Tuesday, 7 August 2007

الناس والحرب وتحذير

قبل ما اكمل عرض كتاب الناس والحرب
الراجل ده واللي معاه
شافوا الاهوال عشان البلد دي
ومافيش واحد فينا يوحد ربنا قدم ربع اللي هم قدموه
وارجل واحد قاعد على النت دلوقت
ما يستحملش اللي هم استحملوه في الصحرا
او في الاستنزاف
الراجل ده كان قائد مفرزة الهاون
وكان ضمن الدفعة الاولى
لا الحقيقة انه مفرزته والمفارز الاخرى من اسلحة اخرى
كانوا هم الدفعة الاولى في حرب تلاتة وسبعين
وللي ما يعرفش
الدفعة دي كان مقدر لها في التخطيط العسكري
انها تموت عن اخرها
يعني عملية انتحارية يعني
وبالفعل كل مفرزة الراجل ده ماتت عن اخرها
ومافضلش غيره باصابات
بيعاني منها لحد النهاردة
ولحد النهاردة في اربع شظايا جوة راسه
استقروا والاطباء فضلوا انهم يسيبوهم عشان
ما ينضرش
يعني
ما حدش يشير اي اشارة سيئة للراجل ده
ولا اللي معاه من قريب او بعيد
اللي عايز يشتم
يشتمني انا
هو لا
وانا مش ح انشر بعد كده اي تعليق
يسيء له او يشكك فيه
اي اساءة ليا انا قابلاها
اي اساءة له غير مقبولة بالمرة
لا هو ولا اي حد من الجنود اللي عانوا المعاناة دي
وضحوا بنفسهم عشانا
واحنا قاعدين على النت في بيوتنا
وفاكرين نفسنا بنناضل
دي برضه جملة اعتراضية وبعدين نكمل

10 comments:

الشنكوتي الكبير said...

انا بس جيت هنا عشان اقدم تحياتي على ردك الرائع على ميراج في مدونته كان نفسي ارد عليه زيك كده بزوق وعقلانيه بس بدون خنوع يعني افهمه الحقيقه بالراحه بس من غير ما اقعد اطبطب عليه
بجد انا فخور بيكي
مدونتك جميله قوي اكيد هيكونلي معاها قعدات تانيه
بجد تحياتي
سلاااااااااااااااااام

mahmoud said...

الحقيقة مش شايف ضرورة للهجتك التصادمية... سبق ووضحت لك اقصد ايه وما اقصدش ايه..
اذا كنتي مش عايزة تسمعي رأي آخر مضاد أو معاكس ممكن اتفهم رغبتك.. رغم ما فيها من مفاجأة بالنسبة لي.. مفاجأة بالضبط زي لهجة التحذير في البوست الأخير..

تحياتي ويمكنك عدم نشر تعليقي هذا لو شئتِ..

الطائر الحزين said...

اختى هونى على نفسك
عرفتى انه كان معايا حق لما قلت تعليقى فى الاول
وقلنا لا نهون من قيمة النصر
لم اكن اقصدك بعينك كنت اقصد اى شخص يتحدث فى هذا الشان بسخرية

ربنا معاكى وكملى
احنا بنشمشم على اى ريحة تحسسنا اننا نقدر نعمل حاجة

تحياتى

Abdou Basha said...

الأخت العزيزة نوارة
اسمحي لي أن أوجه لك هذا التعليق من منطلق إني من المارين دوما هنا
أعتقد أنه أفضل إنه انك تلغي التعليقات أو تخفيها عن البوست اللي تحسي إنه ممكن يثير قلق، وهذا أفضل من توجيه القراء لما يعلقون به
أسفل البوست عند الاضافة هناك خاصية لهذا الأمر
**
وأعتذر عن الازعاج .. لكن تعليقي هدفه تسجيل انطباع لديك، واقتراح
وشكرا لك

الدرويش المرووش said...

