بنشكر الاخت سوزان ومازال مركز هشام مبارك في انتظاركوا

طبعا مركز هشام مبارك دول ايه؟ دول مركز قانوني، غير ربحي، وربما يكون خساري، يعني ايه؟ يعني كل غلبان مظلوم باع اللي وراه واللي قدامه على محامين نصابين وقضيته مافيهاش مكاسب: مافيها شو اعلامي، بنط سياسي، سبوبة تبعتها للممول وتقول له انا باشتغل في القضية دي.. بيروح فيييين؟ مالوش غير مركز هشام مبارك ابو الغلابة. هو ده اللي بيجري له في قضيته، ولامم شوية محامين وموظفين وحتى السعاة من اللي هم بتوع الانسانية والوطن ونحن فداهما والكلام ده اللي بيقولوا عليه بتاع الستينات وبقى مودا قديمة ده. وما اكثر الغلابة المظاليم في مصر اللي قضاياهم ما تكسبش كاميرا ولا تمويل بس مظلومين.

لزومها ايه المقدمة دي؟ عشان بس اقول لحضراتكوا ان مركز هشام مبارك دول ماهماش ناس صيع ولا فاضيين ولا قاعدين يقشروا بصل عشان اقعدهم بمنتهى البجاحة مني ومن غير ما يستفادوا مني ابيض ولا اسود عشان يستلموا التوكيلات من حضارتكوا، هم مش محطة بنزين ولا بوابين، هم بيعملوا كده بجملة الانسانية وخدمة البلد اللي واكلة لهم دماغهم وساعة الجد ماحدش ح يفتكرهم ولا يعبرهم بشكرا اللي هم عادة مش بيستنوا خمس ثواني على التليفون عشان يسمعوها، بيقفلوا في وشي على طول قبل ما اقولها (مش عارفة ايه حكاية القفل في وشي دي؟ ده كلهم بيعملوا كده: طب شكـ... تووووووت)

الاساتذة خدامين الانسانية ببلاش وكأن الانسانية دي ماسكة عليهم صور مخلة اللي قعدتهم، غصمانية واقتدار، مربوطين مستنيين وعاملين ملف مخصوص لجمع التوكيلات ما وصلهمش الا توكيل واحد من الاستاذة سوزان اللي انا ما اعرفهاش وباشكرها اشد الشكر وانا برضه قلت الجدعنة دايما سابقة في الحريم، لا ويا عيني منبهين على الساعي لو جه الصبح ولقى توكيلات من تحت عقب الباب يشيلها عشان يحطوها في الملف

طيب

انا ان شاء الله ح اعدي عليهم بكرة الاحد 3 يناير الساعة اربعة العصر اخد التوكيلات او التوكيل واوديه المعادي للاستاذ ابراهيم يسري اللي برضه مش بياخد فلوس لا من جوة ولا من برة على الشغلانة دي ده بيعملها، في سنه ده وربنا يديله الصحة ويخليهولنا، لوجه الله وفي سبيل الوطن، واللي ح الاقيه ح اخده، والله مافيش الا التوكيل بتاع الست المرجلة دي البركة في القليلة وهي كسبت القضية من قبل ما ترفعها، فيه غيره خير وبركة، انا لما عملت التوكيل ما اخدش مني نص ساعة يعني

والمعلومات تاني اهي، انا حفظتها من كتر ما كتبتها:

رقمك القومي. توكيل عام قضايا للمحامي ابراهيم يسري سيد حسين، المحامي بالنقض، العنوان 11 شارع 213 دجلة المعادي. 

وتروح 1 شارع التوفيقية مركز هشام مبارك الدور الخامس تسلم التوكيل. آخر معاد اللي هو ح اروح فيه ان شاء الله، اربعة العصر بكرة الاحد 3 يناير.

او

تيجي بنفسك مجلس الدولة يوم الاثنين 4 يناير الساعة تسعة الصبح، ومجلس الدولة يقع في الدقي

بس هو غالبا الناس بعتت على عنوان السفير ابراهيم يسري بالبريد السريع بقى على طول، غالبا كده ان شاء الله