نهار احوس؟

تحديث:

انا بقالي من ساعة ما كتبت البوست ده وانا باحاول اتصل بالمسجد على الارقام دي

26243463

26215060

بيرد عليا تسجيل يقول اطلب الارقام الداخلي، اطلب الارقام الداخلي ماحدش بيرد، الكلام ده من يوم الجمعة اللي فات

وكنت ناوية اروح المسجد بنفسي، بس دلوقت دخلت لي الاخت مروة وسابت التعليق ده اللي مفاده انها سألت في الجامع وانهم نفوا تماما الموضوع ده، فسبت لها تعليق ولقت لها اني ح اروح اسأل بنفسي

ورحت على الفيس بوك عشان اراجع المصدر بتاعي لقيت البنوتة باعتة لي الرسالة دي:
المسجد عمل كده فعلا عشان كان فى اطفال من جمعية فى نفس الشارع بدون ذكر اسمها بس اكيد انتوا هتعرفوها يعنى .. المهم المسجد فى الاول كان بيقبل اطفال عادى من دورايتام بس فى صيف اطفال الدار دى عملت سلوكيات غلط وشقاوة وكمان المشرفات بتوع الدار كان بيتاخروا فى انهم ياخدوا الاطفال ويفضلوا سايبينهم فى الجامع فترات طويلة وبناء عليه اتخذت ادارة الجامع القرار بتاع انو مش هيقبلوا اطفال من دور تانية
انا سالت يا نوارة وعرفت الحكاية بالتفصيل
ملحوظة احقاقا للحق : انا لما سالت اتقالى ان ده مش بيحصل مع كل الجمعيات على فكرة .. هما على حسب سلوك الطفل وكمان اتقالى ان هما عرفوا بعد ما دخلنا الاطفال التابعين لنا انهم من دار بطريقة ما ( فى الغالب من الاطفال نفسهم ) وسابونا واحنا فاكرين انهم ميعرفوش

انا قلت اقلك كل اللى وصلتله عشان مكنش ظلمت حد

انتهت الرسالة

الحقيقة انا كنت ناوية اشتكي المسجد ده في وزارة الاوقاف، ليه بقى؟ لأن طفاطيفو قال لي على الجامع ده "انا مش متأكد ان الجامع ده من ضمن الجوامع اللي بتتحرز اشراك الايتام في بعض النشاطات" وقال لي انهم بيعملوا كده عشان مش عايزين ينفقوا اموال الزكاة على مجهولي النسب، فلما قال لي كده فهمت ان فيه جوامع تانية بتعمل كده وبصراحة كنت ناوية اشتكي

لكن يبدو ان عدم اشراك ايتام الجمعية دي، مسألة ادارية مالهاش علاقة بالحذر من الايتام اللي اتكلم عنه امام مسجد ابو زهرة. وانا اوردت رسالة التصحيح اللي بعتتها لي نيفين، الى جانب رسالة مروة.

بس فيه حاجة، المسجد ده الحمد لله طلع مش بيضطهد الايتام، بس مصطفى وقع بلسانه وفهمت منه ان فيه مساجد تانية بتضطهدهم، انا لسة عايزة اشتكي المساجد التانية اللي مش بتشرك الايتام عشان ما تنفقش عليهم من زكاة المال، وطبعا طفاطيفو مش ح يرضى يقول لي اسماء المساجد دي، اعمل ايه؟ مافيش غير اني اشتكي الامام بتاع مسجد ابو زهرة ده لوزارة الاوقاف

بس، اهو هو قال الكلام ده على الايتام وعمل فتنة، وانا ح اشتكيه، هو اسمه الشيخ محمد عيد

ويا سلام لو مصطفى طلع طيب وقال لي على اسماء الجوامع اللي مش بترضى تصرف على الايتام من زكاة المال، اكون شاكرة والله

الا من كام سنة كده كان فيه واحدة قبقاب كده عندها جمعية وبتقول على اولاد المؤسسة ما تجوزش عليهم زكاة المال عشان ولاد حرام وانجاس. اي والله، اي والله عليكوا، قالت كده. وقالت كمان ان اصلاحهم مستحيل عشان هم انجاس، ليه يا بهانة؟ عشان مجهولي النسب! لا ومعتبرة نفسها متدينة وبتاع

بس انا قلت الولية دي مجنونة، عادي يعني الواحد ياما بيقابل مهابيش في حياته. بعد كده واحدة لطيفة كانت عايزة تطلع زكاة المال وقالت لي: هم بتوع العشوائيات دول بيصلوا، اصل لو ما بيصلوش مش ح اطلع عليهم زكاة المال. طبعا صاحبتكوا مجنونة وقلت لها: مش بيصلوا ومش عايزين من خلقتك حاجة. مع ان فيه منهم ناس بيصلوا، بس ما تفهمش ايه الجنونة اللي جات لي بقى لما سمعتها بتقول لي كده، هو فيه حد بيسأل: سكان مصر الجديدة بيصلوا وللا ما بيصلوش؟. اصل لو ما بيصلوش ح نقطع عنهم النور. انا مش فاهمة الدين ده اخترعوه امتى؟

المهم دارت الايام ولفت الايام وحصل موضوع مسجد ابو زهرة ده بتاع الناس اللي اتخانقت مع الامام عشان بيشتم الشيعة.

لقيت بنوتة لطيفة كده بعد ما رجعت من المشوار باعتة لي على الفيس بوك بتقول لي انها ساكنة هناك وانها حضرت الموضوع، وان الموضوع ما كانش فيه ضرب ولا حاجة، هي الناس اتخانقت معاه بس. هي عموما المصري اليوم ماقالتش ضربوه، هي قالت كانوا عايزين يضربوه. وبعدين في وسط الكلام كده قالت لي: هو عموما الراجل ده غريب شوية (على الامام - البنت مؤدبة مش عايزة تشتمه بس انا ممكن اشتمه عشان انا مش مؤدبة) غريب ازاي يابنتي؟ قالت لي: اصله بيحذر من الايتام

!!!!!!!!!!!!!!!!!!!!!

