خلاص بقى.. خدوهم على قد عقلهم

والله ما باقول كده عشان انا مصرية، انا بقالي فترة باحاول اطلع نفسي واتعامل على اني سنغالية مع الموضوع عشان ما اظلمش حد. بس من خلال متابعتي للاعلام المصري باقول للعرب، خلاص بقى، خدوهم على عقلهم، والله. خلاص.
مالكوش دعوة بيا انا سنغالية دلوقت. المصريين زعلانين. مكبرينها، مزودينها، متجننين، ماشي، الرحمة بقى. ارحموهم. اتفرجت النهاردة على العاشرة مساء، على الاقل لانه البرنامج الوحيد اللي مافيهوش شتيمة وضرب بالجزم وخوض في اعراض الناس وتحقير للجزائريين والصراخ الهيستيري بكرامة مصر اللي ظهرت فجأتن زي عفريت العلبة. بس الحلقة كانت بعنوان: لماذا يكرهوننا؟
خلاص.. انا عارفة ده جنان رسمي، مافيش حد بيذنب الدول المحيطة بيه ويحط افتراض ويحاكمهم على اساس الافتراض ده وكمان يدافع عن نفسه ويحس انه ضحية غير اتنين، امريكا ومصر.
الاعلام الامريكي عمل كده عشان يوجد مبررات للحرب على العرب والمسلمين ويقنع الناس ان المسلمين بيكرهوهم فيستاهلوا يموتوا. ده مبرر معقول، يعني اقصد الواحد يبقى فاهم هم بيعملوا كده ليه؟
لكن ليه المصريين بيعملوا كده؟ انا عارفة، بس خلاص، حرام بقى، قولوا لهم احنا بنحبكوا. اكيد يعني مصر مش عايزة تستعمر حد، هم بس تعبانين، مرهقين، حاسين بالضعف، الجيل ده من المصريين جيل ضاربه السلك، وان شاء الله الاجيال اللي جاية ح تعمل بيبي تقيلة على قبورنا، والموضوع مالوش علاقة خالص بمصر، مصر مش مجرد جيل فاشل في مطلع قرن مليان ظلم في كل الكرة الارضية، بقالها كتير، وح ييجي ان شاء الله اجيال تانية واكيد ح تبقى اوضاعهم احسن، اصل مافيش اوسخ من كده بصراحة، ح يحتقرونا صحيح ويقولوا الحمد لله ان الجيل ده غار في داهية، بس خلاص تعاملوا بقى. والله هم مش اشرار، مش اشرار قوي يعني، هو كل انسان جواه طاقة شر، ومع الفشل والمعاناة والاحساس بانه اوحش جيل مر على تاريخ مصر، بيتصرف تصرفات هوجاء.
يعني نفس الجيل ده اللي عامل عزا لكرامة مصر، هو الجيل اللي بيقعد يشتم في تاريخ مصر، هم هم يعني، بيقولوا على نفسهم مصريين ويقولوا مصر دي عمرها ما شافت يوم عدل وطول عمر المصريين عبيد. واي واحد بيفك الخط عارف ان ده كلام فارغ، بس هو الجيل ده من المواطنين حاسس بالفشل، وبصراحة حاسس انه عار على البلد دي وعلى تاريخها، انا واحد قالها لي بالمفتشر: احنا مشكلتنا ان لنا تاريخ. عارف كده لما يبقى ابوك دكتور مخ واعصاب وامك عالمة ذرة وانت ساقط تانية ابتدائي بعد ما عدتها سبع مرات؟ احساسه انه خريج تانية ابتدائي يخليه يقول لابوه: ايه يعني دكتور انت يعني؟ طب ده انا باعمل فلوس اكتر منك، بس ح يروح لابن عمه وح يقرفه بقى، انا ابويا دكتور، انا امي عالمة ذرة، المفروض، رحمة بيه يقول له وماله؟ انت سيد الناس وابن اصول، ما يكبسوش ويقول له ما تسكت بقى يا ساقط تانية ابتدائي، وللا يعمل زي الفلسطينيين اللي مصممين اننا نرجع المدرسة عشان عندهم امل اننا نذاكر وننجح وناخد الدكتوراه كمان، وما تقعدوش بقى تخنقوهم وتقولوا لهم لو انتوا بقيتوا كويسين احنا كلنا ح نبقى كويسين عشان ح تسمعوا كلام وحش، مش عشان الجيل ده بديل وقرون، بس عشان ده كلام فوق طاقته، اصبروا على رزقكوا، ح ييجي جيل كويس، ادي البلد قاعدة ح تروح فين يعني؟ ح تغرق؟ اهو تبقوا استريحتوا واحنا متنا واستريحنا.
