استعنا ع الشقا بالله: هو مين علاء مبارك ده؟

تحديث:
اهو، سبحان الله، اهي مواطنة لا اعرفها ولا تعرفني، بتقول ان الاعلام شحنها، ومكالمة علاء مبارك بكيتها، وبعدين ابتدت تفوق وبتراجع نفسها، ومش لازم تتفق او تختلف معايا، ومش لازم تقرر دلوقت هي ح تستقر على ايه، هي واحدة شجاعة بما يكفي انها تعترف انه تم اللعب بمشاعرها والضغط على اعصابها ووضعها، عن عمد، في حالة ماهياش حالتها الطبيعية
عشان تعرفوا بس اننا مساكين وما احناش ناس شريرة بالطبيعة والسليقة والمشكلة بينا وبين اي حد، خصوصا الجزائر، خصوصا الجزائر، خصوصا الجزائر، مش بالعمق اللي الاعلام بيحاول يصوره والكلام من قبيل "لااااا ده فيه حاجة دفينة، حاجة عميقة، حاجة ابعد من الماتش، حاجة ابعد من الاعلام، حاجة ابعد من هنا لفيصل" ده غسيل مخ، بينيمونا تنويم تغطاطيسي وبيحشروا في دماغنا تحليلات ماهياش تحليلات، ده كلام بيقنعونا بيه زي زوزو نبيل لما كانت بتقول لشادية: نافع هو اللي بيحبك، نافع هو خطيبك، كل الناس عدوينك، كل الناس بيكرهوكي، مالكيش الا نافع، نافع، ناااااااافع...نامي، ناااااااااااااامييييييييي.
لو هي انسانة شريرة او عنصرية او حتى جبانة ما كانتش قالت الكلام ده، وكذلك يا ناس، الولد ده برضه راجع نفسه
بعد ما عمل الفيديو ده، رجع تاني وعمل الفيديو ده وشوفوا التاريخ بتاع الفيديو الاولاني والفيديو التاني، ايه مصلحة ابراهيم حجازي انه ينزل الفيديو الاولاني اللي كان تحت الضغط العصبي ولما الولد هدي وفاق وعمل فيديو تاني يقول يا ناس العنوا الشيطان ما ينزلوش
مش بس ما نزلوش، اهو الواد بعد ما كان هدي، رجع اتجنن تاني لما سمع بودنه ان النقابات الفنية المصرية قاطعت بلده
طب حطوا نفسكوا مكانه، تخيل السعودية، تقاطعنا من غير اي سبب عشان ماتش وتشن علينا حملة اعلامية.
زي ما
hannoda
اتشحنت وراجعت نفسها هو كمان اتشحن وراجع نفسه ورجع اتشحن تاني بعد ما لقى نفسه طالع على التليفزيونات المصرية بيتقال عليه شمام وبلطجي وهمجي...إلخ، حط نفسك مكانه، حط نفسك مكانه. نعذر نفسنا ونعذر الناس، عشان ربنا يعذرنا كلنا ويرحمنا. الشخص اللي عنده رحمة، يرحم نفسه ويرحم الناس، لكن اللي يجيب كل الحق لنفسه وكل الغلط على الطرف التاني يبقى مريض بالشفقة على النفس، دي مش رحمة دي، ده عيا.
الانسان انسان، لما بيتحط تحت ضغط معين بيعمل ردود افعال متوقعة
يا عالم فوقوا... فووووووووقووووووووووووووااااااااااااااااااااااااااااا... احنا مش ماريونيت عشان يجيبونا يمين ويجيبونا شمال ويطلعونا الهوءا وينزلونا النوءا
العقلاء عمالين يقولوا لكوا دعوها انها منتنة دعوها انها منتنة، وفيه بعض الناس عاجبها النتانة وعمالة تشم فيها
انا باحيي هنودة على شجاعتها، وناس تانية كانت برضه منفعلة من الجانبين المصري والجزائري وراجعوا نفسهم... بينما رجالة كتير وبشنبات وما جاتلهمش الشجاعة والرجولة انهم يقولوا انضحك علينا وانفعلنا وبنراجع نفسنا مع ان احساسهم انهم غلطوا باين عليهم جدا، وباين انهم بيكابروا
الله يهدي الجميع ويكفيهم شر الكبر والمكابرة، وينتقم من اللي عمل في الناس كده واللي وراه اجندة، واللي مصمم يفضل سادر في غيه رغم تبين كل حاجة قدام عينه.
البني ادم اللي بيراجع نفسه احسن من كل الناس، احسن من الفراعنة والامازيغ والفرنجة والاسكندنافيين... وكسة
-------------

