من مدونة جزائرية

ده احد المشجعين الجزائريين اللي كان دمه محروق قوي في الاول وقعد يشتم ويلعن ويسب وكله بسبب عمرو اديب، هو قال كده، قال عمرو اديب كرهني في كل المصريين، رجع شاف بعد كده وائل الابراشي وسمع الكلام اللي وائل الابراشي قاله فهدي قوي
هدي بطريقة فوق الخيال والتصور، لدرجة ان المعلقين كاتبين: سبحان الله، يهدي من يشاء، بس انا مش عارفة ليه لما شفته في اول فيديو حسيت انه ممكن يهدا فعلا، اقصد انه كان زعلان بجد، مش مزقوق يصعد، واللي زعلان بجد سهل انك تصالحه، وكلام وائل الابراشي نزل فعلا برد وسلام، قال كلام كويس قوي، ومنى الشاذلي كمان كانت رائعة في الحلقة دي،  
انا الحقيقة عايزة احيي منى الشاذلي، والسفير ابراهيم يسري، ووائل الابراشي

طب ادي واحد هدي اهو من كلمتين، امال ايه الكلام بتاع: مهما عملتوا ومهما قلتوا خلاص اللي انكسر مش ح يتصلح؟

بس انا ما كنتش اعرف انهم بيتابعوا الاعلام بتاعنا كده


انا محرجة بس مضطرة احط البانر بتاع مبادرة: الاقصى يجمعنا

انا طبعا مقدرة كم الذهول اللي فيه الجميع، اقصد جميع الاخوة العرب التانيين من غير المصريين والجزائريين، ده حتى الفلسطينيين فتحوا بقهم وبقوا مش فاهمين احنا بنعمل ايه ده؟ بس معلش، احنا اصلنا بقالنا شوية فاضيين، والمصريين والجزائريين متعودين على العركات، يعني مصر في خمسة وعشرين سنة دخلت خمس حروب، صحيح انضربنا في اتنين وانتصرنا في اخر واحدة، بس ما تفرقش نضرب نتضرب المهم ورانا شغلانة بنعملها، الجزائر قعدت مية وعشرين سنة في عركة متواصلة، من غير ترييح خالص، وبعدين شبكوا معانا بعد الاستقلال في حربين. ابتدينا حرب الجماعات في نفس الوقت وخلصناها في نفس الوقت، وقاعدين فاضيين بقى، اتنين لواءات جيش متقاعدين، وماحدش من اللي حوالينا فاضي لنا يسلينا في قهوة المعاشات اللي احنا الاتنين قاعدين عليها دي، لبنان كل شوية تعمل رياضة، فلسطين كل شوية تخش ملاكمة، السودان بتضرب بمب، العراق بتلعب صلّح بس على القفا، سوريا بتدور على اكل عيشها في الحصار، موريتانيا كل تلات شهور تعمل انقلاب، وما احناش اغنيا زي الخليج عشان نستمتع بحياتنا، احنا جعانين طول عمرنا ومش منتظر نشبع، في الجنة بقى (ده اذا وردنا عليها)، فآدي احنا بنسلي بعض يعني شوية كده بدل الفراغ العاطفي، ده حتى الجزائريين حظهم اوحش مننا، احنا برضه عندنا مسيحيين نحرق بيت هنا، نكسر كنيسة هناك، واهي ماشية، صحيح مش يعني كوباية الشاي بتاعتنا الصح، بس اهي تأدي الغرض، لكن التانيين حتى ماعندهمش مسيحيين، طب ح نعمل ايه اذا ما كناش ح نتخانق على الكورة يعني؟ ده حتى الايد البطالة نجسة، واحنا الاتنين مش واخدين على القعدة الخالية شغل دي.
