Tuesday 10 March 2009

حتى سعيد عب خالق مش عايز يفكك اسرائيل؟


يا اخواتي اعمل ايه بس؟ معقولة اسرائيل لها كل الشعبية دي؟ لدرجة ان سعيد عب خالق رئيس جرنال الوفد الجديد شاف الحلقة التانية من العمود بتاعي اللي مكتوب عن تفكيك اسرائيل راح شاله
شاله وشالني بقى خالص مالص من الوفد
اه وربنا
مع اني ما كنتش باخد فلوس، ييجي واحد يقول لي: نوارة! سنتين بتكتبي ومش بتاخدي فلوس؟ اقول له: كتر خيري اني بارضى اخد من الشغل بتاعي الاصلي فلوس، انا اول ما اشتغلت قعدت تلات شهور ما اقبضش عشان ما يفتكرونيش مادية لحد ما مرتب التلات شهور اتحول امانات
انا بس شايلة هم الهيئة الوفدية الموقرة ومحافظ القاهرة ومحافظ الجيزة والفنانة عايدة عبد العزيز اللي كانوا كل شوية يكلموني عشان يعلقوا على العمود
:)
والله العظيم ح يوحشوني، بس الهيئة الوفدية بيتابعوا هنا مافيش مشكلة
انا بس اللي مجنني ومخلي عقلي يشت، انا عدا عليا رؤساء تحرير كتير قوي
اصل الوفد ده كل شوية يغير رئيس التحرير بتاعه، بس شفت اخضر كتير وقليل، الا الاخضر اللي فوق قبة عينيكي ده
معقول؟
الراجل يشوف عنوان المقال: "تفكيك اسرائيل ضرورة" يقوم يقول لرئيسة الصفحة شيلي ده ومش عايزها تاني؟
ما هو لو كنت باخد فلوس، كنت قلت عايز يوفر
لو كنت باكتب كلام يخالف الاتجاه العام في الوفد (الحقيقة انا مرة عملتها وشتمت في الاعيان وطبعا نسيت ان كلهم يا عيني بشوات وولاد بشوات كلموني وهم زعلانين وقالوا لي: هو كل البشوات والاعيان وحشين؟ ربنا يعلم الوالد كان بيعمل ايه مع اللي تحت ايده :) طب والله لما قال لي كده - بدون ذكر اسماء - دموعي نزلت، وزعلت من روحي)
لو كان مش عايز صفحة ثقافية عشان شايفها تضييع وقت كنا قلنا اهو راجل مش مركز في الثقافة
انما يشوف سلسلة تفكيك اسرائيل يتلدغ ويقول مش عايزها دي تاني؟
يا سبحان الله
دي حاجة مسلية قوي
اهو، بصوا والنبي، اهو ده المقال اللي لدغ سعيد عب خالق وشاله بعد ما اتسقط على الصفحة وقال عليا: ما اخدوش يا بابا ما اخدوش يابابا
(جاري التحميل

