25 يناير

تحديث:

نسيت اقول حاجة مهمة: اجمل حاجة في ثورة تونس ان ما كانش فيها غير علم تونس والنشيد الوطني، ياريت القوى السياسية ترحمنا وما ترفعش شاراتها وصورها، مافيش غير علم مصر والنشيد الوطني، هو مش فرح ابن العمدة وكل واحد نازل ينقط باسمه

انا عارفة ان فيه ناس خايفة

حتى، لا مؤاخذة، رجالة وخايفين

طيب فيه طريقة حلوة قوي تخليك ما تخافش ولا حاجة، انزل انت وتلاتة اربعة صحابك، اي شارع، خلاص؟ امشوا في الشارع واعملوا الاتي:

وقفوا الناس اللي ماشية في الشارع زي ما بتوقفوهم تسألوهم على محل او شارع، وقول له: انت عارف ان فيه 12 مصري ولعوا في نفسهم من الفقر؟ انت عارف ان في تونس واحد ولع في نفسه من الفقر والثورة قامت، عارف الثورة قامت ازاي؟ الناس نزلت الشارع، واتحاموا في بعض، وفضلوا في الشارع لحد ما رئيسهم اللي اتسبب في كل بلاويهم هرب.. وفيه ناس بتقول ان التوانسة ارجل من المصريين.. بس انا مش مصدق، انا عارف ان المصريين كمان رجالة. زي ما التوانسة نزلوا الشارع وغيروا احنا كمان نقدر نعمل كده. وسيبه وامشي

شوف حتنزل انت وصحابك في انهي شارع

وخد الشارع من اوله لاخره، طول ما انت ماشي توقف الناس وتكلمهم، اهم حاجة، ما ترغيش كتير، ما تطولش في الكلام، تركز على نقط محددة، ان حالنا زي حال تونس، ونقدر نبقى زيهم، واللي مش عارف ثورة تونس تعرفه، تحكي له الحكاية باختصار وببساطة، واحد ولع في نفسه من الفقر الناس قامت ونزلت مظاهرات لحد ما طردت رئيسهم، واحنا عندنا 12 واحد ولعوا في نفسهم، من الفقر برضه، ونقدر نبقى زي تونس

افضل انت وصحابك ماشيين في الشارع وتكلموا الناس تكلموا الناس، الناس اللي واقفة على محطة الاتوبيس، الناس اللي واقفة مستنية الميكروباص، الناس اللي ماشية، الناس اللي بتعدي الشارع، الناس اللي ماشيين على الرصيف، ولاد وبنات

وعشان كده يستحسن ان تنزل معاكم انشالله بنت واحدة عشان تكلم البنات وما فيش بنت تفتكرك انك بتعاكسها، انت عارف ما بيصدقوا عندنا هههههههههه

مش لازم تهتف وتشيل يفط، فيه عيال جدعان حيعملوا كده، وفيه ناس خايفة، بس احنا مش لازم نهزأ الخايف، لان الخوف شعور انساني طبيعي، بس انا عايزة اقولك ان التوانسة هزموا بن علي يوم ما هزموا خوفهم، وانت لو خايف، خليك مرسال، بلغ الناس، وقولهم انا نازل في الشارع النهاردة عشان النهاردة يوم 25 يناير، احنا اتفقنا ننزل ونتكلم معاكوا، وقول للي كلمته، امانة عليك تبلغ اللي تعرفه باللي قلتهولك

البنات تلبس بنطلونات وتحتها بنطلون ستريتش او كولون تقيل، تاخدوا معاكم تليفونات رخيصة، ويبقى فيها رصيد، حتنزل انت مع تلاتة اربعة صحابك ولنقل مثلا مثلا، في شارع رابعة العدوية، مثلا، حتخش وتاخد ارقام التليفونات اللي موجودة على صفحة كلنا خالد سعيد ولو لا قدر الله حد اتعرض لك تتصل بالنمر دي او تبعت رسالة، ابعت رسالة افضل لان ممكن الرد على التليفونات ساعتها يبقى صعب

ممكن وانت بتتكلم مع حد تلاقيه متحمس، اعرض عليه انه يمشي معاك، قول له احنا نازلين نكلم الناس تحب تمشي معانا وتكلم الناس انت كمان؟ وشجعه على كده
وامشي.. امشي في الشارع امشي امشي امشي.. واتكلم اتكلم اتكلم.. وغني
غني اغاني وطنية، غني اغنية بلادي بلادي
غني مع اصحابك بصوت عالي اغنية وطنية تكونوا بتحبوها

شايف البنت دي؟ البنت دي نازلة

ان شاء الله يا اسماء مصر كلها رجالة

زي رجالة تونس
------
لو تقدر تصور صور.. لو تقدر تبعت تويتات ابعت.. لو تقدر تدون دون
وانت في الشارع
فيه ناس نازلة عشانا في تونس والاردن، وعرفت دلوقت ان فيه ناس نازلة عشانا في باريس
كل دول حاطين امل علينا

