Sunday 22 May 2011

شابو للثورة المضادة

تحديث:
اه صحيح.. لو الثورة المضادة جابت فينا جون يوم 27 ده حيحمسهم.. ودي احد اسباب نزولي، انا نازلة وحاجيب معايا كل اللي اعرفهم، ولازم كل واحد ينزل ويجيب معاه كل اللي يعرفهم، ولا انتوا مش ملاحظين ان بتوع اسفين يا ريس شامين نفسهم اليومين دول قوي، ولو فشلنا يوم 27 حيحسوا انهم بيحققوا نتائج
استهدوا بالله.. ده فيه دم ساح
حرام عليكم.. انا شخصيا حاعمل الواجب اللي عليا وابري ذمتي قدام ربنا وحسبي الله ونعم الوكيل في المتخلي والندل واللي له حسابات واللي بيفرق الصف عشان مصالح
بالنسبة للسلفيين
كل اصحابي السلفيين نازلين، ايه بقى الموقع اللي عامل نفسه سلفي وبيقول الكفار هم اللي نازلين يوم سبعة وعشرين ده؟
------------------
كده ضربتوا لنا يوم 27؟ 
احنا النهاردة يوم الاحد وفيه مجال يتلحق لو اتعمل شوية حاجات
1- تلغوا مطلب المجلس الرئاسي
2- الاخوان يبطلوا اللي بيعملوه ده.. على الاقل لو مش نازلين يسكتوا
3- تكلموا بعض، القوى السياسية تكلم بعضها
يوم 27 مهم.. كل بتوع الاستقرار وعجلة الانتاج واسفين يا ريس والعفو عند المقدرة وحسنة قليلة تمنع بلاوي كتيرة عاملين حملة كبيرة على النت عشان يحبطوا يوم 27
ومن المؤسف ان الاخوان وسليم العوا يشاركوا في ده
ومن المؤسف ان بعض الداعين ليوم 27 يشاركوا في ده ويتكلموا عن مجلس رئاسي وهم عارفين انهم بيستهبلوا وان ماحدش حيرضى بيه
لا الجيش حيرضى بيه
ولا الاغلبية عايزاه
ثم مالوش لازمة.. مالوش لازمة غير بالنسبة لنا احنا عشان زهقنا من ضرب الشرطة العسكرية
لكن المجلس الرئاسي حننتخبه في شهر وييجي يقعد شهر؟
ولا حنخلي الجيش هو اللي يختاره لنا ويبقى عملنا ايه؟ هي دي ديمقراطية؟ مدام كده كده الجيش بيدير يبقى يدير بنفسه، ونقول له يبطل ضرب فينا بقى
ولا خمستاشر واحد حيقترحوا اسماء ويفرضوها على 85 مليون؟ انتوا اتجننتوا وافتكرتوا نفسكم مين مش عارفة؟ 
ولا حتأجلوا الانتخابات بقى عشان المجلس الرئاسي يقعد له كمان ست شهور؟ طب الناس مش عايزة تأجل الانتخابات
ثم ليه يعني؟ ادوهم سبب، انا عندي سبب اني زهقت من الضرب
وفيه غيري شايفين ان مشكلة الضرب دي تتحل بالمحايلة والعدد الكبير وشهرين يعدوا بالطول ولا بالعرض لحد اما نخلص
كده كل الاطراف تآمرت على يوم 27 بما فيهم بعض الداعين له
وعشان كل الاطراف بما فيهم الداعين لليوم مش عايزينا ننزل انا نازلة، نفسي افهم ايه اللي في اليوم ده بالتحديد اللي مخليهم مش عايزينا ننزل
انا نازلة ومش حاطالب بمجلس رئاسي عشان ده ضد ارادة الشعب اللي عامل الثورة مش الكام مجنون اللي عاملين ايفينتات
ونازلة عشان حاجة كمان... مش عايزة العيال نفسها تتكسر، القوى اللي بتحبط اليوم ده عايزة تكسر نفس العيال، خصوصا اللي انضربوا عند السفارة، وعايزين يقولوا لهم: لا بقى.. مش كل ما تعوزوا تنزلوا حتنزلوا
لا بقى
كل ما يعوزوا ينزلوا حينزلوا.. وماحدش يكسر نفسهم.. وماحدش ينزلهم على ركبهم.. وماحدش يجيب مناخيرهم الارض
لو نزل 200 واحد انا معاهم.. لو نزل الف انا معاهم.. لو نزل مليون انا معاهم.. لو نزلت وما لقتش حد حاروح بيتنا، المهم اني ما اسيبش الناس
وايه ده بقى؟ ها؟ ايه؟ هي بقت كده؟
اللي انكسر ينفع يتصلح، والامور ينفع تتعدل بس اتصلوا ببعض، وهدوا الامور، بتعندوا على بعض ليه الله يكسفكم؟
بجد شابو للثورة المضادة اللي فرقت الصف وفشلت الناس بالطريقة دي، علاء الاسواني قال يوم ما نفقد القدرة على الحشد يبقى الثورة المضادة نجحت
ومتشكرين قوي للاخوان والليبراليين واليساريين والسلفيين اللي بذلوا كل جهد عشان يفقدونا القدرة على الحشد
نردها لكم في الافراح... اذا كنا عايشين يعني
يوم 27 ده لو فكس مبارك حياخد عفو
من الآخر كده... والذنب في رقبة اللي فرق الناس واستهبل 
ولا تنازعوا فتفشلوا وتذهب ريحكم 
اهو.. ده ربنا اللي بيقول اهو
انتوا اتنازعتوا
ربنا ما يقولش الا الحق.. انتظروا بقى الفشل وذهاب الريح

92 comments:

mohamed said...

يا نوارة اصداقي من الاخوان اكدوا لي انهم نازلين في اسكندرية..وده معناه انهم اكيد نازلين في القاهرة ان شاء الله

Anonymous said...

كلامك عين العقل و الله

egyptians25.1 said...

ولو منفزوش مطالبنا نعمل إيه نضرب دماغنا في حيطة ....
احنا نخلي مطلب المجلس الرئاسي لو منفذش طلبطنا علشان كده أنا عملت الورقة دي علشان توحدنا .... واصليها
http://goo.gl/YQqc2

salah said...

عندك حق يا نوارة معاكي قلبا و قالبا

Amani said...

لأ الإخوان مش نازلين... ولا المتدينيين اللى ماشي بكتالوج د. العوا و د.راغب السرجانى ... مش نازليين وواخدينها على كرامة الثورة كمان... انا هرشح العوا للريسه بس زعلانه منه المره دى.... و رأيي ان وحدة الصف أهم من أي مطالب ... شوفولنا حل علشان نتوحد تانى .. مافيش غير ان مبارك يطلع يقول خطاب!!

Amani said...

لأ الإخوان مش نازلين... ولا المتدينيين اللى ماشي بكتالوج د. العوا و د.راغب السرجانى ... مش نازليين وواخدينها على كرامة الثورة كمان... انا هرشح العوا للريسه بس زعلانه منه المره دى.... و رأيي ان وحدة الصف أهم من أي مطالب ... شوفولنا حل علشان نتوحد تانى .. مافيش غير ان مبارك يطلع يقول خطاب!!

مصري اصييل مش من جرابيع التحرير said...

الجربوعة هي انت وبكرة كل الناس هتعرف انت لية جربوعة افتكري هذا اليوم 27يوليو 2011 دة اليوم الا هنكشف للناس انك جربوعة كبيرة

Unknown said...

والله يا أستاذه نوارة أنا أحترمتك جدآ من الحلقة اللى فاتت والمقالة دى عندك قدر من الذكاء لا يستهان به وهى انك وضحتى مطلبك بل غيرتيه كمان بدون اى خجل وانا أوافقك جدآ ولكن لى رجاء عند حضرتك هو عدم التعصب فى برنامجك حتى تكسبى حب الناس وشكرآ لمجهودك

salah said...

كده بقى يوم 27 أهميته في عودة الروح للثورة أكتر من المطالب

Om Kiki said...

نوارة ... ربنا يكرمك وينور بصيرة الباقيين... ربنا معاكي ومع اللي معاكي. إن ينصركم الله فلا غالب لكم...

qqq said...

لا إله إلا الله، لو خسرنا يوم 27 يبقى عليه العوض و خلاص راح مننا الشارع، المشكلة إن فيه شوية حمقى عايزين يركبوا الثورة و وجود الانتهازيين دوله في أي حدث لا بد يفشلوا و يبوظوا، الثورة نجحت لما كانت طبيعية و عفوية و بلا زعامات، دلوقتي بأه بقت مليانة زعامات و هو ده اللي فتت الناس، ممكن أعرف فين شباب الائتلاف، فين وائل غنيم؟ كل دول اختفوا و لا إيه؟ استمري بارك الله فيكي لو اتكسرنا يوم 27 يبقى خلاص العسكر و الخليج و أمريكا هم اللي راح يحكمونا.

arabian_faithful said...

يعنى أنا لو مسمعتش كلامك يبقى أنا السبب فى التفرقة طيب وليه ما تكونيش حضرتك السبب فى الإنقسام!

محمد عبد الغفار said...

انت فى العموم اختلف معك كثيراً - اما هذا فكلام حق وللحق احيكى انت اللى تستاهلى الشابو

Anonymous said...

ربنا يهدينا للى فيه الخير ان شاء الله...

Anonymous said...

ربنا يقدم اللى فيه الخير...

Unknown said...

انا عايزة اعرف فين الشباب اللي قامت الثورة بيهم لية سايبيين القوي السياسية تسرق الثورة فين رأي الائتلافات اللي اتشكلت و لا هم كمان باعوا الثورة

lavender said...

ليه ما تقوليش ان اللي نازلين و اللي عايزين مجلس رئاسي مدني هم اللي "تنازعوا"

om said...

