يا جالاوي.. انت لقيط لقيط فاهم يعني ايه لقيط؟

بعد بيان وزارة الخارجية انا مستنية تعليق مصطفى عبده على جالاوي اللقيط

الراجل قال مش داخل مصر، قوم وزارة الخارجية بجلالة قدرها تطلع بيان تشتم فيه جالاوي وتقول له اننننننت مش ابنيييييي جوردون براون بس هو اللي ابنيييييي انت لقيط لقيط فاهم يعني ايه لقيط؟ انت شخص غير مرغوب فيك، سم كده، يا بايخ، يا رذل، يا تلم، اللللللللل، مين قالك تعدي من حدودنا تشغلنا وتقل راحتنا؟ يا تشوف لك حل في حكايتنا يا تعزل وتسيب حتتنا، ده صخص ياناس، فرد، مواطن يعني من مواطنين العالم

---------

الا العاشرة مساء ما عملتش حلقة خاصة وكسرت الاجازة ليه زي ما عملوا في احداث الجزائر؟ السبعة اللي ماتوا والناس اللي اتنكدت في عيدها ما يشبهوش تي شيرت محمد فؤاد والبنطلون اللي اتلقع لفردوس عبد الحميد؟ وللا لازم هالة صدقي وهاني شنودة يبقوا من ضمن القتلى عشان يعملوا حلقة خاصة؟

-------

مقال ابراهيم عيسى حلو قوي هنا لدرجة اني سبت تعليق مش عارفة ح ينشروه وللا لا، وانا مش متعودة اسيب تعليقات عند حد ناهيك عن الجرايد

بس هو قال كلمة حكمة، النظام ده مش بس مش كفء، ده حتى مش جدير بانه يحكم مصر، هزأنا، مش مقامنا خالص ولا قيمتنا، مرمطة يعني وبهدلة، ده مش نظام ده سب دين ده، تفة حد تفها على وشنا، ست شرشوحة وحد سلطها على راجل محترم تمرمطه، عيل وحد سلطه على هانم يهزأها

كنا ناقصين احنا، الفاتيكان بتهزأنا طبعا، طب احنا نروح فين دلوقت حاليا؟ نروح فين؟ كل ما نقول العالم كله بيهزأنا قوم النظام ده يعمل عملة اسود من اللي قبلها عشان نكتشف ان لسه فيه في العالم ناس كانوا ساكتين عننا وخلاص بقوا مش قادرين يمسكوا احصابهم

والموضوع مش عايز يتلم ولا كأنه غارات اسرائيل على غزة

احمد عبد الفتاح بيقول لي المسيحيين نزلوا يتظاهروا ضد ارادة الكنيسة، والمسلمين نزلوا يضربوا في الصحفيين (ما تفهمش ايه اللي طققها في دماغهم ما يضربوش المسيحيين كالعادة وطلع في دماغهم يضربوا الصحفيين) والامن بيضرب في الكل، على رأي امي، زي خناقات افلام انور وجدي، وفي الاخر بقى زينات صدقي ح تزغرد؟

والاوشاعات بقى، الاوشاعات مالية الدنيا، واليوم الساقع قاعدة تقول: انباء عن.. انباء عن... مافيش حد راح يغطي؟ كله امباء امباء امباء؟ مافيش غير احمد عبد الفتاح وباكينام ناصر بس هم اللي راحوا بنفسهم؟ اخر حاجة امباء عن مسيحي قتل تلاتة مسلمين، خلاص، فاضل لهم اربعة تانيين ونبقى خالصين وما يوجعوش دماغنا بقى، بس باكينام بتقول انها ما سمعتش عندها في نجع حمادي كلام يؤكد ده

يعني اللي ماتوا دول لو كانوا لعيبة كورة وللا طارق الدسوقي واحمد عبد الوارث وبسام رجب اللي راحوا ماتش السودان كان زمان الدنيا كلها عندهم

---------

الا واحد مسيحي، بس متدين بقى مش زنديق زي مينا، قال لي ان ظهور العدرا بالشكل المتكرر ده ومن غير ما تتكلم ولا تقول هي جات ليه دليل على تحذير مش بشارة.. قال وبيقولوا ظهرت في نجع حمادي امبارح.. طب كفاية تحذيرات يا ام النور والنبي، حلفتك بحبيبك النبي كفاية، ماهو يا تقولي جاية تحذري من ايه يا اما كفاية بقى

الجزائريين دعوا علينا وللا ايه... هم الجزائريين هم.. انا كنت عارفة، هم قبل كده الغزاوية وحزب الله دعوا وبعدين الجزائريين...عشان فضحناهم وخلينا اللي ما يشتري يتفرج عليهم، قالوا لنا روحوا الهي تتفضحوا شرق وغرب يا بعدا

وبعدين المسيحيين ح يدعوا علينا، ناقص مين ما دعاش علينااااا ناقص مين ياربيييي ناقص مييييين؟ اه... اثيوبيا.. اثيوبيا اللي قررنا فجأتن لسوء حظها اننا نعمل معاها علاقات، نهارها اسود، اساسا هي حد دعى عليها عشان يسلطنا عليها، وبعدين هي ح تدعي علينا هي كمان، يبقى ناقص مييين، ناااقص مييين يا سيديييي، كده عندك سنة وشيعة ومسيحيين..امممم لسه البوذيين، والهندوس، لا انا الاداء ده مش عاجبني، نظام مبارك مكسل قوي، شدوا حيلكوا شوية عايزين نلحق نتسخط ورق تواليت قبل ما القيامة تقوم

بس الحمد لله ربنا مونسنا والله، ماليزيا المسلمين والمسيحيين بيتخانقوا مع بعض على اسم "الله".. اي والله، الله كلمة عربي زي ما علمونا في المدارس، وهم بيتكلموا ماليزي، ايه اللي يخلي المسلمين والمسيحيين الماليزيين يقولوا الله على ربنا مع ان اكيد فيه ربنا بالماليزي؟ ما تعرفش، المهم ان فيه ناس مجانين غيرنا في العالم ده والحمد لله، عشان ما نحسش بالوحدة في المصحة العقلية اللي احنا قاعدين فيها دي