يوم 25 يوم الغضب العربي :)

الاردن وتونس وعمان معانا

والحركة السلفية "حفص" حتنضم، ودي غير حركات سلفية اخرى رفضت الانضمام

وفيه واحد مسيحي ولع في نفسه

وعاشت الولعة الوطنية، وعاشت الولعة العربية

:)

ايوة كده يا ودييييع

كده اليوم نجح قبل ما يبدأ الحمد لله، ويا سلام بقى لو الامن اتغابى على الناس وضربهم وقبض عليهم، حيعمل سياط وصياح لليوم ما حصلش، لو نزل تلاتة في اليوم ده والامن ضربهم او اعتقلهم يبقى الامن كتر خيره - كالعادة - نجح لنا اليوم

يالا... اتغابوا بقى، على رأي زكي رستم: انا سبت لكم الحبل على الغارب لحد ما شنقتمممم بيه نفسكممممم

التوانسة نازلين مظاهرة يوم 25 تضامنا مع مصر

اه وربنا

والبرادعي مسافر

والاخوان خالعين

ومش محتاجين نقول الوفد خلع لانه مالوش لازمة في الحياة اساسا

بس التوانسة نازلين عشانا... ومش بعيد الاردن كمان تنزل عشانا، ويمكن نتفاجئ ان الجزائر كمان نزلت عشانا، وامبارح كان فيه مظاهرات في السودان على الغلاء، على الله بقى السودان تنزل عشانا

النكتة حتبقى لو كل دول نزلوا عشانا واحنا ما نزلناش بحجة ان "القيادات" مش نازلة... هي كانت فين القيادات لما تونس نزلت؟ 

طب يارب كمان الاردن والجزائر ينزلوا عشانا فعلا... يارب.. عشان اللي ما كانش ناوي ينزل يتكسف على دمه، ولو ما كانش عنده دم اهو نبقى عارفين مين اللي عنده دم ومين اللي ما عندوش 

القبض على محمد محيي وهو يوزع بيان 25 يناير

تحديث:
تم الافراج عن محمد محيي
--------
هو كان في سوهاج

ومحجوز دلوقت ومش عارفة باقي التفاصيل، يارب يكون فيه محامين بيتحركوا

الى كل مواطن عربي: الآن... راسلوا اهل تونس

التشكيل الحكومي الجديد كف واتلسع على قفاهم

جردل مية ساقعة ونزل عليهم

وعليا انا شخصيا... لا.. مش بعد كل الشقا والغلب والموت ده كله يحصل لهم كده ابدا ابدا ابدا

انتقالية مين؟ دول حيسيبوا الكراسي؟ ابقوا قابلوني

تخيلوا نعمل ثورة ونموت ومبارك يهرب هو والعيلة، واللي يمسك الحكومة احمد نظيف ولا بطرس غالي، ويبقى رئيسنا فتحي سرور، ويفضل العادلي وزير الداخلية، ويفضل ابو الغيط وزير الخارجية، ويجيبوا تلاتة من احزاب المعارضة:

السيد البدوي شحاتة

رفعت السعيد

مصطفى بكري

تخيل يا مواطن.. تخيل.. انت ترضى تموت عشان دول اللي يمسكوا الحكم؟ بذمتك ودينك تشكيل وزاري زي ده لما يقولك انا حكومة انتقالية حتصدقه؟ انا راضية ذمتك

انا بعت رسائل لارقام عشوائية تونسية وكتبت لهم

انا مواطنة مصرية اهنئ الشعب التونسي بثورته واشكره لانه منحنا الامل، وادعو الله ان يكفيكم شر الحكومة الجديدة ويعينكم على استكمال النضال

وانا شايفة اننا كلنا لازم نبعت لهم رسائل عشان نشجعهم، مش ممكن دم الشهدا يروح هدر

اهي الارقام، ارجوكم ابعتوا من كل انحاء الوطني العربي

ارجوكم ابعتوا

الثورة بتتسرق.. الثورة بتتسرق لصالح اشباه بطرس غالي والعادلي والسيد البدوي 

لأ لأ... ماحدش يولع النار في نفسه والنبي

الله يخرب بيوتكم.. ما تمشوا بقى.. امشوا بقى.. لازم الناس تموت وتتبهدل.. امبارح في الجزائر والنهاردة في مصر الناس بتولع في نفسها

بالظبط زي ما ابراهيم عيسى تنبأ في رواية مقتل الرجل الكبير

ما تمشوا.. عايزين ايه اكتر من اللي اخدتوه، ما مرات بن علي وهي ماشية اخدت معاها طن ونص دهب وهي ماشية، واهو قاعد ملك اهو في السعودية، روحوا حصلوه، حصلوه من دلوقت، امشوا امشوا امشوا امشوا حرام عليكم