استغفر الله العظيم يارب، انا كنت قايلة ح احط جزمة في بقي واسكت والشعب والحكومة سمنة على عسل (ودي حقيقة والله فعلا) وكل شله يشبهله وقال يا داخل بين البصلة وقشرتها ما ينوبك الا التعليقات النيلة في مدونتها، بس مش قادرة، مش قادرة، هو ايه صفة علاء مبارك؟ بيشتغل ايه؟ اقصد بياكل عيشه منين يعني؟ بيقبض مرتبه من مين؟ وبياكل مراته وابنه وفاتح بيته منين؟

هو مين علاء مبارك عشان يطلع بكلام اهوج شعبوي ارعن يفاقم لنا ازمة مع بلد من قبل ما هو يتولد بقرون طويلة واحنا وهم واحد وح نفضل واحد من بعد ما هو يموت ولحد يوم القيامة؟ هو مين عشان يطلع يتكلم على شعب ويقول ح اديله على دماغه؟ هو مين عشان ينفي العروبة عن الشعب الجزائري ويقول بس يكلمونا عربي الاول؟ هو مين عشان يقول العروبة انتهت؟ صفته ايه عشان يقول الجزائريين ما يجوش مصر والمصريين ما يروحوش الجزائر؟ مين هو عشان يدي فرمان زي ده؟ وبيشتغل ايه عشان يهيج الناس ويحرضهم على التظاهر ولا وكمان بيديهم تعليمات يعملوا ايه في المظاهرة؟ هو مين عشان يعمل لنا مشكلة مع دولة حيوية، طول عمرها حيوية بالنسبة لنا وح تفضل حيوية، واحنا حيويين بالنسبة لها وما يستغنوش عننا

ولو مش حيوية، انشالله يارب يكون بيتكلم عن اسرائيل حتى.... هو مين عشان يدخل براسه ويتسبب في تفاقم ازمة دبلوماسية بينا وبين اي دولة؟ المظاهرات اللي حصلت حوالين السفارة ما انفجرتش غير بعد مكالمة علاء مبارك وبتحريض منه شخصيا على الهوا

هو مين؟ شغلته ايه؟ صفته ايه؟ كل ده عشان بينتقم لنجيب ساويرس؟ وطالع يشتم الجنرالات بقى عشان اللي عايز يخطف منه ومن ساويرس السبوبة جنرال في الجيش الجزائري، وقال ايه بيشتم الجنرالات القمعيين... صحيح اللي اختشوا ماتوا

هو مين؟

واحد بيتكلم زي سواقين التاكسي وبيهيج المشاعر وبيعمل ازمة تاريخية، هو ح يموت وح تفضل اثار الازمة دي اللي اتعملت من تحت راس البزنس موجودة.

يدي مين على دماغه؟ هو ده يدي مين على دماغه؟ يدي الجزائريين على دماغهم؟ بصفته ايه؟ ازاي يتجرأ يتكلم على الشعب الجزائري كده؟ كل ده عشان ايه؟ عشان شحنوا الناس في الماتش بزيادة وورطوهم في شتايم وقلة ادب وضرب من تحت الحزام عشان الخلافات الاقتصادية اللي بينهم؟ ولما اتغلبنا ما بقوش عارفين يعملوا في الحالة دي ايه؟ راحوا جايبين لنا كام ممثل وممثلة يعيطوا؟

قال ايه؟ عشرتلاف بلطجي بالسنج والمطاوي والجنازير جايين على حساب الجيش الجزائري، عملوا ايه العشرتلاف دول، اللي معاهم عشرتلاف سكينة، وعشرتلاف سنجة، وعشرتلاف سيف؟