فخلاص بقى، خلاص، ارحموهم، بالراحة، اعملوا معاهم زي عم مدبولي ما كان بيعمل مع قناوي في اخر فيلم باب الحديد، او زي ما فؤاد المهندس كان بيغني للسفاح ماما زمانها جاية. مش عايزين مشاكل الله يخليكوا، لحد ما الغمة دي تنزاح، هو الجيل ده ح يفضل عايش الى الابد؟
يعني يرضيكوا ومصر مبتلاه بالجيل الضعيف ده تقع فريسة في ايد اسرائيل ونتعزل وييجي اللي بعدنا يلاقوها عكة يقعدوا ميت سنة يصلحوا فيها؟ الناس لبعضيها، هم عايزين كلمتين حلوين، عندهم نقص حنان وعايزين حد يقول لهم: باحبكوا باحبكوا باحبكوا. ما تعملوا لهم اللي هم عايزينه ده الكلمة الطيبة صدقة، لحد بس ما الواد ساقط تانية ابتدائي يخلف عيل يمكن يفلح في المدارس وياخد الدكتوراه اللي انتوا عايزينها.
بلاش سلخ وتريقة والنبي، الكترة تغلب الشجاعة، فما بال مافيش شجاعة؟ وما تزعلوش، ما تزعلوش والنبي من قلة الادب دي، ده واد ساقط تانية ابتدائي هايف وكل ما ح تقول له يا فاشل ح يرد عليك ويقول لك: انت بتهين الدهاشنة؟ وماحدش بيهين الدهاشنة غير هبله، وقعدته مع العيال الصيع في وسط السكة يلعب معاهم بلي ويركب الزقازيق في المولد ويتخانق مع عبيط القرية ويعمل عقله بعقل عيل قد عياله شاط الكورة وجات في الازاز. وعلى رأي منى الشاذلي: الرد على جريدة الشروق ده زي واحد كاتب نوت على الفيس بوك يقوم رئيس الوزرا يخش ويتخانق معاه، معلش، بكرة تروق وتحلا، هو ح يموت وح تفضل الدهاشنة، من هنا لحد ما يموت طبطبوا عليه وادوله نبوت الغفير وقولوا له: احنا بنحبك يا بهلول، وقال على رأي المثل عمر الضفر ما يبقى مية والدم ما يطلعش من الكم.
وكلمة لاخوتي المواطنين، احنا جيل عار على البلد دي، يعني خسارة في جتتنا مصر الحقيقة، بس اهو نصيبها، من هنا لحد ما نموت والبلد دي ربنا يعافيها مننا ويجيب لها جيل محترم (وح ييجي جيل محترم بس نطلع منها احنا وما نحاولش نهبب اي حاجة عشان بنعك) نتنيل ونسكت ونبطل جر شكل في الناس، احنا بالصلاة ع النبي في ظرف خمس ايام اشترينا عداوة كل العرب، وكسبنا احتقار عالمي تاريخي عمره ما حصل في عيلة الدهاشنة، ده احنا في عز العدوان الثلاثي والعالم كله بيشتمنا وبيقول علينا شيوعيين عمر ماحد احتقرنا الاحتقار ده كله، كانوا بيكرهونا بس بيحترمونا، انما بعد انجازاتنا وتظاهراتنا الشعبية حتى مجلة التايمز مستهيفانا، فرانس توينتي فور مستهيفانا، اسرائيل مستهيفانا، الامريكان طلعوا علينا نكت وصحابي الامريكان اللي على الفيس بوك بعتوا لي يقولوا لي كده، اهمد يا بهلول، العب قدام البيت وما تروحش تبل نفسك في الترعة عشان البلهارسيا وما تحدفش الناس بالطوب والا والله ما اوديك الزقازيق في العيد.
كفاية بهدلة في البلد دي، نسيبها في حالها مدام مش عارفين نشرفها وما نلخصش مصر فينا عشان بجد احنا عيبة في حقها، احنا مش مواطنين، احنا ميني مواطنين، بميني مخ، وميني انتماء، وميني وطنية، وميني انجازات، وميني كرامة اتلخصت في ماتش كورة وواحد قلع بنطلونه لفردوس عبد الحميد، ده حتى الشهادة لله واحدة اتصلت تدافع عن القومية العربية، (بعد سيل من المكالمات من كذا بهلول بيقولوا: الواد مندوح ابن عمي سماعين وحش، مش بيحبني، مش بيجيب لي عسلية ولا ارواح زي زمان غيران مني عشان كسبت دور السيجا من الواد زاهر اخوه الصغير واخدت القرش اللي معاه طب واني مالي، مش هو اللي خسر؟)، وعشان تثبت ان القومية العربية لسة موجودة وان الواد مندوح ابن عمي سماعين، هو ابن عمي شقيقي، ولسة بيحبني ضربت مثل بجروب على الفيس بوك ضد الجزائر وعليه عدد كبير من العرب مشتركين فيه و"ما تتخيليش زعلانين علينا قد ايه يا مدام منى" وقاموا معانا بالواجب وحضروا الصوان من الاول لحد ما لمنياه، وحتى "في ستار اكاديمي كل العرب كانوا بيصوتوا لقماح عشان مصري"، خلاص بقى، انتوا ايه مافيش في قلبكوا رحمة؟ معلش البطن قلابة بقى، انا مش عارفة الخلفة السودا دي جابتها من مين؟ طبعا، ماهي اللي تخلف من عوكل ح تجيب ايه؟