ما تسكتيش يا جورجيت، وانا معاكي

ماحدش بيشجع جورجيت، وانا مش معاهم، الناس متخوفة منها عشان هي من الحزب الوطني وبيقولوا الحداية ما بترميش كتاكيت

بس انا ليا اللي هي بتقوله، قد تكون اخدتها الجلالة زي ما مينا بيقول، قد تكون مطبخة زي ما تامر بيقول، قد يكون: اللهم اهلك الظالمين بالظالمين زي ما وائل خليل بيقول

بس انا مش قادرة اشوفها بتقول الحق وما اتضامنش معاها، طبعا انا ما اقدرش اعمل لها حاجة، انا تفة يعني ايش اكون، بس مش اقل من اني اعلن تضامني مع موقفها

وانا مش قادرة اقاوم الاغراء: ست صعيدية مسيحية واقفة لوحدها قدام الداخلية والكنيسة والحزب بتاعها، انا قلت لهم على التويتر دي ناقص يبقى فيها اصل فلسطيني لجد جزائري شيعي متنصر وعضوة في حماس وعندها تينيا وح يبنوا جدار حوالين بيتها

وباقول ان اي مساس بجورجيت قليني ح يبقى المرة دي مكشوف

يعني: لو صحينا الصبح ولقيناها بتقول هالله ع الجد والجد هالله هالله عليه انا حسحس وحسحس انا ونفاجأ انها طالعة عمرة زي ما كرليس استشهد بحديث "سيدنا محمد عليه السلام"  ح نعرف انها اتهددت ومش ح نسكت

لو صحينا الصبح ولقينا مسجل خطر، اخوان مسلمين، سلفي، سعودي، ايراني، صعيدي، قناص حمساوي، عضو في خلية سرية لحزب الله، مختل عقليا، مهووس جنسيا، منحرف نفسيا، اجرب حزين، قاتلها ح نعرف مين اللي قتلها ومش ح ياكل معانا

لو صحينا الصبح ولقيناها متلفق لها قضية فساد وللا سرقة وللا مخضروات وللا دعارة روسيات وللا تهريب سلاح لحماس وللا عمالة لايران وللا تجسس لصالح هاييتي وللا تشجيع لفريق الجزائر ح نعرف برضه مين اللي عمل كده

خلاص بقى، احنا مش ح ناخد خمستاشر قفا على سهوة

بس انا ليا طلب عن جورجيت قليني، الستاشر اسرة الله يخليك.. مش منيمني الليل

ولو طلعت بتضحك علينا ومطبخينها زي ما بيقول تامر ملحوقة يعني، احنا رحنا فين؟