اصابوا 20 اصابات خفيفة ومتوسطة، ودخلوا الازاز في قميص محمد فؤاد وواحد فيهم قلع البنطلون قدام فردوس عبد الحميد، وخضوهم، جايين يعيطوا، عشان اتخضوا. ايه البلطجية السيس دول؟ صرفوا كل الفلوس دي على السنج والمطاوي عشان يدخلوا الازاز في قميص محمد فؤاد ويقلعوا البنطلون؟ وكل واحد فيهم بيتكلم زي القرد ويعيط، فين التعويرة؟

حد حضر خناقة سنج ومطاوي من بعيد؟ لو اتنين بيتخانقوا بالسنج والمطاوي لازم تبعد على الاقل ستة متر والجتت بتقع من حواليهم زي ابراهيم الابيض كده، يا سلام بقى لو تشوفها على الحقيقة، كان زمانك بالل بنطلونك يا محمد يا فؤاد

والشحن الاعلامي لاغي عقول الناس تماما، ماحدش بيحاول يحسبها بالمنطق ابدا، وعيشوا الناس ليلة طويلة من المتصلين اللي بيصرخوا، والناس مغلوبة، ومشحونة، ومحرجة انها اتغلبت بعد ما اتورطت في الشتايم، ودول عمالين يصرخوا لهم في التليفون. بالظبط زي اللي حصل مع الجزائريين في الماتش الاولاني، برضه شحن شحن شحن، وجابوا لهم ناس تصوت، بس كانوا اهبل شوية، جابوا صور مضروبة لناس ماتت، وده خلاهم بقى مش عارفين يسيطروا دلوقت، الاعلام المصري تعمد انه ما ينشرش اشاعة ان فيه واحد مات عشان عارف ان خبر واحد مات ح يخلي الناس "المغلوبة" يصعب السيطرة عليها

بس ربنا موجود، وقادر ربنا يسلط العفريت على اللي حضره

حسبي الله ونعم الوكيل

شوفوا بقى، بحق الايام المفترجة دي، بحق الايام المفترجة دي يارب، بحق الشهر الحرام اللي اشعلوا فيه الفتنة من غير اي اعتبار لحرمة الشهر ولا الناس الغلابة اللي ح يدخل عليهم العيد متنكدين

الله ينتقم من كل انسان كللللللللللللللل انسان، خطط ودبر للفتنة دي، او اشار بيها، او ساعد عليها، او شارك فيها، او حرض عليها، او كان له اي مشاركة فيها بالكلمة او الفعل او التخطيط سواء مصريين وجزائريين او جنسيات اخرى

كل واحد قطع الارحام بين المصريين والجزائريين وقسى قلوبهم على بعض، ونطقهم بكلام عنصري ووقود للفتنة، كل انسان له منبر، ايا كان المنبر ده ولو كان مكالمة تليفون على تلفزيون وللا راديو وللا تويتاية، وساهم في القطيعة بين الاخوات، وجرح في شعب بحاله ومؤامرة الفتنة واضحة قدام عينيه ما تغيبش غير عن اللي عايزها تغيب

حسبي الله ونعم الوكيل فيهم واحد واحد

حسبي الله ونعم الوكيل في كل من ساهم في التراشق بالالفاظ العنصرية واللي تثير النعرات وتألب الناس على بعض، كل من قال كلمة فيها اهانة لاي من الشعبين، او لشعب تالت مالوش ذنب، او للعرب، اهل الرسول، او اللي اتمسكنوا بالتمثيل عشان يجننوا الناس، او اللي بيقولوا يهود علينا وللا اللي بيقولوا همج وبربر ومجرمين عليهم، كل من اثار الشوفونية والعصبية وخلطها بالوطنية وبدعوى الكرامة الزائفة، كل من ساهم في تشويه الولاء الوطني وتوصيفه على انه ضد العروبة وللا عشان تبقى وطني لازم تشتم شعب تاني عشان ماتش كورة، وعشان انت مغلوب في الماتش مش عشان حاجة تانية، لا في الماتش الاول الجزائر غاظهم حاجة غير انهم اتغلبوا ولا في الماتش التاني المصريين غاظهم حاجة غير انهم اتغلبوا