أستاذة نوارة و التى أحبها بصدق
أعتب عليكى تعصبك الشدييييييييييد لأرائك و استعمالك المفرط للترهيب من المصير الفظيع الذى ينتظر الشعب لو ما سمعش كلامك، و الصاق الاتهامات بالجملة بالخيانة للوطن و الندالة و و و... إلخ لكل واحد مش هيشارك فى إللى إنتى بتدعى ليه!!!ليه كدة يا حبيبة قلبى؟
نفس منهج الليبراليين و العلمانيين -سبحان الله- فى مهاجمة الغير ممن يختلف معهم فى الفكر، رغم إنى أشهد أنك لست منهم بل أنتى مسلمة مصرية ملتزمة و كلام ربنا على راسك من فوق فى كل مواقفك...
الشرع و القانون بيقولوا "البينة على من ادعى و اليمين على من أنكر" و هنا أنا بطلب منك تطلعى دليلك على كل كلمة إنتى كاتباها فيها تحريض عاطفى أو عملى للناس، و دليلك على اتهاماتك للإخوان و العلمانيين و الليبراليين و السلفيين بإنهم هيستندلوا يوم27 عشان مصالحهم الشخصية و و و ... كلام ما يخرجش من واحدة عاقلة و زكية زيك..و ليه ما يكونش من ضمن نوايا إللى مش عاوز يشارك إنه ما نبتذلش روح الثورة فى الفاضى و المليان؟ عشان لما نحب نحشد الناس فعلا للمواضيع الأهم بجد نلاقى الناس متحمسة - كلها- عشان إحنا مش كل شوية نقول للناس "الجمعة دى بقى أهم من قبل كدة دى هتحييى روح الثورة، و إللى مش هييجى يبقى خاين و ندل و حسبى الله و نعم الوكيل فيه، و الثورة المضادة هى إللى هتحبط 27 لو تم إحباطه..."فيه إيه يا حبيبة قلبى بس؟ ما روح الثورة موجودة و حية و مش محتاجة بنزين!!؟ و بعدين دة انتى إللى بتطالبى إننا ما نتفرقش، يعنى لما تلاقى الأغلبية "المحترمة و الوطنية" معترضة على النزول يوم 27 مثلا يبقى ليه إنتوا تركبوا دماغكو و تنشقوا عنهم و يبقى هما إللى اسمهم بينشقوا عنكم؟؟ أنا طبعا عاذراكى فى خروجك عن صوت العقل الكام يوم إللى فاتوا نظرا للأحداث إللى تشيب الواحد و نظرا طبعا لإنك أنثى -زييى يعنى- و النساء بطبيعتهم عاطفيين أكثر منهم عقلانيين، لكن فى نفس الوقت مش قادرة أعفيكى من مسئولية إنك تكلمى الشعب و إنتى فى الحالة دى لإنك عارفة إنك ليكى تأثير على الناس و ممكن تقولى كلام تندمى عليه بعد كدة و تضطرى تسحبيه من المدونة أو تعتذرى عنه و دة يفقدك شئ من مصداقيتك ، و دى حاجة تزعلنى .. أتمنى إنك تسمعى لصوت العقل و الديموقراطية و تستجيبى لقرار اللجنة التنسيقية على اعتبار إنها صوت الأغلبية العاقلة و والمحترمة و الوطنية فعلا... و هى عموما فيها مستقلين مشتركين، فإيه رأيك إنتى و بلال فضل تشتركوا فيها و يبقى ليكم دور إيجابى إضافى برضه؟؟

حاجة أخيرة : مش معنى إنك كلمتى كام واحد على التويتر من الإخوان أو الليبراليين أو أو ...إنهم فعلا إخوان أو ليبراليين أو ...، أو -لو افترضنا إنهم فعلا حد من دول- زى أنا بعمل نتيجة لانتشار الشائعات و إنتى ست العارفين فبلاش تكونى من أدوات ترويج الشائعات- بدل ما تنشرى عنهم إشاعات، هما أو العلمانيين حتى، أو السلفيين إللى ظلمناهم فعلا بتصديقنا للإشاعات عنهم و كانوا بيطلعوا براءة من كل تهمة و التانية.. لإن دة ظلم و الظلم فى الدنيا نتيجته بتبقى ظلمات يوم القيامة.. و من لم يجعل الله له نورًا فما له من نور...
و إلى لقاء قريب يا نوارة الانتصار يا مجنانى :)

Hady said...

يا نوارة سامحيني انا فيه كلمة واقفة في زوري وعاوز اواجهك بيها... طريقتك بتاعت استهبال النفس و اعطاء اعذار للمجلس سواء سواء حقيقية او مصطنعة اللي ادت بينا لده و كنت فاكر انك هتتغيري... و لو بتعملي ده خايفة من اننا نكون قلة احنا كنا دايما قلة بس ربنا بقى هو اللي لم الناس و جمعهم و بالنسبة للي مش نازلين بقولهم من امتى كنتم بتنزلوا سيبتونا لوحدنا و لما لقيتم الموضوع جد جيتم ها... ما تخلوناش نتكلم و بعدين مش قصدي أقلل من دور حد في يوم موقعة الجمل بس هي دي الحقيقة و اللي بتتخلوا بسببه عن الناس ربنا هيوريكم انه سراب و اوهام بس لما تكونوا خسرتوا الناس و مش هترفعوا عنكم في وش حد... المهم اضيف انك بطريقتك دي و فيه ناس بتتبعك من غير ما تفكر هيبقى ذنبهم في رقبتك... الاصوات عماله تعلى بالمجلس الرئاسي على العموم بس حتى لو مش اغلبية اهي كورة تلج بندحرجها و انتي بتوقفيها و بتصرفي ناس تقدري توجهيهم عن ده يعني انتي اللي بتساعدي على عرقلة و كتم الصوت... لو وضحتي و كشفتي و نبهتي هيزيدوا و كرة التلج هتكبر... و كم من فئة قليلة اهو هنعمل الصح و لو مرة و بشجاعة اللي عاوز يخاي مسؤليته يقول الحق و خلاص و مش هراجعك تاني في المقف ده و سامحيني لو كنت ضايقتك... بس بجد و يا ستي لو مش مسامحة ابقي اعمليلي عذر من بتوع المجلس اللي بتهدي الناس بيهم من اول ما المجلس جه لحد ما طمع و طمعتيهم فينا و فهمونا غلط... اسف بجد لو زعلتك او ضايقتك بس فكري في اللي بقول عليه

emi_80 said...

بالنسبه للصفحه الغريبه بتاعت السلفيين طبعا اساسي يتعملها ريبورت وانا عن نفسي عملتلهم ريبورت انا نازله انا وزمايلي وبالضبط ده اللي حصل يوم25 وناس كفرتنا وناس قالو علينا بلطجيه وده يخلينا نثبت اكتر على موقفنا لاننا صح والكل بعد كده هيقولو احنا قولنا اننا معاهم يوم27 وبكره افكركو وان شاء الله هيكون يوم حريه جديد على مصر

متفائل said...

يوم 27 ده لو فكس مبارك حياخد عفو
من الآخر كده... والذنب في رقبة اللي فرق الناس واستهبل

لا .. الذنب مش ذنبه .. الذنب حيكون في رقبة من دعا للحشد وهو غير متأكد من قدرته على ذلك .. الذنب ذنب من وضع الثورة في إختبار يكشفها أمام أصحاب الثورة المضادة (والجيش للمرة المليون ليس من أصحاب الثورة المضادة) .. إنتي بتتريقي على الخمستاشر واحد اللي بيقرروا حاجات وعايزين يفرضوها على الخمسه وثمانين مليون ؟ طب مانتي من الخمستاشر دول .. قررتي أنه لابد من النزول يوم الجمعة الجاية (ضد مين وليه ماعرفش) وعايزه تفرضي قرارك ده على الملايين باعتبار أنه القرار الصح واللي يعارضه خاين وعميل وإبن كلب إلى أخر قائمتك الشهيرة .. نفس ديكتاتورية الحزب الوطني بالظبط

محمد طنطاوي said...

لأ أنا مش معاكم فى إن يوم 27 لو خسرناه معنى كده إن فيه موقف من الثورة الاك ده بيحبطنا ، أولا الثورة المضادة مش مستنينه حتى لو خسرناه علشان يققوا نتايج ، لأن هم فعلا حققوا نتايج كبيرة فى الأيام اللى فاتت ماكنوش يحلموا بيها
من غير 27 ، وهيحققوا نتايج كمان حتى لو كسبنا 27 ، المطلوب هو إننا ما نيأس لو كسبناه هيفرق كتير ولو خسرنا ده بيدينا دفعة لموقف تانى ويوم تانى ، بس اليوم التانى ده أنا متأكد إن إحنا مش هنختلف زى ما إحنا مختلفين دلوقت بالعكس هنتجمع تانى وهنبقى أقوى من الأول وهنحقق مكاسب أكتر من الأول ومفيش مانع تكون الثورة المصرية الثالثة أكثر تنظيما وأكثر قدرة على التحرك والوصل إلى أهدافها وبسرعة شديدة

om said...

و بمناسبة الإشاعات كتبتى فى مدونتك "عشان كدة بقى شيخ الأزهر بيقول الرحمة فوق القانون"!! طريقة كلامك توحى للجميع بالتصديق.. بينما الخبر تم تكذيبه من شيخ الأزهر بنفسه و تم تحريف كلامه -كعادة الصحافة المغرضة- و إنتى شربتى المقلب و نقلتى الإشاعة مع إللى بينقلوا الإشاعات:)
صدقينى أنا قلبى على مصلحتك، اللسان دة مشكلة كبيرة:فلتقل خيرا أو لتصمت..

اللينك بتاع تكذيب شيخ الأزهر أهو بما إنى بحب أتكلم بالدليل (و يا ريت كلنا ما نتكلمش غير بالدليل)

http://www.egyptwindow.net/news_Details.aspx?News_ID=12623

و بتمنى على الله يصدروا قانون للصحافة يعاقب على الكذب بعقوبات تدريجية إنذارية تتدرج مع تكرار الكذب، بتدأ من التشهير بالصحيفة أو القناة الإعلامية التى نشرت خيرا كاذبا، و تتطور العقوبة مع تكرار الكذب حتى تصل إلى حد إيقافها عن العمل، قولوا آمين.. و الكداب بيروح النار، عافانا الله منها
سلام يا حبيبتى يا مجنانى :)

bang887 said...

