Monday, 16 March 2009

جالكوا كلامي؟

جالي التعليق ده من انونيمس

نقابة الأطباء تهدد باللجوء للمنظمات الدولية.. اتهام الحكومة بالرضوخ لضغوط البنك الدولي بزراعة التبغ بدلاً من القطن في مصراتهم النائب على لبن، ، الدكتور أحمد نظيف رئيس مجلس الوزراء ووزيري الاستثمار والزراعة بالقضاء على زراعة محصول القطن فى مصر.وأكد النائب، في بيان عاجل، وجود العديد من الأدلة التي تثبت قضاء الحكومة على هذا المحصول الاستراتيجي، في مقدمتها تلكؤ وزارة الزراعة في صرف مخصصات الفلاحين من بذرة القطن حتى فوات موسم الزراعة، وقيامها بتصفية أراضي مركز البحوث الزراعية بعد عرضها 15 ألف فدان من الأراضي المخصصة لأبحاث التقاوي للتأجير بالمزاد العلني، كما جاء في الإعلان المنشور بالصحف والذي حددت له ثلاثة مزادات، الأول عقد في 26/12/2006 بمبنى تحسين الأراضي بمركز البحوث الزراعية، والثاني في يوم 23/2/2006، أما الثالث فعقد في 30/12/2006 الماضي.كما لفت النائب إلى الإجراءات التعسفية التي اتخذتها الحكومة هذا العام ضد زراعة القطن ومنها رفع سعر السماد 300%، وخفض سعر القطن إلى 50%، مؤكدًا أن هذه السياسة تصب لمصلحة الفلاح "الصهيوني"، و"الأمريكي" (ههههه اول مرة اسمع عن فلاح صهيوني، ودول بيبقى شكلهم ايه دول؟).وكشف لبن عن فرض خطة مستقبلية للبنك الدولي على مصر تحت وطأة القروض المشروطة، وتقضي بإحلال زراعة الدخان محل زراعة القطن في مصر، مشيرًا إلى أن الصحف نشرت في الفترة الأخيرة ما يفيد بمطالبة شركات التبغ العالمية، وبعض المستثمرين وزيري الاستثمار والزراعة بزيادة المساحات المزروعة بالتبغ في مصر (مافيش حشيش؟ خلي الناس تنباساط بدل ما يتذلوا للافغان...الامة اللي ما تزرعش كيفها بايدها ما تملكش سطلها)، الأمر الذي واجهته نقابة الأطباء بالتهديد باللجوء إلى القضاء إذا استجابت الحكومة لضغوط الشركات العالمية والمستثمرين بزيادة مساحة التبغ وان النقابة طالبت بتصفية أي مشروع لزراعة التبغ بكافة أشكاله في مصر. وأشار إلى أن نقابة الأطباء هددت أيضًا باللجوء إلى المنظمات الدولية وجمعيات محاربة التدخين لمنع صدور قرارات تخصيص أراض لزراعة التبغ فى مصر (هيصوا يا عيال، ح تتصوروا بالسيجار زي جيفارا بدل كوكو الضعيف والال ام اللي نحرت صدرنا ده انا باكح زي غادة وكاميليا)، وذلك لتعارض هذه الزراعة مع نصوص اتفاقية منظمة الصحة العالمية لمكافحة التبغ والتي وافقت عليها مصر ووقع عليها رئيس الجمهورية وصدق عليها مجلس الشعب فى فبراير 2005.وطالب النائب الدكتور أحمد فتحي سرور، رئيس مجلس الشعب، بدعوة اللجنة الاقتصادية لعقد اجتماع عاجل للبحث عن حلول عاجلة لإنقاذ الفلاح المصري، وإنقاذ الاقتصاد القومي من هذه الكارثة التي هي من صناعة الحكومة والبنك الدولي، مؤكدًا أن لديه العديد من المستندات الأخرى التي تكشف فضائح الحكومة، واستجابتها للضغوط الخارجية على حساب مصلحة الوطن والمواطن.
(عشان ماحدش صدقني...اهو.. ربنا نصفني وكسفكوا كللللللكوا وح نشرب سجاير مية مية)
-------
انا مش محتاجة اتأكد من صحة الخبر لان اهم حاجة فيه انا عارفاها من سنين
دي رابع سنة يبوظوا محصول القطن
ووزير الزراعة قال: اللي متمسكين بزراعة القطن دول زي اللي متمسكين بالطربوش....هو حد بيلبس طربوش دلوقت؟
لا طبعا يا سيادة الوزير
ماحدش بيلبس طربوش
احنا كلنا لابسين طراطير من ساعة ما جرفتوا لنا الاراضي وبقيتوا تستصلحوا الصحرا
بس حكاية التبغ دي جديدة، انا اللي اعرفه اننا بنزرع لب، حتى السيد رئيس الوزرا كان بيعمل اعلان عن المنتج المصري في مجلس الشعب وهو قاعد حاطط كومة لب ابيض قدامه وبيقزقز
يا سلااااااااااااام شايف الوطنية
حد فيكوا فكر يعمل دعاية لبلده بالطريقة دي؟
انا بس عايزة اعرف، هم سايبين ايه لجمال عشان يرضخ له بحيث يعرف يورث ابنه لما يتولد؟ يعني الراجل كمان مية وسبعين سنة لما ييجي يتنازل مش ح يلاقي حاجة يتنازل فيها
طب ولي العهد المسكين اللي في علم الغيب ده ذنبه ايه؟
الا هو جمال في اموركا بيعمل ايه؟ والسؤال اللي بيمغص فعلا في نفسيتي ومحتاجة له اجابة، هو سافر السفرية دي على حساب مين؟ يعني تمن التذكرة والاقامة وكده....والفيزا...الفيزا، خدها كده بساهولة وللا وقف في الطابور؟ معزوم؟ وللا من حسابه الخاص؟
الا هو جمال مبارك بيشتغل ايه؟
بالمناسبة بقى انا عندي كام سؤال محيرني بخصوص جمال مبارك
هو عنده بطاقة شخصية؟
مكتوب فيها ايه؟
طيب مكتوب المهنة؟
المهنة ايه؟ امين لجنة سياسات؟ هي دي وظيفة؟ وظيفة بياخدوا عليها مرتب يعني؟
طب هو مرتبه كام؟ يعني الاساسي كام؟ والحوافز بقى والبدلات؟ تقريبا كام؟
هو بيشتري بقاله لبيته؟ بيشتريها منين؟
طب هو جدد الرقم القومي؟ جدده فين؟ يعني راح وقف واتلطع وكتب الاستمارة؟ طب اشترى الاستمارة يعني؟
عنده في الرقم القومي خانة الديانة زينا؟
هو ايه بقى؟ ها؟ ايه؟