وما تصدقوش المصريين لما بيقولوا احنا تعبنا من الحرب وعايزين نرتاح، ده شكل ناس تعبانة من الحرب؟ ده شكل ناس تعبانة من قلة الحرب والله، وما تصدقوهمش لما يقولوا: هو احنا عشان الاخت الكبرى كل شوية ناخد على دماغنا؟ وده احنا غلابة، ومساكين، وقلبنا ابيض وعندنا مشاكل..ده شكل ناس غلابة وللا حاسين باي مشاكل؟ مش كل شكوى المصريين يقولوها تاخدوها بجدية عشان ما يحصلكوش اللي حصل لي وتتصدموا، هم كده بيحبوا يقولوا الكلام ده، مش بيبقى بجد. زي كلام الجزائريين كده عن الثأر المطلي بلون الدم وعصا موسى اللي هزمت فرعون وجم هنا اتزألوا بالطوب ولبسوها في وشهم كمان وبقوا خايفين يجيبوا جون كل ما اللعيب يقرب جنب الجون بالكورة الجمهور يقول له: هاااااا، يروح راجع. وبكرة الماتش يتلعب ونرجع نتصالح ومافيش حاجة يعني ما تقلقوش، المهم ان ابو تلفيقة وصديقه مبارك (يووو، لا مؤاخذة يا ريس هيهيهيهي) ارتاحوا مننا كمان عشرين سنة قدام بعد هدة الحيل اللي اتهديناها في المعركة الاخيرة..
بس ايه رأيكوا فينا؟ شفتونا واحنا بنناضل في الكورة؟ بصراحة احنا الاتنين كنا جامدين جدا، ما تنكروش، الورد مهما يدبل يفضل عبيره فيه.
الملحوظ ان الجزائريين مصممين انهم قدموا شهدا، ما اعرفش بقى، هل فعلا الحكومة الجزائرية بتتستر لحد ما الماتش التاني يخلص زي ما بيقولوا، وللا ده اشتياق لتقديم الشهدا اللي هم متعودين عليه؟ ح نشوف، الماتش يوم الاربع ولحد الخميس لو ما ظهرش حاجة يبقى ربنا يسهل المرة الجاية ويكتب لهم الشهدا اللي هم نفسهم فيهم،
ما تتخضوش، عشان بس عرب كتير بعتوا لي مخضوضين قوي يا عيني، احنا بنلعب حرب اطاليا واللعبة ح تخلص، والحمد لله، احنا شعبين سعيدين، مبسوطين، متهنيين، ومش محتاجين اي حاجة، كل كام سنة بس ندخل ماتش وخلاص، مع بعض طبعا، هو مين مجنون ح يهاود مصر على هبلها وللا مهبوش ح يهاود الجزائر على عتهها؟ احنا مالناش الا بعض، الا بقى اذا حصلت المعجزة وفلسطين اتحررت ولقوا نفسهم فاضيين ح يضطروا ينضموا لنا، اسألونا احنا الفراغ ممل، وليس في الامكان ابدع مما كان، احنا مبسوطين كده وبكيفنا ومزاجنا، حد شريكنا؟ وبعد ما رفعنا الاعلام وهتفنا وشتمنا بعض، ادي احنا طلعنا بمبادرة "الاخوة" وبعدين مبادرة الاقصى، يعني الحمد لله مرينا بكل المشاعر، العداء والترقب، والوطنية، والكره، والحب، والوحدة العربية، والنضال من اجل الاقصى، كل حاجة كل حاجة، بالصلاة ع النبي الفيلم بتاعنا فيه كل عناصر الدراما والانفعالات الانسانية، وبصباع رجلنا صغير، لا دخلنا حرب مع اسرائيل، ولا بلدنا اتهدت، واااااااااالاااااااااا اي حاجة، انكادوا بقى واتغاظوا

