Tuesday 10 July 2007

مرقص فهمي

هو الراجل ده ماحدش بيجيب سيرته ليه؟
مع انه سابق على قاسم امين في الكلام عن حقوق المرأة
طبعا عائشة التيمورية وزينب فواز سابقين عليه
بس اصلا كلام عائشة التيمورية وزينب فواز
ما كانش له وزن في مجتمع اكثر ذكورية من دلوقت كمان
يعني كانوا شايفينهم نسوان مجانين فلتانين مالهمش راجل يلمهم
لكن مرقص فهمي هو اول راجل اتأثر بكلام التيمورية
وزينب فواز
وهو اصلا خريج مدرسة الحقانية
اللي هي كلية الحقوق يعني
وكان له كتابات كتير بخصوص المرأة
وهو اول راجل يربط ما بين التخلف وقهر المرأة
وهو اول راجل يربط مابين رزوح مصر تحت الاحتلال
واستمرار الست في الحبسة الحريمي
صحيح هو ما اتكلمش على التعليم باعتبار ان رفاعة
الطهطاوي اتكلم عن تعليم المرأة قبله
وما قدرش برضه يتكلم عن غطاء الوجه
لكن في وقته يعني سنة 1894
كان فيه رجالة كتير بيقروا التيمورية وبيشاوروا عقلهم
لكن ما عندهمش الجرأة انهم يصرحوا بافكارهم
ومرقص فهمي كان اولهم واشجعهم
ولولاه ما كانش قاسم امين اتجرأ وكتب كتاباته
حتى الامام محمد عبده آراءه كان بيقولها على استحياء
ومعظمها بيتقال في صالون نازلي فاضل
فيه احيان اتكلم بصراحة عن التعليم مثلا
وفي احيان تانية بخ في ودن قاسم امين
اللي اخد كلامه مبخر ونقله زي ما هو
بالذات فيما يخص معركة غطاء الوجه
كل اراء قاسم امين فيها كانت بتاعة محمد عبده
بس الامام صدر قاسم امين اللي اخد الشتيمة كلها
ونفس قاسم امين ابتدا بعد مرقص فهمي
مرقص فهمي اول راجل يكتب مسرحية عن حقوق المرأة
المسرحية كان اسمها
"المرأة في الشرق"
وكان بيناقش فيها حق اختيار المرأة لزوجها
ملخص المسرحية ميلودرامي شوية
واحدة حبت واحد واهلها غصبوها تتجوز واحد تاني
قيمة ومركز
ولما اللي اتجوزها عرف انها بتكرهه وبتحب فلان
قتل فلان قامت البت قاتلة جوزها وقتلت نفسها
معلش يا جماعة كتر خيره ده سنة 1894
المهم في المسرحية دي انه بيطرح وجهتين النظر
من خلال مناقشة ما بين اخين للبنت الضحية
واحد بيمثل وجهة نظر المجتمع اللي بتقول ان الست
بطبعها ميالة للخطيئة وانها ما ينفعش يترك لها حرية الاختيار
والا ح تجيب لاهلها العار
والتاني بيمثل رأي كاتب المسرحية اللي بيقول ان الشرف في
الراس مش في الحبسة وان الست لو اتحطت جوا ميت زنزانة
ح تعمل اللي هي عايزاه لو ما عندهاش اخلاق
وهو اول راجل يطرح وجهة نظر مخالفة لرأي الرجالة
في الستات في الوقت ده
وفي وقتنا والله فيه رجالة بيقولوا الكلام ده
وستات كمان
وهو اول واحد قال ان حرية مصر مرتبطة بحرية المرأة
والحقيقة الستات ما كسفهوش
وشاركوا فعلا في الحركة الوطنية
ولما الحركة الوطنية اتزنقت ولقت نفسها محتاجة للستات
ما لقوش مفر من انهم يستعينوا بيهم
ولما جم يجنوا ثمرات النضال الوطني
طبعا نفضوا للستات
وده اللي خللا هدى شعرواي تسيب حزب الوفد
بعد ما قالت لسعد باشا زغلول ما معناه
لما عزتوا ناس تموت لكوا في المظاهرات احنا كنا اول ناس
ولما كفاحنا ابتدى يجني ثماره تجاهلتونا وتجاهلتوا مطالبنا
عادي يعني ندالة الرجل المصري التاريخية
no offence
يعني
وعبط المرأة المصرية التاريخي
no offence
برضه
مش دي القصة عشان القصة دي بالذات
ح تفضل الى يوم الدين
القصة
مرقص فهمي
ما حدش بيجيب سيرته ليه
وليه كل الفضل بيرجعوه لقاسم امين
اللي نص مجهوده معتمد على مرقص فهمي
والنص التاني معتمد على محمد عبده
ويمكن مرقص فهمي مات وهو لسة ما قالش كل افكاره
ليه واخد الطناش كده؟