على فكرة، إفشال فلول النظام السابق لجلسة الحوار الوطنى اليوم، هى على ما يبدو رد على مقاطعة الإخوان وقوى أخرى لحوار يحيى الجمل بالأمس.

نورهان رمضان said...

و هو انتى ليه بتفرضى ان مطلب مجلس رئاسى هوالى هيفرق الناس
يعنى مطلب مجلس رئاسى ده مش هينزل كام واحد ؟؟ 10 الاف مثلا !!
ومين فالك ان الغاء ملطب المجلس الرئاسى ده مش هيفرق الناس بردو.انا اعرف ناس كتير نازله عشان المجلس الرئاسى و بس وانا واحدة منهم
نوارة انوا نيمتوا الناس 3 شهور بحبكوا للمجلس العسكرى
وانتى لو مع المجلس الرئاسى انضمى للناس معانا كلنا
مش لازم تقعدى تجمعى عدد و تلزقى احنا مش بنتحايل على حد والناس فى الشارع محتقنه و عايزه محلس رئاسى كتير اوى اوى منهم
لكن احنا مش نازلين نشحت !

romagalaxy said...

نواره
بس المجلس العسكري ده بيقولوا عليه متواطئ
و بيفرقع بلالين ايه يضمنا انهم فعلا هايمشوا بعد شهر

bang887 said...

البورصة تحقق مكاسب قياسية اليوم تصل إلي 8 مليارات جنيه

http://gate.ahram.org.eg/News/73714.aspx

طبعا ده دليل على قرب إفلاس مصر، والانهيار الاقتصادى، وهلع المستثمرين من العمل فى مصر، إللى عمال يروج له ساويرس وجرايده وقنواته بالإضافة لوزير المالية بتاع السلف.

deweyes said...

استغفر الله العظيم يارب.. أكبر غلطة حصلت ان الناس سابت التحرير لما مبارك اتخلع.. ونسيو ان دا كان مطلب واحد فقط من الثوره.. وقعدنا نقول يا جماعه أنصاف الثورات تبيد الشعوب.. ومحدش راضي يسمع
بس ان شاء الله تتحل.. ان شاء الله الناس كلها تنزل تاني.. ان شاء الله العدد المره دي يبقى 60 مليون.. يااااارب احفظنا يارب واحفظ بلدنا.. يارب لو مصر صحيت العرب كلهم هيصحو.. يارب انصرنا عشان نساعد ليبيا وسوريا واليمن.. ياااارب اهدي قلوب الناس
ربنا يكرمك يا نواره.. ربنا يكرمك يارب ويحميكي ويكتر من أمثالك

بساطه said...

عجبني اوي البرنامج بتاعك الحلقه التالته .. بس نفسي تهدي شويه الله يكرمك عشان توصلي لناس اكتر .. مش عيب والله

الناس نازله خناق .. الي بنسميهم نخبه نازلين بهدله في بعض والشارع في وادي تاني .. قرفان .. بس من حجات تانيه خالص
حاسس ان المجلس العسكري بيستهبل .. لكن مش عايز يشيله .. الشارع طريقته مختلفه ولازم نتعامل معاه

بساطه said...

اه ده الجربوع ابن التييييت الي عندك ده ؟؟ ايه القرف ده يانواره ؟؟ امشي اطلع بره ياابن.....؟ غور ياض

متغربه said...

يا نوارة الله يسترك شوفيلنا حل في جوز الفلول ولا امن الدولة اللي موجودين عندك انا واحده صاحبه عيال و نفسي ربنا يكرمني و اربيهم الله يسترك اتصرفي فيهم

Unknown said...

مساء الخير يا جماعة ....محدش فى البلد اليومين دول يقدرينكر الدور الحقير اللى بيلعبوه مبارك المخلوع وكلابه فى تفتيت البلد وتشتيت ارادةالشعب املا بالهروب من المحاكمة ...لكن انا شايف الامل موجود ان شاء الله ...فغالبية الناس رفضت اعتدار المخلوع اللى كان ناويين يطلعوه قبل ما يطلع ...وده دليل ان الناس صاحية وان كان الاغلبية ساكتة شويه بعد ما خوفوهم على البلد والسولار والعيش ....لكن ربنا كبير ومش هيضيعنا

torero said...

شدوا حيلكم
كل كلامك صح
الشعب كله لازم ينزل
بس متخافيش
ربنا معاك

كيوبيد said...

نواره انتى عايزه الاخوان والسلفين ينزلو ضيفى على المطالب دى دولة الخلافه الى عقلاء سنة 1924 رافضو انه تقام فى مصر على يد الملك فواد الاول الاخوان ومن اتبعوالتيار الاسلامى هايبقو يابعتو للشعب رسالة شكر على اسقاط نظام مبارك لهمالناس دى خلاص سيبك منه ايدك منه والارض انسى دول خلاص الحاجز الصعب قدمه الحمد الله الشعب كسور لهم وشاله من طريقهم والباقى هما عارفينه خلاص ينزلو ليه فى مظاهرت تانى وانا من هنا بقول لتيار الاسلامى كله انتو جزاء من الكل ومحدش هايسيب حقه مش هاسيب دم الشهيد مش هاسيب حقى فى ثوره دافعت عنه وصنعته بايدى وباذان الله يوم 27يكون ثورة ثانيه علشان تعرفو حجمك الحقيقى فى المجتمع والله الموفق

mazen said...

ا اخت نوراة بجد حرام عليكم بقي كفاية تهريج بقي لتم عصام شرف واهو جيه عصام شرف ومعملش حاجة هنفضل لغاية امتي مظاهرات ومين طلب منكم تتكلموا باسم الشعب المصري بجد كفاية ..وكفاية تجريح في الجيش حرام عليكم .الجييش هو اللي عمل الثورة وحمي الثورة عايزن تحاكموا حد حاكموا الحمار اللي اسمه عصام شرف ده اخره رئيس حي هو والعيسوي ..البلد هتخرب كفاية غباء بقي

mazen said...

ا اخت نوراة بجد حرام عليكم بقي كفاية تهريج بقي لتم عصام شرف واهو جيه عصام شرف ومعملش حاجة هنفضل لغاية امتي مظاهرات ومين طلب منكم تتكلموا باسم الشعب المصري بجد كفاية ..وكفاية تجريح في الجيش حرام عليكم .الجييش هو اللي عمل الثورة وحمي الثورة عايزن تحاكموا حد حاكموا الحمار اللي اسمه عصام شرف ده اخره رئيس حي هو والعيسوي ..البلد هتخرب كفاية غباء بقي

Dr.issamo said...

برضه راكبة دماغكومش بتقري التعليقات ولا بتفكري ان انتي ممكن تكوني غلط


يا نوارة

اللي مش هينزل
مش خاين
ولا اخوان
ولا سلفي
ولا من بتوع اسفين يا ريس
ولا مع العفو عن المخلوع
ولا من الثورة المضادة
ولامن المتخاذلين

اللي مش هينزل
مقتنع ان دي هي مصلحة مصر
وان المهم العمل للي جاي
وبناء المستقبل
والاستعداد للانتخابات

يا عاقلة يا كمل
ارجعي لعقلك

الثورة مش هتروح ولا حاجة لو مانزلناش

وما زلنا نقدر نحشد بس لو في اجماع

ولازم يستمر الحوار مع الجيش

كشريك وليس كخصم

سلام يا نوارة مصر

omima said...

يانوارة الثورة المضادة شغالة اللة ينور واللى دعمها اكثر كلام اليومين اللى فاتو عن الاقتصاد خلاهم رقصوا تانى واما وسائل الاعلام كثرت من استضافة بتوع اسفين يا خرة بسؤء نية مع اخبار فلوس السعودية مع اخبار اعتذار سى زفت وابناء المنتفعين وبقايا امن الدولة شغالين على النت اللة ينور وزاد الطين بلة رغبة الناس اللى قاموا بالثورة فى تولى مناصب واللعب مع الاخوان والسلفين وهلم جرجر وحسبنا اللة فى مقدرات شعبب يتلعب يهامن ناس معندهاش احساس بالمسئولية انا هاجى معاكى يوم الجمعة وربنا ياخد كل اللى قرفونا كلام عن الثورة وهم اخر ناس ممكن يتعبوا عشانها

itachi said...

انا رأيي انه لازم يوم 27 يتأجل احسن لانه اخد سمعه سيئه خليها الجمعه الجايه احسن

Lilian said...

نواره انا شايفه ان امن الدوله عاملين شغلهم المعتاد طبعا دول سلفيين تايوانى بس احنا مش لازم نتهز من الكلام ده ولازم كلنا ننزل ربنا معانا وان شاء الله حاينصرنا عليهم

Lilian said...

نوارة الانتصار تاكدى ان فيه ناس مخلصين كثير هما بيلعبوا باعصابنا ربنا ان شاء الله معانا ودم الشهداء مش حايروح هدر احنا كمان عايزين اكبر عدد من اخواننا الاقباط وعلينا جميعا بالدعاء انه نعم المولى ونعم النصير

lavender said...

لماذا لا يكون الداعين لمجلس رئاسي هم من "تنازعوا"

Hunter.Wolf said...

إلي الأستاذة نوارة

بخصوص الناس الغريبة اللي بتكفر اللي نازلين يوم 27 .. سيبك منهم .. أنا صحيح مش موافق علي التصعيد دلوقتي وشايف أن أحنا نتسني شوية بس أن مع حقك وحق كل اللي عاوز ينزل يوم 27 (مع تحفظي علي موضوع الأعتصام المفتوح أو الشعارت المهينة للجيش والمجلس العسكري) .. أنزلوا وأعرضوا مطالبكم (اللي أنا متفق مع ضرورة تنفيذ معظمها مع شيئ من التريث) وربنا معاكم ومعانا ومع مصر كلها

ولكن في جزء من كلام الناس الغريبة التكفيريين) فيه شئ من المنطق ...

