قفاك أولا

أنا والله كمية الكتب اللي خلصتها بخصوص إسرائيل تخليني أعمل دكتوراه في إسرائيل

هلبت بقى إني فعلا عايزة كل واحد فيكوا نفر نفر يقرا الكتب دهين، ليه بقى؟ عشان حكاية اللي يعوزه البيت يحرم ع الجامع

وهي نظرية أجلها وأقدرها وأحترمها من خالص معاميع مغاميص قلبي

يعني مثلا ييجي واحد، هو جه عدد من البشريات، يقولوا لي، تفكيك إيه وتربيط إيه يا شيخة ما تسيبينا في حالنا احنا لاقيين ناكل؟

لا إحنا مش لاقيين ناكل، طيب أنا عايزة اسأل كل شاب وفتاء في مصر بالتحديد وفي عموم الوطن العربي (خاصة حزام الزلازل اللي محاوط اسرائيل) انت عايز تبقى محترم وللا عايز تبقى اراجوز؟

لو عايز تبقى اراجوز تقدر تفضل اراجوز طول عمرك (انظر العراق حاليا) يعني، على احسن التقديرات، انا باتكلم عن مصر، يغيروا لك حسني مبارك ويجيبوا لك شاب لطيف يرقص في الانتخابات اللي عمر ما ح يترشح فيها حد مش على مزاج السيادة والباب العالي، ويعملوا لك جمعيات اهلية ومجتمع مدني، ويمولوه يا سيدي كمان، ويفتحوا لك البلد عشان تبقى سوق لاي بضايع في الدنيا غير بضايعك لانك مش ح يبقى لك بضايع ولا نيلة، مع الوضع في الاعتبار انك مش ح تبقى زي دبي لان الامارات عندها بترول وانت ما عندكش، ومع ذلك دبي مش املة ومش منتظر انها تحقق اكتر من اللي حققته، يعني ح تفضل طول عمرها كده، عالم تالت، طبعا كان ح يبقى عندك بترول لولا انك بتخرطه وترميه للوز، ويفضل الحال الاقتصادي على ماهو عليه، مع ضمان جمعيات شحاتة كويسة قوي تشْحت وتشّحت وهكذا كذا فزورة.

مبسوط؟

ح تفضل كده طول عمرك، وطول عمرك ح تفضل عالم تالت، وطول عمرك ح تفضل شحات، طول عمرك ح تاخد على قفاك، طول عمرك ح يفضل مش عندك سيادة، وطول عمرك ح تفضل تحت رحمة الباب العالي، لهم مزاج يجيبوا لك نظام قمعي يجيبوه، لهم مزاج يشهيصوك ح يشهيصوك على حسب فاكهة الموسم بقى

وللا عايز تبقى محترم يعني؟

يعني ايه محترم؟ يعني تعمل تنمية وبلدك بقى تكبر وتقب على وش الدنيا، تبقى زي الصين يعني، وللا حتى تايلاند، وللا اندونيسيا

هم احسن منك في ايه؟

عشان تعمل تنمية لازم لك شوية حاجات صغننة كدهون زي اي بني ادمين بيعملوا تنمية، زي ما انجلترا وفرنسا والنمسا والنرويج والسويد (على فكرة السويد في يوم من الايام كان مستواها الاقتصادي زي مصر كدهون وكله بالارقام)

الناس دي ما نامتش مقملة ومتخلفة ومضلمة صحيت لقت نفسها ميت فل وسبعتاشر

اللي عايز يعمل تنمية لازم يشارك في السوق، مش هو اللي يبقى سوق، السوق ده لما البياعين بيلموا فرشتهم اخر النهار بيبقى فاضي