20 comments:

Anonymous said...

اول مرة اسمع عن الراجل ده
صحيح محدش جاب سيرته في اي حاجه
و لو حد قال لي مرقص فهمي
كنت هسأله و ده بيقعد علي قهوة ايه
تشكري يا نوارة علي المعلومه المحتاجة للكثير من البحث

Anonymous said...

كلام في سيرك تلاقي قاسم أمين كان عضو في لجنة السياسات
هههه
تحياتي

Anonymous said...

"نداله الراجل المصري التاريخيه"

برضه كده يا حاجه نواره . . اخرتها نطلع اندال و علي مدي التاريخ؟

Anonymous said...

السلام عليكم ورحمة الله وبركاته

الإخوة الكرام

طبتم وطاب ممشاكم وتبوأتم من الجنة منزلا

ياريت نشارك في الحمله دي

غزة لن تجوع ولن تركع

وجزاكم الله خيرا

Anonymous said...

هوا فيه أيه؟ هوا خلاص ما بقاش فيه قيمه أو شخصيه بنحترمها الا وشوهتوها ؟ هو ماله قاسم أمين؟ ناصرى ولا حط العصايه فى عماد الكبير؟ يا حول الله يارب !!!!!!!! ودلوقتى المطيابتيه بتوعك يدخلوا يشتموا هما كمان وهايله يا نواره ويا سلام يا نواره ! بلد منافقين صحيح

Anonymous said...

هاني
الحقيقة قبل ما اقرا الكتاب اللي كاتباه مارجو بدران عن تاريخ الحركة النسائية في مصر
برضه ما كنتش اعرف مرقص فهمي

ابن ناصر

ههههههههههههه

لا الاهتمام بقاسم امين كان عشان رجل قانون مسلم

ماكانش فيه اهتمام بآراء الستات والمسيحيين

ودولقت الزمالكاوية واللي عندهم تينيا

عمرو

لا مؤاخذة ليه

هو انا صدمتك وللا حاجة؟

هو الراجل المصري مش ندل لا سمح الله؟

البوسطجي

حاضر

مجهول الاولاني اللي هو مجهول التاني

اولا انا ماليش مطيابتية
وحتى مش عضوة في حزب ولا حركة ولا محسوبة على اي تيار

وما عنديش فلوس اشتري بيها مطيباتية

ولا وزيرة الصحة عشان اعالج المطيباتية على حساب الدولة

ثانيا

انت تعرف مرقص فهمي؟

لو تعرفه يبقى ظلمته

لو ما تعرفوش يبقى ليه بتتكلم عن حاجة ما تعرفهاش؟

ثانيا

الثابت بالتاريخ فعلا ان قاسم امين ناقل افكاره من محمد عبده وهو نفسه ما كانش بينكر الكلام ده

وده مش عيب فيه يعني

مش عيب انه يبقى له استاذ وانه يتأثر بيه ويشرح افكاره للناس

ثالثا
هو قاسم امين قريبك؟
وانت عرفت منين انه مات من القهرة؟

يقال ان قاسم امين مات مسموم لانه - زيه زي ناس كتير تم التغرير بيهم في الزمن ده - دخل جمعية الماسونية وهو فاكرها جمعية انسانية ولما اكتشف حقيقتها سابها فقتلوه

