مش عاجب حد
لا سلفيين ولا اخوان ولا علمانيين
ولا يسار ولا ليبراليين
واقف في زور الكل بالعرض
وفيه ناس عاملة المفتي على جمعة
شغلها شاغل
ولما ما يقولش حاجة جديدة
يدوروا له في القديم
ومش بعيد نلاقي واحد جاب ورق الحضانة بتاعه
وطلع انه مكتوب له في الشهادة انه
naughty naughty naughty
وكل ما يكح
ينزلوها مانشيت: خرج علينا المفتي جمعة
بكحة غليظة خضت ابن الجيران اللي كان نايم
دورت في جوجل على كلمة
"فضائح على جمعة"
طلع لي عشر صفحات كل صفحة فيها عشر نتائج
يعني ميت موضوع مكتوب على النت
بعنوان
"فضائح علي جمعة"
وكلها تصيدات وسفسطات ومهاترات
بغيظ وغل كأنه اتجوز السيدات والدات
كتاب المائة موضوع
ومن كل التيارات والتوجهات
اللي من تيار: بارك الله فيك يا اخي وجعله في ميزان حسناتك
واللي من تيار: تأطير المؤسسات الدينية وادلجتها من خلال
تسييس الشارع الديماجوجي المتحذلق بنيويا وطبقيا
واللي من تيار: المفتي ده مش حد حقيقي
احسن
مدام مش عاجب حد كده
يبقى هو ماشي صح
مش عند والله
بس الغالبية العظمى
الا من رحم ربي
بيكتبوا وفي ذهنهم اجندة مصالح معينة
اذا ما كانتش مصالح سياسية
يبقى على الاقل مصالح شخصية
ومدام اصحاب المصالح مش عاجبهم حد معين
يبقى الحد ده مش بتاع حد
ومش خدام حد
يبقى احسن
هنيا له بالشتايم
وبارك الله في الاخوة وجعله في ميزان حسناتهم
الايديولجية البنيوية الديماجوجية البرجماتية
المتحدة
سؤال بس
هو المفتي ده مش بيني ادم؟
اشمعنى هو الوحيد المحروم من جنة
"حرية التعبير حق مكفول لكل مواطن"
11 comments:
السلام عليكم
طبعا لا يخفى عنك سبب هذا الهجوم المباشر فعلا أنا كنت بالصدفة عند ناس وبفتح الجهاز لقيت مجلد كامل اسمه فضائح على جمعه
فعلا استأت جدا من التعبير
نعم هو المفتى وليس اى رجل من الشارع وكل كلمة منه لابد ان تكون بعناية وتأصيل لانها يضيع فيها رقاب لكن لابد أن يكون الهجوم على قدر الحدث ومش نفتش فى الدفاتر القديمة
وهو أخطأ لما حرم موضوع الختان ولم يرجعة الى الطبيب و حاربة الناس من كل صوب وحدب
ومش معنى ان فى هجوم عليه يبقى هو ماشى صح
معظم النار من مستصغر الشرر
تحياتى
هى نظرية جديدة برضه بس غالبا صحيحة ما دام مش بيرضى حد يبقى المفروض أنه بيرضى ضميره على حساب اللى ليهم مصالح
ياريت يكون كدة فعلا و ميكونش الهجوم ده بسبب انه بيلعب على كل حبل شوية
مبدأيا الموضوع لا هو فضايح ولا حاجة. لكن ان النهاردة يكون لي رأي انفيه بكرة يبقى احنا بنلعب بالشعب. الختان كان مكرمة واصبح حرام. الحقيقة بقيت اتوقع كل حاجة. انا مش ضد ان الانسان يغير رأيه، بس لما يكون فكره الشخصي. المشكلة ياسيد ان الموضوع ماهواش رأي أو حرية تعبير. المفتي مش بيطلع يقولنا البامية أحلى ولا الملوخية. دا راجل بيطلع يتكلم من الدين ويكلم ناس في الغالب مش بتفكر وراه.
