هي الحاجة نوال السعداوي عايزة مننا ايه في نهار رمضان كده؟

مش بافتح المصور لقيتها في وشي، عمالة تقول أمي علمتني التفكير وابويا علمني الحرية، حسستني انها ولدت في فرنسا ونشأت وترعرعت في ايطاليا واخدت شهادتها الثانوية من جبال الالب

بقى فيه فلاحة في الدنيا ما بتفكش الخط ح تقول لبنتها: "إن الله هو الحرية" لما بنتها تقول لها المدرس ضربني عشان سألته مين اللي خلق ربنا؟ ايه المعر ده؟ يعني الست في اوحش الحالات ح ترنها علقة تانية وفي احسن الحالات ح تقول لها: معلش يا ضنايا، خدي عسلية 

ثم مين ابو العلاء المعري اللي قال:  

سكان العالم قسمان: قسم لهم دقون وليس لهم عقول وقسم لهم عقول وليس لهم دقون

ابو العلاء المعري قال كده؟ يا سبحان الله، اول مرة اعرف ان بق ابو العلاء المعري نازل على رقبته دوغري كده من غير دقن، مين الناس اللي مالهمش دقون دول، يمكن قصده اللي عندهم لغد كبير قوي بحيث تبقى دقنه مدفونة في... ايه ده؟ ده قالها في انهي عصيدة دي؟

وابو العلاء المعري قال سكان العالم؟

لا، واللي روى بيت الشعر العبقري ده عن ابي العلاء المعري هو السيد الوالد، الحاج سعداوي، قال الحاج سعداوي في الارياف من حوالي ييجي تمانين سنة كده قال لبنته، في الارياف: .. لا يمكن ان يفرق بين الناس على اساس الجنس او الجنسية او اللون او العرق او العقيدة

دي متربية في الريف الانجليزي؟ لا والله، ولا الريف الانجليزي في اول القرن اللي فات كان فيه حد بيقول الكلام ده

الله، هو مش جان بول السعداوي وفرنسوا سجان عبد الخالق دول اللي كانوا ختنوها وعملت لهم فضيحة من كام سنة ايام حملتها على الختان وازاي قهروها وجوزوها وهي عيلة وودوها عند البلانة تسلخها زي الفرخة، مش هي كانت كتبت كده من حوالي خمستاشر سنة في نفس مجلة المصور دي والله، فجأة كده بقوا بيقروا شعر شيلي وبيحضروا حفلات سيمفونية ويرقصوا سالسا؟