تفكيك إسرائيل ضرورة
بقلم: نوارة نجم
علاوة على الانحدار الأخلاقي والإنساني الذي يكرس له وجود الكيان لصهيوني من خلال تشريع ممارساته الممعنة في اللا أخلاقية، فإن خطر إسرائيل على البشرية يتجاوز ذلك إلى التلاعب بالعقائد مما يهز الإيمان الإنساني بالله. الدولة الصهيونية تقوم على أساس فكرة إنشاء وطن قومي لليهود، وتنبت الفكرة، فكرة الدولة اليهودية، من تفسير خاطئ لتفضيل الله سبحانه وتعالى لبني إسرائيل في مرحلة تاريخية معينة.
تؤمن الديانات الثلاثة – اليهودية والمسيحية والإسلام – بـ"شعب الله المختار"، كعقيدة مبنية على تفضيل الله للصالحين من البشر وإنصافه للمستضعفين في كل وقت وحين، وحدث أن كان في وقت ما، في تاريخ الإنسانية، أن اجتمعت الصفتان، الصلاح والاستضعاف، في بني إسرائيل، مما جعل الله يفضلهم في ذلك الوقت، هذا الإيمان الذي ينبثق منه اليقين بأن الله يمن على الذين استضعفوا في الأرض ويجعلهم أئمة ويجعلهم الوارثين ويمكن لهم ويري فرعون كل زمان ومكان وهاماناته جميعا وجنودهم منهم ما كانوا يحذرون، وعليه فينحاز المؤمنون دوما إلى المستضعفين والمظلومين والمغبونين في كل زمان ومكان، لأنهم دوما "شعب الله المختار" وهم ذاتهم ملح الأرض في المسيحية، وهم المساكين الذي سأل رسول الإسلام صلى الله عليه وسلم ربه أن يحشره معهم وأكد أنهم الشعث الغبر المدفوعين بالباب الذين لا يأبه لهم والمقسمين على الله ولا يجدون منه إلا البر سبحانه، يجاهرون بكلمة الحق عند السلطان الجائر، هو فرعون المثبور أيا كان زمانه ومكانه. هذا ما انطبعت عليه الديانات منذ فجرها وحتى ظهور الدولة اليهودية بفكرها الصهيوني، الذي حول هذه العقيدة السامية إلى فكرة عرقية عنصرية مقيتة بغيضة مفترية على الله، سبحانه وتعالى عما يصفون، بأنه يصطفي الناس على أسس عنصرية ظالمة، فيظل اليهودي السامي مختار مهما قتل من الأطفال والأبرياء، ويظل سواه من البشر أغيار، حيوانات غير عاقلة، مما يثير النعرة العرقية والعنصرية في بقية الأجناس التي تنجر إلى الدفاع عن نفسها من نفس المنظور، فتقع الإنسانية جمعاء في بركة آسنة من العفن العنصري الكفري، ويقول جل الأطراف على الله مالا يعلمون.
وقد ينشأ جيل غض، نما في أحضان هذا الجو المتحلل، فيظن أن هذا كل ما في الإيمانيات؛ فما هي إلا عقائد عنصرية متفاخرة، تتسبب في قتل الأبرياء وإشعال الحروب، فيخرجون من هذه الأديان غاضبين لاعنين ظانين أن العالم سيصبح أفضل بلا إيمان.
الإيمان ضرورة صحية، فقد أثبتت الأبحاث العلمية أن المؤمنين ينعمون بقدر أكبر من السواء النفسي والصفاء الذهني من أقرانهم الذين اختاروا "اللا إيمان". لذلك، فإن وجود إسرائيل يضع البشرية في مأزق صحي ونفسي كبير، إذ أن القبول بوجود "الدولة اليهودية الصهيونية" الناشئة على تفضيل الله لشعبه المختار وفقا لعرقه، مجرد القبول بهذه الفكرة إما يدفعك دفعا إلى القبول بفكرة أن الله عنصري ظالم، وحاشاه وسبحانه، أو أن ترفض الإيمان بالله لنفس الأسباب السالف ذكرها.
ولا يفوت الكيان الصهيوني أن يلعب على مشاعر الذنب للأوروبيين الذين لا يأبهون كثيرا للإيمان والأديان، مما يشكل ضغطا نفسيا وعصبيا حتى على غير المؤمنين، فيحيك خيوطه حول النفس الإنسانية لا يدع لها فكاكا.
إذن فالكيان الصهيوني لا يشكل خطرا على القيم الحق والخير والجمال كما أسلفنا وحسب، وإنما يدمر أيضا الصحة النفسية والعصبية للإنسان، أي إنسان، وفي المرة المقبلة سنتحدث عن الخطر النفسي والعصبي الذي يشكله قيام الكيان الصهيون على الإنسان اليهودي.
http://www.petitiononline.com/ttwpdi/petition.html
http://justicenownetwork.blogspot.com/

49 comments:

أحمد عبد الفتاح said...

يا ستي وانتبي زلعلانة ليه ؟
دول الي بيقروا المدونة عندك 10 اضعاف الي بيقروا الوفد
هما الي خسارنين

Anonymous said...

إذا لم تستح فاصنع ما شئت
انا مشتغلتش صحفي قبل كدة
بس طب هو ده الطبيعي من رئيس تحرير
أوامر على طول كدة ومفيش حد يناقشه؟

Unknown said...

لا والله
انا مش زعلانة على زاوية الوفد خالص
اولا ما بيطلعليش منها فلوس يعني
ثانيا زي ما احمد بيقول اللي على المدونة اضعاف اللي بيشتروا الوفد

انا بس مستغربة من السبب
يعني مثلا لو كتبت ضد الاعيان وقرر يشيلني
لو كتبت ضد الشرطة والداخلية قالت له كفاية

زي ما عملوا مع انور الهواري ايام اسلام نبيه ووالله ما رضيش يشيلني بس قال لي يا نوارة حرام عليكي هريتيهم وهم هروني

انما اكتب ضد اسرائيل يقوم يتغاظ مني ويشيلني؟

حد يفهمها لي دي

ابو حمزة
لا مافيش رئيس تحرير حد بيناقشه

Empress appy said...

عموما يغور فى داهيه هو مش عاوزها تفكك اللهى تفكك صواميل عقله
يمكن من اللى مقتنعين ان اسرائيل صواميلها هتفك لوحدها
الله يحرقه على الصبح زى ما جاب لنا الكلام هههههههه
خلاص متزعليش انا هفتح جرنان وتشتغلى معايا وتقولى ليه اقول ايه ومقولش ايه ههههههههههه

حـنــّا السكران said...

الاستاذ سعيد و ( الوفد ) المرافق له

مش عايزين يفككوا اسرائيل ؟

طيب كان يتبرّأ منك و يكتب في أسفل الصفحة انه ( كل المقالات المنشورة في هذه الصفحة تعبر عن اّراء أصحابها فقط و لا تعبّر عن رأي سعيد أو رأي الوفد المرافق للتاريخ المصري كضيف شرف )

و انت ما عجبك تفككي اسرائيل غير جنب سعيد ؟

أغرب شيء في الدنيا ..هو الأحزاب السياسية العربية ..كلها دون استثناء ..مجموعات من الجبناء و المنافقين ..كلهم عايزين السلطة و كلهم مش عايزين يعملوا أي حاجة ..و لا شيء على الاطلاق ..غير الخطابات الفارغة و الكذب .. و كلهم عايزين امريكا و اسرائيل يقدمولهم السلطة على طبق من ذهب .حتى خطابات النضال الفارغة اللي كانوا بيضحكوا فيها على الشعب ..خلاص ..صاروا أجبن من انهم يقولوها ..ماشيين الحيط الحيط و بيقولوا يا رب الستر .. انا لا اتكلم عن احزاب المقاومة طبعا .المقاومة بالفعل .. مش بالكذب و الخناقات بينهم و بين بعضهم على كرسي الحزب .. و الغريب انه في منهم مش طمعانين بالحكم بقى نهائي.. لا .. أقصى أمانيهم رئاسة الحزب .