كيف يمكن للقوات المسلحة والحكومة المؤقتة ان تقوم بتحقيق كل مطالب الثورة والشعب وهناك من يقوم بمظاهرات واعتصامات فى كل مكان لتحقيق مطالب فئوية أو مطالب خاصة ؟ وكيف يمكنك العمل تحت هذا الضغط الرهيب بإنجاز مطالب للشعب بعد انهيار تام على مدار ثلاثون عاماً ؟

ده كلام منطقي مفيش عاقل يقدر يختلف معاه .. أزاي مطلوب أصلاح أقتصاد وسياسة وهيئات ظل يتراكم فيها الفساد ثلاتين سنة في أقل من ستة أشهر ..ويا ريتها ستة أشهر هادئة .. ده كل أسبوع بيحصل أعتصام فئوي أو أضراب في مصنع أو هيئة ده غير ألاعيب الفلول من النظام السابق وغيره وغيره .. هل معقول نطلب من الحكومة النتقالية والمجلس يصلحوا كل العك اللي عمله مبارك في تلاتين سنة في الفترة القصيرة دي .. ولا ده المفروض يكون دور المجلس المنتخب والرئيس الجديد ... علشان كده لازم ناخد كل الأحتياطات نعمل كل حاجة علشان نضمن أن الأنتخابات تتعمل في وقتها وتكون نزيهة وناجحة .. وأعتقد ده اللي بيحاول الأخوان أنهم يعملوه .. لازم كل الناس تركز علي موضوع الأنتخابات لأنها لو نجحت حتكون أكبر ضربة للنظام القديم (خصوصاً أنها هتم بنظام القائمة النسبية بشكل كبير مع وجود الفردي برضه) .. لازم نشتغل علي توعية الناس وزيادة وعيهم السياسي والأنتخابي وتشجيعهم أنهم ينزلوا ويصوتوا في الأنتخابات

eng gam3a said...

يا نوارة الإخوان ضد المجلس الرئاسي والناس اللي عايزين مجلس رئاسي مش مبطلين

https://www.facebook.com/THAWRA.MASRYA

الصفحة دي بتاعة ثورة الغضب الثانية بينشروا فيها الصفحة دي اسمها مطلبنا الأساسي مجلس رئاسي
https://www.facebook.com/MAGLES.REASEY

عشان كدة مستحيل الإخوان ينزلوا الجمعة دي واللي طالبين مجلس رئاسي بيكابروا لحد دلوقت وفاكرين إنهم هايعملوا حاجة من غير الإخوان

الميدان said...

http://mtahrir.blogspot.com/2011/05/blog-post_22.html?spref=fb

Feuercheval said...

صحيح اني مش متفائل علي المدي القصير للاسباب اللي وضحتها في البوست السابق ولا داعي لتكرارها هنا حتي ما تتهمنيش ببث الفرقة (وان كانت المواقف الاولية للسلفيين والاخوان من المشاركة بتتطابق مع توقعاتي) لكن علي المدي الطويل انا متفائل جدا. أولا الثورة عملت تغييرات عميقة في الشخصية المصرية, أبرزها غرس ثقافة الاحتجاج بشكل مش حيخلي الناس تسكت كتير علي الحال المايل في المستقبل, وكل ماتزيد تجاوزات الشرطة الناس حتفتكر ازاي سحقوا اعتي جهاز للقمع في الشرق الاوسط في يومين اتنين, وده يديها ثقة في قدرتها علي تقويم المعووج فتنرل للشارع وتقوم بالواجب. باختصار صورة المصري اللي بيقبل بالذل والضرب علي القفا انتهت لغير رجعة وبكرة تشوفي.

ثانيا مفيش أي حاكم بعد كده حيجرؤا يهين في الشعب أو يسرقه زي ما رجالة مبارك عملوا طول مامنظر أعضاء الحكومة ولجنة السياسات وهما بيتجرجروا علي طرة حيفضل حاضر في ذهن أي طاغية أو حرامي مستقبلي لفترة طويلة. صحيح ان التأثير حيكون أوقع لو ازدان عصر الرعب ببعض الرؤوس الطائرة علشان الدرس يثبت لكن حتي لو رسيت علي أحكام سجن للبعض وتطبيق الشعب للعدالة بنفسه في اللي حيفلت من العقاب حيتحقق المطلوب. ألشعب لغاية دلوقتي مش مقدر أد ايه حكامه المؤقتين مرعوبين منه. كفاية بيانات الاعتذار من نوعية "رصيدنا لديكم يسمح" والقرابين المقدمة بين يدي كل مليونية (اقالة شفيق, حل أمن الدولة, القبض علي مبارك وعيلته الخ). ايا كان الكلام اللي ممكن يتقال عن الناس اللي ماسكة دلوقتي فهما أعصابهم خفيفة جدا بالمقارنة بمبارك وبالرغم من تظاهرهم برباطة الجأش الا انهم يمكن الهت عليهم بسهولة.

ثالثا الاخوان مش وحشين للدرجة دي. وسواء كان المستقبل القريب بيحمل في طياته حكومة اخوانية أو ائتلافية للاخوان دور قوي فيها أو حتي معارضة اخوانية قوية فمن المؤكد ان السياسة الحارجية حتكون أحسن بكتير جدا من نظيرتها في حكم مبارك كما انهم حيجتهدوا لتحسين الاحوال الاجتماعية والاقتصادية للمجتمع ككل زي ما اردوغان عمل. صحيح ا ن ده غير كافي لارضاء طموحاتنا في العدالة الاجتماعية و اقامة الدولة المدنية لكنه يمثل تحسن كبير عن النظام السابق. ده طبعا غير ان مناخ الحرية النسبي حيدي للتيارات اليسارية والقومية والليبرالية فرصة الوصول للجماهير وبمرور الوقت حيبقي فيه مشاركة حقيقية للسلطة.

فمافيش داعي نعلق كل آمالنا علي الجمعة الجاية أو نرمي نفسنا تحت الدبابات لو مقدرناش نحقق فيها اللي احنا عايزينه. صحيح ان قوي الثورة المضادة حتكون كسبت بكده جولة علي المدي القصير واكتسبت بعض الطاقة, ولكنها طاقة حركة مرحلية محدودة لا تقاس بطاقة الوضع الرهيبة اللي بتتخزن عند الناس واللي كلنا شفنا لما بتطلع بتعمل ايه (والله غالب علي أمره ولكن أكثر الناس لايعلمون) يتبع

om said...

أستاذة نوارة و التى أحبها بصدق
أعتب عليكى تعصبك الشدييييييييييد لأرائك و استعمالك المفرط للترهيب من المصير الفظيع الذى ينتظر الشعب لو ما سمعش كلامك، و الصاق الاتهامات بالجملة بالخيانة للوطن و الندالة و و و... إلخ لكل واحد مش هيشارك فى إللى إنتى بتدعى ليه!!!ليه كدة يا حبيبة قلبى؟
نفس منهج الليبراليين و العلمانيين -سبحان الله- فى مهاجمة الغير ممن يختلف معهم فى الفكر، رغم إنى أشهد أنك لست منهم بل أنتى مسلمة مصرية ملتزمة و كلام ربنا على راسك من فوق فى كل مواقفك...
الشرع و القانون بيقولوا "البينة على من ادعى و اليمين على من أنكر" و هنا أنا بطلب منك تطلعى دليلك على كل كلمة إنتى كاتباها فيها تحريض عاطفى أو عملى للناس، و دليلك على اتهاماتك للإخوان و العلمانيين و الليبراليين و السلفيين بإنهم هيستندلوا يوم27 عشان مصالحهم الشخصية و و و ... كلام ما يخرجش من واحدة عاقلة و زكية زيك..و ليه ما يكونش من ضمن نوايا إللى مش عاوز يشارك إنه ما نبتذلش روح الثورة فى الفاضى و المليان؟ عشان لما نحب نحشد الناس فعلا للمواضيع الأهم بجد نلاقى الناس متحمسة - كلها- عشان إحنا مش كل شوية نقول للناس "الجمعة دى بقى أهم من قبل كدة دى هتحييى روح الثورة، و إللى مش هييجى يبقى خاين و ندل و حسبى الله و نعم الوكيل فيه، و الثورة المضادة هى إللى هتحبط 27 لو تم إحباطه..."فيه إيه يا حبيبة قلبى بس؟ ما روح الثورة موجودة و حية و مش محتاجة بنزين!!؟ و بعدين دة انتى إللى بتطالبى إننا ما نتفرقش، يعنى لما تلاقى الأغلبية "المحترمة و الوطنية" معترضة على النزول يوم 27 مثلا يبقى ليه إنتوا تركبوا دماغكو و تنشقوا عنهم و يبقى هما إللى اسمهم بينشقوا عنكم؟؟ أنا طبعا عاذراكى فى خروجك عن صوت العقل الكام يوم إللى فاتوا نظرا للأحداث إللى تشيب الواحد و نظرا طبعا لإنك أنثى -زييى يعنى- و النساء بطبيعتهم عاطفيين أكثر منهم عقلانيين، لكن فى نفس الوقت مش قادرة أعفيكى من مسئولية إنك تكلمى الشعب و إنتى فى الحالة دى لإنك عارفة إنك ليكى تأثير على الناس و ممكن تقولى كلام تندمى عليه بعد كدة و تضطرى تسحبيه من المدونة أو تعتذرى عنه و دة يفقدك شئ من مصداقيتك ، و دى حاجة تزعلنى .. أتمنى إنك تسمعى لصوت العقل و الديموقراطية و تستجيبى لقرار اللجنة التنسيقية على اعتبار إنها صوت الأغلبية العاقلة و والمحترمة و الوطنية فعلا... و هى عموما فيها مستقلين مشتركين، فإيه رأيك إنتى و بلال فضل تشتركوا فيها و يبقى ليكم دور إيجابى إضافى برضه؟؟

حاجة أخيرة : مش معنى إنك كلمتى كام واحد على التويتر من الإخوان أو الليبراليين أو أو ...إنهم فعلا إخوان أو ليبراليين أو ...، أو -لو افترضنا إنهم فعلا حد من دول- زى أنا بعمل نتيجة لانتشار الشائعات و إنتى ست العارفين فبلاش تكونى من أدوات ترويج الشائعات- بدل ما تنشرى عنهم إشاعات، هما أو العلمانيين حتى، أو السلفيين إللى ظلمناهم فعلا بتصديقنا للإشاعات عنهم و كانوا بيطلعوا براءة من كل تهمة و التانية.. لإن دة ظلم و الظلم فى الدنيا نتيجته بتبقى ظلمات يوم القيامة.. و من لم يجعل الله له نورًا فما له من نور...
و إلى لقاء قريب يا نوارة الانتصار يا مجنانى :)

Feuercheval said...