يعني لازم يبقى عندك صناعة وزراعة وتكنولوجيا

والتلاتة لازم لهم سيستم

والسيستم لازم له دولة

والدولة لازم لها سيادة

والسيادة مش بس على الحدود، السيادة في الخطط السياسية والاقتصادية وعشان تقدر تعمل الخطة اللي على كيف كيفك لازم تبقى آمن، وعشان تبقى آمن لازم تبقى حدودك امان امان امان، وعشان تبقى حدودك امان لازم لك هيبة، وعشان يبقى لك هيبة لازم يبقى عندك قوة عسكرية رادعة توازي قوة اللي جنبك ان لم تفقها، مش في نص الحرب تقول: اي...لا كفاية كفاية، انا ما اقدرش احارب امريكا

هارش؟

طيب يا استاذ لمبي اوعى يغرك جسمك

يعني مش عشان مافيش عسكري انجليزي ماشي في الشارع يبقى انت عندك دولة وسيادة

لازم تفهم انك ممنوع تبقى محترم، ولزمن ولابد تبقى اراجوز

ثانية واحدة عشان ما يجيليش واحد إجز يقول لي نظرية المؤامرة، لا والله العظيم مافيه مؤامرة، المؤامرة دي بتبقى سرية، مابتشتغلش على عينك يا تاجر

في مذكرات موشى شاريت وزير الخارجية ورئيس الوزراء الاسرائيلي في الخمسينات اللي هو كان عبارة عن العوبة يعني في ايد بن جوريون

الراجل بيقول ايه؟

بيقول ان - احم لا مؤاخذة يعني الناصريين ح يزعلوا بس الواحد لزمن يقول اللي في معدته - عبد الناصر ما كانش صلاح الدين ولا حاجة، ده كان راجل عايز يعمل تنمية في بلده، وفكر زي ما بيفكر ناس كتير دلوقت: اللي يعوزه البيت يحرم ع الجامع، عندي امية وفقر وبلاوي متلتلة وانا عايز اعمل تنمية

ومن ثم

قرر يعمل محادثات سرية مع بن جوريون عشان يتوصل الى سلام عادل وشامل يخليه يتفرغ للتنمية داخل مصر، وقال الكلام ده لوزير الخارجية الامريكي ساعتها

قام شكرا لساعي البريد قوي الراجل قال البقين دولم لبن جوريون (كانت امريكا لسة وقتها مش عارفة تظبط دماغها قوي) قوووووووووم بن جوريون قال: ده عند امه يا ادهم....طبعا تحييد مصر في الصراع العربي الاسرائيلي ده ضمن خطتنا، بس مش بكيفه، ومش بشروطه

مش ح اسيبه يعمل تنمية ويبقى خلصت من قوة عسكرية عشان ابقى باواجه قوة اقتصادية

ممنوع اي دولة عربية تعمل اي تقدم صناعي او تكنولوجي او حتى زراعي خصوصا المحيطين باسرائيل

انا اللي احدد امتى اتكلم، وانا اللي ح اصنع الظروف اللي ح اتكلم فيها معاهم

اهو...وش كده من غير اي مؤامرات ولا حاجة

وارجع لمذكرات موشى شاريت اللي اسرائيل دلوقت بتلاحق اللي نشروها قضائيا

قام الدلدول الامريكاني قال كده لعبد الناصر، طبعا الراجل جات له صدمة زرمبيحية، لانه يا قلب امه كان فاكر ان الحكاية حكاية انهم عايزين يعيشوا وخلاص

شاريت بيقول بعدها وبداية من سنة 55 ابتدت الاجهزة الاسرائيلية - بمشاركته نفسه اللي هو شاريت - وضع خطة ما تخرش المية لالحاق هزيمة ساحقة ماحقة بعبد الناصر ومن ثم هدم مشروعة وكل اللي يرتبط بيه، وحددوا لها جدول زمني وقالوا في الفترة ما بين خمسة وستين لتمانية وستين

اللي هي هزيمة سبعة وستين

طبعا هو كان بامكانه ما يتهزمش قوي كده، بس الكلام ده لو كان هو كمان بيحط خطط لهدم اسرائيل من سنة ستة وخمسين مثلا

