هي البلد دي حصل فيها كده امتى؟

ح نفترض اني انا اي تي، جاية من الفضاء وزرت مصر، طبعا في الشارع الناس مش ح تخاف مني زي امريكا، ح يضحكوا على شكلي، ومش بعيد العيال الصغيرة يدوني على قفايا ويجروا، وممكن جدا عدد لا بأس به من الناس ما ياخدش باله اصلا اني انا شكلي غريب، واكيد الشحاتين في الاشارات ح يقولوا لي: حاجة لله ربنا يشفيك، واحد باشتري منه فل النهاردة من غير اي مناسبة قال لي: انا باصرف على ابويا الكفيف، قلت له: ايه لزوم الاسطوانة دي؟ ما انت بتشتغل وانا باشتري منك، قام قال لي انا باشتغل في شركة، شركة حاجة كده ناسياها، سعادتك، مش فاكرة ايه بس فاكرة انها قطاع عام، عشان دي اول حاجة خطرت في بالي، ان موظف في شركة قطاع عام وبيبيع فل في الاشارات وبيشحت على ابوه الكفيف

المهم

دلوقت انا اي تي، بعد ما يأست من اني اخوف المصريين في الشارع او حتى الفت نظرهم اني كائن فضائي يستحق معاملة خاصة، رحت على القهوة وقعدت اتفرج على التلفزيون ولقيت كده:

1- اعلانات عن بيوت ما شفتش شبهها ولا عندنا في المريخ

2- بعدها على طول اعلان مستشفى سرطان الاطفال اتبرع ولو بجنيه

3- بعدها على طول اعلان مربى الرشيدي الميزان

4- الاعلان بتاع مصر الخير: كتير مننا تحت خط الفقر

5- احمد عز في عربية تلوح ما عندناش منها في المريخ

6- اعلان جمعية رسالة عشان الناس تتبرع بهدوم "مستعملة" للفقرا عشان يلبسوها في العيد، وقايلين كده في الاعلان! قايلين اتبرع بهدومك المستعملة

7- مسلسل متخلف حتى عندنا في المريخ

8- اعلان بنك محاربة الجوع (حد مركز في الاسم ده؟ ده عامل زي مشروع محاربة الحفاء ايام الملك) وهو جايب ناس جعانة طبعا

9- اعلانات سمنة مليانة اصناف اكل

10- اعلانات غسالات وتكييفات ومستحضرات تنضيف وتلاجات واللوكيشن في بيوت عجب عجب عجب

11- اعلانات خط الفقر تاني

واخيرااااااااااااااااااا: اعلانات ضرايب اعلانات ضرايب اعلانات ضراااااااااااااييييييييييييييييبببببببببببببب كتيييييييييير

يا ساتر يا ساتر من قنطرة الدفاتر يا عبد القوييييييي

طب انا دلوقت اي تي القادم من الفضاء، وشفت الكلام ده، حطوا نفسكوا مكاني، المفروض اقول عليكوا ناس ايه؟
-----
نسيت حاجة مهمة جدا انا كإي تي مش بالاقي عندنا شبهها في المريخ، على فكرة ولا لما نزلت امريكا من كام سنة شفتها
الحالة الاجتماعية الموبايلي، المجتمع المصري مجتمع موبايلي بامتياز، حيث سيطرة الموبايل من حيث النوع والرقم والكماليات والرنات والكول تون اللي يعصبك وانت بتتصل بواحد وفجأة تلاقي الراديو اتفتح في ودنك، خصوصا وان المحلول في يد الجميع فعلا، بما فيهم اللي تحت خط الفقر واللي مستنيين هدوم مستعملة عشان يعيدوا بيها، واصبح المحمول هو العضو الاساسي في الاسرة ومش فاضل غير ان المصريين يخلفوا منه موبايلات صغيرة، اذ ان الموبايل اقرب الى الاب من ابنائه واحن على الاطفال من امهم ورب موبايل لك لم تلده امك
وانا كإي تي لما الاقي الاخوة المصريين طول النهار بيستهلكوا ما لا ينتجون ح افكر في حاجة من الاتنين: يا اما المصريين دول ماسكين ذلة على منتجي المنتجات دي يا اما المنتجين قلوبهم رحيمة، رئيفة، شفيقة جلالة
يا اما ان انا دخلت مصحة وده قسم اللي عندهم اوتيزم
(الاوتيزم مرض التوحد وغالبا اللي بيعاني منه بيبقى طول الوقت مسيطرة عليه فكرة واحدة او حاجة واحدة: عربية/ كتاب واحد معين...إلخ)