حد يمني هنا يشرح لنا ايه الحوثيين دول؟

تحديث:
لقيت لهم موقع هنا، ميدو بعتهولي على التويتر، نقلا عن محمد توفيق
وميدو بعت لي الاكاونت بتاعهم على اليوتيوب وبكده يبقى لهم موقع بيعبر عنهم وواضح ان اللي دخل الموقع عشان ينقل منهم حصل له اللي حصل لي
مافهمتش حاجة، يبقى هم بقى مش ما عندهمش فرصة يتكلموا، هم مش عارفين يتكلموا
انا مش فاهمة ايه مشكلتهم حاليا دلوقت؟ يعني ايه مطالبهم واحد اتنين تلاتة، وهل مطالبهم دي تستاهل كل الحرب دي؟ اذا كان اضطهاد مذهبي فالموضوع برضه مش مستاهل حرب
والله انا بصيت على الموقع، وعلى الفيديوهات، ومافهمتش حاجة، بصوا انتوا برضه انتوا يمكن مخكوا نور عني انا خريجة خامسة ابتدائي
بصوا وفهموني لو فهمتوا حاجة
------------

انا قاعدة ادور في سلقط في ملقط على موقع للحوثيين عشان افهم هم مين وللا فيهم ايه وللا ايه اللي في دماغهم، مش لاقية، لا ليهم موقع الكتروني، ولا ليهم قناة فضائية، ولا الجزيرة بتستضيف حد منهم، وبس سامعين عنهم اسما كده في الاخبار: مقتل عشرة من الحوثيين، مقتل ثلاثين من الحوثيين، والله لنوري الحوثيين، والله لنشبح الحوثيين

طيب هم رأيهم ايه؟ يعني يسمعونا هم بيقولوا ايه واحنا برضه نشوف كلامهم معقول وللا مجانين، احنا بني ادمين برضه ولينا نظرة في الناس

:)

جابوا في الجزيرة صحفي المفروض انه محايد، انا ما ارتاحتلوش شكله، اسم الصحيفة اللي بيرأسها، كلامه الغامض

اولا لابس لي خنافس، ثانيا الصحيفة اسمها اليمن نيوز!!! ثالثا بيقول كده:

لكن هذه ليست طريقة للمطالبة بمظلمتهم (على الحوثيين يعني) انا لا ادافع عن انتهاكات الدولة، لكن عليهم القاء السلاح والمطالبة برد مظلمتهم بالحوار

ايوة، ايه بقى مظلمتهم؟

انا برضه كنت حاسة انهم مظاليم، والله، اختفاءهم ده، ولسانهم المقطوع ومالهمش حد يدافع عنهم ولا يتكلم نيابة عنهم، وعمالين يموتوا ولا حد بيسأل فيهم، والعالم كله ضدهم، والعالم ده دايما ظالم، العالم اللي واقف مع اسرائيل مش ممكن يبقى بيفهم في العدل حاجة، وخسائرهم الفادحة، كل دي بتوحي بضعفهم الشديد، طيب الضعيف دايما معاه حق حتى لو غلطان، لان مافيش ضعيف بيطالب بمطالب مش معقولة، الضعيف دايما طموحه على قده، ودايما خايف ويؤثر السلامة، عشان يعمل حاجة زي دي لازم يكون فاض بيه، ولو له حق ياخده ولو مالوش حق يتاخد بالهينة مش بالعنف لانه ضعيف في النهاية

ثم فيه حاجة غريبة قوي، السعودية ومصر وامريكا واخدين صف علي عبد الله صالح، من امتى ثلاثي اضواء المسرح دول بيجتمعوا على خير ابدا؟ لازم وراهم مصيبة، وبيقولوا ان ايران ورا الحوثيين، مع ان علي عبد الله صالح قال ايران مالهاش دعوة، طب لو علي عبد الله صالح بينفي دعم ايران لهم، يبقى الناس دي مالهاش داعم خالص، يعني يا قلبي واقفين لوحدهم خالص، ثم دول لو بياخدوا فلوس من اي حد انشالله حتى من لجنة الزكاة كانوا عرفوا يعملوا موقع بتلاتة صاغ يشرح قضيتهم اللي الواحد مش فاهم هي ايه؟

وعلي عبد الله صالح يموت عيالهم ونسوانهم ويقول اصلهم بياخدوا المدنيين دروع بشرية؟ ماحدش بيقول الكلام ده غير اسرائيل، حتى امريكا مش بتقوله، بتقول خطأ، نيران صديقة، ما حصلش، احنا اسفين، والله ما شفنا، ده مش احنا، لكن عمرها ما قالت الكلمة دي، لانه معروف في القانون الدولي ان لما المحارب يتخذ من المدنيين دروع بشرية مش مسموح للطرف التاني انه يموت المدنيين، ده اسرائيل بتقول كده عشان بلطجية يعني

بس فيه حاجة تالتة اغرب واغرب، مذيعة الجزيرة قالت ان الحوثيين بيقولوا ان الخلاف ما بينهم وبين الحكومة خلاف ثقافي!!!!! يا صلاة النبي؟ هي الناس لما تختلف ثقافيا بتحارب؟ ماهو بصراحة هم لو بيحاربوا عشان خلاف ثقافي يبقى عايزين حش رقبتهم

لا حرام، ليطلعوا مظلومين، بس مش معقولة يبقى عقلهم صغير كده

الحاجة الرابعة الاغرب واغرب واغرب، اني دخلت على موقع الجزيرة لقيت واحد يمني معلق على خبر عن الحوثيين بيقول سيهزم الحوثيون، ورغما عن انوفهم ابو سفيان صحابي

!!!!!!!!!!!!!!!!!!!!!!!!!!!

ايه يا جدعان العبث ده، لالالالالالالا، كلموني زي ما باكلمكوا، اكيد الحرب دي لسبب اكبر شوية من الخلاف على ان ابو سفيان صحابي وللا مش صحابي

يا اما قولوا لي كده بقى عشان اروح اعلق الحوثيين والحكومة من حواجبهم وانتف لهم شعر مناخيرهم

حد فاهم يفهمني

بس من غير فتي والنبي