لكن هو اتلخم في العدوان الثلاثي، وفي قمع المعارضة الداخلية، ده غير الفراتين بقى، زي فضيحة لافون وخلايا التجسس الصهيونية مع انه كان حريص اشد الحرص على كسب الاقلية اليهودية في مصر لكن بن جوريون كان متنبه للنقطة دي وعمل اتفاق انجليزي - فرنسي - اسرائيلي لخلق حالة عداء حوالين اليهود العرب خاصة يهود مصر والعراق اللي كانوا متبتين في بلدهم وكانت حكومات بلدهم متبتة فيهم، وبالفعل نجحوا في توريط بعض اليهود والتحريض عليهم وبرضه حطوا خطة ما تخرش المية وما حدش يقول لي وهم متمكنين قوي كده ليه؟

حط في الاعتبار ان الثورات في العالم العربي كانت لسة جديدة، والاحتلال كان لسة خارج حالا، وهم ضربوا على الحديد وهو ساخن زي ما احنا دلوقت حالا المفروض نضرب على اهله عشان احنا خلاص ما بقاش فينا حتة تنضرب

وطبعا زي ما انتوا عارفين حصل ايه في كامب ديفيد والشروط اللي حطتها اسرائيل لضمان عدم حدوث اي تنمية في مصر

وكتاب مذكرات شاريت، وكتاب ركل السلم بعيدا بتاع واحد صيني ناسية اسمه ومش عارفة اجيبه لاني اديت الكتاب لصاحبتي، وكتاب اساطير الصهيونية لجون روز (يهودي امريكي تروتسكي) كلهم بلا استثناء بيقولوا ان اهم حاجة اسرائيل حريصة عليها جدا هي والقوى الامبريالية (اوروبا وامريكا) وبيبذلوا الغالي والنفيس من المعونة الامريكية المعلنة والسرية هي ان ما يبقاش فيه حوالين اسرائيل اي من الآتي: صناعة، زراعة، بحث علمي

كحك

امال ح نعيش ازاي؟

ممنوع ممنوع ممنوع، ومش دلوقت اللي ابتدوا يحذرونا من الانجراف ورا مشاعرنا الطايشة، ده من ايام عبد الناصر وعشان كده عبد الناصر غير رأيه مية وتمانين درجة وقال لهم كده يبقى ناس مش عايزة تتعايش، دي ناس عايزة تستعبدنا!!! اه والله يا عيني، عرفها لوحده من غير ما حد يقول له

اقصد يعني، مافيش داعي لاننا نستهبل ونهبل لان فيه واحد من اكتر من خمسين سنة وفر علينا الهبل والسذاجة وحاول على قد ما تسمح له كرامته انه يتعايش، مش ح نقعد نلف في نفس الدايرة دي ونقول عايزين يتعايشوا وللا لا؟ ماهم من اكتر من خمسين سنة قالوا للراجل كخ كخ، ما تمدش ايدك على التنمية لو عايز تتكلم معانا

انا مش عايزة الاقي اعذار لعبد الناصر والسادات ومبارك على فكرة

بس فعلا فعلا فعلا، مهما كان واحد فيهم قمعي، وواحد مجنون وبيلبس مزيكا ويمسك بايب، وواحد دمه تقيل وما عندوش قدرة على الابتكار

مهما كان اي حد فيهم

مافيش بني ادم في الدنيا يحب ان يتسم عهده بالهزيمة والفساد والانحطاط الاقتصادي والفقر وانعدام السيادة

مافيش حد يحب كده لنفسه، مش عشان بلده ولا حاجة، عشان نفسه وذاته وفرعنته وكدهون يعني، كل واحد يحب الناس تعدد انجازاته

وفشلهم في انجاز اي حاجة مش مية في المية خيابة منهم، جزء منه خيابة طبعا، وجزء خوف ورعب كمان

اظن كان واضح وضوح الشمس في حرب غزة لما اسرائيل خرقت المجال الجوي بتاعنا وضربت حدودنا وخرقت معاهدة كامب ديفيد اللي اصلا سدت علينا اي فرصة لتنمية حقيقية وتقدم ان الراجل فعلا خايف