عايزين منا ايه؟ 

انا مش عايزة حد يولع في نفسه.. ناس عندها اطفال وعندها اهل وبيوت ما يستغنوش عنهم

والنار بتوجع جدا، وبتشوه، ماحدش يولع في نفسه.. احنا حنكلمهم لكم يمشوا

امشوا بقى انتوا ما عندكوش دم؟ امشوا بقى امشووووووووووووووااااااااااااااااااااااااااااااااااااااااااا

يا تونس.. يا توانسة.. يا حماة الحمى.. اسمعووووااااا

يا رب يا رب يا رب كل التوانسة يدخلوا على البوست ده

يا رب يا رب يا رب كل التوانسة يتفرجوا على الفيديو ده

يا رب يا رب يا رب كل التوانسة يعقلوا الكلام ده

نداء هام جدااااااااا من الفنانة محسنة توفيق الى الشعب التونسي والثورة التونسية

عبمنعم سعير

عبد المنعم سعيد طلع في التلافزيون مع منى الشاذلي يتناقشوا: هل ممكن ثورة تونس تحصل عندنا ولا لا

طبعا هم بيقولوا لا.. ونفسهم لا

بس خلاصة تحاليل البول اللي عملها عبد المنعم سعيد ايه بعد كل الرغي اللي رغاه ده (انتوا عارفين هو بيكتب مقال بحاله ينفع يتقال في جملة) ايه بقى؟

الثورة اللي حصلت في تونس لا يمكن تحصل في مصر لسببين جوهريين:

النظام المصري احسن من النظام التونسي

الشعب المصري ابن وسخة مش نضيف ومحترم زي الشعب التونسي

اي والله يا عم انت وهو

النظام التونسي قمعي وبينتهك حقوق الانسان، وما عندهمش تلفزيون، وما عندهمش نت، وما عندهمش تسالي

الشعب التونسي مثقف ومتعلم ومتحضر 

عشان كده حصلت الثورة

بينما النظام المصري بيدي حريات وبيحترم حقوق الانسان وعنده تلفزيونات كتير وسايب النت

والشعب المصري جاهل وغوغائي ومتخلف ومهزأ وما عندوش دم ولا احساس

سبحان الله... ده كلام واحد مثقف ومتعلم ومتحضر زي الشعب التونسي؟ لما النظام فاتح لنا النت ومدلعنا ومهشتكنا وبيحترم حقوق انسانا، امال احنا جبنا التخلف والجهل والغباوة وقلة الكرامة منين؟ ولما نظام بن علي قمعي وقاطع عليهم المية والنور، امال هم جابوا التحضر والثقافة والعلام منين؟ انت يابني بتقول اي كلام.. مين اللي لما تقول له يا شفيق يرد؟ ما انشالله عنه ما رد

مافيش فرق بين مصر وتونس غير حاجتين:

الاول: ان التيار الغالب عندهم تيار التصوف واحنا تيار السلفية

التاني: اننا بنتكلم انجليزي وهم بيتكلموا فرنصاوي.. غير العربي يعني

ما اعرفش بقى هل العلام الفرنصاوي بيخلي الناس تثور؟ ولا التصوف هو اللي بيخلي الناس تثور؟ وايه حكاية اصل المصريين شعب ديني؟ مين اللي فهمكوا ان التوانسة كفرة؟ وايه موضوع التعليم ده؟ بو عزيزي متعلم واشتغل بياع خضار، زي ما متعلمين كتير عندنا بيشتغلوا في الدليفري وبيمسحوا المحلات في ماك دونالدز

باقولك ايه؟ اسكت... اسكت بلاش قلة قيمة والنبي

الرأسمالية توحشت في تونس، وجوعت الناس

وتوحشت في مصر وجوعت الناس

ومصر حتحصل تونس ان شاء الله.. عارف ليه؟ عشان اي تدارك حتعملوه مش حينفع.. مش حينفع

لازم تطردوا البنك الدولي، وتوقفوا المعونة، وتطردوا الاستثمار الاجنبي، وتأمموا الحرامية الداخليين عشان يحصل اصلاح يحل من جدره، اي تلييس حتعملوه حيأخر سنة، اتنين بالكتير، اديني باقولك اهو

واسكت برضه... انت وتامر حسني تسكتوا خالص

:x

السيد حسن نصر الله بارك للشعب التونسي "انتفاضته وثورته وانتصاره" وقال ان العبرة مش بس اذا الشعب يوما اراد الحياة، ولكن كمان العبرة بان بن علي خدم الاسرائيلي والامريكي والاوروبي ويوم ما شعبه طرده ولا حد منهم ساعده ولا سانده ولا حتى قبل يستقبله ولا يستقبل حد من عيلته "هاي هي العبرة" ولو يا سيد حسن

:)

وقال ان الحكومة اللي حتتشكل جديد "خلاص ما عاد نتسامح في سوء الاحوال المعيشية والفساد المالي والاداري والتآمر على المقاومة" تقبر قلبي يا سيد حسن