بس لو قريتِ دساتير هذه الاحزاب جميعا ..دون استثناء أيضا .. اووووووه تكاد تقترب لأن تكون كالكتب السماوية المنزلة .

سيبك من سعيد .. المهم يكون سعيد ..سعيد .

و المقال اللي عم تكتبيه ببلاش هناك .. اكتبيه هنا ..هنا مافي حدا سعيد .. كلنا حزانى ..و كلنا عايزين نفكك أي حاجة تطلع بوجهنا .لأنه بصراحة ما بقى في شي عاجبنا في البلاد الغريبة دي من المحيط للخليج .

حـنــّا السكران said...

ههههه

عجبتني كلمة الاخ ابو حمزة

( أنا مشتغلتش صحفي قبل كده )

Unknown said...

ماما بتقول لي "ان اجتمعت الصفتان" وانا كنت كاتباها الصفتان وبعدين رجعت عملتها الصفتين

هي الصفتين وللا الصفتان؟

TAFATEFO said...

الصفتان فاعل مرفوع وعلامة رفعه الألف لأنه مثنى

TAFATEFO said...

بس على فكره في حاجات كتير أوي في المقال ده غريبه

موضوع الربط بين شعب الله المختار والمساكين معرفش دي جت منين

كمان اليهود كلهم يؤمنوا بأنهم شعب الله المختار اعتمادااً على نصوص محرفة في التوراة .. والمسلمين بس اللي بيؤمنوا ان اليهود كانوا شعب الله المختار في فترة زمنية محددة أما المسيحيين فيؤمنون أن المسيح جاء مخلصاً لكل الشعوب

Unknown said...

شكرا يا مصطفى

Unknown said...

هو ممكن يا شباب الجملة الاخيرة خوفته حيث اني باستحلف اني اكمل ضرر الكيان الصهيوني على الانسان اليهودي

قال لك بقى دي ح تاكل دماغنا

انا والله مش عارفة ايه اللي زعله في المقال ده؟

Unknown said...

المسلمين والمسيحيين مؤمنين انهم كانوا شعب الله المختار في فترة محددة من الزمن وده واضح في المقال
المرجعية للربط بين المستضعفين في الارض يا مصطفى واضح من الاستشهاد بالاية القرآنية: ونريد أن نمن على الذين استضعفوا في الارض ونجعلهم أئمة ونجعلهم الوارثين ونمكن لهم ونري فرعون وهامان وجنودهما منهم ما كانوا يحذرون

والتفسير ده مش مألفاه من دماغي ده موجود عند سيد قطب وابن كثير

TAFATEFO said...

وبعدين بصراحه برضه ضحكتني خطر دولة إسرائيل (الكيان الصهيوني) على الصحة النفسية للإنسان اليهودي

يعني -طبعاً مع اتفاقي مع كل كلمه حضرتك كتبتيها وهتكتبيها في موضوع قيام دولة إسرائيل على أساس عنصري وممارساتها اللاأخلاقية واللاإنسانية إلخ- لكن الخروج من التاريخ والنشأة وكل الممارسات الوحشية عبر تاريخها لخطر الكيان الصهيوني على الصحة النفسية للإنسان اليهودي بعيده عن مناسبة ذكرها أكتر من 60 سنه

Unknown said...

الانسان لما يتعزل مكانيا ولغويا ونفسيا وتصنع منه قاتل مرعوب ده فيه تحطيم لنفسية الانسان ده

وللا انت فاكر اليهود دول مش بني ادمين يعني؟ يعني لما عيل عنده 19 سنة ينشن على دماغ رضيع من مسافة اقل من نص متر ده مش تحطيم لنفسيته؟

مش ده بني ادم؟
انت تقدر تعملها؟
ولو اجبرت على انك تعملها ح تعرف تعيش بعد كده عادي؟

TAFATEFO said...

الآية عن اليهود .. أنا أقصد فكرة ان شعب الله المتار هم المستضعفين والمساكين أي أن المساكين هم شعب الله المختار والاستشهاد بحديث الرسول (ص) .. ولا أنا فاهم غلط؟

وعليه فينحاز المؤمنون دوما إلى المستضعفين والمظلومين والمغبونين في كل زمان ومكان، لأنهم دوما "شعب الله المختار" وهم ذاتهم ملح الأرض في المسيحية، وهم المساكين الذي سأل رسول الإسلام صلى الله عليه وسلم ربه أن يحشره معهم

mido said...

