غشاء بكارة الصيني

انا والله مش مهمتمة بالجدل اللي اثير وسوف يثار اكتر على اثر غشاء البكارة الصيني، لاني عارفة ومتوقعة ايه اللي ح يحصل

اول حاجة ح تتعمل، ح يعمل برنامج توك شو ويجيبوا كام شيخ على كام طبيب نفسي على كام دكتور في علم الاجتماع على كام بنت يغطوا عينيها على كام ولد يصوروا معاه من ضهره وح نقعد في الجدل التافه ده سنين وايام

ما احنا ناس فاضية

احنا ناس فاضية والصين ناس مليانة، عشان كده بيشوفوا كل مجتمع عايز ايه ويصنعوه من غير رغي كتير

انا مش عايزة احطم في ذواتنا يا عيني زيادة ماهي متحطمة، انا بس لما عرفت ان الصين بتصنع غشاء بكارة دماغي اتنقلت، ولاد الجنية، ولاد الجنية، ايه اللي بيعملوه ده؟ قاعدين يشتغلوا بس؟ ما بيعملوش حاجة تانية في حياتهم؟ ما بياكلوش؟ ما بيشربوش؟ ما بيناموش؟ ما بيتفرجوش على التلفزيون؟ ما بيعاكسوش في التليفونات؟ ما بيقعدوش على الشات يقولوا: ممكن نتعرف؟ مافيش حاجة في دماغهم خالص كده غير الشغل؟

طب احنا مش ح ينفع معانا العيشة دي، انا غيرانة، احنا لازم ام البلد دي تشغلنا والا ح نتجنن، الاخ بتاع السياسات الجديدة ده، حرام عليه، ده ما بيشغلش غير خريجين الجامعة الامريكية في المشروع اللي كان عامله لتشغيل الشباب ده، طب احنا ما ينفعناش كده احنا عايزين نشتغل، الناس لما ما بتشتغلش بتبقى شبهنا كده، بقى الصينيين قعدوا، ودرسوا المجتمعاتنا، وعرفوا ان غشاء البكارة مهم وعرفوا ان فيه بنات ح تحتاجه وراحوا مصنعينه؟ ايه الدماغ دي؟

طب احنا مش بنعمل كده ليه؟ لا طبعا احنا قاعدين نقول ده ح يشكك الشباب في البنات والبنات مش ح تتجوز وح يجيلهم عقم وده حرام وتدليس إلخ إلخ إلخ

ما انشالله عنهم ما اتجوزوا، ما انشالله عنهم ما خلفوا، ثم يعني غشاء البكارة المصنع حرام ورمية الناس عطلانة من غير شغل دي هي اللي حلال؟

حرام عليكوا يا ناس، يا ناس حرام، احنا طاقات مهدرة، والله لما بنغور في اي حتة من البلد دي بنفلح وما بيبقاش في دماغنا حاجة غير الشغل، حراااااام اللي بيحصل فينا ده جريمة، شايفين الناس عايشة ازاي وبتفكر ازاي؟ انتوا ايه؟ مافيش في قلبكوا رحمة؟

هو ايه؟ هو خلاص كده؟ خلاص يعني؟ كل الناس ح تفلح واحنا اللي ح نقعد نعيط على وكستنا؟ يعني عايزين تطفشونا من البلد؟ طب نروح فين دلوقت؟ دول الخليج خلاص عرفوا يعملوا جيل جديد من العمالة الوطنية ويعتمدوا عليه، اوروبا والدول المتقدمة بنروح يا نتقتل في محكمة يا يتفوا علينا ونسكت عشان بس نفسنا نشتغل، لو احنا ناس كسلانة كنت قلت مش عارفين يشغلونا، لكن ده اي واحد تجيب له شغل بنص اللي يستحقه يبقى قلبه ح يقف من الفرحة، ونفسيته تبقى في السما، ومافيش حاجة منكدة على الناس وممشياهم يضربوا بعض في الشارع غير العطلة والفراغ

نروح الصين بقى

ملحوظة: اسرائيل عاملة علاقات كويسة قوي ومتينة مع الصين عشان هي القوة الصاعدة في المستقبل

خلينا احنا في غشاء البكارة