:)

كمان الشيخ القرضاوي، بعد ما سمح لنا اننا نشتم ونسب ونلعن بن علي واشباهه بفتوى رسمي، قال لنا كمان ان محمد بو عزيزي ان شاء الله شهيد، مش منتحر :) انا شخصيا ده احساسي، وده تاني احساس اتفق فيه مع فتوى للشيخ القرضاوي

ناقص بس يفتي بإن حرب الشعوب الحرة الحقيقية هي حربهم مع النظام الرأسمالي العالمي، والبنك الدولي، وهيئة المعونة، وصندوق النقد الدولي، والشركات متعددة الجنسيات

وان كل الانظمة الحقيرة هي حقيرة عشان هي عملية لهذه الجهات، وبتخدم مصالحهم على حسابنا وحساب جوعنا وهدمنا وبيع مواردنا وتدمير بنانا التحتية لصالح الاستثمارات الاجنبية، وان الاستثمار الاجنبي هو عمل عدواني استعماري وهو السبب في خلق الحروب والفتن والاستعباد والجوع والبطالة

مستنيينك يا فضيلة الشيخ

تقبري قلبي يا تونس

شدي حيلك يا جزائر

الله معك يا لبنان انت والاردن

وانااااااا حاشرف عليكم

:)

لا مصر جاية ان شاء الله.. وجايين بقوة للعلم يعني، والله ما باهرج، بس مجيتنا حتبقى ايه.. اوعى وشك يعني

ان شاء الله يعني.. بس انتوا حضروا لنا اودة المسافرين

هوبا تيتو مامبو

هيع هيع هيييييع.... والسيد حسن نصر الله حيتكلم النهاردة الساعة تمانية ونص

والاردن بيتظاهروا دلوقت

والنظام المصري قال ماحدش يستفز المصريين دلوقت... سيبوهم لما الحالة تخلص

وحكموا على الكموني - بعد سنة من ارتكابه جريمة طائفية وجريمة رأي عام - بالاعدام، بس غالبا مش حينتفذ لو ما قامتش ثورات تانية جنبنا، بس لو الجزائر شدت حيلها مع الاردن، ربنا يحكرمنا اخر كرم