سعيد عبد الخالق كان رئيس تحرير مجلة الشرطة

كتب خالد السرجانى فى الدستور الاسبوعى :

ناسبنا الحكومة!!

لعل أفضل عنوان لتعيين حزب الوفد الزميل سعيد عبدالخالق - رئيس التحرير السابق لجريدة الحزب - ورئيس تحرير مجلة الشرطة رئيساً لتحرير الوفد مرة أخري هو ناسبنا الحكومة، فما لا يمكن أن يفهمه أحد هو كيف يمارس رئيس تحرير صحيفة معارضة دوره وهو كان يعمل من قبل رئيساً لتحرير مجلة تصدر عن جهاز قمعي وتدافع عنه؟! وبالطبع فإن الرد الذي سيطرح في مواجهة هذا التساؤل هو أن الزميل سعيد عبدالخالق ترأس تحرير مجلة «الشرطة» لأسباب مهنية، وهذا الأمر يتناقض مع رئاسة تحرير جريدة الوفد لأنه حزب سياسي، والانتماء السياسي لرئيس التحرير لابد أن يلعب دوراً وإلا كانت الموضوعات التي ينشرها في الوفد ليست بها الحرارة اللازمة وإنما هي موضوعات للاستهلاك فقط من دون إيمان بما تتضمنه من أفكار، وهو ما يؤثر في النهاية علي مصداقية كل من الجريدة والحزب الذي تصدر عنه. عموماً مبروك للوفد نسبه للحكومة!!

Unknown said...

الاية عن اليهود في الواقعة دي ومقصود بيها بشكل عام ان ربنا دايما يمن على الذين استضعفوا في الارض وحديث الرسول اللهم احيني مسكينا وامتني مسكينا واحشرني في زمرة المساكين الرسول بيشرحه لما السيدة عائشة قالت له: لم يا رسول الله
فقالت عائشة : لم يا رسول الله ؟ قال : إنهم يدخلون الجنة قبل أغنيائهم بأربعين خريفا ، يا عائشة لا تردي مسكينا ولو بشق تمرة . يا عائشة حبي المساكين وقربيهم ، فإن الله يقربك يوم القيامة


وبصرف النظر عن كراهيتك المعهودة للمساكين :) بس انا قايلة اجتماع الصلاح والاستضعاف في اي قوم بيستوجب ان ربنا بيبعت لهم اللي يخلصهم وبيمكن لهم
وانا مش عارفة ايه وجه اعتراضك بالظبط، يعني حط ايدك على النقطة بالظبط غير تأييرك من المساكين عشان اعرف ارد بس

Unknown said...

ميدو

اييييييييييييييييييييييييييييييييي

مجلة الشرطة؟
!!!!!!!!!!!!!!!!!!!!!!!!!!!!

هررررررررررررررررررررر

طب كويس انه شالني بس

ده كان مفروض يعمل لي كمين في الجرنال

TAFATEFO said...

:D:D

-----------------

TAFATEFO said...

اعتراضي كان (كان - كان) على الربط بين شعب الله المختار والمساكين أو المستضعفين بعد المسيحية والإسلام .. وطبعاً نتيجة لثأري البايت المعتاد مع المساكين هتلم وأسكت

حسبي الله ونعم الوكيل :@:@:@

TAFATEFO said...

بعيداً عن الموضوع .. اقري ده علشان هيعجبك

http://www.moheet.com/show_files.aspx?fid=230752

صباح الصباح said...

يا نوارة وفد اية وبتاع اية

انتى لية مش بتكتبى فى الدستور.. دة جرنان محترم جدا وفى نفس الوقت فية مساحة كبيرة لحرية الراى المعارض

Unknown said...

انا لازم اتأكد من مصدر الخبر ده واسمع اوباما بنفسي وهو بيقول كده

ولما ابن الكلب الناس بتقاوم عايز يزود القوات؟

وبعدين احنا ح نسيب طالبان تتفلق كده؟

طالبان حركة مقاومة بتدافع عن بلدها

ليه الناس كلها مستحلية دمها؟ عشان بتغطي وش الستات؟

وللا عشان مانعة الافلام الهندي؟

مش فاهمة يعني

انا عايزة سبب واحد يبرر احتلال افغانستان

الناس قالوا لهم ادونا بن لادن

قالوا لهم طيب

طيب

بس ادونا دليل على انه هو اللي عمل حداشر سبتمبر

اي دولة في الدنيا لها سيادة ح تقول الكلام ده

ومافيش في الدنيا دولة يتبرر غزوها عشان عندها لاجئ سياسي حتى لو عمل عملية ضد دولة تانية

اشمعنى هايتي ما غزتش امريكا اللي موفرة ملجأ للارهابيين اللي قتلوا خمستلاف مواطن في هايتي؟

اشمعنى ايران ما غزتش انجلترا اللي موفرة ملجأ للارهابيين بتوع مجاهدي خلق اللي قتلوا 72 واحد من اعضاء الحكومة المنتخبة والبرلمان الايراني؟

ونقول كده يضحكوا علينا

انا عايزة افهم
احنا ساكتين عن طالبان ومش بنساندهم ليه؟

سامح العروسي said...