والله الكلام ده مش مؤكد بس دي بعض الاقاويل

وبرضه التخمين ده ما يعيبوش

وياريت نبطل تأليه الشخصيات كأنهم ما بيغلطوش

قاسم امين له تأثير وله دور

لكن لا ندي له فوق حقه

ولا دون حقه

ومش عشان ندي له قيمة اكبر من قيمته

ننكر فضل ناس تانية

يعني مرقص فهمي ده ليه التاريخ بيتجاهله؟ مع انه اول رجل يتشجع ويتكلم في حقوق المرأة

وده فضل كبير لو تقرا كويس عن الزمن ده وتعرف معنى ان راجل يتجرأ ويتكلم عن حقوق المرأة

وازاي انه فتح السكة لناس تانيين انهم يتجرأوا ويعلنوا عن افكارهم بما فيهم قاسم امين ومحمد عبده

وايوة هو له الاسبقية عليهم

وده ما يقللش من قيمة قاسم امين

عايزة برضه اسألك سؤال

انت قريت الاعمال الكاملة لقاسم امين؟ المصريون وتحرير المرأة والمرأة الجديدة؟

وللا فاكره كمال ابو رية

ومات يا ولداه من القهرة يا كبد امه والكلام ده كله

لا يعني اننا ندي له سبق مش بتاعه

ولا ندي له فضل لافكار مش هو اللي ابتكرها

وكونه ان مش هو اللي ابتكر كتير من افكاره دي حاجة ما تعيبهوش

لان كل كلام قاسم امين كان بيصب في انه مش عايز يبتدع على الشريعة انما عايز يطبق الشريعة ويفصلها عن العرف والتقاليد

والتفاسير اللي هو وصلها كلها من اجتهاد محمد عبده ولو كانت اجتهاده ما كانش ح يبقى لها قيمة لانه مش متخصص في علوم الشريعة عشان يجتهد

مش عارفة ايه اللي مزعلك برضه

انا عايزة كل واحد ياخد حجمه

وكون ان محمد عبده يثق فيه ويصدره في معركة صعبة زي معركة النقاب

ده دليل على انه لمس فيه شجاعة وفهم ما لمسهمش في غيره

برضه مش فاهمة انت محموق على ايه؟

Anonymous said...

آه تاني مرة يا مجهول ما تبقاش جبان

كعادة الرجل المصري

وبين لي نفسك كده

Anonymous said...

أظن أنتى جاوبتى عن سؤالك فى الرد يا أ.نوارة لما قلتى عشان هو مسيحى

طبيعى جدا مجتمع بيعامل المرأة على أنها حاجة كدة على جنب لازم نخفيها عشان عورة أنه مكانش حيقبل أن واحد مسيحى يناقش قضية تحرير المرأة و مكانش حد حيسمع له

و أنا الصراحة مستغرب من الأستاذ مجهول لأنه بيدافع عن شخص قاسم امين بطريقة تأليهية مش من العقل فى شئ

ما علينا ما علينا ... أنا أول مرة أسمع عن مرقص فهمى و ياريت تقوليلى أجيب الكتاب ده منين ؟؟؟؟

Anonymous said...

أظن أنك جاوبتى على سؤالك يا أ.نوارة لما قلتى أنه مسيحى

و أكيد فى مجتمع بيتعامل مع المرأة على أنها حاجة كدة على جنب لازم نخبيها عشان عورة و بيستمد جموده من آراء فقهية معينة فى الأسلام أنه مش حيسمع لواحد مش مسلم لما يناقش قضية زى كدة

بالنسبة للأخ مجهول أنا مستغرب أنه بيدافع عن قاسم أمين و هو رمز من رموز حرية العقل بطريقة تأليهية و ترميزية بعيدة عن العقل خالص

ما علينا ما علينا .. أنا بعيد التعليق تانى عشان الأولانى باينه اتمسح
و دى أول مرة أسمع عن مرقص فهمى و ياريت تقوليلى أجيب الكتاب ده منين ؟

Anonymous said...