تلات اربع ثورات حوالينا وحنعيش ملوك احنا
بس انا باقول يعني لو نشد احنا حيلنا كمان يبقى خير.. مش عارفين يبقى نقول للحوالينا ايدهم معانا بقى، حنعمل ايه
اه صحيح.. تأكد خلاص ان القذافي بيبعت فرق موت داخل تونس قبضوا على اتنين من عملائه... الشعب التونسي يعني هو اللي قبض عليهم
حبيب قلبي
ومن فضائل تونس علينا، اننا نسينا الفتنة الطائفية
ويا سلام بقى لو ثورتهم تلهمنا... يبقى كتر خيرهم يعني وخيرنا احنا كمان 
عموما حنشوف لبنان من ناحيتها حتعمل ايه عشان القرار الاتهامي حيطلع بكرة وغالبا حيتحط فيه حزب الله، وحنشوف الاردن حيعمل ايه برضه فيه الاف بيتظاهروا، وباقول يعني الجزائر مالها هديت كده؟ راعوا ان لكم زملاء يعني عايشين معاكم، احنا لنا ظروف معينة ومحتاجين تحميس الجوار، معلش اصبروا علينا، احنا جايين والله ان شاء الله، بس محتاجين تشجيع، شدوا حيلكم معانا واحنا برضه ربنا يكرمنا، بس راعونا بسبب الظروف المعينة يعني
اصلا اصلا هم كده كده عندهم خطط لرفع الاسعار والضرائب وكوبونات الغاز، وما قرروش يعدلوا في الخطط دي، قرروا يأجلوها بس، يعني كده كده احنا جايين ان شاء الله، بس شوية عليكم وشوية علينا
الجزائر مالها؟ بتطلع تطلع وتنزل على مافيش ليه؟
انا لاحظت كام حاجة مما يدل على انهم لازم يركزوا شوية
1- مالهمش نشطاء انترنت ليه؟ العيال بتوع اسمع يا عمرو اديب راحوا فين؟ نشطاء الانترنت التوانسة اكثر من رائعين وشغلهم يوزن بلد
2- انتوا بتبتدوا باستبياع كده ليه؟ كده نفسكم حيتقطع لما اول طلعاتكم يبقى تحديف بالطوب، مش حتقدروا تواصلوا، مش كله ضرب ضرب، فيه شتيمة الاول
التوانسة احسن حاجة فيهم انهم وسط ما بينا وبين الجزائريين، يعني لا هم مسالمين لدرجة الالتزام الكامل والمخلص والمتفاني بالكوردون بمنتهى الادب والاخلاق ولو صادف وخرج برة الكوردون هو اللي يرجع كأن الكوردون ده امه
ولا هم اول طلعتهم في الشارع تحديف بالطوب وتوليع نار زي الجزائريين ايه يا عم؟ اهدا على نفسك شوية انت كده مش حتعرف تكمل
اذا ما كنتش تبتدي هادي ويحصل تصاعد مش حتكمل، الهدوء الكامل بيتقطع لانك بعد شوية بتزهق زينا، والتحديف بالطوب من اول بسم الله الرحمن الرحيم برضه بيتقطع لانك لازم تسخن في الاول ما ينفعش تخش بكل تقلك، بنزينك حيخلص كده
التوانسة بيبتدوا سلميين ومنظمين، ولما يتطور الامر بيطوروه، وده اللي بيخلي نفسهم طويل وبيركب الطرف الاخر الغلط
ييجي واحد يقول لي: ايه يا عم جنرال الكازوزة انت قاعدة تحت البطانية تديري الثورة الجزائرية؟ اقول له اه.. طبعا، ما انا عبد السلام النابلسي يعني، باشرف عليهم
حنعمل ايه طيب، احنا محتاجينهم ينجحوا
لو الجزائر تنجح كده اولا نجدة لتونس من مؤامرات القذافي وبوتفليقة ومبارك
ثانيا احنا اساسا هنا بصُرم ولو الجزائر مع تونس صرمنا حيولع 
احلى حاجة في التونسيين
1- وحدة الهدف
2- وحدة الصف
وده اللي خلاهم منظمين كده
زائد بقى انهم نشطا من الداخل والخارج نحاول نتعلم منهم، كل النشطاء اللي نقلوا لنا الاخبار كانوا تونسيين بس، ما شفتش منهم اي استغلال لصالح اجندات سياسية، يعني اكيد كل النشطاء دول بعض منهم له انتماءات سياسية، بس ما شفتش انا انتماءات سياسية عليهم، ما قدرتش اميز اليساري من اليميني والعلماني من الاسلامي من كتر ما كان تركيزهم على هدف واحد وولاءهم الاول كان تونس بس
انا باقول يعني... مش قصدي حاجة
اهو الواحد بيقول كلمتين كده يتفك بيهم، انا عندي امل، وحنشوف لبنان والاردن برضه حيعملوا ايه، بس دول برضه لهم ظروف معينة، لبنان لازم توزن كل خطوة عشان ما تقلبش بنكد، وهم والعياذ بالله نكدهم وحش قوي وغلس وما بيطلعش الا بالطبل البلدي، والاردن عاملين زينا كده بالظبط، عندهم ظروف معينة... احنا املنا دلوقت كله معلق على الجزائر، الجزائر لو ربنا كرمها حتنقذنا وتنقذ الثورة التونسية معاها وتبقى ميت فل كده بس يظبطوا نفسهم، عندهم شوية زوايا بتحدف، لو اتظبطت ربع مللي من هنا ونص مللي من هنا نخلص كلنا
ونقول يا رب قبل اي حاجة

مبادرة

اتصل بيا خالد عبد الحميد وصحاني وقل منامي كالعادة، وقال لي احنا عاملين مبادرة، اتصلي باي رقم تونسي وهنيه على الحرية واشكريه على انه ادانا امل

انا اتصلت بواحدة في الجنوب وقالت لي يعيشك يعيشك الحمد لله وشالله العقبى لكم... فرحانة، فرحانة بجد، اخدت تهنئتي بشكل طبيعي كأنها عروسة :) كنت متوقعة انها تبقى خايفة، تستغرب، لكن لقيتها بتتلقى التهنئة كأنه يوم فرحها بالظبط

الكود بتاع تونس 

00216

وبعدين اي تمن ارقام

انا حطيت الكود واتصلت بنمرة بيتي هههههههه طلعت لي الست دي من جنوب تونس

الجزء الجنوبي هو اللي ثار الاول.. وانا فرحت ان المكالمة جه بختي في الجنوب

انا باتفرج دلوقت على الجزيرة، غسان بن جدو تونسي، وراشد الغنوشي، وعبد الباري عطوان

رائع بن جدو والغنوشي، بس عبد الباري عطوان بيقول ان شاء الله تبقى زي ثورة اتنين وخمسين؟ فال الله ولا فالك يا اخي

تف من بقك، انا مش ضد ثورة اتنين وخمسين في وقتها، من تمانية وخمسين سنة، دلوقت ما تنفعش، ثم يعني دي ثورة شعبية على ابوها، ثورة شعبية زي ما الكتاب بيقول، من غير قيادات ولا زعامات 

والحقيقة انا عايزة اقدم خالص احترامي للاتجاهين الاسلامي والعلماني التونسيين، للأسباب الاتية