إن الرب في عقيدة اليهود غير هذا الرب العادل الذي عرفتاه بفطرتنا واهتدينا إليه بعقولنا ، ذلك الرب الذي عرفناه من كتبه الصحيحة المنزلة فهو غير هذا الإله تماما فهو ليس رب العالمين بل رب اليهود وحدهم و ليس الإله العادل بين الناس علي حد سواء بل هو ميز اسرائيل علي بقية العالمين وجعل من اليهود شعبه المختار وان صنع العجل وعبد الطاغوت واسل الدماء وبقر البطون .
ان هذه العقيدة الشريرة هي التي صنعت اليهود فجعلت منهم هذه الامة العجيبة في سلوكها ن الغريبة في تصرفاتها و التي لم تستطع ان تمتزج بامة من الامم ، ولا بشعب من الشعوب ولم تستطع ،ان تستقر علي بقعة من الارض بل لفظتهم الشعوب وداستهم بأرجلها ومزقتهم شر ممزق من أقدم العصور إلي يومنا هذا ، انهم فقدوا معني الضمير الانساني ولا يتبعون التوراة في قليل ولا كثير ولا يؤمنون بشريعة موسي التي هي ضياء وذكري للمتقين .

احمد سعيد said...

اولا مين اللى قال ان مقالك دة مش مخالف للاتجاة العام دلوقتى؟؟؟؟؟
طبعا مخالف وستين مخالف
انتى بتعيبى عالبهوات
حبايب باباعوكل وولدة نوفل
اسف بابا كركدن لانى لقيت ان الاسم دة احسن


وبعدين وفد ايه ونيله ايه
الحزب دة كان المفروض ينحل من سنه 42
لانه مالوش اى لازمه فى البلد بعد كدة
دا المنديل الكلينكس له لازمه عنه
على الاقل بننف فيه

طب عايز حد كدة يقولى ايه لازمه حزب الوفد فى مصر
طبعا مش هتكلم عن باقى الاحزاب لان الحال من بعضه
خلينا فى الحزق دة
دا حنى يمكن الحزق الوثنى له لازمه عنه
على الاقل بيسرقنا وبيخربلنا البلد
ويطلع افلاسنا

انما الوفد

الوفد

طيب سؤال للجماهير
اذكر عشر استخدامات لحزب الوفد
واربح لبشه قصب هديه

TAFATEFO said...

@ أحمد سعيد

نظقت كفراً

يعني انت شايف ان المفروض حزب الوفد يتحل مش يفعل هو وكافة الأحزاب .. الله لا يرحم اللي كان السبب واللي قضى على الديموقراطية والحياة الحزبية في مصر .. الله لا يرحم الي قضى على كل من نادى بالديموقراطية وزور التاريخ

Unknown said...

حل الاحزاب والنظام الشمولي مش بدعة ابتدعها عبد الناصر

وانا عايزة اقول لك حاجة
عبد الناصر كان عامل مشروع تنمية مهم جدا

وكان ممكن لولا هزيمة سبعة وستين نبقى اليابان

واليابان كمان في اول اربعين سنة كانت عاملة نظام شمولي
وعلى فكرة بقى
وانجلترا كمان
واي دولة في الطور الاول من التنمية بتبقى قافلة على نفسها والدولة بتبقى عاملة نظام حماية لحد ما تتفوق في صناعة معينة وتقف على رجليها وبعد كده تفتح السوق وبيصاحب ده فتح المجال للاحزاب واللي انت بتقول عليه ديمقراطية

بصرف النظر عن تحفظاتي على عبد الناصر وطريقة تطبيقه للنظام الشمولي
بس انا معترضة جدا على انك تدعي عليه بعدم الرحمة
خصوصا يعني انك بتتعاطف مع اي حد معدي انشالله يبقى خاين وللا كلب اعور حزين

اشمعنى عبد الناصر اللي وقع من قعر قفتك

واحمد ما طلبش حل حزب الوفد انحيازا للنظام الشمولي

هو بيقول انها احزاب مالهاش لازمة ومش فعالة

ده اللي كان يقصده
مافيش كفر في اللي قاله يعني
ديمقراطية ايه بقى؟
هو احنا عندنا ديمقراطية
والله انت غلبان قوي

TAFATEFO said...

هو أنا جبت سيرة عبدالناصر؟؟ وأي نظام في رأيي مش شخص .. نظام كامل

وبعدين بتاع ايه ان النظام الشمولي من دعائم التنمية .. تنمية ايه دي ان شاء الله اللي حضرتك بتتكلمي عنها واللي وقفتها هزيمة 67 .. هو ايه وصلنا لهزيمة 67 غير الكذب والانهيار الكامل .. الإنهيار الإنساني قبل أي حاجه تانيه

وبرضه .. هو احنا عندنا ديموقراطيه؟؟ لا طبعاً .. بس كان عندنا .. والمفروض مش بعد ما اتلغت الأحزاب وأعيد تكوينها .. لكنها تعرضت للتخريب والإضعاف المتعمد لخدمة الأنظمة وأصحاب الكراسي .. ومش بعد ما ظهرت حالياً حركات معارضة وجماعات وبعض التحركات الحزبية المحدودة نقول يلغوا الأحزاب .. ده مش منطقي أبداً