(مافيش انسان عنده كرامة يهين كرامة شعب بحاله)

حسبي الله ونعم الوكيل في كل من لعب على مشاعر الناس والامهم واهاج جواهم مشاعر ثأرية

سواء بقى سياسي، او رجل اعمال، او واحد مش عارفين له شغلانة (والله عايزة اعرف بيشتغل ايه علاء ده) او اعلامي، او صحفي، وللا فنان، وللا مخرج، وللا مطرب، او مدون، او حتى متوت، او رياضي، كل اللي هول وكل اللي كدب، كل اللي شعلل وكل اللي اثار، كل اللي ابتز مشاعر الناس عشان يجرهم للفتنة وكل اللي زايد على اي انسان واتهمه في وطنيته عشان يدفعه دفعا انه يشترك في الفتنة دي وانا شفت ناس بتنجر لاهانة شعب وشتيمته لان تم ابتزازها من اخرين باسم الوطنية، وغالبا مدودين وعلى التويتر، حسبي الله ونعم الوكيل في كل اللي عمل او بيحاول يعمل كده في الناس، وكل اللي بيساند كل الافعال السابق ذكرها، باي طريقة، وكل اللي راضي عنها، وكل اللي ساكت عليها.

الناس كانت بتبعت رسائل للبيت بيتك (مصريين مقيمين في الجزائر) بتقول لهم كل كلمة بتقولوها بتتقلب علينا احنا هنا

حسبي الله ونعم الوكيل فيهم

الله ينتقم منهم واحد واحد، الله يجعلهم عبرة خلقه، الله ينكل بيهم ويشعل عليهم الارض زي ما اشعلوا الفتنة بين الناس، الله يلعنهم، الله يلعنهم، الله يلعنهم في الدنيا وفي الآخرة، حسبي الله ونعم الوكيل فيهم، ربنا يفرجنا عليهم عن قريب ان شاء الله

اللهم يارب لا ينولهم اهدافهم المعلنة ولا الخفية، اللهم يقلب عليهم افعالهم واقوالهم واي مشاركة ليهم في الفتنة ويجعلها ضدهم وعلى دماغهم ويبقوا اول من يحترقوا بالنار اللي ولعوها، هم واي حد يشارك معاهم. اللهم آمين، يارب ما يعدي عليهم العيد بخير، بحق الايام المفترجة دي يورينا فيهم عقابه وانتقامه ويبرد نارنا ويذلهم واحد واحد ويجعلهم آية وحكاية تتحاكى بيها الناس

عمري في حياتي ما دعيت على حد بالحرقة دي والغل ده، وعمري ما قلت الله يلعن حد، بس اذا الواحد مش ح يلعن اصحاب الفتن والسائرين في ركابها زي ما الرسول لعنهم امال يلعن مين؟ من قلبي والله العظيم، ياقادر يا كريم يا عظيم يا واحد بحق صيام الناس وبحق حج الحجاج وبحق دعاء الصالحين تبرد ناري وترد نار الفتنة في نحر اللي اشعلها واللي بيزكيها واللي بيساهم فيها، واحد واحد يارب وتفرجنا عليهم.

حسبي الله ونعم الوكيل فيهم كلهم

والله غالب على أمره

الله اكبر.. الله اكبر عليكوا واحد واحد، انتوا ايه؟ ناسيين ربنا؟ الواحد يكلم فيكوا، بالراحة مرة وبالتهزيء مرة، بالجد مرة وبالضحك مرة عشان ترتجعوا مافيش فايدة، شايفين عملتوا ايه؟ شايفين عملتوا ايه؟ ده ح يتصلح ازاي ده؟ الخراب ده ح يتصلح ازاي؟ مش مديين للناس فرصة تهدا، وقال بيقاطعوا الجزائر، بيقاطعوا الجزائر؟ الجزائر؟ انا باكتب الجزائر قلبي بيتخلع، دي الجزائر

الله يورينا انتقامه منكوا ولا يعدي عليكوا العيد بخير ابدا قادر ربنا يجعلكوا أحاديث

قادر الكريم