Monday 23 March 2009

المعونة هي اللي خيانة عظمى يا مصطفى يا بكري

الاستاذ مصطفى بكري كان طالع امبارح مع منى الشاذلي في العاشرة يقول لها: وراحوا (سعد الدين ابراهيم وواحدة اسمها منى الطحاوي انما ايه؟ سعد الدين ابراهيم جنبها ملاك ينقصه الجناحين) لامريكا يطلبوا قطع المعونة.....طلب قطع المعونة عن مصر خيانة عظمى
يا سلاااااااااااام؟
يااااااااااااااااااااااا سلاااااااااااااااااااااااااااااام؟
ياااااااااااااااااااااااااااااااااااااااااااااااااااااا سسسسسسسسسسللللللللللللاااااااااااااااااااااااااااااامممممممممم؟
وكيف كان ذلك يا حاج دبشليم الفسلسوف؟
يا ناس... يا عالم، البلد دي فيها اعجب الاعاجيب، والطف الاهازيج، صحيح مصر يا ام العجايب
فيه في الدنيا معارض حكومي؟ فيه كده؟
بصرف النظر عن رأيي في سعد الدين ابراهيم ومنى الطحاوي، يعني لما ييجي حتى يتناقش مع الناس يقول لهم قطع المعونة عن مصر خيانة عظمى؟ ايه ده؟ انتوا عايزينا نبطل شحاتة وللا ايه؟ قلة ادب، ما داهية تكونوا عايزينا نستغل مواردنا ونحترم نفسنا ونبقى بلد عليها القيمة.....سفالة
فيه كده؟ فيه كده؟
هو فيه بلد في الدنيا بتنهض وهي بتاخد معونة؟ فيه بلد شحاتة بيبقى لها اي سعر في العالم؟
طب المعونة دي جزء من كامب ديفيد يا استاذ مصطفى، ولو كامب ديفيد ح تتلغي، وان شاء الله ح تتلغي، المعونة ح تتقطع توماتيكي توماتيكي، هو مش مصطفى بكري معارض لكامب ديفيد برضه؟
"وقد يكون جمال مبارك راح يتفاوض بشأن الصالح الوطني في امريكا في حاجات ما يقدرش يتفاوض فيها الا هو"
سبحان الله يا اخي، ويخلق مالا تعلمون
ده ايه الفتوح ده كله؟ ده انت لقطة 
طب المعونة دي معمولة في اساسها عشان تضعف الدول اللي بتاخدها وتخليها دايما معتمدة على امريكا ورهينة شروطها
واهو ابراهيم عيسى يا استاذ مصطفى بدون سابق انذار على غفلة واحنا قاعدين بيقول لك اهو
طب انا اللي افهمه، ان البني ادم لما يبقى عنده القدر القليل من المنطق، والقدر القليل من حل المسائل الرياضية (كانوا بيقولوا العرب جنس متفوق في الرياضيات اكتر حاجة.....مش باين) يقول حاجة بسيطة قوي: انت يا حاج انت والانسة اللي معاك رايحين تطلبوا قطع المعونة عن مصر، وانا معاكوا، طب انتوا بتاخدوا معونة ليييييييييييييييييييييييييه؟ هو انتوا مش مصريين برضه؟
مش كده؟ وللا انا هابلة؟
اه
انا هابلة، ما انا عارفة دي معلومة قديمة
بس بصراحة المنظر بقى مقزز قوي، قاعدين كل واحد فيهم ماسك في طرف المعونة ويقولوا: ما تشدش ما تشديش انتي ما تشدش ما تشديش انتي
طب والله العظيم الشحاتين في الاشارات عندهم كرامة اكتر من كده، والله العظيم كمان مرة العيل اللي عنده عشر سنين اللي ما رضيش ياخد مني فلوس من غير ما يبيع لي ورد محترم عنهم وقال لي بالاطة شديدة: انا مش شحات....انا باشتغل
بس دي هدية-
خلاص....وانت كمان تاخدي مني ورد هدية
انا عايزة الواد ده يحكمنا
يرشح نفسه في الانتخابات وانا ح اتبنى الحملة الانتخابية بتاعته انشالله ارفع الناس بالمسدس عشان ينتخبوه، اذا ما كانش عشان كرامته يبقى عشان نباهته ومخه النضيف
عنده قدرة على الاستدلال المنطقي على الاقل

12 comments:

مواطن مصري said...

مصطفى بكري افاق من الدرجة الاولى


و المعونة اساسا نزلت للنص و يا ريت تيجي منهم و تتلغي

الحلقة كان فيما معانها لية الحزب الوثني بيروح امريكا و اي حزب يروح هناك حتى لو بهدف الزيارة يتقال علية خاين


فيها اية لما الاتنين يروحو امريكا او حتى يروحو ايران او بلاد شونجبونو

Unknown said...

