مالها قناة الناس يا عالم يا ظلمة؟

الا كل الناس بتشتكي من قناة الناس، كل الناس بلا استثناء، من اول صاحبتي المنقبة لحد صاحبتي اللي دراعتها باينة، لدرجة انها بقت مضرب الامثال، كل ماحد يخرف الناس تقول: مين فتح قناة الناس؟ كل مرة اقول ح اتفرج عشان اعرف الناس بتشتكي ليه، وبعدين بعد عدة مشاهدات بصراحة لقيت ظلم بين

انا مش عارفة ايه اللي مضايقكوا في اتنين موظفين في الشهر العقاري راجعين بالبدل من كتب كتاب بنت مديرة الادارة في مسجد النور هنا، وبيتكلموا عن الملايات والخلاطات واطقم الكوبايات والحلل؟ ده حتى البوضاعة اللي بيتكلموا عنها شكلها تبع الاسر المنتجة، يعني خير وبيعملوه في الناس، فيه ايه بقى؟

هو فيه حاجة تانية في قناة الناس غير مدير الحسابات وموظف الشئون القانونية وملاياتهم ام ورد أخضر وقلوب حمرا؟ فيه حاجة تانية؟ انا ما شفتش