-----------

ده مدون جزائري كاتب وفقا لمبادرة مصرية جزائرية عشان ينقذوا ما يمكن انقاذه مما تبقى من مخنا وكرامتنا واللي شوية اعلاميين رأسماليين كل همهم يمصوا دم الناس ويلموا فلوس داسوا عليهم الى جانب جرائم شوية عواطلية وشمامين وفشلة مسميين نفسهم قال ايه؟ الالتراس، خواجات قوي.. خواجات فعلا، ما طول عمرنا بنشجع كورة، من امتى اتأمركنا حتى في تشجيع الكورة وبقينا نسمي نفسنا الالتراس ونعمل شغل بلطجية ومجرمين ويقولوا ماهو في كل حتة في العالم، ما طول عمرنا بنلعب كورة، وفيه عنف كروي وشتيمة وكل حاجة، لكن عمرها ما وصلت للدرجة دي غير بشوية اعلاميين على شوية جرابيع وداخلين في الزيطة

ما السرقة في كل حتة في العالم

والبلطجة في كل حتة في العالم

والفساد في كل حتة في العالم

والفقر في كل حتة في العالم

والاستبداد في كل حتة في العالم

والتخلف في كل حتة في العالم

والتحرش في كل حتة في العالم

والجرب والفشل والتسول والعته والجنان في كل حتة في العالم

مالكوا بقى بتشتكوا ليه لما اكلتوا دماغي انا شخصيا؟

طبعا هو ان جيتوا للحق المبادرة دي ما اتعملتش غير لما المصريين اتهددوا، لما الجزائريين اتهددوا وانضربوا وجه لواحد فيهم ارتجاج في المخ ما سمعناش عن مبادرات

بس خلاص، عفى الله عما سلف، نلحق اللي فاضل ولما تخلص الازمة دي نبقى نهزأ

ووالله كتر خيرهم المدونين الجزائريين اللي انضموا للحملة

تحديث:
ده مدون مصري منضم الى المبادرة
وح افضل ان شاء الله احدث كل شوية باي حد يجدد
---------
انا بس عايزة اقول حاجة للاخوة الجزائريين على وجه الخصوص، انا ملاحظة حاجتين: الموقف الرسمي المصري، متجاهل الموضوع زي ما يكون اللي بيحصل ده في كولومبيا مثلا
الموقف الرسمي الجزائري بيتعمد الشعللة والاثارة، ودي حاجة تشكك اي واحد، معلش يعني، مين دولة عربية في الدنيا تحب انها تخسر مصر؟ مافيش، والمصريين معروفين ومشهورين على مستوى العالم، اول ما تقول له: انا باحبك، تبقى حطيته في جيبك
اللي اعرفه كويس ان قبل شحن الماتش كان فيه انتفاضة فقرة عنيفة جدا جدا جدا والامن الجزائري ما عرفش يسيطر عليها وحصل اصابات في رجال الشرطة الجزائريين
اسمحوا لي افكر بنظرية المؤامرة، بوتفليقة ومبارك متفقين مع بعض، مبارك ماله؟ ماله ازاي؟ بيجامل الراجل يعني، زميله في الرئاسة، مبارك منفض، وبوتفليقة بيشحن، وخلاص، ليلة الانتفاضة انفضت كده، كل غضب الفقرا اللي عوروا الشرطة مصبوب دلوقت على مصر والمصريين
صح؟
اعقلوا كده، احنا ما عندناش انتفاضة فقرا من ايام سبعة وسبعين، بس مش عشان بطلنا ننتفض يبقى احب ان كل الناس تتوكس زيي، ربنا يهديكوا
الله، انا رجعت غلطت في مبارك تاني؟ لا مؤاخذة يا ريس، ييأس المدون ولسانه بيلعب
حقك عليا فوتها بقى، انا كنت وعدت اني مش ح اغلط فيه تاني عشان احنا نستاهله بس ما عرفتش امسك لساني
انتظروا مزيدا من التدوينات في المبادرة
---
تدوينة مصرية في حب مصر والجزائر
الشهادة لله انا مش مصدقة اللي انا فيه ده.. مش مصدقة ان المبادرة دي مش على اثر غزو مصر للجزائر ولا غزو الجزائر لمصر
ومش مصدقة ان الكلام ده بين مصر والجزائر
طب حد يحط صورة جزائري ومصري ويقول لي ح يعرف مين فيهم
-----
مواطن مصري يشارك في المبادرة
هههههههه مش قلت لكوا المصريين خافوا، بس انا منبهرة من كم الصدق والشجاعة اللي في التدوينة دي :)

