ترفيهات رمضان

مسلسل يحيى الفخراني حلو قوي، انا استغربت قوي ان اول حلقة مليانة احداث كده ومكتوبة بالاتقان ده

مسلسل ناصر طبعا فحت وردم، عياط عياط عياط، بس ليه ما جابوش رياض الخولي يعمل ناصر؟
هو كبير في السن شوية على فترة شباب جمال، بس انا لسة مخنوقة من مجدي كامل
الولد اللي بيمثل جمال الطفل مش ممكن رائع، وشبه عبد الناصرفعلا وروحه زيه بالظبط، حتى نظره عينيه
بس ايه النكد ده؟ ده انا ح ابتدي اعذره في اللي عمله في السجون على اللي شافه في حياته :) لا باهزر طبعا احنا مالناش ذنب يتزربن علينا، بس الله يسامحه ويغفر له بقى اذا كان الناس سامحته

واحنا قاعدين مستنيين ادان المغرب فتحت اذاعة نجوم اف ام عشان الاستاذ عمر بطيشة كان عمل معايا ومع ماما حوار ومش عارفين ح يتذاع امتى فبنسمع الاذاعة
فوجئنا بالاتي..لا الاول لو سمحت شوف لك اي تربيزة جنبك وطبل عليها ايقاع الواحدة ونص
طيب..هات بقى اخوك الصغير او ابن اختك خليه يصقف جنبك كأنه في فرح
طيب..قول بقى لو سمحت اسماء الله الحسنى
لا لا ما توقفش..يعني طبل وابن اختك يصقف وقولوا اسماء الله الحسنى
اصل حمادة هلال كان بيقول اسماء الله الحسنى كده، ما اعرفش والله اذا كان حد بيرقص وللا لا ده راديو انت بتسأل اسئلة محرجة ليه؟ ما شفتش المذيعات انا
المهم بعد شوية ادان المغرب ادن، لقيت ماما قاعدة مش بتفطر: ياللا يا ماما الادان
ماما: لا ..لو سمحتي اتأكدي من الادان من قناة شرعية
:)
والله العظيم كانت بتتكلم جد، معلش معذورة بعد ما سمعت بودانها اسماء الله الحسنى بتتقال على واحدة ونص
بس شفتوا ربنا عامل ايه في الجو؟ عشان تعرفوا ان ربنا طيب وما حدش بقى يدعي علينا بالهلاك والعذاب والطوفان والطاعون والكلام ده
ربنا مش ح يسمع منكوا كده ادعوا بحاجات حلوة