خالتي بتسلم عليكي

ايه مسلسلات رمضان دي؟ دي حلوة قوي، ايه اللي نور الشريف عامله ده؟ ما تخافوش؟ طب انا من منظره كده خفت وما رضتش اتفرج على المسلسل، ليلى مراد جايبين واحدة كانت بتمثل دور فرخة في كارتون اطفال، هي اسم الله عليها بتتكلم كده يا حبة عين امها؟ إيوإيوإيوإيو.. وفيه كوميديان تاني بيمثل دور عبد الوهاب، هم كان قصدهم يهزروا؟ المفروض كانوا يقولوا انهم بيضاحكوا معانا عشان انا كنت داخلة جد، بس والله قضيت وقت لطيف، وفيه بقى مسلسل خالتي بتسلم عليكي، بس خالتي دي كانت المخابرات المصرية، المخابرات الاسرائيلي اسمها العمة، هم دايما السلايف كده بينهم حزازات، انا لو من المخابرات المصرية ارفع قضية على المسلسل ده، بقى فيه جهاز مخابرات في الدينا كل ادوات الاستخبارات بتاعته هي البص من الشباك؟ ده تشويش لسمعة مصر، حتى ما عملوش زي خالتي بتسلم عليكي وحطوا اجهزة تصنت من اللي بيبقى شبه الحلق الحمصة ده، طول الحلقات خمس ظباط منهم رتبة كبيرة مدلدلين نفسهم من الشباك وعمالين يبصوا على الرايح والجاي ولا قهوة المعاشات، واللي بيراقب نبيل ماشي وراه بالموتوسيكل، اتفضلوا اهو، المتوسيكل اهو، قدامي اهو، ماشيين ورا فريدريك

ده غير بقى الالمان اللي بيتكلموا انجليزي، حتى نشرة الاخبار بتاعتهم في التلفزيون الالماني كلها بالانجليزي من اللي هو: زااات كونفيليكيت بيتوين ايجيبيت آآآآند اسرائيل ايدنديييد ويييززززز وووووور، وجايبين واحد من سرس الليان يقول النشرة الالماني في تلفزيون تليمصر. وللا الالمان بقى، الالمان، هير الواد لاللو من شبرا، فراو خالتي مسألش من مصر عتيقة، انا مبسوطة قوي بالمسلسل ده، طب لو المخابرات المصرية قلبها ابيض وبتسيب المسلسلات تلعب، طب بالنوسبة للموساد، قابلين الاهانة دي؟ قابلين انهم ماشيين والمخابرات المصري وراهم بالفيسبا وهم مش شايفينها؟ وقابلين ان رانيا مش عارفة ايه دي مرات محمد مختار تبقى عميلة موساد؟ والموساد مأجرة شقق اودة وصالة وعفشة مية في الكيتكات بتاعة المانيا تقريبا؟ وبيتفاهموا مع بعض كده، بصوا، كده، يعني بيغمزوا لبعض ويعضوا على شفتهم كده

انا طول عمري باحب الكارتون

الا سؤال، هو محمد مختار كل ما يتجوز واحدة لازم تمثل جاسوسية فاشلة؟ بيقنعهم بالحكاية دي ازاي؟

استنوا استنوا استنوا، دلوقت حاليا، شلومو بيقول لعزرا: اعتبر نبيل "الفدائي" اللي فجر فيك القنبلة سنة تمانية واربعين

اي والله، فيه اسرائيلي بيقول علينا فدائيين، الناس مهما كان مقدرينا، وزي ما انتوا عارفين، كل رجالتهم لابسين نضارات مدورة وخنف وكل نسوانهم مزز، طب ماهو البطن اللي تجيب ست مزة ماهي اكيد ح تجيب راجل مز واللي تجيب نضارة مدورة ح تجيبها في الناحيتين، وباسم ياخور قد الشحط وبيقول: ماما جولدا، ح نشوف بقى ماما جولدا الحلقة الجاية، مش عارفة ح تبقى جايبة معاها بقلظ العبري وللا لا
انا مش عارفة المسلسل ده مش عاجب ماما ليه، بتقول لي انها مش بتحب الهبل،  

مش بتحب الهبل ليه؟ هو ايه الوحش في الهبل؟ وبانبسط وباضحك، مش احسن من الست كوم اللي كلها دمها بق واستظراف مافيش بعده استظراف، حرب الجواسيس مافيهاش حد بيستظرف، هم ظراف، ومش عارفين انهم ظراف كمان
حتى المسلسلات التاريخي مش موجودة، مسكنا السوريين ونزلنا عليهم قر ونبر لحد ما اتوكسوا جنبنا، على الله بتوع الريادة المصرية يبقوا مبسوطين كده، ماهو احنا يا نفشل الناس كلها معانا يا ننكد عليهم، مش بعيد ينطسوا في مخهم هم راخرين ويعملوا مسلسل جاسوسية يطلعوا المخابرات بتراقب اسرائيل من خرم الباب
خلوا بالكوا بقى، اي واحد لازق شنب عيرة باين وراكب فيسبا يبقى مخابرات مصري واي واحد ماشي قدامه ومش سامع صوت الفيسبا يبقى مخابرات اسرائيلي
اقتلوه بقى