Saturday 28 March 2009

ايه بنات؟

انا لحد دلوقت خمستاشر واحد بالعدد حكى لي على البنات اللي بتتقدم له، اقربها تلاتة في اقل من تمانية واربعين ساعة والتلاتة ما يعرفوش بعض، كل واحد فيهم ستايل مختلف عن التاني خالص ودماغ تانية وشغلانة تانية، ومن ضمنهم واحد متجوز مسكته واحدة وقعدت تقول له: وانت بتشتغل ايه؟ ووالدك؟ وانتوا ساكنين فين؟ كويس كويس، ما تنزل توصلني، انا ح اركب من عبد المنعم رياض انت نازل فين؟ وبتقبض كام؟ وعندك شقة؟ كويس كويس، وفارشها؟ عموما مدام جبت الشقة دي اهم حاجة، وريني الموبايل بتاعك؟ ايه ده؟ مين ده؟
ده ابني-
ابنك؟ هو انت لسة متجوز مامته؟
طبعا هو كان عمال يشتغلها "عشان اشوف اخرها ايه" لحد ما اكتشفت لوحدها لما طلبت منه الموبايل 
!!!!!!!!!!!!!!
ايه بنات؟ فيه ايه؟ مش بالراحة كده؟ وبعدين الرجالة بيتجننوا من الكلام وبيفتكروا انهم لقطة، حرام عليكوا، ما عندكوث اخوات ثبيان؟
اظرف حاجة واحد كلمني النهاردة وبيقول لي: عايز اقعد معاكي، جايلي كذا عرض جواز وعايز اخد رأيك
ده بقى ستايل تاني غير المتجوز، مطرقع شوية، مطرقع شويتين تلاتة مية 
التالت بقى محرج ومتواضع: والله انا خايف احكي لك احسن تقولي عليا اتجننت، انا والله ما اتجننتش، ولا فاكر نفسي الان ديلون ولا حاجة والله
ايه بنات؟ ايه حكاية عريس يابوي عريس يابوي، مش نلم نفسنا كده؟ نصيبك ح يجيلك يا حبيبتي، مافيش داعي اي واحدة "تجري على اكل عيشها" زي ما واحد فيهم قال لي
بالراحة بالراحة....حرام عليكوا سرعتوا العيال، ماحدش بياخد غير نصيبه، تجري يابن ادم جري الوحوش غير جوزك ما راح تحوش
اهدوا شوية
فيه حاجة في الاكل والله العظيم
طب والله العظيم كمان مرة فيه حاجة في الاكل

32 comments:

Anonymous said...

انا فى تمانية متكلمين عليا لحد دلوقت بس الشورة فى الاخر لماما انا اخر واحد يتكلم فى الحاجات ديه معندناش ولاد فى العيلة ينقوا مراتتهم

Unknown said...

تصدقى أنا كنت عايز أخد رأيك فى كام عرض جايين لى؟

Unknown said...

ما تنقلوش دماغي بقى احسن اصدقكوا

كل حاجة بقت جايزة دلوقت

ح يبوظوا علينا الرجالة زيادة ما هم بايظين

مواطن مصري said...

يااااااااااااة من زمان و ملقتش بوست

اجتماعي


دة اول بوست اشوفة بعيد عن السياسة
و بعدين هو في حد جايلة نفس يتجوز في عهد عوكل

انا و الله خايف اتجوز ولا ارتبط بواحدة و معرفش ملامحل المستقبل هيكون اية و خايف منة
و بعدين مالها عيشة الحرية

TAFATEFO said...

ما هو الجواز مش سهل .. وفي قطاع كبير من الشباب مش عايز يتجوز (أنا منهم) .. مش عارف ازاي ممكن الانسان (ولد أو بنت) يتخلى بإرادته عن كل حرية ومزايا حياة العزوبية؟؟!!

بصراحة البنات معذورة

على رأي شريهان .. البنت زمان كانوا بيجوزوها وهي عندها 13 سنة .. يعني أنا بقالي -- سنة صابرة

TAFATEFO said...

وبعدين في حاجه

لما بنت بتحكي الولد على اللي بيتقدمولها تبقى عايزه تلحلحه

احم

بالقياس .. لما 15 واحد ميعرفوش بعض يحكوا لواحدة على احم برضه

يبقى الله يسهل لعبيده

Unknown said...