1- بالرغم من انهم اتأخروا في دعم الثورة بس كده احسن، انا ما اعرفش هم عملوا كده بالعمد، ولا جات معاهم كده، بس في كل الاحوال اشكرهم على التأخر في دعم الثورة، اشكرهم انهم سابوا الشعب هم اللي يقرر مسار الثورة ويكبرها لوحده، لوحده، من شاب يولع في نفسه، لانتفاضة، لثورة

2- اشكرهم انهم لم يعطوا اي تعليمات للثوار زي الاهبل اللي طلع يدي الشعب التونسي تعليمات، اشكرهم انهم لما انضموا للثورة، انضموا بعد النقابات كمان (وكمان النقابات اتأخرت شوية في الانضمام للانتفاضة واشكرهم على كده برضه بس ما اتأخروش كتير، يمكن يوم او يومين، لكن الاتجاهات السياسية استنت شوية حلوين وكتر خيرهم) وكمان لما انضموا، كانوا ماشيين ورا الشعب، مافيش حد فيهم، لا زعيم علماني، ولا زعيم اسلامي، خرج على الناس يدي اوامر للناس ابدا.. ابدا، ما شفتش واحد منهم ادى تعليمات ولا عمل لنا جنرال كازوزة وقعد يدي توجيهات، خالص، بالعكس، كل تعليقاتهم كانت متوجهة لبن علي انه يستمع للشعب وفضلوا حافظين نفسهم في الصفوف الخلفية والقرار قرار الشعب وهم اللي يمشوا وراه

اشكرهم اشكرهم اشكرهم... رائعين

3- اشكرهم ان بعد الانتصار لم يدع اي اتجاه منهم ولا اي زعيم منهم لنفسه اي فضل ولا قعد يسفسط ولا يحلل ولا ينظر على الناس.. ابدا، وفضلوا كلهم، بلا استثناء، من اقصى اليمين لاقصى اليسار يكرروا، الفضل للشعب، والثورة ثورة شعبية، والشعب هو اللي يختار، واحنا ماشيين وراه

اشكرهم اشكرهم اشكرهم اشكرهم اشكرهم اشكرهم اشكرهم

ناس عندها دم فعلا.. الله عليهم.. الله عليهم

وانا مش مع المصريين هنا اللي شتموهم وقالوا سايبين الناس.. الله يكرمهم سابوا الناس.. الله يسعدهم سابوا الناس.. الله يهنيهم سابوا الناس ومشيوا وراهم

والله يكملهم بعقلهم 

they are keeping low profile

اللي فيهم برة  راجع وهو بيقول بفضل تضحيات الشعب انا ما عملتش حاجة

واللي فيهم جوة بيقول انا تحت امر الشعب اللي هو يقوله

انا كل ده باتكلم عن المعارضة الحقيقية.. مش باتكلم عن الاحزاب الصورية، اصل هم كمان عندهم السيد البدوي شحاتة زينا كده، ودول دلاديل ومنتفعين، ومكشوفين، والشعب بيحتقرهم

-----

كمان احب اشكر النشطاء التونسيين من الخارج اللي وصلوا لنا اخبار الثورة من اول يوم

والحقيقة هم كمان عندهم دم.. عندهم دم بمعنى انهم ما كانوش بيناموا، ونقلوا للعالم كفاح الشعب التونسي، لكن مافيش اي حد فيهم ادعى لنفسه فضل، ولا قال: انا شاركت في الثورة... ابدا، بالعكس برضه

they are keeping a low profile

-----------

ودي ناس عندها دم... فاهمين يعني ايه عندها دم؟ يعني ناس بتحس على دمها، ناس بالرغم من اهمية دورها، واقفة قصاد جلال دم الشهدا بحياء واستحياء واحترام وتواري عن الاضواء.. ما شفتش حد من المعارضة الحقيقية مش الصورية، او من النشطاء في الخارج بيحاول يبان او مشغول بالاضواء او بادعاء الفضل، بالعكس، خجلانين انهم ما ماتوش

الله يكملهم بعقلهم

ونشكرهم لانهم ادونا مثل نتبعه ونعرف الانسان المفروض يتصرف ازاي

------------

الشعب التونسي شكل لجان شعبية عشان يحمي بلده من الشرطة المنحطة التابعة لبن علي والقذافي

باحبك يا تونس

:)

من الجزائر: محسن بوطرفيف يحرق نفسه

شاب عاطل عن العمل من الجزائر، رفضوا تشغيله فاشعل النار في نفسه

بصوا بقى... انا مش عايزة حد يحرق نفسه تاني، مش عشان حاجة، بس عشان النار بتوجع قوي يعني ربنا ما يكتبها على حد

انا ماليش دعوة باللي قاعدين يودوا الناس النار والجنة على كيفهم.. هم ايش عرفهم؟ هم كانوا ربنا؟ ما يمكن ربنا يحسبها له عملية استشهادية على حسب نيته.. انا باتكلم بس على ان النار بتسبب الام فظيعة في الجسم