تتمة: فقط حبيت أوضح نقطة واحدة أرجو ما تكونش غايبة عن الجميع: مفيش حد حيسمح باصلاحات يكون من شأنها فقدانه لزمام الامور, يعني مثلا أكبر انتقاد وجه للاخوان في الماضي انهم عمرهم ما حيوصلوا للتمكين من خلال اللعب طبقا لقواعد النظام السابق لان النظام مش بالسذاجة انه يحط قواعد للاتخابات مثلا تؤدي ان الاخوان يشكلوا الحكومة, و فعلا ده كان انتقاد صحيح لان النظام عمره ما سمح بان الاخوان يلعبوا أي دور مؤثر والامر احتاج بعد كده لثورة لازالة النظام. بنفس المنطق المجلس العسكري (اذا كنا اخيرا اقتنعنا انه متواطئ مع النظام السابق أو بلاش كلمة متواطئ دي اذا كان لا يزال في القلب منها شيئ خلينا نقول "يحبذ استمرار التوجهات العامة للنظام السابق مع ادخال بعض الاصلاحات الغير كافية من وجهة نظر الثوار" كويس كده؟) مش حيرضخ طواعية لاي مطالب مؤثرة من الثوار ف المظاهرة أو بعدها اذا كانت المطالب دي في النهاية حتؤدي لانهاء توجهات النظام السابق. يعني بالبلدي كده المشكلة مش في المطالبة بمجلس رئاسي او عدمه, المشكلة انه كل ما كانت المطالب هايفة (زي الافراج عن شوية عيال معتقلين أو تخفيف الاحكام عليهم) المجلس حينفذها فورا دون ابطاء عشان يرفع غطا الحلة ومايخليش الضغط الشعبي يزيد. وكل ما كان المطلب ممكن نديه بالايد اليمين وناخده بالشمال (أقبض علي سوزي وبعدين اسيبها بعد كام يوم, أحل امن الدولة واعيد تكوينه تحت اسم الامن الوطني) يبقي مافيش مانع. واذا اضطر الامر الي اعمل بعض التضحيات الحقيقية (أحاكم مبارك بجد) يبقي حاعملها في الاخر خالص وبرضه انا عارف انها تضحية بشخص مش بسياسات. لكن مش ممكن اعمل تضحيات حقيقية تؤدي لانهاة سياسات النظام السابق (حل جهاز الامن الوطنى بجد واخضاع الشرطة لسلطة القضاء, اعادة توزيع الثروات الخ) لانه بارضوخ للمطالب دي أبقي أنا فعلا بانهي النظام السابق اللي عمال أناور عشان يستمر.

باختصار الثوار ممكن مايطالبوش صراحة باسقاط المجلس العسكري وتشكيل مجلس مدني رئاسي اذا كانوا شايفين ا ن ده حيشق الاجماع , بس لازم يطالبوا بمطالب حقيقية تنهي فعليا النظام السابق وده حيكون الاختبار الحقيقي لمزاعم المرجفين عن ارتباط المجلس العسكري بالنظام السابق لانه لو ما كانش مرتبط حينفذها بكل بساطة لكن لو كان مرتبط حيرفض قتل الام اللي بيعيش في احشائها او قطع الحبل السري اللي بيربطه بيها وساعتها يبقي اللعب بقي علي المكشوف ويبقي هو اللي طالب المواجهة مش الثوار اللي حيبقي عداهم العيب و أزح. لكن أرجع وأقول في ظل غياب الوعي الشعبي بالكلام ده وعدم مشاركة القوي الاسلامية ذات الوزن الجماهيري الكبير, ما حدش حينزل غيرنا احنا. معلش نحاول برضه بس مانموتش نفسنا لو فشلنا.

om said...

خبر سعييييييييييد
إحالة مبارك للجنايات في قضية قتل الثوار.. الأربعاء:
خبر سعيد بس مش إشاعة -على الأقل لحد دلوقت مش إشاعة لإنه بدليل- و غالبا مش هيطلع إشاعة لإنه من موقع الإخوان و هما حسب خبرتى عنهم و رغم إشاعاتكم عنهم ما بيكذبوش- يمكن المصدر القضائى يتراجع عن القرار أو يكذبوه بعد كدة كل شئ وارد..

http://www.ikhwanonline.com/new/Article.aspx?ArtID=84783&SecID=230

متفائل said...

نفس منهج الليبراليين و العلمانيين -سبحان الله- فى مهاجمة الغير ممن يختلف معهم فى الفكر، رغم إنى أشهد أنك لست منهم بل أنتى مسلمة مصرية ملتزمة و كلام ربنا على راسك من فوق فى كل مواقفك

كده ؟ بقى الليبراليين والعلمانيين هما اللي بيهاجموا الغير ممن يختلفون معهم في الرأي ؟ ويمكن بيحاولوا يقتلوهم كمان زي ما حاولوا يقتلوا نجيب محفوظ ونجحوا في قتل فرج فودة ؟ .. وبتقولي لنوارة أنك تشهدين أنها ليست من العلمانيين والليبراليين بل هي مسلمة مصرية ملتزمة ؟ قصدك إن العلمانيين والليبراليين كفرة ؟.. يعني سعادتك بتكفريهم لمجرد إختلافهم معك في الرأي .. ثم تواتيكي الشجاعة (هل أقول البجاحة؟) لتلصقي بهم كل التهم التي تنطبق عليك بشدة أنتي وأمثالك .. شر البلية ما يضحك فعلاً
... إلى الأخت صاحبة التعليق الذي إقتبست منه هذا الجزء

ساعي الخير said...

العدل

الناس مش هتجتمع غير علي العدل

و أنتي أول واحدة كانت السبب في الفرقة

لأنك يا نوارة رضيتي بالظلم

و عرصتي ( لا مؤاخذة ) علي البطرك شنودة

في موضوع كاميليا و علي التطرف الأرثوذكسي بتاع ماسبيرو

يا نوارة دي آخرة الطرمخة

يا نوارة الناس بتجتمع علي العدل

مش مطلوب منك غير كلمة

الحق اللي بتقوليها

و هي سر محبة الناس ليكي

و دخولهم المدونة

بس تثبتي عليها

مش تغيريها

نوارة قولي الحق

نوارة العدل هو سر الحب

و الأجتماع و الوحدة


النزول مش حل

الحل في اتخاذ العدل مبدأ اساسي

ثم الأتفاق علي مبادئ لا تخالف العدل

الضرائب التصاعدية ظلم و لكن سياسة

ضرائب عادلة كنسبة ثابتة من دخل كل فرد يحددها كل فرد بنفسه و تتابعه الجهة المختصة للتحقق من صحة الأقرار و العقوبة مشاطرة المال يعني يتاخد 50% من فلوسه كذا و يتم الغاء كافة الضرائب و الرسوم الأخري و التمغات

الغاء سياسة الأقتراض الخارجي الا بضمان المقترض الشخصي أياً كان شخصه رئيس جمهورية رئيس وزارة
مش كل مرة ييجي واحد يستلف فلوس و يسرقها و الناس تدفع ثم سياسة الأقتراض شروطها دايماً مجحفة و بسببها كان الأحتلال الأنجليزي و الذل الأمريكاني

المساواة في سنين التجنيد الأجباري مش واحد سنة و واحد ثلاث سنين و واحد أعفاء و لم يصبه الدور

الحرية في العمل يعني اللي عايز يشتغل دكتور و لا مهندس و لا زي ما يعجبه يدخل امتحان لمزاولة المهنة و الممارس مسئول جنائياً عن أفعاله
و الناس حرة في اختيار الناجح في مهنته

يجب أن يكسر الأحتكار الجامعي لممارسة المهن مما يقلل مصروفات الدولة علي تعليم غير عملي بل أكاديمي بحت و يكسر الأصنام الأحتكارية
المسماة بأساتذة الجامعات

الحرية في التعليم من حق كل فرد أن يتعلم ما شاء وقتما يشاء و كيفما يشاء
و علي يد من يشاء

لا يجب أن يفرض الأساتذة و المناهج و عدد سنوات الدراسة علي الطلاب

كما لا يجب أن يفرض الطلاب علي المدرسون

حرية التعليم تعني حق الجميع في انشاء مدارس غير مقيدة بأي قيود كمناهج و سنوات دراسة و طرق تدريس

حرية التعليم تعني أحترام التعليم المستمر المكتسب من الممارسة الفعلية دون تجاهل

حرية التعليم تعني الأشراف علي كل المدارس من قبل الدولة بغرض تقييمها
في نشرة دورية سنوية أو شهرية لترشد ولاة الأمور و الطلاب إلي أفضل السبل للتعليم

و عموماً

الحل في تأجيل المحاكمات لحين تطهير القضاء من

القوانين الفاسدة و القضاة المرتشين

فاهمين و لا مش فاهمين

و لا ألف مليونية

و لا مليون مظاهرة هتحل حاجة

يا معشر الأغبياء هههههههههههه

تستاهلوا كل اللي يجرالكم أنتم و نوارة الغبية

سوري يا نوارة بس اعمل ايه طيب

و الله العظيم ما ينفع نتوضي بميه وسخة

أنتم مش عايزين تفهموا ليه

أيه الغباوة دي

ثم الجيش ذنبه ايه

قوانين فاسدة و 300 قاضي مرتشي

افهموا بقي مال الجيش و مالكم

ساعي الخير said...