طب بصى.. أنا حاقول لك حاجة حصلت معايا بجد ومش باهزر

أنا مرة كان معايا ابنى فاعد جنبى فى العربية وكنت واخده فرح أخو واحد صاحبى.. واحدة بنت زى القمر لقيتها بتخبط على القزاز اللى جنبه وبتقول له والنبى ياحبيبى ممكن تنزل وتسيبلى بابا ياخدنى لفة بالعربية

ونزلت ضحك ومرقعة هى وصاحبتها اللى معاها تقولها عايزاه ياخدك فين ماتهدى شوية وشوية كلام خلانى أنا وشى احمر من الكسوف ورفعت القزاز وروحت بالواد وطظ فى الفرح

طبعا الواد رجع حكى لأمه وكانت ليلة سودا

يساري مصري said...

امال انا مجاليش حاجه ليييه :D
الواحد شكله فقد السكس ابيل بتاعه :D

Anonymous said...

صدقى أو لا تصدقى 00
أنا من 3 سنين باشتغل شغلانة لها علاقة بالتعامل مع الجمهور وخاصة الجنس الناعم فى خلال الـ 3 سنين دول فى 4 بنات على الأقل ما بين 18 و 26 سنة عرضوا نفسهم على للزواج بنات بكر عذارى جامعيات يحلوا من على حبل المشنقة 00
والعبد لله لو ليه فى اللوع والمشى البطال كان زمان البنات دول فى خبر كان 00
المفاجأة بقى أن أنا فى أواسط الخمسينات من عمرى ومش آلان ديلون ولا حاجة بل أصلع وبدقن ومتجوز وولادى فى الجامعة00
زمن يانوارة يا بنتى

احمد سعيد said...

عندكيث انتى اخوات بلاثتيك

احمد سعيد said...

بلاحه يابنات مث كدة

ايوة انا عالف الثعاع وتأثيلة


لا بجد يانوارة


على فكرة

الحوار دة مش جديد

دا بقاله فترة كبيرة

واصبح ظاهرة بعيد عنك

مواطن مصري said...

@ انيومس ما تشوفلي شغلانة معاك
:)))

TAFATEFO said...
This comment has been removed by the author.
Unknown said...

مصطفى
.....

معلش أنا مش فاهم ردك

يعنى ايه أروح الأهلى و أكبش من فلوس الأهرام ؟
ايه علاقة ده بكلامى؟

ويعنى ايه " هى جت عليك انت ؟ "
انت شايف ان ده أسلوب كلام ؟

TAFATEFO said...
This comment has been removed by the author.
Unknown said...

مواطن

كتير بيقولوا كده برضه زيك

طفاطيفو

هههههههههههههههه
لا يا راجل
ده فيهم عيال قد عيالي وكذا حد متجوز


ام5ام
ههههههههههههههههه
هههههههههههههههه
ههههههههههههههههههههههههه
لا دول بنات كويسة مش زي اللي خبطت لك على القزاز

بنات ناس يعني، وصغيرين وحلوين والله
ما اعرفش مالهم الياس تسرب الى نفوسهم ليه كده بسرعة


مروان
لا والله فيه حاجة في الاكل

على فكرة الناس كلها بتتصرف تصرفات مش طبيعية

دي حاجة من الحاجات
بس فيه حاجات كتير غريبة
زي تصرفات الولاد نفسهم

الواد تلاقيه معجب بواحدة وعمال ياكل دماغي انا
يا واد ما تروح تكلمها
يهنج ويتنح

يا واد انت مالك عامل زي البت المستحية دي ما تقولها الكلمتين اللي بتقولهم لي عنها

ابدا، ينزل عليه الخرس اول ما يشوفها

مش عارفة الدنيا مالها متشقلبة كده

يساري
هههههههههههه
اسم الله على ابيلك
احلق بس

انونيمس
هاه؟
انا لما قريت تعليقك عملت كدهو

احمد سعيد
لا دي حاجة جديدة
على الاقل في حدود علمي
والشباب المهنج برضه جديد
الله
مش هم دول اللي بيتحرشوا في الشارع بواحدة ما يعرفوهاش؟ امال لما بيحبوا واحدة بيتنحوا ليه؟


اه صحيح يا مصطفى ايه الكلام اللي بتقوله ده؟ اسم الله عليك

رحلتنا في الحياة said...

هههههههههههه ايه يانوراة سيبى البنات تلقط رزقها اصل اللى بيحصل ده والله العظيم مش يتقال عليه غير تلقيط رزق وللاسف الاشكال دى خلت الرجالة تتمرع وتفتكر انها يااااااااااااااما هنا يااااااااااااما هناك وتنقى وتفلى وتطلع القطط الفاطسةفى البنات على اساس ان الاخ توم كروز والبنات بتترمى تحت رجليه فى كل حتى
بس ااقول ايه منكم لله يابنات اليومين دول منكم لله كشفت راسى ودعيت عليكم :)

رحلتنا في الحياة said...

