انا عملت عملة ممكن انطرد فيها من ماي سبيس

لا بس الصراحة مؤدبين، يعني قلت لهم التصويت اتقفل راحوا ساكتين، بصوا انا ح اترجم لكوا بقى تعليقي على التصويت بالظبط:

ازيكوا يا شباب

اولا احب اشكركم على التصويت وعلى الالتزام بالشروط.

ثانيا انا لا كنت باتلاعب ولا اخدع اي حد، انا كل هدفي من الاستفتاء اننا نوصل لارضية اخلاقية مشتركة عشان نعرف نتكلم

انا حطيت الاستفتاء ده على المدونة العربي بتاعتي في نفس اليوم اللي حطيت فيه الاستفتاء هنا، وتعالوا نقارن مع بعض النتائج:

عدد المصوتين:

على ماي سبيس: 19

على البلوج: 50

:) اه انا ناسي بيحبوني

المصوتين اللي اتريقوا على الاستفتاء:

المدونة العربي: 4 (تمانية في المية)

ماي سبيس: 2 ( عشرة ونص في المية

المصوتين اللي ما التزموش بالشروط:

المدونة العربي: 6 يعني اتناشر في المية

ماي سبيس: 1 يعني خمسة في المية

التصويتات:

عمري ما استخدم سلاح كرد فعل لتحديف الطوب-

العربي: 30 مصوت - ستين في المية

ماي سبيس: 11 مصوت - 57.8 في المية

ح اهدد بيه بس مش ح استعمله:

العربي: 4 - تمانية في المية

ماي سبيس: 1 - خمسة في المية

ممكن استعمل السلاح بس لازم اتجنب الست والطفلين

العربي: 7 (اربعتاشر في المية

ماي سبيس: 3 مصوتين - 15.7 في المية

ح اتصل بالشرطة

العربي: 1 فقط وقال انه ح يتصل بالشرطة ومش ح تيجي فحيضطر يضربه بس مش ح يقتله

ماي سبيس: 5 مصوتين يعني 26 في المية

هو بيضرب بالطوب ليه؟ اكيد عنده سبب، لازم اتكلم معاه الاول

العربي: 8 يعني 16 في المية

مايسبيس: 1 يعني خمسة في المية

يمكن مجنون، ده محتاج اسعاف مش بندقية

العربي: 2 يعني اربعة في المية

مايسبيس: 0 

(ماعرفش الظاهر تحديف الطوب ده عندهم حاجة بتحصل يعني عادي)

انا ح اقتله هو والست والاطفال يستاهلو:

العربي: 2 يعني اربعة في المية

ماي سبيس: 0 

(الله يحرجهما زيادة ماهم محروجين بجاز )

تعليقات غريبة:

البلوج العربي:

1- طبعا حطيت تعليق شكري، ماشفتش بصراحة اغرب من كده، قال ايه المفروض يتعاملوا معايا على اني مجنون وبما اني مجنون يبقى لازم يتجنبوني والست والطفلين يستاهلوا القتل لانهم بيحموا الراجل بمزاجهم 

لامؤاخذة يا شكري ومن غير زعل 

بس ده تعليق واحد مجنون فعلا

2- فيه تعليق انونيمس قال ح يحط له ايات وعبارات مقدسة تحذره من غذاب الاخرة

3-  تعليق جر شكل اللي قال ما معناه، يمكن مجنون نستحمله، الناس  تساع بعضيها يا حورية

ماي سبيس:

اغرب تعليق بتاع واحد اسمه جون:

1- ح ارمي العيلين على جنب

2- ح اضربه بالنار

3- ح اضحك بهستيريا

4- ح اضرب العيلين بالشلوت

من المضحكات:

نسبة كبيرة من الناس على البلوج العربي حملوا الموقف بظلال سياسية، ولهم حق في ده، بس العجيب ان فيهم كتير افتكروا اني بارمز للاسرائيلي بالراجل اللي بيحدف بالطوب وبارمز للفلسطيني بالراجل اللي معاه بندقية وعلى هذا الاساس زعلوا وقالوا لي ما معناه وانت كمان بتطلعي الفلسطيني ماسك بندقية؟ مش هو اللي ماسك بندقية ده هو اللي معاه الطوب، وقليلين قوي اللي فهموا المثل صح

انا الحقيقة ما عرفتش اقيم ده ازاي، يا اما دي ثقة في النفس مبالغ فيها، يا اما ده احساس بالاضطهاد

على ماي سبيس اخدوا الموضوع بجدية واعتبروا ان الموقف فعلا مالوش علاقة بالسياسة، ولما فيه اتنين ابتدوا يفكروا ويلاقوا ان له ظلال سياسية زعلوا وقالوا لي انت بتخدعينا وبتلعبي بينا

الحقيقة انا كنت شايفة ان المثل اوضح من انه يبقى خادع، خصوصا اني مدية مفتاح للقراء لما حطيت شرط باقول لهم: ما تحملوش الموقف حمولات سياسية، يعني مش ممكن ح احط الشرط ده الا اذا كان فعلا هو له ظلال سياسية

على كل حال، انا ما كانش قصدي اني اخدع حد، انا كنت عايزة ابسط موقف سياسي (من وجهة نظر معينة) عشان نعرف نقيمه اخلاقيا

وعليه

فمعظم المصوتين من الجانبين فعلا وصلوا مع بعض الى ارضية اخلاقية مشتركة الا وهي:

1- مش مقبول استخدام البندقية كرد فعل لتحديف الطوب

2- مش مقبول تبرير قتل المدنيين حتى لو كان المهاجم بيستخدمهم كدروع بشرية

الطرفين لقوا حلول مختلفة للمشكلة:

على ماي سبيس:

