حد ملاحظ ان وكالة عطية بتدافع عن الاخوان؟

هي مش بتدافع، بس هي مقدماهم على انهم بني ادمين، واحنا كلنا عارفين ان الاخوان مش بني ادمين ولا حاجة، ثم ان انا ما توقعتش كده بصراحة عشان كده ما اتكلمتش عن المسلسل من اول رمضان

هو الحقيقة فيه اسباب تانية، لان المسلسل عن قصة خيري شلبي بس سيناريو وحوار واخراج رأفت الميهي، ومارضتش اعمل دعاية للمسلسل احسن حد يقول لي انت بتنافقي الاستاذ بتاعك، فسكت، خصوصا ان واحد مرة دخل يستظرف على اهلي لما جبت سيرة رأفت الميهي مرتين في المدونة. انا متابعة المسلسل وعاجبني قوي، قوي يعني، لانه مش مسلسل، مختلف خالص عن المنهج بتاع المسلسلات اللي احنا واخدين عليها، وده سبب تالت خلاني ما اتكلمش عنه عشان مش كل الناس ممكن تتقبل غير المألوف

هو طبيعة رأفت الميهي انه مش بيطلع شخصيات شريرة ابدا، كل شخصية ولها اعذارها ولها الجانب الانساني بتاعها، حتى الحرامية والنور والقوادين اللي طالعين في المسلسل، بس مطلع شخصية قيادي اخواني (المفروض ان الاحداث بتدور في الخمسينيات وهي ملحمية فيها جانب صوفي) وشخصية القيادي الاخواني، زي الاخوان اللي بحق وحقيق، مش زي اللي بيطلعوا في التلفزيون، وشخصية محبوبة من كل سكان الوكالة، حتى الطبال اللي بيساعده على الهرب. طبعا فيه مواقف كوميدية تفطس من الضحك زي ان واحدة من السكان قالت انها بتتبرع للسيدة زينب فقبضوا عليها بتهمة انها بتدي فلوس لزينب الغزالي، وقبضوا على ولادها الاتنين المعاقين ذهنيا عشان قالت لهم دول اخوات قام محضر الجلسة غلط وكتب: دول اخوان: "بدل ما يكتب اخوات اخرها طبق وفيه حتتين لحمة كتبها سلطانية وفوقيها حتة لحمة واحدة". وواحد بنته اتجوزت اخوانجي فراح هو وصاحبه يفضوا البيت من اي حاجة تجيب لهم تهمة وهم بيفتشوا صاحبه طلع مصحف وقال له: ايه ده؟ مصحف؟ نهارك مدوحس، انت عايز تودي نفسك في داهية؟ ولما قفش بنته التانية ماشية مع واحد وكان ح يضربها صاحبه قال له: سيبها، ماهو مش ممكن تبقى اخوانجي وبنتك مشيها بطال، سيبها تعمل اللي هي عايزاه

واضح ان رأفت الميهي نفسه مش واخد باله ان التلفزيون المصري رفض المسلسل بتاعه عشان السبب ده، هو صدق التقرير بتاعهم يا عيني، كتبوا يقولوا ان المسلسل دون المستوى الفني، على رأفت الميهي يعني، دون المستوى الفني على شغل رأفت الميهي

:)

انا مش عارفة المسلسل ح يتعاد تاني امتى، لانك لو ما تابعتوش من اول حلقة مش ح تفهم حاجة، ح تلاقي عفاريت، وسحرة، وناس بترقص، وناس بتصلي، مش ح تفهم، لازم يبقى من الاول متابع حلقة حلقة، وهو بيبتدي بايقاع هادي ويفضل كل حلقة يسرع يسرع، فدلوقت هو في اسرع حالاته لانه قرب يخلص

هو طبعا كون ان المسلسل مطلع الشخصيات كلها انسانية دي حاجة تمشي مع الحرامية والقوادين لكن ما تشميش مع الاخوان، انا فوجئت، لاني عارفة ان رأفت الميهي المفروض انه يبقى مثقف، وطبعا كلنا عارفين انك عشان تبقى مثقف تعمل ايه؟ تشتم الاخوان، ده الف باء الثقافة يعني، امال ح تعمل ايه يعني؟ ح تقرا لا سمح الله؟ وليه التعب؟ ما تشتم الاخوان وتختصر وح تلاقي الثقافة هبطت عليك من حيث لا ترجو ولا تحتسب، الثقافة دي اصلها رزق ومفتاح رزق الثقافة شتيمة الاخوان، وفضلت مستنية كل حلقة عشان اشوف الزنبة اللي ح يفقعها في الاخوان، ما لقتش، عادي، تصوروا، مطلعهم ناس عادية، وبني ادمين يعني، بيحسوا وبيفهموا وكل شخصية لها عيوبها ومميزاتها بشكل مستقل مش استمبات، ومش مخليهم يرفعوا حواجبهم ولا يكشروا ولا يتآمروا على امن البلاد وصالحها، وكل واحد فيهم له اسباب للانضمام للاخوان، والاسباب وجيهة، ولما اتقبض عليهم متعاطف معاهم عادي زي اي انسان لما يتقبض عليه وكده يعني

سبحان الله

وانا اللي كنت فاكرة رأفت الميهي مثقف؟ كان بيخمني