ربنا يكرمه ويسعده دنيا وآخرة بحق الايام المفترجة دي قادر يا كريم

شاب...كنت ماشية على الاتوستراد ناحية مدينة نصر، مش خبطت له العربية...عجنت له العربية عجن، لدرجة ان عربيته وقفت وما طلبش مني انزل، انا نزلت ورحت قلت له: انا غلطانة..انا غلطانة مية في المية..انا بس مش بافهم في الميكانيكا فياريت تقول لي التكاليف كام وح ادفع تعويض كمان
طبعا الواد كان واقف قدام المرحومة مزبهل من اللي جرا لها، وعربية غالية بقى مش قسطها ربعميت جنيه زي عربيتي وبعدين قال وكأنه بيكلم نفسه: مش على الفلوس..على الوقفة والعطلة بس
قلت له: انا الميكانيكي بتاعي كويس قوي، انا ح اطلبه دلوقت واخليه ييجي ياخدها ويصلحها لك على حسابي بص لي: لا خلاص يا انسة اتفضلي حضرتك
طبعا لما قال لي يا انسة صممت اني ح ادفع الفلوس يعني ح ادفع الفلوس قلت له: والله العظيم..
قاطعني: والله العظيم تلاتة ما واخد منك ولا مليم مش ح اخد فلوس من واحدة ست والميكانيكي بتاعي احسن من الميكانيكي بتاعك لو تحبي اديكي نمرته...ياللا يا انسة اتفضلي حضرتك ربنا يسلم طريقك
تمت
ربنا يسلم طريقه هو ويكرمه ويسعده دنيا واخرة بحق الليالي المفترجة دي هو وامه وابوه ومدرسين مدرسته ودكاتره جامعته اللي ربوه التربية دي
لا قطع عليا الطريق، ولا حتى طلب مني اقف، ولا خبط لي على الازاز، ولا ضرب التكاليف في عشرة، ولا اتصل بظابط صاحبه، ولا جري ورايا عشان يجيبني ويخلي صاحبه يلفق لي تهمة ولا صورني ولا شهر بيا ولا نزل صورتي على المدونات ولا شتمني ولا خاض في عرضي
ربنا يسعده دنيا واخرة يارب، كفاية اني ما اعرفش عنه حاجة وبادعي له دي احسن من اي حاجة تانية الناس بتجري وراها