Tuesday 31 March 2009

ما تشوفوا لنا ايه الحكاية دي يا شباب

هم بتوع قسم عبري عندهم تخلف نتي وللا ايه؟ مش معانا خالص ما يساعدونا يساعدهم ربنا
الولية المجنونة، فاكرينها؟ اللي كانت بتقول الجماعات الاسلامية دول يهود مخطوفين ومدربين في السي اي ايه :) المهم احنا طبعا مش ح نلتفت لتحليلاتها للظواهر اللي موجودة، احنا بس نلتفت للحقائق اللي هي بترصدها لانها ولية فضحية وبتقول كلام كتير ماحدش فيهم يجرؤ يقوله ومقطعة البطاقة ونبقى نحلل في معمل تاني
مين الدوردائيم دول؟ مالهم يهود اليمن؟ مضطهدين ليه في اسرائيل؟
دي طالعة بتعيط عليهم... طبعا بعد ما الفت ولحنت وقالت ان التلمود اللي موجود ده مش هو التلمود الحقيقي، وان اللي الف التلمود ده هو الفاتيكان، معلش هي حاطة الفاتيكان في دماغها وعندها تصور ان الفاتيكان هي اللي عملت كل حاجة في الدنيا، وان الفاتيكان دي هي ابليس اللي طلع ادم من الجنة وهي التفاحة كمان، ما احنا اتفقنا انها مجنونة
بس ما تشوفوا لنا الدوردائيم واليهود المضطهدين في اسرائيل دول بدل ما احنا قاعدين نهبل ونقول سنة وشعية ومسيحيين ومسلمين
ماهو



الكلام اللي هي بتقوله هنا مش مجانيني قوي لان اللنك ده بيقول نفس كلامها، بس هي بتقول ان اسرائيل بتضطهدهم...مال الفاتيكان بقى؟ اه ده انا نسيت، هي كانت قبل كده قالت ان الفاتيكان هو اللي عمل اسرائيل، ههههههههههههههههه، والله اصحاب العقول في راحة، لا ويقولوا لك: احنا اذكى جنس بشري، ومتفوقين على كل الاجناس في المخ
المهم خلينا في الفئات المضطهدة من اليهود في اسرائيل، هاه؟ بدل ما احنا ماسكين في شعور بعض ومفرجين الناس علينا، دي بتقول ان يهود اليمن بيخفوا حقيقتهم عشان ما يتقتلوش، يعني اظن مهما وصل تخلفنا عمرنا ما وصلنا للدرجة دي، وللا هاه؟ وساترين على نفسهم ولا حد يعرف عنهم حاجة وعاملين كمان رقابة على الكتب والكتاب ده اتنشر بدون اذن الرقابة في اسرائيل وواحد اسرائيلي اللي كتبه اسمه فضائح بن جورين واحد ابن حلال ربنا يستره سابهولي في التعليقات وصاحب الكتاب خلع من اسرائيل ونشره على النت وبيتم ملاحقته دلوقت، على الله ما يكونش اتقتل وانا باكلمكوا، واحنا اللي فاضحين روحنا وعمالين بس نندب ونقول اسرائيل دولة ديمقراطية "شبه" علمانية

8 comments:

أكون أو لا أكون said...

يهود اليمن تم خداعهم وجذبهم للخروج من اليمن على اساس يروحوا لإسرائيل... لكن المفاجأه إنهم كانوا عاوزينهم خدم...
ما الشعب اليهودي الإوروبي مين حيخدمُه... لا الأقل قيمه: واللي هو العربي" وخصوصا اليمني يعني بالنسبه لهم ده بقى المتخلف البدوي...
فتم خداعهم وأخذهم لإسرائيل... لم يجدوا إلا العنصريه... والتسلط...
فلم يجدوا مكاناً إلا يشتغلوا زبالين... واستعملوهم كمان لسد ثغرات الجيش... يعني لو عايزين يعملوا حاجه انتحاريه مثلا يستعملوا العساكر اليمنيين كدروع...

لا وفيه وحده اسرائيليه بتقولي إيه؟" بتقولي اليهود العرب مضطهدين في بلادكوا...
على اساس الديموقراطيه عندهم...

احمد سعيد said...

والله ياختى انا اعرف الامورائيم والسبورائيم
والتنائيم

ودول كلهم طوائف من رجال الدين من كتبه وشارحى التلمود


انما الدورائيم دى اول مرة اسمعهاالصراحه

احمد سعيد said...

اكون او لا اكون
....................