9 comments:

77Math. said...

هههههههههههههههههههههههههههه

بيشتغل ابن !

مش كفاية دي؟ متعبة على فكرة جدًا انك تكوني ابن لحد، مش سهلة زي ما انت فاكرة

أنا بس جاية أجاوب على تساؤلك حتى لا يأكلك الفضول كما أكل القط..

الفلاح الصهيوني بيزرع عملاء، أجهزة تنصت، مواد مسرطنة، سم ناقع، زبالة فكرية

كل هذا وأكثر


واحنا كفاية نزرع لمون

:(

مواطن مصري said...

مافيش حشيش؟ خلي الناس تنباساط بدل ما يتذلوا للافغان...الامة اللي ما تزرعش كيفها بايدها ما تملكش سطلها


ههههههههههههههههههه او طبعا يا بنتي الحشيش أصبح امن قومي عاوزة الافغان يتدخلو في الكيف المصري

اهو الحشيش الي بيرخص كلو بيغلى ما عدا هو

ايوشة said...

هههههههههه جمال مبارك وابوه بيشتغلنا هى دى وظيفته
يانوراة سيبى الشعب يحشش ويتبسط يعنى عية زفت ومفي حشيش ودخان الحكومة بتوفر للعب ما يسعده ويفرح قلبه ويذهب عقله:)

ahmed said...

اه اسرائيل عندها زراعه
و زراعه متقدمة كمان
امال انتى فاكرة اسرائيل بتشغل المهاجرين الروس و الافارقه الفقرا فين؟ كل دول بيشتغلوا مزارعين فى الكيبوتس

طبقاً للعولمة المفروض كل دولة تزرع المحاصيل اللى عندها ميزة تنافسية و تبطل تزرع باقى المحاصيل

يعنى احنا كدة عندنا ميزة تنافسية فى التبغ و معندناش فى القطن اللى احنا اصلاً مشهورين بيه
دى مش عولمة دى عولقة
بلا وكسة

مواطن مصري said...

كدة يقولو نقابة الاطباء تهدد الامن القومي المصري عشان لو الحشيش اتمنع في مصر او الكيف هتقوم ثورة و هتبقى ثورة الكيف



سمعتي البوم العسيلي الجديد
:))


هزيها براحة براحة خلي الشعب يعيش :))

بدراوى said...

ههههههههههههه
ده كفاية
هالة - حشيش

رئيس قناة النيل للأخبار
اللى اسمها
مصر الإخبارية

مراسلهم فى روما
طلع شغال فطاطرى فى محل بيتزا
فى ايطاليا

ههههههههههههههههههههه

Sosso said...

6ab eh ra2yek law kollou batal tad5in keda hanshoun hayeza3ouh lemeen la 3ayez mazeg edrab 7ashish balad we battal ettabgh ya ebn baladi !
ana 2reft

Anonymous said...

بمناسبة الحشيش
كلاكيت وزارة الحشيش

www.youtube.com/watch?v=zhgsAdjShxU

Ahmed Salem said...

موضوع القطن ده من المواضيع المؤلمة لي و بيفكرني بشدة بمشكلة البلد عموما.

انا فاكر اعلان على موقع ياهو كان واحد المفروض انه بيعمل توريد للملايات و المنسوجات المختلفة اللي الفنادق ممكن تحتاجها. في الاعلان كان بيقولك ان جميع المنتجات مصنوع من القطن المصري 100 %

تخيلي الكلام ده في أمريكا و بيحبو القطن المصري. حاجة كدة زي القهوة البرازيلي و الحشيش الأفغاني!

فأنا لما أقراء الكلام اللي في مدونتك, فذلك يوجعني أكثر.

أما عن جمال بيه, انا مستغرب سؤالك جدا.
سؤال زي ده ماينفعش يتسأل لرجل بكل المواهب الذي يمتلكها!!!