:'(

كده متعب قوي على فكرة، حاجة توجع القلب يعني

بس املي ان الشعب الجزائري ينتفض مرة اخرى ويعمل زي تونس عشان العدوى تجيلنا.. حتى القذافي خايف ومرعوب وهو وبوتفليقة عمالين يتآمروا على الثوار التونسيين، يعني حتى حد فينا لو انتفض ممكن ينقذ ثورة اخواته في تونس، احنا لو حد فينا عمل لبش حيتلخموا فينا عشان مش حيبقوا عايزين تونس تانية، على الاقل نشغلهم شوية بدل ما هم قاعدين متفرغين للثوار التونسيين وعمالين يعاقبوهم عشان احرار

يا رب

من عندك يارب

الاهبل بيدافع عن الاهبل منه

تحديث:

وردنا الآن من التويتر أن بعض العصابات التي تقوم بالسلب والنهب تابعة لابن الوسخة اللي طلع يقول للتوانسة: مالكوش الا بن علي، بعد 23 سنة هذه آخرتها؟ اه يا قلالات الاصل، ما تخلوه، ده بقاله معاكوا كتير يعني، والمفروض يبقى معاكم مدى الحياة

الكلب

----

بحبك يا تونس :)

لا حول ولا قوة الا بالله العلي العظيم.. كان لنا فين ده كله يا ربي؟ بن علي يطلع يشاور بصباعه زي فتيات الاعلانات "والحشو جوة بجوز الهند" والقذافي يقول خالقين لكم بلبلة بالكيكيليكس وقبل كده مبارك قال: خسارة كبيرة لاسرائيل وخسارة كبيرة للبتاع ده، والقذافي يشتم يشكر عبد الله السعودية يقوم عبد الله السعودية يشتمه، ييجي القذافي يشتمه يقوم عبد الله السعودية يشكره، وكمان امير قطر يشكره على "هذه المبادرة" والبشير بيرقص بالريش.. استغفر الله العظيم يا ربي.. ليه كده؟ احنا ما نستاهلش ده كله

اتفضلوا... ده بني ادم؟

بن علي يا جبان، شعب تونس لا يهان

تحديث:

المعارض راشد الغنوشي ممنوع من الحج

المجاهد رمضان عبد الله شلح ممنوع من الحج

الشيخ محمد العاصي واللي كان امام مسجد واشنطن ممنوع من الحج

اما القاتل السفاح السارق اللي مازالت جرائمة سارية حتى كتابة هذه السطور والذي بكته إسرائيل ووصفته بواحد من أكبر الداعمين لها فهو يؤدي العمرة وينجس بيت الله الحرام

انا باقولكم اهو واسمعوني بقى

ده فجر ربنا مش حيعديه بالساهل.. مش حتعدي السنة دي من غير ما اللي سمح للكلب ده بدخول البيت الحرام يتعاقب ويبقى عبرة ان شاء الله

تحديث:
علمت من النشطاء التونسيين على التويتر ان المياه في تونس كلها صالحة للشرب والحمد لله
تحديث:
انا مش باخد فتاوى، انا باستفتي قلبي، لكن لكل مدمني الفتاوى
الشتمية حلال حلال حلال بفتوى من الشيخ القرضاوي بذات نفسه 
تحديث:
حريق آخر في بنزرت... هذا الكلب بن علي سيذهب لأداء العمرة، هذا النجس سيدخل بيت الله الحرام، أقدر موقف الشعب السعودي، لكن بيت الله الحرام في عهدتهم ومسئوليتهم.. حقنا عليهم أن يحموا مقدساتنا من هذا الدجال القاتل السفاح، مازال يقتل اخوتهم في تونس، مازال يلوث المياه ويتبع سياسة الارض المحروقة
هذا الكلب واذنابه يجب تسليمهم لمحاكمة دولية
لا اريد المزايدة على احد.. لكن رجاء ممن يخافون الله في السعودية التوجه فورا لحماية بيت الله الحرام من دخول هذا النجس اليه
-----------
اذناب بن علي الكلب، بعد تطبيق الفصل 57 من الدستور، بينتقموا من الشعب التونسي

قاموا بحرق سجن المنستير وقتلوا 57 كمان سمموا مياه الصنابير، وحدثت حالات تسمم كثيرة

الكلب.. الكلب.. وارادة الشعب التونسي اكبر واقوى منه

ارجو من الاخوة داخل وخارج تونس، ان ينقلوا الينا بالضبط احتياجاتهم، والطريقة التي نساعدهم بها

واحنا برضه نحاول نفكر حنساعدهم ازاي؟ الكلب سمم لهم المية، دلوقت اكيد حيحصل ازمة في المياه المعدنية، هل فيه امكانية انه بالجهود الشعبية نرسل لهم شحنات من زجاجات المياه عبر التوانسة الموجودين  او باي طريقة