ايه بس اللي جرالكم

ساعي الخير said...

معاها حق OM الكاتبة

" و بعدين دة انتى إللى بتطالبى إننا ما نتفرقش، يعنى لما تلاقى الأغلبية "المحترمة و الوطنية" معترضة على النزول يوم 27 مثلا يبقى ليه إنتوا تركبوا دماغكو و تنشقوا عنهم و يبقى هما إللى اسمهم بينشقوا عنكم؟؟
"
بس ده مش معناه رفض النزول كل

واحد حر

بس و أيمانات المسلمين

ما تفلحوا أن ما قلتوا كلمة الحق

و نصرتوا العدل

و مبادئ العدل

و كمان الولية الضعيفة اللي بتحب لها واحد

زي ما لقحتي عليها تخرج

من سجن محاكم التفتيش

الفلول يعني الظلم

و الحلول في رفض الظلم

بس نقول كلمة الحق

صعبة دي يا نوارة

معلش الدوا مر أنا عارف

و أبوكي كمان عارف

مر الكلام

زي الحسام

يقطع مكان ما يمر

نوارة

الوفا ع الحر

يا حرة يا بنت الحر

amr said...

انت بتضربى حشيش ماركة ايه
كل يوم تصحى من النوم وتعملى قايمة مطالب
المسلمانى المحترم قال ن هناك فى مصر ما يزايدون على الثورة ويتحدثون عن ثورة دائمة على نحو ما كان يقول جيفارا وتروتسكى.. وهؤلاء يقودون الثورة إلى الفوضى.. بدلاً من أن يقودوا الثورة إلى الدولة.
الجيش نقله اعمل بيعمل وبعد مايعمل نقول اصل نيته مش صافيه اصلة بيكدب علينا يقول فى خطر عالاقتصاد نقوول لأ ده بيخوفنا دماغنا يا حاجة الشعب يريد الهدوء مش كل واحد فينا ينفع يبقى مفكر ويقرر فى ناس بتشتغل فى البلد وانتى واللى زيك مش مدينهم فرصة الهدوء شوية حرام عليكى

bang887 said...

**************************
البرادعى والتهويل
**************************

البرادعى لشبكة سى ن ن :

" جميع أفراد الشعب يشعرون بالخوف والجميع يشترون الأسلحة للدفاع عن أنفسهم"

http://www.alwafd.org/index.php?option=com_content&view=article&id=47978#axzz1N5UUINl4


الجميع يشترون الأسلحة

له التهويل ده؟ !!!!! باستكمال الخبر نعرف ليه التهويل ده. باقى الخبر يقول:

" أعرب البرادعى عن قلقه الشديد إذا ما سيطر الإخوان على الوضع السياسى والبرلمانى فى مصر وإقامة القانون الإسلامى فى حال إجراء انتخابات برلمانية مبكرة جدا وعدم تأسيس الأحزاب الجديدة."

Amal said...

يا نوارة .. طول ما اللي عايزين و مصرين على مجلس رئاسي هما اللي في الصورة .. الناس مش هتتجاوب و لا تنزل

الناس لسان حالها .. نضغط على المجلس العسكري ايوة .. نواجهه و نغمر بخراب البلد .. لا .. لازم يعملوا مصيبة الاول .. يلغوا الانتخاباتيعلنوا انهم قاعدييييييييييين .. يعفوا عن مبارك .. كده يعني

الناس واعية اوي.. عايزة تعدي الانتخابات و يرجع الجيش مكانه الطبيعي ..

ربنا ييسر الخير

Amal said...

انا تاني .. استحملوني

يا ريت المطالب تبقى اوضح

مثلا.. محاكمة الفاسدين ... المجلس العسكري المفروض انه ميتدخلش في القضاء
يعني مطلبنا ..تطهير القضاء ؟
طيب نقترح أليات لده.. منسيبش الامور عايمة

كمان يا ريت منصرش ان يوم 27 لو فشل يبقى الثورة فشلت
الثورة هتفضل صاحية و ناجحة طول ما احنا مصحصحين و مش سايبين حد يفرض رؤيته علينا

يا رب اهدنا و هيئ لنا من امرنا رشدا و ول امورنا خيارنا

إنسان said...

بالعقل كده ، يوم 25 يناير راهنتوا على أن الجيش هيزيح مبارك و العادلي ، إنتوا مراهنين على مين عشان يزيح الجيش يوم 27 مايو؟؟؟؟ كل المجلس العسكري له نفس الفكر ، فما تتوقعوش أنه هتحصل ثورة داخل الجيش .... كويس قوي أن عز و العادلي طاروا ... حتى لو آل مبارك هيروحوا السعودية مش كارثة ... لما تكون فرقة مغلوبة بجون و بتهاجم عشان تتعادل بيدخل فيها تلاتة ... عصفور في اليد خير من عشرة فوق الشجرة ... لازم تعرفوا أنه الناس مقامات و العين عمرها ما تعلى على الحاجب ... لازم تتعلموا تقدير المواقف و الحساب و الموازين ... في ظل حالة سهولة إلقاء الاتهامات يمكن إطلاق أي اتهام على أي حد زي يوم تسعة أبريل ، أو اتخاذ اجراءات قاسية تحت شعار المصلحة العليا للوطن ، إنتوا ممكن فكرتكم تنجح بس في إيران لأن السلطة معارضة لأمريكا ، شوفوا البحرين فشلت ثورتها إزاي و اللي دبروها أخدوا إعدام

Anonymous said...

والله يا نواره كلامك معقول جدا مع اني كتير بختلف معاكي بس المشكله ان في ناس كتير فعلا مش فاهمين وفاكرين انكم (انا في الامارات) فرحانين بالنزول للتحرير وانكم هتبوظو البلد. اللي باطلبه منك ومن كل الاحرار اللي زيك انكم تبسطوا كلامكم وتبطلوا انفعال وانتم بتتكلموا مع الناس وربنا يوفق مصر والمصريين اللي زيك

Unknown said...

بيان رقم56 من مبارك رسميا
قلة مندسه
أجندات خراجيه
خراب البلد

Unknown said...

على فكرة البلد لو متغيرتش فعلا بعد يوم 27 وحسينا اننا عملنا ثورة واخدناحقنا من المخلوع وكلابه فعليه العوض ومنه العوض ....والواحد مش هيزعل على حاجة اسمها مصر بعد كده ....وتخرب ما تعمر وتولع ما تطفى لاننا ساعتها هنبقى نستاهل اللى هيحصلنا لاننا سبنا ثورتنا تتسرق منا....وربنا ينتقم من كل الكلاب والمنتفعين سواء كانوا على أرض الواقع أو الكترونيا على النت

نور الدين said...

لا تياْسي يا بنت نجم... اوعي تياْسي يا نوار اوعي ومتقلقيش يوم الجمعه حيبقي قوي ان شاء الله بس انتي لازم تطلبي من اصدقائك الاعلامييين للتحدث عن اليوم اكتر من كده ويوجهه الناس للمشاركه ....والقنوات كمان بالذات الجزيره وياريت بلاش شعار الثوره التانيه عشان في ناس كتير غيرت نظرتها من الثوره الاولي عشان مش فاهمه ايه اللي حصل هما حاسين انهم خسروا اشغالهم بس ميعرفوش ان الخير جي باْذن الله ...خليها جمعة تنفيذ مطالب الثوره وكمان كلمي القائمين علي صفحة خالد سعيد يشدوا الوتر شويه هما عارضين استفتاء يشاركوا ولا لا والمشكله ان نسبة الرفض والقبول متقاربه ودي مشكله لازم هما يوجهوا الناس علي الصفحه ويحسسوهم بالخطر من عدم المشاركه,...مش استفتاء احنا كده بنهزر ...وسبيها هلي الله...

lavender said...

اوحش حاجه انكم بتسموا 27 مايو "ثوره" و ده حيضيع قيمه الكلمه و يضيع حلاوه و عظمه ثوره 25 يناير

بهيج الشرير said...

والنبي ياأبلتي أنا عندي إقتراح! إيه رأييك قبل التخطيط ليوم ٢٧ مايو نخزن كميات كبيرة من البيتزا والريش والمخاصي للتضامن مع حبايبنا سائقي الدبابات والطفطف

mr_adham said...

الاخوان يدعون لقائمه موحده للقوي السياسيه باكلمها تتيح للضعفاء منهم الاشتراك في البرلمان فليه احنا كشباب منرشحش اسماء ونتعاون مع الاخوان بحيث يكون فيه ممثل لشباب الثورة في البرلمان

lo2lo2a said...

أتمنى إن كنتم على حق أن يقف الله معكم حتى وإن تخلى عنكم الكثير ممن لا تهمهم غير مصلحتهم

عايزة اقولك ان كلامك في الغالب بيقنعني

ومهما حصل يوم 27 خليكي متفائلة وإن شاء الله ربنا مش هيخذلك ومصر إن شاء الله هتقوم بالسلامة :)

Unknown said...

يا نواره البيج اللى انتى حاطه اللينك بتاعها دى مش بتاعت سلفيين اصلا و مفيش اى حد سلفى اعترض او ايد يوم 27 و لازم تتحرى الدقه فى كلامك علشان متعمليش فتنه و انتى مش واخده بالك و شكرااا

Early bird said...