وليه يروحوا اي حتة ما البلد دي احسن من غيرهم
اللي عايز يروح زيارة وللا حتى يحضر فاعليات اي حاجة يروح بصفته الشخصية
انما الناس تروح بصفتها الحزبية ليه؟ سواء الوثني او اي حاجة تانية
ما يبطلوا شحاتة كلهم بقى ويحترموا نفسهم في نهارهم المدوحس ده

المشكلة مش في المرواح يا مواطن

لو الواحد مش رايح يشحت وياخد تمويل

المشكلة في انهم كلهم بيروحوا عشان يقنعوا امريكا انهم اولى بالمعونة من غيرهم كل واحد رايح يعمل عرض استبرتيز عشان يوري امريكا امكانياته ويوريها انه احسن من غيره وانه ح يخدمهم خدمة العبد للسيد

هي دي المشكلة

مش انهم راحوا امريكا ولا راحوا اي حتة في الدنيا

جمال مبارك بيهبب ايه في امريكا؟
بيهبب ايه؟

لا فيه مؤتمر يحضره

ولا رايح زيارة على حسابه

بيعمل ايه هناك؟

رايح ماسك الروشتة وبيقول لامريكا في الاشارة: ساعدوا عاجز مسكين؟

مواطن مصري said...

على حسب الاخبار انة كان رايح في مؤتمر اقتصادي بس مش مصدق الحكاية دية انا متفق معاكي في موضوع ان الي يروح يقول انو اولى ب المعونة

معاكي يتسئل من الدولة و يتحاكم انما بصفة السخصية هو حر حتى لو بصفتة السخصية يروح المريخ

Fatma said...

حلال على غربانه الشحاته حرام للطير من كل جنس

كلهم شحاتين
والحلقة عموما كلها كانت مستفزة
بس انا عندي سؤال يا نوارة

r we ready ?

لو المعونةاتقطعت بكره الصبح ( وماظنش في حد مانفسوش اننا نبطل شحاته )

هيبقى حالنا ازاي ونعرف نعدي الازمة في قد ايه دا اذا عديناها اصلا

Unknown said...

ريدي لايه يا حبيبتي؟
ريدي لانهم يبطلوا يلفعونا على كتفهم ويشحتوا بينا ويضربوا الفلوس في جيبهم؟

اه ريدي طبعا

هو احنا بيوصلنا حاجة من المعونة دي؟
دول بيبيعوا اللبن والجبنة اللي جايين في المعونة في سوبر ماركت سومانيل

Fatma said...

انا معاكي اننا ما بيوصلناش حاجة من المعونة دي وانها على جيبوهم عدل

تعالي نتخيل سيناريو افتراضي
اتقطعت المعونة
يعني سبوبة واتقفلت في وشهم
هيسكتوا ؟
لا طبعا
هيدوروا على سبوبة تعوض

الشعب هيتمرمط اكتر

لما الشعب يتمرمط اكتر لازم يكون مستعد ويفهم انه داخل على مرمطة

هل بقى احنا مستعدين نتمرمط اكتر من كدا ؟
يبقى لازم الناس تتحضر للسواد اللي هيحصل قبل ما يحصل

بس هو عموما السواد كدا كدا الناس عايشيين فيه
وكدا كدا السواد بيزداد اسودادا

يعني على رأيك هي مش هتفرق كتير كدا اعمى وكدا اعور

هي البلد دي مافيش منها امل خلاص ؟
هي خلصت خلاص كدا ؟
بجد والله هي انتهت خلاص فعلا ؟

انا تعبت

احمد سعيد said...

هههههههههههىىىىى

ايييييييييييييون

موس طفى بقرى

عليه عفريت اسمه سعد الدين ابراهيم


هههههههه


نوارة

وياترى قعد يصرخ ويقول الحق ولادك والحق مصر ياريس

هههههههههههه

يقال انه عفريت تركى من الاسياد

ركبه ودلدل رجليه

لما النور اتقطع عليه فى الحمام وهو صغير

قام متزحلق فى الصابونه وواقع على الارض وحصل اللى حصل

والمس دة اعراضه انه اول لما بيشوف وسيله اعلاميه ايا كانت بتجيله حاله
انه بيشوف فى كل مكان حوالينه
سعديات متشكله فى صورة سحلبيات(بضم السين) صغيرة
تحيط بيه من كل جانب وتحاول التهامه

معلش يانوارة
معلش ياجماعه
اعذروة
الراجل مريض برضه

Anonymous said...