احنا بنحبك علشان طيبه و حقانيه و بنت حلال

بس موضوع نداله الراجل المصري التاريخيه دا كلام فاضي و مش علمي و لا اخلاقي

مش انا اللي اصدمت . . انا بحترم المرأة سواء المصريه او غيرها

يمكن في بعض السيدات اللي كان ليهم تجربه زواج مؤلمه . . و ده برضه مش معناه ان كل الرجاله المصريين اندال . . علي مدي التاريخ

انا واحد من الناس بحب مدونتك و بحترم رأيك و بشوف فيكي أمل ان البلد حتتصلح في يوم من الايام

ياريت نلتزم الموضوعيه

تحياتي :)

Anonymous said...

كمان الراجل المصري جبان . . كالعاده؟

ليه بس كده . . البلد مليانه ناس زي الفل

رجاله و ستات

انتي لسه شباب

متخليش تجربه وحشه تزعلك من كل الناس اللي حواليكي

ايوه ساعات الواحد بيبقي موجوع

بس انشاءلله اخر صبرك خير

Anonymous said...

باين علينا نهارنا ابيض بالصلاة علي النبي

نظره سريعه لأخبار العالم اليوم

الثوار المسلمين خطفوا و دبحوا 14 عسكري فلبيني في في جنوب الفلبين و قد عثر علي الجثث مفصوله الرأس

استمرار القتال داخل المسجد الأحمر في باكستان وسط انباء بمقتل اكثر من 50 مسلح من المتشددين الاسلاميين
و قد تم القبض علي احد قادتهم و هو يحاول الهرب متنكرا كسيده منقبه

الظواهري يهدد بريطانيا بمزيد من الهجمات

مقتل 220 عراقي في انفجار قنبله بالعراق

وصول 220 امريكي يهودي في اسرائيل للهجره و الاستيطان و قد استقبلتهم وزيره الخارجيه الاسرائيليه بالورود و موسيقي الشرف

و خبر من مصر عشان محدش يزعل
فجرت دراسة أجراها المركز القومي للبحوث بالقاهرة مفاجأة تمثلت في أن معدلات الاصابة بالضعف الجنسي والعقم ارتفعت بدرجة كبيرة مؤخرا في مصر.
وأرجعت الدراسة أسباب هذه الظاهرة إلى سوء التغذية لدى المصريين بالاضافة لزيادة الدهون تحت الجلد وهو ما يؤدي لتحويل بعض هرمونات الذكورة إلى هرمونات أنوثة

Anonymous said...

الاخت العزيزة نوارة هانم
السلام عليكم

انا اول مرة أسمع الاسم ده بس طبيعي في مجتمع تحكمه العادات والتقليد والعرف أكثر من الدين ان يتم تجاهل أراء واحد مسيحي
عادي يعني

اللي عايز أقوله بخصوص أخونا قاسم أمين اللي ناس كتير من الاخوة بتوع حقوق النسوان بيموتوا فيه

لو قروا كتبه احتمال كبير يطالبوا بتحويله للماكم العسكرية للإنضمام لتنظيم محظور

وكمان الاخوة اللي بيشتموا فيه ويكفره لو تمعنوا فيما كتب لنصبه أمير للتنظيم

قاسم أمين كان راجل موضوعي جدا ورائع وبيطالب بتطبيق الشريعة الاسلامية وحقوق المرأة في الاسلام وانا فوجئت لما قريت كتبه ودا من زمان وحسيت اني بنقرا للشيخ الغزالي أو يوسف القرضاوي والراجل كل حججه يستشهد بالقران والسنة يعني مش علماني ولا إمبريالي شيوعي يساري يميني غربي شرقي زي ما ناس كتيير متصوره

