Friday 27 March 2009

هو اللي كتب الاغنية دي يعرفني؟

هو اللحن مش لحن اصلا، لحن بتاع واحد بيهشك عيل، بس كلمات الاغنية غريبة قوي، بالنوسبة لي يعني، انا ما اعرفش ايهاب عبده ده، اعرف ايهاب عبده تاني بس مش هو اللي كاتب الاغنية، هو يعرفني؟ اصلي حسيت انه حاططني قدامه وبيكتبني يا اما يعرف حد من صحابي بقى وحكى له عني، طب ليه كده بقى؟ هي دي الصحوبية؟

9 comments:

mido said...

اخلاء سبيل المدون المدون ضياء عبدالسميع جاد أخيرا

Unknown said...

متشكرة يا ميدو وحمد الله على سلامته

mido said...

دى أغنية لزيزى

:)

هى اسمها واحدة تانية

ايه علاقتها بيك

mido said...

مش معنی اني اديتك قلبي تجي تسيبني لا متعشهاش
انا علمتك لما تحب تحب بجد ياامه بلاش
طب اسمع خذ اقولك مش حلو عشانك لا ودي ماتجيش
من امتی حبيبي انا ساكتالك وانا حالك مابيعجبنيش
بس من الليلة حتسمع مني كلام وحاجات مابترضيش
ممكن اعمل حاجة تانيه في لحظه تانيه تحس كاني واحده تاني
ممكن اقولها اوي لجنابك ايه اللي جابك اجمد قلبي ابيع في ثانية
ممكن الف وادور واجيب واودي وماانتش قدي
يا ياحبيبي
مدوخني وعايز تعندني عالفاضي وعالمليان
وبتنسی ان انا خذت بايدك وماسبتكش كتير حيران
روح بوس ايدك وش وظهر وبطل عند وشغل جنان
ماتعقل كذه حبة وماتشيلش في قلبك يابو قلب كبير
ليه بترجع دايما في كلامك وانا اجدع منك بکتير
شوف اي طريقه تغير بيها ومتخافشي سري في بير
ممكن اعمل حاجة تانيه في لحظه تانيه تحس كاني واحده تاني
ممكن اقولها اوي لجنابك ايه اللي جابك اجمد قلبي ابيع في ثانية
ممكن الف وادور واجيب واودي وماانتش قدي
يا ياحبيبي

Unknown said...

المقطع ده:
ممكن اعمل حاجة تانية في لحظة تانية تحس كأني واحدة تانية ممكن اقولها قوي لجنابك ايه اللي جابك اجمد قلبي ابيع في ثانية

انا كلمة: انا حاسس(ة) اني قدام واحدة تانية ما اعرفهاش

اتقالت لي بعدد شعر راسي (قبل ما اقطعه) لما باقلب على حد
ده حتى طليقي واحنا بنطلق قالها لي
هههههههههههه
اقربها النهاردة واحد صاحبي، زميلي في الشغل، بيقول لي: هو انت انهي عفريت اللي بيلبسك لما بتقلبي؟
:)

الظاهر اني غدارة وللا ايه؟
مش عارفة
الا كل واحد يقول لك: انا عيبي اني طيب زيادة عن اللزوم، انا عيبي اني مجامل زيادة عن اللزوم
ماحدش ابدا بيقول مثلا: انا عيبي اني غبي، انا عيبي اني منافق وابن وسخة

طيب انا اخد السبق بقى
انا عيبي اني غدارة ومفترية
هههههههه
بس والله مش بيبقى من غير اسباب

TAFATEFO said...

كل الناس بتقلب بأسباب .. ده ميبقاش عيب

بس في ناس بتفتعل أسباب من خيالها .. أو بتسئ فهم حاجات .. أو تترجم أفعال بمزاجها وتقلب عليها وتغضب وتثور

وحتى الغضب ليه حدود .. المفروض الواحد لما يغضب يعرف كويس ان رقيب وعتيد ممشيوش ولا حاجه ولسه قاعدين مكانهم .. ولازم يعرف انه بيغضب على ناس نتيجة لموقف واحد أو اتنين أو عشرة أو عشرين حتى .. كان في غيرهم كتير يمكن كويس .. وان لازم غضبه ميقطعش علاقته بحد

المكلة مش الغضب نفسه .. المشكلة ان في ناس بتستبيح لنفسها في غضبها كسر قواعد التعامل وآدابه .. وبتغلط كتير .. وممكن لأسباب تافهة أو لسوء فهم .. وللأسف مبقاش في حد في الزمان ده (غالباً على ما أعتقد) اللي هو يقدر ينسى الموضوع خالص ولحظة الغضب دي متأثرش على العلاقات بين الشخصين أو المجموعة

في ناس كتير أوي بتسقط من نظر الواحد لما يشوفهم غضبانبن

الرسول (ص) كان يغضب .. ولكا يغضب كان بيبان أثر ذلك في وجهه .. لكن في ناس كتير في غضبها بتتمادى وبتعتبر ده رجولة .. وعلشان كده الرسول (ص) قال : ليس القوي بالصرعة، ولكن القوي من يملك نفسه عند الغضب

وعلى فكره

مش كفايه أبداً أبداً يعني ان الواحد يقول أنا بغضب أو أنا بقلب .. عملت ايه علشان تسيطر على نفسك في اللحظات دي وما أكثرها في حياتنا .. العلاقات الإنسانية دلوقتي بقت نادرة أوي .. والأصحاب الكويسين بقوا نادرين جداً وبقى صعب انك تسيب نفسك تغضب وتخسر حد من الصعب تعويض علاقتك بيه

أنا بصراحه كنت كده .. لحد مش بعيد .. كنت غبي وعنيد (لسه غبي وعنيد) وسريع الغضب وصوتي بيعلى لما بغضب .. وحصل كلاش جامد علمني اني أسيطر على غضبي حتى لو تم استفزازي

الإستعاذة (بس بصوت واطي) والعد العكسي والتنفس العميق والوضوء طبعاً لو تيسر مفيد جداً في الموقف دي

TAFATEFO said...

هي مش أبله زيزي دي بتاعة ستار أكاديمي؟؟

بايخه جداً بصراحة

77Math. said...

وأنا عيبي إني شريرة جدًا ..!

:D

ممكن نعمل جمعية الأشرار والمفتريون المتحدة

:p

Anonymous said...

"كل الناس بتقلب بأسباب .. ده ميبقاش عيب

بس في ناس بتفتعل أسباب من خيالها .. أو بتسئ فهم حاجات .. أو تترجم أفعال بمزاجها وتقلب عليها وتغضب وتثور "تسلم ايديك يا مصطفى