فيه ام كده في الدنيا؟

اتفرجوا عشان اللي بيقولوا ان قلب الام مش عارفة ايه، المقال ده جه لامي بالميل، وطبعا دمها اتحرق، تقوم بدل ما تخبيه عني تبعتهولي فرورود بالميل، بتنتقم مني عشان باكل كل الاكل اللي في البيت وباخلص الحلويات، واقول لها ليه يا ماما كده تقول لي: ما انا عايزاك تتجنني اكتر ما انت مجنونة، طب انا باكل الحلويات عشان هي عندها سكر وانا خايفة عليها تقوم هي تقول لي كده؟ وعلى رأي اللمبي: فيه ام كده في الدنيا؟

طيب، السؤال اللي بيطرح نفسه حاليا دلوقت: الراجل ده مجنون؟ مجنون..صح؟

السؤال التاني: هي اللغة العربية لغة ميتة؟ ماتت امتى؟ امال هو الابعد كاتب بانهي لغة؟

السؤال التالت: مين صاحب المثل العبقري بتاع الفلاح اما يتمدن يجيب لاهله مصيبة؟

وبعدين يا عم الكتكوت ما تاخد ننوس عين امه وتسافر بيه في اي داهية يتعلم اللغة الانجليزية اللي افضل من اللغة الميتة ومن هنا ورايح "باذن الله" ما تبقاش تكتب باللغة دي، لا وبالبجاحة بيدعي ربنا عليهم

حد هنا خريج اداب انجليزي او اداب عبري يقول للكتكوت ده ان دراسة الكتب المقدسة او مقاطع منها اساسي لتعلم الثقافة وتطور اللغة؟ يعني مثلا دراسة مقاطع من انجيل الملك جيمس كانت ضرورية عشان نعرف التطور اللي حصل للغة الانجليزية من اول ملحمة بيوولف لحد ما اتطورت بشكلها الحالي ودراسة مقاطع من انجيل الملك جيمس بنفس ضرورة دراسة مسرحيات شيكسبير وشعر تشوسر

حد بقى خريج علم نفس يقول للمخبول ده ان اللي لا يجيد لغته الام مستوى ذكاءه بيبقى قليل اللي هو الآي كيو وقدرته على تعلم اللغات الاخرى بيبقى ضعيف لانه اصلا مهاراته اللغوية محدودة بسبب محدودية اجادته للغته الام وانا اعرف مترجم مسيحي حفظ القرآن عشان يتمكن من اللغة العربية ويقدر يترجم من وإلى، ولما حفظ القرآن الانجليزي بتاعه اتحسن

عشان مش مريض نفسيا ومش بيعاني من عقدة الدونية والانحطاط اللي عند كاتب المقال اللي ان شاء الله ح يتسخط كنبة اسطنبولي بالكلام اللي هو كاتبه ده