الناس دي مسئولة منه. حرام يتشتتوا
ويعجب الناس ليه يا نوارة
طبعا لازم ما يعجبش السلفيين ..ده محلل موسيقى ومحرم ختان و بيوزن بعقله وعلمه ...يانهار اسود !!! عقله وبيقول كلام غريب كده من امثال الفتوى تتغير بتغير الزمان والمكان والعرف والحال وبناءا عليه كل يوم يطلع بحاجة جديدة حسب تغير الحاجات دى واحنا لاما فى الدين ماشيين بمبدا : حافظ مش فاهم
لا نبقى زنادقة مبتدعين وضلالة وكل اللى انت عرفاه وقريته اكيد ع النت
اليسار ...ازاى يعنى يعجبهم شيخ وبعدين شكله كده فاهم و كلامه موزون
والناس بتحبه وعقله وعمله يوزنه بلد
طب العلمانيين واليسار علقولو له المشانق بعد فتوى التماثيل و هاتك يا شتيمة فى البيت بيتك والجرايد وكل حتة فيكى يامصر ولما طلع مع احمد عبد لمعطى حجازى وادهملهم له ومسح بيه الارض قالو خلاص خلاص ماشى بنتحرمه وهو حر فى رايه و اللاختلاف لا يفسد الود و الجملتين اللى بيعرفوش غيرهم طب محدش من البهوات الفنانين والمثقفين وحماة الفن واللى قلوبهم رهيفة ع التماثيل اوى كده ورانا جمال طلعته البهية ليه فى فتوى الختان لما الراجل لما السلفية والاخوان والكل كفروه
ولا هى عنيهم بدمع على التماثيل وبدرو لا ماتت وربنا يرحمها وخلاص
ولما يجى يقول حاجة تلاقيهم بيقولو : طب ما قلش من الاول ليه...يعنى بدون ذكر اسماء مدون مشهور كاتب يشكره ع فتوى الاناث وبالمرة لاقها فرصة راح شتمه ع بول الرسول اى كلام المهم شتيمه وخلاص
عشان نبقى شتمنا المفتى
ولما طلع مع محمود سعد يقول مش هاسمح لحد يدخلنى فى صراعات على مسائل هامشية زى بول الرسول واسيب القضايا الهامة زى الفساد والتعدد السياسى واستقلال القضاء وحقوق الانسان المهدرة والاطفال
ولا كان حد سمع الراجل بيقول حاجة
-مع انهم بيسمعو كل الحاجات التانية اللى بيقولها واللى مش بيقولهااصل افرضى قالوا سمعنا المفتى بيتكلم فى المواضيع دى وهى بالنسبة له قضايا هامة ولا تقبل التاجيل على قوله
طب نشتم تانى ازاااااااااااااااااااااااى
؟؟؟؟؟؟؟؟؟؟؟؟؟؟؟؟؟؟؟؟؟؟
سؤال وجيه برضه
الغريب بقى ان الراجل ولا بيهمه ولا بيتهز ولا فارق معاه وهو قالهل لمحمود سعد: قاله انا عامل بحث بيدرس فى اقتصادوعلوم سياسية عن التعايش مع غير المسلمين وان الاحسان معاهم فرض عين مش كتر خيره المسلم لما يحسن معاهم ولازم يتدرجوا فى المناصب السياسية وحقوقهم و كلام زى الفل
ليه محدش سمع عنه
هما بس اللى حرية التعبير تمشى عليهم يابنتى انما تمشى على شيخ وعالم كبيييييييير جدا
يلالالالالالالاهوى ...بعد الشر انشاء الله اللى يكرهنا
حرية راى ايه نوارة ...قلبك ابيض سلملى على جوزه يا اسماعيل بيه
صدقي عندك حق
لاني شفت له حلقات قديمة من قبل ما يبقى مفتي و عجبتني ردوده لاني لقيتها عقلانية اوي
مش عارفة فعلا ليه بيهاجموه او يكده و ان كان ده معناه انه نماشي صح و مخه كبير اوي لكن كل شوية يشنعوا عليه بحاجة و ةالغريب ان اللي بيشنعوا عليه عندهم كمية اساطير هبلة بالجملة