الرجل كان بيطالب بحق المرأة في الذهاب للطبيب عندما تمرض!!؟؟ وحقها في قبول أو رفض من يتقدم لها للزواج وأن كشف الوجه مع الالتزام بالحجاب الشرعي غير مخالف للإسلام وأن من حق المرأة التعليم وعدم حبس الفتيات في البيوت

ديه كانت مطالب الراجل وأفكاره مش الهبل اللي بينسب ليه خالص

وصراحة أنا متفرقش معايا اوي هي ديه أفكاره ولا أفكار حد تاني لان هو اللي امتلك الشجاعة وقتها وكتب هذه الافكار

تحياتي

بحري من اسكندرية

Anonymous said...

طيب هوا الواحد يجيب منيم كتابات لمرقص فهمي؟؟؟

Anonymous said...

عزيزتى نواره والله ماكانش قصدى أضايقك ,وأولا أنا مش راجل خالص ,أنتى مالاحظتيش الرقه اللى فى الكومنت بتاعى؟ تانيا , أنا ماألهتش قاسم أمين ولا هوا من قرايبى ,وموضوع أنه مات لإآ عز شبابه من القهر يا عين أمه! ! أنا قريته فى مقال عنه. ثالثا ,موضوع التهليل من المعلقيب أصحابك >÷ مش أتهام ليكى ,دى حاجه لاحظتها فى كل المدونات ,كل كاتب مدونه له شله محفوظه , بيدخلوا يعلقوا زى ما يكون بيعملوا واجب فى عزا ولا طهور! ده ما يمنعش أنى باحترم معظم المدونيين وباحبهم والله وحياتى أصبحت أفضل بيهم ومعلش يا نواره حقك عليا يا ستى. بس على فكره أنتى قولتى أن قاسم أمين نص أفكاره واخدها من مرقص فهمى والنص التانى من محمد عبده ,ده يتفهم أيه؟ده حتى أبن ناصر أتريق عليه!

Anonymous said...

الاستاذ احمد بدوي
الكتاب بتاع الدكتورة مارجو بدران
هو عن الحركة النسائية
اسمه
feminists, islam and nation

وصادر عن

princeton university press

بس اعتقد انه موجود في مصر

وهو كتاب تأريخي للحركة النسائية في منطقة الشرق الاوسط اللي بتبتدي في مصر

وانا الحقيقة اول مرة اقرا عن مرقص فهمي عند مارجو بدران

عشان كده ح انزل ادور على كتبه

ده اذا كان فيه اهتمام بكتبه اساسا

الظاهر ما عندوش ولاد يهتموا بتراثه او ولاده مش في مصر

انت عارف اللي بيبقى ولاده مش مهتمين بيه ما حدش بيسمع عنه

عمرو

ههههههههههه

انت زعلت؟
طيب ما تزعلش

بالنسبة للموضوعية

فانا اقتنعت برأي طه حسين

بيقول مافيش حاجة اسمها موضوعية

يبقى ليه نرهق نفسنا بتكلفها

اما بالنسبة لهرمونات الانوثة

ههههههههههههههههههههههههه

معلش بقى نصيبنا


بحري

والله هو اصل قاسم امين ده
كان بيلخبط الواحد

شوية يقول الاسلام حلو الاسلام جميل عايزين نطبق الشريعة

وشوية يقول في كتاب المصريون ان التركي ذكي ونظيف ونشيط والمصري غبي وقذر وكسول ومع ذلك الاتنين متخلفين عشان الاتنين مسلمين

!!!!!!!!!!