لأ

لأ

النكتة ديييييي جدييييدةةةةة

- يعني ايه يا بنتي بيحذر من الايتام فهميني

بيقول عليهم ولاد حرام وانا ليا طفل مسئولة عنه في جمعية رسالة ويوميها اتخانقت معاه

-نعم؟ نعم؟ ده مختل عقليا ده؟

قامت بعتت لي الرسالة دي وانا بعد اذنها ح انقلها لكوا بالنص:

طب ده بيحذر .. مسجد الصحابى باه اللى قدام ميدان الحجاز بيرفض ان الاطفال الايتام يشتركوا فى نشاط المسلم الصغير والسنة دى اشتركت للطفل اللى بقلك عليه وانا مفهاهم انه ابن اختى ... بتوع نشاط مسجد الصحابى قالولى بالحرف مبنقبلش ايتام مع انى هادفع الاشتراك والولد زى الفل وبيلبس كويس جدا ومشترك فى نادى وبيلعب رياضة ومدخلاه مدرسة خاصة يعنى سلوكياته طبيعية جدا مع العلم انو عنده اربع سنين ونص ... شفتى باه الجوامع اللطيفة !!!!!!!!!!!
انتهت الرسالة
حد يشيلني من هنا
دي جوامع؟ دي بيوت الله؟ بترفض الايتام؟ لو الجامع يرفض يتيم امال مين اللي يقبله؟ ده حتى زمان كانوا يقولوا: لاقيينه على باب الجامع، على اساس ان الجامع ده اصلا بتاع الايتام
حسبي الله ونعم الوكيل
حسبي الله ونعم الوكيل
يعني ايه؟ انا مش فاهمة يعني ايه؟ وايه مسجد الصحابي يوسف ده؟ عايزين نروح نعمل لهم فضيحة هناك، ده مسجد؟ وده الصلاة فيه حلال ده وللا ايه؟
والبنية عاملة جروب على الفيس بوك للايتام، بص كاتبة ايه
ادى اليتيم حقه


متجرحوش بكلمة
متقلش قدامه انت يتيم
بلاش تتكلم قدامه عن التبرعات والتطوع والحاجات دى
انسى كل حاجة وانت داخل تزوره
افتكر بس انو طفل صغير ... محتاجلك
احتمال يكون اتحرم من الاب من الام من الحنية
يبقى بلاش كمان نحرموا من الادمية
اوعى فى يوم تعاملوا على انه لقيط او ابن حرام
هو مجرد طفل
ربنا بس اللى عالم اهله فين
جايز ماتوا
جايز هو مخطوف
جايز حاجات كتير
اى كانت الحاجات دى هو مالووش ذنب فيها
فهموا ولادكم واخواتكم وقرايبكم
انهم مينفعش يعاملوهم باستحقار فى مدارسهم
بالعكس ... احنا كلنا واحد .....
انا وانت وانتى وهو وهى ........ انسان
مفيش لقيط ومفيش ابن حرام ......
فى بس طفل صغير .... ضحكته ممكن تنور حياتك ....
محتاجلك و ممكن ياخد ايدك يوم القيامة ويروح بيك الجنة .......
لو سمحتم مش اول سؤال نسأله فى اى دار ايتام ( هما اهلهم فين ؟؟ انت لقتوهم ازاى ؟؟ )
اكيد الاحسن اننا نسأل عن الحاجات اللى بتفرحهم وممكن نساعدهم بيها
-------
يا جدعان هو الكلام ده محتاج يتكتب؟ دي لو بتكلم مجموعة من المعاتيه اللي جايين من الاسكيمو بعد ما ماتوا الف سنة وصحيوا تاني مش ح تضطر تقول لهم الكلام ده، هو ده مش كومن سنس وللا ايه؟ هي محتاجة تفسر دلوقت سنة الفين وتسعة معنى كلمة "فأما اليتيم فلا تقهر"؟ محتاجة مفهومية دي؟
انا ما كنتش اتخيل ابدا ان الكلام الفارغ ده بتاع دول ولاد حرام انتشر بسرعة كده؟ ده من كام سنة الست اللي باقول لكوا عليها دي كانت اضحوكة المحافل الدولية
مش معقول، ده احنا ربنا ح يشنبرنا، يعني يعمل فينا ايه اكتر من اللي عامله فينا؟
لالالالالالالا كده قرف كتير عليا، ده نتانياهو له حق ينسل القبقاب المتعاص في الكنيف على ام رأسنا وشوية علينا
احنا ح نسكت على الجامع ده؟ ح نسكت؟ حد يفهمهم طيب، حد يكلمهم انا مش ح اكلمهم، يجبوا لهم شيخ ينصحهم، يفهمهم، يكبر في ودنهم ويطلع العفريت من جتتهم، اي حاجة
هي الناس دي مش خايفة من ربنا؟ هو حد ضامن عمره؟ هو حد ضامن انه عايش لولاده؟ هو حد ضامن ابنه ممكن يتوه وللا يقع في ايد حد، هو حد حتى ضامن ان بنته ربنا ما يوقعهاش في واحد ابن تيت يضحك عليها وتخلف منه ويبقى عنده حفيد زي ده؟ ح يعمل ايه ساعتها؟ مش ح يدخله الجامع؟

سؤال بس والنبي: هو فيه صحابي اسمه يوسف؟ يعني حتى اسم الجامع غلط؟