تحياتي
امواه
المشكلة إيه؟
آراء معظم إن لك يكن كل اليساريين تؤدي مباشرة إلى قيام سلطة دينية
المشكلة في الفتوي ليست دينية أو معرفية
المشكلة إجتماعية سياسية في المقام الأول والأخير
فسيبكوا من الكلام ده كلو وركزوا يا جماعة على النظام
النظام إللي شغال بمنطق فرق تسد
والله المفروض انه عالم با/ور الدين والمفروض الناس دى يكون لها احترامها
طيب اللى بيدور له على افضايح وعمال يشنع ده لو فعلا يفقه فى الدين حيعرف ان اللى بيكتبه ده اكبر خطأ وكان اتقى الله انما للاسف
الراجل ده دماغه توزن اد دماغات الناس اللي بينتقدوه على اللي بيشتموه مرتين تلاته اربعه خمسه
ويا سلام لو رفع عليهم قواضي و بيعهم عفش بيتهم عشان يعرفوا ان الله حق,عموما ربنا يحفظله اعصابه
صباح توارد الخواطر
يا جماعة هذا الرجل وان كان المفتي لكن له أخطاء كثيرة وكل البشر يخطؤوا مش مشكلة
لكن أخطاؤه والله هتوديه في داهية، وحسابه عند ربنا، إن شاء الله هيعرف يوم القيامة إن دينه أغلى من أي شيء آخر
هذا الرجل يفتي بما يوافق أهواء الناس، وخصوصا منظمات حقوق المرأة والغرب الصليبي الصهيوني
مثلا أيام إمامة المرأة للرجال في الصلاة قال يجوز طالما المجتمع يسمح بذلك، يعني في أوروبا وأمريكا يجوز، لأنه مجتمع منفتح، أما في مصر لا يجوز لأنه مجتمع منغلق .. ولما الدنيا قامت عليه قال حرام حرام حرام لا يجوز
أيام التماثيل قال حرام ولما الدنيا إتقلبت عليه قال للنحاتين قلدوا من أجاز لأن فيه رأيين ونسي أن النبي حرم التماثيل تحريما قطعيا..طبعا إرضاءً للعلمانيين
أيام الدستور طلع في البيت بيتك وقال المواطنة واحترام الآخر ..ماشي نحترم الأخر..لكن تامر أمين باشا سأله عن حكم الجزية فعلي باشا جمعة قاله الجزية فكر مضحك..ونسي إن حكم الجزية مذكور في القرآن .. ومش هقول اللي يستهزأ بحكم في القرآن ده يبقى إيه
والختان قال إنه حرام..طب ليه ماقالش في رأيين وقلدوا من أجاز الختان!! مع إن الأئمة الأربعة وكل علماء المسلمين مجمعين على استحباب الختان، واختلفوا في وجوبه فقط، طبعا ارضاءً لمنظمات حقوق المرأة
أخيرا ويارب نستريح منه بعد كده موضوع الردة وإن حد الردة نلغيه ونهمل حديث الرسول عليه الصلاة والسلام (من بدل دينه فاقتلوه) وكلام العلماء والأئمة في هذا الموضوع، كل ده إرضاءً للغرب وعشان محدش يزعل مننا!! ومحدش من المسلمين اختلف إن المرتد بعد إسلامه يجب تنفيذ حد الردة فيه، ده حتى العوام وأقل الناس ثقافةً عارفين كده
وحاجات كتير جدًا تودّي جهنم، لم أذكرها عشان التطويل مع إني طولت لكن أظن أن في ما ذكرت كفاية .. ربنا يهديه أو يريحنا منه والسلام عليكم
رجاء الاستماع الى هذه المقاطع بصوت على جمعه
http://www.zshare.net/download/3140296ad520ce/
Post a Comment