نيجي لـ عبدالناصر .. عبدالناصر كان عنده مشروع تنمية مهم جداً .. تحقق منه ايه بالظبط؟؟ واللي عنده مشروع تنمية يبقى بيهدم الإنسان اللي هو المحرك الرئيسي للتنمية؟؟ واللي عنده مشروع تنمية ينقلب على الشرعية ويعزل الرئيس ويهينه؟؟ وينقلب على القضاء ويهينه وينال من حريته؟؟ واللي عنده مشروع تنمية يبقى كذاب؟؟ واللي عنده مشروع تنمية يخرب الاقتصاد؟؟ واللي عنده مشروع تنمية يهيئ المناخ المثالي للفساد؟؟

تنمية ايه بس دي ان شاء الله

غنوا معي .. ناصر يا حرية .. بس نفسي أفم كانوا بيغنوا لأنهي حرية .. وكانوا بيغنوا بمزاجهم ولا غصب عنهم

ناصر يا حرية

وعلى فكره .. ربنا يرحم الجميع .. أنا مقصدتش عبدالناصر الشخص لما قلت الله لا يرحم .. وكنت هقول يلعن لكن لقيتها حرام

TAFATEFO said...

الديموقراطيه .. مصر كان فيها ديموقراطية .. كان فيها أحزاب بتتحدى الملك .. وكان فيها حياة حزبية وحراك سياسي .. وكانت الأجزاب فيها بتحقق مكاسب يوم بعد آخر .. وكنا دوله مستعمره تسعى لنيل إستقلالها .. ودولة ملكية سمارس فيها الملك سلطات تتنافى مع مصلحة الشعب .. لكن كنا دولة دستورية

في الوقت اللي قامت ثورة احتضنها الشعب ولم تكن لتنجح بدونه .. في الوقت اللي كانت مصر مهيأة لمواصلة الديموقراطية بعد التخلص من أكبر أعباءها (الملك والإنجليز) انقلبت الثورة على الشعب والديموقراطية .. ومش محتاجه الحكاية تعديد لمظاهر الإنقلاب ده ولا نتائجه .. لكن لو قلنا الكرف دلوقتي في الطالع ولا النازل .. هتلاقيه في الطالع رغماً عن نظام قمعي مستبد غير دستوري ولا شرعي يحاول سحق المعارضة والقضاء على أي محاولة لنمو المعارضة

حزب الوفد حتى وان تملكته السلطه وسيطر عليه عملاء النظام .. سيظل كيان (هو وبقية الأحزاب) لا أمل في قيام دولة ديموقراطية أو تنمية بدونه .. واللي شايف غير كده ولسه مقتنع بالمستبد العادل .. يبقى هو اللي محتاج نظاره وغلبان

Unknown said...

طب ما تقرا تاريخ بريطانيا العظمى وفرنسا والنمسا والنرويج بدل ما تدخل بدراعك كده
بلاش اليابان والصين يعني
اقرا تاريخ الثورة الصناعية والرنيسانس الاول
لسيه باسيه لسيه فير ما ابتدتش غير لما عملوا نهضة الاول
مش النهضة ابتدت بالسوق المفتوح
السوق المفتوح كان نتيجة النهضة وتراكم الثورة

ومصر ما كانش فيها ديمقراطية
مصر كان فيها احتلال

Unknown said...

وبالمناسبة الديمقراطية اللي بتتكلم عنها دي كانت ديمقراطية اعيان
وما كانش فيه تمثيل حقيقي للشعب وما كانش فيه حق انتخاب ولا حق ترشح غير لناس معينة

قال ديمقراطية قال

TAFATEFO said...

على رأي هاني نظيم برضه .. شئ غريب فعلاً

كان فيه احتلال .. وحركات نضال وطنية وأحزاب انتزعت الاعتراف بسيادة مصر واستقلالها .. وانتزعت من الملك سلطات تخول لها الحكم الديموقراطي اللي بيرعى مصالح الناس لأن الناس هي اللي انتخبته .. وحضرتك طبعاً عارفه بدأ ازاي وشق طريقه ازاي (علشان متقوليليش مش ممثل الكل ومش أي حد يترشح .. ده حقيقي لكن كانت ساحة الديموقراطية بتوسع .. وكان كل المواطنين بتنتخب بدون تزوير إرادة شعوب وبدون 99.99 .. وكان فيه برلمان مش مجلس انتقائي بينقلب على بعضه ممثل بصغار لم يعتركوا السياسه إلا قليلاً وليس لهم أي خبرات تؤهلهم لا لقيادة مشروع تنمية ولا لقيادة جيش ولا بلد أصلاً .. وتجت عن خراب عام وشامل في كل نواحي الحياة

بعد 90 سنه على ثورة 19 تعرفي ازاي شعب (مش كبير ونسبة الجهل فيه عاليه) استطاع مناصرة بعض أبناؤه وقاد ثورات شعبيه ونضال ضد الاحتلال واستطاع الحصول على اعتراف بسيادة دولته من بريطانيا العظمى .. وازاي شعب محتل من أبناؤه لا يستطيع أحد إلا بالكاد أن يرفع رأسه في وجه النظام المصري المحتل لمصر .. وإن رفعها فهو غير سالم