أكتر حاجه بأكرهها ف الدنيا الإفترا
حرام عليكى
مين قال إن الناس اللى على الإنترنت دول مش مناضلين؟
و مين قال إنهم مالهمش خبره عسكريه؟

طيب ده أنا أعرف ناس منهم قفلوا
Medal of Honor
و ناس تانيين خلصوا كل المستويات بتاعة
Red Alert

إتقوا ربنا بقى قبل ما تطعنوا فى الناس الشرفا الشجعان

ياماما

كنت هاروح فيها
جرس الباب رن على سهوه

ماعندكيش حاجه توطى جرس الباب علشان ما أتسرعش؟

جبهة التهييس الشعبية said...

الشنكوتي الكبير
نورت المدونة
واشكرك على التعليق

محمود

انا لهجتي تصادمية
يمكن عشان تأثرت بيه جدا لانه بيحكي من منظور انساني بحت

يعني لا بينظر ولا عامل حسابات ولا حاطط في باله اي حبشتكنات بيكتب اللي شافه وبس

عشان كده قلت اللي عايز يهاجم يهاجمني انا عشان يمكن انا اللي اخطأت في تلخيص الكتاب

وانا ادعوك انك تشتري الكتاب وتقراه بنفسك يمكن تشوف حاجات انا ما شفتهاش

بص يا محمود انا مقدرة جدا اننا في الزمن ده وفي الظروف دي بطلنا نصدق اي حد واي حاجة

مش انت لوحدك

انا كمان

بس صدقني لما تجيب الكتاب وتقراه لاخره ح تغير رأيك

انا في بداية الكتاب كنت باقول زيك كده بس لما قريته للاخر غيرت رأيي

عشان كده باقول لك اي خلل في نقل المعلومة يحسسك ان فيه حاجة شكلها فشرة تأكد ان الغلط مني انا مش منه هو

تحياتي

ابو باشا

انا عاملة مودريشن على عيني

لان مش باحب الرقابة

بس فيه ناس بتشتمني بالفاظ قبيحة جدا وانا لو عليا اشتمهم باقبح منها

بس خوفا على مشاعر ناس زيك كده ممكن ما تحبش تقرا الالفاظ دي عملت مودريشن

الطائر الحزين

ما اعرفش احنا نقدر نبقى زيهم وللا الزمن غير الزمن؟؟؟؟؟؟؟؟

الله اعلم ما اقدرش احكم لان وفقا للي كاتب الكتاب اللي كان يشوف الجيش في سبعة وستين ما يتخيلش ابدا اللي حصل في تلاتة وسبعين

قادر على كل شيء

يحيي العظام وهي رميم

Desert cat said...

نوارة انا متابعه معاكى من الاول ومش عايزه ارد غير لما تخلصى
بس كل اللى اقدر على الراجل ده
انه يستحق الاحترام والتقدير مش الهجوم والاستنكار
تحياتى ليكى

مؤمن said...

السلام عليكم

اذا امكنك توفير نسخة
PDF
من هذا الكتاب بعد الانتهاء من عرضك له سيكون شىء رائع لمن لا تتوفر لهم فرصة الحصول على نسخة منه

مع الشكر

مؤمن

مــــــــــازن said...

فعلا الراجل ده مهم جدا وتعب عشان البلد وبجد لازم كلنا نقدره ونحترمه عشان هو ضحي بنفسه عشانا وعشان البلد تفضل وانا والله بدعي له من كل قلبي انه يكون مع الصدقين والشهداء والصالحين ..بس هوممكن اعرف شخصيته هو مين اسمه ايه؟؟ يعني مش المفروض اعرف بتتكلموا عن مين ولا هو شخصية سر بينكم ممنوع حد يعرفه غيركم

joe said...

صحيح يا نوارة

هؤلاء من يصنعون النصر ببنادقهم و سواعدهم و لحمهم العاري أحيانا ..
هؤلاء الذين تبقى اّثار النصر على أجسادهم الى اّخر حياتهم ان كتب الله لهم الحياة كي يروا النصر الذي صنعوه لبلادهم أبناء بلادهم ..و لازال هذا الرجل يحمل اّثار النصر بالتأكيد .. في رأسه و شظاياه .. وفي قلبه الذي أحب هذا الوطن .
هؤلاء هم الذي يصنعون النصر و الساسة هم من يقـوّضه و يذهب به الى الجحيم
ـ تابعي يا نوارة
و لهذا الرجل تحية كبيرة .. و لكل زملاءه الشهداء منهم و الأحياء .. .