فعلا خايف

مش شرير ولا بيعشق اسرائيل في الضلمة، هو ما كانش قدامه غير خيارين لا ثالث لهما، اما يعمل اللي عمله ده

او يقول: يا جماعة انا مش عارف احافظ لكوا على سيادتكوا، الوضع كذا كذا كذا، احنا ممنوعين من زراعة المحاصيل الفلانية، ممنوعين من دراسة الابحاث الفلانية وفيه رقابة على البحث العلمي بتاعنا، احنا ممنوعين من تصنيع كذا وكذا، احنا ممنوعين من تطوير كذا وكذا، احنا ماضيين على اتفاقيات كذا وكذا وكذا

(ارجعوا للكتب بقى انا مش الدادا بتاعتكوا)

وانا مش في ايدي حاجة اعملها، وبجد، بجد مش كده وكده، ومن قلبي: لقد قررت ان اتنحى تماما ونهائيا عن المنصب اللي انا مش عارف اعمل فيه ايه

يمكن حد غيري يعرف يتصرف

وطبعا ده تصرف محترم جدا، بس كسر لقاعدة عمرها ما اتكسرت من سبعتلاف سنة

طب السؤال تاني

انت كمواطن مصري ابن مصر

عايز تبقى محترم وللا عايز تبقى اراجوز؟

لو عايز تبقى اراجوز مافيش احسن من الوضع اللي احنا فيه على فكرة

اي اختيارات تانية اوحش بكتييييييييييييييييييييير وح نبقى اراجوزات على ابوه، اكيد انت مش عايز المالكي وقرظاي

وللا ايه؟ وللا عايزهم؟

ما داهية تكون عايزهم، ما انا بصراحة ردود افعال الناس في الفترة الاخيرة بقت تخليني اتوقع اي حاجة

يهود يمضوا على الوثيقة

عرب يدافعوا عن اسرائيل

فممكن يعني الاقي واحد عاجبه العراق ونفسه في حرب اهلية وللا حاجة

كل شيء جايز

وكما قال جون روز (سبحان الله، لازم اجيب لكوا خواجات عشان يقولوا لكوا بديهيات عشان تقتنعوا) اسرائيل كلب حراسة لضمان عدم تحسن الوضع في العالم العربي مما يضمن للعالم الامبريالي استغلال ثرواته وفتح اسواقه

حد فهمني؟ وللا نشرح تاني؟

بالمختصر

لا ح يبقى عندك ديمقراطية، ولا تنمية، ولا ح يبطل ظابط الشرطة يديك على قفاك، ولا ح تبطل تتذل، ولا ح تبطل تغرق في عبارات، ولا العمال ح يعرفوا ياكلو لقمة رغيف حاف، ولا ح يبقى لك حس في حياتك طول ما كلب الحراسة جنبك

المشكلة مش في مبارك

والله العظيم كمان مرة

اقصد يعني بخلاف عيوبه الشخصية اللي اتعودنا عليها بالعشرة

بس مش لو مبارك راح الدنيا ح تحلو وتزهزه

حد يحاول يحط نفسه مكان مبارك بكل المعاهدات اللي ماضيينها وشروط البنك الدولي وصندوق النقد ووجود اسرائيل على الحدود

ويقول لي ح يعمل ايه؟

انا مش باتكلم عن فتح المعبر لا سمح الله، ولا عن قضية فلسطين لا قدر الله، اعوذ بالله، انا اقول الكلام القبيح ده؟

انا باتكلم عن التنمية الداخلية الواجبة لتحسين الظروف المعيشية للمواطن المصري

وده اللي يهم معظم المصريين، خلينا نيجي دوغري، لا يهمهم ديمقراطية ولا يهمهم حرية ولا نيلة، هم عايزين يشتغلوا وياكلوا ويسكنوا ويتعالجوا ويتعلموا ويعيشوا زي البني ادمين

لو ممنوع عليك الزراعة والصناعة والبحث العلمي ولو خالفت الشروط جنبك كلب حراسة نووي يطلع ميتين اللي جابوك