قال ديموقراطية قال

ودي المفروض يترد عليها .. ولا حضرتك مقتنعه بيها؟؟

آه قال ديموقراطية .. أفضل 100 ألف مره من الديموقراطية والتنمية اللي نعمنا بيها في كل عصور الساده الأفاضل الذين تلوها .. الساده الأفاضل اللي بقيادة جمال عبدالناصر وتابعه السادات وتابعه مبارك انقلبوا عليها ومشمموهاش للمصريين .. القال ديموقراطية قال اللي مش عاجبه حضرتك .. البلد متعرفش تشم دلوقتي 1% منها

ديموقراطية الأعيان اللي حضرتك بتسخري منها .. والمجلس النيابي للأعيان كان أفضل ميت ألف مره من مجلس الفلاحين والعمال اللي بيشتريهم النظام وبيناموا ويتتاوبوا في الجلسات ويرفعوا ايدهم لما يبصلهم الشالي ومن بعده عز

مجلس نيابي فيه أصحاب مواقف ورؤى وفكر .. أفضل ميت مره من مجلس يخدم صاحب الكرسي ولا يملك سحب الثقة من حكومة أو من وزير

مجلس أعيان يختاره الشعب .. أفضل 100 ألف مره من مجلس شعب يختاره الحاكم

TAFATEFO said...

ألا هو كان مجلس أعيان مش عاجب حضرتك؟؟

Unknown said...

شعب ايه؟
اذا كان باقول لك حق التصويت كان مقصور لناس معينة بس
انت ح تدخل في دورة دوخيني يا لمونة وانا دماغي مش رايقة
طب اقرا تاريخ المجلس النيابي وكلامهم عن "الفلاحين والعمال الصعاليك" اللي مش من حقهم لا يترشحوا ولا ينتخبوا
فيه في الدنيا ديمقراطية تحت الاحتلال؟

ايه الكلام ده؟
ده عامل كده زي ما واحدة تقول انا ح ارقص بشرفي

Unknown said...

لا طبعا مش عاجب حضرتي

انت قريت محاضر الجلسات بتاعتهم

دول كانوا ولاد وسخة

Unknown said...

هو احنا اللي ح نقوله نعيده يا مواطن؟

احنا مش قلنا مدونة الهولوكوست دي مشروع له هدف محدد

والتعبير عن اختلاف الاراء ده يبقى على المدونات الشخصية؟

يعني انا ومهندس بنختلف في حاجات معينة

شفتنا عبرنا عن اختلاف وجهات النظر دي على مدونة الهولوكوست؟

انا باعبر هنا عن رأيي
وهو على مدونته بيعبر عن رأيه

لكن مدونة الهولوكوست دي هدفها تجميع الناس لهدف محدد

مش ان كل واحد يقول اللي على مزاجه

دي مدونة لها هدف محدد وواضح
واي مشارك فيها ما يحطش عليها غير اللي بيخدم الهدف ده وبس

وانت عندك مدونة

عبر عن اختلاف الرأي زي ما انت عايز

يعني الكلام عن ان طلبان زي اسرائيل ده

انت حر فيه اكتبه على مدونتك

لكن حاجة زي دي ما تتحطش على مدونة الهلولوكست

ياريت تفهم بقى وما توجعش قلبي

مواطن مصري said...

صدقت يا اخ طفاطيفو فينك يا رجل

Anonymous said...

طب وربنا وكمان وربنا انتى غلطانه بقى بقالك 3 سنين ومبتاخديش فلوس واخرتها لا مش هنعلب؟
امال لو الواشنطن بوست كانوا عملوا ايه؟ خدوا كليتك؟
سيبك منهم ومن شغل الباشوات والاغاوات بتاع زمان اللى بطل دلوقت ده وركزى فى موضوع الوثيقه وهيا هتفك ان شاء الله
اسرائيل يعنى
ولو صبر القاتل على المقتول.....
ولكل جرنال مقال
وصحصحى شوية
وعشان انا باحب الكلام الكبير
تعريف البلاغه: مطابقة الكلام لمقتضى الحال
وكل سنه واحنا زبادى

Unknown said...

ههههههههههههههه
مين ده؟
ده موتني من الضحك

Anonymous said...

اى خدمه سعادتك

Anonymous said...

وبعدين هاقولك حاجة فكرى ان بكره مافيش فيه وفد ولا وجع دماغ اعمل جريده حائط فى ميدان التحرير
وكله برزقه
وتشوفيلك جه تشترى منك 5000 نسخه كل يوم زى عم ابراهيم عيسى كده
او بلاش دى
فضيحتين من هنا على جرستين بضم الجيم من هناك وتبقى بعد عشر سنين زى عم عادل حموكشه وتطلعلى مع الريس الجديد امريكا كل سنه
او بلاش اشتغلى مع عبدالحليم قنديل بس اوعى تمشى لوحدك بعدها لان الناس اللى مستنصدينه بيقلعوا وعلى الصحرا حدف
ولو ضاقت
روحى الامارات شوفى امير فللى كده وخليه فارس العرب الاول والشاعر الاول برضه وهترجعى من هناك اخر حلاوة
ولا اقولك بلاش كل الهجص ده شوفى واسطه وامسكى الاهرام وبعد اول تلاتنين مليار اخلعى وقولى عند القلب وهما هيفهموا
بالمناسبه نسيت ال بكرى وال القذافى وال اقعدى بالعافيه بقى ليكونوا مرافبنى وانا جسمى بيوجعنى من اخر علقه

Anonymous said...

