انا مش شايفة غير نادية الجندي في جرب الحواسيس

النهاردة ابتدوا يضربوا سامية فهمي، ومنة شلبي مش عارفة تنضرب كويس وتتخرشم صح وتترمي على طول دراع الممثل اللي بيضربها وتترزع في الحيطة، مش عارفة تقول: لااااعااااا، وهي مغطية الكاميرا بكفها كله ومع ذلك لوزها باينة من بين صوابعها. حتى لما بتقع على الارض مش بتتهبد زي ما نادية كانت ح تعمل

مافيش حد كان مناسب للدور ده غير نادية الجنسي، خصوصا بقى لو طلعوها في السن ده حامل، ونبيل يفضل زي ماهو شريف سلامة ويبقى هو زميل نادية الجنسي في الكلية، يا سلاااااااام، كان ح يبقى مناسب قوي لجو الخيال العلمي بتاع المسلسل، والجمل الحوارية، كلها كلها بتاعة نادية الجنسي: الرصاصة اللي ضربته بيها طههههرته وعملت منه بطططلللللل... انتوا العدووو انتوا اللي اختارتوا لنفسكوا ككككدددده من ايام دير ياسين واطفال بحر البقر. دي كانت ح تقول في الجمل دي قوالة، وكانت ح ترقص بقى مع شلومو وتعمل احلى كلام، وشلومو كان ح يحاول يراودها عن نفسها، ثم ان شلومو ده كان لازم يبقى سعيد عبد الغني، ازاي ما عرضوش الادوار ده عليهم؟ مع ان الطقم كله بتاعها: نادر جلال، وبشير الديك، وطريقة تمثيل احمد صيام: يا حبيييبببييييي، الورق اللي المخابرات المصرية بتسيبهولها على مستوى: خالتي بتسلم عليك، ماما جولدا، الاود الاسمنتية الكبيرة اللي مليانة عساكر اسرائيليين، الموسيقى التصورية الاسرائيلية اللي بتظهر اول ما يروحوا تل ابيب، المشهد الاخير اللي كلوز على وش سامية وبعدين ديزولف على علم مصر، بس نسيوا يحطوا صوت السادات او عبد الناصر، ماهي نادية اكيد كان ليها بصمتها

العمل ده فاشل فاشل فاشل

هو فيه كشري من غير صلصة؟ فيه عبد الحليم حافظ من غير بلوزات هاي كول فتافيت السكر او على الاقل قمصان مشجرة بياقات تستخدم كفوطة سفرة في بعض الاحيان؟ فيه احمد ماهر من غير عياط بالدموع حتى وهو بيمثل هولاكو؟ فيه استظراف من كتر غلاسته يضحك من غير زكية زكريا؟ فيه اغراء يعلم العفة ويتوب ابليس ويخلي كزانوفا يترهبن وراسبوتين يحج من غير نبيلة عبيد؟ فيه رقصة الشلاليت المميتة اللي تخليك قاعد متوتر وخايف على مناخير واحد من الجمهور من غير نجوى فؤاد؟ فيه أغنية اطفال "ثقافية" لتعريف الاطفال بالمزز ورجليهم من غير صفاء ابو السعود؟ يبقى مافيش جاسوسية من غير نادية