الصفحه بتاعه مش نازليين يوم 27 الناس معلقه فيها وبيشتموهم فاكرينهم شباب الثوره وعلشان يستغلوا كراهيه الناس للسلفيين فيقولوا ان السلفيين مش نازليين فيقوم الشاب اللى مش سلفى ينزل بس نكايه فى السلفيين
الناس بجد جالها حول اقول ايه بس

وعلى فكره الاخوان لو منزلوش حيفقدوا تعاطف الناس وعلى فكره برضه لو الجيش عمل انتخابات نزيهم تظبيتهم مع الجيش _ده لو بيظبتوا اصلا _ مش حينفعهم بس برضه انا عازراهم لانى بصراحه لما لاقيت موضوع المجلس الرئاسى بين الطلبات يوم 20 مايو قلت لا ويارب محدش ينزل لان الناس اللى عايزه عايزاه علشان تاجل الانتخابات واللى هم خايفيين من اختيارات الشعب الجاهل اامى اللى بصراحه اكثر حيجيب اسلاميين يكتبوا الدستور واللى بصراحه اكثر هم عايزيين يشيلوا منه ما يدل على هويه الدوله المصريه كاسلامييه واللى بصراحه اكتر لو اتشالت الكلمه من الدستور واللى هى بالمناسبه لم تكن مفعله اصلا الا انها كانت حاميه ضد الخطوات التاليه من نزع الاسلام بالكليه من الحياه ونصبح لامؤخده زى تونس بورقيبه وتركيا اتاتورك اللى الحريات كلها محترمه فيها من حريه الزنا وحريه الخمور وحريه الزواج المدنى المتحرر من اى قيود دينيه الا الحريه فى لبس الحجاب او فى صلاه الفجر او الادان او حتى قراه القران يعنى محاربه الاسلام

وبعديين الهرس فى الاخوان شديد جدا والشتيمه بقله ادب بس لو كانوا بيشتغلوا علشان رضا الناس الناس عمرها ما حترضى لكن لو بيشتغلوا علشان رضا الله فهو الاولى وربنا يوفق الجميع لما يحب ويرضى

Early bird said...

الصفحه بتاعه مش نازليين يوم 27 الناس معلقه فيها وبيشتموهم فاكرينهم شباب الثوره وعلشان يستغلوا كراهيه الناس للسلفيين فيقولوا ان السلفيين مش نازليين فيقوم الشاب اللى مش سلفى ينزل بس نكايه فى السلفيين
الناس بجد جالها حول اقول ايه بس

وعلى فكره الاخوان لو منزلوش حيفقدوا تعاطف الناس وعلى فكره برضه لو الجيش عمل انتخابات نزيهم تظبيتهم مع الجيش _ده لو بيظبتوا اصلا _ مش حينفعهم بس برضه انا عازراهم لانى بصراحه لما لاقيت موضوع المجلس الرئاسى بين الطلبات يوم 20 مايو قلت لا ويارب محدش ينزل لان الناس اللى عايزه عايزاه علشان تاجل الانتخابات واللى هم خايفيين من اختيارات الشعب الجاهل اامى اللى بصراحه اكثر حيجيب اسلاميين يكتبوا الدستور واللى بصراحه اكثر هم عايزيين يشيلوا منه ما يدل على هويه الدوله المصريه كاسلامييه واللى بصراحه اكتر لو اتشالت الكلمه من الدستور واللى هى بالمناسبه لم تكن مفعله اصلا الا انها كانت حاميه ضد الخطوات التاليه من نزع الاسلام بالكليه من الحياه ونصبح لامؤخده زى تونس بورقيبه وتركيا اتاتورك اللى الحريات كلها محترمه فيها من حريه الزنا وحريه الخمور وحريه الزواج المدنى المتحرر من اى قيود دينيه الا الحريه فى لبس الحجاب او فى صلاه الفجر او الادان او حتى قراه القران يعنى محاربه الاسلام

وبعديين الهرس فى الاخوان شديد جدا والشتيمه بقله ادب بس لو كانوا بيشتغلوا علشان رضا الناس الناس عمرها ما حترضى لكن لو بيشتغلوا علشان رضا الله فهو الاولى وربنا يوفق الجميع لما يحب ويرضى

محمد نبيل said...

يا أستاذ "ساعى الخير" انت كاتب حاجات عجيبة جدا مافيش دولة عملتها قبل كدة. يعنى انت عايز الناس تشتغل دكاترة ومهندسين من غير مايدرسوا طب وهندسة ؟! وبعدين أنهى امتحان دة اللى تخشه ويبقى بديل 7 سنين طب بامتحانتها ؟!! طيب ترضى انت واحد كل مؤهلاته انه دخل امتحان زى دة يعملك عملية ؟ لو انت ترضى أنا مرضاش وماافتكرش حد تانى يرضى.

gogo said...

نواره عايزةاقولك العدد مش هيبقى كبير يوم 27 برده لسببين : الاول الاسم ثورة غضب تانيه , كان غلط كان مفروض عادى دعوه لمليونيه علشان كذا لكن ثورة تانيه خلى ناس كتير تقول ده هبل وهنعمل ثورة تانيه ليه وهانعملها ضد مين وهو احنا لسه خلصنا الاولانيه علشان نعمل تانيه... تانى حاجه اللى برده مصممين ان الطلب الاول مجلس رئاسى انا قاعده انشرها وابعت للناس اقولهم انزلوا لقيت حد بعتلى يقولى ليه عايزين مجلس رئاسى ومين اللى هيختاره وهيقعد اد ايه .. قولتله لأ احنا مش بنطلب مجلس رئاسى مدنى لقيت ورونى الايفينتات اللى كلها الطلب الاول مجلس مدنى ......... مش مشكله هما صحيح بتوع مبارك واسفين ياريس ظاهرين اوى اليومين دول بس مش معنى كده ان الدنيا باظت .. انتى بس بطلى الهيستريا اللى انتى فيها دى انتى من ايام الثورة كنتى تتكلمى ف الجزيرة ترعبينى واحس ان اللى ف الميدان كلهم هيموتوا النهارده وبعدها اخويا يتكلم ويطمنا اقوله فى ايه يقول مافيش حاجه امال نواره عماله تصوت ليه .. يابنتى فكك منها .. انتى بتتهزى بسرعه لازم تبطلى ترعبينا كل شويه ان شاء الله ربنا هايكملها ع خير ........ الاستاذ المتفائل شكرا علشان رديت ع اللى جننتنى وقلت اللى كنت هاقوله .......... الاستاذ اللى بيتكلم على الرساله 56 من المجلس العسكرى هما قصدهم بيها عمر عفيفى ولا حضرتك شايف انه مايستهلش الاوصاف دى

Early bird said...

واضح من التعليقات انك موحده الشعب ناس فاكرك عميله الجيش وناس فاكراكى بتهيجى ضد الجيش وناس بتتعامل معاكى على انك مهيسه وغاويه تتظاهرى وبس وناس بتتعامل معاكى على انك ضد الاخوان والسلف
بس احلى واحد فيهم بتاع جرابيع التحرير ده عاجبنى قوى

mr_adham said...

دي بعد الثورة مش قبل
http://youtu.be/-x1hFKvmv6c

bang887 said...

استعنا على الشقا بالله : هه .. يالاه


رصد | مصر | اللواء الرويني لعمرو أديب: برنامج القاهرة اليوم البرنامج الوحيد اللي يهمه مصر و غير مسييس

Leonardo said...

اتفرقنا ومابقاش فيه قدرة على الحشد ؟؟؟؟
وهو إنتى ماساهمتيش فى كده يانواره ؟
ولسه بتساهمى بإنك تغمضى عينك عن مين اللى بيحاربنا من ساعة ماحسنى مشى ؟
مين اللى كل مايلاقى الناس بدأت تفوق يقوم رامى لنا عضمه نتشغل بيها وننساه ؟
ماهو ياتفوقى ياتبطلى نقوره ع الناس وشتيمه فيهم
بصى لنفسك الأول قبل ماتلومى على غيرك

Ta5arief said...

واحدة صاحبتى اخوان نازلة بس مش رسمى بيقولوا لسه مسمعوش حاجة عن الموضوع
انا شخصيا نازلة فى كتير اوى فاهمين ومش حاسين بالتغيير بس فقدوا الامل
انا شخصيا نازلة مع نفسى ومقتنعه بالمجلس الرئاسى بس مش نازلة علشان كدة لان دة هيدخلنا فى دوامة
الحل اننا نفرض إرادتنا عالمجلس العسكرى
لا للمحاكمات العسكرية
وبعدين عصام شرف فين ؟ وحشنى والله !!! !!

Ahmed said...

المجلس الرئاسى.. لا ولماذا

http://aabobakr.blogspot.com/2011/05/blog-post_22.html

samia said...

طب هو بالنسبة للضابط اللى فى الفيديو ده اللى بيقول انه صدر امر باعتقالهم واتهامهم بالخيانة العظمى وبالتالى اعدامهم وبالنسبة لضباط الجيش اللى اعتقلوا فعلا ايام الثورة ومحدش سمع عنهم حاجة وبالنسبة للثوار اللى فى السجون الحربية .. الناس دى كلها نساعدهم ازاى ونطلع المسجون منهم ازاى لو نزلنا يوم 27 مايو

Alok Ray said...

انا برده حاسس ان الى بيدعوا لثوره الغضب التانيه قصدهم فعلا ان محدش ينزل فى اليوم ده . انا معنديش مانع انزل وائتلاف شباب الثوره عامل استفتاء على المطالب وكده تبقى على الاقل المطالب بتعبر عن قطاع واسع حبه لان فعلا فى ناس كتير معارضه النزول علشان خايفيين ان ممكن حد يستغلها للضغط لتاجيل الانتخابات

Alok Ray said...

الاخوان بينزلوا فى اسكندريه بس مش عايزيين ينزلوا فى التحرير اعتقد بسبب موضوع تاجيل الانتخابات والمجلس الرئاسى . لو الناس بتاعت تاجيل الانتخابات دى هديت وبطلت الصوت العالى ده يبقى فى احتمال كبير ناس كتيير تنزل

مصري واعتز said...

يا نوارة في ناس كتير خايفة من يوم الجمعة للاسف وخايفين اليوم يكون دموي عشان الجيش مش هيسكت ان احنا نتظاهر ضد تواطؤ مع ال مبارك واعوانة وكل فكرهم ان احنا نازلين عشان نشيل المشير والمجلس العسكري وشيفين ان احنا اللي هنخرب البلد ونولعها وبيقولوا ان المظاهرة دي اللي عملها بتوع الثورة المضادة فا ياريت نشوف حل للموضوع دة

مصري واعتز said...