انا مش عارفة مخي واقف مش عارفة افكر

عايزة اعمل لهم اي حاجة

-----------

يارب يا بن علي يقبل دعوات الراجل ده عليك

والدعوات دي كمان





وبرضه الشعب التونسي حر

النهاردة وقفة احتفالية مش احتجاجية.. امام النقابة

النهاردة الساعة 6 ان شاء الله فيه وقفة احتفالة امام نقابة الصحفيين

صباح الفل عليك يا تونس

وحاقعد شوية افرجكم على الفيديو ده

اجمل مشهد شفته في حياتي.. مافيش احلى منه.. في حياتي كلها ما شفتش احلى منه

الكلب ديله لسه بيلعب

تحديث:

شعب تونس العظيم، يتظاهر الآن رافضا تولي محمد الغنوشي السلطة.. يعيشكم يا توانسة

اه يا قلبي... مش ممكن.. مش ممكن





يا توانسة ياللي عذبوكم، يا توانسة ياللي قهروكم، يا توانسة ياللي نهبوكم.. اتنفسوا الحرية. يحيا شعب تونس.. بن علي هرب .. بن علي هرب


الجزيرة قالت بأن عصابات السلب والنهب هي مليشيات تابعة لنظام الديكتاتور بن علي كما توقعنا
وهذه صورة للشرطة التونسية وهي تقوم باعمال النهب

سأتحدث باللغة العربية الفصحى حتى لا يحدث أي سوء فهم يتعلق باختلاف اللهجات العامية

بن علي لم يرحل كليا بعد

وآمل أن يظل الشعب التونسي متمسكا بحقه ومتشبثا بنضاله حتى يقطع ذيول الأفعى التي تسلمت مقاليد الحكم الآن، محمد الغنوشي قائم بأعمال الرئيس المسافر عملا بالفصل 56 من الدستور، أي أن ما يحدث هو التفاف على مطالب الشعب التونسي باستقالة بن علي التي لم يعلنها حتى هذه اللحظة، وحتى كتابة هذه السطور، بن علي مازال هو الرئيس التونسي، ومحمد الغنوشي ومن معه يساعدونه في تحقيق مآربه، هؤلاء هم حفنة من الخونة للشعب التونسي، وعلى الشعب التونسي التخلص منهم كما تخلص من بن علي

ونظرا لأننا هنا في مصر لدينا خبرة بالأنظمة التي عادة ما تستعين بالمسجلين خطر لحمايتها من الشعب فأحب أن أوجه نداء للشعب التونسي الباسل:

الكلب مازال يهز ذيله.. فقد سمعت الآن في نشرة الأخبار المصرية أن قوات الأمن قالت للشعب التونسي "على كل مواطن حماية نفسه لأنه لا يوجد هنا من يحميه" بعدها قامت بعض العصابات المسلحة بمداهمة المنازل والمتاجر، وقامت بأعمال سلب ونهب، وكما سمعت في المذياع، فإن الجيش لا يتدخل لحماية الناس

وكما ذكرت، نحن هنا في مصر لدينا خبرة بالأنظمة التي تستعين بالمجرمين على شعبها، هذه خطة مدبرة لإصابة المواطنين التونسيين بالهلع وإحداث فوضى إجرامية عارمة، عبر الاستعانة بالمسجلين خطر والمجرمين، لقمع ثورة الشعب التونسي، ومن ثم يتم تأهيل الظرف إما لعودة بن علي مرة أخرى، أو لاستبدال نظام بن علي الديكتاتور، بنظام ديكتاتور آخر. 

لست في موقع تقديم النصيحة، ولا حتى كشف المكشوف لدى الشعب التونسي الباسل، الواعي، النابه، لكنني وجدتني مدفوعة لقول هذا الكلام ولو على سبيل التضامن

لا يمكن بأي حال من الأحوال أن تذهب دماء الشهداء سدى وأنا على يقين من أن الشعب التونسي لن يسمح بذلك

عودة للمصريين:

انا مش قلت لكم مبارك معاه على الموبايل؟ طب والله العظيم حركة البلطجية دي ما تطلع غير من مبارك، اكيد هو اللي شار عليه بأنه يسلط على الشعب بلطجية زي ما بيعمل معانا، انا عارفاه، اكيد قال له: مش هم عمالين يقولوا لك تونس حرة وبن علي برة؟ طب اطلع لهم برة بقى، وسلط عليهم مسجلين خطر يخربوا لهم البلد ويرعبوهم عشان يعرفوا قيمتك

انا عارفاه.. قلب الام.. انا عارفة يا بتاع تانية تالت

الله الله يا تونس.. وسلامي عليك يا تونس

تحذير.. الفيديو فيه مشاهد مؤلمة جدا

الاحتجاجات اشتغلت في كل انحاء تونس

وانباء عن هروب  بعض افراد عائلة  الطاغية

مدد يا تونس... بس احنا مش فاضيين.. احنا عندنا فتنا طائفية