رسالة من تحت البتنجان/ الامريكان ياخدوا جمال ويدونا المشروع الصحي

اضغط هنا لمشاهدة الخبر

يعني انت يا عوكل يا حبيبي بتعرف عبري؟ بتفهم الشفرات دي؟ اذا كان الست ام شعر منكوش اليهودية الاسرائيلية بتقول بيحطوا لنا طلاسم حوالين الكتب بتاعتنا مش بنفهمها ولما نسألهم يقولوا مش لازم تفهموا دي حاجات عشان تحميكوا

تاخد كتاب تمسكه بايدك وانت مش عارف فيه ايه؟ افرض فيه شفرة او توجيهات للواد شاليط، افرض فيه سم، افرض فيه سحر، افرض على رأي ابو يوسف فيه آلية متطورة جدا لتتبع مكانه، ما بقاله مرمي حدانا مليون سنة اهو وماحدش سأل فيه بزيارة وللا قفص فاكهة، ما افتكروش يبعتوا له كتاب ادعيا غير دلوقت؟ طب هم دلوقت في شهر أيلول بتاعهم ده زي رمضان عندنا كده او زي الكريسماس عند المسيحيين، وفي الفترة دي الحاخامات بيقعدوا يقروا حاجات ويعملوا حاجات حتى اليهود نفسهم مش فاهمينها، وكتير من اليهود متشككين فيها مش بس الست المنكوشة، وده مش اول ايلول يعدي عليه وهو عندنا عشان نقول ماهو موسم بقى كل سنة وانتوا طيبين، ما بعتوش حاجة قبل كده ليه؟ اشمعنى دلوقت؟ هو مش متنيل قاعد واكل شارب قايم نايم وخلاص، يعني ايه توصل له حاجة انت مش فاهمها ولا عارفها، انت مش شايف شكل الصفحة عامل ازاي؟ انا لما شفت شكلها اتسرعت، ايه ده؟

والنبي حد يقول لي المرسوم على جناب الصفحة ده ايه؟ عمري في حياتي ما شفت كده ابدا عند اي حد في الدنيا، ولا حتى عند الهندوس اللي بيبقى عندهم حاجات مش مفهومة كتير

----------

بالنوسبة للتسعة وخمسين في المية اللي بيقولوا اوباما ح يحولهم اشتراكيين، ياريت يحولهم اشتراكيين يمكن يعرفوا يحسوا بغيرهم بدل ما واحد معتوه يطلع يقول انا مش مستعد اشتغل واصرف ضرايبي على

a lazy unemployed or a loser homeless 

لو مش عاجبهم المشروع عشان ح يعالج اللي عنده تأمين واللي ما عندوش ياخدوا جمال مبارك ويدونا المشروع الصحي ويخلوا اوباما عندهم احنا مش عايزينه، احنا عايزين المشروع الصحي بتاعه بس

ده احنا في عرض ندفع نص دخلنا ضرايب لو ح يروح لعلاج الغلابة، ايه القسوة دي؟ ازاي الرفاهية تقسي القلب بالطريقة دي

عموما انا مش باصدق استطلاعات الرأي قوي، ممكن يكونوا بيسألوا ناس معينة في اماكن معينة هم عارفين انهم جمهوريين او اغنيا وخايفين يدفعوا ضرايب للفقرا، وواحد يقول: ما الفقرا يتعالجوا في الكنيسة، مش ممكن تكون اغلبية اي شعب في الدنيا بتفكر بالطريقة دي، اكيد الاستطلاعات دي متفبركة

مش ممكن

يعني انا قابلت ناس بتفكر كده بس اولا: مش بالبجاحة دي، يعني يعرفوا يحوروا كلامهم بحيث ما يبانش بالقسوة دي: "ربنا عمل اغنيا وفقرا" "ماهو لازم يبقى فيه فقرا عشان ندفع لهم زكاة المال" هههههه "يعني زي اللي بيقول ما الفقرا يتعالجوا في الكنيسة" بس مش بجح يعني، ثانيا: بيبقوا عيال صغيرة قوي ما شافوش في الدنيا حاجة، ثالثا: بيبقى اهلهم اغنيا قوي وغالبا متشككين في مصادر فلوس اهاليهم وضميرهم واجعهم وبيحاولوا يبرروا، رابعا: مش هم الاغلبية خالص، ولا يعملوا تلاتة في المية. انما ناس ترقع الكلام كده وش من غير كسوف: انا ما اصرفش فلوسي على العواطلية والهومليس؟ مش معقول

لا مش معقول

لالالالالالالالالالا مش معقول

مافيش حد كده اصلا، البني ادم مهما كان عنده رحمة شوية، ولو ما عندوش على الاقل ماشفتش البجاحة دي على حد، ثم انا خالي عايش في امريكا ومرات خالي امريكانية وبتقول لي: طب انا كل يوم اسمع نسب عن رأي الشعب الامريكي، طب انا امريكانية، عمر ماحد سألني قبل كده ليه؟ هو انا مش ليا رأي برضه؟

يارب المشروع الصحي ده يتمرر عشان نعرف نطالب بيه دلاديلهم هنا، وللا احنا دلاديل في مصايب بس