للاسف الشديد في ناس كتير ضد يوم الجمعة وبيقولوا اللي احنا اللي هنخرب البلد اقال يعني البلد انصلح حالها اوي اليومين اللي فاتوا وان المجلس العسكري كتر خير اهلة هو احنا كنا نحلم باليوم اللي يتنحي فيه مبارك وكمان مصرين علي محكمته دا انتو شباب بايظ مينفعش معاكم غير مبارك سيبوا البلد تمشي هتخربوا البلد عجبكم سوريا وليبيا عايزين تخربوها كتر خير الناس اللي ما رضيوش يضربوكم بالنار ايام الثورة للاسف الشديد هذا ما يقال والكثير من الناس علي اقتناع تام به من الواضح كدة والله اعلم ان احنا هنرجع تاني لنفس السلبية اللي كنا فيها علي مدار حكم مبارك وان اللي يمسكنا لازم نقولة امين ويبقي علية 100 خط احمر وممنوع الاقتراب لية او التصوير

AYMAN said...

ما نحتاجه حالياً هو وقفة مع النفس والتأمل فى حالنا وما أصاب اقتصادنا من انهيار.وده راي الاغابيه الديمقراطيه بتقول كده
ولا هوه كل ما تتمنيه يجب علينا تنفيذه. الخروج لمجرد العند مرفوض لاسمع ولاطلعه يامولاتنا

Unknown said...

نواره انتى خير مثل للفتاه المصريه

Omar said...

السلام عليكم
لا يا نوارة السلفيين مقالوش كده دي محاولة إظهار إن كل أطياف مصر ضد النزول يوم 27
صفحة الفيش بوك ديه لا تمثل أي تيار معروف دي صفحة زي صفحات fan pages
بيعملها أشخاص لا يمثلون إلا أنفسهم، مش عشان سموا الصفحة السلف الصالح يبقوا هم السلفية أو تيار منها معروف في مصر!! نستعين بالله وهننزل إن شاء الله وهتلاقي سلفية هناك أكيد

Unknown said...

السلام عليكم
لا يا نوارة السلفيين مقالوش كده دي محاولة إظهار إن كل أطياف مصر ضد النزول يوم 27
صفحة الفيش بوك ديه لا تمثل أي تيار معروف دي صفحة زي صفحات fan pages
بيعملها أشخاص لا يمثلون إلا أنفسهم، مش عشان سموا الصفحة السلف الصالح يبقوا هم السلفية أو تيار منها معروف في مصر!! نستعين بالله وهننزل إن شاء الله وهتلاقي سلفية هناك أكيد

ag said...

أنا خايفه قوي ... كل ما يجيلي أمل يحصل حاجه تخليني مش عارفه راسي من رجليا ... نفسي أنزل بس أنا من محافظة السويس و مش عارفه اذا كان فيه مظاهرة في السويس ... اذا كان فيه ربنا يقويني و أنزل

M.A.M.M.G said...

بص يا نونو يا أختي وبنتي . حقولك إيه بس ما أنتي أبوك حبيبي أول من علمني السياسية فالكيش عندي وصف غير أخت. انا فرحان قوي أن الكام عيل اللى قالو للناس وانا منهم لما دكتور يفتح بطنك تسكت خالص وما تتكلمش لحد ما يخلص شغله ومنهم شادي وهادي وغيره اللى عاوزين مجلس رئاس . قوليلهم وش كده على رأي عمهم أبراهيم حمرا حمرا حمرا. بصي يا أختي يا حبيبتي لما عيل أنا معلهمه يجي يتنطط عليا لازم ياخد علي قفا أمه ويفهم أنها حمرا ومحدش نازل 27 غير انتم بس يا حبيبتي عشان احنا مش عاوزين مبارك عاوزين تغيير قوانيين الأسرة المرأة وعاوزين القانون يطبق علي الكل ولو رئيس الجمهورية حسس على البت الخدامة يتسجن وعاوزين ان سايس الجراج ولو مؤاخذة لو انا شتمته تبقي فرصة يعمله قرشين مني بالقانون وانا اتبهدل واتعلم الأدب يعن ي من الآخر لا عم البرادعي ولا الكام الشاب الهايجين ولا شوية الجعانين اللى مش لاقيين ياكلوا أحنا بقي اللى عملنا الثورة الناس اللى مش بتتكلم وبتتفرج وليها دماغ ورأي لا بيغيره إعلام ولا زفت ولا حد أهبل يضحك على نفسه ويفتكر ان مصر وشعبها المطحون اللى بيشتغل لغاية 4 صباحا وبينام ساعتين ويقوم 6 الصبح يروح الشغل عشان يأكل العيلين ويدفع النفقة حد حيغير دماغه مصر لسه فيها رجاله ورجالتها ليها رأي واللى مش عاجبه الباب يفوت ست مائة جمل يا أختي يا صديقتي انتي كدجه معدتيش بتعبري عني رأي انا

M.A.M.M.G said...

بص يا نونو وسامحيني في الدلع أصلك أختي عشان أبوك انا بعتبره أبويا السياسي لما قرأت دوواينه كنت 15 سنة . ما علينا كلنا أخوات وبنحب بعض وانا بحبك . تخيلي كده لما الواد شادي ابن أختي يجي يقولي يا خالي ما تفتحش بقك اصلك عندك الدكتور والدكتور ده انا وانت تخرس لحد ما أنا أخلص . حرد عليه أقوله حمرا حمرا ده أنا أموت ولا أسمع منك الكلمتين دول يا أبو شخة ده انا اللى علمتك وعملتك. وعشان كده يا أختي ياروحي حتبقوا لوححدكوا يوم 27. احنا مش عاوزين مجلس رئاسي .عاوزين قوانين المرأة تتغير عشان أشوف ابني وما أشتغلش لغاية الساعة 4 الصبح ,اقوم الساعة 6 انزل الشغل عشان أدفع نفقة عيل مش بشوفه لأني لو مدفعتش يا حياتي حتحبس ومش بشوفه ولا بحضنه وشغال زي الطور في الساقية عشان أبعت لأمه فلوس كل سنة تزود النفقة وانا أكتر الشغل عشان أكفيه وأكفي أخواته. وكمان يا عيوني احنا شعب حتي لو مش زي حالاتي حتي صحابي اللى مش مطلقين ولا متجوزين من أساسة شغالين زي حالاتي عشان يجيب شقة من شقا السنين يتلم فيها مع واحدة ويارب تطلع بنت حلال لحسن تلحسه التراب وكله سايب تكاله علي اللى اسمه الكريم . انما يجي عيل أهبل زي ميدو مثلا أبن أخويا ويبخ فيا وانا بساعد ابوه وانا اللى عملتله أم الثورة وعاوز مجلس رئاسي من غير أذني ويقولي انزل معايا حمسك الحزام وأضربه هو واللى خلفوه اسمعي الناس يا نوني عشان انتي بقيت نخبوية ما تنسيش انتي منين خليك زي أبوك. انا زعلان منك صوتك بدا ميبقاش زي صوتي وصوت جيراني وأخواتي البنات. سلام يا غالية

أشرف عمار said...

بالنسبة للدعوة لثورة جديدة يوم27 مايو .. الدعوة لنزول الميدان من تانى لان الحال ماتغيرش .. هل فية مجال او فرصة للنجاح بشأنها ؟!
انا باعتقد ان فية ـ فى احسن الاحوال ـ فرصة بالفعل للنجاح .. لكن نجاح على شاكلة نجاح الثورة اللى فاتت بالضبط .. و دة فى حد ذاتة مش نجاح ـ بدليل اننا عاوزين نكرر الامر اهوة لان الثورة اللى فاتت ما عملتش حاجة .. .. ..
العنصر الحاسم هو استعداد الشعب للصمود و النضال .. دى المسألة اللى هتفرق و تحدد المسارات ( و دى المشكلة : هل الشعب لسة مستعد ينزل بالاعداد الغفيرة اللى نزلت ايام مبارك ، هل الصورة واضحة قدامة النهاردة و المطالب محددة زى ايام مبارك ) ..
طيب .. هنفترض ان الشعب مستعد و انة قاوم و صمد و هاجم .. و الجيش ضرب .. و الحكاية طالت و الضغوط زادت ..
ساعتها ممكن يحصل اية ؟!
ببساطة : نفس اللى حصل يوم 11 فبراير .. الامريكان هيتدخلوا ، و ممكن تتم تنحية المشير طنطاوى مثلا و هيطلع ظابط برضة يضرب تعظيم سلام لشهداء 27 مايو .. و ترجع ريما لعادتها القديمة .
الانتصار فى " ثورة " تانية جاية ، وارد بس على هذا الشكل .. لكن " هذا الشكل " مش كفاية ، و ادى احنا جربناة قبل كدة فعلا .
طيب اية العمل ..
الحل الوحيد ، والاجراء الثورى الوحيد ، ان يبقى فية هيكل سلطة بديل ، يبقى فية ازدواجية
سلطة.. .. ..

http://thearabrevolution.blogspot.com/p/blog-page_6707.html

ساعي الخير said...

الأستاذ محمد نبيل

الموضوع متعلق بس بالحرية

حرية التعليم

و حرية العمل في أطار المسئولية

الحرية في التعليم ده شئ طبيعي

كان موجود قبل نشأة النظم القانونية

اللي قيدت الحريات

القصد

اللي عايز من ده ياخد

و اللي مش عايز ما ياخدش

و لا مؤاخذة اللي بيشيل قربة مخرومة بتخر علي راسه

لكن حرية التعليم و حرية العمل

ده حقي و حقك

و انت حر اانازل عن حقك

لكن ده حقي و معرفش مين تاني

عايز حقه

أعتقد كل طلبة ثانوي

هههههههه

ربنا يصلح الحال

Unknown said...

تسلمي يا نواره وربنا يكرمك