وعلى فكرة انت اخدتى البوست من على طرف لسانى ههههههههههه كنت لسه بحضر فيه يلا انتى جبتيه من الاخر

Unknown said...

طفاطيفو
.......
يا أخ مصطفى أنا كتبت الكلمتين دول هزارعشان نوارة اشتكت فى البوست انهم اتقالوا لها

فماكانش فيه داعى تقفش عليا أنا وتكلف خاطرك سخرية مش مفهومة أصلا و أسلوب كلام غير محترم مع واحد فى سن أخوك الكبير

عاشقه وغلبانه said...

البنات مخها طق يا اوختي
هههههههههههههههههه
هايتجننوا ع الجوازم
وبعد كام شهر هو وهي يلعنوا اليوم اللي شافوا بعض فيه

جاتها نيله اللي تقول ياجواز في الزمن ده

Unknown said...

سوري ... انا يظهر دخلت غلط علي مدونة غادة عبد الرازق "مش عايزة أتجوز" بدلا من جبهة التهييس الشعبية

Mafrousa said...

هوه الاكل بس اللى فيه حاجة؟؟؟؟
ده كل حاجة فيها كل حاجة
ربك يلطف بينا
و يجيش علينا البنات تبقى بشنبة و الرجالة تلبس جوبات
فين الحياء اللى بتتكلم عنه الاديان؟؟؟
بس اقولك
مادام كل حاجة بقت خربانة فى البلد
اشمعنى يعنى ديه
لينا الله

منظور شامل للحياة السعيده said...

معلشي يا جماعه انا مش هزود في الموضوع لأني شايفكم اتكلمتو بما فيه الكفايه

و انا شاهد ان الموضوع بقى ظاهره فعلا سواء بالمباشره العلنيه كدا او سواء بالتلميح المفضوح


لكن فيه حاجه تانيه, ليه الشباب مش عاوزين يتجوزو

مش بتكلم عن اللي عندهم مشاكل اقتصاديه

انا بتكلم عن شباب جاهز في السن و الماديات و حتى اجتماعياته متظبطه و معندوش جنس مشكله

و تلاقيه يقولك مش دلوقتي
... ليه؟ هوانفسه ميعرفشي

لسان حاله بيقول انا مبسوط كدا ... انا مرتاح كدا....

صحيح دي بتزود المشاكل الاجتماعيه في بلدنا اكتر و اكتر

mohamad said...

كلنا - رجالة وستات محبطين - خايفين من بكرة - مفيش فرص لأي حاجة . . والجواز والبيت هوا الحل الأقرب . . الناس عايزة تغير حياتها . . ومش عارفة إزاي . . وكله بيخبط

ربنا ينتقم منك ياللي في بالي

TAFATEFO said...

يا أستاذي أنا عمري ما بسخر من حد

ده كان مجرد هزار مع حضرتك على عدة عروض .. فقولت لحضرتك اختار عرض الأهلي هزار

وبعت لحضرتك على ايميل تقريباً طلع غلط لأني لقيته ريتيرند فايلد أوضح لحضرتك ومكنش قصدي لا أسخر ولا أتتريق والله .. كان مجرد هزار

وأنا فعلاً حذفت الرد وقتها

تقبل أسفي .. وتأكد اني والله مكنتش بتتريق ولا أسخر

آسف مره تانيه

77Math. said...

حرام عليكوا سرعتوا العيال

ههههههههههههههههههههههههههههه


الموضوع دا مش جديد، ومن زمان جداااااااااا كان المثل القومي بيقول:

اخطب لبنتك ولا تخطبش لابنك

:D

جتها نيلة اللي عايزة خلف

بجد مين له نفس يتجوز؟

طيب مين له نفس يتجوز في مصر؟

ربنا يرحمنا قبل ما ييجي الوقت اللي ما تجوزش علينا فيه الرحمة

:(

Ahmed Fawzi said...