بكري اللي بيكتب تقارير عن زمايله,الظاهر نفسه يبقي وزير زي احمد زكي,,,كنت بقولك نفسي افهملك بر عشان حاجة واحدة,,وانا مابعدلش عليكي ولا حاجة ,ما فيش حد بينافسك في كره السادات قدي,,انتي قلتي بلاش نهاجم الراجل نشوف نقدر نعمل ايه في المعاهدة,وفي البوست اللي قبلها كنتي مشرحاه بس كده

Unknown said...

وزير؟
ولا ح يشمها

شوف يا سيدي
بالنوسبة لشتيمة السادات

هو انا لو سبت نفسي على راحتها بصراحة ح اعضعضه بين سناني واخلي اكبر حتة فيه قد كده
o
لكن انا لما قلت: خلاص هو مات الله يرحمه بلاش نتكلم عليه ونشوف ح نصلح ازاي اللي هو عمله

كان هدفي اننا ما نضيعش وقت في اننا نقول: كان خاين لا ما كانش خاين كان ابن كلب لا كان ابن قط كان قاصد لا ما كانش قاصد

لان ده مش ح يودينا في حتة
واقع الامر انه اخد العدالة الشعرية اللي يستحقها حقا وصدقا ويقينا
سبحان الله ولا إله الا الله ولا حول ولا قوة الا بالله
امين عثمان قال، مجرد قال، مصر متجوزة انجلترا جواز كاتوليكي
فضل يحرض عليه ودبس يا عيني العيال في قتله وهو ساق العربية
قوم تلف الايام وتدور الايام وهو يجوزنا اسرائيل فعلا فعلا جواز كاتوليكي مش بالقول بالفعل، ويمضي معاهدة ابدية بينا وبين اسرائيل قلعتنا هدومنا ويتقتل بنفس الطريقة ولنفس السبب كأننا في مسرحية من مسرحيات شكسبير يا اخي

فالكلام في انه كان اراجوز ومقرف ومخبول وبيلبس مزيكا حسب الله مش ح يودي ولا ح يجيب

مش ح يعمل حاجة غير اننا نرهق نفسنا في النقاش وبصراحة مافيش اكثر ازعاجا من السادات غير الساداتيين نفسهم ونفس المخ البلغة والله

بدل ما نضيع وقتنا نحاول نحل ونقفل الموضوع ده

انا باقول كده وانا عاصرة على نفسي لمونة

واديك نكشتني وخليتني ابع

ليه كده يا شرير
:)

عم مينا said...

يا نوارة فيه حد بردو يسمع كلام واحد زي مصطفي بكري ده و يعملوا حتي حساب..
ده بني أدم أفاق و كداب و فيه لل العبر اللي في الدنيا

هو مش معارض حكومي.. هو معارض رئاسي.. هاها هو بيعارض الناس كلها الا الرئيس.. و ده نوع من المعارضة مش موجود في حتة في العالم غير في مصر.. و هو انك تبقي مش عاجبك أي حاجة في البلد.. و لا حكومة و لا وزراء و لا اللي بيعملوه و لا قراراتهم و رغم كده اللي اختارهم بيبقي في منتهي الحكمة و الذكاء

Unknown said...

مينا

هههههههههههههههههه
ايوة صحيح

ايه الحكاية دي؟

ولما اغمن عليه في المجلس الريس اتصل يطمن عليه يا اخويا

شوف الحنان الاسري والعواطف الجياشة

الدمعة ح تفر من عيني يا اخي

Unknown said...

اه وكنت عايزة اقول حاجة كمان

انا موافقة جدا ان اخد معونة دي خيانة عظمى

ده رايي وانا حرة فيه افرده واكويه

لان المعونة هدفها اضعاف بلدي

ثم يا اخي اسمها معونة يعني

وموافقة ان سعد الدين براهين بيخدم مصالح ناس تانية غير مصالح الوطن

ماشي ماشي

انا مش باطيق اهله سعد الدين براهين ده

بس طيب
والمعونة من صدام؟ حلال؟
والمعونة من القذافي؟ حلال؟
والمعونة من كل ديكتاتور عشان يعمل له بروباجندا؟ حلال؟

الله

يا سبحان الله

مش كله معونة؟

ما يقوليش بقى الاخوة العرب
عشان هو لو في وشه نقطة دم وحريص على مصالح الاخوة العرب ما يقطعش من لحم العراقيين الغلابة اللي كانوا ميتين من الجوع في ظل حكم صدام وهو عمال يوزع ثرواتهم على الاضيشه

مش كده وللا ايه؟