ح تعمل ايه؟

انا ما باحطش العقدة في المنشار والله

انا كل اقتراحي ان الحقيقة

الحقيقة

الحقيقة

الحكومات العربية مش ح تعرف تعمل حاجة، انا اسفة اني باقول لكوا كده، مش بيأسكوا

بس فعلا هم مش ح يعرفوا يعملوا حاجة، هم كل اللي يقدروا يعملوه انهم يرحمونا شوية ويفكوا عنا، ويبطلوا يهبلوا، يعني

stand still

ماحدش طالب منهم التحرك للامام، بس ما يرجعوش بالسيارة الى الخلف، يقفوا مكانهم كده يمكن احنا نعرف نعمل حاجة، يدونا فرصة نساعدهم

احنا جماهير، مش ملزمين بمعاهدات ولا مهددين باننا لو عملنا حاجة ننضرب بصواريخ

نقدر نحاول نغير الرأي العام العالمي، يدونا فرصة نساعدهم بلاش بقى افترا علينا، يجربونا

وهم جربوا كل حاجة

كل حاجة

جربوا اشتراكية ورأسمالية وبظرميطية وانبطاحية، جربوا الاتحاد السوفييتي وامريكا واسرائيل والصين وفيه منهم اتجنن ولبس ريش على راسه

كل حاجة

الا حاجة واحدة

احنا

ما يجربونا هم خسرانين ايه؟ ما يساعدوناش بس يسيبونا في حالنا مش ح نعمل لهم حاجة، ماحدش عايز بلده تتهد ولا يبقى فيها احتلال، بس بجد القمع والجنان ده مش في مصلحتهم، ينسونا شوية واحنا اصلا كده كده ناسينهم هم بس اللي بيفكرونا بيهم لما بنشوف عربيات الامن المركزي

بس احنا نقدر نقنع الناس انهم يقدرو يحققوا مصالح محترمة لو سابونا في حالنا نعمل تنمية وشالوا كلب الحراسة اللي حاطينه

خصوصا ان زكريا بيقول (اللي هو جون روز) ان دلوقت الوضع اتقلب، بعد ما كانت اسرائيل كلب حراسة لمصالح امريكا زي ما كان ريجان بيقول عليها وش كده، دلوقت بقت هي اللي بتسيير امريكا

وامريكا بتمر بازمة اقتصادية ح تسود مش ح تزهزه ولا ح تتحل وده الكلام الاخير اللي قاله اوبما: احنا مقبلين على ايام سودا

ولو صدق ظني، ح يبقى فيه حرب عالمية تالتة، او على الاقل التاجر لما بيفلس بيدور في دفاتره القديمة

وممكن يدوروا على تحالفات جديدة، او....قديمة

يعني فيه فرصة ان الثوابت تتغير والموازين العالمية تتقلب، فيه رأي عام متنامي عالمي بيقول انهم بيصرفوا على اسرائيل اكتر ما بيستفيدوا منها وانها على كل الصرف ده مش بتحقق التنمية المرجوة لكلب الحراسة اللي المفترض يكون الاقوى سياسيا واقتصاديا وعلميا وعسكريا

طيب

فيه فرصة اهو

بس السيدة في ضهرهم يبطلوا يلحسوا الجزم، اذا كانت الحكومة

او مناضلي الاراجوزات

ماحدش طالب منهم يشهروا السيوف ويعلنوا الجهاد

بس يسكتوا خالص، ويحلوا عنا، يحلوا عنا، احنا ما عنداش مشكلة في تغيير الوشوش، احنا عندنا مشكلة في اننا لازم نغير الوضع

العالم كله عمال يطلع واحنا بقينا في قعر الكباية، مش فاضل غير نحفر قبورنا وننزل فيها

عايزين ناكل....ناكل يا ناس

فهمتوا مني حاجة؟ وللا انفعالي خلاني مش عارفة اشرح وجهة نظري؟

وامضوا ام الوثيقة انا مش بازق في حيطة

http://www.petitiononline.com/ttwpdi/petition.html