مما يؤكد بقى انه كان بينقل افكاره

وده مش كلامي

ده كلام الباحثين

وده ما يعيبوش

لانه كان معروف بشجاعته في مواجهة المجتمع بالاراء الصادمة

حتى لو كانت اراء غيره

يعني يكفيه ان امام بقدر محمد عبده يصدره في معارك صعبة

انت عارف يعني ايه يقول للستات ما تغطوش وشكوا؟

يعني كأنه بيقول لهم دلوقت

اول ما توصلوا ستاشر سنة سيبوا بيوت اهاليكوا وروحوا عيشوا لوحدكوا واشتغلوا

تخيل لو واحد عمل معركة شبه كده مثلا دلوقت

ح يتعمل فيه ايه

اذا كان لما المفتي قال الجواز العرفي حلال

طلعوا ميتينه وقالوا بيبوظ بناتنا علينا

نوشا

ح ادور على كتب لمرقص فهمي واول ما الاقيها ح اعمل لها اعلان في المدونة

مجهول
انت مش راجل؟ مممممممم والله ده رأيك

عموما انا ما زعلتش انت اللي كنت زعلان

او زعلانة

وانا ماليش اي شلل والله

انا في بيتنا

او في الشغل

وساعات العشوائيات

لما باحب اصور بس

بطلت شغل هناك خلاص

وشلتي في بيتنا هم امي وابويا والقطط

وشلتي في الشغل صحابي الهبل

وما بيدخلوش على مدونات اساسا

غير سونيا بس

وماليش شلة في العشوائيات غير صدام وشارون

اه قاسم امين كان ناقل افكار كتير

ولو قريت او قريتي كتبه

ح تلاقيه مضطرب وبيقول كلام عكس بعضه

وهو يحسب له الشجاعة في طرح افكار غيره الصادمة للمجتمع في الوقت ده

بس الاكيد انه ما كانش بيطيق المصريين ما اعرفش ليه

يعني احنا بنشتم في مصر

بس اما تيجي من كردي تبقى تقيلة

انت عارف او عارفة انه كردي؟

Anonymous said...

بصى يا نواره مش عايزه تصدقى أنى ست ’ انتى حره ياختى وده مش موضوعنا’ أما بالنسبه لموضوع الشلليه ،فده مش ذنبك ’ انا قولت أنها ظاهره سايده فى كل المدونات، يعنى شوفى البوست بتاع فتح وحماس والجدال اللى كان فى الكومنت أثرى الموضوع أزاى وأضاف له عنصر الأثاره ’يعنى أنا كل قصدى أن اللى يدخل يعلق لازم يكون هيضيف حاجه تثرى الحوار ,مش مجامله وأمضاء حضور وخلاص .وبعدين أيه يعنى لما قاسم أمين يكون كردى ’طب ماهو صلاح الدين الآيوبى كان كوردى برضه!

Anonymous said...

اه صلاح الدين الايوبي كردي
بس ما كانش بيقول على المصريين اغبيا وكسالى وقذرين

يعني مش معقول يعني احنا بنستقبل اي حد

ومصر اصلا كوزموبوليتان

ومافيهاش عنصرية ولا حاجة

يقوم هو يصنفنا عنصريا ويقول اننا اغبيا ووسخين وكسالى

وان الاتركان نضاف واذكيا ونشطاء

وان اللي مخيبنا احنا الاتنين اننا مسلمين

!!!!!!!!!!!!

وبعدين يجي في حتة تانية يقول الشريعة الاسلامية قمر واحنا عايزين نطبقها

الله يرحمه بقى

عموما هو مات صغير في السن

يعني يمكن لو كان عاش كان استقر على رأي

Anonymous said...

الفكرة إن بيقى فيه نسا بتحب المدون أو المدونة ده عشان كده بيتابعوها، لو واحد بييجي زيارة خاطفة أو متابع ومسش بيعلق كثير مش هيبان

فرؤيتك للموضوع كشللية هي رؤية تشوبها أخطاء منطقية

Anonymous said...

أختى

بداية لا تغضبى من تعليقات بعض الناس ولا تأخذى على اعصابك
ربنا يهديهم

انا أرى انها سياسة التلميع لبعض الاشخاص لهدف معين
يعنى دى افكار دولة ويختاروا من يقوم بالتنفيذ

تحياتى