طيب إيه المشكلة ؟؟ بجد مش هزار ...
فى التاريخ ستات كتير محترمين كانوا بيعرضوا الجواز على رجالة و مكانش لا عيب ولا حرام ولا كان بيقلل من شأن الست ...
إذا كان الأولاد لسبب أو لأخر بيتأخروا فى الجواز فمش عيب إن البنات تاخد الخطوة دى على الأقل يختصروا وقت طويل .. و خصوصا إن فيه ولاد كتير و خصوصا فى ظل الظروف الحالية بيحسوا إن فكرة الجواز صعبة أو إن البنات الكويسين مش ممكن يوافقوا عليهم و بتبقى فكرة غلط .. و فى نفس الوقت بالاقى بنات زى الفل أخلاق و شخصية و ثقافة و جمال بيعدى العمر بيهم من غير ما يتجوزوا ... فيبقى بلاش عقد و سيبوا البنات يعملوا اللى شايفينه صح

احمد سعيد said...

ماث 77
..............

مين له نفس يتجوز ؟؟؟؟

مين له نفس يتجوز

كتيييييييييييييييييير قوى

دا انا بشوف كل يوم ما لا يقل عن فرح او اتنين

( ملحوظه , انا مش منهم طبعا )

77Math. said...

تلاقيهم كلهم بتوع 88 فما بعد !

طيب والله أنا بشوف ناس بتتكلم عن الجواز دلوقت والخلفة كإن كل حاجة بمبي في بمبي


معرفش بجد بيجيبوا الأفكار دي من فين، ولا هم مش عايشين معنا؟


في حاجة غلط أكيييييييييد


في الأكل؟ جايز والله على رأي نوارة

احمد سعيد said...

عالم سوداويين بعيد عنك

Anonymous said...

فى سنة 2009 ولازالت تحكمنا عادات اجتماعية متوارثة من سنوات طويلة جدا اعتقد اذا سمح المجتمع للفتى والفتاه ببعض الحرية والاشباع النفسى والجسدى ودخل ذلك كجزء فى التربية اذا خفف المجتمع من قيودة على الزواج المهور والذهب والمؤخر وغيره اذا احترم الشاب الفتاه وتعلم كيف يحبها ويحترمها ويقبل تفكيرها ويقبلها كما هى انسان مكرم له سلبيات وايجابيات اذا توقف عن الشاب عن التفكير فى زوجة المستقبل على انها مصدر للشك والقلق ( ولازم ينقيها على الفرازة )اذا توقف الشاب عن اذا توقف الاهل عن التدخل وابداء الراى واذا تعلمت الفتاه ان تحب هذا الشاب بغض النظر عن اماكاناته المادية وتقبلة مهما طال بهم العمر ومهما تغيرت بهم الظروف اذا سمحنا لانفسنا لان نعود الى طبيعتنا كبشر لا يخجل من شعورة ورغباتة ولا يحبطها ولا يكبتها بل تكون فى اطار الاحترام والحب المتبادل برغبة كلا الطرفين بقبول المجتمع اعتقد ان هذا سيخفف من العنوسة للشباب والفتيات على السواء وسيحقق نوع من التوازن النفسى للجميع اذا تعلمنا الكفاح للخروج من يؤرة المدن المتكتظة اذا احترمتنا حكومتنا واانشاؤا لنا باموال الضرائب وقناة السويس وغيرها من الموارد انشاؤا بيوت ومساكن ومدن ليست مدبنة او لخلقت الوظائف وتوفر السكن الاستقرار النفسى اذا احترمنا رغباتنا اذا اعدنا النظر الى انفسنا اذا اعدنا تقييم ايدلوجياتنا اذا تعلمنا الكفاح وخرجنا من المدن المكتظة القبيحة الملوثة اذا توقفنا عن النظر للاخرين وانتقادهم اذا انشغل كل فرد بنفسة اذا عرف الاب ان دورة ينتهى مع ابنه او بنتة بمجرد بلوغه اذا فقط تركونا نستمتع بحياتنا ونغير ونتغير ربما وقتها لن تهان فتاه وهى تعرض نفسها بالحلال على شاب ( وهناك ايضا العروض الحرام وغير مشروط على الاطلاق ان تاتى من الباغيات بل قد تاتى من المحترمات المتزوجات والجميع يعرف ذلك ) وربما وقتها لن يشعر شاب بالغرور فقط قليل من التغير فى كل المجالات قد يحل مشاكل مستعصية وان كنت لا اتوقع هذا التغيير فى القريب اتوقع ان نظل هكذا نزنى فى الخفاء دون ان يرانا احد ونمثل الشرف نظهر عدم اهتمامنا بالجنس واحترامنا للدين والمجتمع وبمجرد خروجنا الى دولة اخرى او محافظة اخرى او مجتمع اخر او ظروف اخرى نصبح مسوخ لا فلسفة تحكمنا ولا قيم.

Anonymous said...

انا