هوا انا بعت تعليق بعد اى خدمه سعادتك
ياترى سيرفر جوجل القذر تواطئ عليا وكله ولا حد حذفه
ولا اييييه!!!!!!!!!!!

Anonymous said...

يعنى يبقى رئيسك سعيد عبد الخالق بتاع يا محنى ديل العصفورة ومجلة الشرطة ... يعنى مخبر صحفى يتلقط اخبار مجهلة لأشخاص مجهولين ليصنع منها مادة خام للنميمة تشغل الناس ب(س .ع) قابل (ح.م)وسمعت العصفورة حديثهما.............دة يبقى رئيسك ... وشرطة كمان امال عاملة علينا فتواية وقيضاى ومطهدانا كدة لية؟؟؟ سعيد عبد الخالق ياربى؟؟؟ كنت عاوز اقول ان دة مش مستواكى -خفت تزعلى فعدلتها الى :رغم ان كتابتك وحشة قوى جدا الا ان دة مش مستواكى.حتى تصبح العبارة متوازنة

Anonymous said...

تسلم ايدك ويسلم عقلك ويسلم قلبك يا نواره والله انت خساره فيهم ولو اقدر كنت أترجمهه وأنزلهالك ف التايمز

طارق عبد الفتاح

Unknown said...

استاذ طارق عبد الفتاح

انا كفاية عندي انك تنور المدونة بس

ربنا يجبر خاطرك يارب

Anonymous said...

معلش، بعيداً عن الموضوع شوية، بس لقيتلك إعلان في
Google Ads
ظاهر ب Jaiku
حرق دمي، الإعلان ل:
http://www.yadvashem.org/arabic.htm
الموقع بيدعم لغات كتير من ضمنها العربي، حتى المستخدمين العرب مستهدفين زي الغير عرب بالظبط..
طريقة العرض احترافية جداً وممتازة..تقسيم الموقع بسيط ومريح للأعصاب وبيشجع الزائر انه يقلب الموقع كله!
كنت اقترحت قبل كدة في بوست قديم عندك، ان نستغل
Google Adwords
في ان احنا نظهر إعلانات لمنظمة Neturei Karta
او أي مواقع بتخدم القضية مثلاً زي justicenownetwork..

وبعدين ليه منعملش موقع زي ده؟
ال blog
فعال وكل حاجة، لكن فيه محتوى مهم بيضيع او ملاحظته مش بسهولة لانه بيعتمد على نظام عرض بوستات مش اكتر..

وعامة أنا عندي خبرة في ال web developing
..ومستعد أساعد لو قررتو تبدؤوا في مشروع زي ده..

Unknown said...

بالمناسبة

احب بس اقول للانونيمس بتاع يا محني ديل العصفورة اللي عامل زي حسني مبارك لما كل شوية كان يقف على جهاز كشف الشخصيات ويقول طب انا مين
يقول له انت الرئيس حسني مبارك ومتوجه الى القاهرة في طيارة الساعة ستة
يروح يلبس صعيدي ويرجع
طب اني مين
انت الرئيس حسني مبارك ومتوجه الى القاهرة في طيارة الساعة ستة

يروح يلبس خليجي ويرجع

منو أنا

انت الرئيس حسني مبارك ومتوجه الى القاهرة في طيارة الساعة ستة

لحد ما لبس واحدة ست

طب انا مين

راح الجهاز قال له ياللا يا ...... فاتتك طيارة الساعة ستة


يا اخ


انت جبت منين اني باشتغل في اون تي في؟

انت مش ح تبطل تأليف وكدب بقى؟

يا ريت تروح تتنفس الكدب بتاعك بعيد عني يا عم الكتكوت

كفاية انك كل ما تشوف حد تقول له نوارة بتشتمك

لما بقيت مسخة خلقه

Anonymous said...

الاستاذة نوارة اختلط عليها الردود وقالت ان اللى اتكلم عن العصفورة اللى محنية ديلها قال ايضا انها بتشتغل فى اون تى فى وهذا لم يحدث والكتابة قدامنا اهة. التعليق كان مداعبة لنوارة واستصغارا لشأن رئيس تحريرها وليس لها. زحمة الموضوعات عصبتها وخلتها تفقد روح الدعابة وخلتها عدوانية -قليلا-بدون سبب موضوعى توقيع :حسنى مبارك بتاع جهاز كشف الكذب

Anonymous said...

والنبى يا نواره عندى كام سؤال كده.أنا عندى دلوقتى 49 سنه قريت فيهم على قد الوقت ماسمح بس نفسى اعرف هو مين سعيد عبد الخالق ده ومين ممتاز القط ومين مرسى عطاالله ولا أنا يمكن كنت ف غيبوبه 10-15 سنه وما أدركتش الناس دول او انى مش مسكف كفايه...هم عاوزين مننا ايه

طارق عبد الفتاح