ابلاغ البوليس او ضربه

على البلوج العربي:

الحل الاجتماعي او ضربه

(والنبي احنا طيبين)

امتداد القصة:

كان فيه اقلية طرحت حلول متطرفة في اتجاهين: ناس قالت نقتله وناس قالت نسيبه خالص

ما بين الاتنين اللي عكس بعض دول كان فيه اغلبية بتقول يا اما الشرطة على ماي سبيس يا اما المجتمع عند العرب

طيب خلينا ناخد برأي الاغلبية ونفترض ان اللي بيحدف الطوب في قسم في امريكا او في قعدة صلح في اي بلد عربي

دلوقت هو عنده فرصة يتكلم

زاوية الراجل اللي بيحدف طوب:

1- ده بيتي، كنت عايش فيه مع امي وابويا، وبعدين جه ابو الراجل ده معاه ناس شايلين سلاح وطردونا برة البيت، بعد شوية زور عقد وادا البيت لابنه،

دلوقت اهلي ماتوا، وانا نايم في الشارع، مع مراتي وولادي الاتنين

2- لا انا حاولت اتكلم معاه، بس هو مش بيسمعني، حاطط سدادات في ودانه، قعدت انادي عليه واقول له اديني انشالله اودة واحدة في بيتي عشان مراتي وولادي بس، قعدت اشوح له يبص لي ويمشي، انا قلت لما احدف عليه طوب ح الفت نظره، ما اذيتهوش

3- لا انا ما كانتش مستخبي ورا الست والعيال، الست دي مراتي، والعيال دول ولادي، انا لما شفته خارج بالبندقية خفت عليهم، جريت عليهم عشان احميهم وقعدت اصرخ واقول له ما تضربش نار، بس هو طبعا مش سامع

زاويتك انت:

1- اولا ابويا ده كان راجل ابن كلب، رماني في الملجأ بعد امي ما ماتت ولاكتر من عشرين سنة ما اتصلش بالتليفون يسأل عليه، العيال الاكبر مني كانوا بيضربوني والمشرفين كانوا بيعذبوني مافيش حد عانى معاناتي، قبل ما هو يموت بشوية جالي وقال لي انه عايز يعوضني عن كل اللي عمله فيا، وقال لي انه جاب لي بيت، رحت عشت في البيت وبقالي فيه سنين انا ومراتي وعيالي

2- اه انا حاطط سدادات في وداني، عندي مرض في ودني من ايام الملجأ، اه كنت باشوفه بيشوح، بس ما كنتش فاهم هو عايز ايه؟ كنت فاكره مجنون

3- انا ماليش دعوة بالكلام ده كله، مش انا اللي طردته من البيت ده ابويا، وانا قلت لكوا انه راجل ابن كلب عموما، بس انا عانيت في حياتي ومن حقي يبقى عندي بيت واسرة واستقر بعد كل اللي شفته في حياتي، لو له حق ياخده من ابويا اللي مات بقى

4- كداب، مش عايز اودة في البيت ولا حاجة، ده عايز يموتني... لا انا ما سمعتوش اصلي حاطط سدادات في وداني، بس مراتي مش بتكدب، هي قالت لي انه وهو بيحدفني بالطوب قعد يقول لي: يابن الكلب، انا ح اقتلك، ح اقتلك وح اقتل عيالك، وح اقتل... ح اقتل حتى كل الراجلة اللي طولهم زي طولك، انا ح ارميك في الشارع زي ما ابوك عمل فينا 

زاوية اللي بيحدف بالطوب:

1- انا متعاطف مع معاناته، بس هو ده ذنبي؟ انا ادفع تمن غلط غيري؟ هو بيقول ابوه ابن كلب، انا عارف والله ان ابوه ابن كلب، لو ما كانش ابن كلب ما كانش رماني انا واهلي في الشارع عشان يعوض ابنه، حتى لما يحس بالذنب يرمي ذنبه على ناس ابرياء، انا ذنبي ايه انا؟ انا صاحب البيت الشرعي، العقد معايا،والعقد اللي معاه مزور

2- شفتوا؟ يعني هو شافني وتجاهلني، شفتوا بقى اني كان ليا حق اني احدفه بالطوب؟ لو ما كنتش حدفته بالطوب ما كانتش الفرصة جات لي عشان احكي حكايتي ويسمعني

3- هو عانى في حياته وعشان كده لازم انا اعاني في حياتي؟ هو زي ابوه بالظبط، طبعا مالوش دعوة، مالوش دعوة بست وطفلين نايمين في الشارع، مالوش دعوة براجل بيدور في الزبالة على اكل لعيلته، مالوش دعوة بينا واحنا بنترعش في البرد ونايمين في الشارع مدام هو مدفي ونايم في بيتي

4- والله؟ انا هددته؟ طب ما انا كنت باحدفه بالطوب، يعني هي الناس لما بتحدف حد بالطوب بتقول ايه عادة؟ بتقول باحبك يا جميل؟  هو اللي اضطرني اني احدفه بالطوب عشان يسمعني

لكن الحقائق على الارض هي:

هو معاه بندقية وانا لا

هو عايش في بيتي وانا لا

هو راجل محترم ومتشيك وانا ابن الشوارع

انا قلت ح اقتله، بس الطوب ما بيموتش

هو ما قالش ح يقتلني، بس البندقية بتموت

ها ح تقول ايه؟

همممم خليني اخمن:

انت:

اصلا اصلا ايه اللي خلاه يتجوز ويخلف مدام نايم في الشارع؟

هو:

وش مستغرب

--------

اوب اوب اوب

وبدأت حمم الغضب تنزل عليا على ماي سبيس وانا باكلمكوا دلوقت

ههههههههههههههه