----------
واحد مصري يتقتل واحد جزائري يتقتل؟ احنا نسينا ان عزانا واحد؟
------
عندما لبسنا الخازوق
احمد نصر طبعا
---------
تحديث:
الكورة المنفوخة، يارب بس ييجي بفايدة
اي مصري ح يجرا له حاجة دمه في رقبة عمرو اديب
ومدحت شلبي
ومحمود معروف
-------
مبادرة الاقصى يجمعنا
ههههههههه ولو اني ضحكت لما شفتها، على رأي جو، بعد ما خربت مالطا
------
كاتب جزائري، هو كاتبها بالفرنساوي
بس ملخصها انه بيقول بالبلدي: لما انتوا شاطرين قوي كده وبتعرفوا تكسروا وتحرقوا وتحاصروا ما تنزلوا تعملوا كده في اللي مجوعينكوا مش على ماتش كورة
اه، وبيقول لهم، العدو الحقيقي جوة البلد هنا، مش في القاهرة.
-----
صحفي جزائري: - الماتش الجاي اللي نديروه ما يكونش ضد مصر يكون ضد السراقين من حكامنا
- العدو الحقيقي هما النظامين الجزائري والمصري ضد الشعبين

هههه اللي مش فاهم حاجة يقول لي وانا اترجم
--------
انا ما كنتش اعرف ان الجزائريين صوتوا لابو تريكة انه افضل لاعب عربي! امال عمرو اديب الـ.... جاب كلامه القرف ده منين، قليل الاصل اسفخص عليه
اي حاجة ح تحصل لاي مصري تبقى في رقبة عمرو اديب... ومصطفى عبده التافه

طبعا ييجي واحد يقول لي سبتي كل التقرير واخترتي انهم صوتوا في استفتاء شعبي لابو تريكة اقول له اه، مش هي دي الحاجة اللي عاجباهم الاتنين ومالهمش طموح غيرها؟ احنا فاكرين نفسنا مين عشان نغير ارادة شعبين؟ اللي عايز حاجة بالهنا والشفا عليه
-------
بيشجع مصر وبيحب الجزائر
من مدونة مصرية
--------

ماحدش يحاول يخليهم يصعبوا عليا... برضه ح ادوس على قلبي ومش ح يصعبوا عليا

------

مدون مصري

----

مقال لبناني رااااائع، علي صفا

ههههههههههههههههه الله يضحكه، موتني من الضحك

-----------------

والازهر دخل في الليلة وقال متعصب الكرة يعاقب بحد الحرابة

هههههههه

انا موافقة على حد الحرابة على عمرو اديب ورئيس تحرير جريدة الشروخ الجزائرية عشان اثاروا الفتنة، ويطبق حد الحرابة على مصطفى عبده عشان غبي

ومدحت شلبي يستاهل تتقطع اطرافه عشان بني ادم بيض

-------

صحفي جزائري بيقول مبارك وبوتفليقة يقدروا يحلوا المشكلة

هههههههههههههههه يا ضنايا، اذا كانوا هم اللي عملوها
لا والموضوع كبر ووصل لدرجة القبض على مصري في الجزائر بتهمة التجسس! اكيد كان بيتجسس عشان يعرف خطة المنتخب الجزائري، بس ده بعععععده، قال وعايز بوتفليقة ومبارك يحلوها، ما كنتش اتصور ان فيه ناس عبيطة في الدنيا دي غيري
-------
حوار متخيل بين بوتفليقة ومبارك
من عند فلاشاوي