هي كل الناس دي شايلة في قلبها من فاروق حسني؟

تحديث: امريكا تدخلت عشان تدعم المنافسة البلغارية، نهارنا مدوحس لو رجع لنا مكسور الخاطر، ح يطلعه فينا
هههههههههههه حرام عليكوا، والله انتوا ناس وحشة، اولا ما اقولكوش على كمية التليفونات اللي جات لي عشان: انت بتدعمي نظام مبارك؟ قال ايه؟ عشان باقول فاروق حسني ربنا يسعده ويبعده، وجو دخل يقول لي يعني يا نوارة هي مصر عدمت ناس بتفهم؟ هو عشان مصري وخلاص ما عندكوا البرادعي مثلا، وللا كنتوا بقى تبعتوا اللمبي

اولا انا طالبة سحب الاهانة اللي لحقت باللمبي يا استاذ جو، ده مثلي الاعلى، وباستعير من حكمته ومقولاته التاريخية كتير.

ثانيا: يا سلااااام بقى لما فاروق حسني يروح ده ح يدعم النظام المصري دوليا؟ طب خدوا دي بقى: النظام المصري ثابت بثبات اسرائيل، وش كده، مش فاكرين لما كوندوليزا رايس بوخت على عوكل، وشارون بنفسه لم بؤجته وراح على واشنطن يقول لهم إلا عوكل، ده حبيبي، ويلزمني؟ فاكرين وللا بننسى؟ وشوية الناصحين دول اللي راحوا لامريكا يقولوا لها انا ممكن انفخ لك شفافيفي والبس لك بدل رقص حمرا وما اقولش لا على اي زبون، والغلة اخر النهار كلها بتاعتك بس سيبيني اعمل ديمقراطية وتنمية، إتألشت واتباعت وتم احتواءها من قبل امريكا لصالح النظام المصري، عشان دي مش نصاحة يا روح خالتك انت وهو. دي غباوة، لأن مافيش حاجة اسمها تتساب تعمل ديمقراطية وتنمية وتقول انا مستعد اخدم مصالح اسرائيل زي ما انتوا عايزين، مش كفاية انك تطبع وتخلف من اسرائيل، اسرائيل من مصلحتها وامنها القومي انها تبقى الدولة الوحيدة المتقدمة في المنطقة، وتبقى الدولة الوحيدة اللي فيها شبه ديمقراطية في المنطقة، وتبقى الدولة الوحيدة الممثلة للحضارة الغربية في المنطقة، يعني ايمن نور وسعد الدين براهيم بدون ذكر اسماء لما قالوا انا مستعد اعمل عجين الفلاحة، وابقى مش بس مخلب قط، ده انا ابقى القط نفسه ما كانوش بيثبتوا حسن نواياهم، دول كانوا رايحين ينافسوا اسرائيل على حجر امريكا، وده مش مسموح بيه، الشيء الوحيد المسموح بيه ان الدولة المجاورة لاسرائيل يبقى فرق التقدم اللي بينها وبين اسرائيل نص قرن على الاقل، وتبقى دولة فيها فقر، وقهر، وديكتاتورية، وتبقى مش مستقرة، والدولة تبقى ملبوخة في مصايبها، وفوضى، يعني يبقى الحال على ماهو عليه، هو ده مصلحة اسرائيل. ولو اتغير حسني وجه نظام تاني مستعد يماين مع امريكا مش ح يفرق غير في تغيير الوشوش. فشيلوا امريكا من دماغكوا خالص وبطلوا لحس لجزمتها، مشششششششش ح تساعدكوا، ووجود فاروق حسني من عدمه مش هو اللي ح يحلي النظام في عين امريكا، امريكا مبسوطة مع النظام ومتستتة ومتهنية، وبتاخدكوا في حضنها عشان توسخكوا زي ما وسخته وما يبقاش حد فيكوا له عين يفتح فيه. انسوها بقى، انسوها زي ما نسيتوا اهم قضاياكوا واصلكوا وفصلكوا وتاريخ بلدكوا. التغيير يا ييجي منك ومن ارتكازك على قاعدة شعبية واثقة فيك وتستحمل انت وهم نتائج اختياراتكوا يا تقعد بقى تقمع بامية وما توجعش دماغنا.

(ده بالنوسبة للي كلموني النهاردة عشان يقولوا لي كده بتدعمي النظام دوليا، ده ولية اللي يراهن على الدعم الدولي)

ثالثا: بالنوسبة لملحوظة جو بإنه حاجة ح تعر مصر مش ح تشرفها، آه، بس ده ممثل النظام، وكما ذكرت له في التعليق، ده نظام الكبير اللي فيه بيعمل زيارة مفاجئة لكارفور، دي الادمغة اللي في النظام ده، فاروق حسني ده المفروض انه المتعلم اللي فيهم، طب نعمل ايه؟ ده مرشح النظام، يعني ح يجيبوا واحد بيفهم منين؟ ح يفتروا على ربنا؟ والله لو عندهم احسن منه ما كانوا عزوه علينا، وانا عايزاه يمشي بقى، انا ما يهمنيش اليونسكو ولا صورتنا في اليونسكو ولا ما يسمى بالدعم الدولي، دي ناس نصابة عايزة تمص دمي، هم ما ارتكبوش في حقي كل الجرايم دي عشان يعوضوني عنها، يروح لهم، هو بيحبهم وهم بيحبوه، اهو نغير وشوش، يمكن ييجي اي حد تاني، اذا ما نفعش يبقى على الاقل ما يضرش، اي حاجة، اي حاجة مختلفة، وش جديد يبعت رزق جديد، ده انا وعيت على الدنيا لقيته، ثم هو لو اسرائيل والسعودية موافقين عليه يبقى خلاص، انا بس كل اللي يهمني انه لما يروح يبقى زي قلته، ما يعملش حاجة خالص، لانه اي حاجة ح يعملها ح تبقى ضدنا مش في مصلحتنا

طبعا عشان يثبت ولاءه، بس يروح، يروح بقى شوية عشان النفس

بس جو بيقول لي ح يجيبوا زاهي لحواس؟ ده ح يمنعنا نمشي في الشارع عشان ريحتنا، زاهي لحواس؟ على رأي نادية الجنسي: لاااااععععاااااااااااا

ملحوظة: ايه المحبة دي كلها يا روقة اللي لك في قلب الناس، انت ما تتخيلش الناس اكلت دماغي قد ايه عشان قلت يروح اليونسكو، ههههه، ربنا يديم المعروف