ح الظابط طير الحالة السنتمنتالية المهترئة

استغفر الله العظيم من كل ذنب عظيم يا رب. ده انا لسة كنت باقول مجهودات السادة المدونين حسنت من اداء الداخلية ومباحث السجق المدني اتصلت بيا عشان تحقق في المقال اللي نشرته في الدستور. مافيش 24 ساعة من عودتي من التحقيق الاقيلكوا اهازيج عندنا في العمارات، اسمع يا سيدي:

العمارات عندنا ورا جامعة عين شمس، قدامها ممرين ووراها ممر. فيه تصليحات في احد الممرات، قام بعض السكان اقترح ان الناس تركن ورا العمارات عشان يوسعوا وبالتالي فهم محتاجين الممرات اللي ما بين العمارات عشان العربيات تعدي، كويس لحد كده؟ كويس قوي

الطبيعي ايه؟ الطبيعي انه يتم ابلاغ حراس العمارات وكل حارس يبلغ السكان، او يعلقوا ورقة على مدخل كل عمارة او في الاسانسيرات، او يعملوا ده كله مع بعضه، مش كده؟ وللا انا مجنونة وعندي هلاوس؟ لا الظاهر اني مجنونة وعندي هلاوس، عشان تفتق ذهن احد السكان اللي تصادف انه رائد شرطة انه يجيب من واحد صاحبه في المرور يافطة مرورية: ممنوع الانتظار! طبعا اي انسان عنده ذرة مخ ح يلاقي اشارة مرورية زي دي في مكان ماهواش شارع ح يعتبر ان فيه واحد بيهزر هزار سخيف، جات الناس ركنت. وجيت انا ركنت طبعا لان مافيش مكان في حتة تانية، انزل لك النهاردة يا استاذ الاقي على شباك العربية مخالفة مجهولة الهوية ملزوقة. ناديت على البواب قال لي: لا ما تقلقيش، هم عاملين كده بس

انا: يعني ايه يا سيد؟

سيد: ما الدكتور فلان في العمارة هنا والدكتور علان في عمارة خمسة برضه نزلوا لقوا الورقة دي ملزوقة بس عرفوا انها كده وكده لما لقوا مافيش رقم العربية ولا اسم امين الشرطة ولا حاجة، اللي بيعمل كده كابتن هاني

(ومخلي البوابين يقولوا له كابتن)

انا: مين كابتن هاني ده؟ وجاب الدفتر منين؟

سيد: ماهو ظابط، رائد، بيلزقها كده عشان الناس ما تركنش، وهو اللي جاب الاشارة المرورية دي وحطها بتاعة ممنوع الوقوف

انا: ظابط بوليس وبيستظرف على الناس كده؟ طيب يا سيد، انا ح اركن هنا، وقول له اني ح اركن هنا ولو نزلت بكرة ولقيت حاجة تانية ملزوقة ح اقدم فيه شكوى لوزارة الداخلية، ده اسمه سوء استغلال سلطات، الحكومة مدية له الدفتر ده مش عشان يلعب بيه، والدفتر ده انا وانت دافعين تمنه من الضرايب

سيد: هو مش في المرور

انا: وكمان مش في مرور؟ طب لو نزلت بكرة ولقيت الورقة دي ح ابلغ فيه هو وصاحبه اللي ادا له الدفتر ده

سيد: طب استنى اما نتأكد طيب عشان...

انا: زي ما باقول لك كده، لما تشوفه في صلاة الفجر وللا في اي داهية قول له اني ح اقدم بلاغ في وزارة الداخلية..سلام

------

هو رائد ده يطلع عنده كام سنة؟

طير لي الحالة السنتمنتالية المهترئة اللي كنت فيها