الموضوع دة مش جديد على فكرة

طول عمرهم بيعتبرو اى يهود من غير ذوى الاصول الغربيه احقر واقل منهم

وبيتعاملم معاهم بعنصريه فى كل شىء

دول حتى بيطلعوا عليهم نكت

تدل على مدى غباؤهم وحقارتهم

يعنى يقولك مرة يهودى ( كذا

كذا دى اللى هى مثلا افريقى او عربى او شرقى عموما

أكون أو لا أكون said...

اقري المقابله ده...

http://www.aljazeera.net/NR/exeres/5FE736C5-21DD-4435-86F5-41ACE46EDCFD.htm

Fahd said...

معلش ممكن تدعي هذه الولية جانبا

انتي ليه متجاهله القمة العربية

تكونيش متضامنه مع الريس

ولا يمكن قرفانه

بس فيه احداث سخنة تؤرخ في حاية الزعماء العواجيز العرب

حتي تامر امين قد يهلفط في البيت بيتك

ومحدش فاهم حاجه

كنت اتمني ان اعرف رايك


الموضوع اللي فات رائع


لما بشوف التعليقات علي اي تدوينة بدور علي طفاطيفوا ومواطن مصري

ده بيمثل اليمين وده بيمثل اليسار

وانت في النص ترضي ده شوية وتزعقي لده شوية

حوارك معاهم الاتنين يعد تدوينة اخري ودرس في كيفيه التعامل مع الاخر والاخر المختلفين في وقت واحد

بس انا بحب طفاطيفو اكتر لاني اري انه موضوعي وممنطق ليست لديه قناعات مسبقه شله تفكيره


دمتي بخير

Sosso said...

here is the link to wikipedia article's about dor daim
http://en.wikipedia.org/wiki/Dor_Daim

Unknown said...

معلش اسمحيلي اعتب عليكي في موضوع نقدك لدارسي العبري لاني اظن ان احتياجك ليهم غريب شوية في الوقت اللي فيه موسوعة اليهود والصهيونية للراحل العظيم عبد الوهاب المسيري اللي ما اعتقدش انه ساب اي تفاصيل او طايفه من اليهود الا اما حللها - والراجل عامل رصد موسوعي لتاريخ اليهود جازاه الله عنه كل خير وجعله في ميزان حسناته ونسال له الرحمة والمغفرة
- ما كنتش اعتقد ان كتاب فضائح بن جوريون ممكن يثير اهتمامك , بس واضح ان فكرة ان اسرائيل غير قابله للنقد من الداخل الاسرائيلي غير واردة في تفكيرنا , لكن علي العكس في الداخل الاسرائيلي هنالك تيار ليبرالي وعلماني معادي للاحتلال وضد فكرة الدولة المحتلة وضد اصلا الحركة الصهيونية من الاساس وامثلة علي هذا ممكن تدخلي علي الرابط ده :
http://www.israel-academia-monitor.com/index.php?new_lang=en&userid=3112
كذلك اكبر كتاب حقق مبيعات في عام 2008 داخل اسرائيل كان كتاب للمؤرخ شلوم ساند الاستاذ بجامعة تل ابيب وعنوانه - متي وكيف تم اختراع الشعب اليهودي ؟ - وفيه بينفي تماما اسطورة ارض الميعاد والشتات وكل الاساطير الصهيونية
وللاسف حاولت اعثر علي نسخة من الكتاب بس وجدت صعوبة في ذلك بالرغم من انه ترجم للغة الفرنسية والانجليزية
وده رابط لمقال في جريدة لموند دبلوماتيك حول الكتاب :
http://www.monde-diplomatique.fr/2008/08/SAND/16205
وهنالك الكثير من الكتب الغربية التي تتحدث عن اضطهاد اليهود انفسهم من قبل الحركة الصهيونية العالمية مثل كتاب الاساطير الصهيونية :
http://www.4shared.com/file/95945828/cb220acb/the_myth.html
وغيرها الكثير , بل لو بحثت ستجدي كمية مدونات باللغة الانجليزية ضد الحركة الصهيونة يمكن اكثر من المدونات العربية

وعموما انا حاولت اضيف اضافة ولو متواضعة
وشكرا علي اتاحة الفرصة

Anonymous said...

معروف انه يهود اليمن هم اغلب الزبالين في اسرائيل (حالياً) و مرة شفت واحد من يهود اليمن على الجزيرة بقول انه جدته علشان يجذبوهم للإسرائيل قالولهم انه العسل بينقط من الحيط و طول اليوم ما فيش عندهم شغل غير انهم يلحسو العسل عن صوابعم
arabi100.wordpress.com